Yehowa Sumɔɔ Tsuijurɔnaa Halɔi
“Mɔ fɛɛ mɔ aha bɔ ni ekpɛ mli momo yɛ etsui mli, ni ekajɛ ŋkɔmɔyeli aloo fimɔ mli, ejaakɛ tsuijurɔnaa halɔ Nyɔŋmɔ sumɔɔ.”—2 KORINTOBII 9:7.
1. Yɛ mɛɛ gbɛ nɔ Nyɔŋmɔ kɛ Kristo efee tsuijurɔnaa halɔi?
YEHOWA ji klɛŋklɛŋ tsuijurɔnaa halɔ. Ekɛ miishɛɛ ha e-Bi koome lɛ wala ni ekɛ lɛ tsu nii koni akɛ ŋwɛibɔfoi kɛ adesai aba shihilɛ mli. (Abɛi 8:30, 31; Kolosebii 1:13-17) Nyɔŋmɔ ha wɔ wala kɛ mumɔ kɛ nibii fɛɛ, kɛ nui ni jɛɔ ŋwɛi nɛɔ kɛ bei ni woɔ yibii ni kɛ miishɛɛ woɔ wɔtsuii amli obɔ. (Bɔfoi lɛ Asaji 14:17; 17:25) Yɛ anɔkwale mli lɛ, Nyɔŋmɔ kɛ e-Bi, Yesu Kristo, ji tsuijurɔnaa halɔi. Amɛkɛ miishɛɛ haa nii ni pɛsɛmkunya mumɔ bɛ mli. Yehowa sumɔ adesai aje lɛ aahu akɛ “ekɛ e-Bi koome lɛ ha, koni mɔ fɛɛ mɔ ni heɔ enɔ yeɔ lɛ hiɛ akakpata, shi moŋ ena naanɔ wala.” Ni Yesu ‘kɛ ewala ha akɛ kpɔmɔ nɔ ekɛtsake kɛha mɛi pii,’ ni ŋkɔmɔyeli loo mligbigbilimɔ bɛ mli.—Yohane 3:16; Mateo 20:28.
2. Taakɛ Paulo tsɔɔ lɛ, mɛɛ nihalɔ nɛkɛ Nyɔŋmɔ sumɔɔ?
2 No hewɔ lɛ, esa akɛ Nyɔŋmɔ kɛ Kristo tsuji afee tsuijurɔnaa loo miishɛɛ halɔi. Awo nihamɔ ni tamɔ nɛkɛ he hewalɛ yɛ bɔfo Paulo wolo ni ji enyɔ ni eŋma aaafee afi 55 Ŋ.B. eyaha Kristofoi ni yɔɔ Korinto lɛ mli. Yɛ be mli ni eka shi faŋŋ akɛ suɔmɔ mli ni ajɛɔ afeɔ nii kɛ oniatsumɔ yɛ teemɔŋ ni afee, titri lɛ koni akɛye abua Kristofoi ni ehia amɛ yɛ Yerusalem kɛ Yudea lɛ he ewieɔ lɛ, Paulo kɛɛ: “Mɔ fɛɛ mɔ aha bɔ ni ekpɛ mli momo yɛ etsui mli, ni ekajɛ ŋkɔmɔyeli aloo fimɔ mli, ejaakɛ tsuijurɔnaa halɔ Nyɔŋmɔ sumɔɔ.” (2 Korintobii 9:7; Romabii 15:26; 1 Korintobii 16: 1, 2; Galatabii 2:10) Te Nyɔŋmɔ webii efee amɛnii yɛ hegbɛi ni baa akɛ amɛaaha nii lɛ he amɛha tɛŋŋ? Ni mɛni wɔbaanyɛ wɔkase yɛ Paulo ŋaawoo ni kɔɔ nihamɔ he lɛ mli?
Tsuii ni Sumɔɔ Tsirɛɔ Mɛi
3. lsraelbii lɛ fi kpee buu kɛha Yehowa jamɔ lɛ maa sɛɛ yɛ mɛɛ gbɛ nɔ?
3 Tsuii ni sumɔɔ tsirɛɔ Nyɔŋmɔ webii koni amɛkɛ amɛhe kɛ nibii ni amɛyɔɔ lɛ aha yɛ ŋwɛi yiŋtoo sɛɛfimɔ mli. Akɛ nɔkwɛmɔ nɔ lɛ, lsraelbii ni hi shi yɛ Mose gbii lɛ amli lɛ kɛ miishɛɛ fi kpee buu kɛha Yehowa jamɔ lɛ maa lɛ sɛɛ. Yei komɛi atsuii tsirɛ amɛ koni amɛlo abotia he tsɔi, ni hii komɛi hu tsu nii akɛ ŋaa nitsulɔi. Gbɔmɛi lɛ kɛ shika, jwiɛtɛi, tsei, klala fɛfɛo kɛ nibii krokomɛi ha akɛ Yehowa “nɔwomɔ nikee nii” ni jɛ amɛsuɔmɔ mli. (2 Mose 35:4-35) Bɔ ni amɛjɛ amɛsuɔmɔ mli amɛke nii sɔŋŋ hewɔ lɛ, “nii ni amɛna lɛ fa aahu ha nitsumɔ lɛ fe bɔ ni amɛkɛaatsu, ni eteke nɔ.”—2 Mose 36:4-7.
