Ani Okɛ Ohe Miitsɔɔ Mɛi Krokromɛi akɛ Mɔ ni Sa?

‘Jeee mihe sane ji nɔ ni mɛi krokomɛi baakɛɛ!’ Ekolɛ okɛɛ nɔ ko tamɔ nɛkɛ dã be ko, beni omli fu aloo onijiaŋ je wui. Shi kɛ nakai ekãa babaoo lɛ ba shi lɛ, ehaa osusuɔ sane lɛ he. Mɛni hewɔ? Ejaakɛ, yɛ anɔkwale mli lɛ, wɔteŋ mɛi pii susuɔ nɔ ni mɛi krokomɛi susuɔ yɛ wɔhe lɛ he.

LƐƐLƐŊ, esa akɛ wɔsusu bɔ ni mɛi krokomɛi nuɔ nii ahe amɛhaa lɛ he. Titri lɛ, ákɛ Kristofoi, Yehowa Nyɔŋmɔ sɔɔlɔi ni akpɛlɛ amɛ nɔ lɛ, esa akɛ wɔná bɔ ni mɛi krokomɛi susuɔ yɛ wɔhe lɛ he jwɛŋmɔ kpakpa. Ejaakɛ, wɔji ‘nikwɛmɔnii ha je lɛ.’ (1 Korintobii 4:9) Wɔnaa bɔfo Paulo ŋaawoo ni sa lɛ yɛ 2 Korintobii 6:3, 4 lɛ: “Ni asaŋ wɔtooo mɔ ko mɔ ko pampi yɛ nɔ ko nɔ ko mli, koni akagbe sɔɔmɔ lɛ he guɔ; shi moŋ, nɔ fɛɛ nɔ mli lɛ wɔkɛ wɔhe tsɔɔ akɛ Nyɔŋmɔ sɔɔlɔi.”

Kɛ akɛɛ wɔkɛ wɔhe atsɔɔ mɛi krokomɛi akɛ mɛi ni sa lɛ, te eshishi lɛ? Ani no tsɔɔ akɛ esa akɛ wɔwó wɔhe nɔ, aloo wɔgbala mɛi ajwɛŋmɔ kɛba wɔnɔ koni wɔkɛtsɔɔ nyɛmɔi ni wɔyɔɔ? Dabi. Shi moŋ ebiɔ ni akɛ wiemɔi ni yɔɔ 1 Petro 2:12 lɛ atsu nii: “Ni nyɛba nyɛjeŋ jogbaŋŋ yɛ jeŋmajiaŋbii lɛ ateŋ, koni . . . nyɛnitsumɔi kpakpai lɛ ni amɛnaa lɛ amɛkɛwo Nyɔŋmɔ hiɛ nyam.” Kristofoi kɛ amɛhe tsɔɔ akɛ amɛsa kɛtsɔɔ amɛjeŋba ni amɛkɛyeɔ odase lɛ nɔ! Yɛ naagbee lɛ, enɛ kɛ yijiemɔ bahaa Nyɔŋmɔ shi jeee wɔ. Ŋwanejee ko bɛ he akɛ wɔhe ni wɔkɛtsɔɔ mɛi krokomɛi akɛ wɔsa lɛ hu he baanyɛ aba sɛɛnamɔ kɛha wɔ diɛŋtsɛ. Nyɛhaa wɔkwɛa hei etɛ ni enɛ baanyɛ afee anɔkwale kɛha wɔ yɛ.

Ákɛ Mɔ ni Baanyɛ Ebatsɔ Gbalashihilɛ Mli Hefatalɔ

Ákɛ nɔkwɛmɔnɔ lɛ, nyɛhaa wɔsusua gbalashihilɛ sane lɛ he wɔkwɛa. Eji nikeenii ni jɛ Yehowa Nyɔŋmɔ ŋɔɔ, mɔ ni ji “weku fɛɛ weku ni yɔɔ ŋwɛi kɛ shikpɔŋ lɛ nɔ tsɛ lɛ.” (Efesobii 3:15, NW) Ekolɛ obaasumɔ ni obote gbalashihilɛ mli gbi ko. Kɛji nakai ni lɛ, mɛɛ gbɛ nɔ okɛ ohe tsɔɔ yɛ akɛ oji mɔ ni baanyɛ atsɔ gbalashihilɛ mli hefatalɔ kpakpa wɔsɛɛ? Hɛɛ, mɛɛ gbɛi kpakpa ofee oha ohe ákɛ Kristofonyo nuu aloo yoo oshijafonyo?

