Na Mlijɔlɛ

“Nyɛmlijɔlɛ lɛ, nyɛhaa gbɔmɛi fɛɛ alea. Nuŋtsɔ lɛ ebɛŋkɛ.” —FILIPIBII 4:5.

 1. Mɛni hewɔ eji kaa diɛŋtsɛ akɛ aaana mlijɔlɛ yɛ ŋmɛnɛ je nɛɛ mli lɛ?

“NUU ni mli jɔ lɛ”—Ŋleshinyo niŋmalɔ Sir Alan Patrick Herbert tsɛ lɛ akɛ adesã mli gbɔmɔ ko. Lɛlɛŋ, ebaanyɛ efee yɛ bei komɛi amli akɛ gbɔmɛi ni mli jɔ bɛ nɛkɛ jeŋ ni béi egbala mli fɛɛ nɛɛ mli he ko kwraa. Biblia lɛ gba efɔ shi akɛ gbɔmɛi baafee “mɛi ni hiɛ yɔɔ la,” “yiwalɔi,” kɛ “kpaŋmɔ mlikulɔi” yɛ nɛkɛ “naagbee gbii” ni ji jaramɔ bei nɛɛ amli—yɛ wiemɔ kroko mli lɛ, amɛfeŋ mɛi ni mli jɔ kwraa. (2 Timoteo 3:1-5) Shi yɛ fɛɛ sɛɛ lɛ, anɔkwa Kristofoi buɔ mlijɔlɛ akɛ su ni he hiaa waa, ejaakɛ amɛle akɛ eji ŋwɛi nilee he okadi. (Yakobo 3:17) Wɔnuuu he akɛ anyɛŋ ajie mlijɔlɛ kpo yɛ jeŋ ni mlijɔlɛ bɛ mli nɛɛ mli. Shi moŋ, wɔkɛ wɔshihilɛ mli nɔ fɛɛ nɔ kpeeɔ kaa ni yɔɔ bɔfo Paulo ŋaawoo ni jɛ mumɔŋ, ni anaa yɛ Filipibii 4:5 lɛ mli lɛ naa, akɛ: “Nyɛmlijɔlɛ lɛ, nyɛhaa gbɔmɛi fɛɛ alea.”

 2. Bɔfo Paulo wiemɔi ni yɔɔ Filipibii 4:5 lɛ yeɔ ebuaa wɔ ni wɔnaa kɛji wɔmli jɔ loo wɔmli ejɔɔɔ yɛ mɛɛ gbɛ nɔ?

² Kadimɔ bɔ ni Paulo wiemɔi lɛ yeɔ ebuaa wɔ koni wɔka wɔkwɛ akɛ wɔyɛ mlijɔlɛ lo. Ejeee nɔ ni kɔɔ bɔ ni wɔ diɛŋtsɛ wɔnaa wɔhe lɛ he titri; eji nɔ ni kɔɔ bɔ ni mɛi krokomɛi naa wɔ amɛhaa, bɔ ni ale wɔ aha lɛ he titri. Phillips shishitsɔɔmɔ lɛ tsɔɔ kuku nɛɛ shishi akɛ: “Na gbɛi kpakpa akɛ mɔ ni yɔɔ mlijɔlɛ.” No hewɔ lɛ esa akɛ wɔteŋ mɔ fɛɛ mɔ abi ehe akɛ, ‘Te ale mi aha tɛŋŋ? Ani miyɛ gbɛi kpakpa akɛ mɔ ni mli jɔ, eŋmɛɔ sane he, ni ehe jɔ? Aloo ani ale mi akɛ mɔ ni yɔɔ kpɛŋŋ, shɛii, aloo yiwalɔ?’

 3. (a) Mɛni Hela wiemɔ ni atsɔɔ shishi akɛ “mli jɔ” lɛ tsɔɔ, ni mɛni hewɔ anaa su nɛɛ he miishɛɛ waa lɛ? (b) Te Kristofonyo aaafee tɛŋŋ ena mlijɔlɛ babaoo?

³ Gbɛi kpakpa ni wɔɔna yɛ enɛ gbɛfaŋ lɛ baajie bɔ ni wɔkaseɔ Yesu Kristo wɔhaa lɛ kpo. (1 Korintobii 11:1) Beni eyɔɔ shikpɔŋ nɛɛ nɔ lɛ, Yesu jie e-Tsɛ lɛ mlijɔlɛ he nɔkwɛmɔ nɔ ni fe fɛɛ lɛ kpo yɛ gbɛ ni yeɔ emuu nɔ. (Yohane 14:9) Yɛ anɔkwale mli lɛ, beni Paulo ŋma “Kristo mlijɔlɛ kɛ kpoofeemɔ” lɛ he sane lɛ, Hela wiemɔ ni ekɛtsu nii kɛha kpoofeemɔ (e·pi·ei·kiʹas) lɛ hu tsɔɔ “hiɛshikamɔ” aloo, yɛ wiemɔ ni yɔɔ faŋŋ mli lɛ, “sane heŋmɛɛmɔ.” (2 Korintobii 10:1) The Expositor’s Bible Commentary lɛ tsɛɔ enɛ akɛ “wiemɔi wuji ni akɛtsɔɔ sui amli yɛ K[paŋmɔ] H[ee] lɛ mli lɛ ateŋ ekome.” Ewieɔ su ko ni anaa he miishɛɛ waa lɛ he, aahu akɛ woloŋlelɔ ko tsɔɔ wiemɔ lɛ shishi akɛ “mlijɔlɛ ni ŋɔɔ.” No hewɔ lɛ, nyɛhaa wɔsusua gbɛi etɛ ni Yesu tsɔ nɔ ejie mlijɔlɛ kpo, taakɛ e-Tsɛ, ni ji Yehowa fee lɛ he wɔkwɛa. Kɛtsɔ nakai gbɛ nɔ lɛ, wɔ diɛŋtsɛ hu wɔɔkase bɔ ni wɔɔfee wɔna mlijɔlɛ babaoo.—1 Petro 2:21.

