Nyɛdamɔa Shi Shiŋŋ Nyɛshia Satan Ŋaa Nitsumɔi Lɛ!
“Nyɛwoa tawuu nii ni Nyɔŋmɔ kɛhaa lɛ fɛɛ, bɔni afee ni nyɛnyɛ nyɛdamɔ shi shiŋŋ nyɛshi Abonsam nitsumɔi lɛ”—EFESOBII 6:11, The New English Bible
1. Mɛɛ shihilɛ mli Kristofoi ni hiɔ shi yɛ amɛ hegbɛi anaa lɛ yɔɔ?
1 YEHOWA ODASEFOI ni amɛjɔɔ amɛhe nɔ ni hiɔ shi yɛ hegbɛi ni ámɛna lɛ naa lɛ nɛɛ mumɔŋ paradeiso mli ŋɔɔmɔ. Yɛ be mli ni etsɔɔ amɛ ŋmɛnɛŋmɛnɛ gbii nɛɛ amli shihilɛ lɛ mli yɛ gbalɛ naa lɛ, Nyɔŋmɔ gbalɔ Yesaia ŋma akɛ: “Ni kojomɔ aaahi shi yɛ ŋa lɛ nɔ, ni jalɛ hu aaahe shi yɛ abɔɔ lɛŋ. Ni nii ni jalɛ lɛ aaatsu ji hejɔlɛ, ni jalɛ lɛ mli sɛɛnamɔ ji jɔɔmɔ kɛ toiŋjɔlɛ kɛaatee naanɔ.”—Yesaia 32:16, 17.
2. Mɛni hewɔ esa akɛ wɔha wɔhiɛ ahi wɔhe nɔ yɛ be fɛɛ mli lɛ?
2 Bɔni afee ni wɔhiɛ miishɛɛ shihilɛ nɛɛ mli lɛ, esa akɛ wɔtsɔmɔ bulɔi ni wɔhiɛ ahi wɔhe nɔ yɛ be fɛɛ mli ejaakɛ Satan Abonsam nyɛ̃ɛɔ wɔ mumɔŋ shihilɛ he ni miishɛɛ kɛ shweremɔ yɔɔ mli lɛ. Ákɛ Gog ni jɛ Magog lɛ, etsɛŋ ni ebaafa kɛba Yehowa webii lɛ anɔ ni ebatutua amɛ. (Ezekiel 38:8-12) Shi no etsɔɔɔ akɛ etsumɔ nɔ ko kwraa bianɛ Yɛ anɔkwale mli lɛ, akɛni ele akɛ be ni eyɔɔ lɛ faaa hewɔ lɛ, emli efu Yehowa tsuji babaoo ŋmɛnɛ fe be fɛɛ—Kpojiemɔ 12:12, 17.
3. Mɛni hewɔ Satan mli ewo la ewo Yehowa tsuji lɛ?
3 Satan ji mɔ ni yeɔ adesai ni ejaaa lɛ aje nɛɛ nɔ. (Efesobii 2:1, 2; 1 Yohane 5:19) Mɛnɛɛmɛi fɛɛ damɔ emasɛi yɛ jeŋ muu fɛɛ maŋtsɛyeli he sane kpele ni ka shi lɛ mli. Amɛkɛ hetoo diɛŋtsɛ miiha yiŋkɔshikɔshi-feemɔ ni Satan kɛba ákɛ ani adesai komɛi baanyɛ ahiɛ amɛ emuuyeli mli amɛha Yehowa Nyɔŋmɔ lo lɛ. (Abɛi 27:11) Ni ákɛ Kristofoi fioo ko miiha aale Abonsam akɛ yaka hepupuulɔ kɛ amalelɔ ni eba shi lɛ woɔ emli la. No hewɔ lɛ ekɛ eŋaa nitsumɔi sɔrɔtoi lɛ fɛɛ, eŋaalee fɛɛ ni etsɔ̃ ni eyɔɔ lɛ tsuɔ nii koni ekɛye nɛkɛ Yehowa tsuji anɔkwafoi nɛɛ anɔ. No hewɔ lɛ, “jeee heloo kɛ lá wɔkɛna nɔmɔ lɛ, shi moŋ wɔkɛ mumɔi fɔji asafoi ni yɔɔ ŋwɛiniiaŋ lɛ.”—Efesobii 6:12.
