Saulo Kɛ Etsutsu Nanemɛi Kɛ Henyɛlɔi Kpe

EEENYƐ efee akɛ Saulo ni abale lɛ yɛ sɛɛ mli akɛ bɔfo Paulo lɛ she gbeyei beni ekuɔ esɛɛ klɛŋklɛŋ kwraa kɛyaa Yerusalem beni ebatsɔ Kristofonyo lɛ.a Dani ebaashi maŋtiase lɛ afii etɛ ni tsɔ hiɛ lɛ, no mli lɛ emuɔ hegbeyeiwoo kɛ gbee mumɔ eshwieɔ Yesu kaselɔi lɛ anɔ. No mli lɛ, ehiɛ hegbɛ ni ekɛmɔɔ Kristofonyo fɛɛ Kristofonyo ni ebaana yɛ Damasko.—Bɔfoi lɛ Asaji 9:1, 2; Galatabii 1:18.

Beni Saulo batsɔ Kristofonyo lɛ, ekɛ ekãa jaje hemɔkɛyeli ni eyɔɔ yɛ Mesia ni atée lɛ shi lɛ mli lɛ etsɔɔ. Enɛ ha Yudafoi ni yɔɔ Damasko lɛ tao akɛ amɛgbe lɛ. (Bɔfoi lɛ Asaji 9:19-25) Ani kulɛ eekpa gbɛ akɛ etsutsu nanemɛi Yudafoi ni yɔɔ Yerusalem lɛ baahere lɛ hiɛmɛɛ? Nɔ titri ni he hiaa Saulo ji ni ekɛ Kristo sɛɛnyiɛlɔi ni yɔɔ Yerusalem lɛ akpe. Eji nɔ ko ni enáŋ lɛ mlɛo.

“Ni beni Saulo ba Yerusalem lɛ, eka kaselɔi lɛ ahe kpɛtɛmɔ; shi amɛfɛɛ amɛmiishe lɛ gbeyei, amɛheee amɛyeee akɛ kaselɔ ji lɛ.” (Bɔfoi lɛ Asaji 9:26) Shishinumɔ yɛ amɛnifeemɔ nɛɛ he, ejaakɛ amɛle lɛ akɛ eji yiwalɔ ni enaaa mɔbɔ. Amɛna ehe ni etsɛɔ akɛ Kristofonyo lɛ akɛ eeenyɛ efee ŋaa ni eetsɔ koni ekɛbakpa asafo lɛ shi. Enɛ ha Kristofoi ni yɔɔ Yerusalem lɛ taooo akɛ amɛkɛ lɛ abɔ.

Kɛlɛ, amɛteŋ mɔ kome ye bua Saulo. Biblia lɛ kɛɔ akɛ Barnaba ŋɔ tsutsu yiwalɔ nɛɛ “kɛtee bɔfoi lɛ aŋɔɔ,” ekã ashi faŋŋ akɛ aawie Petro (Keifa) kɛ Yakobo ni ji Nuŋtsɔ lɛ nyɛmi lɛ he, ni egba amɛ Saulo tsakemɔ lɛ kɛ shiɛmɔ ní eshiɛ yɛ Damasko lɛ he sane. (Bɔfoi lɛ Asaji 9:27; Galatabii 1:18, 19) Atsɔɔɔ bɔ ni fee ni Barnaba bahé Saulo eye lɛ mli. Ani amɛji mɛi ni le amɛhe momo hewɔ ni Barnaba tao akɛ ele kɛji Saulo sane lɛ yɛ mli anɔkwale, ni sɛɛ mli lɛ ekpɛlɛ enɔkwayeli lɛ nɔ lɛ? Ani Barnaba le Kristofoi ni yɔɔ Damasko lɛ ateŋ mɛi komɛi, ni no hewɔ lɛ ele anɔkwale ni kɔɔ Saulo tsakemɔ lɛ he? Bɔ fɛɛ bɔ ni sane lɛ ji ha lɛ, Barnaba naaa Saulo he susumɔ fɔŋ. No hewɔ lɛ, Saulo hi bɔfo Petro ŋɔɔ gbii 15.

