Kaahã Hemɔkɛyeli ni Oyɔɔ yɛ Maŋtsɛyeli lɛ Mli lɛ Miigbugbaa

1, 2. Mɛni baaye abua wɔ koni hemɔkɛyeli ni wɔyɔɔ akɛ Nyɔŋmɔ baatsɔ Maŋtsɛyeli lɛ nɔ ehã eyiŋtoo kɛhã adesai lɛ aba mli lɛ mli awa? (Kwɛmɔ mfoniri ni yɔɔ nikasemɔ lɛ shishijee lɛ.)

AKƐ Yehowa Odasefoi lɛ, wɔkɛ ekãa shiɛɔ akɛ Nyɔŋmɔ Maŋtsɛyeli lɛ ji nɔ ni baatsu wɔnaagbai lɛ fɛɛ he nii. Shi ani wɔheɔ wɔyeɔ akɛ Maŋtsɛyeli lɛ ji nɔyeli ko ni baaba lɛɛlɛŋ ní ebatsu Nyɔŋmɔ yiŋtoo he nii? Mɛni hewɔ wɔbaanyɛ wɔhe wɔye akɛ Maŋtsɛyeli lɛ baaba lɛɛlɛŋ lɛ?​—Hebribii 11:1.

² Yehowa baatsɔ Mesia Maŋtsɛyeli lɛ nɔ ehã yiŋ ni eto kɛhã adesai lɛ aba mli. Maŋtsɛyeli nɛɛ ma shishitoo nɔ ko ni nyɛŋ ahoso nɔ, no ji hegbɛ ni Yehowa yɔɔ akɛ lɛ pɛ eyeɔ nɔ fɛɛ nɔ nɔ lɛ. Namɔ ji Maŋtsɛyeli lɛ nɔ Maŋtsɛ? Namɛi hu baafata Maŋtsɛ nɛɛ he kɛye nɔ? Namɛi anɔ amɛbaaye, ni mɛni nɔ amɛbaaye? Yehowa tsɔ kpaŋmɔi anɔ ehã ale nibii titri ni kɔɔ Maŋtsɛyeli nɛɛ he. Nɛkɛ kpaŋmɔi nɛɛ ji gbeekpamɔi ni Yehowa loo e-Bi Yesu Kristo kɛ mɛi komɛi ba. Kɛ́ wɔsusu kpaŋmɔi nɛɛ ahe lɛ, ebaaye ebua wɔ ni wɔbaana bɔ ni baafee ni Yehowa yiŋtoo lɛ baaba mli kɛ nɔ hewɔ ni wɔbaanyɛ wɔkɛ wɔhiɛ afɔ̃ Maŋtsɛyeli lɛ nɔ kwraa lɛ.​—Nyɛkanea Efesobii 2:12.

 3. Mɛni he wɔbaasusu yɛ nikasemɔ nɛɛ kɛ nɔ ni baanyiɛ sɛɛ lɛ mli?

³ Ayɛ kpaŋmɔi ekpaa komɛi yɛ Biblia lɛ mli ni kɔɔ Mesia Maŋtsɛyeli ni Kristo Yesu ji enɔ Maŋtsɛ lɛ he. Nomɛi ji (1) Nyɔŋmɔ kɛ Abraham kpaŋmɔ lɛ, (2) Mla kpaŋmɔ lɛ, (3) Nyɔŋmɔ kɛ David kpaŋmɔ lɛ, (4) kpaŋmɔ kɛhã osɔfoyeli tamɔ Melkizedek nɔ lɛ, (5) kpaŋmɔ hee lɛ, kɛ (6) Maŋtsɛyeli kpaŋmɔ lɛ. Nyɛhãa wɔkwɛa bɔ ni kpaŋmɔi nɛɛ ateŋ eko fɛɛ eko kɔɔ Maŋtsɛyeli lɛ he kɛ bɔ ni eyeɔ ebuaa koni Nyɔŋmɔ yiŋtoo kɛhã shikpɔŋ lɛ kɛ adesai lɛ aba mli.​—Kwɛmɔ akrabatsa ni yitso ji, “Bɔ ni Nyɔŋmɔ Baahã Eyiŋtoo lɛ Aba Mli.”