4. Mɛni hewɔ esa akɛ wɔtsu nii waa ni wɔkɛye wɔgbɔjɔmɔi anɔ lɛ?
4 No hewɔ lɛ, ooofee jogbaŋŋ akɛ ooobi ohe akɛ, ‘Te mafee tɛŋŋ madamɔ shi shiŋŋ mashi nɛkɛ Henyɛlɔ ni yɔɔ hewalɛ nɛɛ?’ Taakɛ wɔna lɛ, ekɛ heloo ni egbee shi lɛ gbɔjɔmɔi tsɔɔ Kristofoi tsɔne. Ekolɛ, wɔ diɛŋtsɛ lɛ wɔbɛ gbɔjɔmɔ ni ji anihao loo hejɔ, shi wɔbaanyɛ wɔfee henɔwolɔi Ekolɛ wɔkɛ wɔhe wooo miishɛjemɔ mli vii, shi wɔbaanyɛ wɔfee hiɛjoolɔi yɛ heloo gbɛfaŋ nibii amli. No hewɔ lɛ ehe miihia ni wɔtsu nii waa ni wɔye wɔgbɔjɔmɔi anɔ, wɔte shi wɔwo Abonsam koni ejo wɔnaa foi.—Yakobo 4:7.
Wɔ Mumɔŋ Tawuu Nii Lɛ
5. Mɛɛ yiŋtoo hewɔ ehe hiaa ni wɔwo Nyɔŋmɔ tawuu nii lɛ fɛɛ lɛ?
5 Wo Henyɛlɔ lɛ yaa nɔ ekɛ eŋaa nitsumɔi lɛ nɔŋŋ tsuɔ nii shii abɔ. No hewɔ lɛ, kɛ wɔkase Nyɔŋmɔ Wiemɔ lɛ wɔhiɛ baanyɛ ahi wɔhe nɔ yɛ Satan ŋaa nitsumɔi ni ekɛtsu nii kɛjɛ Biblia bei amli aahu lɛ nɔ. Wɔbaanyɛ wɔkase bɔ ni wɔɔfee wɔdamɔ shi shiŋŋ wɔshi lɛ. Bɔfo Paulo ŋma akɛ: “Nyɛwoa Nyɔŋmɔ tawuu nii lɛ fɛɛ, koni nyɛnyɛ Abonsam ŋaatsɔɔi lɛ anaa nyɛdamɔ.” Ewo ŋaa hu akɛ: “Nyɛhiɛa Nyɔŋmɔ tawuu nii lɛ fɛɛ mli, koni nyɛnyɛ gbi fɔŋ lɛ naa nyɛkpee, ni beni nyɛgbe fɛɛ naa lɛ, ni nyɛwo shidaamɔ.” Kadimɔ akɛ Paulo miima “Nyɔŋmɔ tawuu nii lɛ fɛɛ” ni wɔɔwo lɛ nɔ mi. Ebaafee nɔ ni oshara yɔɔ mli akɛ wɔɔshi tawuu nii ni jɛ ŋwɛi nɛɛ ekome ni wɔwooo wɔfataaa he, ejaakɛ Satan baana, ni he ni egbɔjɔ nɛɛ ebaatutua. Enɛ baanyɛ aye wɔ wui yɛ mumɔŋ.—Efesobii 6:11, 13.
6. ‘Anɔkwale lɛ ni wɔkɛaafi wɔhɛ’ lɛ biɔ mɛni yɛ wɔdɛŋ?
6 Bɔfo lɛ je shishi kɛtsɔ hewalɛ ni ewo wɔ nɛɛ nɔ: “No hewɔ lɛ nyɛdamɔa shi, ni nyɛkɛ anɔkwale afia nyɛhe.” (Efesobii 6:14) Blema tawuu mli mlifii nɔ̃ lɛ ji too wolo ko ni akɛfiɔ hɛ. Yɛ be babaoo mli lɛ akɛ dadei bibii komɛi etara mli, ni enɛ buɔ mɔ ni kɛfi emli lɛ he. Agbɛnɛ tabilɔ lɛ nyɛɔ ekɛ eklante loo tsi ni ehiɛ tsɛɔ mli. No hewɔ lɛ, ní Kristofonyo kɛ anɔkwale aaafi ehɛ lɛ tsɔɔ mɛni? Ni wɔkɛ Nyɔŋmɔ Wiemɔ lɛ mli anɔkwale lɛ aaafi wɔmli lɛ tsɔɔ akɛ wɔhiɛ mli kpɛŋŋ, no hewɔ lɛ wɔnyɛɔ wɔkɛ Ŋmalɛ lɛ tsuɔ nii ni wɔkɛhaa sanebimɔi ahetoo. Taakɛ tawuu mli mlifii nii Iɛ ji hebuu nii lɛ, nakai nɔŋŋ anɔkwale lɛ aaaha wɔna hekɛnɔfɔɔ koni wɔtere wɔjatsũi ni ebaabu wɔhe hu. Yɛ anɔkwale mli lɛ, kɛ wɔha wɔjwɛŋmɔ hi Nyɔŋmɔ anɔkwalei lɛ anɔ lɛ, eeeye ebua wɔ nii wɔdamɔ shi shiŋŋ wɔshi Satan.
