Daamɔ Shi Shiŋŋ Oha Heyeli Ni Nyɔŋmɔ Kɛha Lɛ!
“Odehe Kristo eha wɔye, nɔ hewɔ lɛ nyɛdamɔa shi shiŋŋ, ni nyɛkahaa abɔa nyɛ nyɔŋyeli apã lɛ dɔŋŋ.”—GALATABII 5:1.
1, 2. Te fee tɛŋŋ ni heyeli ni Nyɔŋmɔ kɛha lɛ laaje?
YEHOWA webii eye amɛhe. Shi amɛtaooo ni amɛye amɛhe kɛjɛ Nyɔŋmɔ he, ejaakɛ no baatsɔɔ nyɔji ni amɛaatsɔmɔ amɛha Satan. Amɛsumɔɔ wekukpaa ni bɛŋkɛ kpaakpa ni amɛkɛ Yehowa naa lɛ ni amɛmli filiɔ amɛ yɛ heyeli ni ekɛhaa amɛ lɛ mli.
2 Wɔ klɛŋklɛŋ fɔlɔi, Adam kɛ Hawa, laaje heyeli ni Nyɔŋmɔ kɛhaa lɛ kɛtsɔ eshafeemɔ kɛ nyɔji ni amɛbatsɔmɔ amɛha esha, gbele kɛ Abonsam lɛ nɔ. (1 Mose 3:1-19; Romabii 5:12) Ejaakɛ Satan ha jeŋ muu lɛ fɛɛ yi eshafeemɔ gbɛ ni kɛ mɔ yaa hiɛkpatamɔ mli lɛ nɔ! Shi mɛi ni damɔɔ shi shiŋŋ amɛhaa heyeli ni Nyɔŋmɔ kɛha lɛ nyiɛɔ yɛ gbɛ ni kɛ mɔ yaa naanɔ wala mli lɛ nɔ.—Mateo 7:13, 14; 1 Yohane 5:19.
Heyeli Kɛmiijɛ Nyɔŋyeli Mli
3. Mɛɛ hiɛnɔkamɔ Nyɔŋmɔ kɛha yɛ Eden?
3 Yehowa eto eyiŋ akɛ adesai ni kɛ woo haa egbɛi lɛ aye amɛhe kɛjɛ nyɔŋyeli kɛha Satan, esha kɛ gbele dɛŋ. Akɛ nakai hiɛnɔkamɔ lɛ ha beni Nyɔŋmɔ kɛɛ onufu ni Satan kɛ lɛ tsu nii yɛ Eden lɛ akɛ: “Mikɛ nyɛɛ aaaŋmɛ okɛ yoo lɛ teŋ, kɛ oseshi kɛ eseshi teŋ; eeetswa oyitso nɔ, ni bo hu oootswa enanetsitsi nɔ” lɛ. (1 Mose 3:14, 15) Yesu Kristo, Seshi ni jɛ Yehowa ŋwɛi gbɛjianɔtoo lɛ mli lɛ na nɔ̃ akɛ mɔ ni atswa enanetsitsi nɔ̃ beni egbo yɛ tso nɔ lɛ, shi Nyɔŋmɔ tsɔ nakai gbɛ nɔ ekɛ kpɔmɔ afɔleshaa nɔ̃ ha koni akɛha adesai ni heɔ yeɔ lɛ aye amɛhe kɛjɛ esha kɛ gbele mli. (Mateo 20:28; Yohane 3:16) Yɛ be ni sa mli lɛ, Yesu baatswa Satan, Onufu lɛ diɛŋtsɛ lɛ yitso nɔ.—Kpojiemɔ 12:9.
4. Mɛɛ heyeli Abraham na mli ŋɔɔmɔ, ni mɛɛ shiwoo Yehowa kɛha lɛ?
4 Beni akɛ shiwoo lɛ ha yɛ Eden lɛ sɛɛ aaafee afii 2,000 lɛ, “Nyɔŋmɔ shieŋtsɛ” Abraham bo Nyɔŋmɔ toi ni eshi Ur maŋ lɛ koni eya he kroko. (Yakobo 2:23; Hebribii 11:8) No hewɔ lɛ enine shɛ heyeli ni Nyɔŋmɔ kɛhaa lɛ nɔ ni ehiii shi akɛ Satan jeŋ apasa jamɔ, emaŋkwramɔ ni ekpɔtɔ, kɛ hiɛjoomɔ jarayeli lɛ nyɔŋ dɔŋŋ. Nyɔŋmɔ kɛ shiwooi krokomɛi akɛ wekui kɛ jeŋmaji fɛɛ baana jɔɔmɔ amɛha amɛhe kɛtsɔ Abraham kɛ e-Seshi lɛ nɔ lɛ fata Eden gbalɛ lɛ he. (1 Mose 12:3; 22:17, 18) Abraham ye ehe kɛjɛ fɔbuu shishi ejaakɛ ‘ehe Yehowa, ni bu enɛ akɛ jalɛ kɛha lɛ lɛ eye.’ (1 Mose 15:6) Ŋmɛnɛ, wekukpaa ni bɛŋkɛ kpaakpa ni akɛ Yehowa aaana lɛ hu kɛ heyeli ni Nyɔŋmɔ kɛhaa ni haa mɔ yeɔ ehe kɛjɛɔ fɔbuu kɛ nyɔŋyeli kɛha jeŋ ni ka Satan hewalɛ mli lɛ mli baa.