4. Mɛɛ su mli David kɛ mɛi krokomɛi kɛ shika ha kɛha sɔlemɔtsu lɛ maa yɛ?
4 Afii ohai komɛi asɛɛ lɛ, Maŋtsɛ David kɛ nii babaoo ha kɛha Yehowa sɔlemɔtsu ni ebi Salomo baama lɛ. Akɛni ‘David yɛ Nyɔŋmɔ we lɛ he tsui hewɔ lɛ,’ ekɛ ‘lɛ diɛŋtsɛ eshika kɛ jwiɛtɛi’ ha. Lumɛi, asafoiatsɛmɛi kɛ mɛi krokomɛi ‘kɛ nikee nii ni amɛhiɛ baha Yehowa.’ Mɛni jɛ mli ba? “Ni maŋ lɛ nya yɛ ha ni amɛha yɛ tsuijurɔnaa lɛ hewɔ; ejaakɛ amɛha Yehowa kɛ amɛtsui muu lɛ fɛɛ yɛ suɔmɔ naa”! (1 Kronika 29:3-9) Amɛji tsuijurɔnaa halɔi.
5. lsraelbii lɛ fi anɔkwa jamɔ sɛɛ kɛtsɔ afii ohai abɔ lɛ amli yɛ mɛɛ gbɛ nɔ?
5 lsraelbii lɛ na hegbɛ yɛ afii ohai abɔ lɛ amli akɛ amɛaaye amɛbua kpeebuu lɛ, sɛɛ mli sɔlemɔtsui lɛ, kɛ osɔfoi lɛ kɛ Levibii ni sɔmɔɔ yɛ mli lɛ. Akɛ nɔkwɛmɔ nɔ lɛ, Yudafoi lɛ kpɛ amɛyiŋ yɛ Nehemia gbii lɛ amli akɛ amɛbaatsu onia ni amɛkɛha jamɔ krɔŋŋ aya nɔ, akɛni amɛle akɛ esaaa akɛ amɛkuɔ amɛhiɛ amɛshwieɔ Nyɔŋmɔ we lɛ nɔ lɛ hewɔ. (Nehemia 10:32-39) Nakai nɔŋŋ ŋmɛnɛ, Yehowa Odasefoi kɛ miishɛɛ jɛɔ amɛsuɔmɔ mli amɛtsuɔ onia koni akɛma ni akɛsaa kpee hei ni akɛfi anɔkwa jamɔ sɛɛ.
6. Okɛ Kristofoi atsuijurɔnaa hamɔ he nɔkwɛmɔ nii aha.
6 Mra be mli Kristofoi lɛ ji tsuijurɔnaa halɔi. Akɛ nɔkwɛmɔ nɔ lɛ, Gaio ‘miitsu nii yɛ anɔkwale mli,’ akɛni efeɔ mɛi ni faa gbɛ yɛ Maŋtsɛyeli lɛ he nibii ahewɔ lɛ gbɔ lɛ hewɔ, taakɛ bɔ ni Yehowa Odasefoi hu feɔ nɔkwɛlɔi gbɛfalɔi ni Watch Tower Bible and Tract Society lɛ tsuɔ amɛ amrɔ nɛɛ lɛ gbɔ lɛ. (3 Yohane 5-8) Ebiɔ shika fitemɔ dani nyɛmimɛi nɛɛ afa gbɛ kɛya asafoi lɛ amli ni afee amɛ gbɔ, shi kwɛ bɔ ni sɛɛnamɔ yɔɔ enɛ he yɛ mumɔŋ ha!—Romabii 1:11, 12.
7. Filipibii lɛ kɛ heloo gbɛfaŋ nibii ni amɛyɔɔ lɛ tsu nii yɛ mɛɛ gbɛ nɔ?
7 Asafoi muji kɛ amɛheloonaa nibii etsu nii koni amɛkɛha Maŋtsɛyeli lɛ he nibii aya hiɛ. Akɛ nɔkwɛmɔ nɔ lɛ, Paulo kɛɛ heyelilɔi ni yɔɔ Filipi lɛ akɛ: “Beni miyɔɔ Tesalonika lɛ hu nyɛmaje mi nii ni hiaa mi lɛ shikome kɛ shii enyɔ fɛɛ. Jeee akɛ nikee nii mitaoɔ; shi moŋ miitao yibii ni aaaha nyɛkɔntaa lɛ afa aha nyɛ.” (Filipibii 4:15-17) Filipibii lɛ ha yɛ miishɛɛ mli, shi mɛni kanyaa tsuijurɔnaa hamɔ ni tamɔ nɛkɛ?
