“Ahe Nyɛ Kɛ Jara Ni Wa”
“Ahe nyɛ kɛ jara ni wa. No hewɔ lɛ nyɛwoa Nyɔŋmɔ hiɛ nyam yɛ nyɛgbɔmɔtso lɛ mli.—1 KORINTOBII 6:20, New World Translation.
1, 2. (a) Mɛni gbele ‘gbɛi ni jieɔ mɔ kɛjɛɔ gbele mli’ lɛ naa? (b) Mɛni ehe bahia ni afee koni eha Kristo afɔleshaa lɛ afee mla naa nɔ, taakɛ mɛni fee he mfoniri?
LALATSƐ lɛ kɛɛ: “Lɛ, Mawu lɛ, ji wɔ yiwalaheremɔ Mawu, ni Nuŋtsɔ Yehowa lɛ ji mɔ ni jieɔ mɔ kɛjɛɔ gbele mli.” (Lala 68:21) Yesu Kristo afɔleshaa lɛ gbele nakai gbɛ lɛ. Shi dani afɔleshaa lɛ aaafee nɔ ni yeɔ emuu yɛ mla naa lɛ, esa akɛ Kristo apue yɛ Nyɔŋmɔ diɛŋtsɛ hiɛ.
2 Akɛ Kpatamɔ Gbi lɛ ni osɔfonukpa lɛ yaa He Krɔŋkrɔŋ Fe Fɛɛ lɛ fee enɛ he mfoniri. (3 Mose 16:12-15) Paulo ŋma akɛ: “Shi Kristo ni ba ebaye . . . osɔfonukpa lɛ, . . . jeee too kpakpoi loo tsinabii ala, shi moŋ lɛ diɛŋtsɛ ela lɛ ekɛbote he krɔŋkrɔŋ lɛ mli shikome nyɔŋlo, ekɛna naanɔ kpɔmɔ lɛ. Ejaakɛ jeee he krɔŋkrɔŋ ni akɛ niji fee, ni ji nii lɛ diɛŋtsɛ lɛ ahenɔ kɛkɛ lɛ mli Kristo yabote lɛ; shi moŋ ŋwɛi diɛŋtsɛ eyabote, koni agbɛnɛ eyapue yɛ Nyɔŋmɔ hiɛ eha wɔ.”—Hebribii 9:11, 12, 24.
Hewalɛ ni Lá Yɔɔ
3. (a) Te Yehowa jalɔi buɔ lá amɛhaa tɛŋŋ, ni mɛni hewɔ?(b) Mɛni tsɔɔ akɛ lá yɛ hewalɛ yɛ mla naa ni ekɛaakpata eha eshai?
3 Mɛni Kristo la lɛ tsũɔ yɛ wɔ yiwalaheremɔ mli? Kɛjɛ Noa gbii lɛ amli kɛbaa nɛɛ, anɔkwa jalɔi ebu la akɛ nɔ̃ krɔŋkrɔŋ. (1 Mose 9:4-6) La naa gbɛfaŋnɔ ko ni he hiaa yɛ wala shihilɛ mli, ejaakɛ Biblia lɛ kɛɔ akɛ “ejaakɛ heloo lɛ wala [loo susuma] yɛ ela lɛ mli.” (3 Mose 17:11) No hewɔ lɛ, Mose Mla lɛ bi ni kɛ akɛ kooloo ko miisha afɔle lɛ, afɔse ela lɛ ashwie Yehowa hiɛ. Yɛ bei komɛi amli lɛ akɛ la dikiɔ afɔleshaa latɛ lɛ koji lɛ hu. Eka shi faŋŋ akɛ afɔleshaa ko kpatamɔ hewalɛ lɛ yɛ ela lɛ mli. (3 Mose 8:15; 9:9) “Ni shwɛ fioo ni la aŋɔtsuuɔ nii fɛɛ he yɛ mla lɛ naa; ni kɛ ashwieee la shi lɛ, aŋɔfaaa.”—Hebribii 9:22.
4. (a) La kɛ nitsumɔ ni Nyɔŋmɔ tsi naa lɛ tsu mɛɛ yiŋtoo he nii? (b) Mɛni sa kadimɔ yɛ gbɛ ni atsɔ nɔ agbe Yesu lɛ he?