 4. Taakɛ atsɔɔ yɛ 1 Mose lɛ mli lɛ, mɛɛ akpɔi Yehowa wo ni kɔɔ adesai ahe?

⁴ Yehowa fee wɔshikpɔŋ lɛ bɔ ni adesai baanyɛ ahi nɔ. Kɛkɛ ni Yehowa wo akpɔi nɛɛ: (1) Nyɔŋmɔ baabɔ adesai yɛ esubaŋ nɔ. (2) Adesai baahã shikpɔŋ lɛ atsɔ paradeiso, ni amɛbaahã enɔ ayi kɛ amɛbii ni feɔ jalɛ nii. (3) Esaaa ni adesai yeɔ ekpakpa kɛ efɔŋ lee tso lɛ nɔ yibii lɛ eko. (1 Mose 1:26, 28; 2:16, 17) Be ni Nyɔŋmɔ bɔ adesai sɛɛ lɛ, nɔ pɛ ni shwɛ ni baahã Nyɔŋmɔ yiŋtoo lɛ aba mli ji, ní adesai aye akpɔi enyɔ ni eshwɛ lɛ anɔ. Belɛ, mɛni hewɔ ehe bahia ni Nyɔŋmɔ afee kpaŋmɔi?

5, 6. (a) Mɛɛ gbɛ nɔ Satan ka akɛ ebaafite Nyɔŋmɔ yiŋtoo lɛ? (b) Te Yehowa tsu atua ni atse yɛ Eden lɛ he nii ehã tɛŋŋ?

⁵ Satan te shi ewo Nyɔŋmɔ kɛ eyiŋtoo lɛ. Efee enɛ kɛtsɔ ka ni eka Hawa ní eye ekpakpa kɛ efɔŋ lee tso lɛ nɔ yibii lɛ eko lɛ nɔ. Hawa ku akpɔ ni ji etɛ lɛ mli, ni tsɔɔ akɛ egbo Nyɔŋmɔ nɔ toi. (1 Mose 3:1-5; Kpojiemɔ 12:9) Enɛ ni Satan fee lɛ hewɔ lɛ, ete shi eshi hegbɛ ni Nyɔŋmɔ yɔɔ akɛ eyeɔ E-bɔɔ nii fɛɛ nɔ lɛ. Sɛɛ mli lɛ, Satan folɔ adesai hu anaa akɛ amɛjáa Nyɔŋmɔ yɛ nibii ni amɛnáa kɛjɛɔ Nyɔŋmɔ dɛŋ lɛ hewɔ.​—Hiob 1:9-11; 2:4, 5.

⁶ Te Yehowa baatsu atuatsemɔ nɛɛ he nii ehã tɛŋŋ? Kulɛ ebaanyɛ ekpata atuatselɔi lɛ ahiɛ. Shi no haŋ eyiŋtoo akɛ Adam kɛ Hawa bii ayi shikpɔŋ lɛ nɔ lɛ aba mli. No hewɔ lɛ, Yehowa kpɛ eyiŋ akɛ ekpataŋ atuatselɔi lɛ ahiɛ. Moŋ lɛ, egba gbalɛ kpele ko, no ji Eden shiwoo lɛ. Shiwoo nɛɛ ma nɔ aduatsɔ akɛ, nibii fɛɛ ni Nyɔŋmɔ ewie yɛ shikpɔŋ lɛ kɛ adesai ahe lɛ baaba mli.​—Nyɛkanea 1 Mose 3:15.

 7. Mɛni Eden shiwoo lɛ hã ana yɛ onufu lɛ kɛ eseshi lɛ he?

⁷ Nyɔŋmɔ tsɔ Eden shiwoo lɛ nɔ ebu onufu lɛ kɛ eseshi, ni ji Satan Abonsam kɛ mɛi fɛɛ ni baafata ehe kɛte shi amɛwo hegbɛ ni Nyɔŋmɔ yɔɔ akɛ eyeɔ nɔ lɛ gbele fɔ. Nyɔŋmɔ hã yoo lɛ seshi lɛ hegbɛ akɛ ekpata atuatselɔi nɛɛ ahiɛ. No hewɔ lɛ, Eden shiwoo lɛ hã ana akɛ abaajie Satan kɛ nibii fɛɛ ni ejɛ etuatsemɔ lɛ mli kɛba lɛ kɛya. Shiwoo lɛ hã ana gbɛ hu ni abaatsɔ nɔ afee enɛ.