Mɛni Kanyaa Tsuijurɔnaa Hamɔ?
8. Te ooofee tɛŋŋ otsɔɔ akɛ Nyɔŋmɔ mumɔ lɛ tsirɛɔ Nyɔŋmɔ webii lɛ koni amɛfee tsuijurɔnaa halɔi.
8 Yehowa mumɔ krɔŋkrɔŋ lɛ, aloo enifeemɔ hewalɛ lɛ, kanyaa ewebii ni amɛfee tsuijurɔnaa halɔi. Beni nibii ahe bahia Kristofoi ni yɔɔ Yudea lɛ, Nyɔŋmɔ mumɔ lɛ tsirɛ heyelilɔi krokomɛi ni amɛye amɛbua amɛ yɛ heloo naa. Bɔni afee ni ewo Kristofoi ni yɔɔ Korinto lɛ hewalɛ koni amɛbɔ mɔdɛŋ fɛɛ ni amɛaanyɛ yɛ nihamɔ nɛɛ mli lɛ, Paulo tsi Makedonia asafoi lɛ anɔkwɛmɔ nɔ lɛ ta. Eyɛ mli akɛ Makedonia heyelilɔi lɛ kɛ yiwaa kɛ ohia miikpe moŋ, shi amɛjie nyɛmimɛi asuɔmɔ kpo ni amɛha fe bɔ ni amɛaanyɛ po. Amɛkpa fai po akɛ aha amɛna nihamɔ ni tamɔ nɛkɛ mli gbɛfaŋnɔ! (2 Korintobii 8:1-5) Nyɔŋmɔ yiŋtoi ahe nitsumɔ damɔɔɔ onia ni niiatsɛmɛi aaatsu pɛ nɔ. (Yakobo 2:5) Etsuji ni amɛjɔɔ amɛhe nɔ ni bɛ nɔ ko tsɔ yɛ heloo gbɛfaŋ lɛ titri efee mɛi ni kɛ shika fiɔ Maŋtsɛyeli shiɛmɔ nitsumɔ lɛ sɛɛ. (Mateo 24:14) Ni kɛlɛ, amɛnaaa nɔ̃ yɛ nii ni amɛhaa nɛɛ hewɔ, ejaakɛ Nyɔŋmɔ yaa nɔ ekɛ ewebii ahiamɔ nii haa amɛ yɛ nɛkɛ nitsumɔ nɛɛ mli, ni hewalɛ ni yɔɔ enɔyaa kɛ yifalɛ sɛɛ ji emumɔ lɛ.
9. Hemɔkɛyeli, nilee, kɛ suɔmɔ kɛ tsuijurɔnaa hamɔ yɛ tsakpaa yɛ mɛɛ gbɛ nɔ?
9 Hemɔkɛyeli, nilee, kɛ suɔmɔ kanyaa miishɛɛ hamɔ. Paulo kɛɛ: “Shi moŋ taakɛ bɔ ni [Korintobii] nyɛtekeɔ nɔ yɛ nɔ fɛɛ nɔ mli, yɛ hemɔkɛyeli kɛ wiemɔ kɛ nilee kɛ mɔdɛŋbɔɔ fɛɛ kɛ suɔmɔ ni jɛ nyɛmli ni eyɔɔ wɔmli lɛ mli lɛ, nyɛkwɛa koni nɛkɛ duromɔ nɛɛ mli hu lɛ nyɛteke nɔ. Jeee kita naa mikɛɔ nɛkɛ, shi moŋ mɛi krokomɛi amɔdɛŋbɔɔ mikɛkaa nyɛ hu nyɛsuɔmɔ lɛ makwɛ akɛ eyɛ krɔŋŋ lo?” (2 Korintobii 8:7, 8) Ni aaatsu onia ko aha Yehowa yiŋtoi ahe nitsumɔ, titri lɛ yɛ be mli ni nihalɔ lɛ bɛ heloonaa nibii tsɔ̃ ko lɛ biɔ hemɔkɛyeli yɛ Nyɔŋmɔ gbɛjianɔtoo kɛha wɔsɛɛ lɛ mli. Kristofoi ni yɔɔ nilee babaoo lɛ miisumɔ ni amɛtsu Yehowa yiŋtoo he nii, ni mɛi ni yɔɔ suɔmɔ babaoo kɛha lɛ kɛ ewebii lɛ kɛ amɛnibii tsuɔ nii yɛ miishɛɛ mli koni amɛha eyiŋtoi ahe nitsumɔ aya hiɛ.
