Bɔni Aaafee Ayɔse Mumɔŋ Gbɔjɔmɔi Fɛɛ ni Aye Amɛnɔ Kunim
TAAKƐ HELA ADESÃ KO TSƆƆ LƐ, ACHILLES JI HELA TATSƐMƐI LƐ ATEŊ kãkãlɔ ni fe fɛɛ yɛ Trojan Ta lɛ mli, ni ji ta ni awuu ashi Troy maŋtiase lɛ. Adesã lɛ tsɔɔ akɛ, beni Achilles ji abifao lɛ, enyɛ kɛ lɛ yawo Styx Faa lɛ mli, ni no ha ebatsɔ mɔ ko ni nɔ ko nɔ ko nyɛŋ aye lɛ awui ja he ni enyɛ kɛ enine mɔ lɛ kɛkɛ—Achilles nanetsitsi ni akɛbuɔ abɛ lɛ. Jɛmɛ tuuntu gaimlibi ni naa wa ni Paris, ni ji Troy Maŋtsɛ Priam bi lɛ tsɛ̃ lɛ yatsu, ni egbe Achilles.
Kristofoi ji Kristo asraafoi, ni miiwuu mumɔŋ ta. (2 Timoteo 2:3) Bɔfo Paulo tsɔɔ mli akɛ: “Jeee heloo kɛ la wɔkɛná nɔmɔ lɛ, shi moŋ wɔkɛ onukpayelii kɛ hegbɛi kɛ je nɛŋ lumɛi ni yɔɔ benɛbe duŋ lɛ mli lɛ, kɛ mumɔi fɔji asafo ni yɔɔ ŋwɛiniiaŋ lɛ.” Hɛɛ, wɔhenyɛlɔi lɛ jeee mɔ ko mɔ ko fe Satan Abonsam kɛ edaimonioi lɛ.—Efesobii 6:12.
Eji jeee yelikɛbuamɔ ni wɔnáa kɛjɛɔ Yehowa Nyɔŋmɔ, mɔ ni awie ehe akɛ “tawulɔ” lɛ dɛŋ kulɛ, eyɛ faŋŋ akɛ fã kome he baawa kwraa fe fã kroko yɛ nɔmɔ lɛ mli. (2 Mose 15:3) Akɛ mumɔŋ tawuu nii eha wɔ bɔni afee ni wɔkɛbu wɔhe kɛjɛ wɔhenyɛlɔi awuiyelɔi lɛ adɛŋ. No hewɔ ni bɔfo lɛ wo hewalɛ akɛ: “Nyɛwoa Nyɔŋmɔ tawuu nii lɛ fɛɛ, koni nyɛnyɛ abonsam ŋaatsɔi lɛ anaa nyɛdamɔ” lɛ.—Efesobii 6:11.
Ŋwanejee ko bɛ he akɛ tawuu nii ni Yehowa Nyɔŋmɔ kɛhaa lɛ hi fe fɛɛ, ni enyɛɔ edamɔɔ nibii fɛɛ ni tutua mɔ yɛ mumɔŋ lɛ anaa. Bo lɛ kwɛmɔ nibii ni Paulo tsĩ amɛ tã lɛ: anɔkwale hɛfii nɔ, jalɛ dama, sanekpakpa lɛ ni akɛaawo nane, hemɔkɛyeli tsɛŋ, walaheremɔ dadefai, kɛ mumɔŋ klaŋte. Ani nɔ kroko yɛ ni fe enɛ ni mɔ ko baanyɛ akpa gbɛ? Kɛ́ Kristofonyo asraafonyo ko wo tawuu nii ni tamɔ enɛɛmɛi lɛ, no lɛ eyɛ hegbɛ akɛ eyeɔ kunim, ní shitee-kɛ-woo nibii ni baaba lɛ kɔɔɔ he eko.—Efesobii 6:13-17.
