Ani Nyɔŋmɔ Baa Klɛŋklɛŋ yɛ Oweku lɛ Mli?
“Suɔmɔ [Yehowa] o-Nyɔŋmɔ lɛ kɛ otsui fɛɛ.”—MARKO 12:29, 30.
1. Te bɔ ni esa akɛ wɔsumɔ Yehowa lɛ he hiaa ha tɛŋŋ?
WOLOŊMALƆ ko babi Yesu akɛ: “Te nɔ ni ji kitai lɛ ateŋ klɛŋklɛŋ nɔ?” Yɛ nɔ najiaŋ ni eeekɛɛ lɛ lɛ diɛŋtsɛ ejwɛŋmɔ lɛ, Yesu tsɛ́ wiemɔi asɛɛ kɛjɛ Nyɔŋmɔ Wiemɔ lɛ mli yɛ 5 Mose 6:4, 5 ni ekɛha esanebimɔ lɛ hetoo. Ejie lɛ naa akɛ: “Kitai lɛ fɛɛ ateŋ klɛŋklɛŋ nɔ ji enɛ: ‘Bo toi, Israel! [Yehowa] wɔ-Nyɔŋmɔ lɛ, [Yehowa] kome ni; ni suɔmɔ [Yehowa] o-Nyɔŋmɔ lɛ kɛ otsui fɛɛ kɛ osusuma fɛɛ kɛ ojwɛŋmɔ fɛɛ kɛ onyɛmɔ fɛɛ.’ ”—Marko 12:28-30.
2. (a) Mɛɛ shitee-kɛ-woo Yesu kɛkpe? (b) Mɛni bei komɛi lɛ eeeha ewa kɛha wɔ akɛ wɔɔsa Yehowa hiɛ?
2 Nɔ ni Yesu tsɛ́ lɛ akɛ klɛŋklɛŋ kita—nɔ ni he hiaa fe fɛɛ—lɛ toiboo biɔ ni wɔfee nɔ ni Yehowa sumɔɔ be fɛɛ be. Yesu fee nakai, eyɛ mli akɛ be ko lɛ bɔfo Petro te shi ewo gbɛ ni Yesu ekɔ lɛ, ni yɛ be kroko hu mli lɛ, lɛ diɛŋtsɛ ewekumɛi ni bɛŋkɛ lɛ kpaakpa hu fee nakai. (Mateo 16:21-23; Marko 3:21; Yohane 8:29) Kɛ ona akɛ oyaje shihilɛ ni tamɔ nakai mli hu? Ŋɔɔ lɛ akɛ ekolɛ oweku lɛ mli bii miitao ni okpa Biblia ni okaseɔ kɛ Yehowa Odasefoi ni okɛbɔɔ lɛ kwraa. Ani obaaha Nyɔŋmɔ aye klɛŋklɛŋ gbɛhe kɛtsɔ nɔ ni saa ehiɛ ni ooofee lɛ nɔ? Ani Nyɔŋmɔ baa klɛŋklɛŋ, kɛji oweku lɛ mli bii miite shi amɛmiiwo mɔdɛŋ ni obɔɔ akɛ ooosɔmɔ lɛ lɛ po?
Weku Shitee-kɛ-Woo he Tsɔne Lɛ
3. (a) Mɛni ekolɛ eeejɛ Yesu tsɔɔmɔi lɛ amli aba kɛha weku lɛ? (b) Mɛɛ gbɛ nɔ weku lɛ mli bii baatsɔ amɛtsɔɔ mɔ ni amɛdɔɔ ehe fe fɛɛ?
3 Yesu baaa jaramɔ shihilɛ ni baanyɛ aba kɛji weku lɛ mli bii krokomɛi te shi amɛwo weku lɛ mli nyo ni kpɛlɛɔ etsɔɔmɔi anɔ lɛ shi. Yesu wie akɛ: “Mɔ diɛŋtsɛ shia teŋ bii aaatsɔmɔ ehenyɛlɔi.” Ni kɛlɛ, yɛ nakai nii ni yɔɔ dɔlɛ ni baajɛ mli aba lɛ fɛɛ sɛɛ lɛ, Yesu tsɔɔ mɔ ni sa akɛ eba klɛŋklɛŋ, ni ekɛɛ: “Mɔ ni dɔɔ tsɛ loo nyɛ he fe mi lɛ, esaaa mi; ni mɔ ni dɔɔ binuu loo biyoo he fe mi lɛ, esaaa mi.” (Mateo 10:34-37) Wɔhaa Yehowa Nyɔŋmɔ baa klɛŋklɛŋ kɛtsɔɔ e-Bi, Yesu Kristo, mɔ ni ji “[Nyɔŋmɔ] anunyam lɛ kpɛmɔ kɛ esu lɛ henɔ” pɛpɛɛpɛ lɛ tsɔɔmɔi asɛɛnyiɛmɔ nɔ.—Hebribii 1:3; Yohane 14:9.
