Yehowa—Nyɔŋmɔ ni Tsɔɔ Mɔ Nii
“Yehowa baatsɔɔ amɛ fɛɛ nii.”—YOHANE 6:45, NW.
1. Mɛni Yesu feɔ yɛ Kapernaum amrɔ nɛɛ?
ETSƐKO tsɔ ni Yesu Kristo fee naakpɛɛ nii, ni amrɔ nɛɛ aana lɛ ni eetsɔɔ nii yɛ kpeehe ko yɛ Kapernaum, yɛ Galilea Ŋshɔ lɛ masɛi. (Yohane 6:1-21, 59) Beni ewie akɛ: “Mijɛ ŋwɛi lɛ,” mɛi pii heee yeee. Amɛwie huhuuhu akɛ: “Ani jeee Yosef bi Yesu lɛ, ni wɔle etsɛ kɛ enyɛ lɛ nɛ? Te tɛŋŋ mɔ ni ekɛɔ akɛ: ‘Mijɛ ŋwɛi lɛ?’ ?” (Yohane 6:38, 42) Kɛkɛ ni Yesu ka amɛhiɛ, ni ejaje akɛ: “Mɔ ko nyɛŋ aba miŋɔɔ, akɛ ja Tsɛ lɛ ni tsu mi lɛ gbala lɛ dã; ni mi lɛ matee lɛ shi yɛ naagbee gbi lɛ nɔ.”—Yohane 6:44.
2. Mɛɛ nɔdaamɔ nɔ yɔɔ ni akɛaahe Yesu shiwoo ni kɔɔ gbohiiashitee he lɛ aye?
2 Mɛɛ shiwoo ni yɔɔ naakpɛɛ nɛ—akɛ aaatee mɔ ko shi yɛ naagbee gbi lɛ nɔ, beni Nyɔŋmɔ Maŋtsɛyeli lɛ yeɔ nɔ lɛ! Wɔbaanyɛ wɔhe shiwoo nɛɛ wɔye ejaakɛ Tsɛ lɛ, ni ji Yehowa Nyɔŋmɔ ji mɔ ni damɔ sɛɛ. (Hiob 14:13-15; Yesaia 26:19) Lɛlɛŋ, Yehowa mɔ ni tsɔɔ akɛ gbohii lɛ baate shi lɛ, ji “tsɔɔlɔ kpeteŋkpele fe fɛɛ.” (Hiob 36:22, Today’s English Version) Beni egbalaa jwɛŋmɔ kɛyaa Tsɛ lɛ nitsɔɔmɔ nɔ lɛ, Yesu tee nɔ ewie akɛ: “Aŋma yɛ Gbalɔi lɛ amli akɛ: ‘Amɛ fɛɛ amɛaafee [Yehowa] Nyɔŋmɔ kaselɔi.’ ”—Yohane 6:45.
3. Mɛɛ sanebimɔi wɔbaasusu he?
3 Eka shi faŋŋ akɛ, eeefee hegbɛ akɛ mɔ ko aaafata mɛi ni gbalɔ Yesaia ŋma yɛ amɛhe akɛ: “Obii lɛ fɛɛ aaafee Yehowa kaselɔi” lɛ ahe. (Yesaia 54:13) Ani wɔbaanyɛ wɔfata amɛhe? Namɛi efee tamɔ bii kɛha lɛ ni amɛnine eshɛ enitsɔɔmɔ nɔ? Mɛni ji Yehowa nitsɔɔmɔ ni he hiaa ni sa akɛ wɔle ni wɔtsu he nii koni wɔna edɛŋ jɔɔmɔi? Te Yehowa tsɔɔ nii yɛ blema beaŋ eha tɛŋŋ, ni ani etsɔɔ nii nakai nɔŋŋ ŋmɛnɛ? Enɛɛmɛi ji sanebimɔi ni wɔbaasusu he.