Eyɛ mli akɛ mumɔŋ tawuu nii ni jɛ Yehowa ŋɔɔ lɛ ji nɔ ni hi fe fɛɛ, ni eji hebuunɔ̃ kɛha wɔ moŋ, shi esaaa akɛ wɔsusuɔ akɛ eji nɔ ko ni he ehiaaa tsɔ. Kɛ wɔɔkai Achilles ni asusu akɛ anyɛɛɛ enɔ kunim aye lɛ he lɛ, ani eeenyɛ eba akɛ wɔ hu wɔyɛ gbɔjɔmɔ ko, mumɔŋ Achilles nanetsitsi? No baanyɛ afee oshara, kɛ ebati wɔ shi trukaa lɛ.
Pɛimɔ Omumɔŋ Tawuu Nii lɛ Mli Okwɛ
Nɔ̃ nyɔ nuu ko ni eka shi faŋŋ akɛ eyɛ hewalɛ diɛŋtsɛ ni ená shika jweremɔ nii shii enyɔ sɔŋŋ ákɛ mɔ ni joɔ foi waa yɛ ais nɔ yɛ Olympic shwɛmɔ mli lɛ beni esaa ehe kɛha nifeemɔ lɛ nɔ, ni egbo. No sɛɛ lɛ, etsɛɛɛ kɛkɛ ni atswa sane fioo ko ni haa mɔ susuɔ nii ahe lɛ he adafi yɛ The New York Times lɛ mli: “Tsui hela ni Amerikabii 600,000 mlijaa náa daa afi lɛ he okadii ejeee kpo.” Eyɛ faŋŋ akɛ anyɛŋ adamɔ bɔ ni wɔnuɔ nii ahe wɔhaa lɛ nɔ wɔkɛna bɔ ni wɔyɔɔ hewalɛ yɛ gbɔmɔtsoŋ wɔha.
Nakai pɛpɛɛpɛ eji kɛji akɛ aawie wɔmumɔŋ shihilɛ hu he. Ŋaawoo ni Biblia lɛ kɛhaa ji akɛ: “Mɔ ni susuɔ akɛ edamɔ shi lɛ akwɛ ehe ni ahi koni ekagbee shi.” (1 Korintobii 10:12) Eyɛ mli akɛ mumɔŋ tawuu nii ni wɔyɔɔ lɛ ji nɔ ni hi fe fɛɛ ni wɔɔná moŋ, shi gbɔjɔmɔ baanyɛ aba. Nɔ hewɔ lɛ ji akɛ, afɔ́ wɔ awo esha mli, ni ewaaa akɛ esha mli ni wɔyɔɔ kɛ emuu ni wɔyeee lɛ baanyɛ aye wɔfaishitswaa akɛ wɔɔfee Nyɔŋmɔ suɔmɔnaa nii lɛ nɔ kunim. (Lala 51:7Ga Bible) Yɛ jwɛŋmɔ kpakpa ni wɔhiɛ lɛ fɛɛ sɛɛ lɛ, wɔkutumpɔo tsui lɛ baanyɛ alaka wɔ kɛtsɔ susumɔi loo naajiemɔi anɔ, ni ebaaha wɔbu wɔgbɔjɔmɔi lɛ akɛ nɔ ni he ehiaaa, ni wɔkɛlaka wɔhe ni wɔsusu akɛ wɔyɛ mumɔŋ shidaamɔ kpakpa.—Yeremia 17:9; Romabii 7:21-23.
Kɛfata he lɛ, wɔyɛ jeŋ ko ni afɔɔ ekpakpa kɛ efɔŋ he jwɛŋmɔ ni ayɔɔ lɛ futumɔ kɛ etsɔmɔmɔ. Abaanyɛ adamɔ bɔ ni mɔ ko nuɔ nii ahe ehaa lɛ nɔ ale kɛji akɛ nɔ ko ja aloo ejaaa. Ajieɔ susumɔ ni tamɔ nɛkɛ lɛ kpo yɛ nihɔɔmɔ he adafitswai amli, shwɛmɔi ni ale waa, kɛ adafitswaa nɔ. Eyɛ faŋŋ akɛ, kɛ wɔkwɛɛɛ wɔhe nɔ jogbaŋŋ lɛ, abaanyɛ alaka wɔ awo susumɔ ni tamɔ nakai mli, ni wɔ mumɔŋ tawuu nii lɛ baanyɛ abɔi fitemɔ.
