Ni Aaakwɛ Nyɔŋmɔ Asafoku Lɛ Yɛ Suɔmɔ Mli
“Nyɛlɛa Nyɔŋmɔ asafoku ni yɔɔ nyɛteŋ lɛ.”—1 PETRO 5:2.
1, 2. Mɛni ji Yehowa su titri fe fɛɛ, ni mɛɛ gbɛ nɔ ejieɔ ehe kpo yɛ?
AFEƆ lɛ faŋŋ yɛ Ŋmalɛi Krɔŋkrɔŋi lɛ amli fɛɛ akɛ, suɔmɔ ji Nyɔŋmɔ sui lɛ ateŋ nɔ ni yeɔ nɔ. Klɛŋklɛŋ Yohane 4:8 jajeɔ akɛ: “Nyɔŋmɔ lɛ, suɔmɔ ji lɛ.” Akɛni esuɔmɔ lɛ jeɔ kpo yɛ nifeemɔ mli hewɔ lɛ, 1 Petro 5:7 kɛɔ akɛ Nyɔŋmɔ “jwɛŋɔ nyɛnɔ.” Yɛ Biblia lɛ mli lɛ, akɛ bɔ ni Yehowa susuɔ ewebii ahe ehaa lɛ toɔ bɔ ni tookwɛlɔ ni yɔɔ suɔmɔ kwɛɔ etooi ehaa lɛ he, akɛ: “Naa, Nuŋtsɔ Yehowa . . . [aaalɛ] etoiku lɛ tamɔ tookwɛlɔ; eeehiɛ etoobii lɛ yɛ ekpɔkɔiaŋ, ni eeehole amɛ eshãkã etsitsi, ni too-nyɛmɛi lɛ hu, eeekpala amɛ blɛoo.” (Yesaia 40:10, 11) Kwɛ bɔ ni David mii shɛ ehe eha, aahu akɛ enyɛ ewie akɛ: “Yehowa ji mi-Kwɛlɔ, nɔ ko nɔ ko ehiaŋ mi”!—Lala 23:1.
2 Eja gbɛ jogbaŋŋ akɛ Biblia lɛ kɛ gbɔmɛi ni Nyɔŋmɔ naa amɛhe miishɛɛ lɛ toɔ gwantɛŋi ahe, ejaakɛ gwantɛŋi ahe jɔ, amɛbaa amɛhe shi, ni amɛboɔ amɛkwɛlɔ ni kwɛɔ amɛnɔ lɛ toi. Akɛ Tookwɛlɔ ni yɔɔ suɔmɔ lɛ, Yehowa kwɛɔ ewebii ni tamɔ gwantɛŋi lɛ jogbaŋŋ. Ejieɔ enɛ kpo kɛtsɔɔ amɛhiamɔ nii ni ehaa amɛ yɛ heloonaa kɛ mumɔŋ fɛɛ, kɛ agbɛnɛ hu kɛtsɔ kudɔmɔ ni ekudɔɔ amɛ kɛtsɔɔ jeŋ fɔŋ nɛɛ “naagbee gbii” ni mli wa nɛɛ amli kɛbɛŋkɛɔ ejalɛ jeŋ hee ni baa lɛ he lɛ nɔ.—2 Timoteo 3:1-5, 13; Mateo 6:31-34; 10:28-31; 2 Petro 3:13.
3. Te lalatsɛ lɛ tsɔɔ bɔ ni Yehowa kwɛɔ etooi lɛ ehaa lɛ mli eha tɛŋŋ?
3 Kadimɔ bɔ ni Yehowa jɛɔ suɔmɔ mli ekwɛɔ etooi lɛ: “Yehowa hiŋmɛi kã jalɔi ahe, ni efeɔ toi ehaa amɛbolɔmɔi lɛ. . . . Jalɔi lɛ bolɔɔ, ni Yehowa boɔ toi, ni ehereɔ amɛ kɛjɛɔ amɛfimɔi fɛɛ mli. Yehowa bɛŋkɛɔ mɛi ni tsuii ekumɔ lɛ, ni ehereɔ mɛi ni mumɔ tswiaa shi kɛ dɔlɛ lɛ. Jalɔ amanehulu faa babaoo shi Yehowa jieɔ lɛ kɛjɛɔ fɛɛ mli.” (Lala 34:16-20) Mɛɛ miishɛjemɔ kpele Jeŋ Muu Fɛɛ Tookwɛlɔ lɛ kɛhaa ewebii ni tamɔ gwantɛŋi lɛ nɛkɛ!