Okadi loo Nɔkwɛmɔ Nɔ ko ni Heɔ Mɔ Jwɛŋmɔ Fɛɛ
5. Mɛɛ shihilɛi komɛi ni ba kɔɔ Isak fɔmɔ lɛ he?
5 Bɔni afee ni Abraham ana seshi lɛ, eŋa Sara ni fɔɔɔ lɛ kɛ etsulɔyoo Hagar ha lɛ akɛ bifɔlɔ. Abraham kɛ lɛ fɔ Ishmael, shi Nyɔŋmɔ halaaa lɛ akɛ shiwoo Seshi lɛ. Shi moŋ, beni Abraham eye afii 100 ni Sara ena 90 lɛ, Yehowa ha amɛnyɛ amɛfɔ binuu ni awo lɛ gbɛi Isak. Beni Ishmael ye Isak he fɛo lɛ, ashwie Hagar kɛ ebi lɛ kɛtee, ni ebashwɛ Abraham bi kɛtsɔ yoo ni yeɔ ehe ni ji Sara nɔ lɛ akɛ Abraham seshi diɛŋtsɛ ni ŋwanejee ko bɛ he. Taakɛ Abraham fee lɛ, Isak hu kɛ hemɔkɛyeli tsu nii ni enine shɛ heyeli ni Nyɔŋmɔ kɛhaa lɛ nɔ.—1 Mose 16:1-16; 21:1-21; 25:5-11.
6, 7. Apasa tsɔɔlɔi etsɔ Galata Kristofoi lɛ ateŋ mɛi komɛi ayiŋ yɛ mɛni he, shi mɛni Paulo tsɔɔ mli?
6 Nɛkɛ saji nɛɛ feɔ nibii ni he hiaa mɛi ni sumɔɔ heyeli ni Nyɔŋmɔ kɛha lɛ waa lɛ ahe mfoniri. Ayɔse enɛ yɛ wolo ni bɔfo Paulo ŋma eyaha asafoi ni yɔɔ Galatia aaafee afi 50 kɛbashi 52 Ŋ.B. lɛ mli. No mli lɛ nɔyeli kuu lɛ ekpɛ amɛyiŋ akɛ ketiafoo he ehiaaa Kristofoi. Shi amale tsɔɔlɔi komɛi etsɔ Galatabii lɛ ateŋ mɛi komɛi ayiŋ akɛ eji Kristojamɔ mli nɔ ko ni he hiaa.
7 Paulo kɛɛ Galatabii lɛ akɛ: Abuɔ mɔ ko jalɔ kɛtsɔɔ hemɔkɛyeli yɛ Kristo mli lɛ nɔ, jeee kɛtsɔ Mose Mla lɛ mli nitsumɔi anɔ. (Ga 1:1–3:14) Mla lɛ haaa shiwoo ni kɔɔ Abraham kpaŋmɔ lɛ he lɛ afee efolo, shi moŋ eha nɔtɔmɔi je kpo faŋŋ, ni etsu nii akɛ tsɔɔlɔ ni kɛ mɔ yaa Kristo ŋɔɔ. (Ga 3:15-25) Yesu tsɔ egbele nɔ ekpɔ mɛi ni yɔɔ Mla shishi lɛ, eha amɛnyɛ amɛtsɔmɔ Nyɔŋmɔ bii. No hewɔ lɛ, ni aaaku sɛɛ kɛaaya gbɛjianɔtoo ko ni kɔɔ gbii, nyɔji, bei, kɛ afii ayeli he lɛ baatsɔɔ akɛ aaku sɛɛ aya nyɔŋyeli mli ekoŋŋ. (Ga 4:1-20) Kɛkɛ ni Paulo ŋma akɛ:
8, 9. (a) Tsɔɔmɔ nɔ ni Paulo kɛɛ yɛ Galatabii 4:21-26 lɛ mli kuku yɛ bo diɛŋtsɛ owiemɔi amli (b) Namɔ loo mɛni akɛfee Abraham kɛ Sara he mfoniri yɛ nɛkɛ okadi loo nɔkwɛmɔ nɔ nɛɛ mli, ni namɔ ji shiwoo Seshi lɛ?
