“Tsɛ Asafo Lɛ Mli Onukpai Lɛ”
“Kɛ nyɛteŋ mɔ ko he waaa lɛ lɛ, etsɛ asafo lɛ mli onukpai lɛ kɛba eŋɔɔ.”—YAKOBO 5:14.
1, 2. (a) Mɛɛ jaramɔ bei Yehowa tsuji naa amɛhe yɛ mli bianɛ, ni te amɛbaanu he amɛha tɛŋŋ? (b) Mɛɛ sanebimɔi ebiɔ ni aha hetoo agbɛnɛ?
“JARAMƆ bei” amli wɔyɔɔ nɛɛ. Gbɔmɛi miifee amɛnii yɛ pɛsɛmkunya gbɛ nɔ, amɛmiidi heloo gbɛfaŋ nibii asɛɛ kɛ henɔwomɔ, ni amɛkɛ basabasa-feemɔ baa yɛ nɛkɛ “naagbee gbii” nɛɛ amli. (2 Timoteo 3:1-5) Akɛ Kristofoi ni yɔɔ ŋmɛnɛŋmɛnɛ yiwalɛ nibii agbɛjianɔtoo nɛɛ naagbee lɛ mli lɛ, wɔnaa ni osharai wuji etɛ ko miiwo wɔhe gbeyei waa: Satan Abonsam, adesai ni sheee Nyɔŋmɔ gbeyei lɛ aje lɛ, kɛ wɔ diɛŋtsɛ wɔ eshafeemɔ sui ni wɔna kɛjɛ fɔmɔ mli lɛ.—Romabii 5:12; 1 Petro 5:8; 1 Yohane 5:19.
2 Akɛni osharai nɛɛ miiwo wɔhe gbeyei hewɔ lɛ, wɔbaanu he yɛ bei komɛi amli akɛ aye wɔnɔ kwraa. Belɛ nɛgbɛ wɔbaana sɛɛfimɔ kɛjɛ koni eye ebua wɔ ni wɔŋmɛ wɔtsui shi yɛ anɔkwayeli mli? Namɔ wɔbaanyɛ wɔtsɔ wɔhe kɛya eŋɔɔ kɛha gbɛtsɔɔmɔ kɛ esa akɛ wɔkpɛ wɔyiŋ yɛ wɔ Kristofoi anitsumɔi kɛ wɔjamɔ lɛ he?
Yelikɛbuamɔ Bɛŋkɛ Kpaakpa
3. Namɔ dɛŋ wɔɔnyɛ wɔna miishɛjemɔ ni nɔmimaa yɔɔ mli kɛjɛ, ni yɛ mɛɛ gbɛ nɔ?
3 Nilee ni wɔyɔɔ akɛ Yehowa ji wɔ hewalɛ Jɛɛhe lɛ haa wɔnaa miishɛɛ ni nɔmimaa yɔɔ mli. (2 Korintobii 1:3, 4; Filipibii 4:13) Lalatsɛ David, ni na ŋwɛi yelikɛbuamɔ lɛ jaje akɛ: “Gbɛ ni onyiɛ nɔ lɛ, ŋɔɔ ofɔ Yehowa nɔ, ni oŋɔ ohiɛ hu ofɔ enɔ, ni eeefee.” “Shɛ ojatsu lɛ ofɔ Yehowa nɔ, ni lɛ eeehiɛ omli; eŋmɛŋ gbɛ gbi ko gbiko ni jalɔ adida.” (Lala 37:5; 55:23) Kwɛ shi ni wɔbaanyɛ wɔda yɛ nɛkɛ sɛɛfimɔ nɛɛ hewɔ!