Tookwɛlɔ Kpakpa lɛ Nɔkwɛmɔ nɔ Lɛ
4. Mɛni ji Yesu nitsumɔ yɛ Nyɔŋmɔ tooku lɛ kwɛmɔ mli?
4 Nyɔŋmɔ Bi, Yesu, kase nii jogbaŋŋ kɛjɛ e-Tsɛ ŋɔɔ, ejaakɛ Biblia lɛ tsɛɔ Yesu akɛ “tookwɛlɔ kpakpa lɛ.” (Yohane 10:11-16) Wɔkadiɔ sɔɔmɔ ni he hiaa ni ekɛhaa Nyɔŋmɔ asafoku lɛ, yɛ Kpojiemɔ yitso 7 lɛ. Atsɛɔ Nyɔŋmɔ tsuji ni yɔɔ wɔgbii nɛɛ amli lɛ yɛ kuku 9 lɛ akɛ “asafo babaoo . . . ni jɛ jeŋmaŋ fɛɛ jeŋmaŋ kɛ akutsei kɛ maji kɛ majianɔ wiemɔi amli.” Kɛkɛ lɛ, kuku 17 lɛ kɛɔ akɛ: “Toobi lɛ [Yesu] . . . aaalɛ amɛ, ni eeetsɔɔ amɛ gbɛ kɛaatee wala nu bui ahe, ni Nyɔŋmɔ aaatsumɔ amɛhiɛaŋ yaafo nui fɛɛ.” Yesu tsɔɔ Nyɔŋmɔ tooi lɛ agbɛ kɛyaa nui ni ji anɔkwale ni kɛ mɔ yaa naanɔ wala mli lɛ ahe. (Yohane 17:3) Kadimɔ akɛ atsɛɔ Yesu akɛ “Toobi lɛ,” ni tsɔɔ akɛ lɛ diɛŋtsɛ hu eyɛ sui tamɔ gwantɛŋ nɔ̃, ni eji heshibaa ni akɛhaa Nyɔŋmɔ lɛ he nɔkwɛmɔ nɔ ni fe fɛɛ.
5. Te Yesu nu he yɛ gbɔmɛi ahe eha tɛŋŋ?
5 Beni eyɔɔ shikpɔŋ nɔ lɛ, Yesu hi shi yɛ gbɔmɛi lɛ ateŋ ni ena amɛshihilɛ ni yɔɔ mɔbɔ lɛ. Te etsu amɛ amanehulu shihilɛ nɛɛ he nii eha tɛŋŋ? “Emusuŋ tsɔ lɛ yɛ amɛhewɔ, akɛni etɔ amɛ ni amɛfee yuuyaa tamɔ tooi ni bɛ kwɛlɔ lɛ.” (Mateo 9:36) Tooi ni bɛ kwɛlɔ lɛ naa amanehulu waa yɛ kooloi krokomɛi ni mɔmɔɔ amɛ amɛyeɔ lɛ adɛŋ, tamɔ bɔ ni eji yɛ tooi ni yɔɔ kwɛlɔi ni kwɛɛɛ amɛ jogbaŋŋ lɛ agbɛfaŋ lɛ. Shi Yesu susuɔ mɔ he jogbaŋŋ, ejaakɛ ewie akɛ: “Nyɛbaa miŋɔɔ, nyɛ mɛi fɛɛ ni etɔ nyɛ ni nyɛjatsui fe nyɛ lɛ, ni maha nyɛ hejɔɔmɔ. Nyɛwoa mipã lɛ nyɛfɔ̃a nyɛnɔ, ni nyɛkasea mi; shi mihe jɔ, ni mibaa mihe shi kɛjɛ mitsui mli; ni nyɛaana hejɔɔmɔ nyɛaaha nyɛsusumai lɛ. Ejaakɛ mipã lɛ teremɔ waaa, ni mijatsu lɛ etsiii.”—Mateo 11:28-30.
6. Mɛɛ henumɔ Yesu ná eha mɛi ni anaanaa amɛnɔ lɛ?
6 Biblia gbalɛ gba efɔ shi akɛ Yesu kɛ gbɔmɛi baaye yɛ suɔmɔ mli, akɛ: “Yehowa efɔ mi mu . . . koni mibatsa mɛi ni amɛtsuii ekumɔ lɛ, . . . ni mishɛje ŋkɔmɔyelɔi fɛɛ amii.” (Yesaia 61:1, 2; Luka 4:17-21) Yesu ebuuu ohiafoi kɛ mɛi ni he bɛ nii lɛ akɛ mɛi ni baa shi kɔkɔɔkɔ. Shi moŋ, eha Yesaia 42:3 ba mli, akɛ: “Gãlã ni amiã lɛ, ekuŋ, ni kane mli odonti ni tsoɔ sulii lɛ, egbeŋ.” (Okɛto Mateo 12:17-21 he.) Mɛi ni naa amanehulu lɛ tamɔ gãlãi ni akumɔ, tamɔ kane mli odonti ni miihe agbo yɛ mu ni enaaa hewɔ. Beni ena amɛshihilɛ ni yɔɔ mɔbɔ waa nɛɛ, Yesu jie mɔbɔnalɛ kpo etsɔɔ amɛ, ni ekɛ hewalɛ kɛ hiɛnɔkamɔ fɛɛ wo amɛmli, ni etsa amɛ yɛ mumɔŋ kɛ gbɔmɔtsoŋ fɛɛ.—Mateo 4:23.