Tsɛ, Tsɔɔlɔ, Wu
4. Namɛi ji Yehowa bii ni nine shɛ enitsɔɔmɔi anɔ klɛŋklɛŋ?
4 Yehowa batsɔ Tsɛ kɛ Tsɔɔlɔ fɛɛ klɛŋklɛŋ kwraa beni ebɔ e-Bi koome, Yesu dani ebatsɔ gbɔmɔ adesa lɛ. Atsɛ mɔ nɛ akɛ “Wiemɔ lɛ,” ejaakɛ lɛ ji Yehowa Naawielɔ Nukpa. (Yohane 1:1, 14; 3:16) Wiemɔ lɛ sɔmɔ “yɛ [Tsɛ lɛ] masɛi akɛ ŋaalɔ,” ni ekase nii jogbaŋŋ kɛjɛ e-Tsɛ nitsɔɔmɔ lɛ mli. (Abɛi 8:22, 30) Yɛ anɔkwale mli lɛ, ebatsɔ Najiaŋdamɔlɔ, loo mɔ titri ni Tsɛ lɛ tsɔ enɔ ebɔ nibii krokomɛi fɛɛ, ni “Nyɔŋmɔ bii” mumɔŋ bɔɔ nii lɛ fata he. Kwɛ amɛmii ni baashɛ amɛhe waa akɛ Nyɔŋmɔ tsɔɔ amɛ nii! (Hiob 1:6; 2:1; 38:7; Kolosebii 1:15-17) Sɛɛ mli lɛ, abɔ klɛŋklɛŋ adesa, Adam. Lɛ hu eji “Nyɔŋmɔ [bi],” ni Biblia lɛ jieɔ lɛ kpo akɛ Yehowa tsɔɔ lɛ nii.—Luka 3:38; 1 Mose 2:7, 16, 17.
5. Mɛɛ hegbɛ ko ni jara wa Adam laaje, ni kɛlɛ namɛi anii Yehowa tsɔɔ, ni mɛni hewɔ?
5 Dɔlɛ sane ji akɛ, Adam tsɔ toigbele ni eje gbɛ efee lɛ nɔ elaaje hegbɛ ni eyɔɔ akɛ eeetsa nɔ daa akɛ Nyɔŋmɔ bi lɛ. No hewɔ lɛ, eseshibii nyɛɛɛ adamɔ fɔmɔ kɛkɛ nɔ amɛkɛɛ akɛ amɛkɛ lɛ yɛ wekukpaa akɛ Nyɔŋmɔ bii. Shi kɛlɛ, Yehowa tsɔɔ adesai ni yeee emuu, ni kɛ amɛhe fɔ̃ɔ enɔ kɛha gbɛtsɔɔmɔ lɛ nii. Akɛ nɔkwɛmɔ nɔ lɛ, Noa hi shi akɛ “jalɔ,” ni “[ekɛ] Nyɔŋmɔ nyiɛ,” ni no hewɔ lɛ Yehowa tsɔɔ Noa nii. (1 Mose 6:9, 13–7:5) Abraham tsɔ etoiboo lɛ nɔ ejie ehe kpo akɛ “[Yehowa] shieŋtsɛ,” no hewɔ lɛ, lɛ hu Yehowa tsɔɔ lɛ nii.—Yakobo 2:23; 1 Mose 12:1-4; 15:1-8; 22:1, 2.
6. Namɛi Yehowa babu amɛ akɛ “[e]bi,” ni mɛɛ tsɔɔlɔ nɛkɛ eji kɛha amɛ?
6 Sɛɛ mli kwraa, yɛ Mose bei amli lɛ, Yehowa kɛ Israel maŋ lɛ bote kpaŋmɔ wekukpaa mli. Nɔ ni jɛ mli ba ji akɛ, maŋ lɛ batsɔ ewebii ni ehala, ni abu amɛ akɛ “[e]bi.” Nyɔŋmɔ kɛɛ: “Mibi . . . ji Israel.” (2 Mose 4:22, 23; 19:3-6; 5 Mose 14:1, 2) Kɛtsɔ nakai kpaŋmɔ wekukpaa lɛ nɔ lɛ, Israelbii lɛ baanyɛ akɛɛ, taakɛ gbalɔ Yesaia ŋma lɛ akɛ: “Bo, Yehowa, bo nɔŋŋ ji wɔ-Tsɛ.” (Yesaia 63:16) Yehowa tsu egbɛnaa nii akɛ tsɛ lɛ he nii ni ejɛ suɔmɔ mli etsɔɔ ebii, Israel nii. (Lala 71:17; Yesaia 48:17, 18) Yɛ anɔkwale mli lɛ, beni amɛyeee lɛ anɔkwa lɛ, ekɛ mɔbɔnalɛ kpa amɛ fai akɛ: “Nyɛkua nyɛsɛɛ, nyɛ bii sɛɛsɛɛyalɔi.”—Yeremia 3:14.