4 Belɛ ebɛ naakpɛɛ mɔ akɛ yɛ Mla lɛ shishi lɛ, akɛ gbele gbalaa mɔ toi yɛ la ni akɛtsuuu nii yɛ gbɛ ni ja nɔ lɛ hewɔ! (3 Mose 17:10) Wɔ fɛɛ wɔle akɛ kɛ aha nɔ ko fee nɔ ni anaaa, aloo atsi ekɛ nitsumɔ naa waa lɛ, ehaa ejara yaa hiɛ. Enɛ naa ni Yehowa tsi lɛ kwɛ koni akabu la akɛ nɔ ko kɛkɛ ni jara waaa, shi akɛ nɔ ko ni jara wa ni sɛɛnamɔ yɔɔ he. (Bɔfoi lɛ Asaji 15:29; Hebribii 10:29) Kristo la lɛ baatsu yiŋtoo ni awo nɔ nɛɛ he nii. Egbo hu yɛ gbɛ ni baaha afɔse ela ashwie shi lɛ nɔ pɛpɛɛpɛ. No hewɔ lɛ, eka shi faŋŋ akɛ jeee akɛ Kristo kɛ egbɔmɔtso akɛ adesa lɛ sha afɔle kɛkɛ shi efɔse esusuma eshwie, ekɛ ewala diɛŋtsɛ akɛ adesa ni yeɔ emuu lɛ sha afɔlei (Yesaia 53:12) Kristo elaajeee mla naa hegbɛ ni eyɔɔ kɛha nakai wala lɛ yɛ emuu ni eyeee hewɔ, no hewɔ lɛ ela ni efɔse eshwie shi lɛ jara wa waa ni abaanyɛ akɛya Nyɔŋmɔ hiɛ koni akɛkpata aha adesai ahe eshai.
5. (a) Mɛni Kristo ŋɔ kɛtee ŋwɛi lɛ, ni mɛni hewɔ? (b) Mɛɛ gbɛ nɔ eje kpo faŋŋ yɛ akɛ Nyɔŋmɔ kpɛlɛ Kristo afɔleshaa lɛ nɔ?
5 Kristo nyɛŋ ni ekɛ egbɔmɔtso lɛ mli la diɛŋtsɛ lɛ aya ŋwɛi. (1 Korintobii 15:50) Shi moŋ eŋɔ nɔ ni damɔ shi kɛha la lɛ: adesa wala ni yeɔ emuu ni ekɛsha afɔle lɛ jara yɛ mla naa lɛ. Ebaanyɛ ni ekɛ nakai wala lɛ, akɛ kpɔmɔ nɔ ni akɛtsake adesai ahe eshai lɛ aha yɛ Nyɔŋmɔ hiɛ diɛŋtsɛ agbɛnɛ. Bɔ ni Yehowa kpɛlɛ nakai afɔleshaa lɛ nɔ lɛ baje kpo faŋŋ yɛ Pentekoste afi 33 Ŋ.B., beni mumɔ krɔŋkrɔŋ lɛ ba kaselɔi 120 lɛ anɔ yɛ Yerusalem lɛ. (Bɔfoi lɛ Asaji 2:1-4) Taakɛ eji lɛ, adesa weku lɛ ebatsɔ Kristo nii kɛtsɔ kpɔmɔ loo hemɔ nɔ. (Galatabii 3:13; 4:5; 2 Petro 2:1) No hewɔ lɛ kpɔmɔ nɔ lɛ mli sɛɛnamɔi baanyɛ aho kɛya adesai aŋɔɔ agbɛnɛ.
Klɛŋklɛŋbii ni Na Kpɔmɔ lɛ He Sɛɛ
6. Mɛɛ gbɛjianɔ Nyɔŋmɔ eto koni akɛ Kristo kpɔmɔ nɔ lɛ mli sɛɛnamɔi lɛ atsu nii?
6 Shi enɛ etsɔɔɔ akɛ abaaha adesai aye emuu yɛ gbɔmɔtsoŋ amrɔ nɔŋŋ, ejaakɛ kɛ ayeee adesa esha bɔɔsu lɛ nɔ kunim lɛ, emuuyeli yɛ gbɔmɔtsoŋ nyɛŋ aba. (Romabii 7:18-24) Belɛ mɛɛ gbɛ nɔ ni yɛ mɛɛ be mli abaaye eshafeemɔ nɔ kunim? Klɛŋklɛŋ lɛ, Nyɔŋmɔ to gbɛjianɔ koni 144,000 kɛ Kristo Yesu aye nɔ yɛ ŋwɛi akɛ ‘osɔfoi kɛha wɔ-Nyɔŋmɔ lɛ kɛ maŋtsɛmɛi yɛ shikpɔŋ lɛ nɔ.’ (Kpojiemɔ 5:9, 10; 7:4; 14:1-3) Abaatsɔ amɛnɔ ni akɛ kpɔmɔ nɔ lɛ mli sɛɛnamɔi lɛ atsu adesai ahe nii fiofio kɛha afii akpe.—1 Korintobii 15:24-26; Kpojiemɔ 21:3, 4.
7. (a) Mɛni ji kpaŋmɔ hee lɛ, namɛi fata he feɔ enɛ lɛ, ni mɛɛ yiŋtoo he nii etsuɔ? (b) Mɛni hewɔ esa akɛ gbele aba dani kpaŋmɔ hee lɛ anyɛ aba lɛ, ni mɛɛ gbɛfaŋnɔ Kristo lá lɛ tsũɔ yɛ enɛ mli?