4. Petro kɛ Paulo fɛɛ kɛ miishɛjemɔ haa yɛ mɛɛ gbɛ nɔ?
4 Wɔbaanyɛ wɔna miishɛɛ hu kɛjɛ nilee ni wɔyɔɔ akɛ jeee wɔ pɛ wɔkɛ kaai kɛ osharai nɛɛ kpeɔ lɛ mli. Bɔfo Petro wo nanemɛi Kristofoi lɛ hewalɛ akɛ: “Nyɛdamɔa shi shiŋŋ yɛ hemɔkɛyeli lɛ mli nyɛtsia [Satan Abonsam] gbɛ, ejaakɛ nyɛle akɛ nakai amanehului lɛ nɔŋŋ nyɛnyɛmimɛi ni yɔɔ je lɛŋ lɛ hu naa.” (1 Petro 5:9) Yɛ anɔkwale mli lɛ Kristofoi fɛɛ miisumɔ ni amɛdamɔ shi shiŋŋ yɛ hemɔkɛyeli lɛ mli. Eji anɔkwale akɛ wɔbaanu he yɛ bei pii akɛ “afifiaa wɔ yɛ he fɛɛ he,” taakɛ bɔfo Paulo nu he lɛ. Ni kɛlɛ, “[e]tsui esuuu.” Taakɛ eba enɔ lɛ, ekolɛ wɔɔfee yeyeeye, “ shi kɛlɛ wɔnijiaŋ ejeko wui.” Ni kɛ awaa wɔ yi po lɛ, “kɛlɛ akwako wɔ.” Kɛ “atswiaa wɔ shi” lɛ, kɛlɛ “wɔpleneeko.” No hewɔ lɛ, “wɔtsui efaaa.” “Wɔjeee mɛi ni kwɛɔ nii ni anaa lɛ, shi moŋ nii ni anaaa lɛ wɔkwɛɔ.” (2 Korintobii 4:8, 9, 16, 18) Mɛɛ gbɛ nɔ wɔɔtsɔ wɔfee enɛ?
5. Mɛɛ yelikɛbuamɔ nibii etɛ Yehowa kɛhaa?
5 Yehowa, “sɔlemɔ Toibolɔ lɛ,” kɛ yelikɛbuamɔ nii ni bɔ he etɛ haa. (Lala 65:2, New World Translation; 1 Yohane 5:14) Klɛŋklɛŋ lɛ, ekɛ gbɛtsɔɔmɔ haa kɛtsɔɔ e-Wiemɔ ni jɛ mumɔŋ, ni ji Biblia lɛ nɔ. (Lala 119:105; 2 Timoteo 3:16) Nɔ ni ji enyɔ lɛ, emumɔ krɔŋkrɔŋ lɛ woɔ wɔ hewalɛ koni wɔfee esuɔmɔnaa nii. (Okɛto Bɔfoi lɛ Asaji 4:29-31 he.) Ni nɔ ni ji etɛ lɛ, Yehowa shikpɔŋ nɔ gbɛjianɔtoo lɛ efee klalo akɛ eeeye ebua wɔ. Mɛni esa akɛ wɔfee koni wɔnine ashɛ yelikɛbuamɔ nɔ?
“Nikeenii yɛ Gbɔmɛi Ateŋ”
6. Mɛɛ yelikɛbuamɔ Yehowa kɛha yɛ Tabera, ni yɛ mɛɛ gbɛ nɔ?
6 Sane ko ni ba yɛ gbalɔ Mose gbii lɛ amli lɛ yeɔ ebuaa wɔ ni wɔhiɛ sɔɔ suɔmɔ gbɛ ni Yehowa tsɔɔ nɔ esusuɔ mɛi ahe yɛ yelikɛbuamɔ ni ekɛhaa E-tsuji hewɔ lɛ mli. Enɛ ba yɛ Tabera, ni eshishi ji “la ni hereɔ; la ni awo; la ni tsoɔ grigri.” Biɛ ji he ni Nyɔŋmɔ ha la here ewo lsraelbii ni wieɔ huhuuhu lɛ, yɛ Sinai ŋa lɛ nɔ. “Futufutu-gbɔmɛi” ni fata lsraelbii lɛ ahe kɛjɛ Mizraim lɛ yafata amɛhe ni amɛkɛtsɔɔ bɔ ni amɛsumɔɔɔ niyenii ni ajɛ ŋwɛi akɛha nɛɛ. Akɛni Mose yoo Nyɔŋmɔ mlifu kɛ bɔ ni enuɔ he akɛ gbɔmɛi lɛ agbɛnaa nii kɛ amɛhiamɔ nii fa fe bɔ ni eeenyɛ etere hewɔ lɛ, ebo akɛ: “Mikome too minyɛŋ maŋ muu nɛɛ fɛɛ mahiɛ, ejaakɛ etsii fe mi! Ni kɛji nɛkɛ okɛ mi baaye lɛ, no lɛ kɛ mihiɛ eba nyam yɛ ohiɛ lɛ, gbee mi moŋ nyɔŋlo, koni mikana mihiɛnaa nɔ nii.” (4 Mose 11:1-15) Te Yehowa ha hetoo eha tɛŋŋ? Ehala “lsrael onukpai lɛ ateŋ mɛi nyɔŋmai kpawo,” ni ekɛ emumɔ lɛ shwie amɛnɔ koni amɛnyɛ amɛye amɛbua Mose yɛ maŋ nɔkwɛmɔ nitsumɔ lɛ mli. (4 Mose 11:16, 17, 24, 25) Akɛni akɛ nitsumɔ ewo onukpai nɛɛ adɛŋ hewɔ lɛ, lsraelbii lɛ kɛ “futufutu-gbɔmɛi” babaoo lɛ anine shɛ yelikɛbuamɔ nɔ oya.—2 Mose 12:38.