Yɛ nɔ najiaŋ ni wɔɔgbee oshara ni tamɔ nɛkɛ mli lɛ, esa akɛ wɔkɛ Biblia lɛ ŋaawoo lɛ atsu nii: “Nyɛkaa nyɛ diɛŋtsɛ nyɛhe nyɛkwɛa akɛ nyɛyɛ hemɔkɛyeli lɛ mli lo; nyɛkwɛa nyɛ diɛŋtsɛ nyɛhe ni ahia.” (2 Korintobii 13:5) Kɛ wɔfee nakai lɛ, wɔbaanyɛ wɔyɔse gbɔjɔmɔi fɛɛ ni aaanyɛ ate shi lɛ, ni wɔtsu nii kɛsaa amɛ, dani wɔhenyɛlɔi lɛ ayɔse amɛ ni amɛtutua amɛ. No hewɔ lɛ, mɛɛ gbɛ nɔ wɔɔtsɔ wɔtsu kaa ni tamɔ nɛkɛ lɛ he nii yɛ? Mɛɛ okadii komɛi esa akɛ wɔtao yɛ nɛkɛ mlipɛimɔ nitsumɔ nɛɛ mli?
Okadii lɛ Ayɔsemɔ
Teemɔŋ nikasemɔ sui ni atsuuu he nii lɛ ji mumɔŋ gbɔjɔmɔ he okadi ni ale waa lɛ ekome. Mɛi komɛi nuɔ he akɛ esa akɛ amɛkase nii babaoo, shi amɛnyɛɛ amɛfee nakai. Yɛ bɔ ni dekã bɛ ŋmɛnɛ shihilɛ ni wɔyɔɔ mli lɛ mli hewɔ lɛ, ewaaa akɛ aaagbee shihilɛ ni tamɔ nakai mli. Ni kɛlɛ, nɔ ni ehiii kwraa ji akɛ, bei pii lɛ mɛi komɛi buɔ akɛ amɛmiibɔ mɔdɛŋ, akɛni amɛnyɛɔ amɛkaneɔ Biblia he woji be fɛɛ be ni amɛbaanyɛ ni amɛnyɛɔ amɛyaa Kristofoi akpeei komɛi lɛ hewɔ.
Mɔ he lakamɔ ji susumɔ ni tamɔ nɛkɛ. Etamɔ nuu ko ni nuɔ he akɛ ebɛ dekã ni ekɛaata shi ni eye niyenii kpakpa ko, no hewɔ lɛ, etĩɔ ewoɔ edaaŋ be fɛɛ be yɛ be mli ni efeɔ nibii krokomɛi kplakpla lɛ. Eyɛ mli akɛ hɔmɔ yeŋ lɛ moŋ, shi etsɛŋ ni ehe baaye. Yɛ nakai gbɛ nɔŋŋ nɔ lɛ, kɛ wɔtooo be kɛha mumɔŋ niyeli lɛ, no lɛ etsɛŋ ni wɔbaana gbɔjɔmɔi yɛ wɔmumɔŋ tawuu nii lɛ he. Akɛni akɛ je lɛŋ nibii gbohii kɛ esui lɛ tutuaa wɔ be fɛɛ be hewɔ lɛ, ewaaa akɛ wɔbaaŋmɛɛ wɔhe wɔha Satan tutuamɔi ni yɔɔ gbeyei lɛ.
