Biblia Mli Wolo ni Ji 49—Efesobii

Mɔ ni Ŋma: Paulo

Heni Aŋma Yɛ: Roma

Be ni Aŋma Agbe Naa: Aaafee afi 60–61 Ŋ.B.

ŊƆƆ lɛ akɛ oyɛ kpabuŋ. Ekãa ni okɛshiɛɔ akɛ Kristofonyo maŋsɛɛ sanekpakpa shiɛlɔ lɛ hewɔ ni awo bo tsuŋ ni awaa bo yi nɛɛ. Amrɔ nɛɛ ni onyɛɛɛ ofã gbɛ kɛyasara asafoi lɛ ní okɛwo amɛ hewalɛ lɛ, mɛni obaafee? Ani oŋmaŋ mɛi ni oshiɛ oha amɛ ni amɛbatsɔmɔ Kristofoi lɛ awolo? Ani ekolɛ amɛmiiye ohe ŋkɔmɔ ni hewalɛwoo he miihia amɛ? Hɛɛ, amɛmiiye ohe ŋkɔmɔ ni hewalɛwoo he miihia amɛ! No hewɔ lɛ, oŋma amɛ wolo. Nakai pɛpɛɛpɛ bɔfo Paulo fee beni awo lɛ tsuŋ klɛŋklɛŋ yɛ Roma, aaafee afi 59-61 Ŋ.B. lɛ. Eyɛ mli akɛ Paulo miimɛ koni aye sane ni ekɛha Kaisare yeli lɛ, ni afamɔ asraafoi ato enɔ moŋ, shi enyɛɔ etsuɔ nibii komɛi ahe nii. Eeenyɛ efee akɛ yɛ afi 60 loo 61 Ŋ.B. lɛ Paulo ŋma wolo ni eŋma ‘kɛyaha Efesobii’ lɛ yɛ Roma, ni ekɛmaje Tihiko, ní no mli lɛ Onesimo fata ehe lɛ.—Efe. 6:21; Kol. 4:7-9.

² Efesobii Awolo lɛ shishijee gbɛ tɔɔ ni Paulo tsɔɔ mli akɛ lɛ eŋma wolo nɛɛ, ni etsi tã loo ekɛ wiemɔi ni tsɔɔ akɛ eji “gbokɛlɛfonyo yɛ Nuŋtsɔ lɛ mli” tsu nii shii ejwɛ. (Efe. 1:1; 3:1, 13; 4:1; 6:20) Mɛi ni kɛɔ akɛ jeee Paulo ŋma Efesobii Awolo lɛ anine enyɛ shi. Paulo woji lɛ yɛ Chester Beatty Papyrus No. 2 (P⁴⁶) ni ji kodɛs ko mli baafai 172 ni aheɔ ayeɔ akɛ akɛtsu nii yɛ aaafee afi 200 Ŋ.B. kɛyaa lɛ mli. Efesobii Awolo lɛ fata woji nɛɛ ahe, ni tsɔɔ akɛ nakai beaŋ lɛ abuɔ Efesobii Awolo lɛ akɛ efata woji ni Paulo ŋmala lɛ ahe.

