Trinity Lɛ​—Ani Atsɔɔ yɛ Biblia lɛ Mli?

“Katolik Hemɔkɛyeli lɛ ji enɛ, wɔjaa Nyɔŋmɔ kome yɛ Trinity mli, Trinity ni efee Ekome. . . . . No hewɔ lɛ, Tsɛ lɛ ji Nyɔŋmɔ, Bi lɛ ji Nyɔŋmɔ, ni Mumɔ Krɔŋkrɔŋ lɛ ji Nyɔŋmɔ. Ni kɛlɛ amɛjeee Nyɔŋmɔi Etɛ, shi Nyɔŋmɔ Kome.”

ATANASIA Hemɔkɛyeli Jajemɔ lɛ kɛ wiemɔi nɛɛ tsɔɔ nɔ ni Kristendom tsɔɔmɔ titri​—Triniti lɛ ji mli.a Kɛ sɔlemɔyalɔ, Katoliknyo loo, Protestantnyo jio lɛ, ekolɛ nɔ ni abaakɛɛ bo ji akɛ enɛ ji tsɔɔmɔ ni he hiaa fe fɛɛ ni esa akɛ ohe oye. Shi ani obaanyɛ otsɔɔ tsɔɔmɔ nɛɛ mli? Mɛi ni le nii waa diɛŋtsɛ yɛ Kristendom lɛ ateŋ mɛi komɛi po ekpɛlɛ nɔ akɛ amɛnyɛɛɛ amɛnu Triniti tsɔɔmɔ lɛ shishi.

Mɛni hewɔ mɔ, ni amɛheɔ amɛyeɔ lɛ? Ani enɛ jɛ Biblia lɛ ni tsɔɔ tsɔɔmɔ nɛɛ hewɔ? Anglican osɔfo John Robinson ni eshi jeŋ lɛ ha hetoo ko ni taa mɔ jwɛŋmɔ mli waa yɛ nɛkɛ sanebimɔ nɛɛ he yɛ ewolo Honest to God, ni ahɔɔ babaoo lɛ mli. Eŋma akɛ:

“Maŋshiɛmɔ kɛ nitsɔɔmɔ ni ehe gbɛi haa asusuɔ Kristo he akɛ eji, mɔ ko ni fe adesa, ni anyɛŋ akɛ Kpaŋmɔ Hee lɛ afi sɛɛ. Nɔ ni no tsɔɔ kɛkɛ ji akɛ, Yesu ji Nyɔŋmɔ, yɛ gbɛ ni haa anyɛɔ akɛ sabalai tamɔ ‘Kristo’ kɛ ‘Nyɔŋmɔ’ tsakeɔ ni ehaa akɛ ekome toɔ ekroko najiaŋ. Shi he ko kwraa bɛ Biblia lɛ mli ni akɛtsu nii yɛ nakai gbɛ nɔ. Kpaŋmɔ Hee lɛ kɛɔ akɛ Yesu ji Nyɔŋmɔ Wiemɔ lɛ, ni ekɛɔ akɛ Nyɔŋmɔ yɛ Kristo mli, ekɛɔ hu akɛ Yesu ji Nyɔŋmɔ Bi; shi ewieee lɛ efolo kɛkɛ akɛ Yesu ji Nyɔŋmɔ.”

John Robinson ji mɔ ko ni kɛ mɛi kpaaa gbee oya yɛ Anglican Sɔlemɔ lɛ mli. Shi kɛlɛ, ani nɔ ni ewie ni tsɔɔ akɛ he ko kwraa bɛ “Kpaŋmɔ Hee” lɛ mli ni ‘wieɔ efolo kɛkɛ akɛ Yesu ji Nyɔŋmɔ’ lɛ ja?