Mumɔŋ gbɔjɔmɔ he okadi kroko ji hehiamɔ henumɔ ni wɔbɛ kɛha wɔmumɔŋ tawuu nii lɛ. Yɛ toiŋjɔlɛ be mli lɛ, asraafonyo ko nuuu nɔnyɛɛ kɛ oshara ni yɔɔ tawuu mli lɛ he. Enɛ hewɔ lɛ, enuuu he akɛ esa akɛ akɛ he hiamɔ afee klalo. Kɛ́ atsɛ lɛ trukaa kɛha ta lɛ no lɛ ebaafee mɔ ni esako ehe kwraa. Nakai nɔŋŋ eji yɛ mumɔŋ gbɛfaŋ. Kɛ́ wɔhiɛ kpa hiamɔ henumɔ ni yɔɔ lɛ nɔ lɛ, no lɛ wɔbaafee mɛi ni wɔsako wɔhe kɛha tutuamɔi ni baaba wɔnɔ lɛ anɔ kunimyeli.
Shi, te wɔɔfee tɛŋŋ wɔna akɛ wɔyaje shihilɛ ni tamɔ nakai mli? Wɔbaanyɛ wɔbibii wɔhe saji komɛi ni baajie shihilɛ mli diɛŋtsɛ ni wɔyɔɔ lɛ kpo etsɔɔ: Ani mikɛ mihe woɔ sɔɔmɔ nitsumɔ lɛ mli kɛ oyaiyeli taakɛ mifeɔ kɛji akɛ miije kpo kɛmiiya shisharamɔ ko? Ani misumɔɔ ni mafite be kɛsaa mihe kɛha kpeei taakɛ mifeɔ yɛ jarayeli aloo TV kwɛmɔ mli? Ani misaa misusuɔ tsutsu heloonaa nibii kɛ hegbɛi ni miŋmɛɛ he beni mibatsɔ Kristofonyo lɛ he ekoŋŋ? Ani miyeɔ nɔ ni mɛi tsɛɔ lɛ akɛ shihilɛ kpakpa ni anáa mli ŋɔɔmɔ lɛ he awuŋa? Enɛɛmɛi ji sanebimɔi ni haa mɔ susuɔ nii ahe, shi amɛyeɔ amɛbuaa ni ayɔseɔ gbɔjɔmɔi ni baa wɔ mumɔŋ tawuu nii lɛ ahe lɛ.
Akɛni tawuu nii ni buɔ mɔ he ni wɔyɔɔ lɛ ji mumɔŋ nɔ̃ hewɔ lɛ, ehe miihia ni Nyɔŋmɔ mumɔ lɛ atsu nii be fɛɛ be yɛ wɔshihilɛ mli. Enɛ jeɔ kpo yɛ bɔ ni Nyɔŋmɔ mumɔ lɛ yibii lɛ jeɔ kpo yɛ wɔnifeemɔi fɛɛ amli lɛ mli. Ani omli fuɔ oya kɛ mɛi krokomɛi fee nɔ ko aloo amɛkɛɛ nɔ ko ni osumɔɔɔ? Ani ewaa kɛhaa bo akɛ oookpɛlɛ ŋaawoo nɔ, aloo onuɔ he akɛ mɛi krokomɛi yeɔ osane tsɔ̃? Ani oyeɔ mɛi krokomɛi ajɔɔmɔi loo nɔ ni amɛnyɛ amɛtsu lɛ ahe awuŋa babaoo? Ani mɛi krokomɛi kɛ shihilɛ wa kɛha bo, titri onanemɛi? Wɔmli pɛimɔ yɛ anɔkwale mli lɛ baaye ebua wɔ koni wɔna kɛji Nyɔŋmɔ mumɔ lɛ yibii lɛ eyi obɔ yɛ wɔshihilɛ mli loo heloo lɛ nitsumɔi lɛ miipue yɛ gbɛ nigii nɔ.—Galatabii 5:22-26; Efesobii 4:22-27.