4. (a) Mɛni Yesu kɛɛ ehe hiaa yɛ esɛɛnyiɛlɔ ni mɔ ko aaatsɔ lɛ mli? (b) Esa akɛ Kristofoi anyɛ amɛweku mli bii yɛ mɛɛ shishinumɔ naa?
4 Be kroko hu, beni Yesu tsɔɔ nɔ ni enɔkwa kaselɔ ni mɔ ko aaafee lɛ tsɔɔ diɛŋtsɛ lɛ, ewie akɛ: “Kɛji mɔ ko miiba miŋɔɔ ni enyɛɛɛ etsɛ kɛ enyɛ kɛ eŋa kɛ ebii kɛ enyɛmimɛi hii kɛ enyɛmimɛi yei kɛ lɛ diɛŋtsɛ esusuma hu tete lɛ, enyɛŋ etsɔ mikaselɔ.” (Luka 14:26) Eka shi faŋŋ akɛ Yesu etsɔɔɔ akɛ esa akɛ esɛɛnyiɛlɔi lɛ anyɛ amɛweku mli bii diɛŋtsɛ, ejaakɛ ewo gbɔmɛi kita akɛ amɛna suɔmɔ amɛha amɛhenyɛlɔi tete po. (Mateo 5:44) Shi moŋ, Yesu miitsɔɔ yɛ biɛ akɛ esa akɛ bɔ ni esɛɛnyiɛlɔi sumɔɔ amɛweku mli bii lɛ aba shi fe bɔ ni amɛsumɔɔ Nyɔŋmɔ. (Okɛto Mateo 6:24 he.) Yɛ nakai shishinumɔ lɛ kɛ gbeekpamɔ naa lɛ, Biblia lɛ kɛɔ akɛ Yakob “sumɔɔɔ” Lea, shi esumɔɔ Rahel, ni tsɔɔ akɛ esumɔɔɔ Lea jogbaŋŋ tamɔ bɔ ni esumɔɔ enyɛmiyoo Rahel lɛ. (1 Mose 29:30-32) Yesu wie akɛ esa akɛ wɔnyɛ wɔ diɛŋtsɛ ‘wɔsusuma’ loo wɔwala po, aloo suɔmɔ ni wɔyɔɔ kɛha wɔsusuma lɛ aba shi fe suɔmɔ ni wɔyɔɔ kɛha Yehowa!
5. Satan kɛ weku gbɛjianɔtoo lɛ tsuɔ nii yɛ ŋaa gbɛ fɔŋ nɔ yɛ mɛɛ gbɛ nɔ?
5 Ákɛ Bɔlɔ kɛ Wala-Halɔ lɛ, Yehowa sa hetuu-kɛhamɔ kwraa kɛmiijɛ etsuji fɛɛ ŋɔɔ. (Kpojiemɔ 4:11) Bɔfo Paulo ŋma akɛ: “Enɛ hewɔ ni midɔrɔɔ minakutsei mihaa wɔ-Nuntsɔ Yesu Kristo Tsɛ lɛ, ni ji mɛi fɛɛ ni atsɛ amɛ akɛ bii yɛ ŋwɛi kɛ shikpɔŋ lɛ nɔ lɛ a-Tsɛ krɔŋŋ lɛ.” (Efesobii 3:14, 15) Bɔ ni Yehowa to weku gbɛjianɔtoo lɛ shishi lɛ yɛ naakpɛɛ aahu akɛ weku lɛ mli bii naa hedɔɔ amɛhaa amɛhe. (1 Maŋtsɛmɛi 3:25, 26; 1 Tesalonikabii 2:7) Shi, Satan Abonsam kɛ nɛkɛ weku mli hedɔɔ, ni suɔmɔ ni ayɔɔ akɛ aaasa suɔlɔi ahiɛ fata he nɛɛ tsuɔ nii yɛ ŋaa gbɛ fɔŋ nɔ. Ewoɔ shitee-kɛ-woo ni jɛɔ mɔ diɛŋtsɛ wekumɛi aŋɔɔ lɛ mli wu, ni efeɔ kaa kɛhaa mɛi babaoo akɛ amɛaadamɔ shi shiŋŋ amɛha Biblia mli anɔkwale lɛ kɛ amɛkɛ enɛ kpe.—Kpojiemɔ 12:9, 12.
Kaa lɛ Naadaamɔ yɛ Omanyeyeli Mli
6, 7. (a) Te aaafee tɛŋŋ aye abua weku mli bii ni amɛna bɔ ni Biblia kasemɔ kɛ Kristofoi anaanyobɔɔ he hiaa? (b) Te wɔɔfee tɛŋŋ wɔha ana akɛ wɔsumɔɔ wɔweku mli bii lɛlɛŋ?