‘Efee Klalo akɛ Eeeŋɔ Efa’

 4. Mɛɛ gbɛ nɔ Yesu jie ehe kpo yɛ akɛ ‘efee klalo akɛ eeeŋɔ efa’?

⁴ Taakɛ e-Tsɛ ji lɛ, Yesu jie mlijɔlɛ kpo kɛtsɔ ‘klalo ni efee akɛ eeeŋɔ efa’ shii abɔ lɛ nɔ. (Lala 86:5) Susumɔ beni Petro, ni ji Yesu hefatalɔ ni bɛŋkɛ lɛ kpaakpa lɛ kwa lɛ shii etɛ sɔŋŋ yɛ gbi gbɛkɛ ni amɔ Yesu ni akojo lɛ lɛ he okwɛ. Yesu diɛŋtsɛ etsɔ hiɛ ewie momo akɛ: “Mɔ fɛɛ mɔ ni kwaa mi yɛ gbɔmɛi ahiɛ lɛ, mi hu makwa lɛ yɛ mi-Tsɛ . . . hiɛ.” (Mateo 10:33) Ani Yesu kɛ nɛkɛ mla nɛɛ tsu nii keketee yɛ Petro nɔ, ni mɔbɔnalɛ ko bɛ mli? Dabi; yɛ E-shitee lɛ sɛɛ lɛ, Yesu diɛŋtsɛ tee Petro ŋɔɔ, ni ŋwanejee ko bɛ he akɛ, koni eyashɛje nɛkɛ bɔfo ni tsui ekumɔ, ni eshwa ehe nɛɛ mii, ni ewo lɛ hewalɛ. (Luka 24:34; 1 Korintobii 15:5) No sɛɛ etsɛɛɛ nɔŋŋ lɛ, Yesu ŋmɛ Petro gbɛ ni ena hegbɛ kpele ko. (Bɔfoi lɛ Asaji 2:1-41) Naa mlijɔlɛ ni ŋɔɔ ni aajie lɛ kpo yɛ gbɛ ni nɔ kwɔ fe fɛɛ nɔ! Ani ejeee miishɛjemɔ akɛ wɔɔsusu he akɛ Yehowa ehala Yesu akɛ Kojolɔ yɛ adesai fɛɛ nɔ?—Yesaia 11:1-4; Yohane 5:22.

 5. (a) Mɛɛ gbɛi kpakpa esa akɛ onukpai lɛ ana yɛ tooi lɛ ateŋ? (b) Mɛɛ sane ko ni aŋma onukpai lɛ baanyɛ asusu he dani amɛtsu kojomɔ saji ahe nii, ni mɛni hewɔ?

⁵ Kɛ onukpai miitsu nii akɛ kojolɔi yɛ asafo lɛ mli lɛ, amɛbɔɔ mɔdɛŋ akɛ amɛaanyiɛ Yesu mlijɔlɛ he nɔkwɛmɔ nɔ lɛ sɛɛ. Amɛsumɔɔɔ ni tooi lɛ ashe amɛ gbeyei akɛ mɛi ni gbalaa mɛi atoi. Shi moŋ, amɛbɔɔ mɔdɛŋ akɛ amɛaakase Yesu, bɔni afee ni tooi lɛ anu he akɛ amɛyɛ shweshweeshwe yɛ amɛdɛŋ akɛ tookwɛlɔi ni yɔɔ suɔmɔ. Yɛ kojomɔ saji amli lɛ, amɛbɔɔ mɔdɛŋ fɛɛ ni amɛaanyɛ ni amɛfee mɛi ni mli jɔ, mɛi ni efee klalo akɛ amɛaaŋɔ amɛfa. Dani amɛaatsu sane ni tamɔ nɛkɛ he nii lɛ, onukpai lɛ ekomɛi ena akɛ eyeɔ ebuaa amɛ waa kɛji amɛtĩ July 1, 1992 Buu-Mɔɔ lɛ mli saji ni ji “Yehowa, ‘Shikpɔŋ Fɛɛ nɔ Kojolɔ’ ni Kwɛɛɛ Hiɛaŋ Lɛ” kɛ “Onukpai, Nyɛkojoa yɛ Jalɛ Naa” lɛ mli. Enɛ hewɔ lɛ, amɛhaa bɔ ni amu gbɛ ni Yehowa tsɔɔ nɔ ekojoɔ lɛ naa aha lɛ hiɔ amɛjwɛŋmɔ mli, akɛ: “Shiŋŋ-feemɔ kɛji ehe miihia, kɛ mɔbɔnalɛ kɛji abaanyɛ ajie lɛ kpo.” Ejeee tɔmɔ akɛ aaatsi abɛŋkɛ mɔbɔnalɛ he yɛ kojomɔ mli kɛji ayɛ nɔdaamɔ nɔ ni sa kɛha nakai feemɔ. (Mateo 12:7) Eji tɔmɔ kpele akɛ aaafee shɛii aloo ajieee mɔbɔnalɛ kpo. (Ezekiel 34:4) Enɛ hewɔ lɛ, onukpai tsiɔ amɛhe kɛjɛɔ tɔmɔ ni amɛaatɔ̃ lɛ he kɛtsɔ mɔdɛŋbɔɔ babaoo ni amɛkɛtaoɔ gbɛ ni suɔmɔ, kɛ mɔbɔnalɛ babaoo yɔɔ mli fe fɛɛ ni amɛkɛaatsu nii, yɛ jalɛsaneyeli husui amli lɛ nɔ.—Okɛto Mateo 23:23; Yakobo 2:13 he.