8 “Nyɛ mɛi ni nyɛtaoɔ akɛ nyɛhi mla shishi lɛ, nyɛkɛɛa mi, Ani nyɛnuuu Mla lɛ lo? Ejaakɛ aŋma akɛ Abraham yɛ bii enyɔ, Mɔ kome lɛ [Ishmael], ekɛ tsulɔyoo lɛ [Hagar] fɔ lɛ ni mɔ kome hu [Isak], ekɛ odehe lɛ [Sara] fɔ lɛ. Shi agbɛnɛ lɛ, mɔ ni ekɛ tsulɔyoo lɛ fɔ lɛ, afɔ lɛ yɛ heloo naa; shi mɔ ni ekɛ odehe lɛ fɔ lɛ, afɔ lɛ yɛ shiwoo lɛ naa. Nɛkɛ nii nɛɛ aŋɔbuɔ abɛ. Enɛɛmɛi ji kpaŋmɔi enyɔ lɛ: ekome lɛ [Mla kpaŋmɔ lɛ] jɛ Sinai gɔŋ lɛ nɔ (he ni Nyɔŋmɔ kɛ Israelbii lɛ fee nakai kpaŋmɔ lɛ], ni nyɔŋyeli mli efɔɔ ewoɔ: ni no ji Hagar. [Kpaŋmɔ kroko lɛ ji nɔ ni akɛ Abraham fee yɛ e-Seshi lɛ he lɛ.] Ejaakɛ Hagar ji Sinai gɔŋ lɛ yɛ Arabia; shi ekɛ ŋmɛnɛŋmɛnɛ Yerusalem lɛ tsaa nɔ, ejaakɛ ekɛ ebii lɛ [Abraham, Isak kɛ Yakob seshibii] ji nyɔji. Shi ŋwɛi Yerusalem lɛ ji odehe lɛ, mɔ nɔŋŋ ni ji wɔ fɛɛ wɔnyɛ lɛ.”—Galatabii 4:21-26.
9 Abraham feɔ Yehowa he mfoniri yɛ nɛkɛ okadi nɔkwɛmɔ nɔ nɛɛ mli. “Odehe lɛ,” Sara, feɔ Nyɔŋmɔ “yoo” loo jeŋ muu fɛɛ gbɛjianɔtoo krɔŋkrɔŋ lɛ he mfoniri. Efɔ Kristo, nakai okadi yoo lɛ kɛ Abraham Kpeteŋkpele lɛ Seshi lɛ. (Galatabii 3:16) Bɔni afee ni etsɔɔ gbɔmɛi lɛ heyeli gbɛ kɛmiijɛ jamɔ ni he tseee, esha, kɛ Satan dɛŋ lɛ, Yesu tsɔɔ anɔkwale lɛ ni ekpa apasa jamɔ he mama, shi Yerusalem kɛ ebii lɛ tee nɔ amɛhi jamɔ nyɔŋyeli shishi ejaakɛ amɛkpoo lɛ. (Mateo 23:37, 38) Yesu sɛɛnyiɛlɔi ni ji Yudafoi lɛ ye amɛhe kɛjɛ Mla lɛ ni jie amɛ nyɔŋyeli kɛha emuu ni ayeee, esha kɛ gbele lɛ shishi. Ni gbɔmɛi fɛɛ ni kpɛlɛɔ Yesu nɔ akɛ Mɔ ni Nyɔŋmɔ “yoo” lɛ fɔ lɛ koni ebafee Mesia Maŋtsɛ kɛ Mɔ ni Haa Mɛi Yeɔ Amɛhe ni ‘jajeɔ heyeli kɛhaa nomii’ lɛ eye amɛhe lɛlɛŋ!—Yesaia 61:1, 2; Luka 4: 18, 19.
Kwa Nyɔŋyeli Apã Lɛ
10, 11. Kristo ha esɛɛnyiɛlɔi lɛ ye amɛhe kɛjɛ mɛɛ nyɔŋyeli apã shishi, ni mɛɛ nibii ni tamɔ nakai abaanyɛ ana ŋmɛnɛ?