7, 8. (a) Mɛɛ bɛ nɔ Yehowa tsɔ ekɛ “nikeenii yɛ gbɔmɛi ateŋ” ha yɛ blema Israel? (b) Paulo kɛ Lala 68:19 tsu nii yɛ klɛŋklɛŋ afii oha lɛ mli yɛ mɛɛ gbɛ nɔ?
7 Beni lsraelbii lɛ ehi Shiwoo Shikpɔŋ lɛ nɔ afii babaoo sɛɛ lɛ, Yehowa kwɔ Zion Gɔŋ lɛ yɛ mfoniri-feemɔ gbɛ nɔ ni ekɛ Yerusalem fee mfoniri-feemɔ mli maŋtsɛyeli ko maŋtiase kɛ David akɛ enɔ maŋtsɛ. Yɛ Nyɔŋmɔ, ni ji “Ofe lɛ” yijiemɔ mli lɛ, David wo egbee nɔ ni ela akɛ: “Okwɔ kɛtee ŋwɛi, oŋɔ nomi anom; ohe nikeenii yɛ gbɔmɛi ateŋ.” (Lala 68:15, 19) Lɛlɛŋ, hii ni aŋɔ amɛ nom beni aye Shiwoo Shikpɔŋ lɛ nɔ lɛ batsɔmɔ mɛi ni ye bua Levibii lɛ yɛ amɛnitsumɔi amli.—Ezra 8:20.
8 Kristofonyo bɔfo Paulo gbala jwɛŋmɔ kɛtee lalatsɛ lɛ wiemɔi lɛ amlibaa yɛ gbalɛ mli lɛ nɔ, yɛ Ŋ.B. klɛŋklɛŋ afii oha lɛ mli. Paulo ŋma akɛ: “Shi wɔteŋ mɔ fɛɛ mɔ lɛ, aŋɔ duromɔ lɛ aha lɛ yɛ Kristo nikeenii asusumɔ lɛ naa. No hewɔ lɛ ekɛɛ: ‘Ekwɔ kɛtee ŋwɛi, ni eŋɔ nomi anom, ni ekɛ nikeenii ha gbɔmɛi.’ Shi ni akɛɛ ‘ekwɔ’ lɛ, te eshishi hu? kɛ jeee shi hu ekpeleke kɛtee shikpɔŋ lɛ shishi niiaŋ tsutsu lɛ? Mɔ ni kpeleke shi lɛ, lɛ nɔŋŋ hu ji mɔ ni kwɔ kɛtee ŋwɛii fɛɛ ayiteŋ, koni ewo nii fiaa obɔbɔ lɛ.” (Efesobii 4:7-10) Namɔ ji “lɛ nɔŋŋ hu” nɛɛ? Jeee mɔ ko mɔ ko fe Yehowa najiaŋdamɔlɔ, David Kpeteŋkpele lɛ kɛ Mesia Maŋtsɛ, Yesu Kristo. Lɛ ji mɔ ni Nyɔŋmɔ tee lɛ shi ni ewo enɔ “gojoo” lɛ.—Filipibii 2:5-11.
9. (a) Namɛi ji klɛŋklɛŋ afii oha lɛ mli nikeenii yɛ gbɔmɛi ateŋ lɛ? (b) Namɛi ji ŋmɛnɛŋmɛnɛ beaŋ nikeenii yɛ gbɔmɛi ateŋ lɛ?
