Ani Nyɔŋmɔ Etsɛ Bo Kɛha Toiŋjɔlɛ?

“Shi kɛ mɔ ni hee yeee lɛ miigbala ehe shi lɛ; ayeee nyɛminuu loo nyɛmiyoo nyɔŋ yɛ nɛkɛ saji nɛɛ amli. shi hejɔlɛ mli Nyɔŋmɔ tsɛ wɔ yɛ.”​—1 KORINTOBII 7:⁠15.

 1. Te esa akɛ asusu gbalashihilɛ he yɛ Ŋmalɛ naa aha tɛŋŋ?

YEHOWA etoko eyiŋ kɔkɔɔkɔ akɛ esa akɛ nɔ ni aajɛ kpeemɔ mli aba lɛ afee mligbalamɔ loo gbalamlitsemɔ ni kumɔɔ mɔ tsui. Ato ni gbalashihilɛ afee ‘heloo kome’ tsakpaa ni hiɔ shi kɛyaa naanɔ, ni nɔ ni jɛɔ mli baa ji miishɛɛ, hejɔɔmɔ kɛ toiŋjɔlɛ. (1 Mose 2:​24; Rut 1:⁠9) Yɛ fɛɛ mli lɛ, Ŋmalɛ lɛ woɔ mɛi ni amɛbote gbalashihilɛ mli lɛ ŋaa ni amɛhi shi yɛ he kome, kɛji akɛ hefatalɔ kome ji Kristofonyo ni mɔ kroko lɛ ji mɔ ni heee yeee lɛ. (1 Korintobii 7:​12-16) Agbɛnɛ, nifeemɔi ni tsɔɔ anɔkwale ni ayeee ni nɔ ni jɛɔ mli baa ji gbalashihilɛ wekukpaa lɛ mlitsemɔ lɛ haa mɔ bafeɔ mɔ ni baabu ehe akɔntaa aha Nyɔŋmɔ, mɔ ni ‘nyɛɔ ŋa shwiemɔ’ lɛ.​—Maleaki 2:​13-16.

 2. Te Kristofoi susuɔ mligbalamɔ kɛ gbalamlitsemɔ he amɛhaa tɛŋŋ?

² Emuu ni adesa yeee kɛ nibii krokomɛi kɛ mligbalamɔ loo gbalamlitsemɔ baa Nyɔŋmɔ tsuji ni abaptisi amɛ lɛ ateŋ yɛ bei komɛi amli. Shi yɛ bulɛ ni nɔ kwɔ ni Kristofoi yɔɔ kɛha gbalashihilɛ hewɔ lɛ, yɛ bei babaoo mli lɛ, atsɔɔ gbɛi ni tamɔ nɛkɛ nɔ yɛ be mli ni abɔ mɔdɛŋ waa ni aha gbalashihilɛ lɛ ahi shi yɛ ekomefeemɔ mli lɛ sɛɛ. Nyɔŋmɔ diɛŋtsɛ toɔ okadi ni kwɔ fe fɛɛ yɛ enɛ mli. Akɛ blema Israel ‘wu kɛ nɔtsɛ’ lɛ, eŋmɛ etsui shi yɛ afii ohai abɔ kuɛŋtimɔ, atuatsemɔ kɛ mumɔŋ gbalafitemɔ yɛ ewebii lɛ agbɛfaŋ lɛ mli. (Yesaia 54:​1-5; Yeremia 3:​14-17; Hoshea 1:​10, 11; 3:​1-5) Beni amɛtee kɛyashɛ he ni anyɛŋ akpɔ amɛ dɔŋŋ lɛ dani Yehowa shɛ amɛ efɔ kwraa akɛ maŋ.​—Mateo 23:​37, 38.

 3. (a) Mɛɛ yiŋtoi ni Ŋmalɛi lɛ ŋmɛɔ gbɛ Kristofonyo baanyɛ adamɔ nɔ ekɛ egbalashihilɛ mli hefatalɔ agbala mli? (b) Ŋmalɛ naa gbalamlitsemɔ baa yɛ mɛɛ shihilɛi ashishi?\

³ Yɛ bei komɛi amli lɛ, nanemɛi heyelilɔi baa asafoŋ onukpai aŋɔɔ ni amɛmiitao yelikɛbuamɔ yɛ amɛgbalashihilɛ mli naagbai ni hiɛdɔɔ yɔɔ mli lɛ mli. Akɛ hegbɛ hako onukpai lɛ akɛ amɛkɛɛ mɔ ko akɛ eshi egbalashihilɛ hefatalɔ lɛ loo ekɛ lɛ atse gbala mli, shi amɛbaanyɛ amɛtsɔɔ nɔ ni Nyɔŋmɔ Wiemɔ lɛ kɛɔ yɛ saji ni tamɔ nɛkɛ he. Taakɛ atsɔɔ yɛ nikasemɔ ni tsɔ hiɛ lɛ mli lɛ, Biblia lɛ ŋmɛɔ mligbalamɔ gbɛ yɛ nɔ ni aje gbɛ akwɛɛɛ weku lɛ, yii ni naa wa tsɔ, aloo mumɔŋ shihilɛ ni akɛwoɔ oshara mli kwraa lɛ mli. Ayoo hu akɛ Ŋmalɛ naa gbalamlitsemɔ ni abaanyɛ akɛ hefatalɔ kroko abote gbalashihilɛ mli yɛ wɔsɛɛ be mli lɛ baanyɛ aba kɛji akɛ hefatalɔ lɛ ‘ebɔ ajwamaŋ,’ ni kɔɔ bɔlɛnamɔ mli jeŋba sharai sɔrɔtoi ahe lɛ. (Mateo 19:⁠9) Shi, esaaa akɛ mligbalamɔ loo gbalamlitsemɔ feɔ sane lɛ naamuu kwraa, ejaakɛ abaanyɛ aha toiŋjɔlɛ aba gbalashihilɛ lɛ mli ekoŋŋ ni gbalashihilɛ mli hefatalɔ ni yeee fɔ lɛ baanyɛ ni ekɛ gbalafitemɔ loo ajwamaŋbɔɔ mli nifeemɔi krokomɛi ake.​—Mateo 6:​31, 32; okɛto Hoshea 3:​1-3 he.