10 Kɛha mɛi ni feɔ Abraham seshibii lɛ kɛfata Kristo, Isak Kpeteŋkpele lɛ he lɛ, Paulo kɛɔ akɛ: “Shi ŋwɛi Yerusalem lɛ ji odehe lɛ, mɔ nɔŋŋ ni ji wɔnyɛ lɛ. . . . Shi, anyɛmimɛi, wɔ lɛ shiwoo lɛ bii ji wɔ tamɔ Isak. Shi belɛ taakɛ bɔ ni no be lɛ mli hu, mɔ ni afɔ lɛ yɛ heloo naa lɛ [lshmael] wa mɔ ni afɔ lɛ yɛ mumɔ naa [Isak] lɛ yi lɛ, nakai nɔŋŋ kɛ̃ yɔɔ ŋmɛnɛ hu. . . . No hewɔ lɛ, anyɛmimɛi, wɔjeee tsulɔyoo lɛ bii, shi moŋ odehe lɛ bii ji wɔ. Odehe [kɛmiijɛ Mla lɛ shishi] Kristo eha wɔye, no hewɔ lɛ nyɛdamɔa shi shiŋŋ, ni nyɛkahaa abɔa nyɛ nyɔŋyeli apã lɛ dɔŋŋ.”—Galatabii 4:26–5:1.
11 Eji Yesu sɛɛnyiɛlɔi lɛ eko ba ehe shi eha Mla lɛ kulɛ abaabɔ lɛ nyɔŋyeli apã lɛ. Apasa jamɔ ji ŋmɛnɛŋmɛnɛ beaŋ nyɔŋyeli apã, ni Kristendom tamɔ blema Yerusalem kɛ ebii lɛ. Shi mɛi ni afɔ amɛ mu lɛ ji ŋwɛi Yerusalem lɛ, Nyɔŋmɔ ŋwɛi gbɛjianɔtoo ni eye ehe lɛ bii. Amɛ kɛ nanemɛi heyelilɔi ni yɔɔ shikpɔŋ nɔ shihilɛ he hiɛnɔkamɔ lɛ jeee je nɛɛ fa ni amɛtsɔmɔko Satan nyɔji. (Yohane 14:30; 15:19; 17:14, 16) Akɛni anɔkwale lɛ kɛ Kristo afɔleshaa lɛ ekpɔ wɔ hewɔ lɛ, nyɛhaa wɔdamɔa shi shiŋŋ wɔhaa heyeli ni Nyɔŋmɔ kɛha wɔ lɛ.
Shi ni Wɔɔdamɔ Wɔha Heyeli ni Nyɔŋmɔ Kɛha Lɛ
12. Mɛni ji gbɛ ni heyelilɔi tsɔɔ nɔ, ni mɛni abaasusu he agbɛnɛ?
12 Akpekpei abɔ miina anɔkwa heyeli mli ŋɔɔmɔ bianɛ akɛ Yehowa Odasefoi. Akɛ akpekpei abɔ krokomɛi hu miikase Biblia lɛ, ni amɛteŋ mɛi pii tamɔ “mɛi abɔ ni ajie ato aha naanɔ wala.” Kɛ amɛbatsɔmɔ heyelilɔi lɛ, amɛbaadamɔ shi amɛha heyeli ni Nyɔŋmɔ kɛha lɛ kɛtsɔ baptisimɔ ni amɛaafee nɔ. (Bɔfoi lɛ Asaji 13:48; 18:8) Shi mɛɛ nifeemɔi tsɔɔ Kristofoi abaptisimɔ hiɛ?
13. Mɛɛ tsakpaa ka nilee kɛ baptisimɔ teŋ?
13 Dani aaabaptisi mɔ ko lɛ, esa akɛ mɔ lɛ ana Ŋmalɛi lɛ ahe anɔkwale nilee ni ekɛtsu nii. (Efesobii 4:13) No hewɔ lɛ, Yesu kɛɛ esɛɛnyiɛlɔi lɛ akɛɛ “Nyɛyaa ni nyɛyafea jeŋmaji fɛɛ mikaselɔi, nyɛbaptisia amɛ nyɛwoa Tsɛ lɛ kɛ Bi lɛ kɛ mumɔ krɔŋkrɔŋ lɛ gbɛi amli, ni nyɛtsɔɔ amɛ ni amɛye nii fiaa ni mikɛɛ nyɛ lɛ nɔ.”—Mateo 28:19, 20.