10. Mɛni hewɔ abaanyɛ akɛɛ akɛ Yesu nɔkwɛmɔ nɔ lɛ tsirɛɔ Kristofoi ni amɛha yɛ tsuijurɔnaa lɛ?
10 Yesu nɔkwɛmɔ nɔ lɛ tsirɛɔ Kristofoi ni amɛha yɛ tsuijurɔnaa. Yɛ be mli ni ewo Korintobii lɛ hewalɛ ni amɛha yɛ suɔmɔ naa lɛ sɛɛ lɛ, Paulo kɛɛ: “Ejaakɛ nyɛle wɔ Nuŋtsɔ Yesu Kristo duromɔ lɛ, akɛ lɛ ni ji niiatsɛ lɛ, etsɔ ohiafo yɛ nyɛhewɔ, koni nyɛtsɔ ehia lɛ nɔ nyɛtsɔmɔ niiatsɛmɛi.” (2 Korintobii 8:9) Akɛni eji niiatsɛ yɛ ŋwɛi fe Nyɔŋmɔ bii krokomɛi lɛ fɛɛ hewɔ lɛ, Yesu jie enɛɛmɛi fɛɛ kɛjɛ ehe ni ebatsɔ gbɔmɔ. (Filipibii 2:5-8) Akɛni ebatsɔ ohiafo yɛ gbɛ ni pɛsɛmkunya bɛ mli nɛɛ nɔ hewɔ lɛ, Yesu ye bua Yehowa gbɛi lɛ hetsemɔ ni ekɛ ewala fɔ shi akɛ kpɔmɔ afɔleshaa nɔ kɛha adesai ni baakpɛlɛ nɔ lɛ asɛɛnamɔ. Yɛ Yesu nɔkwɛmɔ nɔ lɛ kɛ gbeekpamɔ naa lɛ, ani esaaa akɛ wɔhaa nii yɛ tsuijurɔnaa ni wɔkɛye wɔbua mɛi krokomɛi ni eye ebua yɛ Yehowa gbɛi lɛ hetsemɔ mli?
11, 12. Gbɛjianɔtoo kpakpa baanyɛ aha wɔfee tsuijurɔnaa halɔi yɛ mɛɛ gbɛ nɔ?
11 Gbɛjianɔtoo kpakpa haa anyɛɔ ahaa yɛ tsuijurɔnaa. Paulo kɛɛ Korintobii lɛ akɛ: “Daa otsi mli klɛŋklɛŋ gbi lɛ nɔ lɛ, nyɛteŋ mɔ fɛɛ mɔ atia nɔ ko ato, yɛ bɔ ni enaa lɛ naa, koni mikaba dani atsu onia lɛ.” (1 Korintobii 16: 1, 2) Yɛ nakai teemɔŋ kɛ suɔmɔnaa gbɛ ni atsɔɔ nɔ afeɔ nii lɛ nɔŋŋ nɔ lɛ, mɛi ni sumɔɔ ni amɛtsu onia ni akɛye abua Maŋtsɛyeli nitsumɔ lɛ ŋmɛnɛ lɛ baafee jogbaŋŋ akɛ amɛkɛ shika ni baa amɛdɛŋ lɛ eko aaato aha nakai yiŋtoo lɛ. Yɛ gbɛjianɔtoo kpakpa nɛɛ hewɔ lɛ, Odasefoi aŋkroaŋkroi, wekui, kɛ asafoi baanyɛ atsu onia ni amɛkɛye amɛbua anɔkwa jamɔ nɔyaa.
12 Gbɛjianɔ ni ato koni akɛtsu onia lɛ sɛɛdii baaha wɔna miishɛɛ. Taakɛ Yesu kɛɛ lɛ, “nɔ hamɔ mli yɛ jɔɔmɔ [miishɛɛ] fe hemɔ.” (Bɔfoi lɛ Asaji 20:35) No hewɔ lɛ Korintobii lɛ baanyɛ aha amɛmiishɛɛ afa kɛtsɔ Paulo ŋaawoo akɛ amɛtsu amɛgbɛjianɔtoo ni eye afi akɛ amɛkɛ shika aaamaje kɛaaya Yerusalem lɛ he nii. Ekɛɛ: “Kɛ tsui yɛ he lɛ, esa hiɛ hu bɔ ni mɔ oyɔɔ, jeee bɔ ni obɛ.” Kɛ mɔ ko tsu onia yɛ bɔ ni eyɔɔ lɛ naa lɛ, esa akɛ akɛ hiɛsɔɔ babaoo aha enɛ. Kɛ wɔkɛ wɔhe fɔɔ Nyɔŋmɔ nɔ lɛ, ebaanyɛ ekɛ nibii ato najiaŋ, koni mɛi ni yɔɔ babaoo lɛ anine akpɔ, ni amɛkafite nii, koni ekafi mɛi ni yɔɔ bibioo lɛ, ni ekaba hewalɛ kɛ nyɛmɔ ni amɛyɔɔ ni amɛkɛaasɔmɔ lɛ lɛ shi.—2 Korintobii 8:10-15.