Nɔ ni Biblia lɛ kɛɔ

Mɛi komɛi baaha sanebimɔ nɛɛ hetoo kɛtsɔ ŋmalɛ mli kuku ni jeɔ Yohane Sanekpakpa lɛ shishi ni kɛɔ nɛkɛ lɛ nɔ: “Shishijee lɛŋ lɛ Wiemɔ lɛ yɛ ni Wiemɔ lɛ kɛ Nyɔŋmɔ yɔɔ, ni Wiemɔ lɛ Nyɔŋmɔ ni.” (Yohane 1:⁠1) Shi ani enɛ eteee shi ewooo nɔ ni Anglican osɔfo lɛ kɛɛ lɛ? Eteee shi ewooo lɛ yɛ faŋŋ mli. Taakɛ John Robinson le ni ŋwanejee ko bɛ he lɛ, ŋmɛnɛŋmɛnɛ wiemɔi ashishitsɔɔlɔi komɛi kɛ bɔ ni King James Version (Ga Biblia) lɛ tsɔɔ nakai ŋmalɛ lɛ mli eha lɛ kpaaa gbee. Mɛni hewɔ? Ejaakɛ wiemɔ ni yɔɔ klɛŋklɛŋ Hela niŋmalamɔi lɛ amli ni atsɔɔ shishi yɛ wiemɔ kuku nɛɛ mli akɛ “Wiemɔ lɛ Nyɔŋmɔ ni” lɛ bɛ wiemɔ ni tsɔɔ nɔ pɔtɛɛ “lɛ” yɛ sabala “Nyɔŋmɔ” lɛ he. Yɛ wiemɔ kuku ni atsɔ hiɛ atsi ta akɛ “Wiemɔ lɛ kɛ Nyɔŋmɔ yɔɔ” lɛ mli lɛ, wiemɔ ni akɛtsu nii kɛha “Nyɔŋmɔ” lɛ tsɔɔ nɔ pɔtɛɛ, ni ji akɛ, wiemɔ ni tsɔɔ nɔ pɔtɛɛ lɛ yɛ he. Enɛ haaa efee tamɔ nɔ ni wiemɔi sɔrɔtoi enyɔ lɛ fɛɛ hiɛ shishinumɔ kome too lɛ nɔŋŋ.

Enɛ hewɔ lɛ, shishitsɔɔmɔi komɛi bɔɔ mɔdɛŋ ni amɛha shishinumɔ diɛŋtsɛ ni hewalɛ yɔɔ mli yɛ enɛ he lɛ aba. Akɛ nɔkwɛmɔ nɔ lɛ, mɛi komɛi tsɔɔ wiemɔ lɛ shishi akɛ “Wiemɔ lɛ yɛ krɔŋkrɔŋ.” (An American Translation, Schonfield ) Moffatt tsɔɔ shishi akɛ “Logos lɛ yɛ krɔŋkrɔŋ.” Shi kɛlɛ, beni amɛtsɔɔ akɛ jeee “krɔŋkrɔŋ” ji shishinumɔ ni sa yɛ biɛ lɛ, John Robinson kɛ Ŋleshinyo ŋmalɛi amlipɛilɔ, Sir Frederick Kenyon fɛɛ susu akɛ, kɛji nakai ji bɔ ni Yohane tsɔɔ lɛ, kulɛ ekɛ Hela wiemɔ thei’os ni atsɔɔ shishi akɛ “krɔŋkrɔŋ” lɛ baatsu nii. New World Translation lɛ ni naa wiemɔ “Nyɔŋmɔ” lɛ akɛ etsɔɔɔ nɔ pɔtɛɛ lɛ, kɛ sɔrɔto feemɔ ni ehaa anaa yɛ Hela ŋmaa mli lɛ, tsɔɔ shishi ni ekɛ wiemɔ ni etsɔɔɔ nɔ pɔtɛɛ yɛ Ŋleshi wiemɔ mli lɛ tsu nii nɛkɛ akɛ: “Wiemɔ lɛ nyɔŋmɔ ko ni.”