14. Ni aaabaptisi mɔ ko yɛ Tsɛ lɛ, kɛ Bi lɛ, kɛ mumɔ krɔŋkrɔŋ lɛ gbɛi amli lɛ biɔ ni ana mɛɛ nilee?
14 Ni aaabaptisi mɔ ko yɛ Tsɛ lɛ gbɛi amli lɛ tsɔɔ akɛ ni aaakpɛlɛ Yehowa gbɛhe kɛ hegbɛ akɛ Nyɔŋmɔ, Bɔlɔ, kɛ Jeŋ Muu Fɛɛ Maŋtsɛ lɛ nɔ. (1 Mose 17:1; 2 Maŋtsɛmɛi 19:15; Kpojiemɔ 4:11) Baptisimɔ yɛ Bi lɛ gbɛi amli lɛ biɔ ni ayoo Kristo gbɛhe kɛ ehegbɛ akɛ bɔɔ nɔ ni awo enɔ gojoo, Mesia Maŋtsɛ lɛ, kɛ mɔ ni Nyɔŋmɔ etsɔ enɔ ekɛ “kpɔmɔ nɔ ni yeɔ egbɔ” eha. (1 Timoteo 2: 5, 6; Daniel 7:13, 14; Filipibii 2:9-11) Mɔ ni abaptisi lɛ yɛ mumɔ krɔŋkrɔŋ lɛ gbɛi amli lɛ yɔseɔ akɛ eji Nyɔŋmɔ nifeemɔ hewalɛ ni Yehowa kɛtsu nii yɛ nibɔɔ mli ni no ekɛkanya Biblia ŋmalɔi, kɛ agbɛnɛ yɛ gbɛi krokomɛi hu nɔ. (1 Mose 1:2; 2 Petro 1:21) Lɛlɛŋ, nibii babaoo yɛ ni abaakase yɛ Nyɔŋmɔ, Kristo, kɛ mumɔ krɔŋkrɔŋ lɛ he.
15. Mɛni hewɔ esa akɛ mɔ ko ana hemɔkɛyeli dani abaptisi lɛ lɛ?
15 Dani baptisimɔ aaaba lɛ, esa akɛ mɔ lɛ ana hemɔkɛyeli ni damɔ anɔkwa nilee nɔ. “Shi kɛ hemɔkɛyeli bɛ lɛ, anyɛŋ [Yehowa] Nyɔŋmɔ hiɛ asa.” (Hebribii 11:6) Mɔ ni naa Nyɔŋmɔ, Kristo, kɛ ŋwɛi yiŋtoo mli hemɔkɛyeli lɛ baasumɔ ni efee Yehowa Odasefoi lɛ ateŋ mɔ kome, ni hiɔ shi yɛ Nyɔŋmɔ Wiemɔ lɛ kɛ gbeekpamɔ naa, ni naa sanekpakpa lɛ shiɛmɔ mli gbɛfaŋnɔ ni mɔɔ shi. Ni ebaawie Yehowa maŋtsɛyeli anunyam lɛ hu he.—Lala 145:10-13; Mateo 24:14.
16. Mɛni ji tsuitsakemɔ, ni ekɔɔ Kristofoi abaptisimɔ he yɛ mɛɛ gbɛ nɔ?
16 Tsuitsakemɔ hu ji taomɔ nii kroko kɛha baptisimɔ. Ni aaatsake tsui lɛ tsɔɔ ni “mɔ ko aaatsake ejwɛŋmɔ yɛ tsutsu nifeemɔ (loo nɔ ni eka feemɔ) he, loo yɛ jeŋba he, yɛ heshwamɔ loo mɔ ko hiɛ ni anyɛɛɛ asa he,” aloo ni “aaanu dɔlɛ, awerɛho, loo henilee mli naagba he yɛ nɔ ni mɔ ko fee loo eku ehiɛ eshwie nɔ ni efeee he.” Ehe bahia ni klɛŋklɛŋ afii oha lɛ mli Yudafoi lɛ atsake amɛtsui yɛ eshai ni amɛfee amɛshi Yesu Kristo lɛ he. (Bɔfoi lɛ Asaji 3:11-26) Heyelilɔi komɛi ni yɔɔ Korinto lɛ tsake amɛtsui yɛ ajwamaŋbɔɔ, wɔŋjamɔ, gbalafitemɔ, hii kɛ hii ni kɛ amɛhe feɔ yakayakanii, juu, hiɛjoomɔ, daatɔɔ, jɛmɔ, kɛ amimyeli he. Nɔ ni jɛ mli ba ji akɛ “aju amɛhe” yɛ Yesu la lɛ mli, ‘atsuu amɛhe’ akɛ mɛi ni atu amɛ ama afa kɛha Yehowa sɔɔmɔ, ni ‘abu amɛ bem’ yɛ Yesu Kristo kɛ Nyɔŋmɔ mumɔ lɛ gbɛi amli. (1 Korintobii 6:9-11) No hewɔ lɛ tsuitsakemɔ ji gbɛ ni atsɔɔ nɔ akɛnaa henilee kpakpa kɛ heyeli ni Nyɔŋmɔ kɛhaa ni haa mɔ yeɔ ehe kɛjɛɔ esha he fɔyeli ni haoɔ mɔ lɛ mli.—1 Petro 3:21.