9 Belɛ namɛi ji “nikeenii yɛ gbɔmɛi ateŋ” (loo “nikeenii ni ji gbɔmɛi”) nɛɛ? Paulo tsɔɔ mli akɛ Nyɔŋmɔ Najiaŋdamɔlɔ Nukpa lɛ ha “mɛi komɛi tsɔmɔ bɔfoi, ni mɛi komɛi gbalɔi, mɛi komɛi hu sanekpakpa jajelɔi, ni mɛi komɛi hu nɔkwɛlɔi kɛ tsɔɔlɔi, koni aŋɔsaa hetselɔi lɛ aha sɔɔmɔ nitsumɔ lɛ, kɛ Kristo gbɔmɔtso lɛ tswaa.” (Efesobii 4:11, 12) Kristo sɛɛnyiɛlɔi lɛ fɛɛ ni sɔmɔ akɛ bɔfoi, gbalɔi, sanekpakpa jajelɔi, nɔkwɛlɔi, kɛ tsɔɔlɔi lɛ fɛɛ fee nakai yɛ teokrase gbɛtsɔɔmɔ shishi (Luka 6:12-16; Bɔfoi lɛ Asaji 8:12; 11:27, 28; 15:22; 1 Petro 5:1-3) Yɛ wɔgbii nɛɛ amli hu lɛ, onukpai ni he esa yɛ mumɔŋ ni mumɔ krɔŋkrɔŋ lɛ ehala amɛ sɔmɔɔ akɛ nɔkwɛlɔi yɛ Yehowa Odasefoi asafoi aaafee 70,000 ni yɔɔ jeŋ fɛɛ lɛ amli. Amɛji wɔ nikeenii yɛ gbɔmɛi ateŋ. (Bɔfoi lɛ Asaji 20:28) Akɛni Maŋtsɛyeli-shiɛmɔ nitsumɔ lɛ mlilɛɛmɔ miiya nɔ kɛ foi yɛ jeŋ fɛɛ hewɔ lɛ, nyɛmimɛi hii babaoo ‘kɛ amɛhe miiha’ ni amɛmiitsu gbɛnaa nii ni fataa “nɔkwɛmɔ nitsumɔ” he baa lɛ ahe nii. (1 Timoteo 3:1) Kɛ ahala amɛ lɛ, amɛ hu amɛbatsɔmɔɔ nikeenii yɛ gbɔmɛi ateŋ.
10. Bɔ ni Yesaia tsɔɔ “lumɛi” amli eha lɛ sa nitsumɔ ni Kristofoi onukpai lɛ tsuɔ ŋmɛnɛ lɛ yɛ mɛɛ gbɛ nɔ?
10 Nɛkɛ Kristofoi onukpai, loo nikeenii yɛ gbɔmɛi ateŋ nɛɛ sa bɔ ni gbalɔ Yesaia tsɔɔ saji amli eha beni egbaa “lumɛi,” ni ji maŋ nɔkwɛlɔi yɛ Maŋtsɛyeli nɔyeli shishi lɛ anitsumɔi ahe saji efɔɔ shi lɛ. Amɛteŋ mɔ fɛɛ mɔ “aaatsɔ tamɔ abobaa he yɛ kɔɔyɔɔ naa kɛ teemɔ he yɛ nugbɔnɛmɔ naa, tamɔ faai yɛ ŋa kpataa nɔ loo tɛsaa kpele ko ni haa hɔɔŋ yɛ shikpɔŋ gbiŋ nɔ.” (Yesaia 32:1, 2) Enɛ jieɔ bɔ ni esa akɛ hii ni ahala amɛ nɛɛ anɔkwɛmɔ nitsumɔ lɛ afee nɔ ni yeɔ buaa loo ewoɔ mɔ hewalɛ lɛ kpo. Te ooofee tɛŋŋ ni enɛ he aba sɛɛnamɔ ahao kɛmɔ shi?