7. Mɛɛ wekukpaa Israel kɛ Yehowa ná?
7 Nɔ ni jɛ ekɛ Israel teŋ kpaŋmɔ wekukpaa lɛ mli ba ji akɛ, Yehowa hu batsɔ maŋ lɛ Wu yɛ mfoniri-feemɔŋ, ni maŋ lɛ batsɔ efoniri-feemɔŋ ŋa. Gbalɔ Yesaia ŋma yɛ maŋ lɛ he akɛ: “Owu ji o-Feelɔ lɛ, Yehowa Zebaot ji egbɛi.” (Yesaia 54:5; Yeremia 31:32) Eyɛ mli akɛ Yehowa kɛ bulɛ tsu enitsumɔ akɛ Wu lɛ he nii moŋ, shi Israel maŋ lɛ batsɔ ŋa ni yeee anɔkwa. Yehowa kɛɛ: “Taakɛ bɔ ni yoo yeɔ ewu he kutumpɔo lɛ, nakai nyɛ hu nyɛye mihe kutumpɔo, nyɛ Israel we.” (Yeremia 3:20) Yehowa tee nɔ ekpa eŋa ni yeee anɔkwa lɛ bii lɛ fai; etee nɔ lolo akɛ amɛ “Tsɔɔlɔ Kpeteŋkpele.”—Yesaia 30:20, NW; 2 Kronika 36:15.
8. Eyɛ mli akɛ Yehowa kpoo Israel maŋ muu lɛ fɛɛ moŋ, shi mɛɛ mfoniri-feemɔŋ ŋa eyɔɔ lolo?
8 Beni Israel kpoo E-Bi, Yesu Kristo, ni amɛgbe lɛ lɛ, yɛ naagbee lɛ Nyɔŋmɔ hu kpoo lɛ. No hewɔ lɛ nakai Yudafoi amaŋ lɛ jeee mfoniri-feemɔŋ ŋa kɛha lɛ dɔŋŋ, ni nakai nɔŋŋ lɛ hu ejeee Tsɛ kɛ Tsɔɔlɔ kɛha ebiii ni egba afã lɛ. (Mateo 23:37, 38) Shi kɛlɛ, Israel ji okadi, loo mfoniri-feemɔŋ ŋa kɛkɛ. Bɔfo Paulo tsɛ wiemɔi asɛɛ kɛjɛ Yesaia 54:1, ni wieɔ “kene ni [fɔɔɔ]” he, ni esoro lɛ kwraa yɛ “[yoo] mɔ ni yɔɔ wu,” ni ji heloonaa Israel maŋ lɛ he lɛ. Paulo jie lɛ kpo akɛ Kristofoi ni afɔ amɛ mu lɛ ji “kene ni [fɔɔɔ],” mɔ ni etsɛɔ lɛ akɛ “ŋwɛi Yerusalem lɛ” bii. Mɛi ni feɔ nɛkɛ mfoniri-feemɔŋ okadi yoo nɛɛ ji Nyɔŋmɔ mumɔŋ bɔɔ nii aŋwɛi gbɛjianɔtoo lɛ.—Galatabii 4:26, 27.
9. (a) Namɛi ahe Yesu wieɔ beni ewie akɛ ‘obii lɛ fɛɛ aaafee Yehowa kaselɔi lɛ’? (b) Mɛni nɔ adamɔɔ ni gbɔmɛi batsɔmɔɔ Nyɔŋmɔ mumɔŋ bii?
9 Enɛ hewɔ lɛ, beni eyɔɔ Kapernaum kpeehe lɛ, ni Yesu tsɛ Yesaia gbalɛ lɛ sɛɛ akɛ: “Obii lɛ fɛɛ aaafee Yehowa kaselɔi” lɛ, no mli lɛ eewie mɛi ni baatsɔmɔ “ŋwɛi Yerusalem,” ni ji Nyɔŋmɔ ŋwɛi gbɛjianɔtoo ni tamɔ eŋa lɛ “bii” lɛ ahe. Kɛtsɔ Nyɔŋmɔ najiaŋdamɔlɔ ni jɛ ŋwɛi, ni ji Yesu Kristo nitsɔɔmɔi lɛ anɔkpɛlɛmɔ nɔ lɛ, nakai Yudafoi toibolɔi lɛ baanyɛ amɛtsɔmɔ Nyɔŋmɔ tsutsu ŋwɛi yoo kene ni fɔɔɔ lɛ bii, ni amɛfee “jeŋmaŋ krɔŋkrɔŋ,” mumɔŋ “Nyɔŋmɔ Israel lɛ.” (1 Petro 2:9, 10; Galatabii 6:16) Beni etsɔɔ hegbɛ kpele ni Yesu kɛha kɛha Nyɔŋmɔ mumɔŋ bii atsɔmɔ lɛ, bɔfo Yohane ŋma akɛ: “Lɛ diɛŋtsɛ emɛi aŋɔɔ eba, ni mɛi ni ji lɛ diɛŋtsɛ emɛi lɛ hereee lɛ. Shi mɛi abɔ ni here lɛ lɛ, eha amɛ hegbɛ akɛ amɛtsɔmɔ Nyɔŋmɔ bii, mɛi ni heɔ egbɛi lɛ nɔ yeɔ lɛ.”—Yohane 1:11, 12.