17. Tsakemɔ tsɔɔ mɛni, ni mɛni no biɔ yɛ mɔ ni toɔ gbɛjianɔ koni abaptisi lɛ lɛ dɛŋ?
17 Esa akɛ tsakemɔ hu aba dani abaanyɛ abaptisi mɔ ko akɛ Yehowa Odasefoi lɛ ateŋ mɔ kome. Mɔ ni eshwa ehe lɛ tsakemɔ baa yɛ be mli ni ekpoo egbɛ fɔŋ lɛ ni etswa efai shi akɛ ebaafee nɔ ni ja lɛ. Hebri kɛ Hela wiemɔi ni kɔɔ tsakemɔ be lɛ shishi ji “kpalemɔ, tsɔ he kɛba, loo sɛɛkuu.” Kɛ akɛtsu nii yɛ mumɔŋ shishinumɔ kpakpa naa lɛ, enɛ kɔɔ gbɛ fɔŋ nɔ ni ajeɔ kɛ Nyɔŋmɔ ŋɔɔ ni akuɔ sɛɛ ayaa lɛ he. (1 Maŋtsɛmɛi 8:33, 34) Tsakemɔ biɔ “nitsumɔi ni sa tsuitsakemɔ,” akɛ wɔfee nɔ ni Nyɔŋmɔ fãa lɛ, wɔkpoo apasa jamɔ, ni wɔkudɔ wɔtsui kɛya Yehowa he ni ekagba afa koni wɔsɔmɔ lɛ pɛ. (Bɔfoi lɛ Asaji 26:20; 5 Mose 30:2, 8, 10; 1 Samuel 7:3) Enɛ biɔ “tsui hee kɛ mumɔ hee,” ebiɔ tsakemɔ yɛ bɔ ni ajwɛŋɔ ahaa lɛ kɛ subaŋ mli, kɛ yiŋtoo yɛ shihilɛ hu mli. (Ezekiel 18:31) Su kɛ baŋ hee ni jɛɔ mli baa lɛ kɛ sui ni Nyɔŋmɔ gbeyeishemɔ yɔɔ mli yeɔ subaŋi ni Nyɔŋmɔ gbeyeishemɔ bɛ mli lɛ anajiaŋ. (Kolosebii 3:5-14) Hɛɛ, anɔkwa tsuitsakemɔ haa mɔ ko ‘kuɔ esɛɛ’ diɛŋtsɛ.—Bɔfoi lɛ Asaji 3:19.
18. Mɛni hewɔ esa akɛ afee henɔjɔɔmɔ aha Nyɔŋmɔ yɛ sɔlemɔ mli lɛ, ni nifeemɔ nɛɛ tsɔɔ mɛni?
18 Esa akɛ henɔjɔɔmɔ kɛha Nyɔŋmɔ yɛ sɔlemɔ mli atsɔ baptisimɔ hiɛ. (Okɛto Luka 3:21, 22 he.) Henɔjɔɔmɔ tsɔɔ he ni atuɔ amaa afa kɛhaa yiŋtoo krɔŋkrɔŋ ko. Bɔ ni nifeemɔ nɛɛ he hiaa ha hewɔ lɛ, esa akɛ wɔjie wɔyiŋkpɛɛ akɛ wɔɔtu wɔhe wɔha Nyɔŋmɔ kwraa ni wɔsɔmɔ lɛ kɛya naanɔ lɛ kpo yɛ sɔlemɔ mli. (5 Mose 5:8, 9; 1 Kronika 29:10-13) Shi wɔjɔɔɔ wɔhe nɔ wɔhaaa nitsumɔ ko, shi moŋ kɛha Nyɔŋmɔ diɛŋtsɛ. Aha nakai sane lɛ mli fee faŋŋ yɛ Buu Mɔɔ Asafo lɛ klɛŋklɛŋ sɛinɔtalɔ, Charles Taze Russell yarafeemɔ shishi. Yɛ nakai be lɛ mli, yɛ 1916 lɛ, Asafo lɛ woloŋmalɔ kɛ shikatolɔ, W. E. Van Amburgh kɛɛ: “Nɛkɛ jeŋ muu fɛɛ nitsumɔ kpeteŋkpele nɛɛ jeee gbɔmɔ kome nitsumɔ. Eda kwraa tsɔ kɛha nakai feemɔ. Eji Nyɔŋmɔ nitsumɔ ni etsakeee. Nyɔŋmɔ kɛ tsuji babaoo etsu nii yɛ blema, ni ŋwanejee ko bɛ he akɛ E-kɛ pii baatsu nii yɛ wɔsɛɛ be mli. Wɔjɔɔɔ wɔhe nɔ wɔhaaa gbɔmɔ ko, jeee kɛha gbɔmɔ nitsumɔ ko, shi moŋ koni wɔfee Nyɔŋmɔ suɔmɔnaa nii, taakɛ Lɛ eeetsɔ E-Wiemɔ kɛ ŋwɛi hiɛnyiɛmɔ nɔ ejie lɛ kpo etsɔɔ wɔ lɛ. Nyɔŋmɔ ka he eji mɔ ni kudɔɔ nibii lolo.” Shi mɛni hu esa akɛ afee yɛ henɔjɔɔmɔ kɛ Nyɔŋmɔ hamɔ nɛɛ he?