Professor Charles H. Dodd, New English Bible lɛ he nitsumɔ nɔkwɛlɔ lɛ wie enɛ he akɛ: “Shishitsɔɔmɔ ko ni yɔɔ mlɛo . . . lɛ baafee nɛkɛ, ‘Wiemɔ lɛ nyɔŋmɔ ko ni.” Tɔmɔ ko kwraa bɛ he, kɛ atsɔɔ wiemɔ fɛɛ wiemɔ shishi taakɛ eji pɛpɛɛpɛ lɛ.” Shi kɛlɛ, The New English Bible lɛ etsɔɔɔ kuku lɛ shishi yɛ nakai gbɛ nɔ. Shi moŋ, bɔ ní nakai shishitsɔɔmɔ lɛ kaneɔ yɛ Yohane 1:1 nɛ: “Beni nɔ fɛɛ nɔ je shishi lɛ, no mli lɛ Wiemɔ lɛ yɛ momo. Wiemɔ lɛ kɛ Nyɔŋmɔ yɔɔ, ní bɔ ní Nyɔŋmɔ ji lɛ, nakai nɔŋŋ hu Wiemɔ lɛ ji.” Mɛni hewɔ ni wiemɔi ashishitsɔɔmɔ ajinafoi lɛ kɛ shishitsɔɔmɔ ni yɔɔ mlɛo lɛ tsuuu nii lɛ? Professor Dodd haa hetoo akɛ: “Nɔ hewɔ ni akpɛlɛɛɛ nɔ lɛ ji akɛ eteɔ shi ewoɔ Bɔfo Yohane yiŋsusumɔ lɛ, ni akɛ, eteɔ shi ewoɔ Kristofoi ayiŋsusumɔ muu lɛ fɛɛ hu.”​—Technical Papers for the Bible Translator, Wolokpo 28, January 1977.

Ŋmalɛ Mli Shishinumɔ ni Yɔɔ Faŋŋ ni Afutuko Mli

Ani wɔɔkɛɛ akɛ jwɛŋmɔ ni tsɔɔ akɛ Yesu ji nyɔŋmɔ ko ni tamɔɔɔ Nyɔŋmɔ ni ji Bɔlɔ lɛ teɔ shi ewoɔ Bɔfo Yohane yiŋsusumɔ, kɛ agbɛnɛ Kristofoi ayiŋsusumɔ muu lɛ fɛɛ? Nyɛhaa wɔpɛia Biblia ŋmalɛi lɛ ekomɛi ni wieɔ Yesu kɛ Nyɔŋmɔ he lɛ amli wɔkwɛa, ni wɔbaana nɔ ni nibii ahe wielɔi komɛi ni hi shi dani afee Artanasia Hemɔkɛyeli Jajemɔ lɛ susu yɛ enɛɛmɛi ahe.

“Mi kɛ Tsɛ lɛ fɛɛ lɛ, ekomeŋ.”​—YOHANE 10:⁠30.

Novatian (c. 200-258 Ŋ.B.) wie enɛ he akɛ: “Akɛni E-kɛɛ nɔ ‘kome’[b] hewɔ lɛ, ha jamɔŋ atuatselɔi lɛ anu shishi akɛ, E-kɛɛɛ akɛ mɔ ‘kome.’ Ejaakɛ ekome ni akɛdamɔ shi aha wiemɔ ni etsɔɔɔ nuu loo yoo lɛ, tsɔɔ gbeekpamɔ ni ka amɛteŋ, shi jeee gbɔmɔtsoŋ ekomefeemɔ . . . Shi, akɛni E-kɛɛ ekome lɛ, tsɔɔ gbeekpamɔ, kɛ agbɛnɛ ekomefeemɔ yɛ kojomɔ mli, kɛ suɔmɔ naanyobɔɔ lɛ diɛŋtsɛ, taakɛ jwɛŋmɔ yɔɔ mli akɛ Tsɛ lɛ kɛ Bi lɛ fɛɛ kpaa gbee yɛ suɔmɔ kɛ hedɔɔ mli lɛ.”​—Treatise Concerning the Trinity, yitso 27.

“Mi-Tsɛ da fe mi.”​—YOHANE 14:⁠28.