Ni Aaafee Tswãa Kɛ akɛ Shihilɛi ni Tsakeɔ Kpe

 6. Yɛ mɛɛ gbɛ nɔ Yesu jie mlijɔlɛ kpo, beni ekɛ yoo Jeŋmaŋnyo ni daimonio yɔɔ ebiyoo mli lɛ wieɔ lɛ?

⁶ Taakɛ Yehowa ji lɛ, Yesu jie ehe kpo akɛ mɔ ni he yɔɔ oya ni ekɛtsakeɔ gbɛ loo etsakeɔ ehe ewoɔ shihilɛi heei amli beni amɛteɔ shi lɛ. Be ko lɛ, yoo Jeŋmaŋnyo ko kpa lɛ fai ni etsa ebiyoo ni daimonio yɔɔ emli ni ehiii kwraa lɛ. Kɛjɛ shishijee lɛ, Yesu tsɔɔ yɛ gbɛi sɔrɔtoi etɛ nɔ akɛ eyeŋ ebuaŋ yoo nɛɛ—klɛŋklɛŋ lɛ, kɛtsɔ edaaŋ ni efooo lɛ nɔ; nɔ ni ji enyɔ lɛ, kɛtsɔ wiemɔ ni ewie tɛɛ akɛ atsu lɛ kɛba Yudafoi aŋɔɔ, shi jeee Jeŋmajiaŋbii aŋɔɔ lɛ nɔ; kɛ nɔ ni ji etɛ lɛ, kɛtsɔ mfoniri-feemɔ wiemɔ ni ejɛ mlihilɛ mli ewie kɛma nakai oti lɛ nɔŋŋ nɔ mi lɛ nɔ. Shi kɛlɛ, yoo lɛ tee nɔ ekpa fai aahu yɛ enɛɛmɛi fɛɛ mli, ni ekɛye ehemɔkɛyeli ni yɔɔ sɔrɔto kwraa lɛ he odase. Beni esusu nɛkɛ shihilɛ ni yɔɔ sɔrɔto kwraa nɛɛ he lɛ, Yesu nyɛ ena akɛ jeee be ni ekɛaanyɛ mla ni kɔɔ amɛ fɛɛ amɛhe lɛ nɔ yeli nɔ doo nɛ; eji be ni ekɛaafee tswãa, yɛ shishitoo mlai ni nɔ kwɔlɔ lɛ ahe nitsumɔ mli.a Enɛ hewɔ lɛ, Yesu fee nɔ ni etsɔɔ shii etɛ sɔŋŋ akɛ efeŋ kɔkɔɔkɔ lɛ pɛpɛɛpɛ. Etsa yoo lɛ biyoo lɛ!—Mateo 15:21-28.

 7. Mɛɛ gbɛi anɔ fɔlɔi baanyɛ ajie mlijɔlɛ kpo yɛ, ni mɛni hewɔ?

⁷ Ani ale wɔ hu nakai akɛ wɔsumɔɔ ni wɔɔfee tswãa kɛji esa nakai? Esa akɛ fɔlɔi ajie nɛkɛ mlijɔlɛ nɛɛ kpo yɛ be kɛ bei amli. Akɛni esoro gbekɛ fɛɛ gbekɛ hewɔ lɛ, ekolɛ gbɛi komɛi ni tsuɔ nii yɛ gbekɛ ko gbɛfaŋ lɛ esaŋ kɛhaŋ gbekɛ kroko. Kɛfata he lɛ, beni gbekɛbii daraa lɛ, amɛhiamɔ nii tsakeɔ. Ani esa akɛ atsake be ni fɔlɔi lɛ etsɔɔ akɛ esa akɛ gbekɛbii lɛ awɔ lɛ? Ani abaana weku nikasemɔ lɛ he sɛɛ waa kɛ aha efee miishɛɛ nɔ lɛ? Kɛ fɔlɔ ko fee nii fe nine yɛ tɔmɔ bibioo ko he lɛ, ani lɛ fɔlɔ lɛ miisumɔ ni eba ehe shi koni ejaje nibii ekoŋŋ? Fɔlɔi ni ŋmɛɛɔ saji ahe yɛ nɛkɛ gbɛi anɔ lɛ tsiɔ amɛhe kɛjɛɔ amɛbii lɛ amlilawoo ni he ehiaaa, kɛ amɛhe ni amɛaaha amɛtsi kɛjɛ Yehowa he lɛ he.—Efesobii 6:4.