Gbɛ̀i ni Abaanyɛ Akɛtsu Nii Koni Akɛye Mumɔŋ Gbɔjɔmɔi Anɔ Kunim
Ní aaayɔse mumɔŋ gbɔjɔmɔ he okadii lɛ ji nɔ kome; ni eji nɔ kroko kwraa hu akɛ aaakpee naa ni akwɛ gbɛ̀i ni aaatsɔ nɔ atsu naagbai lɛ ahe nii. Dɔlɛ sane ji akɛ, mɛi pii jieɔ amɛnaa, ni amɛsusuɔ akɛ amɛsane ja, ni amɛbaa naagba lɛ shi, loo amɛtsoɔ po akɛ ebɛ. Kwɛ bɔ ni eyɔɔ oshara—etamɔ mɔ ko ni miiya ta ni ewo etawuu nii ni eshi amɛteŋ ekomɛi! Gbɛ ni tamɔ nakai ni aaakɔ lɛ baagbele gbɛ agbo kɛha Satan tutuamɔi lɛ. Yɛ no najiaŋ lɛ, esa akɛ wɔtsu he nii oya yɛ gbɛ̀i ni ja nɔ koni wɔkɛsaa tɔmɔi ni wɔɔna lɛ fɛɛ. Mɛni wɔbaanyɛ wɔfee?—Romabii 8:13; Yakobo 1:22-25.
Akɛni wɔmiiwuu mumɔŋ ta—ta ni biɔ koni akudɔ Kristofonyo jwɛŋmɔ kɛ etsui lɛ hewɔ lɛ—esa akɛ wɔfee nɔ fɛɛ nɔ ni wɔɔnyɛ koni wɔkɛbu wɔjwɛŋmɔ nyɛmɔi lɛ ahe. Kadimɔ akɛ nibii ni fata wɔmumɔŋ tawuu nii lɛ ahe ji “jalɛ dama” ni buɔ wɔtsui he, kɛ “walaheremɔ dadefai” ni buɔ wɔjwɛŋmɔ lɛ he. Nikeenii nɛɛ ni wɔɔkase ni wɔkɛtsu nii jogbaŋŋ lɛ baanyɛ aha wɔna srɔtofeemɔ ni yɔɔ kunimyeli kɛ shigbeemɔ mli.—Efesobii 6:14-17; Abɛi 4:23; Romabii 12:2.
“Jalɛ dama” lɛ ní wɔɔwo jogbaŋŋ lɛ tsɔɔ akɛ, wɔbaakwɛ bɔ ni wɔ diɛŋtsɛ lɛ wɔjieɔ suɔmɔ kpo wɔhaa jalɛ nifeemɔ kɛ bɔ ni wɔnyɛ̃ɔ mlakwamɔ be fɛɛ be lɛ wɔhaa. (Lala 45:8; Ga Bible 97:10; Amos 5:15) Ani wɔjalɛ tɛi lɛ kɛ je lɛ nɔ̃ lɛ yeɔ hegbɔ? Ani wɔnáa nibii ni tsutsu lɛ eyeɔ wɔ awui loo ehaa wɔfeɔ efɔŋ—shihilɛ mli nifeemɔi diɛŋtsɛ loo nibii ni ajieɔ yɛ TV kɛ sinii anɔ, woji kɛ woji tɛtrɛbii amli saji—ahe miishɛɛ agbɛnɛ? Suɔmɔ kɛha jalɛ nifeemɔ baaye ebua wɔ koni wɔna akɛ, nibii ni je lɛ jieɔ yi akɛ amɛji heyeli kɛ je lɛ nifeemɔi lɛ baafee lakamɔ kɛ nɔ ni ahà hiɛ.—Romabii 13:13, 14; Tito 2:12.