Irenaeus (c. 130-200 Ŋ.B.) kɛɛ: “Wɔbaakase nii kɛtsɔ E-nɔ [Kristo] akɛ Tsɛ lɛ ta nii fɛɛ nɔ. Ejaakɛ E-kɛɔ akɛ ‘Tsɛ lɛ da fe Mi.’ No hewɔ lɛ, wɔ Nuŋtsɔ lɛ ejaje akɛ Tsɛ lɛ nɔ kwɔ yɛ nilee gbɛfaŋ.”​—Against Heresies, Wolo II, yitso 28.8.

“Enɛ ji naanɔ wala lɛ, akɛ amɛaana bo anɔkwa Nyɔŋmɔ koome pɛ lɛ, kɛ Yesu Kristo, mɔ ni otsu lɛ lɛ he nilee.”​—YOHANE 17:​3, NW.

Clement ni jɛ Alexandria (c. 150-215 Ŋ.B.) kɛɛ: “Koni ale naanɔ Nyɔŋmɔ, naanɔ shihilɛ halɔ lɛ, ni atsɔ nilee kɛ shishinumɔ nɔ koni nine ashɛ Nyɔŋmɔ nɔ, mɔ ni ji klɛŋklɛŋ, ni nɔ kwɔ fe fɛɛ, kɛ mɔ kome too, kɛ mɔ kpakpa lɛ. . . . Kɛkɛ lɛ, abaafa lɛ mɔ ni baana anɔkwa shihilɛ mli ehi lɛ koni ele Lɛ klɛŋklɛŋ, ‘mɔ ni mɔ ko mɔ ko leee lɛ, akɛ ja Bi lɛ ejie (Lɛ) kpo etsɔɔ.’ (Mat. 11:27) Nɔ ni nyiɛ sɛɛ ni abaakase ji Yiwalaherelɔ lɛ ni nyiɛ Lɛ esɛɛ lɛ agbojee lɛ.”​—Who Is The Rich Man That Shall Be Saved? VlI, Vlll.

“Nyɔŋmɔ kɛ mɛi fɛɛ a-Tsɛ kome ni yɔɔ mɛi fɛɛ nɔ ni etsɔɔ mɛi fɛɛ mli ni eyɔɔ mɛi fɛɛ mli lɛ.”​—EFESOBII 4:⁠6.

Irenaeus kɛɛ: “Ni no hewɔ lɛ ajaje Nyɔŋmɔ kɛ Tsɛ kome atsɔɔ, mɔ ni nɔ kwɔ fe mɛi fɛɛ, ni tsɔɔ mɛi fɛɛ mli, ni yɔɔ mɛi fɛɛ mli. Eka shi faŋŋ akɛ Tsɛ lɛ nɔ kwɔ fe mɛi fɛɛ, ni Lɛ ji Kristo lɛ Yitso.”​—Against Heresies, Wolo, yitso 18.2.

Nɛkɛ mra be mli niŋmalalɔi nɛɛ nu nɛkɛ kukuji nɛɛ ashishi akɛ etsɔɔ bɔ ni Tsɛ lɛ nɔ kwɔ ha, ni enɔ kwɔ fe nɔ fɛɛ nɔ kɛ mɔ fɛɛ mɔ ni Yesu Kristo fata he lɛ. Amɛwiemɔi lɛ etsɔɔɔ yɛ gbɛ ko kwraa nɔ akɛ amɛhe Triniti lɛ amɛye.

Mumɔ Krɔŋkrɔŋ lɛ Jieɔ Anɔkwalei Fɛɛ Kpo

Yesu wo ekaselɔi lɛ ashi akɛ yɛ egbele kɛ eshitee lɛ sɛɛ lɛ, akɛ mumɔ krɔŋkrɔŋ lɛ baaha amɛ akɛ hefatalɔ loo yelikɛbualɔ. Ewo shi akɛ: “Kɛ lɛ, anɔkwale mumɔ lɛ, ena eba lɛ, eeetsɔɔ nyɛ anɔkwale lɛ fɛɛ mli gbɛ; . . . ni nii ni baa lɛ, eeetsi ta etsɔɔ nyɛ.”​—Yohane 14:​16, 17; 15:​26; 16:⁠13.