 8. Mɛɛ gbɛ nɔ asafoŋ onukpai lɛ baanyɛ anyiɛ hiɛ yɛ tsakemɔ ni aaatsake ni esa shikpɔŋkuku lɛ mli hiamɔ nii yɛ?

⁸ Ehe miihia ni onukpai lɛ hu atsake amɛhe amɛwo shihilɛi heei ni teɔ shi lɛ amli, yɛ be mli ni esaaa akɛ amɛŋmɛɛɔ Nyɔŋmɔ mlai pɔtɛɛ komɛi ahe ni akɛsaa hu lɛ. Beni okwɛɔ shiɛmɔ nitsumɔ lɛ nɔ lɛ, ani ohiɛ hiɔ ohe nɔ yɛ tsakemɔi ni baa yɛ shikpɔŋkuku lɛ mli lɛ ahe? Beni akutso lɛ mli shihilɛi tsakeɔ lɛ, ekolɛ esa akɛ awo gbɛkɛnaashi odaseyeli, gbɛjegbɛ he odaseyeli, aloo tɛlifon nɔ odaseyeli he hewalɛ. Tsakemɔi ni wɔɔfee yɛ nɛkɛ gbɛi anɔ lɛ yeɔ ebuaa wɔ ni wɔtsuɔ wɔshiɛmɔ nitsumɔ lɛ he nii jogbaŋŋ kɛmɔɔ shi. (Mateo 28:19, 20; 1 Korintobii 9:26) Paulo wie bɔ ni esa akɛ wɔtsake wɔhe koni esa gbɔmɛi sɔrɔtoi fɛɛ ni wɔkɛkpeɔ yɛ sɔɔmɔ nitsumɔ lɛ mli lɛ he. Akɛ nɔkwɛmɔ nɔ lɛ, ani wɔfeɔ nakai kɛtsɔɔ maŋ lɛ mli jamɔ kɛ kusumii ahe nii babaoo ni wɔɔkase lɛ nɔ, koni wɔnyɛ wɔye wɔbua gbɔmɛi lɛ?—1 Korintobii 9:19-23.

 9. Mɛni hewɔ esaaa akɛ onukpa ko kɛɔ doo akɛ ebaatsu naagbai ahe nii yɛ gbɛ ni etsɔɔ nɔ etsuɔ he nii tsutsu lɛ nɔŋŋ nɔ lɛ?

⁹ Beni naagbee gbii nɛɛ yaa nɔ emli waa lolo lɛ, ekolɛ ehe baahia ni tookwɛlɔi lɛ hu atsake amɛhe amɛwo shihilɛi ni yɔɔ haŋtsii kɛ naagbai komɛi ni yɔɔ dɔlɛ babaoo ni amɛtooi lɛ kɛkpeɔ amrɔ nɛɛ lɛ amli. (2 Timoteo 3:1) Onukpai, jeee be ni akɛfeɔ kpɛŋŋ nɛ! Eka shi faŋŋ akɛ, onukpa ko ekaŋ doo akɛ ebaatsu naagbai ahe nii taakɛ efeɔ be ko ni eho lɛ, kɛji gbɛi ni etsɔɔ nɔ lɛ mɔɔɔ shi jogbaŋŋ dɔŋŋ, aloo kɛji “tsulɔ anɔkwafo kɛ nilelɔ” lɛ ena akɛ ehi jogbaŋŋ akɛ eeeŋmala nibii heei yɛ saji ni tamɔ nakai he lɛ. (Mateo 24:45; okɛto Jajelɔ 7:10; 1 Korintobii 7:31 he.) Onukpa anɔkwafo ko kɛ anɔkwayeli ka akɛ ebaaye ebua nyɛmiyoo ko ni ehao yɛ jwɛŋmɔŋ, ni toibolɔ kpakpa he miihia lɛ waa diɛŋtsɛ. Shi kɛlɛ, ebuuu haomɔ ni ehao yɛ jwɛŋmɔŋ lɛ kwraa akɛ ehe miihia, ni ekɛ tsabaa ni esusuɔ akɛ eyɛ mlɛo lɛ ha lɛ. Kɛkɛ ni Buu Mɔɔ Asafo lɛ ŋmala saji komɛi ni damɔ Biblia lɛ nɔ, ni tsu nyɛmiyoo nɛɛ naagba lɛ diɛŋtsɛ he nii. Onukpa lɛ kai ni ekɛ lɛ yagba sane ekoŋŋ, shi yɛ enɛ mli lɛ, ekɛ saji heei lɛ tsu nii ni ejie henumɔ kpo yɛ enaagba lɛ he. (Okɛto 1 Tesalonikabii 5:14, 15 he.) Mɛɛ mlijɔlɛ he nɔkwɛmɔ nɔ fɛfɛo nɛ!

10. (a) Te esa akɛ onukpai ajie sane heŋmɛɛmɔ su kpo yɛ amɛteŋ, kɛ agbɛnɛ yɛ onukpai akuu lɛ fɛɛ gbɛfaŋ hu amɛha tɛŋŋ? (b) Te sa akɛ onukpai akuu lɛ ana mɛi ni jieɔ amɛhe kpo akɛ amɛbɛ mlijɔlɛ lɛ amɛha tɛŋŋ?