Yehowa Nitsɔɔmɔi ni He Hiaa
10. Yɛ Eden atuatsemɔ lɛ sɛɛ nɔŋŋ lɛ, mɛni Yehowa tsɔɔ yɛ “seshi” lɛ he, ni namɔ nɛkɛ Seshi nɛɛ bafee?
10 Akɛ Tsɛ ni yɔɔ suɔmɔ lɛ, Yehowa tswaa ebii lɛ eyiŋtoi ahe adafi. Enɛ hewɔ lɛ, beni ŋwɛibɔfo atuatselɔ ko laka klɛŋklɛŋ adesai enyɔ lɛ ni amɛgbo toi lɛ, Yehowa ha amɛle nɔ ni ebaafee koni eyiŋtoo akɛ ebaaha shikpɔŋ lɛ atsɔ paradeiso lɛ aba mli lɛ amrɔ nɔŋŋ. Ewie akɛ ekɛ nyɛɛ baafɔ̃ “blema onufu lɛ,” ni ji Satan Abonsam, “kɛ yoo lɛ” teŋ. Kɛkɛ ni etsɔɔ mli akɛ yoo lɛ “seshi” lɛ baatswa Satan “yitso nɔ” bɔ ni ekɛ egbele aaaba. (1 Mose 3:1-6, 15; Kpojiemɔ 12:9; 20:9, 10) Taakɛ wɔna lɛ, yoo lɛ—ni atsɛ lɛ yɛ sɛɛ mli akɛ “ŋwɛi Yerusalem” lɛ—ji Nyɔŋmɔ ŋwɛi gbɛjianɔtoo ni ji mumɔŋ bɔɔ nii lɛ. Shi namɔ ji “[e]seshi” lɛ? Lɛ ji Nyɔŋmɔ Bi, Yesu Kristo, mɔ ni atsu lɛ kɛjɛ ŋwɛi, kɛ mɔ ni naagbee lɛ ebaakpata Satan hiɛ lɛ.—Galatabii 4:4; Hebribii 2:14; 1 Yohane 3:8.
11, 12. Te Yehowa lɛɛ enitsɔɔmɔ ni he hiaa, ni kɔɔ “seshi” lɛ he lɛ mli eha tɛŋŋ?
11 Yehowa lɛɛ nɛkɛ nitsɔɔmɔ ni he hiaa ni kɔɔ “seshi” lɛ he nɛɛ mli beni ewo Abraham shi akɛ: “Fa maha oseshi afa tamɔ ŋwɛi ŋulamii . . . Ni oseshi lɛ mli aaajɛ ajɔɔ shikpɔŋ lɛ nɔ jeŋmaji fɛɛ.” (1 Mose 22:17, 18) Yehowa kɛ bɔfo Paulo tsu nii ni ekɛtsɔɔ mli akɛ Yesu Kristo ji Abraham shiwoo Seshi lɛ, shi kɛlɛ, mɛi krokomɛi hu baatsɔmɔ “seshi” lɛ fã. Paulo ŋma akɛ: “Kɛ Kristo nii ji nyɛ lɛ, belɛ Abraham seshibii ji nyɛ, kɛ gboshiniyelɔi hu yɛ shiwoo lɛ naa.”—Galatabii 3:16, 29.