7. Nɛgbɛ Yesu tsɔɔ mɛi ni bo lɛ toi lɛ agbɛ kɛtee?
7 Gbɔmɛi ni tamɔ gwantɛŋi lɛ ke yuu kɛba Yesu ŋɔɔ. Enitsɔɔmɔ lɛ yɛ miishɛɛ aahu akɛ asraafoi ni atsu amɛ akɛ amɛyamɔ lɛ kɛba lɛ ku amɛsɛɛ ni amɛbabɔ amaniɛ akɛ: “Bɔ ni gbɔmɔ nɛɛ wieɔ lɛ, mɔ ko ewieko nakai dã.” (Yohane 7:46) Ni lɛlɛŋ, jamɔ mli hiɛnyiɛlɔi osatofoi lɛ po wie akɛ: “Je lɛ efa kɛnyiɛ esɛɛ”! (Yohane 12:19) Shi Yesu taooo woo loo anunyam ehaaa lɛ diɛŋtsɛ ehe. Etsɔɔ gbɔmɛi agbɛ kɛtee e-Tsɛ ŋɔɔ. Etsɔɔ amɛ ni amɛjɛ suɔmɔ ni amɛyɔɔ kɛha E-sui ni anaa he miishɛɛ lɛ mli amɛsɔmɔ Yehowa, akɛ: “Suɔmɔ Nuŋtsɔ [Yehowa], o-Nyɔŋmɔ lɛ, kɛjɛ otsui fɛɛ kɛ osusuma fɛɛ kɛ onyɛmɔ fɛɛ kɛ ojwɛŋmɔ fɛɛ mli.”—Luka 10:27, 28.
8. Esoro toiboo ni Nyɔŋmɔ webii feɔ amɛhaa lɛ lɛ yɛ nɔ ni mɛi krokomɛi kɛhaa je lɛŋ nɔyelɔi lɛ he yɛ mɛɛ gbɛ nɔ?
8 Yehowa naa anunyam ejaakɛ ewebii ni tamɔ gwantɛŋi lɛ fiɔ ejeŋ muu fɛɛ maŋtsɛyeli lɛ sɛɛ, ni amɛdamɔɔ suɔmɔ ni amɛyɔɔ kɛha lɛ lɛ nɔ amɛfeɔ enɛ. Amɛjɛɔ amɛsuɔmɔ mli amɛhalaa akɛ amɛaasɔmɔ lɛ, yɛ esui ni amɛsumɔɔ waa lɛ he nilee ni amɛyɔɔ lɛ hewɔ. Kwɛ bɔ ni esoro enɛ kwraa yɛ je lɛŋ hiɛnyiɛlɔi, ni amɛ shishibii lɛ boɔ amɛ toi yɛ gbeyeishemɔ pɛ hewɔ, aloo kɛ ŋtsɔidɔɔmɔ, aloo akɛni amɛyɔɔ yiŋtoo fɔŋ ko hewɔ lɛ ahe! Anyɛŋ awie nɔ ni awie yɛ Roma Katolik Sɔlemɔ lɛ paapa ko he nɛɛ yɛ Yehowa aloo Yesu he kɔkɔɔkɔ, akɛ: “Mɛi pii naa ehe miishɛɛ, ni mɛi fɛɛ sheɔ lɛ gbeyei, shi mɔ ko kwraa sumɔɔɔ esane.”—Vicars of Christ—The Dark Side of the Papacy, ni Peter De Rosa ŋma.
Tookwɛlɔi Yitseiaŋwalɔi ni Yɔɔ Israel
9, 10. Tsɔɔmɔ bɔ ni hiɛnyiɛlɔi ni hi blema Israel kɛ klɛŋklɛŋ afii oha lɛ mli lɛ ji.
9 Ákɛ mɛi ni tamɔɔɔ Yesu lɛ, Israel jamɔ mli hiɛnyiɛlɔi ni hi shi yɛ egbii lɛ amli lɛ bɛ suɔmɔ ko kwraa kɛha tooi lɛ. Amɛtamɔ nɔyelɔi ni ye nɔ kɛtsɔ̃ hiɛ yɛ Israel, ní Yehowa wie amɛhe nɛkɛ lɛ nɔŋŋ, akɛ: “Kpoo ha Israel tookwɛlɔi ni lɛɔ amɛ diɛŋtsɛ amɛhe lɛ! Ani tookwɛlɔi lɛ, jeee tooi lɛ sa akɛ amɛlɛ lo? . . . Nii ni egbɔjɔ lɛ, nyɛwajeee amɛ; ni helatsɛmɛi lɛ, nyɛtsaaa amɛ; ni nɔ ni epila lɛ, nyɛfiii nyɛhaaa lɛ; ni nɔ ni edũ gbɛ lɛ, nyɛkpalaaa lɛ; ni nɔ ni elaaje lɛ, nyɛyataooo lɛ; shi moŋ nyɛyeɔ amɛnɔ kɛ nɔnyɛɛ kɛ yiwalɛ.”—Ezekiel 34:2-4.