³ Woloŋmalɔi ni ŋma Kristojamɔ he woji yɛ blema lɛ ma nɔ mi akɛ Paulo ji mɔ ni ŋma wolo nɛɛ, ni ákɛ eŋma ‘kɛyaha Efesobii lɛ.’ Ákɛ nɔkwɛmɔnɔ lɛ, Irenaeus ni hi shi yɛ afi 100 Ŋ.B. afii lɛ amli lɛ tsɛ Efesobii 5:30 lɛ yisɛɛ akɛ: “Taakɛ mɔ krɔŋkrɔŋ Paulo kɛɛ yɛ wolo ni eŋma kɛyaha Efesobii lɛ mli lɛ, wɔji egbɔmɔtso lɛ henii.” Clement ni jɛ Aleksandria ni hi shi yɛ nakai beaŋ nɔŋŋ lɛ tsɛ Efesobii 5:21 lɛ yisɛɛ yɛ emaniɛbɔɔ ko mli akɛ: “No hewɔ hu, ni yɛ Efesobii lɛ Awolo lɛ mli lɛ eŋma akɛ, Nyɛbaa nyɛhe shi nyɛhaa nyɛhe yɛ Nyɔŋmɔ gbeyeishemɔ mli lɛ.” Yɛ afi 200 klɛŋklɛŋ afii 50 lɛ amli lɛ, Origen tsɛ Efesobii 1:4 lɛ yisɛɛ yɛ ewoji lɛ eko mli akɛ: “Agbɛnɛ hu, yɛ ewolo ni eŋma Efesobii lɛ mli lɛ, bɔfo lɛ kɛ nɛkɛ wiemɔ nɛɛ nɔŋŋ tsu nii beni ekɛɛ akɛ, Ehala wɔ dani ato jeŋ shishi lɛ.”a Mra be mli Kristofoi lɛ ayinɔsane he nilelɔ kroko ni atsɛɔ lɛ Eusebius (aaafee afi 260-342 Ŋ.B.) lɛ kɛ Efesobii Awolo lɛ fata woji ni akpɛlɛɔ nɔ akɛ amɛji Biblia mli woji lɛ ahe, ni woloŋmalɔi krokomɛi ni ŋma Kristojamɔ he woji yɛ blema lɛ ateŋ mɛi pii tsĩ Efesobii Awolo lɛ tã yɛ amɛwoji amli akɛ efata Ŋmalɛi ni ajɛ mumɔŋ aŋma lɛ ahe.b

⁴ Atsĩii mɛi ni aŋma wolo nɛɛ aha lɛ tã yɛ Chester Beatty Papyrus, Vatican Manuscript No. 1209, kɛ Sinaitic Manuscript lɛ amli, ejaakɛ wiemɔ ni ji “ni yɔɔ Efeso lɛ” ni anaa yɛ Efesobii yitso 1 kuku 1 lɛ mli lɛ bɛ wolokpoi nɛɛ amli. Akɛni atsiii Efeso tã yɛ klɛŋklɛŋ kuku lɛ mli yɛ wolokpoi nɛɛ amli, ni agbɛnɛ hu akɛ ŋamɔi emajeee aŋkroaŋkroi komɛi ni yɔɔ Efeso lɛ (eyɛ mli akɛ Paulo kɛ afii etɛ tsu nii yɛ jɛmɛ) hewɔ lɛ, mɛi komɛi emu sane naa akɛ ekolɛ mɛi krokomɛi moŋ aŋma wolo nɛɛ ayaha loo kɛhooo lɛ ebaanyɛ efee akɛ eji wolo ni aŋma kɛyaha asafoi fɛɛ ni yɔɔ Asia Bibioo lɛ, ni Efeso asafo lɛ fata he lɛ. Shi wiemɔ ni ji “ni yɔɔ Efeso lɛ” yɛ wolokpoi krokomɛi babaoo amli, ni taakɛ wɔwie kɛtsɔ hiɛ lɛ, blema woloŋmalɔi ni ŋma Kristojamɔ he woji lɛ kpɛlɛɔ nɔ akɛ eji wolo ni aŋma kɛyaha Efesobii lɛ.

