Hiɛsɔɔ ni Wɔɔná Wɔha Kristofoi Ahenaabuamɔi
“Nyɛhaa wɔyɔseyɔsea wɔhe, koni wɔhiɛ adɔ suɔmɔ kɛ nitsumɔi kpakpai ahe, ni wɔkakwa wɔhe naabuamɔ.”—HEBRIBII 10:24, 25.
1, 2. (a) Mɛni hewɔ eji hegbɛ akɛ aaaya anɔkwa Kristofoi ahenaabuamɔ shishi lɛ? (b) Yesu fata esɛɛnyiɛlɔi lɛ ahe yɛ amɛhenaabuamɔi ashishi yɛ mɛɛ shishinumɔ naa?
KWƐ hegbɛ ni eji akɛ aaaya Kristofoi ahenaabuamɔ shishi, kɛji akɛ Yehowa jalɔi ni ebua amɛhe naa lɛ shɛɛɛ mɛi nyɔŋma aloo amɛyifalɛ shɛɔ akpei abɔ, ejaakɛ Yesu wie akɛ: “He ni mɛi enyɔ loo mɛi etɛ ebua amɛhe naa yɛ, yɛ migbɛi anɔ lɛ, miyɛ amɛteŋ yɛ jɛi”! (Mateo 18:20) Eji anɔkwale akɛ, beni Yesu kɛ nakai shiwoo lɛ hãa lɛ, no mli lɛ eewie kojomɔ saji ni ehe hiaa ni mɛi ni nyiɛɔ hiɛ yɛ asafo lɛ mli lɛ atsu he nii yɛ gbɛ ni ja nɔ lɛ ahe. (Mateo 18:15-19) Shi ani Yesu wiemɔi lɛ baanyɛ akɔ Kristofoi ahenaabuamɔi fɛɛ ni ajeɔ shishi ni agbeɔ naa kɛ sɔlemɔ yɛ egbɛi amli lɛ ahe, yɛ shishitoo mla ni yɔɔ mli lɛ naa? Hɛɛ. Kaimɔ akɛ, beni Yesu kɛ nitsumɔ hã esɛɛnyiɛlɔi lɛ akɛ amɛyatsu kaselɔ-feemɔ nitsumɔ lɛ, ewo shi akɛ: “Naa, mi lɛ mikɛ nyɛ yɛ daa kɛyashi jeŋ naagbee lɛ.”—Mateo 28:20.
2 Ŋwanejee ko bɛ he akɛ Kristofoi asafo lɛ Yitso, ni ji Nuntsɔ Yesu Kristo, yɛ esɛɛnyiɛlɔi anɔkwafoi lɛ ahenaabuamɔi fɛɛ ahe miishɛɛ waa diɛŋtsɛ. Kɛfata he lɛ, wɔbaanyɛ wɔná nɔmimaa akɛ efata amɛhe yɛ jɛmɛ kɛtsɔ Nyɔŋmɔ mumɔ krɔŋkrɔŋ lɛ nɔ. (Bɔfoi lɛ Asaji 2:33; Kpojiemɔ 5:6) Yehowa Nyɔŋmɔ hu yɛ kpee ni wɔkpeɔ kutuu lɛ he miishɛɛ. Klɛŋklɛŋ yiŋtoo ni yɔɔ kpeei nɛɛ asɛɛ ji, koni wɔkɛ yijiemɔ ahã Nyɔŋmɔ “yɛ gwabɔɔi amli!” (Lala 26:12) Asafoŋ kpeei ni wɔyaa lɛ ji suɔmɔ ni wɔyɔɔ kɛha lɛ lɛ he odaseyeli.
3. Mɛɛ yiŋtoi ni he hiaa hewɔ ni wɔhiɛ sɔɔ Kristofoi ahenaabuamɔi lɛ?
3 Yiŋtoi kpakpai krokomɛi ahewɔ ni wɔhiɛ sɔɔ Kristofoi ahenaabuamɔi lɛ hu yɛ. Dani ebaashi shikpɔŋ lɛ nɔ lɛ, Yesu Kristo hala ekaselɔi ni afɔ amɛ mu lɛ koni amɛsɔmɔ akɛ “tsulɔ anɔkwafo kɛ nilelɔ,” ní eha hemɔkɛyeli shia lɛ mli bii lɛ mumɔŋ niyenii yɛ be ni sa mli. (Mateo 24:45) Gbɛ ni he hiaa ni atsɔɔ nɔ akɛ mumɔŋ niyenii hãa ji kɛtsɔ asafoŋ kpeei kɛ agbɛnɛ hu, henaabuamɔi wuji—kpeei bibii kɛ kpeei wuji anɔ. Nuntsɔ Yesu Kristo kudɔɔ nɛkɛ tsulɔ anɔkwafo nɛɛ koni ekɛ adafitswaa ni he hiaa lɛ ahã mɛi fɛɛ ni sumɔɔ ni amɛfo gbɛjianɔtoo fɔŋ nɛɛ ni amɛná wala yɛ Nyɔŋmɔ jalɛ jeŋ hee lɛ mli lɛ yɛ nɛkɛ henaabuamɔi nɛɛ ashishi.