Nihamɔ He Gbɛjianɔtoo Kpakpa
13. Mɛni hewɔ Korintobii lɛ baanyɛ ana hekɛnɔfɔɔ yɛ onia ni atsu lɛ ni Paulo aaakwɛ nɔ jogbaŋŋ lɛ mli.
13 Eyɛ mli akɛ Paulo kwɛ oniatsumɔ gbɛjianɔtoo lɛ nɔ koni heyelilɔi ni ehia amɛ lɛ anyɛ ana heloo gbɛfaŋ nibii amli ŋɔɔmɔ koni amɛkɛ hewalɛ babaoo awo shiɛmɔ nitsumɔ lɛ mli moŋ, shi lɛ kɛ mɛi krokomɛi lɛ eko kɛ shika lɛ eko heee nɔ ko kɛhaaa amɛ diɛŋtsɛ amɛhe. (2 Korintobii 8:16-24; 12:17, 18) Paulo tsu nii koni ekɛhe nibii ni he hiaa lɛ lɛ fe ni ekɛ shika he jatsu aaatere asafo ko. (1 Korintobii 4:12; 2 Tesalonikabii 3:8) No hewɔ lɛ yɛ be mli ni Korintobii lɛ kɛ onia ni amɛtsu lɛ haa lɛ lɛ, belɛ amɛkɛmiiwo Nyɔŋmɔ tsulɔ ni tsuɔ nii waa ni anyɛɔ akɛ he fɔɔ enɔ lɛ dɛŋ.
14. Mɛɛ nɔ kpakpa ayoo yɛ onia ni Buu Mɔɔ Asafo lɛ kɛtsuɔ nii lɛ he?
14 Kɛjɛ be mli ni akɛ Watch Tower Bible and Tract Society lɛ wo mla shishi yɛ 1884 nɛɛ, mɛi ni tsuɔ onia lɛ ena odaseyeli ni tsɔɔ akɛ eji shikai fɛɛ ni akɛwoɔ edɛŋ koni akɛtsu Yehowa Maŋtsɛyeli lɛ he nii lɛ nɔkwɛlɔ anɔkwafo. Taakɛ emla lɛ tsɔɔ lɛ, Asafo lɛ bɔɔ mɔdɛŋ koni ekɛ gbɔmɛi lɛ fɛɛ ahiamɔ nii ni fe fɛɛ, mumɔŋ hiamɔ nii lɛ, aha amɛ. Afeɔ enɛ kɛtsɔɔ Biblia kasemɔ he woji kɛ tsɔsemɔ yɛ gbɛ ni aaatsɔ nɔ ana yiwalaheremɔ lɛ nɔ. Ŋmɛnɛ, Yehowa miiha mɛi ni tamɔ gwantɛŋi ni abuaa amɛnaa kɛbaa egbɛjianɔtoo ni mli lɛɛɔ lɛ mli lɛ miiya nɔ kɛ foi, ni ejɔɔmɔ ni yɔɔ shika ni akɛtsuɔ nii yɛ nilee mli yɛ Maŋtsɛyeli-shiɛmɔ nitsumɔ lɛ mli lɛ nɔ lɛ ji ŋwɛi nɔkpɛlɛmɔ he odaseyeli ni mli ka shi faŋŋ. (Yesaia 60:8, 22) Wɔyɛ hekɛnɔfɔɔ akɛ ebaaya nɔ etsirɛ tsuijurɔnaa halɔi lɛ atsuii.
15. Mɛni hewɔ wolo tɛtrɛɛ nɛɛ tsiɔ oniatsumɔ ta yɛ be kɛ bei amli lɛ?
15 Yɛ be kɛ bei amli lɛ, Asafo lɛ kɛ wolo nɛɛ mli baafai tsuɔ nii koni akɛgbala nikanelɔi ajwɛŋmɔ kɛba hegbɛ ni amɛyɔɔ akɛ amɛaajɛ amɛsuɔmɔ mli amɛtsu onia amɛha jeŋ muu fɛɛ Maŋtsɛyeli-shiɛmɔ nitsumɔ lɛ nɔ. Enɛ jeee shikabimɔ aloo ehe fai ni akpaa, shi moŋ eji kaimɔ kɛmiiha mɛi fɛɛ ni sumɔɔ akɛ amɛaafi “sanekpakpa lɛ he osɔfo nitsumɔ” lɛ sɛɛ yɛ bɔ ni Nyɔŋmɔ haa amɛshwereɔ lɛ naa. (Romabii 15:16; 3 Yohane 2) Asafo lɛ kɛ shika fɛɛ ni akɛhaa lɛ lɛ tsuɔ nii yɛ ehelɛtemɔ kpakpa kɛ hiɛshikamɔ mli koni eha ale Yehowa gbɛi lɛ kɛ Maŋtsɛyeli lɛ. Akɛ shidaa kpɛlɛɔ shika ni baa lɛ fɛɛ nɔ ni ahaa aleɔ akɛ nine eshɛ nɔ, ni akɛtsuɔ nii koni akɛlɛɛ Nyɔŋmɔ Maŋtsɛyeli lɛ he sanekpakpa lɛ mli. Akɛ nɔkwɛmɔ nɔ lɛ, enɛɛmɛi anɔ atsɔɔ ahaa maŋsɛɛ sanekpakpa shiɛmɔ nitsumɔ yaa nɔ yɛ maji pii amli, ni akɛtsuɔ woji akalamɔ tsɔnei ni he hiaa kɛha Biblia mli nilee gbɛɛ-kɛ-shwamɔ lɛ ahe nii ni akɛlɛɛɔ mli. Kɛfata he lɛ, akɛ oniatsumɔi krokomɛi kɛha jeŋ muu fɛɛ nitsumɔ lɛ tsuɔ nii koni akɛwo Bibliai kɛ Biblia kasemɔ he woji kɛ video kɛ kasɛt nɔ nibii ni amɛjara yaa ŋwɛi be fɛɛ be lɛ afeemɔ he nyɔmɔ. Nɛkɛ gbɛi anɔ tsuijurɔnaa halɔi haa Maŋtsɛyeli lɛ he nibii yaa hiɛ yɛ.