10 Taakɛ nakai maŋkwramɔŋ tookwɛlɔi lɛ ji lɛ, Yudafoi ajamɔ mli hiɛnyiɛlɔi ni hi shi yɛ klɛŋklɛŋ afii oha lɛ mli lɛ atsuii wa waa. (Luka 11:47-52) Akɛ enɛ he nɔkwɛmɔ nɔ lɛ, Yesu gba sane ko ni kɔɔ Yudanyo ko ni atswa lɛ ojo, ni ayi lɛ, ni ashi lɛ afɔ̃ shi ni egbo fã kɛ fã yɛ gbɛ toi lɛ he sane. Israelnyo osɔfo ko banina lɛ, shi beni ena Yudanyo lɛ, etsɔ̃ afã kɛtee. Levinyo ko hu fee nakai nɔŋŋ. Kɛkɛ ni mɔ ko ni jeee Israelnyo, Samarianyo ko ni abuuu lɛ, banina lɛ ni ena mɔ ni apila lɛ nɛɛ mɔbɔ. Efimɔ efaji lɛ anɔ, ni ewo lɛ eta koolo nɔ kɛtee gbɔi atoohe, ni ekwɛ lɛ. Ewo gbɔi atoohe kwɛlɔ lɛ nyɔmɔ ni ekɛɛ lɛ akɛ ebaaku esɛɛ ebawo nyɔji krokomɛi ni baashwɛ lɛ hu.—Luka 10:30-37.
11, 12. (a) Mɛɛ gbɛ nɔ jamɔ mli hiɛnyiɛlɔi ni hi shi yɛ Yesu gbii amli lɛ anɔ fɔŋ feemɔ lɛ yashɛ shɔŋŋ yɛ? (b) Yɛ naagbee lɛ, mɛni Romabii lɛ fee jamɔ mli hiɛnyiɛlɔi lɛ?
11 Jamɔ mli hiɛnyiɛlɔi ni hi shi yɛ Yesu gbii amli lɛ efite aahu akɛ beni Yesu tee Lazaro shi kɛjɛ gbohiiaje lɛ, osɔfonukpai lɛ kɛ Farisifoi lɛ tsɛ Sanhedrin lɛ fɛɛ kɛkpe ni amɛkɛɛ amɛ akɛ: “Te wɔfeɔ tɛŋŋ? Shi nuu [Yesu] nɛɛ miifee okadii sɔrɔtoi pii. Kɛji wɔŋmɛ lɛ gbɛ nɛkɛ lɛ, mɛi fɛɛ aaahe enɔ aye; ni Romabii lɛ aaaba ni amɛaabashɔ̃ wɔmaŋ kɛ wɔshikpɔŋ lɛ fɛɛ.” (Yohane 11:47, 48) Jeee amɛhe sane ko kwraa ji ekpakpa ni Yesu fee nɛkɛ nuu ni egbo nɛɛ. Amɛmiisusu amɛgbɛhei lɛ ahe. No hewɔ lɛ, “kɛjɛ nakai gbi lɛ nɔ lɛ amɛkpɛ amɛyiŋ akɛ amɛbaagbe [Yesu].”—Yohane 11:53.
12 Nɔ ni amɛkɛwo amɛyitsoŋwalɛ nɛɛ mli wu ji akɛ, no sɛɛ lɛ, osɔfonukpai lɛ “kpɛ amɛyiŋ akɛ, amɛaagbe Lazaro hu; ehewɔ jɛ ni Yudafoi lɛ ateŋ mɛi pii tee ni amɛyahe Yesu nɔ amɛye lɛ.” (Yohane 12:10, 11) Hiɛjoomɔ ni amɛkɛbɔ mɔdɛŋ akɛ amɛkɛaabu amɛgbɛhei ahe lɛ eko kwraa yeee omanye, ejaakɛ Yesu ekɛɛ amɛ momo akɛ: “Aaashi nyɛwe lɛ amaŋfɔ aha nyɛ.” (Mateo 23:38) Ni yɛ nakai wiemɔi lɛ anaa pɛpɛɛpɛ hu lɛ, Romabii lɛ ba yɛ nakai yinɔ lɛ mli ni ‘amɛbashɔ̃ amɛmaŋ kɛ amɛshikpɔŋ lɛ,’ kɛ amɛwala hu kɛtee.