4. Mɛɛ “nifeemɔ gbɛ” ni yɔɔ oshara atsĩ tã yɛ Biblia lɛ mli, ni mɛni baaye abua wɔ ni wɔtsi wɔhe kɛjɛ he?
4 Enɛ hewɔ lɛ, esaaa akɛ Kristofonyo ko kɔɔ nifeemɔ gbɛ ni yɔɔ oshara, ní bɔfo Paulo wie he beni eŋma akɛ: “Nyɛhaa wɔyɔseyɔsea wɔhe, koni wɔhiɛ adɔ suɔmɔ kɛ nitsumɔi kpakpai ahe, ni wɔkakwa wɔhe naabuamɔ, taakɛ bɔ ni mɛi komɛi fɔɔ feemɔ lɛ, shi moŋ wɔwowoo wɔhe ŋaa, ni titri lɛ akɛni nyɛnaa akɛ gbi lɛ miibɛŋkɛ nɛɛ.” (Hebribii 10:24, 25) Hegbɛ ni eji, kɛ sɛɛnamɔi ni wɔnáa kɛjɛɔ Kristofoi ahenaabuamɔi amli lɛ nɔjwɛŋmɔ baaye abua wɔ ni wɔkɛ anɔkwayeli kɛ wɔtsui muu fɛɛ afĩ henaabuamɔi nɛɛ asɛɛ.
Kpeei ni Tswaa Mɔ Emaa Shi
5. (a) Mɛɛ hewalɛ esa akɛ wɔwiemɔ aná yɛ kpeei ashishi? (b) Mɛni hewɔ esaaa ni wɔshashaoɔ shi akɛ wɔɔfɔ̃ mɛi ni yɔɔ wiemɔ lɛ he miishɛɛ lɛ anine ni amɛba kpeei lɛ?
5 Akɛni Kristofoi sɔleɔ koni Yehowa mumɔ krɔŋkrɔŋ lɛ atsu nii yɛ Kristofoi akpeei ashishi hewɔ lɛ, esa akɛ aŋkroaŋkroi ni baa kpee lɛ ateŋ mɔ fɛɛ mɔ abɔ mɔdɛŋ fɛɛ ni eeenyɛ ni efee enii yɛ mumɔ lɛ kɛ gbeekpamɔ naa, ‘ni ekafee Nyɔŋmɔ mumɔ krɔŋkrɔŋ lɛ nidɔɔnii.’ (Efesobii 4:30) Beni bɔfo Paulo ŋmala nakai wiemɔi ni jɛ mumɔŋ lɛ, no mli lɛ eewie wiemɔ ni akɛaatsu nii yɛ gbɛ kpakpa nɔ lɛ he. Esa akɛ akɛ nɔ ni wɔwieɔ lɛ atsu nii be fɛɛ be “koni eha mɔ nane amɔ shi, ni akɛduro mɛi ni nuɔ lɛ.” (Efesobii 4:29) Enɛ he miihia waa yɛ Kristofoi ahenaabuamɔi ashishi titri. Paulo mã bɔ ni ehe hiaa ni kpeei atswa mɔ ama shi, ni etsɔɔ mɔ nii, ni ewo mɔ hewalɛ hu lɛ nɔ mi, yɛ ewolo ni eŋma eyaha Korintobii lɛ mli. (1 Korintobii 14:5, 12, 19, 26, 31) Mɛi fɛɛ ni baa kpee lɛ, kɛ mɛi heei lɛ hu náa he sɛɛ, ejaakɛ amɛnyɛɔ amɛmuɔ sane naa akɛ: “Nyɔŋmɔ yɛ nyɛteŋ lɛɛlɛŋ.” (1 Korintobii 14:25) Enɛ hewɔ lɛ, esaaa ni wɔshashaoɔ shi akɛ wɔɔfɔ̃ mɛi heei ni yɔɔ wiemɔ lɛ he miishɛɛ lɛ anine kɛba wɔ henaabuamɔi ashishi, ejaakɛ nakai feemɔ baaha amɛya hiɛ oyayaayai yɛ mumɔŋ.
6. Mɛni ji otii komɛi ni yeɔ buaa ni ehaa kpee tswaa mɔ emaa shi?
6 Esa akɛ mɛi fɛɛ ni ahaa amɛ wiemɔi, mɛi kɛ sanegbaa, loo nɔkwɛmɔnii yɛ Kristofoi akpee shishi lɛ akwɛ jogbaŋŋ ní amɛwiemɔ lɛ afee nɔ ni tswaa mɔ emaa shi, ni ekɛ Nyɔŋmɔ Wiemɔ ni aŋma, ni ji Biblia lɛ hu kpãa gbee. Kɛfata wiemɔi ni ja ni wɔɔwie lɛ he lɛ, esa akɛ wɔjie henumɔi kɛ kanyamɔi ni kɛ Nyɔŋmɔ kɛ Kristo sui ni ji suɔmɔ lɛ kpãa gbee lɛ akpo. Kɛji mɛi fɛɛ ni náa gbɛfaŋnɔ yɛ kpee he gbɛjianɔtoo ko mli lɛ hiɛ hi amɛhe nɔ yɛ ‘Nyɔŋmɔ mumɔ lɛ yibii,’ tamɔ miishɛɛ, tsuishitoo, kɛ hemɔkɛyeli ni amɛaajie lɛ kpo lɛ he lɛ, no lɛ eka shi faŋŋ akɛ mɛi fɛɛ ni eba lɛ baanu he akɛ atswa amɛ ama shi.—Galatabii 5:22, 23.