7 Yɛ enɛ hewɔ lɛ, maŋtsɛmɛi kɛ osɔfoi 144,000 lɛ ji “mɛi ni ahe kɛjɛ gbɔmɛi ateŋ.” (Kpojiemɔ 14:4) Atsɔɔ “kpaŋmɔ hee” lɛ nɔ afeɔ enɛ. Nɛkɛ kpaŋmɔ nɛɛ ji yeli-kɛ-fuamɔ ni ka Yehowa Nyɔŋmɔ kɛ Nyɔŋmɔ mumɔŋ Israel lɛ teŋ, koni emlibii lɛ asɔmɔ akɛ maŋtsɛmɛi kɛ osɔfoi. (Yeremia 31:31-34; Galatabii 6:16; Hebribii 8:6-13; 1 Petro 2:9) Ni kɛlɛ, te aaafee tɛŋŋ ni Nyɔŋmɔ kɛ gbɔmɔ ni yeee emuu lɛ teŋ kpaŋmɔ aaahi hu? Paulo tsɔɔ mli: “Ejaakɛ he ni awo shamaŋsheo [kpaŋmɔ yɛ Nyɔŋmɔ kɛ gbɔmɔ ni yeee emuu teŋ, yɛ lɛ, ehia akɛ mɔ ni wo lɛ agbo da, ejaakɛ shamaŋsheo [kpaŋmɔ] lɛ, ja agbo dani enaa hewalɛ, shi kɛ mɔ ni wo lɛ hiɛ ka lolo lɛ, ebɛ hewalɛ.”—Hebribii 9:16, 17.
8, 9. Kpɔmɔ nɔ lɛ kɔɔ kpaŋmɔ hee lɛ he yɛ mɛɛ gbɛ nɔ?
8 No hewɔ lɛ kpɔmɔ afɔleshaa lɛ ji kpaŋmɔ hee lɛ, ni Yesu ji Teŋdamɔlɔ lɛ shishitoo. Paulo ŋma akɛ: “Ejaakɛ Nyɔŋmɔ kome yɔɔ, kɛ Nyɔŋmɔ kɛ gbɔmɛi ateŋdamɔlɔ kome hu ni ji gbɔmɔ Kristo Yesu lɛ, mɔ ni ŋɔ ehe eha akɛ kpɔmɔ nɔ ni yeɔ egbɔ eha mɛi fɛɛ—enɛ ji nɔ ni abaaye he odase yɛ ebei ni sa mli lɛ.” (1 Timoteo 2:5, 6, NW) Nakai wiemɔi lɛ kɔɔ 144,000 lɛ ni akɛ amɛ fee kpaŋmɔ hee lɛ ahe titri.
9 Beni Nyɔŋmɔ kɛ heloo naa Israel fee kpaŋmɔ lɛ, eyeee emuu yɛ mla naa aahu kɛyashi be mli ni afɔse kooloo la ashwie shi yɛ afɔleshaa mli. (Hebribii 9:18-21) Nakai nɔŋŋ hu dani kpaŋmɔ hee lɛ aaatsu nii lɛ, esa akɛ Kristo afɔse “kpaŋmɔ lɛ la” lɛ ashwie shi da. (Mateo 26:28; Luka 22:20) Akɛni Kristo miisɔmɔ akɛ Osɔfonukpa kɛ “kpaŋmɔ hee mlidamɔlɔ” hewɔ lɛ, Nyɔŋmɔ kɛ Yesu la lɛ jara lɛ tsũɔ mɛi ni akɛ amɛ baa kpaŋmɔ hee lɛ mli lɛ ahe nii, ni abuɔ amɛ adesai jalɔi yɛ mla naa. (Hebribii 9:15; Romabii 3:24; 8:1, 2) Kɛkɛ lɛ Nyɔŋmɔ baanyɛ aŋɔ amɛ awo kpaŋmɔ hee lɛ mli koni amɛbatsɔmɔ ŋwɛi maŋtsɛmɛi kɛ osɔfoi! Akɛ amɛ Teŋdamɔlɔ kɛ Osɔfonukpa lɛ, Yesu yeɔ ebuaa amɛ koni amɛna shidaamɔ ni he tse yɛ Nyɔŋmɔ hia—Hebribii 2:16; 1 Yohane 2:1, 2.
Shikpɔŋ nɔ Nibii lɛ Anaabuamɔ
10, 11. (a) Kpɔmɔ nɔ lɛ mli kpãa kɛtekeɔ Kristofoi ni afɔ amɛ mu lɛ yɛ mɛɛ gbɛ nɔ? (b) Namɛi ji asafo babaoo lɛ, ni mɛɛ shidaamɔ amɛyɔɔ yɛ Nyɔŋmɔ hiɛ?