Tookwɛlɔi ni Yɔɔ Suɔmɔ yɛ Kristofoi Asafo lɛ Mli
13. Namɔ Yehowa wo shi akɛ ebaatsu lɛ kɛba ni ebakwɛ etooku lɛ?
13 Yɛ tookwɛlɔi yiwalɔi, kɛ hiɛjoolɔi anajiaŋ lɛ, Yehowa baatee Tookwɛlɔ Kpakpa, Yesu shi, koni ekwɛ E-tooku lɛ. Ewo shi hu akɛ ebaatee tookwɛlɔi bibii ni yɔɔ suɔmɔ shi, koni amɛkwɛ tooi lɛ anɔ: “Ni maŋɔ tookwɛlɔi mato amɛnɔ ni amɛlɛ amɛ, ni amɛsheŋ gbeyei, ni amɛtsui hu efaŋ dɔŋŋ.” (Yeremia 23:4) Enɛ hewɔ lɛ, taakɛ eji yɛ klɛŋklɛŋ afii oha lɛ mli Kristofoi asafo lɛ mli lɛ, nakai nɔŋŋ hu ŋmɛnɛ, “[awowooɔ] onukpai yɛ maŋ fɛɛ maŋ mli.” (Tito 1:5) Nɛkɛ hii ni edara yɛ mumɔŋ, ni shɛɔ taomɔ nii ni atsɔɔ yɛ Ŋmalɛi lɛ amli lɛ ahe lɛ ‘baalɛ Nyɔŋmɔ asafoku lɛ.’—1 Petro 5:2; 1 Timoteo 3:1-7; Tito 1:7-9.
14, 15. (a) Mɛɛ su ewa waa kɛha kaselɔi lɛ akɛ amɛaana? (b) Mɛni Yesu fee ni ekɛtsɔɔ amɛ akɛ esa akɛ onukpai lɛ afee sɔɔlɔi heshibalɔi?
14 Yɛ tooi lɛ akwɛmɔ mli lɛ, “titri lɛ,” esa akɛ onukpai lɛ “[asuɔmɔ] lɛ mli awa” aha amɛ. (1 Petro 4:8) Shi akɛni Yesu kaselɔi lɛ miitao gbɛi kɛ gbɛhe waa amɛha amɛhe hewɔ lɛ, ehe bahia ni amɛkase enɛ. No hewɔ lɛ, beni kaselɔi lɛ ateŋ mɛi enyɔ nyɛ bakɛɛ Yesu akɛ: “Kɛɛmɔ ni mibii enyɔ nɛɛ ateŋ mɔ kome ata oninejurɔ nɔ, ni mɔ kome hu ata obɛku nɔ yɛ omaŋtsɛyeli lɛ mli” lɛ, kaselɔi krokomɛi lɛ amli fu waa yɛ enɛ he. Yesu kɛɛ amɛ akɛ: “Maji lɛ anɔ lumɛi lɛ yeɔ amɛnɔ, ni amɛteŋ gbɔmɛi agboi lɛ hu yɛ hewalɛ yɛ amɛnɔ. Akafee nakai yɛ nyɛteŋ; shi mɔ fɛɛ mɔ ni sumɔɔ akɛ etsɔ agbo yɛ nyɛteŋ lɛ, lɛ moŋ etsɔ nyɛsɔɔlɔ. Ni mɔ fɛɛ mɔ ni sumɔɔ akɛ etsɔ onukpa yɛ nyɛteŋ lɛ, lɛ moŋ etsɔ nyɛtsulɔ.”—Mateo 20:20-28.
15 Yɛ be kroko hu mli, beni kaselɔi lɛ “ye sane yɛ amɛteŋ akɛ, namɔ ji agbo fe fɛɛ” lɛ, Yesu kɛɛ amɛ akɛ: “Kɛ mɔ ko miitao klɛŋklɛŋ mɔ atsɔ lɛ, eeetsɔ mɛi fɛɛ sɛɛkpelɔ kɛ mɛi fɛɛ tsulɔ.” (Marko 9:34, 35) Esa akɛ heshibaa jwɛŋmɔ kɛ miishɛɛ ni ayɔɔ akɛ aaasɔmɔ lɛ afee amɛsu lɛ fã. Ni kɛlɛ, kaselɔi lɛ tee nɔ amɛna naagbai yɛ nakai susumɔi lɛ anamɔ he, ejaakɛ gbi gbɛkɛ tuuŋtu ni tsɔ hiɛ dani Yesu gbo lɛ, “naataamɔ” ko te shi yɛ amɛteŋ akɛ amɛteŋ namɔ ji agbo fe fɛɛ, yɛ enaagbee gbɛkɛ niyeli lɛ shishi! Enɛ ba mli, yɛ tsɔɔmɔ ni Yesu etsɔɔ amɛ bɔ ni esa akɛ onukpa lɛ asɔmɔ asafoku lɛ fɛɛ sɛɛ; eba ehe shi ni efɔ amɛnaji ahe. Ekɛɛ: “Agbɛnɛ, kɛji mi, Tsɔɔlɔ kɛ Nuŋtsɔ lɛ, mifɔ nyɛnaji ahe lɛ, esa akɛ nyɛ hu nyɛfɔfɔɔ nyɛnanemɛi anaji ahe. Shi okadi mito miha nyɛ, koni bɔ ni mifee nɛɛ, nyɛ hu nyɛfee nakai.”—Luka 22:24; Yohane 13:14, 15.