7. Mɛi ni eba lɛ fɛɛ baanyɛ aye abua ni henaabuamɔ lɛ atswa mɔ ama shi yɛ mɛɛ gbɛ nɔ?
7 Eyɛ mli akɛ ekolɛ mɛi fioo ko pɛ baaná gbɛfaŋnɔ yɛ asafoŋ kpeei ahe gbɛjianɔtoo mli moŋ, shi mɔ fɛɛ mɔ baanyɛ aye abua ni eha henaabuamɔ lɛ atswa mɔ ama shi. Bei pii lɛ, toibolɔi lɛ náa hegbɛi akɛ amɛaaha sanebimɔi ahetoo. Enɛɛmɛi ji bei ni wɔkɛjajeɔ wɔhemɔkɛyeli lɛ wɔtsɔɔ yɛ faŋŋ mli. (Romabii 10:9) Esaaa ni wɔkɛ bei nɛɛ tsuɔ nii akɛ hegbɛ ni wɔkɛaaha ale wɔ diɛŋtsɛ wɔsusumɔi, ni wɔkɛ wɔ diɛŋtsɛ wɔnyɛmɔi aaashwã, loo ni wɔkɛaawie wɔshi naanyo heyelilɔ ko kɔkɔɔkɔ. Ani no efeŋ Nyɔŋmɔ mumɔ lɛ nidɔɔnii? Gbɛ ni hi fe fɛɛ ni atsɔɔ nɔ atsuɔ nanemɛi heyelilɔi ateŋ naagbai ahe nii ji yɛ teemɔŋ, yɛ suɔmɔ mumɔ mli. Biblia lɛ kɛɔ akɛ: “Nyɛmli ahia ahaa nyɛhe, nyɛmusuŋ atsɔa nyɛ yɛ nyɛhe, nyɛŋɔfafaa nyɛhe, taakɛ bɔ nɔŋŋ ni Nyɔŋmɔ ŋɔfa nyɛ yɛ Kristo mli lɛ.” (Efesobii 4:32) Kwɛ hegbɛ ni hi jogbaŋŋ ni Kristofoi ahenaabuamɔi haa wɔnáa koni wɔkɛ ŋaawoo fɛfɛo nɛɛ atsu nii! Kɛha enɛ feemɔ lɛ, mɛi pii shɛɔ kpeei ashishi mra, ni amɛmɛɔ fioo hu kɛji akpa. Enɛ yeɔ ebuaa mɛi heei ni yɔɔ wiemɔ lɛ he miishɛɛ, ní ehe hiaa waa akɛ ahere amɛ hiɛmɛɛ lɛ hu. Enɛ hewɔ lɛ Kristofoi ni ejɔɔ amɛhe nɔ lɛ fɛɛ yɛ gbɛfaŋnɔ ni amɛaatsu ni amɛkɛha kpeei lɛ atswa mɔ ama shi lɛ mli, kɛtsɔ ‘wɔhe ni wɔɔyɔseyɔsee, kɛ wɔhiɛ ni aaadɔ suɔmɔ kɛ nitsumɔi kpakpai ahe’ lɛ nɔ.
Saamɔ Ohe Jogbaŋŋ
8. (a) Mɛɛ afɔlei ni sa yijiemɔ mɛi komɛi shãa koni amɛya kpeei? (b) Mɛɛ nɔkwɛmɔnɔ Yehowa feɔ akɛ tookwɛlɔ?
8 Yɛ be mli ni ekolɛ efeɔ mlɛo saŋŋ kɛha mɛi komɛi akɛ amɛaaya Kristofoi ahenaabuamɔi ashishi lɛ, enɛ biɔ afɔleshaa daa yɛ mɛi krokomɛi agbɛfaŋ. Akɛ nɔkwɛmɔnɔ lɛ, bei pii lɛ, Kristofonyo yoo ni ebiɔ ni etsu heloonaa nitsumɔ koni ekɛye ebua yɛ eweku lɛ hiamɔ nii agbɛfaŋ lɛ jɛɔ nitsumɔ ebashɛɔ shia kɛ tɔlɛ. Ekolɛ esa akɛ ehoo nii ni eye ebua ebii lɛ ni amɛsaa amɛhe kɛha kpee lɛ. Ekolɛ Kristofoi krokomɛi fãa gbɛ kakadaŋŋ dani amɛbashɛɔ kpeei lɛ, aloo ekolɛ gbɔjɔmɔi loo gbɔlɛ tsĩɔ amɛ naa. Eka shi faŋŋ akɛ, Yehowa Nyɔŋmɔ nuɔ shihilɛ ni kpeeiyalɔ anɔkwafo fɛɛ anɔkwafo yɔɔ mli lɛ shishi, tamɔ bɔ ni tookwɛlɔ ni yɔɔ suɔmɔ lɛ nuɔ tooi komekomei ni yɔɔ etooi akuu lɛ mli lɛ ahiamɔ nii krɛdɛɛi lɛ ashishi lɛ. Biblia lɛ kɛɔ akɛ: “[Yehowa aaalɛ] etooiku lɛ tamɔ tookwɛlɔ; eeehiɛ etoobii lɛ yɛ ekpɔkɔiaŋ, ni eeehole amɛ eshãkã etsitsi, ni toonyɛmɛi lɛ hu, eeekpala amɛ blɛoo.”—Yesaia 40:11.
9, 10. Mɛɛ gbɛ nɔ wɔɔtsɔ wɔná kpeei ahe sɛɛ kɛmɔ shi?