10 Ani Kristofoi ni afɔ amɛ mu lɛ pɛ baana heyeli, amɛhe eshai ni akɛaake amɛ lɛ kɛtsɔ kpɔmɔ nɔ lɛ nɔ? Dabi, Nyɔŋmɔ miikpata koni nibii krokomɛi fɛɛ anyɛ aba eŋɔɔ, kɛtsɔ toiŋjɔlɛ ni eeetsɔ la ni afɔse ashwie shi yɛ sɛŋmɔtso lɛ nɔ ekɛba lɛ nɔ, taakɛ Kolosebii 1:14, 20 tsɔɔ lɛ. Enɛ kɔɔ nibii ni yɔɔ ŋwɛi (144,000) lɛ kɛ agbɛnɛ nibii ni yɔɔ shikpɔŋ nɔ lɛ ahe. Sɛɛkpeebii lɛ ji mɛi ni baana wala yɛ shikpɔŋ nɔ, adesai ni baana wala ni yeɔ emuu yɛ Paradeiso yɛ shikpɔŋ nɔ. Kɛjɛ 1935 titri abɔ mɔdɛŋ koni abua mɛi ni tamɔ nɛkɛ lɛ anaa. Kpojiemɔ 7:9-17 tsɔɔ akɛ amɛji “asafo babaoo” ni amɛ yiwalaheremɔ jɛ Nyɔŋmɔ kɛ Toobi lɛ. Ehe miihia lolo ni amɛfo “amanehulu kpeteŋkpele lɛ,” ni ‘atsɔɔ amɛ gbɛ lolo kɛya wala nu bui ahe,’ ejaakɛ Kpojiemɔ 20:5 tsɔɔ akɛ mɛi ni tamɔ nɛkɛ lɛ baaba wala mli kwraa, ni amɛhiɛ adesa wala ni yeɔ emuu, yɛ Kristo Afii Akpe Nɔyeli lɛ naagbee. Kɛkɛ lɛ abaabu mɛi ni yeɔ naagbee kaa yɛ amɛ emuuyeli shihilɛ akɛ adesai lɛ mli lɛ mli omanye lɛ jalɔi kɛha naanɔ wala yɛ shikpɔŋ nɔ.—Kpojiemɔ 20:7, 8.
11 Kɛlɛ, kɛjɛ shishijee mli nɛɛ, asafo babaoo lɛ “efɔ amɛtadei lɛ ahe ni amɛha eyɛ futaa yɛ Toobi lɛ la lɛ mli.” (Kpojiemɔ 7:14) Kristo tsuuu nii akɛ kpaŋmɔ hee lɛ Teŋdamɔlɔ kɛhaaa amɛ, ni kɛlɛ amɛnaa kpaŋmɔ nɛɛ he sɛɛ kɛtsɔɔ Nyɔŋmɔ Maŋtsɛyeli lɛ nitsumɔ nɔ. Kristo tsuɔ amɛhe nii lolo, shi akɛ Osɔfonukpa ni Yehowa baanyɛ atsɔ enɔ ni ekɛ kpɔmɔ nɔ lɛ atsu amɛhe nii ni eefee nakai hu akɛni abuɔ amɛ akɛ jalɔi yɛ Nyɔŋmɔ shieŋtsɛmɛi ni amɛbatsɔmɔ bianɛ lɛ hewɔ. (Okɛto Yakobo 2:23 he.) Amɛbaaye “amehe kɛje fitemɔ nyɔŋyeli lɛ mli kɛya Nyɔŋmɔ bii lɛ anunyam heyeli lɛ mli” [yɛ naagbee kwraa] yɛ Afii Akpe lɛ mli.—Romabii 8:21.
12. Mɛni nɔ Nyɔŋmɔ damɔ ekɛ gbɔmɛi anɔkwafoi ye dani Kristofoi abe lɛ ba?
12 Yɛ amɛshidaamɔ yɛ Nyɔŋmɔ hiɛ lɛ he lɛ, ebaatamɔ akɛ asafo babaoo lɛ yɛ sɔrɔto fioo yɛ mɛi ni ja Nyɔŋmɔ kɛtsɔ Kristofoi abe lɛ hiɛ lɛ ahe. Shi Nyɔŋmɔ tsu sɛɛkpeebii lɛ ahe nii yɛ kpɔmɔ nɔ lɛ he gbɛjianɔtoo ni baaba yɛ wɔsɛɛ be mli lɛ hewɔ. (Romabii 3:25, 26) Amɛna amɛhe eshaifaa lɛ mli ŋɔɔmɔ yɛ be kuku ko mli kɛkɛ. (Lala 32:1, 2) Ni kooloi afɔlei lɛ aaajie amɛ kwraa kɛaajɛ “eshai ahe nilee” mli lɛ, nɔ ni ekɛba ji “kaimɔ [ni akɛ] ŋɔkaiɔ eshai.”—Hebribii 10:1-3.