¹⁰ Esa akɛ onukpai lɛ ajie su ni tsɔɔ bɔ ni aŋmɛɛɔ sane he lɛ kpo yɛ amɛteŋ. Kɛ onukpai akuu lɛ kpe lɛ, kwɛ bɔ ni ehe hiaa waa akɛ onukpa kome pɔtɛɛ ko wiemɔ akana kpee lɛ fɛɛ nɔ hewalɛ! (Luka 9:48) Mɔ ni taa sɛi lɛ nɔ lɛ titri ehe hiaa ni eye ehe nɔ yɛ enɛ gbɛfaŋ. Ni kɛ onukpa kome loo mɛi enyɔ kɛ onukpai akuu muu lɛ fɛɛ yiŋkpɛɛ kpaaa gbee lɛ, amɛfeŋ shɛii akɛ afee nɔ ni amɛkɛɛ lɛ doo. Shi moŋ, kɛji ekuuu Ŋmalɛ naa shishitoo mla ko mli lɛ, amɛbaaŋmɛɛ he, yɛ be mli ni amɛkaiɔ akɛ aatao mlijɔlɛ yɛ onukpai ahe lɛ. (1 Timoteo 3:2, 3) Yɛ gbɛ kroko nɔ lɛ, esa akɛ onukpai akuu lɛ akai akɛ Paulo kã Korinto asafo lɛ hiɛ yɛ ‘hiɛmɛɛ ni amɛhereɔ mɛi ni bɛ yitseiaŋ,’ ni kɛ amɛhe batsɔɔ akɛ “bɔfoi agboi” lɛ hewɔ. (2 Korintobii 11:5, 19, 20) No hewɔ lɛ, esa akɛ amɛsumɔ akɛ amɛaawo amɛnaanyo onukpa ni feɔ enii kɛ kuɛŋtimɔ, yɛ gbɛ ni nilee bɛ mli nɔ lɛ ŋaa, shi amɛ diɛŋtsɛ hu lɛ, esa akɛ amɛna mlijɔlɛ kɛ mlihilɛ yɛ nakai feemɔ mli.—Galatabii 6:1.

Mlijɔlɛ yɛ Nɔyeli Hegbɛ he Nitsumɔ Mli

11. Mɛɛ sɔrɔtofeemɔ yɔɔ bɔ ni Yesu beaŋ Yudafoi ajamɔ mli hiɛnyiɛlɔi lɛ kɛ hegbɛ tsu nii, kɛ bɔ ni Yesu hu fee lɛ mli?

¹¹ Beni Yesu yɔɔ shikpɔŋ nɛɛ nɔ lɛ, emlijɔlɛ lɛ je kpo lɛlɛŋ yɛ bɔ ni ekɛ hegbɛ ni Nyɔŋmɔ kɛha lɛ lɛ tsu nii eha lɛ mli. Kwɛ bɔ ni esoro lɛ kwraa yɛ egbii lɛ amli jamɔ mli hiɛnyiɛlɔi lɛ ahe! Susumɔ nɔkwɛmɔ nɔ nɛɛ he okwɛ. Nyɔŋmɔ mla lɛ efã akɛ akatsu nitsumɔ ko kwraa, akalɛ́ lai po, yɛ Hejɔɔmɔ Gbi lɛ nɔ. (2 Mose 20:10; 4 Mose 15:32-36) Jamɔ mli hiɛnyiɛlɔi lɛ miisumɔ ni amɛkudɔ bɔ ni gbɔmɛi lɛ yeɔ nakai mla lɛ nɔ amɛhaa. No hewɔ lɛ, amɛkɔ amɛfɔ̃ amɛnɔ akɛ amɛbaawo akpɔ yɛ nɔ ni mɔ ko baanyɛ awó nɔ yɛ Hejɔɔmɔ Gbi lɛ nɔ lɛ he. Amɛwo mla akɛ: akawó nɔ ko ni tsii fe agbamii gbijii enyɔ. Amɛwo akpɔ po amɛshi tokota ni akɛ plɛkobii ekala mli, ejaakɛ amɛkɛɔ akɛ plɛkoobii ni akɛkala mli lɛ atsiimɔ lɛ nɔwomɔ tsɔɔ nitsumɔ! Awieɔ akɛ kɛ abu naa lɛ, rabifoi lɛ kɛ mlai 39 fata Nyɔŋmɔ mla ni ewo yɛ Hejɔɔmɔ Gbi lɛ he lɛ he, kɛkɛ ni amɛkɛ nibii babaoo ni bɛ naagbee fata nakai mlai lɛ ahe hu. Shi, yɛ gbɛ kroko nɔ lɛ, Yesu taooo akɛ eeekudɔ gbɔmɛi lɛ kɛtsɔ amɛ hiɛgbelewoo nɔ, kɛtsɔ mlai babaoo ni eeewo kɛtsĩ amɛ naa aloo kɛtsɔ shishitoo mlai ni yɔɔ kpɛŋŋ, ni anyɛŋ aye nɔ kɔkɔɔkɔ lɛ nɔ.—Mateo 23:2-4; Yohane 7:47-49.