9 Ekolɛ be fioo pɛ mɛi ni ebiɔ ni amɛkɛ nibii wuji ashã afɔle bɔni afee ni amɛba kpeei daa lɛ baanyɛ aná ni amɛkɛkwɛ nibii ni abaasusu he yɛ kpee lɛ shishi lɛ amli. Daa otsi Biblia kanemɔ he gbɛjianɔtoo lɛ kɛ nitsumɔ hãa Teokrase Sɔɔmɔ Skul lɛ yaa feɔ nɔ ni sɛɛnamɔ yɔɔ mli. Nakai nɔŋŋ hu, hesaamɔ ni tsɔɔ hiɛ kɛhaa kpeei krokomɛi, tamɔ Buu-Mɔɔ Nikasemɔ lɛ kɛ Asafo Woloŋ Nikasemɔ lɛ, hãa kpeei nɛɛ hu feɔ nɔ ni he yɔɔ sɛɛnamɔ babaoo. Kɛ́ amɛtsɔ hiɛ amɛkane nɔ ni abaakase lɛ ni kɛ hoo lɛ amɛsusu Biblia mli ŋmalɛi ni atsɛ lɛ ekomɛi ahe lɛ, mɛi ni yɔɔ weku shihilɛi ni heɔ be babaoo mli lɛ baanyɛ afee klalo babaoo akɛ amɛaaná Biblia mli sanegbaai ni he hiaa nɛɛ amli gbɛfaŋnɔ ni mɔɔ shi jogbaŋŋ.
10 Mɛi krokomɛi ni amɛshihilɛi haa amɛnáa be saŋŋ lɛ baanyɛ amɛkɛ be babaoo asaa amɛhe kɛha kpee. Ákɛ nɔkwɛmɔnɔ lɛ, amɛbaanyɛ amɛtao ŋmalɛi ni atsɛ, shi aŋmalako amɛmli wiemɔi lɛ amli babaoo. Enɛ hewɔ lɛ mɛi fɛɛ baanyɛ asaa amɛhe kɛtsɔ hiɛ koni amɛná kpeei lɛ ahe sɛɛ jogbaŋŋ kɛmɔ shi, koni amɛná gbɛfaŋnɔ kpakpa yɛ asafo lɛ ni amɛaatswa amɛma shi kɛtsɔ amɛwiemɔi kɛ saji ahetoohamɔ nɔ lɛ mli. Kɛ́ amɛsaa amɛhe jogbaŋŋ kɛha kpeei lɛ, onukpai kɛ asafoŋ sɔɔlɔi lɛ baafee nɔkwɛmɔnɔ kpakpa yɛ saji ahetoohamɔ ni yɔɔ kuku, kɛ tɛ̃ɛ agbɛfaŋ. Bulɛ ni amɛyɔɔ kɛha nibii ni Yehowa eto he gbɛjianɔ lɛ hewɔ lɛ, mɛi ni eba kpee lɛ baatsi amɛhe kɛjɛ nifeemɔi ni gbalaa mɔ jwɛŋmɔ, yɛ be mli ni kpee lɛ yaa nɔ lɛ ahe.—1 Petro 5:3.
11. Mɛni hewɔ he-tsɔsemɔ he hiaa koni wɔsaa wɔhe kɛha kpeei lɛ?
11 Ekolɛ nifeemɔi kɛ hiɛtserɛjiemɔi ni he ehiaaa kɛha wɔ mumɔŋ hewalɛnamɔ lɛ fiteɔ wɔbe babaoo. Kɛ́ nakai ni lɛ, no lɛ ehe miihia ni wɔpɛi wɔ diɛŋtsɛ wɔmli wɔkwɛ, ni ‘wɔkafee wɔhe mɛi ni bɛ yitseiaŋ,’ yɛ wɔbe kɛ nitsumɔ gbɛfaŋ. (Efesobii 5:17) Esa akɛ oti ni mã wɔhiɛ lɛ afee akɛ ‘wɔɔhe be’ kɛjɛ saji ni he ehiaaa tsɔ lɛ amli, koni wɔkɛ be babaoo awo teemɔŋ Biblia kasemɔ kɛ hesaamɔ kɛha kpeeiyaa, kɛ agbɛnɛ hu Maŋtsɛyeli sɔɔmɔ lɛ mli. (Efesobii 5:16) Wɔkpɛlɛɔ nɔ akɛ, jeee be fɛɛ be enɛ feemɔ feɔ mlɛo, ni ebiɔ he-tsɔsemɔ hu. Obalahii kɛ obalayei bibii ni tsuɔ enɛ he nii lɛ miitswa shishitoo kpakpa kɛha hiɛyaa yɛ wɔsɛɛ be mli. Paulo ŋma wolo eyaha enaanyo obalanyo Timoteo akɛ: “Bɔɔ nii nɛɛ [Paulo ŋaawoo ni ekɛha Timoteo lɛ] ahe mɔdɛŋ, okɛ ohe awo mli kwraa, koni mɛi fɛɛ ana oshweremɔ faŋŋ.”—1 Timoteo 4:15.
Nɔkwɛmɔnii ni Jɛ Nyɔŋmɔ Wiemɔ lɛ Mli
12. Mɛɛ nɔkwɛmɔnɔ ni sa kadimɔ Samuel weku lɛ fee?
12 Susumɔ nɔkwɛmɔnɔ fɛfɛo ni Samuel weku lɛ fee amɛfɔ̃ shi, beni amɛkɛ amɛhe wo gbɛjianɔ ni ato kɛha amɛkɛ amɛnanemɛi jálɔi ahenaabuamɔ mli beni Nyɔŋmɔ kpee buu lɛ yɔɔ Shilo lɛ he okwɛ. Hii pɛ abiɔ ni amɛya daa afi gbijurɔyelii ashishi. Shi Samuel tsɛ, Elkana, ŋɔɔ eweku muu lɛ fɛɛ efataa ehe, ni “daa afi lɛ nɛkɛ nuu nɛɛ jɛɔ emaŋ eyaa Shilo eyasɔleɔ ni eshãa afɔle ehãa Yehowa Zebaot.” (1 Samuel 1:3-5) Ekolɛ, Samuel maŋ Ramataim-Zofim, bɛŋkɛ ŋshɔ lɛ naa gbɛ yɛ ŋmɛnɛŋmɛnɛ beaŋ Rentis yɛ “Efraim gɔŋ lɛ” shishi gɔji bibii lɛ anɔ. (1 Samuel 1:1) Enɛ hewɔ lɛ gbɛfaa kɛmiiya Shilo lɛ baanyɛ afee kilomitai 30, ni ji gbɛfaa ni yɔɔ tɔlɛ waa yɛ nakai beaŋ. Enɛ ji nɔ ni Elkana kɛ eweku lɛ kɛ anɔkwayeli feɔ “daa afi: kɛ́ amɛtee Yehowa we lɛ.”—1 Samuel 1:7.