Hegbɛ ni Oooŋɔ ni Okɛtsu Nii
11. Te wɔɔfee tɛŋŋ ni wɔnine ashɛ yelikɛbuamɔ nɔ beni wɔba shi yɛ mumɔŋ lɛ?
11 Gbɔmɔ ni miimii nu lɛ kɛ henumɔ boɔ etsɛɔ yelikɛbuamɔ. Shishashaomɔ ko bɛ enɛ mli. Atsirɛɛɛ mɔ ko yisɛɛ koni ebi yelikɛbuamɔ kɛ oshara ba wala he. Ani Maŋtsɛ David biii yelikɛbuamɔ shii abɔ kɛjɛɛɛ Yehowa dɛŋ? (Lala 3:5; 4:2; 5:2-4; 17:1, 6; 34:7, 18-20; 39:13) Kɛ wɔba shi yɛ mumɔŋ, ni ekolɛ wɔmiibote nijiaŋwujee mli lɛ, wɔtsɔɔ wɔhe kɛyaa Yehowa ŋɔɔ yɛ sɔlemɔ mli, ni wɔkpaa lɛ fai koni ekɛ emumɔ krɔŋkrɔŋ lɛ akudɔ wɔ. (Lala 55:23; Filipibii 4:6, 7) Wɔtaoɔ miishɛjemɔ kɛjɛɔ Ŋmalɛi lɛ amli. (Romabii 15:4) Wɔtaoɔ Kristofoi awoji ni Buu Mɔɔ Asafo lɛ eŋmala lɛ amli kɛhaa ŋaawoo ni anyɛɔ akɛtsuɔ nii. Yɛ bei pii amli lɛ enɛ yeɔ ebuaa wɔ ni wɔnaa tsabaa wɔhaa wɔ diɛŋtsɛ wɔnaagbai. Shi kɛ etamɔ nɔ ni shihilɛi ni mli wawai eye wɔnɔ kwraa lɛ, wɔbaanyɛ wɔtao ŋaawoo kɛjɛ asafo lɛ mli onukpai ni ahala amɛ lɛ aŋɔɔ. Yɛ anɔkwale mli lɛ, be baashɛ ni ehe baahia ni ‘wɔtsɛ onukpai lɛ.’ Mɛni hewɔ esa akɛ otsɛ Kristofoi onukpai lɛ? Mɛɛ gbɛ nɔ amɛaatsɔ amɛye amɛbua mɛi ni mumɔŋ yelikɛbuamɔ he hiaa amɛ lɛ?
12-14. (a) Mɛni ji gbɛ ni nilee yɔɔ mli ni esa akɛ atsɔ nɔ beni mɔ ko he yeɔ lɛ? (b) Taakɛ Yakobo 5:14 tsɔɔ lɛ, mɛni awoɔ Kristofoi ni “he waaa lɛ” aŋaa ni amɛfee? (d) Mɛɛ hela nɛkɛ Yakobo 5:14 wieɔ he lɛ, ni mɛni hewɔ ohaa hetoo nakai?
12 Kɛ wɔhe miiye lɛ, wɔjɔɔ wɔhe koni wɔha nyɛmɔ ni gbɔmɔtso lɛ yɔɔ ni ekɛsaa nii lɛ anyɛ atsu nii jogbaŋŋ. Shi kɛ hela lɛ baaa shi lɛ, wɔkɛ nilee taoɔ yelikɛbuamɔ ni sa yɛ tsofafeemɔ mli. Ani esaaa akɛ wɔfeɔ nakai nɔŋŋ yɛ be mli ni wɔgbɔjɔ yɛ mumɔŋ lɛ?
13 Kadimɔ ŋaawoo ni kaselɔ Yakobo kɛhaa wɔ yɛ enɛ mli lɛ. Ekɛɔ akɛ: “Kɛ nyɛteŋ mɔ ko he waaa lɛ lɛ, etsɛ asafo lɛ mli onukpai lɛ kɛba eŋɔɔ, ni amɛkpa lɛ mu yɛ Nuŋtsɔ [Yehowa] gbɛi amli, ni amɛsɔle amɛha lɛ.” (Yakobo 5:14) Mɛɛ hela nɛkɛ Yakobo wieɔ he lɛ? Biblia mli saji ahe wielɔi komɛi tsɔɔ akɛ eji gbɔmɔtsoŋ hela, ejaakɛ mu ni akpaa mɔ lɛ ji tsofa-feemɔ mli nifeemɔ ni akɛfɔɔ nitsumɔ yɛ nakai gbii lɛ amli. (Luka 10:34) Amɛheɔ amɛyeɔ hu akɛ nɔ ni yɔɔ Yakobo jwɛŋmɔ mli ji naakpɛɛ tsamɔ kɛtsɔ nikeenii ni ji hela tsamɔ nɔ. Shi mɛni emli saji lɛ tsɔɔ?