13. Mɛɛ hegbɛi wɔyɔɔ ni fe Nyɔŋmɔ tsuji ni hi shi dani Kristofoi abe lɛ ba lɛ anɔ̃?
13 Eyɛ sɔrɔto yɛ anɔkwa Kristofoi ahe ŋmɛnɛ. Amɛdamɔɔ kpɔmɔ nɔ ni awo he nyɔmɔ momo lɛ nɔ amɛjaa! Amɛtsɔɔ amɛ Osɔfonukpa lɛ nɔ “amɛkɛ wiemɔ mli heyeli bɛŋkɛɔ duromɔ maŋtsɛsɛi lɛ.” (Hebribii 4:14-16, NW) Ni akpataa amɛkɛ Nyɔŋmɔ teŋ lɛ jeee nɔ ko ni hiɛ kaa nɔ kɛkɛ ni baa, shi moŋ eji nɔ ko diɛŋtsɛ ni yɔɔ ŋmɛnɛ! (2 Korintobii 5:20) Kɛ amɛtɔ lɛ, amɛnine baanyɛ ashɛ eshaifaa diɛŋtsɛ nɔ. (Efesobii 1:7) Amɛnaa henilee ni mli tse keŋkeŋ mli ŋɔɔmɔ. (Hebribii 9:9; 10:22; 1 Petro 3:21) Nɛkɛ jɔɔmɔi nɛɛ ji Nyɔŋmɔ bii lɛ anunyam heyeli ni Yehowa tsuji baana mli ŋɔɔmɔ yɛ wɔsɛɛ be mli lɛ ni amɛtsɔ hiɛ amɛkɛ-miisa amɛnaa.
Nyɔŋmɔ Nilee kɛ Suɔmɔ Mlikwɔlɛ
14, 15. Kpɔmɔ nɔ lɛ maa Yehowa nilee ni anyɛɛɛ shishi ana lɛ, kɛ agbɛnɛ ejalɛ kɛ suɔmɔ nɔ mi yɛ mɛɛ gbɛ nɔ?
14 Mɛɛ nikeenii ni yɔɔ naakpɛɛ ni jɛ Yehowa ŋɔɔ kpɔmɔ nɔ lɛ ji nɛkɛ! Etsɛɛɛ ni anuɔ shishi, ni kɛlɛ emli kwɔ bɔ ni eeeha mɔ ni le nii fe fɛɛ lɛ naa aaakpɛ ehe. Kpɔmɔ nɔ lɛ nitsumɔi amlitii lɛ ahiɛ pɛ kɛkɛ wɔna nɛɛ. Ni kɛlɛ, wɔkɛ bɔfo Paulo jajeɔ akɛ: “Oo bɔ ni Nyɔŋmɔ nifalɛ kɛ ŋaa kɛ nilee mli kwɔ ha nɛ! Ekojomɔi lɛ anyɛɛɛ shishi ana, ni egbɛi lɛ hu anyɛɛɛ sɛɛ mo aja!” (Romabii 11:33) Ajieɔ Yehowa nilee lɛ kpo yɛ bɔ ni enyɛ ekpɔ adesai ni ebu maŋtsɛ ni eji hu lɛ bem hewɔ. Yɛ kpɔmɔ nɔ lɛ hewɔ lɛ, “ajie Nyɔŋmɔ jalɛ lɛ kpo faŋŋ . . . Nyɔŋmɔ jie [Kristo] to akɛ kpatamɔ nɔ kɛtsɔ ela lɛ nɔ hemɔkɛyeli nɔ.”—Romabii 3:21-26.
15 Anyɛŋ awie ashi Nyɔŋmɔ yɛ eshai ni Nyɔŋmɔjalɔi ni tsɔ Kristofoi abe lɛ hiɛ lɛ fee yɛ tsutsu ni ekɛke amɛ lɛ hewɔ. Kɛfata he lɛ, anyɛŋ awie ashi Yehowa yɛ jalɔi ni afɔ amɛ mu lɛ ni eŋɔ amɛ akɛ ebii kɛ asafo babaoo lɛ ni abuɔ amɛ akɛ eshieŋtsɛmɛi lɛ hewɔ. (Romabii 8:33) Nyɔŋmɔ eye mla nɔ yɛ emuuyeli mli, aloo eja yɛ enifeemɔi amli, ni eha Satan amale wiemɔi akɛ Yehowa ji nɔyelɔ ni ejaaa lɛ hetoo, tsɛ enɛ ha elaaje nii babaoo! Ajie suɔmɔ ni pɛsɛmkunya bɛ mli ni Nyɔŋmɔ yɔɔ kɛha ebɔɔnii lɛ hu kpo ni sanebimɔ ko kwraa bɛ he.—Romabii 5:8-11.