 8. Mɛni wɔle yɛ yoo lɛ kɛ eseshi lɛ he?

⁸ Namɔ baafee yoo lɛ seshi lɛ? Esa akɛ seshi nɛɛ afee mumɔŋ bɔɔ nɔ. Mɛni hewɔ? Ejaakɛ seshi nɛɛ ‘baakpata’ Satan, ní lɛ hu eji mumɔŋ bɔɔ nɔ ni anaaa lɛ lɛ hiɛ. (Hebribii 2:14) Enɛ tsɔɔ akɛ, esa akɛ yoo ni baafɔ seshi nɛɛ hu afee mɔ ko ni anaaa lɛ. Onufu lɛ seshi lɛ tee nɔ eshwere, shi ayɔseee mɔ ni yoo lɛ kɛ eseshi lɛ ji kɛyashi afii 4,000 yɛ Eden shiwoo lɛ sɛɛ dani ayɔse. Yɛ nakai afii lɛ amli lɛ, Yehowa fee kpaŋmɔi babaoo ní hã ayɔse seshi lɛ, ni agbɛnɛ hu, no hã ana gbɛ ni Nyɔŋmɔ baatsɔ nɔ ejaje nibii ni Satan atuatsemɔ lɛ efite lɛ.

 9. Mɛni ji Nyɔŋmɔ kɛ Abraham kpaŋmɔ lɛ, ni mɛɛ be ebɔi nitsumɔ?

⁹ Eden shiwoo lɛ sɛɛ aaafee afii 2,000 lɛ, Yehowa kɛɛ Abraham akɛ eshi emaŋ ni ji Ur, ní eya Kanaan shikpɔŋ lɛ nɔ. (Bɔfoi lɛ Asaji 7:2, 3) Nyɔŋmɔ kɛɛ lɛ akɛ: “Jee oshikpɔŋ lɛ nɔ kɛ ojaku lɛ kɛ otsɛ we lɛ kɛya shikpɔŋ ni matsɔɔo lɛ nɔ. Ni mahã otsɔ jeŋmaŋ kpeteŋkpele, ni majɔɔo, ni mahã ogbɛ́i ada, ni oootsɔ jɔɔmɔ! Ni majɔɔ mɛi ni jɔɔo, ni mɔ ni lomɔɔo lɛ, malomɔ lɛ; ni omli aaajɛ ajɔɔ shikpɔŋ lɛ nɔ wekui fɛɛ.” (1 Mose 12:1-3) Atsɛɔ shi ni Nyɔŋmɔ wo Abraham lɛ akɛ, Nyɔŋmɔ kɛ Abraham kpaŋmɔ. Wɔleee be tuuntu ni Yehowa kɛ Abraham fee kpaŋmɔ nɛɛ klɛŋklɛŋ kwraa. Shi wɔle akɛ kpaŋmɔ nɛɛ bɔi nitsumɔ yɛ afi 1943 dani Kristo ba. Nakai beaŋ Abraham shi Haran ní efo Eufrate Faa lɛ. No mli lɛ eye afii 75.

10. (a) Mɛɛ gbɛ nɔ Abraham tsɔɔ akɛ eyɛ hemɔkɛyeli ni mli wa yɛ Nyɔŋmɔ shiwoi lɛ amli? (b) Mɛɛ saji ni kɔɔ yoo lɛ seshi lɛ he Yehowa hã ale fiofio?

¹⁰ Yehowa tĩ shiwoo lɛ mli ehã Abraham shii abɔ, ni be fɛɛ be lɛ, ekɛ nɔ ko hee fataa he. (1 Mose 13:15-17; 17:1-8, 16) Hemɔkɛyeli ni Abraham yɔɔ yɛ Nyɔŋmɔ shiwoi lɛ amli lɛ mli wa aahu akɛ, eesumɔ ni ekɛ ebinuu ni esumɔɔ waa lɛ ashã afɔle po. Enɛ tsirɛ Yehowa ni ema kpaŋmɔ lɛ nɔ aduatsɔ akɛ, shi ni ewo lɛ baaba mli. (Nyɛkanea 1 Mose 22:15-18; Hebribii 11:17, 18.) Be ni Nyɔŋmɔ kɛ Abraham kpaŋmɔ lɛ bɔi nitsumɔ lɛ, Yehowa tee nɔ ehã ale yoo lɛ seshi lɛ he saji ni he hiaa lɛ ahe nii fiofio. Ehã ana akɛ seshi lɛ baajɛ Abraham weku lɛ mli, mɛi babaoo baafee seshi nɛɛ, amɛbaasɔmɔ akɛ maŋtsɛmɛi, amɛbaakpata Nyɔŋmɔ henyɛlɔi fɛɛ hiɛ, ni amɛbaatsɔ jɔɔmɔ amɛhã adesai babaoo.