Yɛ shikpɔji komɛi anɔ lɛ, enɛ ji sane ko ni he hiaa wekui waa. Ákɛ nɔkwɛmɔnɔ lɛ, yɛ Ghana lɛ, kɛ mɛi enyɔ miitao ni amɛbote gbalashihilɛ mli lɛ, eji kusum nifeemɔ akɛ mɛi enyɔ ni baabote gbalashihilɛ mli wɔsɛɛ lɛ aha amɛfɔlɔi ale. No sɛɛ lɛ, amɛ hu amɛhaa weku lɛ mli bii krokomɛi leɔ. No sɛɛ lɛ, nuu lɛ weku lɛ yataoɔ ni ele gbɛi ni yoo lɛ efee eha ehe yɛ akutso lɛ mli. Kɛji akɛ fɔlɔi lɛ kpɛlɛ nɔ akɛ yoo lɛ sa lɛ, amɛyabɔɔ yoo lɛ wekumɛi amaniɛ ni kɔɔ amɛbinuu yiŋ ni ekpɛ akɛ ekɛ amɛbiyoo lɛ baabote gbalashihilɛ mli lɛ he. Kɛkɛ agbɛnɛ yoo lɛ wekumɛi yataoɔ gbɛi ni nuu lɛ efee dani amɛkpɛlɛɔ koni ekɛ lɛ abote gbalashihilɛ mli. Abuɔ abɛ ko yɛ Ghana akɛ: “Bi mɛi ni le lɛ jogbaŋŋ dani okɛ lɛ abote gbalashihilɛ mli.”

Ni te mɛi ni yɔɔ Anaigbɛ shikpɔji lɛ anɔ he ni aŋmɛɔ mɔ fɛɛ mɔ gbɛ ni ehalaa mɔ ni lɛ diɛŋtsɛ esumɔɔ ni ekɛ lɛ boteɔ gbalashihilɛ mli lɛ hu feɔ amɛnii amɛhaa tɛŋŋ? Yɛ jɛmɛ po lɛ, Kristofonyo nuu loo yoo ni eda yɛ mumɔŋ jɛɔ nilee mli ni eyataoɔ ni eleɔ wɔsɛɛ gbalashihilɛ mli hefatalɔ lɛ he saji kɛjɛɔ mɛi krokomɛi ni le lɛ jogbaŋŋ lɛ adɛŋ, mɛi komɛi tamɔ efɔlɔi aloo nanemɛi ni eda yɛ mumɔŋ. Taakɛ wolo ni ji Nɔ Diɛŋtsɛ ni Kɛ Weku Miishɛɛ Baa lɛ tsɔɔ lɛ, oblayoo baanyɛ ebi ehe akɛ: “Mɛɛ gbɛi nuu nɛɛ efee eha ehe? Namɛi ji enanemɛi? Ani ejieɔ henɔyeli kpo? Te ekɛ mɛi ni egbɔlɔ lɛ yeɔ ehaa tɛŋŋ? Mɛɛ weku mli ejɛ? Te ekɛ amɛ yeɔ ehaa tɛŋŋ? Mɛni ji esu yɛ shika he? Ani ekɛ dãa tsuɔ nii yɛ gbɛ ni ejaaa nɔ? Ani eji mɔ ko ni mli fuɔ mra, ni efeɔ enii kɛ yiwalɛ? Mɛɛ asafoŋ gbɛnaa nii jwere enɔ, ni te etsuɔ he nii ehaa tɛŋŋ? Ani manyɛ majie bulɛ ni mli kwɔ kpo matsɔɔ lɛ?”—3 Mose 19:32; Abɛi 22:29; 31:23; Efesobii 5:3-5, 33; 1 Timoteo 5:8; 6:10; Tito 2:6, 7.”a