16. (a) Yɛ mɛɛ gbɛ nɔ kpɔmɔ nɔ lɛ eha ana sane ni te shi yɛ emuuyeli mli ni Nyɔŋmɔ tsuji aaahiɛ lɛ he lɛ naa? (b) Kpɔmɔ nɔ lɛ kɛ nɔdaamɔ nɔ kɛha hemɔkɛyeli yɛ jalɛ jeŋ hee ko ni baa lɛ mli lɛ haa wɔ yɛ mɛɛ gbɛ nɔ?
16 Gbɛ ni atsɔ nɔ akɛ kpɔmɔ nɔ lɛ ha lɛ hu ha ana saji ni kɔɔ emuuyeli mli ni Nyɔŋmɔ tsuji aaahiɛ lɛ he lɛ naa. Toiboo ni Yesu fee lɛ pɛ tsu enɛ. (Abɛi 27:11; Romabii 5:18, 19) Shi okɛ Kristofoi 144,000 ni yɛ Satan shitee-kɛ-woo fɛɛ sɛɛ lɛ amɛyeɔ anɔkwa kɛyashiɔ gbele mli lɛ ashihilɛ gbɛ lɛ afata he! (Kpojiemɔ 2:10) Kpɔmɔ nɔ lɛ haa mɛnɛɛmɛi anine shɛɔ shihilɛ ni gbele bɛ mli—wala ni anyɛɛɛ akpata hiɛ nɔ! (1 Korintobii 15:53; Hebribii 7:16) Enɛ haa nɔ ni Satan kɛɔ akɛ anyɛɛɛ akɛ he afɔ Nyɔŋmɔ tsuji anɔ lɛ bafeɔ kwashiai asane! Kpɔmɔ nɔ lɛ hu kɛ shishitoo ni ma shi shiŋŋ kɛha hemɔkɛyeli yɛ Nyɔŋmɔ shiwooi amli lɛ eha wɔ. Wɔbaanyɛ wɔna bɔ ni ato yiwalaheremɔ ni ‘ato shishi yɛ mla naa’ kɛtsɔ kpɔmɔ afɔleshaa lɛ nɔ lɛ he gbɛjianɔ aha lɛ. (Hebribii 8:6) No hewɔ lɛ ama jalɛ jeŋ hee nɔ aduatsɔ!—Hebribii 6:16-19.
Nyɛkahea lɛ Yakatswaa
17. (a) Yɛ mɛɛ gbɛ nɔ mɛi komɛi tsɔɔ akɛ amɛhe kpɔmɔ nɔ lɛ yakatswaa aloo amɛŋmɛɛ yiŋtoo ni yɔɔ sɛɛ lɛ he? (b) Mɛni baakanya wɔ ni wɔhi shi yɛ jeŋba mli hetsemɔ mli?
17 Bɔni afee ni mɔ ko ana kpɔmɔ nɔ lɛ he sɛɛ lɛ, ehe baahia ni mɔ lɛ ana nilee, ena hemɔkɛyeli, ni ehi shi yɛ tɛi ni afolɔ ashwie shi yɛ Biblia mli lɛ anaa. (Yohane 3:16; 17:3) Shi kɛ akɛto he lɛ, mɛi fioo ko pɛ sumɔɔ ni amɛfee nakai. (Mateo 7:13, 14) Mɛi komɛi baanyɛ “ahe Nyɔŋmɔ duromɔ lɛ yakatswaa” yɛ anɔkwa Kristofoi ateŋ po. (2 Korintobii 6:1) Akɛ nɔkwɛmɔ nɔ lɛ, ashwie akpei abɔ kɛjɛ asafo lɛ mli yɛ bɔlɛnamɔ jeŋba gbonyo hewɔ. Mɛɛ hiɛgbejiasane nɛ, yɛ nɔ ni Yehowa kɛ Kristo efee kɛha wɔ lɛ fɛɛ sɛɛ! Ani esaaa akɛ kpɔmɔ nɔ lɛ he hiɛsɔɔ tsirɛɔ mɔ ko koni ekafee mɔ ni “ehiɛ ekpa ehe eshai ni efee sa lɛ ahetsuumɔ nɔ”? (2 Petro 1:9) No hewɔ lɛ Paulo kaiɔ Kristofoi yɛ gbɛ ni sa nɔ akɛ: “Ahe nyɛ kɛ jara ni wa. No hewɔ lɛ nyɛwoa Nyɔŋmɔ hiɛ nyam yɛ nyɛgbɔmɔtso kɛ nyɛmumɔ lɛ ni ji Nyɔŋmɔ nɔ lɛ mli.” (1 Korintobii 6:20) Enɛ ni wɔɔkai lɛ kɛ kanyamɔ ni hewalɛ yɔɔ mli haa wɔ koni wɔhi shi akɛ mɛi ni he tse yɛ jeŋba mli!—1 Petro 1:14-19.
18. Te aaafee tɛŋŋ ni Kristofonyo ni gbeeɔ eshafeemɔ ni hiɛdɔɔ yɔɔ mli lɛ mli kɛ ehe aaaha ni kpɔmɔ nɔ lɛ he aba sɛɛnamɔ aha lɛ?