11, 12. Mɛɛ gbɛ nɔ Ŋmalɛ lɛ hãa wɔnaa akɛ nibii ni awie he yɛ Nyɔŋmɔ kɛ Abraham kpaŋmɔ lɛ mli lɛ baaba mli yɛ gbɛ ni da nɔ, ni te wɔbaaná enɛ he sɛɛ wɔhã tɛŋŋ?

¹¹ Nibii ni awie he yɛ Nyɔŋmɔ kɛ Abraham kpaŋmɔ lɛ mli lɛ ba mli klɛŋklɛŋ kwraa be ni Abraham shwiei lɛ anine shɛ Shiwoo Shikpɔŋ lɛ nɔ lɛ. Kɛ̃lɛ Biblia lɛ tsɔɔ hu akɛ, nɛkɛ kpaŋmɔ nɛɛ baaba mli yɛ gbɛ ni da kwraa fe nakai nɔ. (Galatabii 4:22-25) Bɔfo Paulo tsɔɔ mli akɛ, mɔ titri ni ji Abraham seshi lɛ ji Yesu Kristo. Mɛi krokomɛi ni fata seshi lɛ he ji Kristofoi 144,000 ní afɔ amɛ mu lɛ. (Galatabii 3:16, 29; Kpojiemɔ 5:9, 10; 14:1, 4) Yoo ni awie ehe yɛ Eden shiwoo lɛ mli lɛ ji Nyɔŋmɔ gbɛjianɔtoo lɛ fã ni yɔɔ ŋwɛi lɛ. Atsɛɔ yoo nɛɛ “ŋwɛi Yerusalem,” ni mumɔŋ bɔɔ nii anɔkwafoi ji emli bii. (Galatabii 4:26, 31) Taakɛ awo shi yɛ Nyɔŋmɔ kɛ Abraham kpaŋmɔ lɛ mli lɛ, yoo lɛ seshi lɛ baahã adesai aná jɔɔmɔi kɛya naanɔ.

¹² Ŋwɛi Maŋtsɛyeli lɛ damɔ Nyɔŋmɔ kɛ Abraham kpaŋmɔ lɛ nɔ, ni kpaŋmɔ nɛɛ ji nɔ ni hãa Maŋtsɛ lɛ kɛ ehefatalɔi lɛ hegbɛ akɛ amɛye nɔ yɛ nakai Maŋtsɛyeli lɛ mli. (Hebribii 6:13-18) Kpaŋmɔ nɛɛ baaya nɔ atsu nii kɛyashi mɛɛ be? Atsɔɔ mli yɛ 1 Mose 17:7 lɛ akɛ, eji “naanɔ kpaŋmɔ.” Ebaaya nɔ etsu nii kɛyashi Maŋtsɛyeli lɛ baakpata Nyɔŋmɔ henyɛlɔi lɛ ahiɛ, ní ejɔɔ mɛi fɛɛ ni yɔɔ shikpɔŋ lɛ nɔ lɛ. (1 Korintobii 15:23-26) Shi jɔɔmɔi ni kpaŋmɔ nɛɛ kɛbaaba lɛ baahi shi kɛya naanɔ. Nyɔŋmɔ kɛ Abraham kpaŋmɔ lɛ hãa wɔnaa akɛ, Yehowa yiŋtoo akɛ adesai ni feɔ jalɛ nii ‘ayi shikpɔŋ lɛ nɔ obɔ’ lɛ baaba mli.​—1 Mose 1:28.

13, 14. Mɛni nɔ aduatsɔ Nyɔŋmɔ kɛ David kpaŋmɔ lɛ maa?