12 Yehowa jie lɛ kpo hu akɛ Kristo, ni ji Seshi lɛ, baajɛ Yuda maŋtsɛmɛi aweku lɛ mli, ni lɛ “toi majimaji lɛ aaabo.” (1 Mose 49:10) Yehowa wo shi yɛ Maŋtsɛ David ni jɛ Yuda akutso lɛ mli lɛ he akɛ: “Maha eseshi ahi shi daa, ni emaŋtsɛsɛi lɛ aaatamɔ ŋwɛi gbii. Eseshi lɛ aaahi shi daa, ni emaŋtsɛsɛi lɛ hu aaatamɔ hulu yɛ mihiɛ.” (Lala 89:4, 5, 30, 37) Beni bɔfo Gabriel tswa Yesu fɔmɔ he adafi lɛ, etsɔɔ mli akɛ bi lɛ ji Nyɔŋmɔ Nɔyelɔ ni ehala lɛ, David Seshi lɛ. Gabriel kɛɛ: “Eeetsɔ agbo, ni aaatsɛ lɛ Ŋwɛinyo lɛ Bi, ni Nuntsɔ [Yehowa] Nyɔŋmɔ aaaŋɔ etsɛ David maŋtsɛsɛi lɛ aha lɛ, . . . ni emaŋtsɛyeli lɛ sɛɛ efoŋ.”—Luka 1:32, 33; Yesaia 9:6, 7; Daniel 7:13, 14.
13. Kɛ wɔɔna Yehowa dɛŋ jɔɔmɔi lɛ, te esa akɛ wɔhere enitsɔɔmɔ lɛ nɔ wɔha tɛŋŋ?
13 Kɛ wɔnine baashɛ Yehowa dɛŋ jɔɔmɔi anɔ lɛ, no lɛ esa akɛ wɔle nɛkɛ nitsɔɔmɔ ni he hiaa ni kɔɔ Nyɔŋmɔ Maŋtsɛyeli lɛ he nɛɛ ni wɔtsu he nii. Esa akɛ wɔhe wɔye akɛ Yesu jɛ ŋwɛi kɛba biɛ, ni lɛ ji Maŋtsɛ ni Nyɔŋmɔ ehala lɛ—Seshi ni ji odehe ni baakwɛ ni akɛ Paradeiso aba shikpɔŋ nɛɛ nɔ ekoŋŋ lɛ—ni lɛ ebaatee gbohii lɛ ashi. (Luka 23:42, 43; Yohane 18:33-37) Beni Yesu yɔɔ Kapernaum ni ewie gbohii lɛ ashitee he lɛ, kulɛ esa akɛ efee faŋŋ eha Yudafoi lɛ akɛ anɔkwale ewie lɛ. Ejaakɛ, otsii fioo ni tsɔ hiɛ, ekolɛ beni eyɔɔ jɛmɛ nɔŋŋ yɛ Kapernaum lɛ, etee kpeehe lɛ onukpa lɛ biyoo ko ni eye afii 12 lɛ shi! (Luka 8:49-56) Eka shi faŋŋ akɛ wɔ hu wɔyɛ yiŋtoo babaoo ni wɔɔdamɔ nɔ wɔhe Yehowa nitsɔɔmɔ ni kɔɔ e-Maŋtsɛyeli lɛ he, ni haa mɔ hiɛnɔkamɔ lɛ wɔye, ni wɔfee wɔnii yɛ ekɛ gbeekpamɔ naa!
14, 15. (a) Te Yehowa Maŋtsɛyeli lɛ he hiaa kɛha Yesu tɛŋŋ? (b) Mɛni ehe hiaa ni wɔnu shishi ni wɔnyɛ wɔtsɔɔ mli jogbaŋŋ yɛ Yehowa Maŋtsɛyeli lɛ he?
14 Yesu tuu eshikpɔŋ nɔ shihilɛ eha Yehowa Maŋtsɛyeli lɛ tsɔɔmɔ. Efee lɛ esɔɔmɔ nitsumɔ lɛ saneyitso, ni efã esɛɛnyiɛlɔi lɛ po ni amɛsɔle yɛ he. (Mateo 6:9, 10; Luka 4:43) Heloonaa Yudafoi lɛ ná hegbɛ akɛ amɛaafee “maŋtsɛyeli lɛŋ bii,” shi yɛ hemɔkɛyeli ni amɛbɛ hewɔ lɛ, amɛteŋ mɛi pii laaje nakai hegbɛ lɛ. (Mateo 8:12; 21:43) Yesu jie lɛ kpo akɛ “asafoku bibioo” ko pɛ baana hegbɛ akɛ amɛaatsɔmɔ “maŋtsɛyeli lɛŋ bii.” Nɛkɛ “bii” nɛɛ batsɔmɔɔ “Kristo nanemɛi niyelɔi” yɛ eŋwɛi Maŋtsɛyeli lɛ mli.—Luka 12:32; Mateo 13:38; Romabii 8:14-17; Yakobo 2:5.