18 Shi kɛji akɛ mɔ ko ebote eshafeemɔ ni hiɛdɔɔ yɔɔ mli lɛ mli momo hu? Esa akɛ eŋɔ eshaifaa hegbɛ ni kpɔmɔ nɔ lɛ kɛhaa lɛ, ni enine ashɛ yelikɛbuamɔ nɔ kɛjɛ nɔkwɛlɔi ni yɔɔ suɔmɔ lɛ adɛŋ. (Yakobo 5:14, 15) Kɛji akɛ kamɔ ni mli wa po he miihia lɛ, esaaa akɛ Kristofonyo ni etsake etsui lɛ nijiaŋ jeɔ wui yɛ tsɔsemɔ ni tamɔ nɛkɛ shishi. (Hebribii 12:5) Wɔyɛ Biblia mli nɔmimaa ni yɔɔ naakpɛɛ nɛɛ: “Kɛji wɔjaje wɔhe eshai lɛ, anɔkwafo kɛ jalɔ ji lɛ, koni ekɛ wɔhe eshai lɛ ake wɔ, ni etsumɔ wɔhe kɛjɛ nii ni ejaaa gbɛ fiaa mli.”—1 Yohane 1:9.
19. Mɛɛ jwɛŋmɔ Kristofonyo baanyɛ ana yɛ ejeeŋba gbonyo ko ni tee nɔ dani ebakase anɔkwale lɛ he?
19 Yɛ bei komɛi amli lɛ Kristofoi anijiaŋ jeɔ wui ni ehe ehiaaa nakai, yɛ amɛtsutsu jeŋba hewɔ. Nyɛminuu ko ni nijiaŋ eje wui ŋma akɛ: “Mikɛ miŋa na fɔmɔ nii ahe hela ni tamɔ babaso dani mibale anɔkwale lɛ. Wɔnuɔ he yɛ bei komɛi amli akɛ wɔhe tseee, tamɔ nɔ ni ‘wɔsaaa’ Yehowa gbɛjianɔtoo ni he tse lɛ.” Wɔkpɛlɛ nɔ po akɛ, yɛ be mli ni mɛi komɛi ebatsɔmɔ Kristofoi po sɛɛ lɛ, amɛbaana nɔ̃ ko yɛ amɛtsutsu tɔmɔi ahewɔ. (Galatabii 6:7) Kɛlɛ, ehe ehiaaa ni mɔ ko anu he akɛ ehe tseee yɛ Yehowa hiɛ kɛ etsake etsui. ‘Kristo la lɛ’ nyɛɔ ‘etsumɔɔ wɔhenilei ahe kɛjɛɔ nitsumɔi gbohii amli.’—Hebribii 9:14.
20. Te aaafee tɛŋŋ ni kpɔmɔ nɔ lɛ mli hemɔkeyeli aaaha Kristofonyo ko aye ehe kɛje tɔmɔ ni he ehiaaa lɛ mli?
20 Hɛɛ, kpɔmɔ nɔ lɛ mli hemɔkɛyeli baanyɛ aye abua ni ejie wɔ kɛjɛ fɔyeli he jatsui ni he ehiaaa lɛ shishi. Nyɛmiyoo fioo ko kpɛlɛ nɔ akɛ: “Miibɔ mɔdɛŋ kɛkɛ ni maye fɔmɔ nii ni akɛshwɛɔ ni he tseee lɛ nɔ kunim fe afii 11 nɛ. Be shɛ ni shwɛ sharao kulɛ mishi asafo lɛ, ejaakɛ miinu he akɛ Yehowa ekpɛlɛŋ gbɔmɔ ni he yɔɔ nyaŋemɔ waa nɛkɛ lɛ nɔ koni ebule esafo lɛ.” Shi esa akɛ wɔkai akɛ, Yehowa “hi ni eŋɔ-faa mra,” bei abɔ ni wɔkɛ anɔkwayeli bɔɔ mɔdɛŋ ni wɔwuu wɔshi nii ni ejaaa, ni wɔŋmɛɛɛ wɔhe wɔhaaa enɛ lɛ!—Lala 86:5.
21. Te esa akɛ kpɔmɔ nɔ lɛ asa bɔ ni wɔsusuɔ mɛi ni tɔ̃ɔ wɔnɔ lɛ he aha tɛŋŋ?
21 Esa akɛ kpɔmɔ nɔ lɛ hu ana hewalɛ yɛ bɔ ni wɔkɛ mɛi krokomɛi yeɔ haa lɛ nɔ. Akɛ nɔkwɛmɔ nɔ lɛ, te ofeɔ onii ohaa tɛŋŋ kɛ naanyo Kristofonyo ko tɔ̃ onɔ lɛ? Ani okpaa eshaifaa ni tamɔ Kristo nɔ lɛ mli ohaa lɛ? (Luka 17:3, 4) Ani ‘omusuŋ tsɔɔ bo yɛ mɛi ahe, ni okɛfaa mɛi krokomɛi’ “tamɔ bɔ nɔŋŋ ni Nyɔŋmɔ ŋɔfa nyɛ yɛ Kristo mli lɛ”? (Efesobii 4:32) Aloo obɛɔ mɔ owoɔ omli ni okɛ mlifu toɔ? Enɛ baatsɔɔ akɛ ohe kpɔmɔ nɔ lɛ yakatswaa.—Mateo 6:15.