Nakai nɔŋŋ nuu ko hu baasumɔ ni ele Kristofonyo yoo ni etaoɔ ni ekɛbote gbalashihilɛ mli lɛ he saji. Taakɛ Biblia lɛ tsɔɔ lɛ, Boaz fee nɔ ko tamɔ nakai yɛ Rut ni sɛɛ mli lɛ ekɛ lɛ bote gbalashihilɛ mli lɛ gbɛfaŋ. Beni Rut bi lɛ akɛ: “Mɛɛ hewɔ ni mihiɛ eba nyam yɛ ohiɛ, ni otseɔ ohiɛ ohaa mi, mi mɔkpɔŋ nɛɛ?” Boaz to he eha lɛ akɛ: “Nii ni ofee . . . lɛ agba mi fɛɛ pɛpɛɛpɛ.” (Rut 2:10-12) Hɛɛ, jeee akɛ Boaz na akɛ Rut yeɔ anɔkwa, ni ejɔɔ ehe nɔ eha Yehowa, ni agbɛnɛ hu eji yoo ni tsuɔ nii waa pɛ kɛkɛ, shi enine shɛ saji kpakpai anɔ kɛjɛ mɛi krokomɛi adɛŋ.

No hewɔ lɛ, nakai nɔŋŋ ojeŋba baanyɛ atsɔɔ bɔ ni mɛi krokomɛi naa bo haa akɛ mɔ ni sa ni baanyɛ etsɔ gbalashihilɛ mli hefatalɔ kpakpa. No hewɔ lɛ, te okɛ ohe tsɔɔ akɛ osa yɛ mɛi krokomɛi ahiɛ ohaa tɛŋŋ?

Ákɛ Nitsulɔ

Nitsumɔhe lɛ hu ji he kroko hu ni jeŋba kpakpa mli ni ahiɛɔ lɛ he baanyɛ aba sɛɛnamɔ aha bo yɛ. Akaŋshii yɛ nitsumɔ mli lɛ mli baanyɛ awa. Bei pii lɛ ashwieɔ nitsulɔi ni ekpɛlɛɛɛ ni ayeɔ amɛnɔ, ni fɔɔ sɛɛkpee kɛ nitsumɔ baa, ni yeee anɔkwa lɛ kɛjɛɔ nitsumɔ mli. Nitsumɔhei komɛi hu haa nitsulɔi ni bɔɔ mɔdɛŋ lɛ ekomɛi yaa shia fioo bɔni afee ni amɛkɛba shika babaoo ni amɛfiteɔ lɛ shi. Kɛ mɛi ni bɛ nitsumɔ lɛ miitaoɔ nitsumɔ hee lɛ, amɛbaana akɛ nitsumɔhei lɛ sumɔɔ ni amɛle bɔ ni nitsulɔi lɛ tsuɔ nii amɛhaa, amɛjeŋba, kɛ niiashikpamɔ ni amɛyɔɔ, ni amɛleɔ enɛ kɛjɛɔ amɛ tsutsu nitsumɔtsɛmɛi lɛ adɛŋ. Kristofoi pii eye omanye yɛ amɛhe ni amɛkɛtsɔɔ amɛ nitsumɔtsɛmɛi lɛ akɛ amɛsa lɛ mli kɛtsɔ bulɛ ni amɛyɔɔ, amɛhesaamɔ kpakpa, bulɛ kpo ni amɛjieɔ amɛtsɔɔ mɛi krokomɛi, kɛ Kristofoi asubaŋ kpakpai ni nɔ bɛ ni amɛjieɔ lɛ kpo lɛ nɔ.