¹³ Eden shiwoo lɛ kɛ Nyɔŋmɔ kɛ Abraham kpaŋmɔ lɛ hãa wɔnaa akɛ, Yehowa nɔyeli lɛ damɔ eshishitoo mlai ni ja lɛ anɔ. No hewɔ lɛ, Mesia Maŋtsɛyeli lɛ ní Nyɔŋmɔ to shishi lɛ hu damɔ nakai shishitoo mlai ni ja lɛ anɔ. (Lala 89:15) Ani be ko baashɛ ni Mesia Maŋtsɛyeli lɛ baafee nibii ni esaaa? Ani ehe baahia ni atsake Maŋtsɛyeli nɛɛ be ko? Kpaŋmɔ kroko maa nɔ aduatsɔ akɛ ebaŋ lɛ nakai kɔkɔɔkɔ.

¹⁴ Yehowa wo Maŋtsɛ David ni hi shi yɛ blema Israel lɛ shi. Atsɛɔ nakai shiwoo lɛ akɛ Nyɔŋmɔ kɛ David kpaŋmɔ. (Nyɛkanea 2 Samuel 7:12, 16.) Yehowa wo shi akɛ, Mesia lɛ baafee David seshinyo. (Luka 1:30-33) No hewɔ lɛ, Yehowa hã ale nibii pɔtɛɛ komɛi yɛ wekutɔkpaa ni Mesia lɛ baajɛ mli kɛba lɛ he. Yehowa kɛɛ David seshinyo nɛɛ baaná “gbɛnaa” ni baahã etsɔ Mesia Maŋtsɛyeli lɛ nɔ Maŋtsɛ. (Ezekiel 21:30-32) David maŋtsɛyeli lɛ baahi shi kɛya naanɔ, ejaakɛ Yesu, ni ji David seshinyo lɛ “aaahi shi daa, ni emaŋtsɛsɛi lɛ hu aaatamɔ hulu.” (Lala 89:35-38) Wɔbaanyɛ wɔná nɔmimaa akɛ, Mesia nɔyeli lɛ efeŋ nibii ni esaaa, ni jɔɔmɔi ni wɔbaaná yɛ enɔyeli lɛ shishi lɛ baahi shi kɛya naanɔ!

15-17. Yɛ kpaŋmɔ kɛhã osɔfoyeli tamɔ Melkizedek nɔ lɛ naa lɛ, mɛɛ gbɛnaa kroko seshi lɛ baaná? Mɛni hewɔ ebaaná gbɛnaa nɛɛ?

¹⁵ Nyɔŋmɔ kɛ Abraham kpaŋmɔ lɛ kɛ Nyɔŋmɔ kɛ David kpaŋmɔ lɛ maa nɔ aduatsɔ akɛ, yoo lɛ seshi lɛ baaye maŋtsɛ. Shi bɔ ni afee ni adesai fɛɛ aná he sɛɛ lɛ, esa akɛ seshi lɛ aná gbɛnaa kroko kɛfata maŋtsɛ ni eji lɛ he. Ehe miihia ni esɔmɔ akɛ osɔfo hu, ejaakɛ osɔfo pɛ baanyɛ ashã afɔle ni baahã adesai aye amɛhe kɛjɛ esha he, ní amɛbatsɔmɔ Yehowa weku ni feɔ esuɔmɔnaa nii yɛ ŋwɛi kɛ shikpɔŋ nɔ lɛ mli bii. Bɔ ni afee ni seshi lɛ anyɛ asɔmɔ akɛ osɔfo lɛ, Yehowa kpaŋ kpaŋmɔ kroko, no ji kpaŋmɔ kɛhã osɔfoyeli tamɔ Melkizedek nɔ lɛ.