15 Maŋtsɛyeli niyelɔi enyiɛ Kristo kɛbaaya ŋwɛi ni amɛyafata ehe kɛye shikpɔŋ lɛ nɔ? Taakɛ Biblia lɛ tsɔɔ lɛ, mɛi 144,000 pɛ. (Yohane 14:2, 3; 2 Timoteo 2:12; Kpojiemɔ 5:10; 14:1-3; 20:4) Shi Yesu wie akɛ eyɛ “tooi krokomɛi,” ni baafee nakai Maŋtsɛyeli nɔyeli lɛ shishibii yɛ shikpɔŋ nɛɛ nɔ. Mɛnɛɛmɛi baana gbɔmɔtsoŋ hewalɛ ni eye emuu kɛ toiŋjɔlɛ mli ŋɔɔmɔ kɛya naanɔ yɛ paradeiso shikpɔŋ nɔ. (Yohane 10:16; Lala 37:29; Kpojiemɔ 21:3, 4) Ehe miihia ni wɔnu Yehowa nitsɔɔmɔ ni kɔɔ Maŋtsɛyeli lɛ he lɛ shishi ni wɔnyɛ wɔtsɔɔ mli jogbaŋŋ.
16. Mɛɛ Yehowa nitsɔɔmɔ ko ni he hiaa esa akɛ wɔkase ni wɔkɛtsu nii?
16 Bɔfo Paulo tsɔɔ Yehowa nitsɔɔmɔ kroko hu ni he hiaa. Ewie akɛ: “Nyɛ diɛŋtsɛ lɛ, Nyɔŋmɔ etsɔɔ nyɛ akɛ nyɛsumɔsumɔɔ nyɛhe.” (1 Tesalonikabii 4:9) Kɛ wɔɔsa Yehowa hiɛ lɛ, no lɛ esa akɛ wɔjie suɔmɔ ni tamɔ nakai kpo. Biblia lɛ kɛɔ akɛ “Nyɔŋmɔ lɛ, suɔmɔ ji lɛ,” ni esa akɛ wɔkase esuɔmɔ kpojiemɔ he nɔkwɛmɔ nɔ lɛ. (1 Yohane 4:8; Efesobii 5:1, 2) Dɔlɛ sane ji akɛ, mɛi pii ekaseee suɔmɔ ni amɛaana amɛha amɛnanemɛi adesai taakɛ Nyɔŋmɔ tsɔɔ wɔ ni wɔfee lɛ. Shi wɔ hu? Ani wɔkpɛlɛ Yehowa nitsɔɔmɔ nɛɛ nɔ?
17. Namɛi asu esa akɛ wɔkase?
17 Ehe miihia ni wɔkpɛlɛ Yehowa nitsɔɔmɔi lɛ fɛɛ nɔ. Eba akɛ wɔ su aaatamɔ Biblia mli lalatsɛmɛi lɛ anɔ, mɛi ni ŋma akɛ: “Yehowa, tsɔɔmɔ mi ogbɛ̀i lɛ, ha male otempɔŋi lɛ. Ha manyiɛ onɔkwale lɛ mli, ni otsɔɔ mɔ nii.” “Tsɔɔmɔ mi ogbɛnaai lɛ. Ha mi yitsoŋ kpakpa kɛ nilee . . . Ni otsɔɔ mi okojomɔi lɛ.” (Lala 25:4, 5; 119:12, 66, 108) Kɛji ohenumɔi tamɔ lalatsɛmɛi lɛ anɔ lɛ pɛpɛɛpɛ lɛ, no lɛ obaanyɛ ofata asafo babaoo ni Yehowa tsɔɔ amɛ nii lɛ ahe.
Gbɔmɛi Asafo Babaoo ni Atsɔɔ Amɛ Nii
18. Mɛni gbalɔ Yesaia gba efɔ shi akɛ ebaaba mli yɛ wɔbe nɛɛ mli?
18 Gbalɔ Yesaia gba nɔ ni baaba yɛ wɔbe nɛɛ mli lɛ efɔ shi: “Ni aaaba mli akɛ naagbee gbii lɛ amli lɛ, Yehowa we lɛ gɔŋ lɛ aaama shi yɛ gɔji lɛ ayiteaŋ . . . Ni majimaji pii aaatee ayakɛɛ akɛ: ‘Nyɛbaa ni wɔyakwɔa Yehowa gɔŋ lɛ, kɛyaa Yakob Nyɔŋmɔ lɛ we lɛ, koni etsɔɔ wɔ egbɛ̀i lɛ.’ ” (Yesaia 2:2, 3; Mika 4:2) Namɛi ji mɛi ni Yehowa tsɔɔ amɛ nii nɛɛ?