16. Yɛ 1899 mli lɛ, mɛɛ wiemɔi komɛi Buu-Mɔɔ lɛ wie yɛ su ni he hiaa fe fɛɛ yɛ onukpai ahe lɛ he?
16 Yehowa Odasefoi etsɔɔ be fɛɛ be akɛ esa akɛ onukpai lɛ afee tamɔ nɛkɛ. Aaafee afii oha ni eho nɛ lɛ, April 1, 1899, Watch Tower lɛ kadi Paulo wiemɔi ni yɔɔ 1 Korintobii 13:1-8 ni ewie akɛ: “Bɔfo lɛ tsɔɔ mli faŋŋ akɛ nilee kɛ naatselɛ ni akɛwieɔ yɛ mɛi ahiɛ lɛ jeee kaai lɛ ateŋ nɔ ni he hiaa fe fɛɛ, shi moŋ suɔmɔ ni yaa tsui lɛ mli tɔ̃ɔ ni emli lɛɛɔ kɛjeɔ kpo kɛtsɔɔ shihilɛ gbɛ lɛ fɛɛ nɔ, ni kanyaa ni ekudɔɔ wɔgbɔmɔtsei ni gboɔ nɛɛ, ji kaa lɛ diɛŋtsɛ—wɔ ŋwɛi wekukpaa lɛ he odaseyeli diɛŋtsɛ. . . . Klɛŋklɛŋ su ni sa akɛ atao yɛ mɔ fɛɛ mɔ ni akpɛlɛɔ enɔ akɛ sɔlemɔ lɛ sɔɔlɔ, koni esɔmɔ yɛ nibii krɔŋkrɔŋi amli lɛ, afee suɔmɔ mumɔ lɛ klɛŋklɛŋ kwraa.” Ewie akɛ hii ni kɛ heshibaa sɔmɔɔɔ kɛjɛɛɛ suɔmɔ mli lɛ “jeee tsɔɔlɔi ni yɔɔ shweshweeshwe, ni eeenyɛ eba akɛ amɛbaafee efɔŋ waa fe ekpakpa.”—1 Korintobii 8:1.
17. Te Biblia lɛ maa sui ni esa akɛ onukpai lɛ ana lɛ nɔ mi ehaa tɛŋŋ?
17 Enɛ hewɔ lɛ, esaaa akɛ onukpai lɛ ‘yeɔ’ tooi lɛ anɔ ‘nuŋtsɔmɛi asane.’ (1 Petro 5:3) Shi moŋ, esa akɛ amɛnyiɛ hiɛ ni ‘amɛmli ahi aha amɛhe, ni amɛmusuŋ atsɔ̃ amɛ yɛ amɛhe.’ (Efesobii 4:32) Paulo ma nɔ mi akɛ: “Nyɛwoa musuŋtsɔlɛ, mlihilɛ, heshibaa jwɛŋmɔ, mlijɔlɛ, tsuishitoo. . . . Shi enɛɛmɛi fɛɛ sɛɛ lɛ, nyɛwoa suɔmɔ ni ji emuuyeli kpaa lɛ.”—Kolosebii 3:12-14.
18. (a) Mɛɛ nɔkwɛmɔ nɔ fɛfɛo Paulo fee efɔ shi yɛ bɔ ni ekɛ tooi lɛ ye ha lɛ mli? (b) Mɛni hewɔ esaaa ni onukpai lɛ kuɔ amɛhiɛ amɛfɔɔ tooi lɛ ahiamɔ nii anɔ lɛ?