13. Mɛɛ nɔkwɛmɔnɔ Yudafoi anɔkwafoi lɛ fee yɛ be mli ni Yesu yɔɔ shikpɔŋ nɔ lɛ?
13 Yesu hu da akɛ weku agbo ko mlinyo. Daa afi lɛ weku lɛ fãa gbɛ kɛjɛɔ Nazaret aaafee kilomitai 100 kɛbaa wuoyigbɛ ni amɛbayeɔ Hehoo gbi jurɔ lɛ yɛ Yerusalem. Gbɛ̀i enyɔ yɛ ni amɛbaanyɛ amɛtsɔ nɔ kɛya. Gbɛ ni yɔɔ tɛ̃ɛ lɛ biɔ shikpelekemɔ kɛmiiya Megido Jɔɔ lɛ mli, ni no sɛɛ lɛ ekwɔɔ kɛyaa ŋwɛigbɛ aaafee mitai 600 kɛtsɔɔ Samariabii ashikpɔŋ nɔ, ni etsaa nɔ kɛyaa Yerusalem. Gbɛ kroko ni ale waa lɛ ji nɔ ni Yesu tsɔ nɔ yɛ enaagbee gbɛfaa ni kɛ lɛ tee Yerusalem yɛ afi 33 Ŋ.B. lɛ. Enɛ biɔ nyiɛmɔ kɛtsɔ Yordan Jɔɔ lɛ mli kɛyashɛɔ he ni baa shi fe ŋshɔ hiɛ kwɔlɛ, aahu kɛyashi eyashɛɔ “Yudea niiaŋ, kɛ Yordan sɛɛ gbɛ.” (Marko 10:1) Kɛjɛ biɛ lɛ, “gbɛ kɛmiiya Yerusalem” lɛ jɛkɛmɔ aaashɛ kilomitai 30, ni akwɔɔ gɔŋ ni nɔkwɔlɛ fe mitai 1,100. (Marko 10:32) Gbɔmɛi babaoo, ni ji gbijurɔyelɔi anɔkwafoi lɛ fãa gbɛ ni tɔlɛ yɔɔ mli nɛɛ kɛjɛɔ Galilea kɛyaa Yerusalem be fɛɛ be. (Luka 2:44) Mɛɛ nɔkwɛmɔnɔ fɛfɛo enɛ ji nɛkɛ kɛha Yehowa tsuji ni yɔɔ shikpɔji ni etee hiɛ lɛ anɔ ŋmɛnɛ, he ní amɛteŋ mɛi pii baanyɛ aya Kristofoi ahenaabuamɔi ashishi yɛ gbɛ ni waaa tsɔ̃ nɔ, kɛtsɔ ŋmɛnɛŋmɛnɛ beaŋ gbɛfaa tsɔnei anɔ lɛ!
14, 15. (a) Mɛɛ nɔkwɛmɔnɔ Hana fee? (b) Mɛni wɔbaanyɛ wɔkase kɛjɛ subaŋ kpakpa ni mɛi heei ni baa kpeei lɛ ateŋ mɛi komɛi jieɔ lɛ kpo lɛ mli?
14 Nɔkwɛmɔnɔ kroko hu ji yoo okulafo Hana ni eye afii 84 lɛ nɔ̃ lɛ. Biblia lɛ kɛɔ akɛ “ejeee sɔlemɔwe lɛ kwraa.” (Luka 2:37) Kɛfata he lɛ, Hana jie mɛi krokomɛi ahe suɔmɔ kɛ miishɛɛ kpo. Beni ena abifao Yesu ni ená ele akɛ lɛ ji shiwoo Mesia lɛ, mɛni efee? Eda Nyɔŋmɔ shi ni “ewie yɛ ehewɔ etsɔɔ mɛi fɛɛ ni kwɛɔ Yerusalem kpɔmɔ lɛ gbɛ lɛ.” (Luka 2:38) Mɛɛ subaŋ kpakpa nɛ, nɔkwɛmɔnɔ kɛha Kristofoi ŋmɛnɛ!