19. (a) Aŋkroaŋkroi yeɔ amɛhe nɔ ni amɛjɔɔ amɛha Yehowa lɛ he odase yɛ faŋŋ yɛ mɛɛ gbɛ nɔ? (b) Nu mli baptisimɔ feɔ mɛni he okadi?
19 Akɛ odaseyeli ni tsɔɔ akɛ ajɔɔ he nɔ aha Nyɔŋmɔ haa yɛ gbɔmɛi ahiɛ beni abaptisiɔ mɔ lɛ. Baptisimɔ ji okadi ni tsɔɔ akɛ mɔ ni amiiɔ lɛ nu lɛ ejɔɔ ehe nɔ kwraa ehe Yehowa Nyɔŋmɔ kɛtsɔ Yesu Kristo nɔ. (Okɛto Mateo 16:24 he.) Kɛ afũ mɔ ni taoɔ baptisimɔ lɛ loo akɛ lɛ wo nu lɛ shishi ni awo enɔ ekoŋŋ lɛ, egboɔ yɛ okadi gbɛ nɔ kɛhaa etsutsu shihilɛ lɛ ni ateeɔ lɛ shi kɛbaa shihilɛ hee mli, koni agbɛnɛ ebafee Nyɔŋmɔ suɔmɔnaa nii kwraa. (Okɛto Romabii 6:4-6 he.) Beni abaptisi Yesu lɛ, ekɛ ehe ha eŋwɛi Tsɛ lɛ kwraa kɛmɔ shi. (Mateo 3:13-17) Ni Ŋmalɛi lɛ tsɔɔ shii abɔ akɛ esa akɛ abaptisi heyelilɔi ni sa lɛ. (Bɔfoi lɛ Asaji 8:13; 16:27-34; 18:8) No hewɔ lɛ, dani mɔ ko aaatsɔ Yehowa Odasefoi lɛ ateŋ mɔ kome ŋmɛnɛ lɛ, esa akɛ efee heyelilɔ ni yɔɔ hemɔkɛyeli diɛŋtsɛ ni eha abaptisi lɛ.—Okɛto Bɔfoi lɛ Asaji 8:26-39 he.
Daamɔ Shi Shiŋŋ!
20. Mɛni ji Biblia mli nɔkwɛmɔ nii komɛi ni yeɔ odase akɛ abaajɔɔ wɔ yɛ shi ni wɔdamɔɔ wɔhaa heyeli ni Nyɔŋmɔ kɛha akɛ Yehowa Odasefoi ni abaptisi amɛ lɛ hewɔ?
20 Kɛji akɛ okɔ shidaamɔ ni yɔɔ shiŋŋ kɛha heyeli ni Nyɔŋmɔ kɛha kɛtsɔ Yehowa Odasefonyo ni abaptisiɔ ni oji nɔ lɛ, ebaajɔɔ bo taakɛ ejɔɔ eblema tsuji lɛ. Akɛ nɔkwɛmɔ nɔ lɛ, Yehowa kɛ binuu ni sheɔ Nyɔŋmɔ gbeyei, Isak jɔɔ Abraham kɛ Sara ni amɛgbɔlɔ lɛ. Gbalɔ Mose tsɔ hemɔkɛyeli nɔ ehala akɛ ekɛ Nyɔŋmɔ webii aaana amanehulu “fe nɔ ni eeeye esha mli ŋɔɔmɔ be fioo ko lɛ; ebuɔ Kristo [loo Mɔ ni Nyɔŋmɔ Efɔ lɛ Mu, ni efee ehe mfoniri yɛ blema lɛ] ahorabɔɔ lɛ akɛ nii babaoo fe Mizraim jwetrii lɛ.” (Hebribii 11:24-26) Mose na hegbɛ akɛ Yehowa kɛ lɛ aaatsu nii koni enyiɛ Israelbii lɛ ahiɛ kɛjɛ Mizraimbii anyɔŋyeli shishi. Agbɛnɛ hu, akɛni esɔmɔ Nyɔŋmɔ yɛ anɔkwayeli mli hewɔ lɛ, abaatee lɛ shi ni ebaasɔmɔ akɛ “lumɛi yɛ shikpɔŋ lɛ nɔ fɛɛ” lɛ ateŋ mɔ kome, yɛ Mose Kpeteŋkpele, Yesu Kristo shishi.—Lala 45:17; 5 Mose 18:17-19.
