Tito—“Naanyo Nitsulɔ Ji Lɛ Ha Nyɛ”

BEI komɛi lɛ naagbai teɔ shi yɛ klɛŋklɛŋ afii oha Kristofoi asafo lɛ mli. Esa akɛ atsu enɛɛmɛi ahe nii, ni enɛ biɔ ekãa kɛ toiboo. Nuu ko ni kpee kaai ni fa fe ekome ni tamɔ enɛ naa yɛ omanyeyeli mli ji Tito. Akɛni eji mɔ ni kɛ bɔfo Paulo etsu nii dã hewɔ lɛ, ekɛ mɔdɛŋbɔɔ yeɔ ebuaa mɛi krokomɛi koni amɛfee amɛnii taakɛ Yehowa sumɔɔ. No hewɔ ni Paulo kɛɛ Kristofoi ni yɔɔ Korinto lɛ akɛ, Tito ji ‘naanyo nitsulɔ ha amɛ.’—2 Korintobii 8:23.

Namɔ ji Tito? Mɛɛ gbɛhe he nii etsu yɛ naagbai ahe nitsumɔi amli? Ni mɛɛ gbɛ nɔ wɔbaaná ejeŋba he sɛɛ yɛ, kɛ wɔsusu he?

Ketiafoo He Sane Lɛ

Tito ji Helanyo ni afoko lɛ ketia. (Galatabii 2:3)a Akɛni Paulo tsɛɔ lɛ akɛ “ebi krɔŋŋ yɛ hemɔkɛyeli koome lɛ nɔŋŋ gbɛfaŋ” hewɔ lɛ, eeenyɛ efee akɛ Tito ji bɔfo lɛ mumɔŋ bii lɛ ateŋ mɔ kome. (Tito 1:4; okɛto 1 Timoteo 1:2 he.) Tito fata Paulo, Barnaba kɛ mɛi krokomɛi ni jɛ Antiokia, kɛ Syria lɛ ahe beni amɛtee Yerusalem yɛ aaafee afi 49 Ŋ.B. koni ayasusu ketiafoo he sane lɛ he lɛ.—Bɔfoi lɛ Asaji 15:1, 2; Galatabii 2:1.

Asusu akɛ, akɛni aawie Jeŋmajiaŋbii ni afoko amɛ ketia lɛ atsakemɔ he sane yɛ Yerusalem lɛ he hewɔ lɛ, akɛ Tito tee, bɔni afee ni etsɔɔ akɛ Yudafoi kɛ mɛi ni jeee Yudafoi baanyɛ aná Nyɔŋmɔ hiɛ duromɔ, kɛji akɛ afo amɛ ketia aloo afoko amɛ ketia. Yerusalem asafo lɛ mli bii komɛi ni tsutsu lɛ amɛji Farisifoi dani amɛbakpɛlɛ Kristojamɔ nɔ lɛ, taa sane naa akɛ, esa jogbaŋŋ akɛ afolɔ Jeŋmajiaŋbii ni atsake amɛ lɛ ketia, ni amɛye Mla lɛ nɔ, shi akɛ sane naataamɔ nɛɛ tsuuu nii. Tito kɛ Jeŋmajiaŋbii krokomɛi ní aaanyɛ amɛnɔ koni afo amɛ ketia lɛ baatsɔɔ akɛ akpɛlɛɛɛ nɔ akɛ yiwalaheremɔ damɔ Yehowa duromɔ ni esaaa wɔ kɛ hemɔkɛyeli yɛ Yesu Kristo mli lɛ nɔ, shi moŋ edamɔ Mla lɛ he nitsumɔi anɔ. No hu baatsɔɔ akɛ aakpoo anɔkwale ni eji akɛ Jeŋmajiaŋbii, aloo majianɔ bii lɛ anine eshɛ Nyɔŋmɔ mumɔ krɔŋkrɔŋ lɛ nɔ lɛ.—Bɔfoi lɛ Asaji 15:5-12.