15 Hɛɛ, esa akɛ wɔkpeei ni wɔɔya kɛ wɔhe ni wɔkɛaawo mli lɛ aŋɔɔ wɔnaa aahu akɛ, taakɛ Hana fee lɛ, wɔsumɔɔɔ ni wɔfoɔ mli. Mɛi heei pii nuɔ he yɛ gbɛ ni tamɔ nɛkɛ nɔ. Akɛni amɛje duŋ lɛ mli kɛba Nyɔŋmɔ naakpɛɛ la lɛ mli hewɔ lɛ, amɛmiisumɔ ni amɛkase nɔ fɛɛ nɔ ni amɛbaanyɛ, ni mɛi babaoo jieɔ mɔdɛŋbɔɔ kpele kpo yɛ Kristofoi akpeei ahe. Yɛ gbɛ kroko nɔ lɛ, esa akɛ mɛi ni etsɛ yɛ anɔkwale lɛ mli lɛ akwɛ amɛhe nɔ jogbaŋŋ ni ‘amɛkaŋmɛɛ amɛ klɛŋklɛŋ suɔmɔ lɛ he.’ (Kpojiemɔ 2:4) Bei komɛi lɛ, ekolɛ hewalɛnamɔ mli naagbai ni mli wa loo shihilɛi ni ehiii nɔ ko feemɔ yɛ he baanyɛ atsĩ mɔ ko kpeeiyaa naa. Shi esaaa ni wɔŋmɛɔ gbɛ ni heloonaa ninamɔ, hiɛtserɛjiemɔ, loo ehe miishɛɛ ni wɔbɛ lɛ hãa wɔfeɔ mɛi ni esaaa amɛhe, mɛi ni efee gbedee, loo mɛi ni eyaaa kpeei daa.—Luka 8:14.
Nɔkwɛmɔnɔ Kpakpa ni Fe Fɛɛ
16, 17. (a) Te Yesu fee enii yɛ mumɔŋ henaabuamɔi ahe eha tɛŋŋ? (b) Mɛɛ nifeemɔ gbɛ kpakpa esa akɛ Kristofoi fɛɛ abɔ mɔdɛŋ akɛ amɛaanyiɛ sɛɛ?
16 Yesu fee nɔkwɛmɔnɔ ni sa kadimɔ waa efɔ̃ shi yɛ hiɛsɔɔ ni aaaná aha mumɔŋ henaabuamɔi lɛ agbɛfaŋ. Beni eji gbekɛ ni eye afii 12 lɛ, etsɔɔ suɔmɔ ni eyɔɔ kɛha Nyɔŋmɔ we ni yɔɔ Yerusalem lɛ. Efɔlɔi lɛ enaaa he ni eyɔɔ, shi yɛ naagbee lɛ, amɛyana lɛ ni ekɛ tsɔɔlɔi lɛ miigba Nyɔŋmɔ Wiemɔ lɛ he sane yɛ sɔlemɔwe lɛ. Beni ejieɔ efɔlɔi lɛ atsuiyeli wiemɔ lɛ naa lɛ, Yesu kɛ bulɛ bi akɛ: “Ani nyɛleee akɛ esa mi akɛ mihiɔ shi yɛ nii ni ji mitsɛ nɔ̃ lɛ mli?” (Luka 2:49) Gbekɛ Yesu lɛ kɛ efɔlɔi lɛ ku amɛsɛɛ kɛtee Nazaret yɛ heshibaa mli. Etee nɔ ejie suɔmɔ ni eyɔɔ kɛha jamɔ he kpeei lɛ kpo yɛ jɛmɛ kɛtsɔ kpeehe lɛ ni eyaa daa lɛ nɔ. Enɛ hewɔ lɛ, beni eje esɔɔmɔ nitsumɔ lɛ shishi lɛ, Biblia lɛ bɔɔ amaniɛ akɛ: “Eba Nazaret, he ni alɛ lɛ yɛ lɛ, ni taakɛ bɔ ni efɔɔ feemɔ lɛ, etee kpeehe lɛ yɛ hejɔɔmɔ gbi lɛ nɔ, ni ete shi koni ekane wolo.” Beni Yesu kane Yesaia 61:1, 2 lɛ egbe naa ni etsɔɔ mli lɛ, toibolɔi lɛ “[ahiɛ] fee amɛ yaa yɛ duromɔ wiemɔi ni jɛ enaa lɛ hewɔ.”—Luka 4:16, 22; wɔma efã ko nɔ mi.
17 Kristofoi akpeei nyiɛɔ nɛkɛ shishijee nɔkwɛmɔnɔ nɛɛ sɛɛ ŋmɛnɛ. Yɛ yijiemɔ lala kɛ sɔlemɔ ni akɛjeɔ kpee lɛ shishi lɛ sɛɛ lɛ, akaneɔ ŋmalɛi kukuji kɛjɛɔ Biblia (loo Biblia kasemɔ wolo ni atsɛ ŋmalɛi asɛɛ yɛ mli) lɛ mli ni atsɔɔ mli. Gbɛnaa nii kã anɔkwa Kristofoi anɔ akɛ amɛkase nɔ̃ kpakpa ni Yesu Kristo fɔɔ feemɔ lɛ. Amɛnáa Kristofoi ahenaabuamɔi ni amɛaaya daa lɛ he miishɛɛ, yɛ bɔ ni amɛshihilɛi baaŋmɛ gbɛ lɛ naa.
Ŋmɛnɛŋmɛnɛ Beaŋ Nɔkwɛmɔnii
18, 19. Mɛɛ nɔkwɛmɔnii ni sa kadimɔ waa nyɛmimɛi ni yɔɔ maji ni eyako hiɛ tsɔ̃ lɛ amli lɛ efee yɛ asafoŋ kpeei, kpeei bibii, kɛ kpeei wuji agbɛfaŋ?