Nakai shiwoo lɛ ba mli yɛ Yesu gbele sɛɛ. Biblia lɛ eŋma bɔ ni atsɔ mumɔ krɔŋkrɔŋ lɛ yelikɛbuamɔ nɔ ajie tsɔɔmɔi heei akpo loo aha efee faŋŋ aha Kristofoi asafo lɛ efɔ shi. Aŋmala nɛkɛ tsɔɔmɔi heei nɛɛ ashwie shi yɛ woji ni sɛɛ mli lɛ ebatsɔ Biblia lɛ fa ni ji enyɔ lɛ, ni ji Kristofoi a-Hela Ŋmalɛi lɛ, loo “Kpaŋmɔ Hee” lɛ amli. Ani ana Triniti ni bajeɔ shihilɛ mli lɛ he okadi loo kpojiemɔ ko yɛ no be lɛ mli niiashishinumɔ hee ni faa nɛɛ mli? Dabi. Mumɔ krɔŋkrɔŋ lɛ jie nɔ ko ni esoro no kwraa kpo yɛ Nyɔŋmɔ kɛ Yesu he.

Akɛ nɔkwɛmɔ nɔ lɛ, yɛ Pentekoste 33 Ŋ.B., beni mumɔ krɔŋkrɔŋ lɛ eba kaselɔi ni ebua amɛhe naa lɛ anɔ sɛɛ mli yɛ ŋwɛitsu lɛ mli yɛ Yerusalem lɛ, bɔfo Petro ye Yesu he odase etsɔɔ mɛi babaoo ni damɔ agbo lɛ naa lɛ. Ani ewie Triniti ko he? Bo lɛ susumɔ ewiemɔi lɛ ekomɛi ahe, ni oha hetoo oha bo diɛŋtsɛ ohe: “Yesu . . . , nuu ni Nyɔŋmɔ kɛ hewalɛ nitsumɔi kɛ naakpɛɛ nii kɛ okadii ni etsɔ enine nɔ efee yɛ nyɛteŋ lɛ ye ehe odase etsɔɔ nyɛ.” “Nɛkɛ Yesu nɛɛ Nyɔŋmɔ tee lɛ shi; no he odasefoi ji wɔ fɛɛ.” “Nyɔŋmɔ eŋɔ nɛkɛ Yesu ni nyɛsɛŋ lɛ nɛɛ efee Nuŋtsɔ kɛ Kristo fɛɛ.” (Bɔfoi lɛ Asaji 2:​22, 32, 36) Wiemɔi ni jɛ Petro ni mumɔ eyi lɛ obɔ lɛ naa lɛ, maa bɔ ni Yesu baa shi ha lɛ nɔ mi kɛ akɛ lɛ to e-Tsɛ lɛ he lɛ, ni ji akɛ lɛ ji dɛŋdade kɛha Nyɔŋmɔ suɔmɔnaa nii lɛ amlibaa, ni ji nɔ ko ni esoro no kwraa yɛ Triniti ni eeetsɔɔ lɛ he.

No sɛɛ etsɛɛɛ nɔŋŋ, ni Kristofonyo anɔkwafo ko hu wie Yesu he. Akɛ Stefano ba Akuashɔŋ lɛ hiɛ koni eha enaafolɔmɔi ahetoo. Yɛ no najiaŋ moŋ lɛ, Stefano folɔ enaafolɔi lɛ anaa, ni eka amɛhiɛ akɛ amɛtamɔ amɛblema tsɛmɛi atuatselɔi lɛ pɛpɛɛpɛ. Naagbee mli lɛ, amaniɛbɔɔ lɛ tee nɔ akɛ: “Lɛ lɛ, nɔ ni mumɔ krɔŋkrɔŋ eyi lɛ obɔ lɛ, ekwɛ ŋwɛi gaa, ni ena Nyɔŋmɔ anunyam lɛ kɛ Yesu ni edamɔ Nyɔŋmɔ ninejurɔ nɔ, ni ekɛɛ: ‘Naa, miina ŋwɛi naa ni egbele, kɛ gbɔmɔ Bi lɛ ni edamɔ Nyɔŋmɔ ninejurɔ nɔ.’” (Bɔfoi lɛ Asaji 7:​55, 56) Mɛni hewɔ ni mumɔ krɔŋkrɔŋ lɛ jie Yesu kpo akɛ “gbɔmɔ Bi” kɛkɛ, ni damɔ Nyɔŋmɔ ninejurɔ nɔ ni jeee akɛ eji mɛi etɛ ni efee ekome ko fa ni kɛ e-Tsɛ lɛ yeɔ egbɔ lɛ? Eka shi faŋŋ akɛ, Stefano bɛ Triniti he shishinumɔ yɛ ejwɛŋmɔ mli.