¹⁶ Nyɔŋmɔ tsɔ Maŋtsɛ David nɔ egba akɛ, Lɛ diɛŋtsɛ ekɛ Yesu baakpaŋ kpaŋmɔ ko. Nakai kpaŋmɔ lɛ kɔɔ nibii enyɔ he: klɛŋklɛŋ lɛ, Yesu ‘baata Nyɔŋmɔ ninejurɔ nɔ,’ ni abaahã lɛ hegbɛ ní eye ehenyɛlɔi lɛ fɛɛ nɔ kunim; ni nɔ ni ji enyɔ lɛ, Yesu baaye “osɔfo kɛyashi naanɔ yɛ Melkizedek gbɛjianɔ lɛ naa.” (Nyɛkanea Lala 110:1, 2, 4.) Shi mɛni hewɔ Yesu baaye osɔfo “yɛ Melkizedek gbɛjianɔ lɛ naa” lɛ? Dani Abraham shwiei lɛ baaŋɔ Shiwoo Shikpɔŋ lɛ, no mli lɛ Melkizedek ji Salem maŋtsɛ, ni eji “Nyɔŋmɔ Ofe lɛ, osɔfo” hu. (Hebribii 7:1-3) Yehowa diɛŋtsɛ hala lɛ akɛ maŋtsɛ kɛ osɔfo fɛɛ, ni Melkizedek pɛ ji mɔ ni hi shi dani Yesu ba ní ná gbɛnai enyɔ nɛɛ fɛɛ. Kɛfata he lɛ, akɛni nɔ ko nɔ ko bɛ ni tsɔɔ akɛ mɔ ko ná gbɛnai enyɔ nɛɛ dani afɔ Melkizedek kɛ no sɛɛ fɛɛ hewɔ lɛ, etamɔ nɔ ni eji “osɔfo daa nɛɛ,” loo kɛmiiya naanɔ.

¹⁷ Nyɔŋmɔ diɛŋtsɛ tsɔ kpaŋmɔ nɛɛ nɔ ehala Yesu akɛ osɔfo. Yesu baaye ‘osɔfo kɛya naanɔ yɛ Melkizedek gbɛjianɔ lɛ naa.’ (Hebribii 5:4-6) Kpaŋmɔ nɛɛ tsɔɔ faŋŋ akɛ, Yehowa miima nɔ aduatsɔ akɛ ebaatsɔ Mesia Maŋtsɛyeli lɛ nɔ ehã yiŋ ni eto kɛhã adesai kɛ shikpɔŋ lɛ aba mli.

18, 19. (a) Mɛɛ gbɛ nɔ kpaŋmɔi ni wɔsusu he lɛ kɔɔ Maŋtsɛyeli lɛ he? (b) Mɛni he wɔbaasusu yɛ nikasemɔ ni nyiɛ sɛɛ lɛ mli?

¹⁸ Kɛbashi he ni wɔshɛ nɛɛ, wɔkase bɔ ni kpaŋmɔi nɛɛ ateŋ eko fɛɛ eko kɔɔ Mesia Maŋtsɛyeli lɛ he, ni agbɛnɛ hu, wɔna akɛ Maŋtsɛyeli lɛ damɔ kpaŋmɔi nɛɛ anɔ. Eden shiwoo lɛ maa nɔ aduatsɔ kɛhãa wɔ akɛ, Yehowa baatsɔ yoo lɛ seshi lɛ nɔ ehã yiŋ ni eto kɛhã shikpɔŋ lɛ kɛ adesai lɛ aba mli. Nyɔŋmɔ kɛ Abraham kpaŋmɔ lɛ hu hãa wɔnaa mɔ ni seshi lɛ ji kɛ nɔ ni seshi lɛ baatsu.

¹⁹ Nyɔŋmɔ kɛ David kpaŋmɔ lɛ hãa wɔleɔ nibii babaoo yɛ wekutɔkpaa ni Mesia lɛ baajɛ mli kɛba lɛ he. Nakai kpaŋmɔ lɛ hu hãa Yesu hegbɛ akɛ eye shikpɔŋ lɛ nɔ kɛya naanɔ. Kpaŋmɔ kɛhã osɔfoyeli tamɔ Melkizedek nɔ lɛ maa nɔ aduatsɔ akɛ, seshi lɛ baasɔmɔ akɛ osɔfo. Shi jeee Yesu pɛ baaye ebua adesai koni amɛye emuu ekoŋŋ. Ahala mɛi krokomɛi hu ní amɛsɔmɔ akɛ maŋtsɛmɛi kɛ osɔfoi. Nɛgbɛ ahala amɛ kɛjɛ? Wɔbaasusu enɛ he yɛ nikasemɔ ni nyiɛ sɛɛ lɛ mli.