18 Wɔnyɛmimɛi hii kɛ yei ni yɔɔ shikpɔŋ lɛ nɔ hei ni eyako hiɛ tsɔ̃ lɛ anɔ lɛ ateŋ mɛi babaoo feɔ hiɛsɔɔ ni aaaná aha Kristofoi ahenaabuamɔi lɛ he nɔkwɛmɔnɔ kpakpa. Yɛ Mozambique lɛ, ehé kpokpaa wulu nɔkwɛlɔ, Orlando, kɛ eŋa, Amélia, ŋmɛlɛtswai 45 ni amɛkɛnyiɛ aaashɛ kilomitai 90 kɛtsɔ gɔŋ ni kwɔ nɔ ni amɛyasɔmɔ yɛ kpee ko shishi. No sɛɛ lɛ esa akɛ amɛnyiɛ nakai gbɛ nɔŋŋ kɛku amɛsɛɛ koni amɛyasɔmɔ yɛ kpee ni nyiɛ sɛɛ lɛ hu shishi. Orlando kɛ heshibaa bɔ amaniɛ akɛ: “Ní wɔkɛ wɔhe to nyɛmimɛi ni jɛ Bawa Asafo lɛ mli lɛ ahe lɛ, wɔnu he akɛ wɔfeko nɔ ko kwraa. Kpee lɛ baa kɛ amɛsɛɛkuu kɛmiiya amɛshiai lɛ biɔ gbii ekpaa gbɛfaa ni jɛkɛmɔ shɛɔ aaafee kilomitai 400 kɛtsɔ nyiɛmɔ nɔ, ni nyɛminuu ko ni eye afii 60 fata amɛhe!”
19 Ni hesaamɔ kɛha daa otsi asafoŋ kpeei hu? Kashwashwa Njamba ji nyɛmiyoo ko ni he waaa tsɔ̃, ni eye fe afii 70. Eyɛ Kaisososi, ni ji akrowa bibioo ko ni kɛ Maŋtsɛyeli Asa ni yɔɔ Rundu, yɛ Namibia lɛ jɛkɛmɔ aaafee kilomitai enumɔ lɛ mli. Kɛ eeya kpeei lɛ, enyiɛɔ kilomitai nyɔŋma yaa-kɛ-baa, kɛtsɔɔ ŋa mli. Atutua mɛi krokomɛi ni atswa amɛ ojo yɛ nɛkɛ gbɛ nɛɛ nɔ, shi Kashwashwa baa kpeei daa. Afeɔ kpeei lɛ amli babaoo yɛ wiemɔi ni enuuu shishi mli. No hewɔ lɛ te efeɔ tɛŋŋ ni enáa kpee ni eyaa lɛ he sɛɛ? Kashwashwa kɛɔ akɛ: “Mibɔɔ mɔdɛŋ akɛ mana nɔ ni wiemɔ ni ahãa lɛ kɔɔ he, kɛtsɔ ŋmalɛi lɛ asɛɛnyiɛmɔ nɔ.” Shi elé woloŋ, no hewɔ lɛ te efeɔ tɛŋŋ ni enyiɛɔ ŋmalɛi lɛ asɛɛ? Ehãa hetoo akɛ: “Miboɔ toi akɛ manu ŋmalɛi ni mile yɛ miyitsoŋ lɛ eko lo.” Ekase ŋmalɛi ni fa saŋŋ ewo eyitsoŋ, yɛ afii abɔ ni eho lɛ amli. Eyaa nikanemɔ kɛ niŋmaa skul ni asafo lɛ eto he gbɛjianɔ lɛ, koni eha bɔ ni enyɛɔ ekɛ Biblia lɛ tsuɔ nii ehãa lɛ aya hiɛ. Ekɛɛ: “Misumɔɔ kpeeiyaa waa. Mikaseɔ nibii heei yɛ jɛmɛ be fɛɛ be. Misumɔɔ ni mikɛ nyɛmimɛi hii kɛ yei lɛ abɔ. Eyɛ mli akɛ minyɛɛɛ mikɛ amɛ fɛɛ awie moŋ, shi amɛbaa ni amɛbaŋaa mi be fɛɛ be. Ni nɔ ni he hiaa fe fɛɛ ji akɛ, mile akɛ mihãa Yehowa tsui nyáa, kɛtsɔ kpeei ni miyaa lɛ nɔ.”
20. Mɛni hewɔ esaaa akɛ wɔkwaa wɔ Kristofoi ahenaabuamɔi lɛ?
20 Taakɛ Kashwashwa ji lɛ, Yehowa jalɔi akpekpei abɔ ni yɔɔ shikpɔŋ lɛ nɔ fɛɛ lɛ jieɔ hiɛsɔɔ ni sa yijiemɔ kpo kɛhaa Kristofoi ahenaabuamɔi. Yɛ be mli ni Satan je lɛ bɛŋkɛɔ ehiɛkpatamɔ he lɛ, wɔnyɛŋ wɔkwa wɔhe naabuamɔ kutuu. Shi moŋ, nyɛhaa wɔyaa nɔ wɔshĩa kpe yɛ mumɔŋ ni wɔjie hiɛsɔɔ ni mli kwɔ kpo yɛ asafoŋ kpeei, kpeei bibii kɛ kpeei wuji ahe. Jeee akɛ no baaha Yehowa tsui anyá kɛkɛ, shi moŋ ehe baaba sɛɛnamɔ babaoo kɛha wɔ beni wɔnáa ŋwɛi nitsɔɔmɔ ni kɛ mɔ yaa naanɔ wala mli lɛ mli gbɛfaŋnɔ lɛ.—Abɛi 27:11; Yesaia 48:17, 18; Marko 13:35-37.
Sanebimɔi Kɛha Emlitĩi
◻ Mɛni hewɔ eji hegbɛ akɛ aaaya Kristofoi ahenaabuamɔi ashishi lɛ?
◻ Mɛi fɛɛ ni baa kpee lɛ baanyɛ aye abua ni kpee lɛ atswa mɔ ama shi yɛ mɛɛ gbɛ nɔ?
◻ Mɛɛ nɔkwɛmɔnɔ ni sa kadimɔ waa Yesu Kristo fee?