Anɔkwayeli ji su ko—ni nitsumɔtsɛmɛi pii sumɔɔ waa. Taakɛ bɔfo Paulo ji lɛ, wɔmiisumɔ ni “wɔba wɔjeŋ fɛfɛo yɛ nii fɛɛ mli.” (Hebribii 13:18) Abɔ nibii ni asharaa yɛ Ghana nitsumɔhe ko ni atsaa shikatsuru yɛ jɛmɛ lɛ he amaniɛ. Ashwie mɛi komɛi, shi ashi Odasefonyo ko ni ji nitsumɔ nɔkwɛlɔ ni yɔɔ he ni atsuuɔ shikatsuru lɛ he yɛ lɛ. Mɛni hewɔ? Nitsumɔ nɔkwɛlɔi onukpai lɛ ena yɛ afii ni eho lɛ mli akɛ eyeɔ anɔkwa. Ale bɔ ni etsuɔ nii waa ha lɛ, kɛ bulɛ ni eyɔɔ kɛha hegbɛ ni yeɔ enɔ lɛ hu jogbaŋŋ. Hɛɛ, ejeŋba kpakpa lɛ ha enine shɛ enitsumɔ lɛ nɔ!

Mɛɛ nibii krokomɛi hu Kristofonyo baanyɛ efee yɛ nitsumɔ mli koni ekɛ ehe atsɔɔ ni mɛi krokomɛi ana akɛ esa? Bɔɔ mɔdɛŋ ni ohe asa yɛ nitsumɔ fɛɛ nitsumɔ ni atuɔ awoɔ odɛŋ lɛ mli. (Abɛi 22:29) Tsu nii waa, ni otsu lɛ jogbaŋŋ. (Abɛi 10:4; 13:4) Okɛ bulɛ aha onitsumɔtsɛmɛi kɛ mɛi ni kwɛɔ onɔ lɛ. (Efesobii 6:5) Nitsumɔ mra baa, anɔkwayeli, nii ni atsuɔ lɛ jogbaŋŋ, kɛ nii ni atsuɔ waa lɛ ji sui ni nitsumɔtsɛmɛi sumɔɔ waa, ni nakai sui lɛ baanyɛ eye ebua bo koni oná nitsumɔ, kɛ nitsumɔi ahe sɛ̃ŋ po.

Asafo Mli Hegbɛi

Amrɔ nɛɛ lɛ, hii ni edara yɛ mumɔŋ ni baanyiɛ hiɛ yɛ Kristofoi asafo lɛ mli lɛ ahe miihia waa fe be fɛɛ ni eho. Yɛ mɛɛ yiŋtoo hewɔ? Yesaia gba akɛ: “Ha ní obuu lɛ mli alɛɛ, ní akpã oshihilɛhe lɛ he mamai lɛ amli.” (Yesaia 54:2) Yɛ gbalɛ nɛɛ mlibaa naa lɛ, Yehowa jeŋ muu fɛɛ asafo lɛ miiya nɔ eeda waa.

No hewɔ lɛ kɛ oji Kristofonyo nuu lɛ, mɛɛ gbɛ nɔ obaanyɛ okɛ ohe atsɔɔ yɛ akɛ oshɛ mɔ ni baanyɛ atsu gbɛnaanii ahe nii? Ákɛ nɔkwɛmɔnɔ lɛ, susumɔ oblanuu Timoteo he okwɛ. Luka bɔ amaniɛ akɛ, Timoteo ji mɔ ko ni “nyɛmimɛi lɛ ni yɔɔ Listra kɛ Ikoniom lɛ tãa ehe sane kpakpa.” Hɛɛ, yɛ ejeŋba kpakpa lɛ hewɔ lɛ, nɛkɛ oblanuu nɛɛ kɛ ehe etsɔɔ mɛi krokomɛi yɛ maji srɔtoi enyɔ mli akɛ eji mɔ ni sa. No hewɔ lɛ, Paulo fɔ̃ Timoteo nine koni ebafata ehe yɛ gbɛfaa sɔɔmɔ nitsumɔ lɛ mli.—Bɔfoi lɛ Asaji 16:1-4.