7. “Nyɛwoa jalɛ dama” lɛ tsɔɔ mɛni yɛ wɔgbɛfaŋ?
7 Nɔ ni nyiɛ sɛɛ lɛ, bɔfo lɛ kɛɔ wɔ ni wɔwo ‘jalɛ dama lɛ.’ (Efesobii 6:14) Yɛ Biblia bei amli lɛ, nɔ ni akɛfeɔ dama lɛ ji dade totoi, dade gai loo kɔsɔŋkɔsɔ aloo dade diɛŋtsɛ, ni enɛ buɔ tsui lɛ he titri. Kɛ wɔwo nɛkɛ jalɛ dama nɛɛ lɛ, belɛ no tsɔɔ akɛ esa akɛ yɛ nɔ fɛɛ nɔ sɛɛ lɛ, ‘wɔbu wɔtsuii ahe.’ (Abɛi 4:23) Nakai gbɛ nɔ pɛ wɔɔtsɔ wɔdamɔ shi shiŋŋ wɔshi Satan kɛtsɔ kanyamɔ ni aaakanya wɔ ni wɔsɔmɔ Yehowa ni wɔhi shi yɛ hetsemɔ mli bɔ ni no aaaha wɔfee mɛi ni jeŋba he muji ko ni aaaha wɔbule Yehowa webii bɛ wɔhe.—1 Petro 1:14-16.
8. Mɛni yɔɔ “hejɔlɛ sanekpakpa lɛ saamɔ-kɛ-too” ni ‘wɔkɛaawo wɔnaji’ lɛ mli aloo mɛni no tsɔɔ?
8 Paulo tsi ta hu akɛ, wɔkɛ ‘hejɔlɛ sanekpakpa lɛ he saamɔ-kɛ-too awoa wɔnaji.’ (Efesobii 6:15) Te enɛ tsɔɔ tɛŋŋ? Ákɛ, wɔfee mɛi ni bɛ deka kwraa yɛ Maŋtsɛyeli lɛ he sane lɛ shiɛmɔ mli, yɛ toiŋjɔlɛ mli, taakɛ Yesu fa sanekpakpa jajelɔi 70 lɛ: “Shia fɛɛ shia ni nyɛaabote lɛ, klɛŋklɛŋ lɛ nyɛkɛɛa akɛ: Hejɔlɛ aba shia nɛɛ!” (Luka 10:5) Wɔbaaa ni wɔkɛ gbɔmɛi abaje ŋwane. Shi moŋ, wɔkɛ miishɛjemɔ, nyamɔ, jwɛŋmɔŋ toiŋjɔlɛ kɛ hiɛnɔkamɔ miiba abaha amɛ.’ Satan baasumɔ ni etee shitee-kɛwoo kɛ nɔmɔ shi yɛ toibolɔi komɛi amli koni eha wɔha hetoo yɛ nakai gbɛ nɔ nɔŋŋ. No hewɔ lɛ, kɛ́ wɔɔdamɔ shi shiŋŋ wɔshi Satan ŋaatsɔɔ lɛ, ehe miihia ni wɔkɛ ŋaa kɛ tsuishitoo atsu nii, koni ‘wɔtsɔmɔ nɔ fɛɛ nɔ wɔha gbɔmɛi fɛɛ.’—1 Korintobii 9:19-23.