14 Aatsɔɔ sɔrɔto-feemɔ ni yɔɔ mɔ ni “ena tsuijurɔ” kɛ mɔ ni “miina amanehulu” lɛ teŋ. Enɛ tsɔɔ akɛ Yakobo miiwie mumɔŋ hela he. (Yakobo 5:18) “Asafo lɛ mli onukpai” [onukpai, King James Version] lɛ ji mɛi ni esa akɛ atsɛ amɛ, shi jeee datrɛfoi loo mɛi ni yɔɔ naakpɛɛ nikeenii ni ji helatsamɔ lɛ po. Ni mɛni amɛbaafee? Yakobo kɛɛ: “Amɛsɔle amɛha lɛ, ni hemɔkɛyeli sɔlemɔ lɛ aaahere helatsɛ lɛ yiwala.” (Yakobo 5:14, 15; okɛto Lala 119:9-16 he.) Nɔ ni maa nɔ mi kɛgbeɔ naa kwraa akɛ Yakobo miiwie mumɔŋ hela he lɛ ji anɔkwale ni eji akɛ ewo tɔmɔi loo eshai ni aaajaje he hewalɛ ekɛto tsamɔ ni hiɛ ka nɔ akɛ aaana lɛ he lɛ. Eŋma akɛ: “Nyɛjajea nyɛnɔtɔmɔi nyɛtsɔɔa nyɛhe, ni nyɛsɔlea nyɛhaa nyɛhe, ni nyɛhe ata.” Kɛ esha ni mli wa ji nɔ ni kɛ mumɔŋ hela lɛ ba lɛ, hewalɛ ni mɔ ni he yeɔ lɛ aaana lɛ damɔ ŋaawoo ni damɔ Nyɔŋmɔ Wiemɔ lɛ nɔ lɛ ni akɛhaa lɛ lɛ toiboo, etsuitsakemɔ, kɛ eshafeemɔ gbɛ lɛ ni eeeje he lɛ pɛ nɔ.—Yakobo 5:16; Bɔfoi lɛ Asaji 3:19.
15. Mɛɛ nifeemɔ ajie yi akɛ afee yɛ Yakobo 5:13, 14?
15 Nɔ kroko hu yɛ ni esa akɛ akadi yɛ Yakobo ŋaawoo lɛ mli. Kɛ Kristofonyo ko miina amanehulu lɛ, “ha esɔle.” Kɛ ena tsuijurɔ lɛ, “ela yijiemɔ lalai.” Shihilɛ fɛɛ shihilɛ biɔ nifeemɔ ko—kɛ mɔ lɛ miina amanehulu loo ena tsuijurɔ. Sɔlemɔ he miihia yɛ gbɛ kome nɔ, ni miishɛɛ wiemɔi hu yɛ gbɛ kroko nɔ. No hewɔ lɛ mɛni esa akɛ wɔkpa gbɛ beni Yakobo wieɔ akɛ: “Kɛ nyɛteŋ mɔ ko he waaa lɛ lɛ”? Nɔ ni ejieɔ yi ekoŋŋ ji nifeemɔ ni hi, hɛɛ, hegbɛ ni mɔ lɛ aaaŋɔ ni ekɛtsu nii. “Etsɛ asafo lɛ mli onukpai lɛ kɛba eŋɔɔ.”—Lala 50:15; Efesobii 5:19; Kolosebii 3:16.
Bɔ Ni “Onukpai lɛ” Yeɔ Buaa
16, 17. Mɛɛ gbɛ nɔ onukpai tsɔɔ amɛyeɔ amɛbuaa wɔ koni wɔkɛ Biblia mli shishitoo mlai atsu nii?
16 Bɔ ni wɔɔfee wɔle gbɛ ni wɔɔtsɔ nɔ wɔkɛ Biblia mli shishitoo mlai atsu nii yɛ wɔ diɛŋtsɛ wɔshihilɛ mli lɛ wa yɛ bei komɛi amli. Kristofoi onukpai baanyɛ afee yelikɛbuamɔ jɛɛhe diɛŋtsɛ yɛ biɛ. Akɛ nɔkwɛmɔ nɔ lɛ, amɛsɔleɔ amɛhaa mɔ ni he yeɔ yɛ mumɔŋ lɛ, ni ‘amɛkɛ mu kpaa lɛ yɛ Yehowa gbɛi amli’ kɛtsɔɔ hesaa ni amɛkɛ Nyɔŋmɔ Wiemɔ lɛ mli tsɔsemɔ wiemɔi ni tsaa mɔ lɛ tsuɔ nii haa lɛ nɔ. No hewɔ lɛ onukpai lɛ baanyɛ afee babaoo yɛ wɔmumɔŋ hewalɛnamɔ mli. (Lala 141:5) Yɛ bei pii amli lɛ, nɔ ni he hiaa wɔ pɛ ji nɔmimaa akɛ wɔmiisusu saji ahe yɛ gbɛ ni ja nɔ. Saji ni wɔkɛ Kristofonyo onukpa ni he esa lɛ aaawie he loo asusu he lɛ baawo wɔfaishitswaa akɛ wɔɔfee nɔ ni ja lɛ mli hewalɛ.—Abɛi 27:17.