19. Namɛi fata mɛi ni Yehowa tsɔɔ amɛ nii lɛ ahe ŋmɛnɛ?
19 Yɛ mɛi ni kɛ Kristo baaye maŋtsɛ yɛ ŋwɛi lɛ asɛɛ lɛ, mɛi krokomɛi hu fata he. Taakɛ wɔna kɛtsɔ hiɛ lɛ, Yesu wie akɛ eyɛ “tooi krokomɛi”—Maŋtsɛyeli lɛ shishibii ni yɔɔ shikpɔŋ nɛɛ nɔ—kɛfata “asafoku bibioo” ni ji Maŋtsɛyeli gboshiniyelɔi lɛ ahe. (Yohane 10:16; Luka 12:32) “Asafo babaoo” lɛ, ni yi naa wala kɛfoɔ “amanehulu kpeteŋkpele lɛ” jɛ tooi krokomɛi akuu lɛ mli, ni amɛnaa shidaamɔ kpakpa mli ŋɔɔmɔ yɛ Yehowa hiɛ kɛtsɔ Yesu la ni afɔse ashwie shi lɛ mli hemɔkɛyeli ni amɛyɔɔ lɛ nɔ. (Kpojiemɔ 7:9, 14) Eyɛ mli akɛ tooi krokomɛi lɛ fataaa “bii” ni awie amɛhe yɛ Yesaia 54:13 lɛ ahe tɛɛ moŋ, shi ajɔɔ amɛ ejaakɛ Yehowa tsɔɔ amɛ nii. No hewɔ lɛ, amɛtsɛɔ Nyɔŋmɔ yɛ gbɛ ni ja nɔ akɛ “Tsɛ,” ejaakɛ, yɛ naagbee lɛ, ebaafee amɛ-Nii kɛtsɔ “Naanɔ Tsɛ,” Yesu Kristo nɔ.—Mateo 6:9; Yesaia 9:6.
Bɔ ni Yehowa Tsɔɔ Nii Ehaa
20. Mɛɛ gbɛi anɔ Yehowa tsɔɔ etsɔɔ nii?
20 Yehowa tsɔɔ nii yɛ gbɛi pii anɔ. Akɛ nɔkwɛmɔ nɔ lɛ, efeɔ nakai kɛtsɔɔ enibɔɔ nitsumɔi, ni yeɔ shihilɛ mli ni eyɔɔ kɛ enilee kpele lɛ fɛɛ he odase lɛ nɔ. (Hiob 12:7-9; Lala 19:2, 3; Romabii 1:20) Kɛfata he lɛ, etsɔɔ nii kɛtsɔɔ wiemɔ tɛɛ nɔ, taakɛ efee beni etsɔɔ Yesu ni ebatsɔko adesa lɛ nii lɛ. Nakai nɔŋŋ hu ejɛ ŋwɛi ekɛ gbɔmɛi wie tɛɛ yɛ shikpɔŋ nɛɛ nɔ, yɛ shii etɛ ni aŋmala he saji ashwie shi lɛ amli.—Mateo 3:17; 17:5; Yohane 12:28.