Awo Amɛ Gbɛ Kɛtee Korinto

Beni atsu ketiafoo sane lɛ he nii agbe naa lɛ, akɛ hegbɛ ha Paulo kɛ Barnaba kwraa koni amɛshiɛ amɛtsɔɔ maji lɛ. Nakai beaŋ nɔŋŋ lɛ, amɛha ohiafoi lɛ ahi amɛjwɛŋmɔ mli. (Galatabii 2:9, 10) Yɛ anɔkwale mli lɛ, beni atsĩ Tito gbɛi tã ekoŋŋ yɛ saji ni jɛ mumɔ mli ni aŋmala ashwie shi lɛ mli aaafee afii ekpaa sɛɛ lɛ, no mli lɛ eyɛ Korinto akɛ Paulo tsulɔ ni toɔ onia ni atsuɔ kɛha mɛi krɔŋkrɔŋi lɛ ahe gbɛjianɔ. Yɛ be mli ni Tito tsuɔ nɛkɛ nitsumɔ nɛɛ lɛ, ena akɛ eyaje shihilɛ kroko ni mli wa waa mli.

Yɛ woji ni Paulo ŋmala Korintobii lɛ mli klɛŋklɛŋ nɔ lɛ mli lɛ, eŋma amɛ akɛ ‘amɛkɛ ajwamaŋbɔlɔi akabɔ.’ Ehe bahia ni ekɛɛ amɛ koni amɛjie ajwamaŋbɔlɔ ni tsakeee etsui lɛ kɛjɛ amɛteŋ. Hɛɛ, Paulo ŋma amɛ wolo ni mli wa, ni efee enɛ “kɛtsɔ yaafonui babaoo hu mli.” (1 Korintobii 5:9-13; 2 Korintobii 2:4) Yɛ nakai beaŋ nɔŋŋ lɛ, awo Tito gbɛ kɛtee Korinto koni eyaye ebua yɛ onia ni atsuɔ yɛ jɛmɛ kɛha Kristofoi ni yɔɔ Yudea ni ehia amɛ lɛ. Ekolɛ atsu lɛ hu koni eyakwɛ bɔ ni Korintobii lɛ hereɔ Paulo wolo ni eŋma amɛ lɛ nɔ amɛhaa.—2 Korintobii 8:1-6.

Te Korintobii lɛ baafee amɛnii yɛ Paulo ŋaawoo lɛ he amɛha tɛŋŋ? Ekolɛ bɔ ni Paulo feɔ yeyeeye akɛ eeele lɛ ha etsu Tito kɛjɛ Efeso kɛfo Aegean Ŋshɔ lɛ kɛtee Korinto, ni ekɛ wiemɔi fata he akɛ eku esɛɛ amrɔ nɔŋŋ ni ebabɔ lɛ amaniɛ. Kɛji akɛ agbe nitsumɔ ni tamɔ nɛkɛ naa dani ŋshɔ hiɛ kɔɔyɔɔ lɛ tsake kɛha fɛibe (yɛ ekolɛ November teŋgbɛ) lɛ, Tito baanyɛ ekɛ lɛlɛ aya Troia aloo efã gbɛ kakadaŋŋ kɛtsɔ shikpɔŋ, kɛtsɔ Hellespont. Ekolɛ Paulo yashɛ he ni amɛbaakpe yɛ yɛ Troia lɛ mra, akɛni basabasafeemɔ ni jwiɛtɛiŋaalɔi lɛ tee lɛ shi lɛ ha eshi Efeso oya fe bɔ ni ekpɛ eyiŋ akɛ ebaafee lɛ hewɔ. Beni Paulo kɛ yeyeeyefeemɔ emɛ yɛ Troia aahu sɛɛ lɛ, eyɔse akɛ Tito tsɔŋ ŋshɔ hiɛ kɛbaŋ. Enɛ hewɔ lɛ Paulo yi gbɛ kɛ ekãa, kɛ hiɛnɔkamɔ akɛ ekɛ lɛ baakpe yɛ gbɛ lɛ nɔ. Shii abɔ ni ena eshɛ Europa shikpɔŋ nɔ nɛɛ lɛ, Paulo baanyɛ atsɔ Via Egnatia lɛ, ni yɛ naagbee lɛ ekɛ Tito kpe yɛ Makedonia. Paulo tsui nyɔ emli waa, ni ena miishɛɛ waa diɛŋtsɛ, ejaakɛ amaniɛbɔɔ ni akɛjɛ Korinto lɛ hi. Asafo lɛ etsu bɔfo lɛ ŋaawoo lɛ he nii jogbaŋŋ.—2 Korintobii 2:12, 13; 7:5-7.