17 Kɛ atsɛ amɛ ni amɛyasara mɔ ko lɛ, ehe baahia ni Kristofoi onukpai lɛ afee mɛi ni “shɛjea mɛi ni tsui faa lɛ amii.” Agbɛnɛ amɛ-baahere “mɛi ni feɔ gbedee lɛ,” ni ‘amɛto amɛtsui shi amɛha mɛi fɛɛ.’ (1 Tesalonikabii 5:14) Nɛkɛ teemɔŋ shishinumɔ kɛ tsakpaa kpakpa ni ka “onukpai lɛ” kɛ “mɛi ni feɔ gbedee” lɛ ateŋ lɛ haa mumɔŋ hewalɛ ni aaana ekoŋŋ lɛ feɔ nɔ ni baanyɛ aba.
Mɔ Diɛŋtsɛ Gbɛnaa Nii kɛ Sɔlemɔ
18, 19. Mɛni Kristofoi onukpai tsuɔ yɛ Galatabii 6:2, 5 he?
18 Esa akɛ Kristofoi onukpai atsu gbɛnaa nii ni jwere amɛnɔ yɛ Nyɔŋmɔ asafoku lɛ he lɛ he nii. Esa akɛ amɛfee mɛi ni fiɔ mɔ sɛɛ loo mɛi ni yeɔ buaa mɔ. Akɛ nɔkwɛmɔ nɔ lɛ, Paulo kɛɛ: “Anyɛmimɛi, kɛji nɔtɔmɔ ko banina mɔ ko trukaa lɛ, nyɛ mɛi ni nyɛji mumɔŋ gbɔmɛi lɛ, nyɛsaa nakai mɔ lɛ ekoŋŋ yɛ mlijɔlɛ mumɔ mli; ni ole ohe nɔ kwɛmɔ, koni bo hu akakao. Nyɛjatsui lɛ nyɛkpeekpeea nyɛhe nyɛterea, ni nakai nyɛaaye Kristo mla lɛ nɔ.” Bɔfo lɛ ŋma hu akɛ: “Mɔ fɛɛ mɔ aaatere lɛ diɛŋtsɛ ejatsu.”—Galatabii 6:1, 2, 5.
19 Te wɔɔfee tɛŋŋ wɔkpeekpee wɔhe yɛ wɔjatsui ateremɔ mli ni wɔtere wɔ diɛŋtsɛ wɔjatsu yɛ nakai beaŋ nɔŋŋ hu? Sɔrɔto-feemɔ ni yɔɔ Hela wiemɔi enyɔ ni atsɔɔ shishi akɛ “jatsui” kɛ “jatsu” loo (gbɛnaa nii) lɛ shishinumɔi amli lɛ kɛ hetoo lɛ haa. Kɛ Kristofonyo ko yabote mumɔŋ haomɔ ko ni tamɔ jatsu kɛha lɛ lɛ mli lɛ, onukpai lɛ kɛ nanemɛi heyelilɔi krokomɛi baaye abua lɛ, koni enyɛ etere ‘ejatsũi’ loo gbɛnaa nii lɛ. Shi aakpa mɔ aŋkro lɛ diɛŋtsɛ gbɛ akɛ eeetere egbɛnaa nii kɛha Nyɔŋmɔ lɛ he “jatsu” lɛ.a Onukpai lɛ kɛ miishɛɛ tereɔ amɛ nyɛmimɛi lɛ ‘ajatsui’ lɛ kɛtsɔɔ hewalɛwoo, Ŋmalɛ mli ŋaawoo, kɛ sɔlemɔ nɔ. Ni kɛlɛ onukpai lɛ heee gbɛnaa nii ni jwere wɔnɔ yɛ mumɔŋ lɛ he “jatsu” lɛ kɛjɛɛɛ wɔdɛŋ.—Romabii 15:1.