12. Mɛni hewɔ wɔbaanyɛ wɔkɛɛ akɛ Yesu gbugbãaa yɛ Yehowa jalɛ shishitoo mlai lɛ ahe lɛ?

¹² Belɛ, ani esa akɛ wɔsusu akɛ Yesu kɛ shiŋŋ-feemɔ ehiɛɛɛ Nyɔŋmɔ jalɛ shishitoo mlai lɛ amli? Eka shi faŋŋ akɛ ehiɛ mli! Enu shishi akɛ, kɛ gbɔmɛi ŋɔ shishitoo tɛi ni yɔɔ mlai lɛ asɛɛ lɛ amɛto amɛtsuii amli lɛ, ehaa mlai lɛ mɔɔ shi jogbaŋŋ. Yɛ be mli ni Farisifoi lɛ ekɔ efɔ̃ amɛnɔ akɛ amɛbaakudɔ gbɔmɛi lɛ kɛtsɔ mlai babaoo ni amɛaawo nɔ lɛ, Yesu bɔ mɔdɛŋ akɛ eeeshɛ tsuii ahe. Akɛ nɔkwɛmɔ nɔ lɛ, ele akɛ esaaa ni aŋmɛɛɔ sane he, kɛji ebalɛ akɛ aawie ŋwɛi mlai tamɔ nɔ ni kɛɔ akɛ “nyɛjoa ajwamaŋbɔɔ naa foi” lɛ he. (1 Korintobii 6:18) No hewɔ lɛ, Yesu bɔ gbɔmɛi lɛ kɔkɔ eshi susumɔi ni baanyɛ ekɛ mɔ aya jeŋba shara mli lɛ. (Mateo 5:28) Nitsɔɔmɔ ni tamɔ nɛkɛ hiaa nilee kɛ sɛɛyoomɔ babaoo kwraa fe ni aaafee mlai ni yɔɔ kpɛŋŋ, ni hejɔlɛ bɛ mli ashwie shi.

13. (a) Mɛni hewɔ esa akɛ onukpai atsi amɛhe kɛjɛ mlai ni yɔɔ kpɛŋŋ ni amɛaawo lɛ he lɛ? (b) Mɛɛ nibii komɛi amli nɛkɛ ehe hiaa ni ajie bulɛ kpo atsɔɔ mɔ aŋkro henilee yɛ?

¹³ Nakai nɔŋŋ nyɛmimɛi hii ni yɔɔ sɔɔmɔ gbɛhei ŋmɛnɛ lɛ susuɔ bɔ ni amɛaafee amɛshɛ tsuii ahe lɛ he. No hewɔ lɛ, amɛtsiɔ amɛhe kɛjɛɔ mlai ni yɔɔ kpɛŋŋ, ni amɛaawo kɛkɛ, aloo amɛ diɛŋtsɛ amɛsusumɔi kɛ amɛjwɛŋmɔi ni amɛaaha etsɔ mla lɛ he. (Okɛto Daniel 6:7-16 he.) Yɛ be kɛ bei amli lɛ, kaimɔi ni akɛhaa yɛ mlihilɛ mli yɛ saji tamɔ atadewoo kɛ hesaamɔ he lɛ baafee nɔ ni sa ni eba yɛ ebe naa pɛpɛɛpɛ hu, shi onukpa lɛ baanyɛ afite egbɛi kpakpa ni eyɔɔ akɛ nuu ni yɔɔ hiɛshikamɔ lɛ kɛji emaa nakai saji lɛ anɔ mi doo, aloo ebɔ mɔdɛŋ akɛ ekɛ nibii ni tsɔɔ nɔ ni lɛ diɛŋtsɛ esumɔɔ lɛ aaafĩ mɛi krokomɛi anɔ doo lɛ. Lɛlɛŋ, esa akɛ mɔ fɛɛ mɔ ni yɔɔ asafo lɛ mli lɛ atsi ehe kɛjɛ mɛi krokomɛi ni eeeka akɛ eeekudɔ amɛ lɛ he.—Okɛto 2 Korintobii 1:24 Filipibii 2:12 he.

14. Yesu tsɔɔ akɛ emli jɔ, yɛ nɔ ni ekpaa gbɛ yɛ mɛi krokomɛi adɛŋ lɛ gbɛfaŋ yɛ mɛɛ gbɛ nɔ?

¹⁴ Onukpai lɛ baasumɔ ni amɛpɛi amɛ diɛŋtsɛ amɛmli amɛkwɛ ekoŋŋ yɛ sane kroko hu he: ‘Ani mimli jɔ yɛ nɔ ni mikpaa gbɛ kɛjɛɔ mɛi krokomɛi adɛŋ lɛ gbɛfaŋ?’ Eka shi faŋŋ akɛ Yesu fee nakai. Etee nɔ etsɔɔ esɛɛnyiɛlɔi lɛ be fɛɛ be akɛ ekpaaa nɔ kroko gbɛ kɛjɛɛɛ amɛdɛŋ, fe amɛmɔdɛŋbɔi ni jɛ amɛsusuma muu fɛɛ mli, ni ebuɔ nɛkɛ mɔdɛŋbɔi nɛɛ waa hu. Ejie yoo okulafo ohiafo lɛ yi, yɛ ekaplɛji ni jara waaa ni ekɛha lɛ he. (Marko 12:42, 43) Ekã ekaselɔi lɛ ahiɛ beni amɛwie amɛshi Maria tooyeli ni jara wa waa lɛ, ni ekɛɛ amɛ akɛ: “Nyɛfɔ̃ɔa lɛ hiɛmɔ. . . . Mɔnɛ lɛ, nɔ ni enyɛ efee nɛ.” (Marko 14:6, 8) Ekɛ mlijɔlɛ tsu nii po beni ekaselɔi lɛ ha enine nyɛ shi lɛ. Akɛ nɔkwɛmɔ nɔ lɛ, eyɛ mli akɛ ewo ebɔfoi etɛ ni bɛŋkɛ lɛ kpaakpa fe fɛɛ lɛ hewalɛ ni amɛkawɔ, ni amɛkɛ lɛ ashĩ kpe yɛ gbi gbɛkɛ beni abamɔ lɛ lɛ moŋ, shi amɛtee nɔ amɛwɔ aahu shii abɔ, ni amɛha enine nyɛ shi. Shi kɛlɛ, ekɛ musuŋtsɔlɛ wie akɛ: “Mumɔ lɛ miikpɛlɛ moŋ; shi heloo lɛ he waaa.”—Marko 14:34-38.