Kulɛ eji hegbɛ kroko hu ni ana ni akɛaajie Triniti tsɔɔmɔ lɛ kpo beni Petro kɛ Yesu he sanekpakpa lɛ tee Kornelio ŋɔɔ lɛ. Mɛni ba? Petro tsɔɔ mli akɛ Yesu ji “mɛi fɛɛ a-Nuŋtsɔ.” Shi etee nɔ etsɔɔ mli akɛ enuŋtsɔyeli lɛ jɛ jɛɛhe ko ni nɔ kwɔ. Yesu ji “Mɔ ni Nyɔŋmɔ efa eto hiɛkalɔi kɛ gbohii akojolɔ lɛ.” Yɛ Yesu shitee lɛ sɛɛ lɛ, e-Tsɛ lɛ ‘ha ejie ehe kpo faŋŋ etsɔɔ’ esɛɛnyiɛlɔi lɛ. Ni mumɔ krɔŋkrɔŋ lɛ hu? Ejeɔ kpo yɛ sanegbaa nɛɛ mli moŋ shi jeee akɛ gbɔmɔ ko ni fata he feɔ mɛi etɛ yɛ Triniti ko mli. Shi moŋ, “Nyɔŋmɔ ŋɔ mumɔ krɔŋkrɔŋ kɛ hewalɛ efɔ Yesu [mu].” No hewɔ lɛ, awie mumɔ krɔŋkrɔŋ lɛ ni tamɔɔɔ gbɔmɔ kwraa lɛ he akɛ nɔ ko ni jeee gbɔmɔ, tamɔ “hewalɛ” nɛkɛ ni atsi ta yɛ nakai kuku lɛ mli lɛ. (Bɔfoi lɛ Asaji 10:​36, 38, 40, 42) Kwɛmɔ Biblia lɛ mli jogbaŋŋ, ni obaana odaseyeli kroko hu ni tsɔɔ akɛ mumɔ krɔŋkrɔŋ lɛ jeee gbɔmɔ shi moŋ eji nifeemɔ hewalɛ ni baanyɛ ayi mɛi amli obɔ, ni ekanya amɛ, eha amɛhe adɔ la, ni afɔse ashwie amɛnɔ.

Naagbee lɛ, eji Triniti lɛ ji anɔkwale tsɔɔmɔ kulɛ bɔfo Paulo na hegbɛ ni ekɛaatsɔɔ mli​—yɛ be mli ni eshiɛɔ etsɔɔ Ateenebii lɛ. Ewie amɛ afɔleshaa latɛ ni aŋma yɛ nɔ akɛ “Nyɔŋmɔ ni aleko lɛ nɔŋ” lɛ he yɛ emaŋshiɛmɔ lɛ mli ni ekɛɛ akɛ: “Mɔ ni nyɛleee lɛ ni nyɛjaa lɛ kɛ̃ lɛ, lɛ nɔŋŋ ehe sane mijajeɔ mitsɔɔ nyɛ nɛɛ.” Ani ejaje Triniti he sane ko etsɔɔ amɛ? Dabi. Etsɔɔ mɔ ni “Nyɔŋmɔ ni fee je lɛ kɛ emli nibii fɛɛ, ni ji ŋwɛi kɛ shikpɔŋ Nuŋtsɔ lɛ” ji. Shi mɛni ekɛɛ yɛ Yesu he? “[Nyɔŋmɔ] eto gbi ko, nɔ̃ nɔ ni ebaatsɔ nuu ni eto lɛ nɔ ekojo jeŋ muu lɛ fɛɛ yɛ jalɛ naa.” (Bɔfoi lɛ Asaji 17:​23, 24, 31) Awieee nɔ ko kwraa ni kɔɔ Triniti ko he yɛ jɛmɛ!