20. Mɛni hewɔ esaaa akɛ akuɔ hiɛ ashwieɔ sɔlemɔ nɔ lɛ?
20 Sɔlemɔ he miihia ni esaaa akɛ akuɔ hiɛ ashwieɔ nɔ. Shi Kristofoi pii ni he miiye yɛ mumɔŋ lɛ naa akɛ ewa kɛha amɛ akɛ amɛaasɔle. Mɛni ji yiŋtoo ni yɔɔ onukpai lɛ ni kɛ hemɔkɛyeli sɔlemɔ lɛ tsuɔ nii amɛhaa mɔ ni he yeɔ yɛ mumɔŋ lɛ sɛɛ? “Nuŋtsɔ [Yehowa] aaatee lɛ shi” kɛjɛ nijiaŋwujee lɛ mli, ni ebaawo lɛ hewalɛ koni etiu anɔkwale kɛ jalɛ gbɛ lɛ sɛɛ. Kristofonyo ni he yeɔ yɛ mumɔŋ lɛ baanyɛ ana su ko ni ejaaa, shi no etsɔɔɔ akɛ belɛ efee esha ni hiɛdɔɔ yɔɔ mli, ejaakɛ Yakobo kɛɛ: “Ni kɛji efee eshai lɛ, aaaŋɔfa lɛ.” Onukpai lɛ aŋaawoo ni jɛ mumɔŋ kɛ sɔlemɔ ni ajɛɔ tsuiŋ fɛɛ afeɔ lɛ kanyaa mɔ ni egbɔjɔ yɛ mumɔŋ lɛ yɛ bei komɛi amli koni ejaje eshai ni hiɛdɔɔ yɔɔ mli ni ekolɛ efee lɛ koni ejie tsuitsakemɔ mumɔ kpo. No sɛɛ lɛ enɛ hu tsɛɔ Nyɔŋmɔ dɛŋ eshaifaa kɛbaa.—Yakobo 5:15, 16.
21. (a) Mɛni hewɔ Kristofoi komɛi shashaoɔ ahi akɛ amɛaatsɛ onukpai lɛ? (b) Mɛni abaasusu he yɛ nikasemɔ ni nyiɛ enɛ sɛɛ lɛ mli?
21 Akɛni mɛi heei pii ni hoɔ yuu kɛbaa Kristofoi asafo lɛ mli lɛ akwɛmɔ he kaa ka amɛnɔ hewɔ lɛ, onukpai ni kɛ henilee kpakpa tsuɔ nii lɛ yɛ babaoo feemɔ yɛ kwɛmɔ ni sa ni amɛkɛaaha lɛ mli. Yɛ anɔkwale mli lɛ, nɛkɛ nikeenii yɛ gbɔmɛi ateŋ nɛɛ ji gbɛjianɔtoo kpakpa ni jɛ Yehowa ŋɔɔ koni ekɛye ebua wɔ ni wɔŋmɛ wɔtsui shi yɛ nɛkɛ jaramɔ bei nɛɛ amli. Ni kɛlɛ, Kristofoi komɛi sumɔɔɔ ni amɛtsɛɔ amɛ koni amɛbaye amɛbua amɛ, ejaakɛ amɛsusuɔ akɛ nɛkɛ nyɛmimɛi hii nɛɛ bɛ deka kwraa loo naagbai ni tamɔ jatsui babaoo jwere amɛnɔ. Nikasemɔ ni nyiɛ sɛɛ lɛ baaye abua wɔ koni wɔyoo akɛ nɛkɛ hii nɛɛ yɛ he miishɛɛ akɛ amɛaaye amɛbua, ejaakɛ amɛjɛɔ amɛsuɔmɔ mli amɛsɔmɔɔ akɛ tookwɛlɔi bibii yɛ Kristofoi asafo lɛ mli.
[Shishigbɛ niŋmai]
a A Linguistic Key to the Greek New Testament, ni Fritz Rienecker ŋma lɛ tsɔɔ phor-ti’on mli akɛ “jatsu ni aakpa gbɛ akɛ mɔ ko baatere” ni ekɛfata he akɛ: “Akɛtsu nii akɛ asraafoi awiemɔ kɛha jatsu loo asraafonyo hewulamɔ nibii.”
Te Obaaha Hetoo Oha Tɛŋŋ?
◻ Mɛɛ yelikɛbuamɔ nibii ni bɔ he toi etɛ Yehowa kɛhaa beni yelikɛbuamɔ he ehia wɔ lɛ?
◻ Namɛi ji ŋmɛnɛŋmɛnɛ beaŋ nikeenii yɛ gbɔmɛi ateŋ lɛ?
◻ Mɛɛ be esa akɛ wɔtsɛ onukpai lɛ?
◻ Mɛɛ yelikɛbuamɔ wɔbaanyɛ wɔkpa gbɛ kɛjɛ Kristofoi onukpai adɛŋ?
[Mfoniri ni yɔɔ baafa 15]
Ani onaa mumɔŋ sɛɛnamɔi ni baa kɛjɛɔ sɔlemɔ, Biblia lɛ kasemɔ, kɛ yelikɛbuamɔ ni baa kɛjɛɔ Kristofoi onukpai adɛŋ lɛ mli ŋɔɔmɔ?