6 Shi kɛ aanyɛ onɔ ni ohala akɛ obaasa Nyɔŋmɔ hiɛ aloo obaasa oweku lɛ mli nyo ko hiɛ lɛ, mɛni obaafee? Ani obaanu he akɛ nilee yɛ mli akɛ Nyɔŋmɔ kpaaa wɔ gbɛ akɛ wɔkase e-Wiemɔ lɛ ni wɔkɛ eshishitoo mlai atsu nii, kɛ nakai feemɔ kɛ weku mligbalamɔ baaba? Shi susumɔ he okwɛ. Kɛ oŋmɛɛ he ni okpa o-Biblia mli nikasemɔ loo Yehowa Odasefoi ni okɛbɔɔ lɛ, te baafee tɛŋŋ ni osuɔlɔi baanu shishi akɛ Biblia mli anɔkwa nilee ni mɔ aaana lɛ ji wala-kɛ-gbele sane hu?—Yohane 17:3; 2 Tesalonikabii 1:6-8.
7 Wɔbaanyɛ wɔfee shihilɛ lɛ he mfoniri yɛ nɛkɛ gbɛ nɔ: Ekolɛ weku lɛ mli nyo ko sumɔɔ daanumɔ waa diɛŋtsɛ. Ani ohiɛ ni oooku ofɔ̃ nɔ, loo kpɛlɛmɔ ni oookpɛlɛ edaanumɔ naagba lɛ nɔ lɛ he baaba sɛɛnamɔ diɛŋtsɛ kɛha lɛ? Ani ebaahi akɛ oŋmɛɛ he kɛkɛ ni okɛbaa toiŋjɔlɛ yi, ni no hewɔ lɛ ofeee enaagba lɛ he nɔ ko kwraa? Dabi, ekolɛ okpɛlɛɔ nɔ akɛ ebaahi jogbaŋŋ akɛ oooka akɛ oooye obua lɛ ni eye edaanumɔ naagba lɛ nɔ, kɛji ebiɔ ni okɛ emlifu kɛ hegbeyeiwoo ni ekɛaaba lɛ akpe hiɛ kɛ hiɛ po. (Abɛi 29:25) Nakai nɔŋŋ, kɛji osumɔɔ oweku lɛ mli bii lɛlɛŋ lɛ, no lɛ oŋmɛŋ ohe ohaŋ mɔdɛŋ ni amɛbɔɔ ni amɛha okpa Biblia lɛ kasemɔ lɛ. (Bɔfoi lɛ Asaji 5:29) Ja okɔ shidaamɔ ni yɔɔ shiŋŋ pɛ dani obaanyɛ oye obua amɛ ni amɛna akɛ shi ni wɔɔhi yɛ Kristo tsɔɔmɔi anaa lɛ tsɔɔ wɔ wala diɛŋtsɛ.
8. Mɛɛ gbɛ nɔ wɔnáa anɔkwale ni eji akɛ Yesu kɛ anɔkwayeli fee Nyɔŋmɔ suɔmɔnaa nii lɛ he sɛɛ yɛ?
8 Nyɔŋmɔ ni wɔɔha eba klɛŋklɛŋ lɛ baanyɛ awa waa bei komɛi. Shi kaimɔ akɛ, Satan ha ewa waa kɛha Yesu hu akɛ eeefee Nyɔŋmɔ suɔmɔnaa nii. Shi kɛlɛ, Yesu nijiaŋ ejeee wui; emia ehiɛ yɛ sɛŋmɔtso nɔ piŋmɔ mli tete po. Biblia lɛ kɛɔ akɛ: “Yesu Kristo [ji] wɔ Yiwalaherelɔ.” “[E]gbo wɔyi gbele.” (Tito 3:6; 1 Tesalonikabii 5:10) Ani wɔdaaa shi babaoo akɛ Yesu nijiaŋ ejeee wui yɛ shitee-kɛ-woo ni ekɛkpe lɛ mli? Akɛni emia ehiɛ yɛ afɔleshaa gbele mli hewɔ lɛ, wɔyɛ gbɛkpamɔ kɛha naanɔ wala namɔ yɛ toiŋjɔlɛ jeŋ hee ni jalɛ hiɔ mli lɛ mli kɛtsɔ ela ni efɔse eshwie shi lɛ mli hemɔkɛyeli kpojiemɔ nɔ.—Yohane 3:16, 36; Kpojiemɔ 21:3, 4.
Nyɔmɔwoo Kpakpa ni Abaanyɛ Ana
9. (a) Mɛɛ gbɛ nɔ Kristofoi baanyɛ ana mɛi krokomɛi ayiwalaheremɔ mli gbɛfaŋnɔ yɛ? (b) Mɛni ji Timoteo weku shihilɛ?