Ekɛ Petro Hi Shi Gbii Nyɔŋma Kɛ Enumɔ

Taakɛ Saulo ma nɔ mi eha Galatabii lɛ, nitsumɔ ni enine shɛ nɔ lɛ jɛ Yesu ŋɔɔ tɛ̃ɛ, ni no hewɔ lɛ ehe ehiaaa ni adesa ko aŋmɛ enɛ feemɔ gbɛ dã. (Galatabii 1:11, 12) Shi ekã shi faŋŋ akɛ Saulo yɔse akɛ ehe baahia ni atsɔɔ lɛ Yesu shiɛmɔ nitsumɔ lɛ he nii. Petro ni Saulo kɛhi shi lɛ baaha ena hegbɛ ekɛkase Yesu shiɛmɔ nitsumɔ lɛ he nii babaoo. (Luka 24:12; 1 Korintobii 15:3-8) Ekã shi faŋŋ akɛ Saulo baabibii Petro kɛ Yakobo saji babaoo, ni nakai nɔŋŋ amɛ hu amɛyɔɔ saji ni amɛbaabi Saulo yɛ nɔ ni kɔɔ ninaa kpo ni ajie atsɔɔ lɛ lɛ kɛ nitsumɔ ni akɛwo edɛŋ lɛ he.

Mɛɛ Gbɛ Nɔ Ahere Saulo Kɛjɛ Etsutsu Nanemɛi lɛ Adɛŋ?

Atsɛ Stefano akɛ klɛŋklɛŋ Kristofonyo ni gbo akɛ lá odasefonyo. Mɛi ni Stefano kɛtaa saji anaa lɛ ji “mɛi komɛi ni jɛ kpeehe ni atsɛ́ɔ akɛ Libertinomɛi kɛ Kireenemɛi kɛ Aleksandriamɛi akpeehe lɛ kɛ mɛi ni jɛ Kilikia kɛ Asia lɛ.” Agbɛnɛ Saulo kɛ “Helenibii lɛ taa naa,” ni ekɛ ekãa shiɛ etsɔɔ amɛ. Te amɛfee amɛnii amɛha tɛŋŋ? Amɛtao akɛ amɛaagbe lɛ.—Bɔfoi lɛ Asaji 6:9; 9:28, 29.

Saulo yɛ he miishɛɛ akɛ kulɛ eeegbála tsakemɔ kpele ni ba eshihilɛ mli lɛ mli etsɔɔ etsutsu nanemɛi lɛ, ní etsɔɔ amɛ Mesia lɛ he nii hu. Kɛlɛ, Helenibii lɛ amlifu Saulo ejaakɛ amɛbu lɛ akɛ eji sɛɛgbɛtsɔɔlɔ.

Ani Saulo yɔse oshara mli ni eyaje lɛ? Wɔkaneɔ akɛ beni eyɔɔ sɔlemɔwe lɛ ni esɔleɔ lɛ, efee tamɔ nɔ̃ enyɔ enɔ ni ena Yesu, mɔ ni kɛɛ lɛ akɛ: ‘Ohe afee oya ni oje Yerusalem, ejaakɛ amɛboŋ mihe odase ni oyeɔ lɛ toi.’ Saulo here lɛ nɔ akɛ: “Nuŋtsɔ, amɛ diɛŋtsɛ amɛle akɛ mi nɔŋŋ ni sá lɛ miwoɔ mɛi ni heɔ onɔ yeɔ lɛ tsuŋ, ni miyiɔ amɛ yɛ kpeehe fɛɛ kpeehe lɛ; ni beni ashwie Stefano, ohe odaseyelɔ lɛ, lá shi lɛ, mi hu midamɔ jɛi, ni miná egbele lɛ he tsui.”—Bɔfoi lɛ Asaji 22:17-20.

Mɛi susuɔ akɛ hetoo ni Saulo kɛha lɛ tsɔɔ akɛ ele oshara ni baa lɛ. Mɛi krokomɛi hu susuɔ akɛ no mli lɛ eekɛɛ akɛ: ‘Awa miyi tamɔ amɛ, ni amɛle nakai. Yɛ anɔkwale mli lɛ, esa akɛ amɛkpɛlɛ mitsakemɔ lɛ nɔ. Ekolɛ manyɛ maye mabua amɛ ni amɛnu anɔkwale lɛ shishi.’ Kɛlɛ, Yesu le akɛ nakai Yudafoi lɛ boŋ odase ni “hemɔkɛyeli kwalɔ” ko baaye lɛ toi. Ekɛɛ Saulo akɛ: “Yaa, ejaakɛ mibatsuo jeŋmaji lɛ ni yɔɔ shɔŋŋ lɛ aŋɔɔ.”—Bɔfoi lɛ Asaji 22:21, 22.