21. Mɛɛ nɔkwɛmɔ nii ni woɔ mɔ hewalɛ akɛha yɛ blema yei ni sheɔ Nyɔŋmɔ gbeyei lɛ ahe?
21 Kristofoi ni amɛjɔɔ amɛhe nɔ ŋmɛnɛ lɛ hu baanyɛ ana hewalɛwoo kɛtsɔ yei ni baye amɛhe ni amɛna miishɛɛ diɛŋtsɛ lɛ ahesusumɔ nɔ. Mɛi ni fata amɛhe ji Moab yoo Rut ni na niiashikpamɔ akɛ okulafo kɛ dɔlɛ, kɛ apasa jamɔ mli heyeli ni Nyɔŋmɔ kɛhaa lɛ mli ŋɔɔmɔ fɛɛ lɛ. Yoo nɛɛ shi emaŋbii kɛ enyɔŋmɔi lɛ, ni ekɛ ehe kpɛtɛ eshaayoo Naomi okulafo lɛ he. Rut kɛɛ: “He fɛɛ he ni oyaa lɛ, matee; ni he ni oooyahi lɛ, jɛi mayahi. Omaŋ ji mimaŋ, ni o-Nyɔŋmɔ ji mi hu mi-Nyɔŋmɔ.” (Rut 1:16) Akɛ Boaz ŋa lɛ, Rut batsɔ nyɛ kɛha Maŋtsɛ David nii, Obed. (Rut 4:13-17) Yehowa “wo” nɛkɛ yoo heshibalɔ ni jeee Israelnyo nɛɛ “nyɔmɔ shishiishi” kɛtsɔ gbɛ ni aŋmɛ lɛ koni ebatsɔ Yesu Mesia lɛ seshinyo loo blemanyɛ lɛ nɔ! (Rut 2:12) Kwɛ miishɛɛ ni Rut aaana, beni aaatee lɛ shi ni eeele akɛ ena hegbɛ ni tamɔ nɛkɛ! Nakai nɔŋŋ hu ŋwanejee ko bɛ he akɛ tsutsu ajwamaŋbɔlɔ Rahab, ni aha eye ehe kɛjɛ nyenyeŋtswibɔɔ kɛ apasa jamɔ mli lɛ hu baana miishɛɛ, kɛ agbɛnɛ hu Batsheba ni tɔ ni etsake etsui lɛ hu, ejaakɛ amɛ hu amɛbaale akɛ Yehowa ŋmɛ amɛ gbɛ koni amɛtsɔmɔ Yesu Kristo blemanyɛmɛi loo wekumɛi.—Mateo 1:1-6, 16.
22. Mɛni abaasusu he yɛ nikasemɔ ni nyiɛ sɛɛ lɛ mli.
22 Mɛi ni nine shɛ heyeli ni Nyɔŋmɔ kɛha lɛ nɔ lɛ ahesusumɔ baanyɛ aya nɔ aahu. Akɛ nɔkwɛmɔ nɔ lɛ, mɛi ni fata amɛyibɔ lɛ ahe ji hii kɛ yei ni yɔɔ hemɔkɛyeli ni atsi amɛ ta yɛ Hebribii yitso 11 lɛ. Amɛna amanehulu ni afee amɛ niseniianii, ni “je nɛŋ esaaa amɛ.” Okɛ klɛŋklɛŋ afii oha lɛ mli Kristo sɛɛnyiɛlɔi anɔkwafoi lɛ kɛ anɔkwafoi krokomɛi kɛjɛ no sɛɛ kɛbaa, ni akpekpei abɔ ni sɔmɔɔ Yehowa bianɛ akɛ e-Dasefoi lɛ afata amɛyibɔ lɛ he. Taakɛ wɔbaana yɛ enɛ sɛɛ lɛ, kɛ okɛ amɛ efee ekome kɛha heyeli ni Nyɔŋmɔ kɛhaa lɛ, belɛ oyɛ yiŋtoi pii ni ooodamɔ nɔ ona miishɛɛ.
Te Obaaha Hetoo Oha Tɛŋŋ?
◻ Mɛɛ hiɛnɔkamɔ Nyɔŋmɔ kɛha beni alaaje heyeli ni Nyɔŋmɔ kɛha lɛ?
◻ Mɛɛ “nyɔŋyeli apã” Kristo ha esɛɛnyiɛlɔi lɛ ye amɛhe kɛjɛ shishi?
◻ Mɛɛ nifeemɔi tsɔɔ baptisimɔ hiɛ akɛ Yehowa Odasefoi lɛ ateŋ mɔ kome?
◻ Mɛɛ ŋmalɛi mli nɔkwɛmɔ nii tsɔɔ akɛ abaajɔɔ wɔ yɛ shi ni wɔdamɔɔ wɔhaa heyeli ni Nyɔŋmɔ kɛha lɛ hewɔ?
[Mfoniri ni yɔɔ baafa 16]
Ani ole nifeemɔi ni tsɔɔ baptisimɔ akɛ Yehowa odasefoi lɛ ateŋ mɔ kome hiɛ lɛ?