9 Ani oyoo akɛ bo hu obaanyɛ ona gbɛfaŋnɔ yɛ mɛi krokomɛi, ni owekumɛi ni osumɔɔ amɛ waa lɛ fata he lɛ ayiwalaheremɔ mli? Bɔfo Paulo wo Timoteo hewalɛ akɛ: “Hii shi yɛ nii [ni atsɔɔ bo] nɛɛ amli; ejaakɛ kɛji ofee enɛ lɛ, ooohere bo diɛŋtsɛ kɛ mɛi ni boɔ bo toi lɛ fɛɛ yiwala.” (1 Timoteo 4:16) Timoteo hi shia ni mli egbala mli, ejaakɛ etsɛ Helanyo lɛ jeee heyelilɔ. (Bɔfoi lɛ Asaji 16:1; 2 Timoteo 1:5; 3:14) Eyɛ mli akɛ wɔleee akɛ Timoteo tsɛ batsɔ heyelilɔ yɛ be ko mli moŋ, shi nyɛ ni eeenyɛ eba akɛ ebatsɔ heyelilɔ lɛ tee hiɛ babaoo yɛ eŋa, Eunike, kɛ ebi Timoteo jeŋba kpakpa lɛ hewɔ.
10. Mɛni Kristofoi baanyɛ afee yɛ amɛhefatalɔi ni heee yeee lɛ ahe?
10 Ŋmalɛi lɛ jieɔ lɛ kpo akɛ wumɛi kɛ ŋamɛi ni kɛ shiŋŋ-feemɔ hiɛɔ Biblia mli anɔkwale lɛ mli lɛ baanyɛ aye abua kɛhere amɛ hefatalɔi ni jeee Kristofoi lɛ ayiwala kɛtsɔ yelikɛbuamɔ ni amɛkɛaaha amɛ ni amɛbatsɔmɔ heyelilɔi lɛ nɔ. Bɔfo Paulo ŋma akɛ: “Kɛji nyɛmi ko yɛ ŋa ko ni heee yeee, ni kɛlɛ ekpɛlɛ akɛ ekɛ lɛ aaahi shi lɛ, ekaŋmɛɛ ehe; ni kɛ yoo ko hu yɛ wu ko ni heee yeee, ni kɛlɛ ekpɛlɛ akɛ ekɛ lɛ aaahi shi lɛ, ekafɔɔ lɛ gbala. Shi, yoo, bo obaahere owu lɛ yiwala jiŋŋ, ole? Aloo nuu, bo hu obaahere oŋa lɛ yiwala jiŋŋ, ole?” (1 Korintobii 7:12, 13, 16) Bɔfo Petro tsɔɔ bɔ ni, yɛ naagbee lɛ, ŋamɛi baanyɛ ahere amɛwumɛi ayiwala, ni ewo amɛ hewalɛ akɛ: “Nyɛbaa nyɛhe shi nyɛhaa nyɛ diɛŋtsɛ nyɛwumɛi lɛ, koni, kɛ mɛi komɛi booo wiemɔ lɛ toi tete lɛ, ashi wiemɔ lɛ sɛɛ ni atsɔ yei lɛ ajeŋba nɔ ni nine ashɛ amɛnɔ.”—1 Petro 3:1.
11, 12. (a) Mɛɛ nyɔmɔwoo Kristofoi akpei abɔ ena, ni mɛni amɛfee dani amɛna? (b) Gbaa niiashikpamɔ ko ni tsɔɔ weku mli nyo ko ni awo lɛ nyɔmɔ yɛ anɔkwayeli ni ekɛmia ehiɛ lɛ hewɔ.
11 Mɛi akpei abɔ ebatsɔmɔ Yehowa Odasefoi yɛ nyɛsɛɛ afii fioo nɛɛ amli, yɛ nyɔji loo afii abɔ po ni amɛkɛte shi amɛwo amɛwekumɛi Odasefoi lɛ a-Kristofoi anitsumɔi aahu lɛ fɛɛ sɛɛ. Kwɛ nyɔmɔwoo ni enɛ ji kɛha Kristofoi ni etee nɔ amɛdamɔ shi shiŋŋ lɛ, kɛ jɔɔmɔ hu ni eji kɛha tsutsu shitee-kɛ-wolɔi lɛ! Kristofonyo onukpa ko ni eye afii 74 wie kɛ gbee ni henumɔ yɔɔ mli akɛ: “Midaa miŋa kɛ mibii ashi be fɛɛ be akɛ amɛkpɛtɛ anɔkwale lɛ he yɛ afii ni mikɛte shi miwo amɛ lɛ mli.” Ewie akɛ ekɛ kuɛŋtimɔ haaa eŋa hegbɛ ko kwraa ni ekɛ lɛ awie Biblia lɛ he po, afii etɛ sɔŋŋ. “Shi yoo lɛ tsɔ ŋaa gbɛ nɔ ni enine shɛ minɔ,” taakɛ ewie lɛ, “ni ebɔi mi odaseyeli beni ekɛ eniji shwishwiaa minaji ahe lɛ. Kwɛ bɔ ni midaa shi waa akɛ enijiaŋ ejeee wui yɛ mishitee-kɛ-woo lɛ hewɔ!”