15, 16. (a) Mɛni hewɔ esa akɛ onukpai akwɛ jogbaŋŋ ni amɛkanyɛ asafoku lɛ nɔ loo amɛwo amɛ hiɛgbele lɛ? (b) Mɛɛ gbɛ nɔ nyɛmiyoo anɔkwafo ko tsɔ etsake nɔ ni ekpaa gbɛ kɛjɛɔ mɛi krokomɛi adɛŋ lɛ kwraa?

¹⁵ Eji anɔkwale, Yesu wo esɛɛnyiɛlɔi lɛ hewalɛ ni ‘amɛpele amɛhe waa.’ (Luka 13:24) Shi enyɛɛɛ amɛnɔ kɔkɔɔkɔ ni amɛfee nakai! Ewo amɛ mumɔ hewalɛ, efee nɔkwɛmɔ nɔ eha amɛ, enyiɛ hiɛ, ni ebɔ mɔdɛŋ akɛ eeeshɛ amɛtsuii ahe. Ekɛ ehe fɔ̃ Yehowa mumɔ lɛ hewalɛ nɔ koni etsu nɔ ni eshwɛ lɛ. Nakai nɔŋŋ esa akɛ onukpai ni yɔɔ ŋmɛnɛ lɛ awo asafoku lɛ hewalɛ ni amɛkɛ amɛtsuii fɛɛ asɔmɔ Yehowa, shi esa akɛ amɛkwa amɛhiɛ ni amɛaagbe kɛ fɔyeli kɛ hiɛgbelewoo henumɔ, ni amɛkɛmiitsɔɔ akɛ nɔ ni amɛfeɔ amrɔ nɛɛ yɛ sɔɔmɔ mli kɛha Yehowa lɛ faaa aloo ekpɛlɛɛɛ nɔ yɛ gbɛ ko nɔ. Kpɛŋŋ-feemɔ, kɛ yisɛɛ tsirɛmɔ akɛ “tsũ babaoo, tsũ babaoo, tsũ babaoo!” lɛ baanyɛ aha mɛi ni tsuɔ bɔ fɛɛ ni amɛaanyɛ lɛ anijiaŋ aje wui kwraa. Kwɛ bɔ ni eeefee dɔlɛ sane eha akɛ aaale onukpa ko akɛ mɔ ni “ewa dani anyɛɔ asaa ehiɛ”—su ni esoro no kwraa yɛ mlijɔlɛ he lɛ.—1 Petro 2:18.

¹⁶ Esa akɛ wɔ fɛɛ wɔkɛ mlijɔlɛ atsu nii yɛ nɔ ni wɔkpaa gbɛ yɛ mɛi krokomɛi ahe lɛ gbɛfaŋ! Nyɛmiyoo ko, ni ekɛ ewu shi maŋsɛɛ sanekpakpa shiɛmɔ nitsumɔ lɛ koni amɛyakwɛ yoo lɛ nyɛ ni he yeɔ lɛ ŋma akɛ: “Nɛkɛ bei nɛɛ amli wa waa diɛŋtsɛ kɛha wɔ ni ji shiɛlɔi ni yɔɔ asafoi lɛ amli lɛ. Akɛni wɔtsu nii yɛ kpokpai bibii kɛ kpokpaa wulu nɔ nitsumɔ lɛ mli, ni abu wɔhe kɛjɛ nɛkɛ nɔnyɛɛi nɛɛ pii amli hewɔ lɛ, eha ebati wɔ shi trukaa ni ekɛ nɔnyɛɛ babaoo ba wɔnɔ. Akɛ nɔkwɛmɔ nɔ lɛ, mifɔɔ mi diɛŋtsɛ mihe kɛɛmɔ akɛ, ‘Mɛni hewɔ nakai nyɛmiyoo lɛ kɛ wolo ni akɛtsuɔ nii yɛ nyɔŋ nɛɛ nɔ lɛ haaa lɛ? Ani ekaneee Maŋtsɛyeli Sɔɔmɔ lɛ?’ Agbɛnɛ mibana mile nɔ hewɔ. Yɛ mɛi komɛi agbɛfaŋ lɛ, no nɔŋŋ pɛ amɛbaanyɛ amɛfee, [akɛ amɛya shiɛmɔ].” Kwɛ bɔ ni ehi jogbaŋŋ akɛ wɔɔjie wɔnyɛmimɛi lɛ ayi yɛ nɔ ni amɛtsuɔ lɛ he, moŋ fe ni wɔɔkojo amɛ yɛ nɔ ni amɛfeee lɛ hewɔ!