18 Paulo kase enɛ feemɔ, ni ekɛɛ: “Wɔmli jɔ yɛ nyɛteŋ, taakɛ bɔ ni biianyɛ hiɛɔ lɛ diɛŋtsɛ ebii dɔdɔɔdɔ lɛ. Ni akɛni wɔsumɔɔ nyɛ jogbaŋŋ nɛkɛ hewɔ lɛ, wɔyɛ he tsui akɛ jeee Nyɔŋmɔ sanekpakpa lɛ kɛkɛ wɔkɛaaha nyɛ, shi moŋ wɔ diɛŋtsɛ wɔwala tete, ejaakɛ wɔmiisumɔ nyɛ naakpa.” (1 Tesalonikabii 2:7, 8) Yɛ enɛ kɛ gbeekpamɔ naa lɛ, ekɛɛ: “Nyɛshɛjea mɛi ni tsui fãa lɛ amii; nyɛherea mɛi ni feɔ gbedee lɛ; nyɛtoa nyɛtsui shi nyɛhaa mɛi fɛɛ.” (1 Tesalonikabii 5:14) Naagbai ni tooi lɛ kɛbaaba amɛŋɔɔ lɛ eko kwraa kɔɔɔ he eko, esa akɛ onukpai lɛ akai Abɛi 21:13, akɛ: “Mɔ ni tsimɔɔ etoi yɛ ohiafo bolɔmɔ nɔ lɛ, lɛ hu eeebolɔ, shi aboŋ lɛ toi.”
19. Mɛni hewɔ onukpai ni yɔɔ suɔmɔ lɛ ji jɔɔmɔ lɛ, ni te tooi lɛ hereɔ suɔmɔ ni tamɔ nɛkɛ nɔ amɛhaa tɛŋŋ?
19 Onukpai ni jɛɔ suɔmɔ mli amɛkwɛɔ tooi lɛ ji jɔɔmɔ kɛha tooi lɛ. Yesaia 32:2 lɛ gba efɔ shi akɛ: “Ni mɔ fɛɛ mɔ aaatsɔ tamɔ abobaa he yɛ kɔɔyɔɔ naa kɛ teemɔ he yɛ nugbɔnɛmɔ naa, tamɔ faai yɛ ŋa kpataa nɔ loo tɛsaa kpele ko ni haa hɔɔŋ yɛ shikpɔŋ gbiŋ nɔ.” Eŋɔɔ wɔnaa waa akɛ wɔɔle akɛ wɔ onukpai ni yɔɔ ŋmɛnɛ lɛ ateŋ mɛi pii feɔ nii yɛ nɛkɛ mfoniri fɛfɛo ni haa mɔ naa hejɔɔmɔ nɛɛ kɛ gbeekpamɔ naa. Amɛkase ni amɛkɛ shishitoo mla ni nyiɛ sɛɛ nɛɛ tsuɔ nii, akɛ: “Nyɛkɛ nyɛmimɛi asuɔmɔ asumɔsumɔa nyɛhe; mɔ fɛɛ mɔ kɛ woo aha enaanyo tsutsu.” (Romabii 12:10) Kɛ onukpai lɛ jie nɛkɛ suɔmɔ kɛ heshibaa nɛɛ kpo lɛ, tooi lɛ hu hereɔ nɔ, ni “[amɛbuɔ] amɛ naakpa diɛŋtsɛ yɛ suɔmɔ mli, yɛ amɛnitsumɔ lɛ hewɔ.”—1 Tesalonikabii 5:12, 13.
Ná Bulɛ Kɛha Heyeli kɛ Nitsumɔ
20. Mɛni hewɔ esa akɛ onukpai lɛ ana bulɛ amɛha nifeemɔ mli heyeli lɛ?
20 Yehowa bɔ adesai kɛ heyeli koni amɛkɛkpɛ amɛ diɛŋtsɛ amɛyiŋ. Eyɛ mli akɛ onukpai lɛ kɛ ŋaawoo kɛ tsɔsemɔ po baaha moŋ, shi esaaa akɛ amɛnaa mɔ kroko shihilɛ loo ehemɔkɛyeli lɛ nɔ hewalɛ. Paulo wie akɛ: “Jeee akɛ nyɛhemɔkɛyeli lɛ nyɔŋ wɔyeɔ, shi moŋ nyɛ miishɛɛ lɛ he nitsumɔ hefatalɔi ji wɔ, ejaakɛ hemɔkɛyeli mli nyɛdamɔ shi yɛ.” (2 Korintobii 1:24) Hɛɛ, “mɔ fɛɛ mɔ aaatere lɛ diɛŋtsɛ ejatsu.” (Galatabii 6:5) Yehowa eha wɔ heyeli babaoo yɛ husui ni ji emlai kɛ eshishitoo mlai lɛ amli. Enɛ hewɔ lɛ, esa akɛ onukpai lɛ atsi amɛhe kɛjɛ mlai afeemɔ he, kɛji akuuu Ŋmalɛ naa shishitoo mlai amli. Ni esa akɛ amɛte shi amɛwo henumɔ ni amɛaana akɛ amɛkɛ amɛ diɛŋtsɛ amɛsusumɔi aaaha akɛ nɔ ni abiii he sane, aloo ni amɛaaha amɛ diɛŋtsɛ amɛhiɛnyam taomɔ abaje sane ko mli kɛji mɔ ko kɛ nakai susumɔi lɛ kpaaa gbee.—2 Korintobii 3:17; 1 Petro 2:16.