⁵ Shihilɛ mli ni Efesobii lɛ yɔɔ lɛ he saji fioo ko ni wɔɔle lɛ baaye abua wɔ ni wɔna nɔ hewɔ ni aŋma amɛ wolo lɛ. Ale Efeso akɛ maŋ ni afeɔ ashwai, ayeɔ ŋkunyaa, akwɛɔ ŋulamii amli, ni ajaa nyɔŋmɔyoo ni atsɛɔ lɛ Artemi ni asusuɔ akɛ ehaa mɛi fɔɔ lɛ yɛ mli lɛ yɛ klɛŋklɛŋ afii 100 Ŋ.B.c Ama sɔlemɔtsu agbo awo nyɔŋmɔyoo nɛɛ amaga lɛ he yɛ Efeso, ni abuɔ enɛ akɛ eji blema nibii kpawo ni haa mɔ naa kpɛɔ ehe waa lɛ ateŋ ekome. Yɛ afi 1800 afii lɛ amli lɛ, atsa heni sɔlemɔtsu lɛ yɔɔ lɛ, ni ana akɛ ama sɔlemɔtsu lɛ ama shikpɔŋ ni lɛɛmɔ ji mitai 73 ni ekɛlɛ ji mitai 127 nɔ. Sɔlemɔtsu lɛ diɛŋtsɛ lɛɛmɔ ji mitai 50 ni ekɛlɛ ji mitai 105. Akɛ akulashiŋi 100 ni akɛ marmaratɛ fee ma sɔlemɔtsu lɛ, ni eko fɛɛ eko kwɔlɛ ji mitai 17. Akɛ marmaratɛ ŋtayaa yɛji wo eyiteŋ. Akɛ shika tsuru tsara marmaratɛi lɛ, shi jeee sũ ni akpɔtɔ. Mɛi jɛɔ hei srɔtoi pii amɛbajaa yɛ jɛmɛ, ni kɛ́ aaye gbijurɔ yɛ Efeso lɛ mɛi akpei ohai abɔ baa maŋ lɛ mli. Jwiɛtɛi ŋaalɔi ni yɔɔ Efeso lɛ náa nii pii yɛ Artemi sɔlemɔtsu lɛ henɔ bibioo ni amɛkɛ jwiɛtɛi sɔ̃ɔ ni amɛhɔ̃ɔ amɛhaa mɛi ni fãa gbɛ kɛbajáa yɛ Artemi sɔlemɔtsu lɛ mli lɛ hewɔ.

⁶ Yɛ Paulo gbɛfãa ni ji enyɔ akɛ maŋsɛɛ sanekpakpa shiɛlɔ lɛ mli lɛ, eyaye be kukuoo ko yɛ Efeso ni ekɛshiɛ, ni eshi Akwila kɛ Priskila yɛ jɛmɛ koni amɛtsa shiɛmɔ nitsumɔ lɛ nɔ. (Bɔf. 18:18-21) Eku esɛɛ etee Efeso ni eyaye aaafee afii etɛ yɛ jɛmɛ, ni eshiɛ “tsɔɔmɔ lɛ” ni etsɔɔ mɛi babaoo nii. (Bɔf. 19:8-10; 20:31) Paulo tsu nii waa yɛ Efeso. A. E. Bailey ŋma yɛ ewolo ni ji Daily Life in Bible Times lɛ mli akɛ: “Nɔ ni Paulo feɔ ji akɛ eloɔ buui kɛjɛ leebi maŋkpa kɛyashiɔ leebi ŋmɛlɛ 11, (Bɔf. 20:34, 35) be mli ni Tirano egbe nii ni etsɔɔ mɛi lɛ anaa lɛ; no sɛɛ lɛ, kɛjɛ leebi ŋmɛlɛ 11 kɛyashi shwane ŋmɛji 4 lɛ eshiɛɔ yɛ nikasemɔhe lɛ, ni ekɛ mɛi ni yeɔ buaa lɛ lɛ feɔ kpee, . . . ni naagbee kwraa lɛ kɛjɛ shwane ŋmɛji 4 kɛyashi jenamɔ yi aaawa kwraa lɛ eyaa shĩa kɛ shĩai amli ni eshiɛɔ. (Bɔf. 20:20, 21, 31) Mibiɔ mihe akɛ mɛɛ be enaa ni ekɛyeɔ nii ni ekɛwɔɔ.”—1943, baafa 308.

⁷ Beni Paulo shiɛɔ kɛ ekãa lɛ, ekpa amagai ajamɔ he mama. Enɛ ha mɛi ni sɔ̃ɔ amagai ni amɛhɔɔ ni jwiɛtɛi ŋaalɔ ko ni atsɛɔ lɛ Demetrio lɛ fata amɛhe lɛ amli wo la, ni basabasafeemɔ ni jɛ amɛ mlilawoo lɛ mli ba lɛ ha Paulo shi maŋ lɛ mli.—Bɔf. 19:23–20:1.