Ŋmɛnɛ, mɛɛ gbɛ nɔ nuu ko baanyɛ ekɛ ehe atsɔɔ yɛ akɛ ‘eshɛ kɛha nɔkwɛmɔ nitsumɔ’ yɛ gbɛ ni sa ni tsɔɔ Nyɔŋmɔ gbeyeishemɔ nɔ? Yɛ anɔkwale mli lɛ, jeee kɛtsɔ ehe tafaa nɔ, shi moŋ, kɛtsɔ mumɔŋ sui ni he hiaa kɛha gbɛnaa nii ni tamɔ nakai lɛ ahe nitsumɔ. (1 Timoteo 3:1-10, 12, 13; Tito 1:5-9) Ebaanyɛ etsɔɔ hu akɛ “eetao nitsumɔ kpakpa” kɛtsɔ ehe ni ekɛaawo shiɛmɔ nitsumɔ lɛ mli, kɛ kaselɔfeemɔ nitsumɔ lɛ mli ni ekɛ ehe aaawo jogbaŋŋ kɛmɔ shi lɛ nɔ. (Mateo 24:14; 28:19, 20) Mɛi ni kɛ amɛhe tsɔɔ akɛ Kristofoi hii ni tsuɔ amɛgbɛnaa nii ahe nii lɛ, yɛ amɛmumɔŋ nyɛmimɛi lɛ ahilɛ-kɛ-hamɔ he miishɛɛ. Amɛkɛ bɔfo Paulo ŋaawoo lɛ tsuɔ nii: “Mɛi krɔŋkrɔŋi lɛ ahĩa lɛ ahĩa nyɛ hu; nyɛbɔa gbɔfeemɔ he mɔdɛŋ.” (Romabii 12:13) Kɛtsɔ nakai feemɔ nɔ lɛ, Kristofonyo nuu baanyɛ ekɛ ehe atsɔɔ yɛ anɔkwale mli akɛ ‘ekɛ ehe miitsɔɔ akɛ eji Nyɔŋmɔ sɔɔlɔ’ lɛɛlɛŋ.

Be Fɛɛ Be

Wɔhe ni wɔkɛaatsɔɔ mɛi krokomɛi akɛ wɔsa lɛ etsɔɔɔ akɛ esa akɛ wɔje gbɛ wɔfee nii ‘kɛtao gbɔmɛi ahiɛnyam.’ (Efesobii 6:6) Kɛ wɔkɛ Yehowa Nyɔŋmɔ wɔ-Bɔlɔ lɛ mlai kɛ eshishitoo mlai lɛ tsuɔ nii lɛ, no baatsɔɔ akɛ, wɔkɛ wɔhe miitsɔɔ akɛ wɔsa yɛ ehiɛ. Kɛ oha omumɔŋ shidaamɔ tee hiɛ, ni oha wekukpaa ni kã okɛ Yehowa Nyɔŋmɔ teŋ lɛ fee gbagbalii lɛ, mɛi krokomɛi baana hiɛyaa ni ofee yɛ gbɛ ni okɛ oweku mli bii, nitsulɔi, kɛ nanemɛi Kristofoi yeɔ haa lɛ mli. Agbɛnɛ amɛbaana oshiŋŋfeemɔ kɛ pɛpɛɛpɛ ni oŋmɛɔ, bɔ ni osusuɔ nii ahe yɛ gbɛ ni ja nɔ, nyɛmɔ ni oyɔɔ ni okɛtsuɔ gbɛnaa nii ahe nii, kɛ heshibaa su ni oyɔɔ lɛ hu. Enɛ baaha amɛsumɔ osane, ni amɛkɛ bulɛ aha bo, kɛ nɔ ni fe fɛɛ lɛ, ebaaha ohiɛ aba nyam yɛ Yehowa Nyɔŋmɔ hiɛ ejaakɛ ojieɔ ohe kpo otsɔɔ mɛi krokomɛi akɛ mɔ ni sa!

[Shishigbɛ niŋmaa]

[Mfoniri ni yɔɔ baafa 19]

Fɔlɔi pii jɛɔ nilee mli amɛtaoɔ gbɛi ni mɔ ko ní miitao akɛ ekɛ amɛbinuu loo amɛbiyoo abote gbalashihilɛ mli lɛ yɔɔ

[Mfoniri ni yɔɔ baafa 20]

Nyɛminuu kɛ ehe tsɔɔ akɛ esa kɛha sɔɔmɔ hegbɛi ahe nitsumɔ kɛji akɛ esusuɔ mɛi krokomɛi ahe