Beni Saulo nanemɛi Kristofoi lɛ nále oshara ni baa lɛ, amɛkɛ Saulo shi kɛ oyaiyeli kɛtee ŋshɔnaa maŋ ni yɔɔ Kaisarea lɛ, ni amɛwo lɛ gbɛ koni eshi kɛya Tarso ni ji ejakumaŋ ni heɔ kilomitai 500 gbɛfaa lɛ. (Bɔfoi lɛ Asaji 9:30) Afii babaoo ho dani Saulo ku esɛɛ kɛtee Yerusalem.

Ekolɛ oyaiyeli ni ekɛshi Yerusalem lɛ fee hebuu kɛha Kristofoi asafo lɛ. Tsutsu yiwalɔ lɛ ní mɛi na lɛ lɛ ha amɛmli fu waa diɛŋtsɛ. Beni Saulo eshi kɛtee sɛɛ lɛ, “asafo lɛ ná hejɔlɛ yɛ Yudea kɛ Galilea kɛ Samaria fɛɛ, ni enane mɔ shi, ni enyiɛɔ yɛ Nuŋtsɔ lɛ gbeyeishemɔ mli, ni ekɛ Mumɔ krɔŋkrɔŋ miishɛjemɔ lɛ shwereɔ.”—Bɔfoi lɛ Asaji 9:31.

Sɛɛyoomɔ He Nikasemɔ

Taakɛ ebalɛ yɛ klɛŋklɛŋ afii 100 lɛ mli lɛ, ŋmɛnɛ hu shihilɛi komɛi baa ni esa akɛ wɔkɛ sɛɛyoomɔ atsu nii. Esaaa akɛ wɔnáa mɛi ni wɔkɛ amɛ ekpeko pɛŋ lɛ ahe jwɛŋmɔ fɔŋ yɛ gbɛ ni ejaaa nɔ. Kɛlɛ, bei komɛi lɛ, aŋkroaŋkroi komɛi ni bɛ jeŋba lɛ bɔɔ mɔdɛŋ koni amɛná Yehowa webii lɛ ahe sɛɛ, ekolɛ kɛha amɛ diɛŋtsɛ amɛsɛɛnamɔ loo kɛ yiŋtoo akɛ amɛkɛaaye asafo lɛ awui. Enɛ hewɔ wɔkɛ sɛɛyoomɔ tsuɔ nii bɔni afee ni shishiulɔi kɛ amɛlakamɔ wiemɔi lɛ akaná wɔnɔ hewalɛ.—Abɛi 3:27; 2 Timoteo 3:13.

Bɔ ni Saulo fee enii yɛ shiɛmɔ ní eeeshiɛ yɛ Yerusalem lɛ he lɛ bafeɔ nɔkwɛmɔnɔ kroko ni Kristofoi baanyɛ amɛkɛtsu nii koni amɛkɛ henɔkwɛmɔ atsu shiɛmɔ nitsumɔ lɛ. Ákɛ mɔ aaashiɛ yɛ akutsei komɛi amli loo ni eshiɛ etsɔɔ aŋkroaŋkroi komɛi ní etsutsu nanemɛi fata he lɛ baanyɛ ekɛ oshara aba egbɔmɔtso, nilee ni eyɔɔ yɛ Nyɔŋmɔ he, kɛ ejeŋba tete po nɔ. Esa ákɛ akɛ henɔkwɛmɔ atsu nii jogbaŋŋ yɛ nibii komɛi amli, tamɔ be ni akɛbaatsu shiɛmɔ nitsumɔ lɛ kɛ heni abaatsu yɛ.—Abɛi 22:3; Mateo 10:16.

Wɔbaanyɛ wɔná nɔmimaa akɛ abaashiɛ Nyɔŋmɔ Maŋtsɛyeli lɛ he sanekpakpa lɛ atsɔɔ dani nibii agbɛjianɔtoo fɔŋ nɛɛ aba enaagbee. Kwɛ nɔkwɛmɔnɔ ni nɔ bɛ ni Saulo fee efɔ̃ shi yɛ enɛ gbɛfaŋ, ‘ákɛ ekɛ ekãa wie yɛ Nuŋtsɔ lɛ gbɛi amli’ etsɔɔ etsutsu nanemɛi kɛ henyɛlɔi po!—Bɔfoi lɛ Asaji 9:28.

[Shishigbɛ niŋmaa]

[Mfoniri ni yɔɔ baafa 16]

Beni Saulo bashɛ Yerusalem lɛ, ekɛ ekãa shiɛ etsɔɔ Helenibii lɛ