⁸ Agbɛnɛ beni Paulo yɔɔ tsuŋwoo mli lɛ, esusu naagbai ni Efeso asafo lɛ mlibii lɛ kɛkpeɔ lɛ he ejaakɛ amɛyɛ wɔŋjalɔi ateŋ ni Artemi sɔlemɔtsu agbo lɛ baaha amɛjamɔ lɛ afee tamɔ nɔ ni sɛɛnamɔ bɛ he. Enɛ hewɔ lɛ ŋwanejee ko bɛ he akɛ mfonirifeemɔŋ wiemɔ ni Paulo kɛtsu nii lɛ sa Kristofoi ni afɔ amɛ mu nɛɛ, ejaakɛ etsɔɔ akɛ amɛji “sɔlemɔtsu krɔŋkrɔŋ,” ni Yehowa hiɔ amɛteŋ kɛtsɔ emumɔ lɛ nɔ. (Efe. 2:21) “Teemɔŋ sane” ni ji akɛ Nyɔŋmɔ gbɛjianɔtoo lɛ (gbɛ ni etsɔɔ nɔ ekwɛɔ ewebii anɔ) baatsɔ Yesu Kristo nɔ ni ekɛ ekomefeemɔ kɛ toiŋjɔlɛ aba, ní agbele nɔ atsɔɔ Efeso asafo lɛ mlibii lɛ ha amɛná ekãa waa ni eshɛje amɛ mii. (1:9, 10) Paulo ma nɔ mi akɛ afee Yudafoi kɛ mɛi ni jeee Yudafoi lɛ fɛɛ ekome yɛ Kristo mli. Ewo amɛ hewalɛ ni amɛhiɛ jwɛŋmɔ kome ni amɛfee ekome. No hewɔ lɛ, wɔna akɛ wolo nɛɛ jɛ mumɔŋ, ehe hiaa waa, ni wɔna yiŋtoo hewɔ ni aŋma wolo nɛɛ.

NƆ HEWƆ NI EHE YƆƆ SƐƐNAMƆ

¹⁶ Efesobii Awolo lɛ wieɔ shihilɛ fɛɛ ni Kristofoi kɛkpeɔ lɛ he. Akɛni amrɔ nɛɛ naagbai ni haa mɔ feɔ yeyeeye lɛ miifa ni jeŋba gbohii ehe shi waa hewɔ lɛ, sɛɛnamɔ kpele yɛ Paulo ŋaawoo kpakpa ni yɔɔ Efesobii Awolo lɛ mli lɛ he kɛha mɛi ni miisumɔ ni amɛhi shi akɛ Nyɔŋmɔ gbeyeishelɔi lɛ. Te esa akɛ bii kɛ amɛfɔlɔi aye aha tɛŋŋ, ni te esa akɛ fɔlɔi hu kɛ amɛbii aye aha tɛŋŋ? Te esa akɛ wumɛi kɛ amɛŋamɛi aye aha tɛŋŋ, ni te esa akɛ ŋamɛi hu kɛ amɛwumɛi aye aha tɛŋŋ? Mɛni esa akɛ aŋkroaŋkroi ni yɔɔ asafo lɛ mli lɛ afee koni ekomefeemɔ kɛ suɔmɔ aya nɔ ahi asafoŋbii lɛ ateŋ ni amɛhe atse akɛ Kristofoi yɛ jeŋ fɔŋ nɛɛ mli? Paulo wo ŋaa yɛ enɛɛmɛi fɛɛ he, ni etsɔɔ nɔ ni kɛ́ mɔ ko fee lɛ abaanyɛ akɛɛ akɛ ewo Kristofoi asu ni be ko lɛ ebɛ lɛ. Kɛ́ wɔkase Efesobii Awolo lɛ ebaaye ebua wɔ koni wɔná su diɛŋtsɛ ni Nyɔŋmɔ naa he miishɛɛ ni “abɔ yɛ Nyɔŋmɔ subaŋ nɔ yɛ anɔkwa jalɛ kɛ hetsemɔ mli lɛ.”—4:24-32; 6:1-4; 5:3-5, 15-20, 22-33.

¹⁷ Efesobii Awolo lɛ hu haa wɔnaa yiŋtoo hewɔ ni akɛ hegbɛi kɛ nitsumɔi komɛi woɔ mɛi adɛŋ yɛ asafo lɛ mli lɛ. No ji akɛ “koni aŋɔsaa hetselɔi lɛ aha sɔɔmɔ nitsumɔ lɛ, kɛ Kristo gbɔmɔtso lɛ tswaa” ni amɛhe amɔ shi yɛ Kristofoi ashihilɛ mli. Kɛ́ Kristofonyo ko kɛ asafoŋ gbɛjianɔtoo nɛɛ tsu nii kɛmɔ shi lɛ ‘ebaada yɛ nibii fɛɛ gbɛfaŋ yɛ suɔmɔ mli yɛ Kristo lɛ nɔŋŋ ni ji yitso lɛ he.’—4:12, 15.