“Walaheremɔ dadefai” lɛ ni wɔɔbu lɛ tsɔɔ akɛ wɔbaaha jɔɔmɔi ni yɔɔ naakpɛɛ ni kã wɔhiɛ lɛ ahi wɔjwɛŋmɔ mli daa, ni wɔhaŋ je lɛŋ nibii ni kpɛlɛɔ kɛ nibii fɛfɛji lɛ aha wɔjie wɔjwɛŋmɔ kɛjɛ nɔ. (Hebribii 12:2, 3; 1 Yohane 2:16) Jwɛŋmɔ ni tamɔ nɛkɛ ni wɔɔná lɛ baaye ebua wɔ koni wɔjwɛŋ mumɔŋ nibii ahe titri moŋ fe heloonaa nibii ni wɔɔná loo wɔ diɛŋtsɛ wɔsɛɛnamɔi ahe. (Mateo 6:33) Enɛ hewɔ lɛ, bɔni afee ni wɔna nɔmimaa akɛ wɔwo nɛkɛ tawuu nii nɛɛ jogbaŋŋ lɛ, esa akɛ wɔbi wɔhe akɛ: Mɛni sɛɛ mitiuɔ yɛ shihilɛ mli? Ani mikɛ mumɔŋ otii pɔtɛɛ komɛi ema mihiɛ? Mɛni mifeɔ koni minine ashɛ amɛ nɔ? Kɛ́ wɔfata Kristofoi ni afɔ amɛ mu ni eshwɛ lɛ ahe loo “asafo kuu babaoo” lɛ he jio, esa akɛ wɔkase Paulo, mɔ ni kɛɛ akɛ: “Mibuuu mihe akɛ minine eshɛ nɔ, shi nɔ kome kɛkɛ: nii ni yɔɔ sɛɛgbɛ lɛ mijie mihiɛ yɛ nɔ, shi nii ni yɔɔ hiɛgbɛ lɛ ahe moŋ mipeleɔ, ni miitiu oti lɛ.”—Kpojiemɔ 7:9; Filipibii 3:13, 14.
Paulo kɛ ŋaawoo nɛɛ mu bɔ ni etsɔɔ wɔmumɔŋ tawuu nii lɛ mli lɛ naa akɛ: “Nyɛkɛ sɔlemɔ kɛ faikpamɔ fɛɛ asɔlea daa yɛ mumɔ mli, ni enɛ nɔŋŋ hewɔ lɛ nyɛsraa, ni nyɛkãa he daa nyɛkpaa fai nyɛhaa krɔŋkrɔŋbii lɛ fɛɛ.” (Efesobii 6:18) Enɛ tsɔɔ gbɛ̀i enyɔ ni ja ni wɔbaanyɛ wɔtsɔ nɔ wɔkɛye mumɔŋ gbɔjɔmɔ nɔ kunim loo wɔkɛtsĩ naa: Ná okɛ Nyɔŋmɔ teŋ wekukpaa kpakpa, ni okɛ nanemɛi Kristofoi abɔ gbagbalii.
Kɛ wɔná su ni tsɔɔ Yehowa ŋɔɔ ni wɔɔya yɛ ‘sɔlemɔ kɛ faikpamɔi srɔtoi fɛɛ’ amli lɛ (wɔhe eshai ajajemɔ, faikpamɔ kɛha eshai faa, gbɛtsɔɔmɔ taomɔ, shidaa yɛ jɔɔmɔi ahewɔ, yijiemɔi ni jɛ tsui mli) “daa” yɛ (maŋ, teemɔŋ, mɔ aŋkro, be kɛ bei amli) lɛ, wɔnáa wɔkɛ Yehowa teŋ wekukpaa ni yɔɔ gbagbalii. No ji hebuu ni fe fɛɛ ni wɔbaanyɛ wɔná.—Romabii 8:31; Yakobo 4:7, 8.