21. Mɛɛ ŋwɛibɔfo Yehowa kɛtsu nii titri akɛ enajiaŋdamɔlɔ, shi te wɔfeɔ tɛŋŋ wɔleɔ akɛ ekɛ mɛi krokomɛi hu tsu nii?
21 Yehowa kɛ enajiaŋdamɔlɔi ŋwɛibɔfoi, ni e-Kromɔbi, “Wiemɔ lɛ” fata he lɛ, tsuɔ nii kɛtsɔɔ nii. (Yohane 1:1-3) Eyɛ mli akɛ kulɛ Yehowa baanyɛ ekɛ ebi adesa ni eye emuu, Adam awie tɛɛ yɛ Eden trom lɛ mli moŋ, shi ekolɛ ekɛ Yesu ni ebatsɔko adesa lɛ tsu nii ni ewie eha Lɛ. (1 Mose 2:16, 17) Ekolɛ mɔnɛ ji “Nyɔŋmɔ bɔfo lɛ ni nyiɛ Israel ta lɛ hiɛ,” mɔ ni Yehowa wo amɛ kita yɛ ehe akɛ: “Obo egbee toi” lɛ. (2 Mose 14:19; 23:20, 21) Ŋwanejee ko bɛ he akɛ Yesu ni ebatsɔko adesa lɛ nɔŋŋ ji “Yehowa ta lɛ nɔ tatsɛ” ni jie ehe kpo etsɔɔ Yoshua ni ewo lɛ hewalɛ lɛ. (Yoshua 5:14, 15) Yehowa kɛ ŋwɛibɔfoi krokomɛi hu tsuɔ nii ni ekɛtsɔɔ nii, tamɔ mɛi ni ekɛtsu nii ni amɛkɛ e-Mla lɛ ha Mose lɛ.—2 Mose 20:1; Galatabii 3:19; Hebribii 2:2, 3.
22. (a) Namɛi Yehowa kɛtsu nii yɛ shikpɔŋ lɛ nɔ kɛtsɔɔ nii? (b) Mɛni ji gbɛ titri ni Yehowa tsɔɔ nɔ etsɔɔ adesai anii ŋmɛnɛ?
22 Kɛfata he lɛ, Yehowa Nyɔŋmɔ kɛ najiaŋdamɔlɔi ni ji adesai tsuɔ nii ni amɛtsɔɔ nii. Esa akɛ fɔlɔi ni yɔɔ Israel atsɔɔ amɛbii anii; gbalɔi, osɔfoi, lumɛi, kɛ Levibii lɛ tsɔɔ maŋ lɛ Yehowa Mla lɛ. (5 Mose 11:18-21; 1 Samuel 12:20-25; 2 Kronika 17:7-9) Yesu ji Nyɔŋmɔ Naawielɔ nukpa yɛ shikpɔŋ lɛ nɔ. (Hebribii 1:1, 2) Yesu fɔɔ wiemɔ akɛ nɔ ni etsɔɔ lɛ ji nɔ pɛpɛɛpɛ ni ekase kɛjɛ Tsɛ lɛ ŋɔɔ, no hewɔ lɛ, enɛ tsɔɔ akɛ Yehowa ji mɔ ni tsɔɔ etoibolɔi lɛ anii. (Yohane 7:16; 8:28; 12:49; 14:9, 10) Yehowa eha aŋmala ewiemɔi lɛ ashwie shi, ni yɛ wɔ gbii nɛɛ amli lɛ etsɔɔ adesai anii kɛtsɔɔ nɛkɛ Ŋmalɛi ni jɛ mumɔŋ nɛɛ anɔ titri.—Romabii 15:4; 2 Timoteo 3:16.
23. Mɛɛ sanebimɔi abaasusu he yɛ nikasemɔ ni nyiɛ sɛɛ lɛ mli?
23 Wɔyɛ bei ni he hiaa mli, ejaakɛ Ŋmalɛi lɛ woɔ shi akɛ ‘abaatsɔɔ gbɔmɛi babaoo Yehowa gbɛ̀i lɛ, yɛ naagbee gbii [ni wɔyɔɔ mli] lɛ amli.’ (Yesaia 2:2, 3) Mɛɛ gbɛ nɔ akɛ nitsɔɔmɔ nɛɛ haa yɛ? Mɛni esa akɛ wɔfee koni wɔna Yehowa nitsɔɔmɔ gbɛjianɔtoo kpele ni yaa nɔ amrɔ nɛɛ he sɛɛ, ni wɔna mli gbɛfaŋnɔ hu? Wɔbaasusu sanebimɔi nɛɛ ahe yɛ nikasemɔ ni nyiɛ sɛɛ lɛ mli.
Te Obaaha Hetoo Tɛŋŋ?
◻ Mɛɛ gbɛ nɔ Yehowa tsɔ ebatsɔ Tsɛ, Tsɔɔlɔ, kɛ Wu?
◻ Mɛni ji Yehowa tsɔɔmɔ yɛ “seshi” lɛ he?
◻ Mɛɛ Nyɔŋmɔ nitsɔɔmɔ ni he hiaa esa akɛ wɔye nɔ?
◻ Mɛɛ gbɛ nɔ Yehowa tsɔɔ etsɔɔ nii?
[Mfoniri ni yɔɔ baafa 10]
Yairo biyoo lɛ shitee lɛ ha ana nɔdaamɔ nɔ ni akɛaahe Yesu gbohiiashitee he shiwoo lɛ aye