Ní Aaajie Suɔmɔ Kpo Atsɔɔ Mɛi ni Ehia Amɛ Lɛ

EJI Kristofoi agbɛnaa nii kɛ hegbɛ fɛɛ akɛ amɛaajie suɔmɔ kpo amɛtsɔɔ amɛnyɛmimɛi hii kɛ yei ni ehia amɛ lɛ. (1 Yohane 3:17, 18) Bɔfo Paulo ŋma akɛ: “Nyɛhaa wɔfea mɛi fɛɛ ejurɔ, shi titri lɛ mɛi ni ji hemɔkɛyeli lɛ webii lɛ.” (Galatabii 6:10) Nyɛmi nuu ko ni kɛ nɔ ni miihe ashɛ afii nyɔŋmai ejwɛ esɔmɔ Yehowa lɛ ná Kristofoi asuɔmɔ nyɛmifeemɔ mli niiashikpamɔ nyɛsɛɛ nɛɛ, yɛ hela ni mɔ eŋa kɛ no sɛɛ lɛ gbele ni ba enɔ hewɔ lɛ mli. Eŋma akɛ:

“Akɛni mikwɛ miŋa yɛ shia yɛ be mli ni ehe yeɔ lɛ hewɔ lɛ, minyɛɛɛ matsu heloonaa nitsumɔ aaafee nyɔji enyɔ sɔŋŋ. Kwɛ hejɔlɛ ni miná beni nanemɛi ni yɔɔ asafo lɛ mli jɛ amɛsuɔmɔ mli amɛba wɔ yelikɛbuamɔ lɛ! Wɔnine shɛ shika nikeenii babaoo nɔ—‘koni nyɛkɛwo shikai krokomɛi ni nyɛfite lɛ he nyɔmɔ,’ taakɛ woji ni aŋma ni fata he lɛ kɛɔ lɛ—ni wɔkɛ woɔ daa nyɔŋ nɔ too, kane, sarawa hewalɛ, nu, kɛ nyɔji krokomɛi ahe nyɔmɔ.

“Beni eshwɛ otsii enyɔ ni miŋa baagbo lɛ, wɔ kpokpaa nɔkwɛlɔ lɛ basara wɔ ni ewo wɔ hewalɛ. Ejie sini ni ebaajie etsɔɔ asafo lɛ yɛ otsi lɛ naagbee mli po lɛ etsɔɔ wɔ. Wɔnyɛ wɔbo kpeei lɛ atoi yɛ tɛlifon nɔ—ní kpeei kɛha shiɛmɔyaa ni kpokpaa nɔkwɛlɔ lɛ kwɛ nɔ lɛ fata he. Yɛ kpeei nɛɛ ekome shishi lɛ, mɛi fɛɛ ni ba kɛha shiɛmɔyaa lɛ kɛ gbee kome kɛɛ ‘hɛloo’ akɛ kuu amɛtsɔɔ miŋa. No hewɔ lɛ, eyɛ mli akɛ etse ehe banee yɛ gbɔmɔtsoŋ moŋ, shi enuuu he kɔkɔɔkɔ akɛ ehe efee shoo.

“Egbele sɛɛ ŋmɛlɛtswaa kome mli lɛ, shwɛ fioo ni onukpai lɛ fɛɛ aba mishia lɛ. Nyɛmimɛi hii kɛ yei ni fa fe oha basara mi yɛ nakai gbi lɛ pɛ mli. Aná niyenii yɛ okpɔlɔ lɛ nɔ kɛha mɛi fɛɛ ni ba jɛmɛ lɛ yɛ ‘naakpɛɛ gbɛ nɔ.’ Minyɛŋ maje shishi makane nikeenii, musuŋtsɔlɛ wiemɔi, miishɛjemɔ wiemɔi, kɛ sɔlemɔi ni asɔle yɛ mihewɔ lɛ fɛɛ ekomekome. Kwɛ bɔ ni amɛwoɔ mɔ hewalɛ amɛhaa! Naagbee lɛ ebabi ni makɛɛ nyɛmimɛi lɛ koni amɛkpa yelikɛbuamɔ ni amɛkɛ haa mi yɛ niyenii kɛ shia kwramɔ gbɛfaŋ lɛ!

“Nɛgbɛ ákɛ ja Yehowa gbɛjianɔtoo lɛ pɛ mli wɔbaanyɛ wɔná musuŋtsɔlɛ wiemɔi, mɔhedɔɔ kɛ suɔmɔ ni pɛsɛmkunya bɛ mli nɛɛ yɛ? Mɛi babaoo yɛ ŋmɛnɛ ni amɛbaanyɛ amɛkane nanemɛi diɛŋtsɛ ni amɛyɔɔ lɛ yɛ gbɛ ko nɔ. Yehowa ejɔɔ wɔ kɛ mumɔŋ nyɛmimɛi hii kɛ yei aweku ni da!”—Marko 10:29, 30.