◻ Mɛni wɔbaanyɛ wɔkase kɛjɛ nyɛmimɛi ni yɔɔ shikpɔji ni eyako hiɛ tsɔ̃ lɛ aŋɔɔ?
[Akrabatsa ni yɔɔ baafa 17]
Amɛhiɛ Sɔɔ Daa Otsi Kpeei
Gbɔmɛi akpekpei abɔ hiɔ maŋtiasei ni ohia kɛ awuiyeli yɔɔ mli waa lɛ amli. Yɛ shihilɛi nɛɛ fɛɛ sɛɛ lɛ, anɔkwa Kristofoi ni yɔɔ amɛteŋ lɛ jieɔ hiɛsɔɔ ni sa yijiemɔ kpo yɛ Kristofoi ahenaabuamɔi ahe. Onukpa ko ni sɔmɔɔ yɛ Soweto asafoi ni yɔɔ Gauteng, yɛ South Africa lɛ ekome mli lɛ bɔ amaniɛ akɛ: “Yɛ asafo ni Odasefoi 60 kɛ shiɛlɔi ni abaptisiko amɛ lɛ yɔɔ mli lɛ, wɔnáa mɛi aaashɛ 70 kɛmiishɛ 80, kɛ nɔ ni fa fe nakai baa wɔkpeei yɛ bei komɛi amli. Eyɛ mli akɛ he ni nyɛmimɛi hii kɛ yei lɛ jɛɔ amɛbaa kpee lɛ jɛkɛɛɛ tsɔ̃ moŋ, shi shihilɛ ni yɔɔ Soweto akutso nɛɛ mli lɛ yɛ basabasa. Atsu nyɛminuu ko kotosɛɛ kakla beni enyiɛ kɛmiiba kpee. Kɛ hoo lɛ, amɔ̃mɔ nyɛmimɛi yei enyɔ ni aka ni kulɛ atswa amɛ ojo. Shi enɛ etsiii amɛ naa ni amɛkaba. Daa Hɔgbaa lɛ, yɛ be mli ni wɔkɛ sɔlemɔ ekpa kpee lɛ sɛɛ lɛ, wɔkɛ be fioo kaseɔ lala. Kɛ hoo lɛ, mɛi ni naa shɛɔ oha mlijaa 95 hiɔ shi daa ni amɛlaa lalai ni abaala yɛ kpeei ni abaafee yɛ otsi ni nyiɛ sɛɛ lɛ mli lɛ fɛɛ. Enɛ yeɔ ebuaa mɛi heei ni yɔɔ wiemɔ lɛ he miishɛɛ lɛ ni amɛkaseɔ lalai lɛ ni amɛfataa he kɛlaa.”
Mɛi ni yɔɔ akrowai lɛ yɛ gbɛtsii nii krokomɛi, tamɔ gbɛ kakadaŋŋ ni esa akɛ amɛnyiɛ kɛya kpeei shii etɛ yɛ otsi mli lɛ nɛkɛ. He ni gbalashihilɛ mli hefatalɔi komɛi ni yɔɔ wiemɔ lɛ he miishɛɛ lɛ yɔɔ lɛ kɛ Maŋtsɛyeli Asa ni yɔɔ Lobatse, yɛ Botswana lɛ teŋ jɛkɛmɔ ji kilomitai 15. Amɛkɛ amɛbii enyɔ lɛ baa kpeei daa yɛ afi ni eho lɛ mli fɛɛ. Wu lɛ saa aspaatere ni ekɛkwɛɔ weku lɛ. Ŋa lɛ hɔ̃ɔ nibii bibii ni ekɛyeɔ ebuaa weku lɛ yɛ shika gbɛfaŋ, koni amɛnyɛ amɛwo tsɔne mlitamɔ he nyɔmɔ kɛha kpeei ayaa kɛ baa.
Nyɛsɛɛ nɛɛ latsaa be lɛ mli gbi ko gbɛkɛ, yɛ amɛkɛ kpokpaa nɔkwɛlɔ lɛ kpee ko sɛɛ lɛ, weku nɛɛ na akɛ amɛdamɔ bɔs shidaamɔhe ko gbɛkɛ 9:00 ni amɛnáko bɔs kɛya shia. Bɔs sɔrɔtoi lɛ ekpa jeeŋmɔ yɛ kɔɔyɔŋ tsakemɔ ni ehiii lɛ hewɔ. Polisifonyo ko wa etsɔne ní eta mli lɛ ni ebi amɛ nɔ ni amɛfeɔ yɛ jɛmɛ. Beni enu amɛ amanehulu lɛ, ena amɛ mɔbɔ, ni eha amɛtara etsɔne lɛ mli ni ekɛ amɛ tee amɛshia ni jɛkɛmɔ shɛɔ kilomitai 15 lɛ tɔ̃ɔ. Ŋa lɛ, ni ji shiɛlɔ ni abaptisiko lɛ lɛ kɛɛ ewu lɛ akɛ: “Oona, kɛ wɔkɛ kpeei ye klɛŋklɛŋ gbɛhe lɛ, Yehowa tsuɔ wɔhiamɔ nii ahe nii be fɛɛ be.” Amrɔ nɛɛ wu lɛ ewie akɛ eesumɔ ni lɛ hu etsɔ sanekpakpa lɛ he shiɛlɔ.
[Mfoniri ni yɔɔ baafa 18]
Odasefoi tamɔ mɛi ni yɔɔ Romania nɛɛ feɔ hiɛsɔɔ ni wɔɔná wɔhã Kristofoi ahenaabuamɔi lɛ ahe nɔkwɛmɔnɔ fɛfɛo