Eyɛ mli akɛ Paulo tsui ye yɛ bɔ ni amɛbaahere etsulɔ lɛ hiɛmɛɛ amɛha lɛ he moŋ, shi Nyɔŋmɔ ye ebua Tito ni etsu tsumɔ ni atsu lɛ lɛ he nii. Amɛkɛ “gbeyeishemɔ kɛ hekpokpomɔ” here Tito. (2 Korintobii 7:8-15) Kɛ wɔkɛ sanemlitsɔɔlɔ W. D. Thomas wiemɔi lɛ aaatsu nii lɛ: “Kɛ wɔfiteee hewalɛ ni yɔɔ susumɔ ni Paulo na akɛ abaakpoo ewiemɔ lɛ, wɔbaanyɛ wɔkɛɛ akɛ, [Tito] jɛ nilee mli ni ekwɛ ehe nɔ jogbaŋŋ ekpa Korintobii lɛ fai; ni ema nɔ mi eha amɛ akɛ, beni Paulo wieɔ lɛ, no mli lɛ eejwɛŋ amɛ mumɔŋ hilɛ-kɛ-hamɔ he.” Beni nifeemɔ lɛ yaa nɔ lɛ, no mli lɛ Tito ebana suɔmɔ eha Korintobii Kristofoi lɛ, ejaakɛ amɛfeɔ toiboo kpakpa ni amɛfeɔ tsakemɔi kpakpai. Amɛsu ni sa yijiemɔ lɛ ji nɔ ni wo lɛ hewalɛ.

Ni Tito nitsumɔ yɛ Korinto lɛ hu—ni ji onia ni atsu kɛha mɛi krɔŋkrɔŋi ni yɔɔ Yudea lɛ fɛɛ he gbɛjianɔtoo lɛ? Tito miitsu no hu he nii pɛpɛɛpɛ, taakɛ abaanyɛ ana yɛ amaniɛbɔɔ ni yɔɔ 2 Korintobii lɛ mli lɛ. Ekolɛ aŋma nakai wolo lɛ yɛ Makedonia yɛ afi 55 Ŋ.B. lɛ naagbee mli, etsɛɛɛ nɔŋŋ ni Tito kɛ Paulo kpe lɛ. Paulo ŋma akɛ, agbɛnɛ atsu Tito ni ha abɔi onia lɛ tsumɔ lɛ kɛ mɛi enyɔ ni atsĩii amɛgbɛi atã ni baaye ebua lɛ bɔni afee ni atsu he nii agbe naa lɛ kɛku sɛɛ kɛtee ekoŋŋ. Akɛni eyɛ Korintobii lɛ ahe miishɛɛ yɛ anɔkwale mli hewɔ lɛ, Tito miisumɔ waa akɛ eeeku esɛɛ. Ekolɛ beni Tito kuɔ esɛɛ kɛyaa Korinto ekoŋŋ lɛ, no mli lɛ ehiɛ wolo ni ji enyɔ ni ni jɛ mumɔŋ ni Paulo eŋma Korintobii lɛ.—2 Korintobii 8:6, 17, 18, 22.

Tito jeee gbɛjianɔtolɔ kpakpa kɛkɛ, shi moŋ eji nuu ko ni abaanyɛ atuu nitsumɔ ni ebiɔ ni atsu he nii jogbaŋŋ awo edɛŋ yɛ shihilɛ ni mli wawai amli hu. Eyɛ ekãa, eda yɛ mumɔŋ, ni efeɔ shiŋŋ. Eka shi faŋŋ akɛ Paulo susu akɛ Tito ji mɔ ni baanyɛ atsu naagbai ni “bɔfoi agboi” lɛ kɛbaa yɛ Korinto lɛ ahe nii. (2 Korintobii 11:5) Ama jwɛŋmɔ ni ayɔɔ yɛ Tito he nɛɛ nɔ mi yɛ he ni epue yɛ ekoŋŋ yɛ Ŋmalɛi lɛ amli lɛ, yɛ nitsumɔ kroko ni he hiaa lɛ mli.