17. Yesu fee nɔkwɛmɔ nɔ eha yɛ mlijɔlɛ kpojiemɔ mli yɛ mɛɛ gbɛ nɔ?

¹⁷ Susumɔ naagbee nɔkwɛmɔ nɔ ni tsɔɔ bɔ ni Yesu tsuɔ ehegbɛ he nii yɛ mlijɔlɛ mli lɛ he okwɛ. Taakɛ e-Tsɛ ji lɛ, Yesu kɛ awuŋayeli ebuuu hegbɛ ni eyɔɔ lɛ he. Lɛ hu eji mɔ ko ni ale lɛ waa akɛ ekɛ nitsumɔ woɔ mɛi krokomɛi adɛŋ, ni ehala etsulɔ anɔkwafo kuu lɛ koni ekwɛ “enii fɛɛ kwa” ni yɔɔ shikpɔŋ nɛɛ nɔ lɛ anɔ. (Mateo 24:45-47) Ni esheee gbeyei akɛ eeebo mɛi krokomɛi asusumɔi atoi. Ebi etoibolɔi lɛ yɛ be kɛ bei amli akɛ: “Te nyɛsusuɔ tɛŋŋ?” (Mateo 17:25; 18:12; 21:28; 22:42) Nakai sa akɛ efee yɛ Kristo sɛɛnyiɛlɔi fɛɛ ateŋ ŋmɛnɛ. Hegbɛ ko bɛ ni sa akɛ eha amɛfee mɛi ni sumɔɔɔ ni amɛboɔ mɛi atoi. Fɔlɔi, nyɛboa mɛi atoi! Wumɛi, nyɛboa mɛi atoi! Onukpai, nyɛboa mɛi atoi!

18. (a) Te wɔɔfee tɛŋŋ wɔle kɛji wɔyɛ gbɛi kpakpa akɛ mɛi ni mli jɔ? (b) Mɛni ebaahi akɛ wɔteŋ mɔ fɛɛ mɔ akpɛ eyiŋ akɛ eeefee?

¹⁸ Eyɛ faŋŋ akɛ, wɔteŋ mɔ fɛɛ mɔ miisumɔ ni “ena gbɛi kpakpa akɛ mɔ ni mli jɔ.” (Filipibii 4:5, Phillips) Shi te wɔfeɔ tɛŋŋ wɔleɔ akɛ wɔyɛ gbɛi kpakpa tamɔ nakai? Ojogbaŋŋ, beni Yesu taoɔ ale nɔ ni gbɔmɛi wieɔ yɛ ehe lɛ, ebi ehefatalɔi ni enyɛɔ ekɛ ehe fɔɔ amɛnɔ lɛ. (Mateo 16:13) Mɛni hewɔ onyiɛɛɛ enɔkwɛmɔ nɔ lɛ sɛɛ? Obaanyɛ obi mɔ ko ni obaanyɛ okɛ ohe afɔ enɔ akɛ ebaakɛɛ bo anɔkwale lɛ, koni ekɛɛ bo kɛ awieɔ ohe ekpakpa akɛ mɔ ni yɔɔ mlijɔlɛ, ni eŋmɛɛɔ sane he hu. Eka shi faŋŋ akɛ, nibii babaoo yɛ ni wɔ fɛɛ wɔbaanyɛ wɔfee ni wɔkɛkase Yesu mlijɔlɛ he nɔkwɛmɔ nɔ ni eye emuu lɛ jogbaŋŋ! Titri lɛ, kɛ wɔyɛ hegbɛ fioo ko yɛ mɛi krokomɛi anɔ lɛ, nyɛhaa wɔnyiɛa Yehowa kɛ Yesu nɔkwɛmɔ nɔ lɛ sɛɛ be fɛɛ be, ni wɔkɛtsu nii yɛ mlijɔlɛ gbɛ nɔ, ni wɔfee klalo daa nɛɛ akɛ wɔɔŋɔfa, wɔfee tswãa, aloo wɔŋmɛɛ sane he kɛji nakai feemɔ sa. Lɛlɛŋ, eba akɛ wɔteŋ mɔ fɛɛ mɔ aaabɔ mɔdɛŋ ni ‘wɔmli ajɔ’!—Tito 3:2.

[Shishigbɛ niŋmai]

Te Obaaha Hetoo Tɛŋŋ?

◻ Mɛni hewɔ esa akɛ Kristofoi asumɔ akɛ amɛmli aaajɔ lɛ?

◻ Mɛɛ gbɛ nɔ onukpai lɛ baanyɛ akase Yesu akɛ mɛi ni efee klalo akɛ amɛaaŋɔfa?

◻ Mɛni hewɔ esa akɛ wɔbɔ mɔdɛŋ wɔfee tswãa taakɛ Yesu ji lɛ?

◻ Mɛɛ gbɛ nɔ wɔɔtsɔ wɔjie mlijɔlɛ kpo, yɛ bɔ ni wɔkɛ hegbɛ tsuɔ nii wɔhaa lɛ mli?

◻ Mɛɛ gbɛ nɔ wɔɔtsɔ wɔpɛi wɔmli akɛ ani wɔyɛ mlijɔlɛ su lɛlɛŋ lo?

[Mfoniri ni yɔɔ baafa 15]

Yesu kɛ Petro ni shwa ehe lɛ he ke lɛ nɔŋŋ

[Mfoniri ni yɔɔ baafa 16]

Beni yoo ko jie hemɔkɛyeli sɔrɔto ko kpo lɛ, Yesu na akɛ jeee be ni ekɛaanyɛ mla ni kɔɔ amɛ fɛɛ amɛhe lɛ nɔ yeli nɔ doo nɛ

[Mfonirii ni yɔɔ baafa 18]

Fɔlɔi, nyɛboa toi!

Wumɛi, nyɛboa toi!

Onukpai, nyɛboa toi!