12 Wu kroko hu ni te shi wo eweku lɛ ŋma akɛ: ‘Mibafee miŋa henyɛlɔ ni ehiii fe fɛɛ, ejaakɛ beni ebana anɔkwale lɛ sɛɛ lɛ, miwo ehe gbeyei, ni miwoɔ lɛ bei daa gbi; miitsɔɔ akɛ, mi ji mɔ ni jeɔ bei lɛ shishi be fɛɛ be. Shi fɛɛ fee efolo; miŋa kɛ ehe kpɛtɛ Biblia lɛ he. Enɛ hewɔ lɛ afii nyɔŋma-kɛ-enyɔ ho yɛ anɔkwale lɛ, kɛ miŋa kɛ mibi ni mikɛnɔɔ shɛii nɛɛ mli. Mibatsɔ tamɔ Abonsam ni ejie ehe kpo yɛ adesa gbɔmɔtso mli miha amɛyi enyɔ lɛ fɛɛ.’ Yɛ naagbee lɛ, nuu lɛ bɔi lɛ diɛŋtsɛ eshihilɛ he susumɔ. Etsɔɔ mli akɛ: ‘Mibana akɛ mikɛ mlifu miigba mihe naa yakatswaa. No hewɔ lɛ mikane Biblia lɛ, ni kɛtsɔ egbɛtsɔɔmɔ nɔ lɛ, amrɔ nɛɛ mitsɔ Odasefonyo ni abaptisi lɛ.’ Susumɔ ŋa lɛ nyɔmɔwoo kpele nɛɛ he okwɛ, hɛɛ, ákɛ eye ebua ‘kɛhere ewu lɛ yiwala’ kɛtsɔ anɔkwayeli ni ekɛmia ehiɛ yɛ eshitee-kɛ-woo lɛ mli aahu afii 12 sɔŋŋ lɛ nɔ!
Nii ni Wɔɔkase Kɛaajɛ Yesu Ŋɔɔ
13. (a) Mɛni ji nɔ titri ni esa akɛ wumɛi kɛ ŋamɛi akase kɛjɛ Yesu shihilɛ mli? (b) Mɛɛ gbɛ nɔ mɛi ni ewa waa kɛha amɛ akɛ amɛaaba amɛhe shi amɛha Nyɔŋmɔ suɔmɔnaa nii lɛ baanyɛ ana Yesu nɔkwɛmɔ nɔ lɛ he sɛɛ yɛ?
13 Nɔ titri ni esa akɛ wumɛi kɛ ŋamɛi akase kɛjɛ Yesu shihilɛ mli ji toiboo ni afeɔ ahaa Nyɔŋmɔ. Yesu kɛɛ: “Nɔ ni sa ehiɛ mifeɔ daa.” “Mitaooo nɔ ni mi diɛŋtsɛ misumɔɔ, shi moŋ nɔ ni Tsɛ lɛ ni tsu mi lɛ sumɔɔ.” (Yohane 5:30; 8:29) Be ko beni Yesu na akɛ Nyɔŋmɔ suɔmɔnaa nii pɔtɛɛ ko eŋɔɔɔ enaa lɛ, ebo toi. Esɔle akɛ: “Kɛji oosumɔ lɛ, jiemɔ kpulu nɛɛ kɛjɛ minɔ.” Shi ewie kɛfata he oya akɛ: “Shi kɛlɛ jeee bɔ ni mi misumɔɔ lɛ, shi moŋ bɔ ni bo osumɔɔ.” (Luka 22:42) Yesu ekɛɛɛ Nyɔŋmɔ akɛ etsake E-suɔmɔnaa nii; etsɔɔ akɛ esumɔɔ Nyɔŋmɔ lɛlɛŋ kɛtsɔ toiboo ni ekɛba ehe shi eha nɔ fɛɛ nɔ ni ji Nyɔŋmɔ suɔmɔnaa nii kɛha lɛ lɛ nɔ. (1 Yohane 5:3) Nyɔŋmɔ suɔmɔnaa nii ni wɔɔha eye klɛŋklɛŋ gbɛhe be fɛɛ be, taakɛ Yesu fee lɛ, he miihia waa kɛha omanyeyeli, jeee yɛ oshija shihilɛ pɛ mli, shi moŋ yɛ gbalashihilɛ kɛ weku shihilɛ hu mli. Susumɔ nɔ hewɔ ni enɛ ji nakai lɛ he okwɛ.