Jeee yɛ Nɔnyɛɛ loo Fimɔ Naa
16. Eyɛ mli akɛ Yehowa Odasefoi ateŋ mɛi fioo ji niiatsɛmɛi moŋ, shi mɛni hewɔ hiɛ sɔɔ onia ni amɛtsuɔ lɛ?
16 Yehowa Odasefoi lɛ ateaŋ mɛi fioo ko pɛ ji niiatsɛmɛi yɛ heloonaa. Eyɛ mli akɛ amɛbaaha shika bibii ni sa hiɛ kɛha Maŋtsɛyeli lɛ he nibii anɔyaa moŋ, shi kɛlɛ onia ni amɛtsuɔ lɛ tsɔɔ nɔ ko pɔtɛɛ. Beni Yesu na ni yoo okulafo ohiafo ko kɛ shika bibii enyɔ ewo sɔlemɔwe onia adeka lɛ mli lɛ, ekɛɛ: “Nɛkɛ yoo okulafo ohiafo nɛɛ, ekɛ pii ewo mli fe mɛi lɛ fɛɛ; ejaakɛ mɛnɛɛmɛi fɛɛ [oniatsulɔi krokomɛi lɛ], nɔ ni amɛna ni eteke nɔ lɛ eko amɛkɛbawo Nyɔŋmɔ nikee nii lɛ amli nɛɛ, shi mɔ nɛɛ lɛ, ehia mli nii ni ekɛkwɛɔ ehe nɔ lɛ fɛɛ ekɛbawo mli nɛɛ.” (Luka 21:1-4) Eyɛ mli akɛ enikee nii lɛ bibioo ni moŋ, shi eji tsuijurɔnaa halɔ—ni hiɛ sɔ onia ni etsu lɛ.
17, 18. Mɛni ji Paulo wiemɔi ni yɔɔ 2 Korintobii 9:7 lɛ mli nɔ titri, ni Hela wiemɔ ni atsɔɔ shishi “tsuijurɔnaa” lɛ tsɔɔ mɛni?
17 Paulo wie yɛ yelikɛbuamɔ nitsumɔ ni atsu yɛ Yudea Kristofoi lɛ ahe lɛ he akɛ: “Mɔ fɛɛ mɔ aha bɔ ni ekpɛ mli momo yɛ etsui mli, ni ekajɛ ŋkɔmɔyeli aloo fimɔ [nɔnyɛɛ] mli; ejaakɛ tsuijurɔnaa halɔ Nyɔŋmɔ sumɔɔ.” (2 Korintobii 9:7) Ekolɛ bɔfo lɛ miigbala jwɛŋmɔ kɛmiiya Abɛi 22:8 ni yɔɔ Septuagint shishitsɔɔmɔ lɛ mli lɛ ni kɛɔ nɛkɛ lɛ nɔ: “Nyɔŋmɔ jɔɔ tsuijurɔnaa halɔ; ni ebaaha lɛ nɔ ni etɔɔ fa yɛ mli yɛ enitsumɔi amli lɛ.” (The Septuagint Bible, ni Charles Thomson tsɔɔ shishi) Paulo kɛ “sumɔɔ” to “jɔɔ” najiaŋ, shi tsakpaa ko yɛ mli, ejaakɛ nɔ ni jɛɔ Nyɔŋmɔ suɔmɔ mli baa ji jɔɔmɔi babaoo.