Eji anɔkwale akɛ, Paulo gbala nɔ ko mli etsɔɔ ni kɔɔ Nyɔŋmɔ yiŋtoo he ni haa ewaa waa akɛ Yesu kɛ e-Tsɛ lɛ fɛɛ aaafee mɛi ni kɛ amɛhe yeɔ egbɔ yɛ Triniti ko mli. Eŋma akɛ: “[Nyɔŋmɔ] ‘ŋɔ nibii fɛɛ kwa eto [Yesu] najiashi.’ Shi kɛ ekɛɛ akɛ ‘aŋɔ nibii fɛɛ ato eshishi’ lɛ, belɛ eyɛ faŋŋ akɛ Mɔ ni ŋɔ nibii fɛɛ to eshishi lɛ bɛ mli. Shi beni aŋɔ nii fɛɛ ato Bi lɛ shishi lɛ, no lɛ lɛ diɛŋtsɛ hu eeeŋɔ ehe eto Mɔ ni ŋɔ nii fɛɛ to eshishi lɛ shishi, koni Nyɔŋmɔ afee [mɛi] fɛɛ ayitso.” (1 Korintobii 15:​27, 28) No hewɔ lɛ, Nyɔŋmɔ baaka he afee mɔ ni ta mɛi fɛɛ nɔ, ni Yesu fata he.

Belɛ ani Triniti lɛ ji Biblia tsɔɔmɔ? Dabi. John Robinson sane lɛ ja. Ebɛ Biblia lɛ mli, asaŋ ejeee “Kristofoi asusumɔi” lɛ fa. Ani osusuɔ enɛ he akɛ ehe miihia bo kɛ ojamɔ lɛ? Esa akɛ ehe ahia bo. Yesu kɛɛ: “Enɛ ji naanɔ wala lɛ, akɛ amɛaana bo anɔkwa Nyɔŋmɔ koome pɛ lɛ, kɛ Yesu Kristo, mɔ ni otsu lɛ lɛ he nilee.” (Yohane 17:​3, NW) Kɛ wɔŋɔɔ jamɔ ni wɔkɛhaa Nyɔŋmɔ lɛ akɛ hiɛdɔɔ sane lɛ, belɛ ehe miihia ni wɔle lɛ taakɛ eji diɛŋtsɛ, tamɔ bɔ ni ejie ehe kpo etsɔɔ wɔ lɛ pɛpɛɛpɛ. Ni no dani wɔɔnyɛ wɔkɛɛ yɛ anɔkwale mli akɛ wɔfata “anɔkwa jalɔi” ni ‘jaa Tsɛ lɛ yɛ mumɔ kɛ anɔkwale mli’ lɛ ahe.​—Yohane 4:⁠23.

[Shishigbɛ niŋmaa]

[Wiemɔ ni akɔ ni akɛmiitsu nii ni yɔɔ baafa 28]

Ŋmalɛ mli shishinumɔ ni yɔɔ faŋŋ lɛ tsɔɔ akɛ Yesu kɛ e-Tsɛ lɛ jeee Nyɔŋmɔ kome too lɛ nɔŋŋ

[Wiemɔ ni akɔ ni akɛmiitsu nii ni yɔɔ baafa 29]

Mɛni hewɔ mumɔ krɔŋkrɔŋ lɛ ejieee lɛ kpo etsɔɔɔ akɛ Yesu ji Nyɔŋmɔ lɛ nɔŋŋ yɛ Pentekoste afi 33 Ŋ.B. lɛ sɛɛ?