14. Te Kristofoi komɛi susuɔ nii ahe yɛ gbɛ ni ejaaa nɔ amɛhaa tɛŋŋ?
14 Taakɛ wɔna momo lɛ, kɛ heyelilɔi kɛ Nyɔŋmɔ ye klɛŋklɛŋ gbɛhe lɛ, amɛbɔɔ mɔdɛŋ akɛ amɛkɛ amɛhefatalɔi ni heee yeee lɛ aaahi shi, ni bei pii lɛ amɛnyɛɔ amɛyeɔ amɛbuaa amɛ ni amɛbafeɔ mɛi ni sa kɛha yiwalaheremɔ. Kɛ hefatalɔi lɛ fɛɛ ji heyelilɔi po lɛ, ekolɛ amɛgbalashihilɛ lɛ yeee emuu kɛmɔɔɔ shi. Yɛ esha henumɔi ahewɔ lɛ, jeee be fɛɛ be wumɛi kɛ ŋamɛi naa susumɔi ni suɔmɔ yɔɔ mli amɛhaa amɛhe. (Romabii 7:19, 20; 1 Korintobii 7:28) Mɛi komɛi yaa shɔŋŋ aahu po akɛ amɛbɔɔ mɔdɛŋ akɛ amɛaana hefatalɔ kroko, eyɛ mli akɛ amɛbɛ Ŋmalɛ naa nɔdaamɔ nɔ kɛha gbalamlitsemɔ. (Mateo 19:9; Hebribii 13:4) Amɛsusuɔ akɛ enɛ hi fe fɛɛ kɛha amɛ, ni Nyɔŋmɔ suɔmɔnaa nii akɛ wumɛi kɛ ŋamɛi afee ekome kɛhi shi lɛ wa kwraa tsɔ. (Maleaki 2:16; Mateo 19:5, 6) Ŋwanejee ko bɛ he akɛ enɛ feɔ adesai asusumɔi ni asusuɔ moŋ fe Nyɔŋmɔ nɔ̃ lɛ he nɔkwɛmɔ nɔ kroko.
15. Mɛni hewɔ Nyɔŋmɔ ni ahaa ebaa klɛŋklɛŋ lɛ ji hebuu lɛ?
15 Kwɛ hebuu nɔ̃ ni eji akɛ aaaha Nyɔŋmɔ aba klɛŋklɛŋ! Gbalashihilɛ mli hefatalɔi ni feɔ nakai lɛ baabɔ mɔdɛŋ ni amɛkɛ amɛhe ahi shi gbagbalii ni amɛsaa amɛnaagbai kɛtsɔ ŋaawoo ni yɔɔ Nyɔŋmɔ Wiemɔ lɛ mli lɛ kɛ nitsumɔ nɔ. Kɛtsɔ nakai feemɔ nɔ lɛ, amɛtsiɔ amɛhe kɛjɛɔ tsui-kuumɔ ni baa kɛji aku hiɛ afɔ̃ esuɔmɔnaa nii anɔ lɛ he. (Lala 19:8-12) Enɛ he nɔkwɛmɔ nɔ ji gbalashihilɛ mli hefatalɔi komɛi ni darako tsɔ̃, ni beni amɛgbala lɛ mli heɔ atse lɛ, amɛkpɛ amɛyiŋ akɛ amɛkɛ Biblia mli ŋaawoo baatsu nii lɛ ashihilɛ. Afii komɛi asɛɛ beni ŋa lɛ susuɔ miishɛɛ ni ena yɛ egbalashihilɛ lɛ mli lɛ he lɛ, ewie akɛ: “Kɛ misusu he akɛ kulɛ mikɛ miwu teŋ egbala yɛ afii babaoo ni eho nɛɛ amli fɛɛ lɛ, minuɔ he akɛ esa akɛ mata shi ni mafo waa. Shi misɔleɔ mihaa Yehowa Nyɔŋmɔ ni midaa lɛ shi yɛ eŋaawoo kɛ gbɛtsɔɔmɔ ni ha wɔfee ekome ekoŋŋ yɛ miishɛɛ wekukpaa ni tamɔ nɛkɛ mli lɛ he.”
Wumɛi, Ŋamɛi—Nyɛkasea Kristo!
16. Mɛɛ nɔkwɛmɔ nɔ Yesu fee efɔ shi eha wumɛi kɛ ŋamɛi fɛɛ?
16 Yesu, ni haa Nyɔŋmɔ baa klɛŋklɛŋ be fɛɛ be lɛ, fee nɔkwɛmɔ nɔ fɛfɛo efɔ shi eha wumɛi kɛ ŋamɛi fɛɛ, ni amɛaafee jogbaŋŋ akɛ amɛaabo toi jogbaŋŋ. Awoɔ wumɛi hewalɛ ni amɛkase bɔ ni Yesu tsuɔ yitsoyeli ni suɔmɔ yɔɔ mli he nii yɛ Kristofoi asafo lɛ mli bii anɔ lɛ. (Efesobii 5:23) Ni ŋamɛi Kristofoi baanyɛ akase nii kɛjɛ Yesu heshibaa ni efeɔ ehaa Nyɔŋmɔ lɛ he nɔkwɛmɔ nɔ ni eye emuu lɛ mli.—1 Korintobii 11:3.
17, 18. Mɛɛ gbɛi anɔ Yesu fee nɔkwɛmɔ nɔ fɛfɛo eha wumɛi yɛ?