18 Tsuijurɔnaa halɔ lɛ yɛ miishɛɛ lɛlɛŋ akɛ eeeha nii. Ejaakɛ nɔ ni jɛɔ Hela wiemɔ ni atsɔɔ shishi akɛ “tsuijurɔnaa” yɛ 2 Korintobii 9:7 lɛ mli baa ji wiemɔ “mlifilimɔ”! Yɛ be mli ni etsɔɔ enɛ lɛ, woloŋlelɔ R. G. H. Lenski kɛɛ: “Nyɔŋmɔ sumɔɔ nihalɔ ni yɔɔ tsui kpakpa, mɔ ni nyãa, ni yɔɔ miishɛɛ . . . [ni] ŋmɔlɔ ebɔle ehemɔkɛyeli he kɛ ekɛ hegbɛ kroko kɛha nihamɔ kpe.” Mɔ ni yɔɔ miishɛɛ mumɔ ni tamɔ nɛkɛ lɛ haaa nii yɛ ŋkɔmɔyeli loo fimɔ kɛ nɔnyɛɛ naa, shi etsui yɛ enihamɔ lɛ mli. Ani oyɛ tsuijurɔ nakai yɛ nihamɔ ni akɛfiɔ Maŋtsɛyeli lɛ he nibii asɛɛ lɛ he?
19. Mɛɛ gbɛ mra be mli Kristofoi lɛ tsɔɔ nɔ amɛtsuɔ onia yɛ?
19 Klɛŋklɛŋ Kristofoi lɛ kɛ plɛte tsɔɔɔ mɛi ahiɛ ni akɛmiiba shika aloo ni amɛaaha nibii ni baa amɛdɛŋ lɛ mli mlijaa nyɔŋma mli ekome kɛha jamɔ. Shi moŋ, suɔmɔnaa amɛtsuɔ onia yɛ. Tertullian, ni atsake lɛ kɛba Kristojamɔ mli aaafee afi 190 Ŋ.B. lɛ ŋma akɛ: “Eyɛ mli akɛ wɔyɛ wɔ shika adeka moŋ, shi ejeee shika ni akɛheɔ yiwalaheremɔ, tamɔ jamɔ ni yɔɔ ejara. Yɛ daa nyɔŋ nɔ [eka shi faŋŋ akɛ shikome yɛ nyɔŋ lɛ mli] lɛ, kɛ eesumɔ lɛ, amɛteŋ mɔ fɛɛ mɔ kɛ shika ko woɔ mli; shi ja kɛ eesumɔ pɛ, ni kɛ ebaanyɛ hu; ejaakɛ fimɔ loo nɔnyɛɛ bɛ mli; fɛɛ jɛ suɔmɔnaa.”—Apology, Yitso XXXIX.
20, 21. (a) Mɛni wolo tɛtrɛɛ nɛɛ eko ni je kpo mra mli lɛ wie yɛ hegbɛ ni aaana akɛfi Nyɔŋmɔ yiŋtoi ahe nitsumɔ sɛɛ yɛ shika gbɛfaŋ lɛ he, ni akɛ enɛ tsuɔ nii yɛ ŋmɛnɛ po yɛ mɛɛ gbɛ nɔ? b) Mɛni baa kɛ wɔkɛ wɔ nibii ni jara wawai wo Yehowa hiɛ nyam?
20 Suɔmɔnaa hamɔ efee nɔ ni Yehowa tsuji ni yɔɔ ŋmɛnɛŋmɛnɛ beaŋ lɛ fɔɔ feemɔ. Shi bei komɛi lɛ, mɛi komɛi kɛ hegbɛ ni amɛna akɛ amɛaafi Nyɔŋmɔ yiŋtoi ahe nitsumɔ sɛɛ kɛmɔ shi kɛtsɔ oniatsumɔ nɔ lɛ tsuuu nii. Akɛ nɔkwɛmɔ nɔ lɛ, wolo tɛtrɛɛ nɛɛ wie yɛ February 1883 mli akɛ: “Mɛi komɛi tere oniatsumɔ [shika gbɛfaŋ] jatsu ni tsii waa yɛ mɛi krokomɛi ahewɔ, ni enɛ eha hewalɛ ni amɛyɔɔ ni amɛkɛ shika aaaha lɛ miiba shi yɛ nitsumɔ ni fa kɛteke nɔ kɛ gbedemɔ hewɔ, no hewɔ lɛ sɛɛnamɔ ni yɔɔ amɛhe lɛ tɔɔ fa; ni jeee nakai pɛ kɛkɛ, shi mɛi ni . . . susuko shihilɛ lɛ he lɛ elaaje hegbɛ ni aaaha amɛnine ashɛ jɔɔmɔi anɔ lɛ yɛ nii ni amɛkeee yɛ shika gbɛfaŋ lɛ hewɔ.”