9. Te blema damai kɛ gaimlbii ni tsoɔ lɛ yɔɔ tɛŋŋ?
9 Yɛ be mli ni eyaa nɔ lɛ, bɔfo lɛ wo ŋaa akɛ: “Nyɛhiɛa hemɔkɛyeli tsɛŋ lɛ mli, nɔ ni nyɛkɛaanyɛ mɔ fɔŋ lɛ gaimlibii ni tsoɔ lɛ fɛɛ nyɛgbe lɛ.” (Efesobii 6:16) Hela wiemɔ ni akɛtsu nii yɛ biɛ akɛ “tsɛŋ” lɛ tsɔɔ nɔ ni da bɔ ni eeenyɛ eha gbɔmɔtso muu lɛ fa titri he. Yɛ “gaimlibii ni tsoɔ” lɛ he lɛ, Romabii lɛ feɔ gai ko ni atsɛ́ɔ ni fɔlɔ ka mli ni la nibii ni tsoɔ hɔlɔ mli yɛ bei komɛi amli. Eka shi faŋŋ akɛ Paulo miitsɔɔ nɛkɛ gai ni tsoɔ kɛ la nɛɛ.
10. Mɛni Satan kɛtsuɔ nii akɛ “gaimlibii ni tsoɔ”?
10 Satan kɛ “gaimlibii ni tsoɔ” nɛɛ sɔrɔtoi tsɛɔ Kristofoi lɛ. “Gaimlibii” nɛɛ ekomɛi ji hefɛoyeli, heguɔgbee kɛ Nyɔŋmɔ webii lɛ agbɛi ni amɛhenyɛlɔi lɛ fiteɔ. Nɛkɛ “gaimlibii” nɛɛ ekomɛi baanyɛ afee mɔdɛŋ ni mɛi komɛi bɔɔ koni amɛje Kristofoi tabilɔi nɛɛ anijiaŋ wui akɛni ekolɛ nɔ ni jɛɔ amɛ sɔɔmɔ nitsumɔ lɛ mli baa lɛ faaa aloo nyɛ ni amɛnyɛɛɛ amɛyɛ amɛ heloo mli gbɔjɔmɔi lɛ anɔ kunim hewɔ. Nɔ ni fatahe hu ji wiemɔi ni wa, wiemɔ fɔŋ kɛ wiemɔi ni bɛ mli ni aweɔ yɛ amɛhe. Eshɛɔ be ni Satan yeɔ Kristofoi awui kɛtsɔɔ je lɛŋ nilee koni amɛtaoɔ mli amɛle kɛtsɔ ŋkunyaayeli loo gbɔmɔ adesa shishijee kɛ enaagbee he nilee ni ataoɔ akɛ aaale lɛ nɔ. Esa akɛ otsi ohe kɛjɛ “Satan bui ni mli kwɔ” lɛ ahe. Ani ofeɔ nakai?—Kpojiemɔ 2:24.
11. Wɔ mumɔŋ dama lɛ dalɛ kɛ ehilɛ damɔ mɛni nɔ?
11 Kɛ wɔɔnyɛ wɔbu wɔtsuii ahe kɛjɛ Satan “gaimlibii ni tsoɔ” lɛ ahe lɛ, belɛ ehe miihia ni wɔna hemɔkɛyeli tsɛŋ ni da ni wa. Bɔ ni edalɛ aaafee kɛ bɔ ni ewa ha ni gai ko nyɛŋ atsɔ mli lɛ damɔ wɔ diɛŋtsɛ wɔnɔ titri. Wɔbaanyɛ wɔna hebuu ni he hiaa lɛ yɛ bei abɔ ni wɔheɔ wɔkɛfeɔ wɔ diɛŋtsɛ wɔteemɔŋ Biblia kasemɔ, wɔkɛjwɛŋɔ Nyɔŋmɔ Wiemɔ lɛ nɔ ni wɔkɛ wɔnanemɛi Yehowa odasefoi lɛ kpeɔ lɛ. Shi ehe miihia ni wɔkɛ nɔ ni wɔkaseɔ lɛ atsu nii, ejaakɛ “hemɔkɛyeli ni nitsumɔi bɛ he Iɛ ji hemɔkɛyeli gbonyo.” (Yakobo 2:26) No hewɔ lɛ, gbɛi ni hi fe fɛɛ ni wɔɔtsɔ nɔ wɔha wɔhemɔkɛyeli lɛ ada ni wɔha emli awa, ni no hewɔ lɛ wɔnyɛ wɔdamɔ shi shiŋŋ lɛ ateŋ ekome ji ni wɔmia wɔhiɛ, diɛŋtsɛ ni wɔtɛo hemɔkɛyeli yɛ mɛi krokomɛi amli.