22, 23. (a) Te esa akɛ kpɔmɔ nɔ lɛ asa otii ni wɔkɛmamɔ wɔhiɛ lɛ kɛ wɔshihilɛ gbɛi ahe aha tɛŋŋ? (b) Mɛɛ yiŋkpɛɛ esa akɛ Kristofoi fɛɛ afee yɛ kpɔmɔ nɔ lɛ he?
22 Yɛ naagbee lɛ, esa akɛ hiɛsɔɔ kɛha kpɔmɔ nɔ lɛ ana otii ni wɔkɛmamɔ wɔhiɛ kɛ wɔshihilɛ gbɛ lɛ nɔ hewalɛ yɛ gbɛ ni mli kwɔ waa nɔ. Paulo kɛɛ: “Jara ni wa akɛhe nyɛ; nyɛkatsɔmɔa gbɔmɛi atsuji.” (1 Korintobii 7:23) Ani shika-helɛtemɔ he hiamɔ nii—shia, nitsumɔ, niyenii, atadei—ka he amɛji oshihilɛ mli nibii ni ojwɛŋɔ he titri? Aloo ootao Maŋtsɛyeli lɛ klɛŋklɛŋ, okɛ hemɔkɛyeli miiwo Nyɔŋmɔ shiwoo akɛ ebaaha bo nɔ ni sa lɛ mli? (Mateo 6:25-33) Ani obaatsu nii dɛŋdɛŋ oha onitsumɔtsɛ lɛ shi otoŋ be ni fa ohaŋ teokrase nitsumɔi? Kaimɔ akɛ, Kristo “ŋɔ lɛ diɛŋtsɛ ehe eha yɛ wɔnajiaŋ, koni . . . etsuu wɔhe efee lɛ diɛŋtsɛ emaŋ krɔŋkrɔŋ ni hiɛ dɔɔ yɛ nitsumɔi kpakpai ahe.”—Tito 2:14; 2 Korintobii 5:15.
23 ‘Shidaa aha Nyɔŋmɔ kɛtsɔ Yesu Kristo nɔ’ yɛ enikeenii ni fe fɛɛ ni ji—kpɔmɔ nɔ, lɛ hewɔ! (Romabii 7:25) Eba akɛ wɔheŋ kpɔmɔ nɔ lɛ yakatswaa aloo ni wɔɔŋmɛɛ yiŋtoo ni yɔɔ sɛɛ lɛ he, shi moŋ wɔbaaŋmɛ gbɛ ni etsɔ hewalɛ ko diɛŋtsɛ yɛ wɔshihilɛi amli. Eba akɛ wɔɔwo Nyɔŋmɔ hiɛ nyam daa, yɛ susumɔ mli, yɛ wiemɔ mli, yɛ nifeemɔ mli, ni wɔkɛ shidaa akai akɛ ahe wɔ kɛ jara ni wa.
Sanebimɔi ni Akɛtiɔ Mli
◻ Mɛni hewɔ abuɔ la akɛ nɔ ko krɔŋkrɔŋ lɛ, mɛɛ gbɛ nɔ atsɔ akɛ Kristo la lɛ yaha Yehowa yɛ ŋwɛi?
◻ Mɛɛ gbɛfaŋnɔ Kristo la lɛ tsu yɛ kpaŋmɔ hee lɛ ni awo mli hewalɛ lɛ mli?
◻ Kpɔmɔ nɔ lɛ he baa sɛɛnamɔ kɛhaa mɛi ni afɔ amɛ mu kɛ asafo babaoo lɛ yɛ mɛɛ gbɛ nɔ?
◻ Te wɔɔfee tɛŋŋ wɔtsɔɔ akɛ wɔheko kpɔmɔ nɔ lɛ yakatswaa aloo wɔŋmɛko yiŋtoo ni yɔɔ sɛɛ lɛ he?
[Mfoniri ni yɔɔ baafa 16]
Kpatamɔ afɔleshaa ko hewalɛ lɛ yɛ elá Iɛ mli
[Mfoniri ni yɔɔ baafa 17]
Mɔ ni hiɛ sɔɔ Nyɔŋmɔ dɛŋ eshaifaa lɛ hu miisumɔ ni ekpã eshaifaa mli eha mɛi krokomɛi