17 Biblia lɛ kɛ famɔ haa akɛ: “Nyɛ wumɛi lɛ, nyɛsumɔa nyɛ diɛŋtsɛ nyɛŋamɛi, taakɛ bɔ ni Kristo sumɔ asafo lɛ ni eŋɔ lɛ diɛŋtsɛ ehe eha yɛ ehewɔ [lɛ].” (Efesobii 5:25) Gbɛ ni he hiaa ni Yesu tsɔ nɔ ejie esuɔmɔ kpo kɛha esafo ni ji esɛɛnyiɛlɔi lɛ ji amɛnaanyo ni bɛŋkɛ amɛ kpaakpa ni eji lɛ. “Shieŋtsɛmɛi mitsɛ nyɛ,” Yesu kɛɛ, “ejaakɛ nii fɛɛ ni minu yɛ mi-Tsɛ naa lɛ, mitsĩ tã mikɛɛ nyɛ.” (Yohane 15:15) Susumɔ be babaoo ni Yesu ye ni ekɛ ekaselɔi lɛ wie—sanegbaai pii, babaoo ni ekɛ amɛ ná—kɛ hekɛnɔfɔɔ ni ená yɛ amɛmli lɛ he okwɛ! Ani jeee nɔkwɛmɔ nɔ ni hi jogbaŋŋ kɛha wumɛi nɛ?
18 Yesu ná ekaselɔi lɛ ahe miishɛɛ diɛŋtsɛ ni ejie anɔkwa suɔmɔ kpo etsɔɔ amɛ. (Yohane 13:1) Kɛ etsɔɔmɔi lɛ efeee faŋŋ kɛhaaa amɛ lɛ, enaa be ni ekɛ tsuishitoo gbalaa nibii amli jogbaŋŋ ehaa amɛ yɛ teemɔŋ. (Mateo 13:36-43) Wumɛi, ani nyɛŋamɛi amumɔŋ shihilɛ kpakpa namɔ he hiaa nyɛ waa nakai nɔŋŋ? Ani onaa be ohaa yoo lɛ, ni okwɛɔ akɛ nyɛyi enyɔ lɛ fɛɛ nyɛha Biblia mli anɔkwalei lɛ efee faŋŋ yɛ nyɛjwɛŋmɔi kɛ tsuii amli? Yesu fata ebɔfoi lɛ ahe yɛ sɔɔmɔ nitsumɔ lɛ mli, ni ekolɛ etsɔse amɛteŋ mɔ fɛɛ mɔ aŋkroaŋkro. Ani ofataa oŋa he yɛ sɔɔmɔ nitsumɔ lɛ mli, ni okɛ lɛ naa gbɛfaŋnɔ yɛ shia-kɛ-shia saramɔi kɛ Biblia mli nikasemɔi afeemɔ mli?
19. Mɛɛ gbɛ nɔ bɔ ni Yesu tsu ebɔfoi lɛ agbɔjɔmɔi ni jeɔ kpo yɛ be kɛ bei amli lɛ he nii lɛ feɔ nɔkwɛmɔ nɔ kɛhaa wumɛi yɛ?
19 Beni etsuɔ emuu ni ebɔfoi lɛ yeee lɛ he nii lɛ titri mli ni Yesu fee nɔkwɛmɔ nɔ ni hi fe fɛɛ eha wumɛi. Beni ekɛ ebɔfoi lɛ yeɔ naagbee niyenii lɛ, enyɛ ena akɛ akaŋshii mumɔ miite shi yɛ amɛteŋ ekoŋŋ. Ani ewie amɛhiɛ nyanyaanya? Dabi, shi moŋ ekɛ heshibaa fɔ amɛteŋ mɔ fɛɛ mɔ naji ahe. (Marko 9:33-37; 10:35-45; Yohane 13:2-17) Ani onaa tsuishitoo ni tamɔ nakai ohaa oŋa? Yɛ nɔ najiaŋ ni ooowie gbɔjɔmɔ ko ni jeɔ kpo be fɛɛ be lɛ he lɛ, ani okɛ tsuishitoo bɔɔ mɔdɛŋ akɛ oooye obua lɛ, ni otsɔɔ nɔkwɛmɔ nɔ feemɔ nɔ oshɛɔ etsui he? Ŋamɛi baahere suɔmɔ kɛ mlihilɛ kpojiemɔ ni tamɔ nɛkɛ nɔ, taakɛ naagbee lɛ, bɔfoi lɛ fee lɛ.