12. Mɛni ji wɔ mumɔŋ dadefai lɛ, ni mɛɛ sɛɛnamɔ enɛ ji kɛha wɔ?
12 Paulo tee nɔ akɛ: “Ni walaheremɔ dadefai lɛ hu nyɛbua.” (Efesobii 6:17) Yɛ blema bei amli lɛ, akɛ jwɛi ko feɔ nɛkɛ faii nɛɛ ekomɛi, ekrokomɛi hu yɛ ni akɛ mama ni akɛ odonti ehɔlɔ mli feɔ, aloo ekomɛi yɛ ni akɛ too hewolo feɔ, ni ekomɛi hu yɛ ni akɛ dadei feɔ. (1 Samuel 17:38) Shi mɛni akɛfee wɔmumɔŋ fai lɛ? Paulo kɛɛ Tesalonika Kristofoi lɛ akɛ: “Nyɛhaa wɔhiɛ akaa shi, . . . ni wɔbumɔ dadefai ni ji yiwalaheremɔ nɔhiɛkamɔ lɛ.” (1 Tesalonikabii 5:8) Hɛɛ, hiɛnɔkamɔ baanyɛ abu wɔbe lɛlɛŋ kɛjɛ Satan kɛ esamaŋfoi lɛ atswɛrɛmaa kɛ amɛ klantei anaa baamɔ lɛ he. “Hiɛnɔkamɔ” ni wa ni damɔ Biblia lɛ nɔ lɛ “wooo mɔ hiɛgbele.” (Romabii 5:5) Hiɛnɔkamɔ ni tamɔ nɛkɛ baabu wɔbe kɛjɛ heloo gbɛfaŋ nibii asɛɛdii he lakamɔ he, ejaakɛ ebaakanya wɔ ni wɔtao Nyɔŋmɔ Maŋtsɛyeli lɛ tsutsu.—Mateo 6:33; Luka 12:31.
13. Mɛni ji “mumɔŋ klante” lɛ, ni mɛni ji esɛɛnamɔ?
13 Yɛ naagbee lɛ, wɔbaa wɔtawuu nii lɛ ekome ni wɔkɛtutuaa henyɛlɔ lɛ he, “mumɔŋ klante” lɛ. (Efesobii 6:17) Hela wiemɔ kɛha klante yɛ biɛ lɛ tsɔɔ klante kuku ni tamɔ dukpei, ni tsɔɔ ta ni mɛi enyɔ ni bɛŋkɛ amɛhe ni naa amɛhe kɛ klante wuɔ. Wɔbaanyɛ wɔtsɔ Nyɔŋmɔ Wiemɔ lɛ he anɔkwale nilee nɔ wɔbamɔ ni wɔfolɔ apasa tsɔɔmɔi amli, ni wɔkpa bɔ ni jwɛŋmɔ bɛ mli kwraa ha lɛ he mama, ni titri lɛ, bɔ ni ekɛ Ŋmalɛ Krɔŋkrɔŋ lɛ kpaaa kwraa lɛ hewɔ. (2 Korintobii 10:4) Wɔkɛ henɔwomɔ efeee enɛ, shi moŋ wɔkɛ heshibaa kɛ suɔmɔ kɛha Nyɔŋmɔ, anɔkwale lɛ kɛ wɔnaanyo gbɔmɔ feɔ. Yɛ miishɛɛ mli lɛ, yɛ anɔkwale Kristofoi awoji lɛ yelikɛbuamɔ naa lɛ, wɔbaanyɛ “wɔmɔ anɔkwale wiemɔ lɛ mli waa.”—Filipibii 2:16, NW.
Kristofoi Asui Kpakpai Akɛ Nibii ni Yeɔ Buaa
14. (a) Mɛni hewɔ wɔbɛ nɔ ko ni wɔɔdamɔ nɔ wɔfee mɛi ni wóɔ amɛhe nɔ lɛ? (b) Mɛni hewɔ ehe hiaa ni wɔba wɔhe shi koni wɔnyɛ wɔdamɔ shi shiŋŋ wɔshi Satan?