21 Beni asafo babaoo lɛ hoɔ yuu kɛbaa Yehowa gbɛjianɔtoo lɛ mli ŋmɛnɛ, ni Nyɔŋmɔ nitsumɔ lɛ mli lɛɛɔ kɛboteɔ Europa Bokagbɛ kɛ hei krokomɛi ni tsutsu lɛ naatsii yɔɔ jɛmɛ lɛ, ehe bahiaa waa ni alɛɛ woji akalamɔ nitsumɔ hei kɛ nibii krokomɛi amli. Esa ni afee Bibliai kɛ woji krokomɛi babaoo. Ahiɛ teokrase nitsumɔi sɔrɔtoi amli bianɛ; shi kɛ shika ni fa yɛ lɛ, abaanyɛ atsu ekomɛi ahe nii yɛ oyaiyeli mli. Shi wɔyɛ hemɔkɛyeli akɛ Nyɔŋmɔ kɛ nɔ ni he hiaa lɛ baaha, ni wɔle akɛ abaajɔɔ ‘mɛi ni kɛ amɛ nibii ni jara wawai lɛ woɔ Yehowa hiɛ nyam lɛ’ babaoo. (Abɛi 3:9, 10) Eji anɔkwale akɛ, “mɔ ni duɔ babaoo lɛ, babaoo hu ebaakpa.” Yehowa baaha ‘wɔtsɔmɔ niiatsɛmɛi yɛ ejurɔ fɛɛ ni wɔfeɔ lɛ mli,’ ni wɔ tsuijurɔnaa nihamɔ lɛ baaha mɛi pii ada lɛ shi ni amɛjie eyi.—2 Korintobii 9:6-14.
Jiemɔ Ohiɛsɔɔ Kpo yɛ Nyɔŋmɔ Nikee Nii Ahe
22, 23. (a) Mɛni ji Nyɔŋmɔ nikee nii ni anyɛŋ agba lɛ? (b) Akɛni wɔhiɛ sɔɔ Yehowa nikee nii lɛ hewɔ lɛ, mɛni esa akɛ wɔfee?
22 Akɛni hiɛsɔɔ babaoo tsirɛ lɛ hewɔ lɛ, Paulo diɛŋtsɛ kɛɛ: “Shidaa aha Nyɔŋmɔ yɛ enikee nii ni anyɛŋ agba lɛ hewɔ.” (2 Korintobii 9:15) Akɛ Kristofoi ni afɔ amɛ mu lɛ kɛ je lɛ he eshai ahe “kpatamɔ nɔ” lɛ, Yesu ji nɔdaamɔ nɔ kɛ gbɛ ni atsɔ nɔ akɛ Yehowa nikee nii ni anyɛŋ agba lɛ ha. (1 Yohane 2:1, 2) Nakai nikee nii lɛ ji ‘Nyɔŋmɔ duromɔ ni tekeɔ nɔ,’ ni ejie lɛ kpo etsɔɔ ewebii ni yɔɔ shikpɔŋ nɔ kɛtsɔ Yesu Kristo nɔ lɛ, ni efa babaoo kɛha amɛyiwalaheremɔ kɛ Yehowa anunyam kɛ bembuu.—2 Korintobii 9:14.
23 Wɔdaa Yehowa shi babaoo yɛ enikee nii ni anyɛŋ agba ni ekɛha yaka kɛ mumɔŋ kɛ heloonaa nikee nii krokomɛi babaoo ni ekɛha ewebii lɛ hewɔ. Ejurɔ ni wɔŋwɛi Tsɛ lɛ efee wɔ lɛ yɛ naakpɛɛ aahu akɛ etekeɔ hewalɛ ni adesa yɔɔ ni ekɛaatsɔɔ mli! Ni yɛ anɔkwale mli lɛ belɛ esa akɛ ekanya wɔ ni wɔtsɔmɔ tsuijurɔnaa halɔi. No hewɔ lɛ, nyɛhaa wɔkɛ tsuiŋ hiɛsɔɔ afea nɔ fɛɛ nɔ ni wɔɔnyɛ ni wɔkɛha wɔ Nyɔŋmɔ ni keɔ nii babaoo, Yehowa, klɛŋklɛŋ tsuijurɔnaa halɔ ni fe fɛɛ lɛ yiŋtoi ahe nitsumɔ aya hiɛ!
Ani Okaiɔ
◻ Tsui ni sumɔɔ etsirɛ Yehowa webii koni amɛfee mɛni?
◻ Mɛni kanyaa tsuijurɔnaa hamɔ?
◻ Buu Mɔɔ Asafo lɛ kɛ shika ni enine shɛɔ nɔ lɛ fɛɛ tsuɔ nii yɛ mɛɛ gbɛ nɔ?
◻ Mɛɛ nihalɔ nɛkɛ Nyɔnmɔ sumɔɔ, ni te esa akɛ wɔjie hiɛsɔɔ kpo yɛ E-nikee nii babaoo lɛ he wɔha tɛŋŋ?
[Mfonirii ni yɔɔ baafa 15]
Beni amaa kpee buu lɛ, lsraelbii lɛ tsu nii waa ni amɛkɛ nibii ni amɛyɔɔ ke Yehowa
[Mfonirii ni yɔɔ baafa 18]
Hiɛ sɔɔ shika ni tamɔ okulafo ohiafo lɛ nɔ lɛ ní etsɔɔ nɔ ko babaoo