Yɛ Kreta Ŋshɔkpɔ lɛ Nɔ

Eeenyɛ efee akɛ yɛ ekolɛ afi 61 kɛmiibote 64 Ŋ.B. lɛ, Paulo ŋma Tito, ni no mli lɛ eesɔmɔ yɛ Mediterranean ŋshɔkpɔ ni ji Kreta lɛ nɔ lɛ. Paulo shi lɛ yɛ jɛmɛ koni ‘eto nibii lɛ ahe gbɛjianɔ pɛpɛɛpɛ’ ni ‘ewowoo onukpai yɛ maŋ fɛɛ maŋ mli.’ Ale Kretabii akɛ ‘amalelɔi, kooloi fɔji, mũsũtsɛmɛi, kɛ hejɔ̃lɔi.’ No hewɔ lɛ ehe baahia ekoŋŋ ni Tito kɛ ekãa kɛ shiŋŋfeemɔ atsu nii yɛ Kreta hu. (Tito 1:5, 10-12) Eji nitsumɔ ni wa waa, ejaakɛ esa akɛ efee nɔ ni baatswa Kristojamɔ yɛ ŋshɔkpɔ nɛɛ nɔ ema shi wɔsɛɛ. Yɛ mumɔ kudɔmɔ naa lɛ Paulo ye ebua Tito ni etsɔɔ lɛ nɔ pɔtɛɛ ni ena yɛ mɛi ni baanyɛ atsɔmɔ nɔkwɛlɔi lɛ ahe. Akɛ nibii ni ataoɔ yɛ Kristofonyo onukpai adɛŋ lɛ ŋmɛɔ mɛi ni sa lɛ akwɛɔ lolo.

Ŋmalɛi lɛ etsɔɔɔ be mli ni Tito kɛshi Kreta. Ehi jɛmɛ be saŋŋ, ejaakɛ Paulo bi koni eha Zena kɛ Apolo hiamɔ nii, mɛi ni nyiɛ gbɛ kɛmiiya he ko, shi amɛbaamɛ fioo yɛ jɛmɛ yɛ be ni aleee mli lɛ. Shi Tito etsɛŋ tsɔ yɛ ŋshɔkpɔ lɛ nɔ. Paulo miito gbɛjianɔ ni etsu ekolɛ Artema aloo Tihiko kɛya jɛmɛ, koni agbɛnɛ Tito kɛ bɔfo lɛ akpe yɛ Nikopoli, ekolɛ maŋtiase ko ni ale waa yɛ Greece kooyi-anaigbɛ ní nakai atsɛɔ jɛmɛ lɛ.—Tito 3:12, 13.

Yɛ naagbee sane kuku ni kɔɔ Tito he, ni Biblia lɛ kɛha lɛ mli lɛ, wɔnaa wɔleɔ akɛ ekolɛ yɛ aaafee afi 65 Ŋ.B. lɛ Paulo tsu lɛ kɛha nitsumɔ kroko hu. Enɛ kɛ lɛ tee Dalmatia, ni ji kpokpaa ko ni yɔɔ Adria Ŋshɔ lɛ bokagbɛ yɛ ŋmɛnɛŋmɛnɛ Croatia lɛ. (2 Timoteo 4:10) Atsɔɔɔ wɔ nɔ ni Tito baayafee yɛ jɛmɛ, shi asusu akɛ atsu lɛ koni eyakwɛ asafoŋ nitsumɔi lɛ anɔ, ni ekɛ ehe awo maŋsɛɛ sanekpakpa shiɛmɔ nitsumɔ lɛ mli. Kɛ nakai ni lɛ, belɛ Tito miitsu nɔ ni tamɔ nɔ ni eyatsu yɛ Kreta lɛ nɔŋŋ.

Kwɛ bɔ ni wɔdaa shi akɛ wɔyɛ Kristofoi nɔkwɛlɔi ni edara yɛ mumɔŋ tamɔ Tito! Bɔ ni amɛnuɔ Ŋmalɛ mli shishitoo mlai ashishi jogbaŋŋ, kɛ ekãa ni amɛkɛtsuɔ he nii lɛ yeɔ ebuaa ni akɛbuɔ asafo lɛ mumɔŋ shidaamɔ he. Nyɛhaa wɔkasea amɛhemɔkɛyeli lɛ, ni wɔtsɔɔ akɛ wɔtamɔ Tito, kɛtsɔ nii ni wɔɔtsu bɔni afee ni wɔnanemɛi heyelilɔi lɛ aya amɛhiɛ yɛ mumɔŋ lɛ nɔ.—Hebribii 13:7.

[Shishigbɛ niŋmai]

[Mfoniri ni yɔɔ baafa 31]

Naanyo nitsulɔ ni yɔɔ ekãa ji Tito kɛha Kristofoi ni yɔɔ Korinto kɛ hei krokomɛi