14 Kɛfata wɔmumɔŋ tawuu nii lɛ ahe lɛ, Kristofoi asubaŋi hu baaye abua wɔ ni wɔnyɛ wɔdamɔ shi shiŋŋ wɔshi Abonsam. Akɛni Satan gbalaa jwɛŋmɔ kɛyaa henɔwomɔ nɔ hewɔ lɛ, heshibaa ni wɔyɔɔ kɛ jwɛŋmɔŋ hiɛshikamɔ mumɔ baaye abuɔ wɔ yɛ ta ni wɔwuɔ wɔshiɔ lɛlɛ mli. Yɛ anɔkwale mli lɛ esaaa akɛ Kristofonyo ko “buɔ lɛ diɛŋtsɛ ehe tuutu fe bɔ ni sa akɛ ebuɔ ehe.” Beni wɔfee nɔ fɛɛ nɔ ni akɛwo wɔdɛŋ lɛ wɔgbe naa lɛ, esa akɛ wɔnyɛ wɔkɛɛ akɛ: “Tsuji ni he bɛ sɛɛnamɔ ko ji wɔ; nɔ ni ji wɔgbɛnaa akɛ wɔtsuɔ lɛ, no pɛ wɔtsu nɛɛ.” Kɛfata he lɛ Nyɔŋmɔ duromɔ he miihia wɔ koni wɔnyɛ wɔdamɔ shi shiŋŋ wɔshi Satan, ni dani wɔɔnyɛ wɔfee nakai lɛ esa akɛ wɔba wɔhe shi, ejaakɛ “Nyɔŋmɔ lɛ, ekuɔ hewolɔi anaa, shi heshibalɔi eduroɔ.”—Romabii 12:3; Luka 17:10: Yakobo 4:6.
15. Mɛɛ sɛɛnamɔ yɔɔ henɔyeli he ye shidaamɔ shiŋŋ lɛ mli?
15 Henɔyeli ji Kristofoi asubaŋ kroko ni baanyɛ aye ebua wɔ ni wɔdamɔ shi shiŋŋ wɔshi Satan. Kɛ wɔnyɛɛɛ wɔhenumɔi tamɔ mlifu, aloo wɔhe ni wɔkɛwoo niyeli, ninumɔ aloo bɔlɛnamɔ mli tuutu lɛ anɔ wɔye lɛ, ebaaha wɔfee mɛi ni Abonsam baanyɛ atutua wɔ ni ekudɔ wɔ. Beni wɔba wɔjeŋ sa “yɛ wɔ heloo akɔnɔi lɛ amli” lɛ, no mli lɛ wɔnyiɛ diɛŋtsɛ “yɛ je nɛŋ su lɛ naa, yɛ kɔɔyɔɔ mli hewalɛ lɛ nɔ lumɔ lɛ [Satan Abonsam] ni ji mumɔ ni tsuɔ nii ŋmɛnɛŋmɛnɛ yɛ toigbele bii amli lɛ naa.” (Efesobii 2:1-3) Kɛ wɔha pɛsɛmkunya susumɔi ni ejaaa kɛ henumɔi ye wɔnɔ lɛ, belɛ wɔbaabote oshara ni aaaha Abonsam atsɔ wɔ tsɔne ni wɔfee esuɔmɔnaa nii lɛ mli. (2 Timoteo 2:26) Kɛ wɔɔnyɛ wɔdamɔ shi shiŋŋ wɔshi lɛ lɛ, belɛ esa akɛ wɔye wɔsusumɔi kɛ wɔhenumɔi kɛ agbɛnɛ wɔwiemɔi kɛ wɔnifeemɔi anɔ. Esɔ akɛ wɔtsɔse wɔjwɛŋmɔ koni ejwɛŋ sui kpakpai, nibii ni ja, nibii ni he tse kɛ nibii ni asumɔɔ lɛ ahe.—Filipibii 4:8.