¹⁸ Efesobii Awolo lɛ ye ebua mra be mli Kristofoi asafo lɛ, ni amɛnu “Kristo teemɔŋ sane lɛ” shishi jogbaŋŋ. Atsɔɔ mli yɛ Efesobii Awolo lɛ mli akɛ aafɔ̃ “jeŋmajiaŋbii lɛ” kɛ Yudafoi ni heɔ Kristo nɔ amɛyeɔ lɛ anine koni amɛbatsɔmɔ “niyelɔi lɛ ekomɛi kɛ gbɔmɔtso lɛ henii lɛ ekomɛi kɛ mɛi ni awo amɛ shi yɛ Kristo Yesu mli lɛ hu ekomɛi, yɛ sanekpakpa lɛ hewɔ.” Agu “kitai amla” ni tamɔ gbogbo ni yɔɔ Yudafoi kɛ mɛi ni jeee Yudafoi lɛ ateŋ ni ehaaa amɛnyɛ amɛfee ekome lɛ, ni akɛ Kristo lá lɛ eha amɛ fɛɛ amɛbatsɔmɔ mɛi krɔŋkrɔŋi amaŋ lɛ kɛ Nyɔŋmɔ we lɛ mli bii. Ákɛ nɔ ni tamɔɔɔ wɔŋjalɔi asɔlemɔtsu ni yɔɔ Artemi lɛ, aatswa mɛi krɔŋkrɔŋi amaŋ nɛɛ mli bii lɛ aama shi yɛ ekomefeemɔ mli, yɛ Kristo Yesu mli koni Nyɔŋmɔ anyɛ ahi amɛteŋ kɛtsɔ emumɔ lɛ nɔ, ni tsɔɔ akɛ amɛji “sɔlemɔtsu krɔŋkrɔŋ yɛ Nuŋtsɔ [Yehowa] mli.”—3:4, 6; 2:15, 21.

¹⁹ Beni Paulo wieɔ “teemɔŋ sane lɛ” he lɛ ewie hu akɛ Nyɔŋmɔ eto gbɛjianɔ “koni eŋɔ nibii fɛɛ eto yitso kome shishi yɛ Kristo mli, nii ni yɔɔ ŋwɛi [mɛi ni ahala amɛ koni amɛyafata ŋwɛi Maŋtsɛyeli lɛ he lɛ] kɛ nii ni yɔɔ shikpɔŋ lɛ nɔ [mɛi ni baahi Maŋtsɛyeli lɛ shishi yɛ shikpɔŋ lɛ nɔ] lɛ fɛɛ.” No hewɔ lɛ, Nyɔŋmɔ yiŋtoo kpele ni ji akɛ ebaaha toiŋjɔlɛ kɛ ekomefeemɔ ahi ebɔɔnii lɛ ateŋ lɛ bafee sane ni he hiaa fe fɛɛ. No hewɔ lɛ, Paulo sɔle eha Efeso asafo lɛ mli bii lɛ ní amɛmfonirifeemɔŋ tsuii hiŋmɛi lɛ anɔ etse lɛ, koni amɛnyɛ amɛyɔse hiɛnɔkamɔ ni Nyɔŋmɔ esaa eto amɛ lɛ jogbaŋŋ kɛmɔ shi ní amɛna “egboshinii lɛ anunyam lɛ falɛ yɛ mɛi krɔŋkrɔŋi amli” lɛ. Eeenyɛ efee akɛ wiemɔi nɛɛ wo amɛ hewalɛ waa yɛ hiɛnɔkamɔ ni amɛyɔɔ lɛ hewɔ. Wolo ni ajɛ mumɔŋ aŋma Efeso asafo lɛ tswaa ŋmɛnɛŋmɛnɛ beaŋ Kristofoi asafo lɛ hu emaa shi, koni ‘Nyɔŋmɔ obɔyimɔ lɛ ayimɔ wɔ fɛɛ obɔ̃.’—1:9-11, 18; 3:19.

[Shishigbɛ niŋmai]