20. Mɛni esaaa ni ŋamɛi Kristofoi ahiɛ kpaa nɔ, ni namɔ akɛfeɔ nɔkwɛmɔ nɔ ahaa amɛ?
20 Esa akɛ ŋamɛi hu akase Yesu, mɔ ni hiɛ kpaaa nɔ akɛ “Kristo yitso ji Nyɔŋmɔ” lɛ. Ebaa ehe shi ehaa eŋwɛi Tsɛ lɛ be fɛɛ be. Nakai nɔŋŋ, esaaa akɛ ŋamɛi hu hiɛ kpaa nɔ akɛ “wu lɛ ji ŋa lɛ yitso,” hɛɛ, ákɛ amɛwumɛi ji amɛyitsei. (1 Korintobii 11:3; Efesobii 5:23) Bɔfo Petro wo ŋamɛi Kristofoi hewalɛ ni amɛkase “yei krɔŋkrɔŋi” ni hi shi blema lɛ anɔkwɛmɔ nɔ lɛ, titri lɛ Sara, mɔ ni “bo Abraham toi, ni etsɛ lɛ ‘nuntsɔ’ tete lɛ. ”—1 Petro 3:5, 6.
21. Mɛni hewɔ Abraham kɛ Sara gbalashihilɛ ye omanye, shi Lot kɛ eŋa nɔ lɛ yeee omanye lɛ?
21 Eka shi faŋŋ akɛ Sara ŋmɛɛ maŋtiase mli shia shihilɛ ni ŋɔɔ lɛ he ni eyahi shi yɛ buui amli yɛ maŋsɛɛ shikpɔŋ nɔ. Mɛni hewɔ? Ani akɛni eesumɔ nakai shihilɛ hewɔ? Enyɛŋ efee akɛ no hewɔ. Akɛni ewu kɛɛ eha ni amɛya lɛ hewɔ? Ŋwanejee ko bɛ he akɛ enɛ baanyɛ afee oti kome hewɔ, ejaakɛ Sara sumɔɔ Abraham ni ebuɔ lɛ yɛ e-Nyɔŋmɔ gbeyeishemɔ sui lɛ ahewɔ. (1 Mose 18:12) Shi yiŋtoo titri hewɔ ni efata ewu he kɛtee lɛ ji suɔmɔ ni eyɔɔ kɛha Yehowa, kɛ etsui mli ni ejɛɔ esumɔɔ akɛ eeenyiɛ Nyɔŋmɔ gbɛtsɔɔmɔ sɛɛ lɛ. (1 Mose 12:1) Ena Nyɔŋmɔ toiboo he miishɛɛ. Nɔ ni tamɔɔɔ nakai lɛ, Lot ŋa shashao shi akɛ eeefee Nyɔŋmɔ suɔmɔnaa nii, ni no ha ekɛ akɔnɔ kwɛ nibii ni eshiɔ yɛ esɛɛ yɛ emaŋ ni ji Sodom lɛ. (1 Mose 19:15, 25, 26; Luka 17:32) Kwɛ bɔ ni nakai gbalashihilɛ lɛ ba naagbee yɛ amanehulu mli—yɛ Nyɔŋmɔ nɔ toi ni yoo lɛ gbo lɛ hewɔ!
22. (a) Mɛɛ he kaa-kɛ-kwɛmɔ weku mli bii baajɛ nilee mli amɛfee? (b) Mɛni he wɔbaasusu yɛ wɔ nikasemɔ ni nyiɛ sɛɛ lɛ mli?
22 No hewɔ lɛ, akɛ wu loo ŋa lɛ, ehe miihia waa ni obi ohe akɛ, ‘Ani Nyɔŋmɔ baa klɛŋklɛŋ yɛ wɔweku lɛ mli? Ani mibɔɔ mɔdɛŋ lɛlɛŋ akɛ matsu weku mli gbɛnaa nii ni Nyɔŋmɔ kɛha mi lɛ he nii? Ani mikɛ anɔkwayeli bɔɔ mɔdɛŋ akɛ masumɔ mihefatalɔ lɛ ni maye mabua lɛ ni ena loo ehiɛ ekɛ Yehowa teŋ wekukpaa kpakpa mli be fɛɛ be?’ Gbekɛbii yɛ wekui pii amli. Nɔ ni wɔbaasusu he kɛtsa enɛ nɔ ji fɔlɔi anitsumɔ, kɛ bɔ ni ehe hiaa ni amɛyi enyɔ lɛ fɛɛ kɛ amɛbii lɛ hu aha Nyɔŋmɔ aba klɛŋklɛŋ.
Ani Okaiɔ?
◻ Mɛni baanyɛ ajɛ Yesu tsɔɔmɔi lɛ amli aba kɛha wekui babaoo?
◻ Mɛɛ nyɔmɔwoo Kristofoi akpei abɔ ni edamɔ shi shiŋŋ lɛ ena?
◻ Mɛni baaye abua hefatalɔi ni amɛtsi amɛhe kɛjɛ jeŋba shara kɛ gbalamlitsemɔ he?
◻ Mɛni wumɛi baanyɛ akase kɛjɛ Yesu nɔkwɛmɔ nɔ lɛ mli?
◻ Mɛɛ gbɛ nɔ ŋamɛi baatsɔ aye abua kɛha gbalashihilɛ ni miishɛɛ yɔɔ mli?
[Mfoniri ni yɔɔ baafa 10]
Mɛni Sara fee ni eha egbalashihilɛ lɛ ye omanye lɛ?