16. Mɛni hewɔ suɔmɔ ni pɛsɛmkunya bɛ mli baanyɛ aye abaa wɔ ni wɔdamɔ shi shiŋŋ?
16 Suɔmɔ ni pɛsɛmkunya bɛ mli titri ji nɔ ni baaye abuɔ wɔ ni wɔdamɔ shi shiŋŋ wɔshi Satan Abonsam. Ehe yɛ oya yɛ pɛsɛmkunya su ko ni eeena yɛ wɔmli lɛ he nitsumɔ mli. Bei abɔ ni suɔmɔ ni pɛsɛmkunya bɛ mli haa wɔfeɔ mɛi ni bɛ deka kwraa yɛ Yehowa jamɔ kɛ sɔɔmɔ mli lɛ, nakai nɔŋŋ hu satan tutuamɔi lɛ nyɛŋ aye wɔnɔ. Mɛɛ hegbɛ loo hewalɛ eeenyɛ ena yɛ wɔnɔ kɛji akɛ wɔkɛ wɔtsui muu fɛɛ, susuma muu fɛɛ, jwɛŋmɔ fɛɛ kɛ hewalɛ fɛɛ sumɔ Yehowa? Suɔmɔ hu haa wɔsusuɔ mɛi krokomɛi ayiwalaheremɔ he, ni enɛ baaye abua wɔ ni eha wɔyiwalaheremɔ lɛ afee nɔ ni ama nɔ mi. (Marko 12:30, 31; 1 Timoteo 4: 16) Yɛ bei abɔ ni wɔjieɔ suɔmɔ kpo wɔtsɔɔ yɛ egbɛi sɔrɔtoi lɛ fɛɛ nɔ lɛ, Satan loo esamaŋfoi lɛ, emli mɛi ni anaa aloo mɛi ni anaaa amɛ lɛ nyɛŋ agbɔjɔ shi ni wɔdamɔɔ wɔshiɔ amɛ lɛ.—1 Korintobii 13:4-8.
17. Mɛni hewɔ sɔlemɔ he hiaa kɛha shi ni wɔɔdamɔ shiŋŋ lɛ?
17 Bɔni afee ni wɔnyɛ wɔdamɔ shi shiŋŋ wɔshi Satan nitsumɔi lɛ, esa akɛ wɔkɛ sɔlemɔ hu atsu nii kɛmɔ shi. Mɛni hewɔ? Ejaakɛ wɔnyɛŋ wɔjɛ wɔ diɛŋtsɛ wɔhewalɛ mli wɔye kunim. Yelikɛbuamɔ ni jɛ ŋwɛi he miihia wɔ. Yɛ be mli ni Paulo etsɔɔ mumɔŋ tawuu nii lɛ amli lɛ sɛɛ lɛ, etee nɔ ewo enanemɛi heyelilɔi lɛ ahewalɛ akɛ ‘amɛkɛ sɔlemɔ kɛ faikpamɔ fɛɛ asɔlea yɛ mumɔŋ yɛ be fɛɛ mli.’ Yɛ enɛ hewɔ lɛ etee nɔ ekɛɛ amɛ akɛ “nyɛsraa, ni nyɛkaa he daa nyɛkpaa fai nyɛhaa krɔŋkrɔŋbii lɛ fɛɛ,” ni bɔfo lɛ hu fata he.—Efesobii 6:18, 19.
18, 19. (a) Yijiemɔ kɛ shidaa baanya aye abua wɔ yɛ mɛɛ gbɛ nɔ? (b) Mɛɛ sɛɛnamɔ yɔɔ faikpamɔ kɛ tutɔmɔi ahe?
18 Mɛni fata “sɔlemɔ kɛ faikpamɔ fɛɛ” lɛ he? Sɔlemɔ lɛ ekome ji yijiemɔ. Eka shi faŋŋ akɛ, yɛ mɔ ni Yehowa ji, esui kpakpai kɛ egbɛhe yɛ je muu fɛɛ hewɔ lɛ, esa akɛ wɔjie eyi. (Lala 33:1) Sɔlemɔ kroko ji shidaa. Ni kwɛ nibii ni wɔyɔɔ ni wɔbaanyɛ wɔdamɔ nɔ wɔkɛ shidaa aha “duromɔ nii kpakpai fɛɛ kɛ nikee nii ni hi kɛwulashi fɛɛ” a-Halɔ lɛ! (Yakobo 1:17) No hewɔ lɛ awoɔ wɔ ŋaa yɛ gbɛ ni sa nɔ akɛ “esa akɛ amɛjie Yehowa yi yɛ emlihilɛ kɛ enaakpɛɛ nii ni etsuɔ ehaa gbɔmɛi abii lɛ ahewɔ.” (Lala 107:31) Hiɛsɔɔ tsui kɛ jwɛŋmɔ ni wɔyɔɔ lɛ baaye abua wɔ diɛŋtsɛ ni wɔdamɔ shi shiŋŋ wɔshi Satan.