21. Mɛni abaanyɛ akase kɛjɛ su ni Paulo na yɛ Filemon he lɛ mli?
21 Kadimɔ bɔ ni Paulo kɛ Filemon, ni ji Kristofonyo ni yɔɔ nyɔŋ, ni hi Kolose yɛ Asia Bibioo lɛ ye ha, beni lɛ Paulo yɔɔ tsuŋwoo mli yɛ Roma lɛ. Filemon nyɔŋ ni atsɛɔ lɛ Onesimo lɛ jo foi kɛtee Roma, ni ebatsɔ Kristofonyo, ni eyeɔ ebuaa Paulo. Paulo ŋma wolo eyaha Filemon akɛ: “Kulɛ miisumɔ akɛ ekɛ mi ahi shi, koni esɔmɔ mi yɛ onajiaŋ yɛ sanekpakpa lɛ kpãai lɛ amli; shi misumɔɔɔ akɛ maje osusumɔ sɛɛ mafee nɔ ko, beni afee ni ejurɔ ni obafee lɛ akabafee akɛ fimɔ naa ni, shi moŋ tsuijurɔ naa.” (Filemon 13, 14) Paulo ha Onesimo ku esɛɛ, ni ekɛɛ Filemon ni ekɛ lɛ aye akɛ enyɛminuu Kristofonyo. Paulo le akɛ jeee lɛ enɔ ji tooku lɛ; Nyɔŋmɔ nɔ ni. Ejeee amɛnɔ nuŋtsɔ, shi moŋ amɛtsulɔ. Paulo etsɔɔɔ Filemon nɔ ni sa akɛ efee; ena bulɛ kɛha eheyeli ni ekɛaafee nɔ ni esumɔɔ lɛ.
22. (a) Mɛni esa akɛ onukpai lɛ anu amɛgbɛhe lɛ shishi akɛ eji? (b) Mɛɛ gbɛjianɔtoo nɛkɛ Yehowa tswaa emaa shi?
22 Beni Nyɔŋmɔ gbɛjianɔtoo lɛ yaa nɔ edaa lɛ, belɛ aahala onukpai pii. Esa akɛ amɛ, kɛ onukpai ni yɔɔ niiashikpamɔ babaoo lɛ fɛɛ anu shishi akɛ amɛgbɛhe lɛ, heshibaa sɔɔmɔ ni. Yɛ nɛkɛ gbɛ nɔ lɛ, beni Nyɔŋmɔ tsiɔ egbɛjianɔtoo lɛ kɛbɛŋkɛɔ jeŋ hee lɛ, ebaaya nɔ eda bɔ ni etaoɔ—ni ato amɛhe gbɛjianɔ jogbaŋŋ, shi amɛkɛ suɔmɔ kɛ mlihilɛ eshaaa afɔle yɛ nitsumɔ hilɛ hewɔ. Yɛ nɛkɛ gbɛ nɔ lɛ, egbɛjianɔtoo lɛ baaya nɔ agbala mɛi ni tamɔ gwantɛŋi, ni baana odaseyeli ni yɔɔ mli ni tsɔɔ akɛ “mɛi ni sumɔɔ Nyɔŋmɔ lɛ, nibii fiaa yeɔ ebuaa amɛ ni ahi aha amɛ” lɛ babaoo kɛba. No ji nɔ ni sa akɛ akpa gbɛ yɛ gbɛjianɔtoo ni atswa ama suɔmɔ nɔ lɛ he, ejaakɛ “suɔmɔ sɛɛ efooo gbi ko gbi ko.”—Romabii 8:28; 1 Korintobii 13:8.
Te Obaaha Hetoo Oha Tɛŋŋ?
◻ Te Biblia lɛ tsɔɔ bɔ ni Yehowa kwɛɔ ewebii ehaa lɛ mli eha tɛŋŋ?
◻ Mɛni Yesu tsuɔ yɛ Nyɔŋmɔ tooku lɛ kwɛmɔ mli?
◻ Mɛɛ su titri ni fe fɛɛ esa akɛ onukpai ana?
◻ Mɛni hewɔ esa akɛ onukpai lɛ asusu tooi lɛ aheyeli he lɛ?
[Mfoniri ni yɔɔ baafa 16]
Yesu, ni ji “tookwɛlɔ kpakpa” lɛ, jie mɔbɔnalɛ kpo
[Mfoniri ni yɔɔ baafa 17]
Jamɔ mli hiɛnyiɛlɔi fɔji lɛ tee Yesu yinɔ apam akɛ amɛbaagbe lɛ