Yɛ gbɛ kroko nɔ lɛ, awoɔ wɔ ŋaa koni wɔsɔle wɔha ‘mɛi krɔŋkrɔŋi lɛ fɛɛ,’ ni tsɔɔ akɛ, kɛha wɔnanemɛi Kristofoi. Wɔbaakai wɔmumɔŋ nyɛmimɛi ni yɔɔ maji ni yɔɔ shɔŋŋ, ni naa nɔ̃ yɛ yiwaa mli lɛ loo amɛpiŋɔ yɛ shihilɛi krokomɛi ni wawai amli lɛ. Shi Kristofoi ni wɔkɛ amɛ tsuɔ nii ni wɔkɛ amɛ bɔɔ daa gbi lɛ hu? Eja gbɛ akɛ wɔɔsɔle wɔha amɛ hu, taakɛ Yesu po fee eha ekaselɔi lɛ. (Yohane 17:9; Yakobo 5:16) Sɔlemɔi ni tamɔ enɛɛmɛi feɔ wɔ ekome, ni ewoɔ wɔ hewalɛ koni wɔnyɛ wɔdamɔ “mɔ fɔŋ lɛ” tutuamɔi lɛ anaa.—2 Tesalonikabii 3:1-3.
Naagbee lɛ, nyɛhaa bɔfo Petro ŋaawoo ni jɛ suɔmɔ mli lɛ ahia wɔjwɛŋmɔ mli be fɛɛ be: “Nibii fɛɛ anaagbee lɛ eshɛ etã. Hewɔ lɛ nyɛjwɛŋmɔ mli atsea ni nyɛhiɛ akãa shi ahaa sɔlemɔi. Shi titri lɛ nyɛsuɔmɔ ni nyɛkɛsumɔsumɔɔ nyɛhe lɛ mli awa, ejaakɛ suɔmɔ hàa eshai babaoo nɔ.” (1 Petro 4:7, 8) Ewaaa kwraa akɛ wɔɔha emuu ni adesai yeee—mɛi krokomɛi anɔ̃ kɛ wɔ diɛŋtsɛ wɔnɔ̃—abote wɔtsuii kɛ wɔjwɛŋmɔi amli ni etsɔ gbɛtsĩi nii, kɛ tɛmɔ tɛ kɛha wɔ. Satan le nɛkɛ adesa gbɔjɔmɔ nɛɛ jogbaŋŋ. Mligbalamɔ kɛ gbɔmɔ nɔ kunimyeli ji egbɛ̀i ni yɔɔ nigii lɛ ateŋ ekome. No hewɔ lɛ, esa akɛ wɔhe afee oya koni wɔkɛ suɔmɔ ni wɔyɔɔ kɛha wɔhe lɛ ahà eshai ni tamɔ enɛɛmɛi anɔ, ‘wɔkɛ wɔhe akafɔ̃ shi wɔha abonsam.’—Efesobii 4:25-27.
Hii Shi Bianɛ akɛ Mɔ Ko ni Yɔɔ Hewalɛ yɛ Mumɔŋ
Kɛ́ ona akɛ oshwãko oyitsɔi loo otai ekpa afã lɛ, mɛni ofeɔ? Eka shi faŋŋ akɛ, ojajeɔ nibii oya nɔŋŋ. Gbɔmɛi fioo ko pɛ baashi lɛ nakai, ni amɛbaanu he akɛ nibii ni tamɔ enɛɛmɛi ni efite lɛ he ehiaaa. Belɛ nyɛhaa wɔtsua wɔmumɔŋ gbɔjɔmɔi ahe nii oya nakai nɔŋŋ. Gbɔmɛi ni kwɛɔ kpa ni yɔɔ mɔ ko he lɛ naaa he miishɛɛ, shi nɔ ni baanyɛ ajɛ mumɔŋ fatɔɔi ni atsuuu amɛhe nii lɛ amli aba ji Yehowa nɔkpɛlɛmɔ ni anaŋ.—1 Samuel 16:7.