19 Faikpamɔ hu ji sɔlemɔ kroko. Wɔbaanyɛ wɔbi nibii tamɔ nilee (Yakobo 1:5) , mumɔ krɔŋkrɔŋ (Luka 11:13) , eshaifaa (1 Yohane 1:9; 2:1, 2) kɛ Nyɔŋmɔ jɔɔmɔ yɛ wɔ mɔdɛŋbɔɔi anɔ (Lala 90:17) . Agbɛnɛ tutɔmɔi hu yɛ. Etsɔɔ Yehowa Nyɔŋmɔ ni aaakpa lɛ fai yɛ heshibaa kɛ hiɛdɔɔ mli koni efee nɔ ko, tamɔ yɛ haomɔ loo oshara bei ni mli wa amli. No hewɔ lɛ heni awo Paulo tsuŋ lɛ, ebi ni akpa fai aha lɛ yɛ nɛkɛ gbɛ nɔ. (Efesobii 6:18-20) Yɛ anɔkwale mli lɛ, nɛkɛ gbɛi sɔrɔtoi ni atsɔɔ nɔ asɔleɔ nɛɛ baaye abuɔ wɔ ni wɔdamɔ shi shiŋŋ wɔshi Satan.
Tswaa Ofai Shi akɛ Obaadamɔ Shi Shiŋŋ
20, 21. Te wɔɔfee tɛŋŋ wɔje mli kɛ kunimyeli kwraa?
20 Ákɛ kuu lɛ, ŋmɛnɛ Yehowa webii miina mumɔŋ paradeiso mli jɔɔmɔi amli ŋɔɔmɔ. Shi kɛji akɛ wɔ aŋkroaŋkroi lɛ wɔɔya nɔ wɔna nɛkɛ jɔɔmɔi nɛɛ amli gbɛfaŋnɔ lɛ, belɛ wɔnyɛŋ wɔku wɔhiɛ wɔshwie nɔ. Esa akɛ wɔsara, ni wɔdamɔ shi shiŋŋ wɔshi wɔ-Henyɛlɔ, Satan Abonsam.—1 Petro 5:8, 9.
21 Abonsam yɛ ŋaa nitsumɔi babaoo, taakɛ wɔna lɛ, ni eŋaatsɔɔ lɛ ji ni ekumɔ emuuyeli mli ni wɔhiɛ lɛ, ni eha wɔkpa Yehowa Nyɔŋmɔ sɔɔmɔ. Shi kɛji akɛ wɔtee nɔ wɔwo wɔmumɔŋ tawuu nii ni jɛ Nyɔŋmɔ ŋɔɔ lɛ, ni wɔtee nɔ wɔwo Nyɔŋmɔ mumɔ lɛ yibii tamɔ suɔmɔ, henɔyeli, ni wɔka sɔlemɔ he lɛ, Satan nine shɛŋ wɔnɔ. No hewɔ lɛ, yɛ yelikɛbuamɔ ni suɔmɔ yɔɔ mli ni jɛ wɔ-Nyɔŋmɔ, Yehowa ŋɔɔ lɛ hewɔ lɛ, wɔbaafee mɛi ni awula wɔ kwraa koni wɔnyɛ wɔdamɔ shi shiŋŋ wɔshi Satan nitsumɔi lɛ.a
[Shishigbɛ niŋmaa]
a Ajie kɛjɛ October 15, 1984 Watchtower lɛ mli
Ani Okaiɔ
◻ Nɔ hewɔ ni Satan mli ewo Ia ewo Yehowa tsuji Iɛ?
◻ Nɔ ni feɔ Kristofonyo lɛ mumɔŋ tawuu nii lɛ?
◻ Nɔ ni Satan “gaimlibi ni tsoɔ” lɛ ekomɛi, shi mɛɛ hebuu wɔyɔɔ yɛ enɛɛmɛi ahiɛ?
◻ Nɔ hewɔ ni esa eko wɔba wɔhe shi koni wɔnyɛ wɔdamɔ shi wɔshi Abonsam?
◻ Nɔ hewɔ ni sɔlemɔ he hiaa waa yɛ shi ni wɔɔdamɔ shiŋŋ lɛ mli Iɛ?
[Mfoniri ni yɔɔ baafa 29]
Sɔlemɔ ni afeɔ daa baaye abua weku lɛ ni eku Satan tutuamɔ naa
MAY Daa Gbi Ŋmalɛ
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)