Yehowa ejɛ esuɔmɔ mli ekɛ nibii fɛɛ ni he hiaa wɔ koni eye ebua wɔ ni wɔyɔse mumɔŋ gbɔjɔmɔi fɛɛ, ni wɔhi shi akɛ mɛi ni yɛ hewalɛ yɛ mumɔŋ lɛ eha wɔ. Etsɔɔ Kristofoi akpeei, Biblia kasemɔ he woji, kɛ Kristofoi nanemɛi ni edara yɛ mumɔŋ ni susuɔ mɔ he lɛ anɔ ekaiɔ wɔ daa gbi, ni ekɛ otii ni he hiaa ni tsɔɔ nɔ ni esa akɛ wɔfee lɛ haa. Enɔkpɛlɛmɔ kɛ ehe nitsumɔ kã wɔnɔ. Enɛ biɔ mɔdɛŋbɔɔ kɛ hetsɔsemɔ. Shi kaimɔ nɔ ni bɔfo Paulo kɛɛ yɛ anɔkwale mli lɛ: “Foi ni midaa nɛɛ, midaaa lɛ butubutu; nɔmɔ ni minɔɔ nɛɛ, jeee kɔɔyɔɔ mikɛ nɔɔ; shi moŋ migbalaa mi diɛŋtsɛ migbɔmɔtso lɛ mai ni miyeɔ lɛ nyɔŋ, koni mi ni mishiɛɔ mitsɔɔ mɛi krokomɛi lɛ, mi diɛŋtsɛ lɛ akashɛ mi afɔ.”—1 Korintobii 9:26, 27.
Ohiɛ ahi ohe nɔ, ni kaaŋmɛ gbɛ kɔkɔɔkɔ ni mumɔŋ Achilles nanetsitsi je shishi. Shi moŋ, nyɛhaa wɔkɛ heshibaa kɛ ekãa atsua nɔ ni he hiaa amrɔ nɛɛ he nii, bɔni afee ni wɔyɔse ni wɔye mumɔŋ gbɔjɔmɔi anɔ kunim.
[Wiemɔ ni akɔ ni akɛmiitsu nii ni yɔɔ baafa 19]
“NYƐKAA NYƐ DIƐŊTSƐ NYƐHE NYƐKWƐA AKƐ NYƐYƐ HEMƆKƐYELI LƐ MLI LO; NYƐKWƐA NYƐ DIƐŊTSƐ NYƐHE NI AHIAA.”—2 Korintobii 13:5.
[Wiemɔ ni akɔ ni akɛmiitsu nii ni yɔɔ baafa 21]
“NYƐHIƐ AKÃA SHI AHAA SƆLEMƆI.
SHI TITRI LƐ NYƐSUƆMƆ NI NYƐKƐSUMƆSUMƆƆ NYƐHE LƐ MLI AWA, EJAAKƐ SUƆMƆ HAA ESHAI BABAOO NƆ.”—1 Petro 4:7, 8.
[Akrabatsa/Mfoniri ni yɔɔ baafa 20]
BI OHE AKƐ . . .
◆ Ani misumɔɔ ni mafite be kɛsaa mihe kɛha kpeei taakɛ mifeɔ yɛ jarayeli aloo TV kwɛmɔ mli?
◆ Ani miyeɔ nɔ ni mɛi tsɛɔ lɛ akɛ shihilɛ kpakpa ni anáa mli ŋɔɔmɔ lɛ he awuŋa?
◆ Ani mimli fuɔ oya kɛ mɛi krokomɛi fee nɔ ko aloo amɛkɛɛ nɔ ko ni misumɔɔɔ?
◆ Ani ŋaawoo nɔkpɛlɛmɔ wa kɛha mi, loo minuɔ he akɛ mɛi krokomɛi yeɔ misane tsɔ̃?
◆ Ani mɛi krokomɛi kɛ shihilɛ wa kɛha mi?
◆ Ani bɔ ni mihiɔ shi mihaa lɛ kɛ je lɛŋ nɔ yeɔ hegbɔ?
◆ Ani miyɛ mumɔŋ otii pɔtɛɛ?
◆ Mɛni mifeɔ koni minine ashɛ mimumɔŋ otii anɔ?
[Hei ni Mfonirii ni yɔɔ baafa 18 lɛ Jɛ]
Achilles: Sane ni aŋma yɛ wolo ni ji Great Men and Famous Women; Roma asraafoi kɛ baafã 21 lɛ mli lɛ: Historic Costume in Pictures/ni Dover Publications, Inc., New York fee lɛ