 4. (a) Tsɔɔmɔ nɔ ni Paulo kɛɛ Kristofoi ni amɛbote gbalashihilɛ mli yɛ 1 Korintobii 7:​10-16 lɛ mli kuku. (b) Mɛɛ be mli abaanyɛ akɛɛ akɛ: “Nyɔŋmɔ etsɛ nyɛ kɛha toiŋjɔlɛ”?

⁴ Taakɛ wɔyoo yɛ nikasemɔ ni tsɔ hiɛ lɛ mli lɛ, bɔfo Paulo wo Kristofoi ni amɛbote gbalashihilɛ mli lɛ ŋaa akɛ amɛkashi amɛhefatalɔi. (1 Korintobii 7:​10-16) Yɛ Paulo wiemɔi nɛɛ hewɔ lɛ, kɛji akɛ hefatalɔ ni heee yeee lɛ hala akɛ ekɛ e-Kristofonyo gbalashihilɛ mli hefatalɔ ni heɔ yeɔ lɛ aaahi shi lɛ, esa akɛ heyelilɔ lɛ abɔ mɔdɛŋ aye abua lɛ yɛ mumɔŋ. (1 Petro 3:​1-4) Etsakemɔ lɛ baafee babaoo ni eha shia lɛ afee toiŋjɔlɛ kɛ hejɔɔmɔ he. Ni kɛlɛ, kɛji akɛ mɔ ni heee yeee lɛ kpoo ehefatalɔ ni heɔ yeɔ lɛ hemɔkɛyeli lɛ waa akɛ ehala akɛ eeegbala mli loo eeetse ehe lɛ, mɛni Kristofonyo lɛ baanyɛ afee? Kɛji akɛ heyelilɔ lɛ bɔ mɔdɛŋ akɛ eeenyɛ nuu loo yoo lɛ nɔ ni ehi shi lɛ, mɔ ni heee yeee lɛ baanyɛ aha shihilɛ lɛ afee nɔ ni eŋɔɔɔ kwraa akɛ Kristofonyo lɛ toiŋjɔlɛ fɛɛ baaje edɛŋ. No hewɔ lɛ yɛ toiŋjɔlɛ hewɔ lɛ, heyelilɔ lɛ baanyɛ aŋmɛ gbɛ ni mɔ ni heee yeee lɛ aya. (Mateo 5:⁠9) Beni gbalashihilɛ mli hefatalɔ ni heee yeee lɛ aaashi loo aaagbala ehe shi kɛaaya lɛ pɛ aaanyɛ akɛɛ akɛ: ‘Nyɔŋmɔ etsɛ bo kɛha toiŋjɔlɛ.’ Anyɛŋ akɛ nɛkɛ wiemɔi nɛɛ atsu nii yɛ gbɛ ni ja nɔ ni akɛba mligbalamɔ ni aaaba Kristofoi ni ji gbalashihilɛ mli hefatalɔi enyɔ lɛ ateŋ ni damɔɔɔ ŋmalɛ nɔ loo eji saji ni he ehiaaa lɛ bem.

 5. Mɛɛ sanebimɔi esa akɛ wɔsusu he agbɛnɛ?

⁵ Mligbalamɔ loo gbalamlitsemɔ fɛɛ ni baa lɛ yɛ nibii pɔtɛɛ ni kɔɔ eko fɛɛ eko he, ni “tsabaa” loo shishitoo mla ko bɛ ni kɔɔ sane fɛɛ sane he. Shi mɛɛ naagbai Kristofonyo ni ekɛ ehefatalɔ egbala mli loo amɛtse gbala mli lɛ kɛbaakpe? Mɛni abaanyɛ afee yɛ he? Ni mɛi krokomɛi baanyɛ aye abua yɛ mɛɛ gbɛ nɔ?

Henumɔŋ Loo Bɔlɛnamɔ Mli Hiamɔ Nii

 6. Yɛ naagbai ahe lɛ, mɛni abaanyɛ awie yɛ mligbalamɔ loo gbalamlitsemɔ he?

⁶ Mligbalamɔ loo gbalamlitsemɔ ni damɔ Ŋmalɛ nɔ lɛ baanyɛ atsu naagbai komɛi ahe nii. Shi klɛŋklɛŋ lɛ nɔ ni jɛɔ nifeemɔ ni tamɔ nɛkɛ mlibaa ji naagbai komɛi ni akɛtsakeɔ ekrokomɛi. Akɛ nɔkwɛmɔ nɔ lɛ, Kristofonyo ko ni etse gbala mli kɛɛ: “Minyɛɛɛ mafee nɔ ko akɛ ja mida Yehowa shi akɛ agbɛnɛ mina toiŋjɔlɛ.” Shi ekpɛlɛ nɔ akɛ: “Ebɛ mlɛo akɛ fɔlɔ kome aaatsɔse gbekɛbii. Eshɛɔ be ni onuɔ he akɛ eshwɛ okome too ni onuɔ nɔnyɛɛ he. Yɛ bɔlɛnamɔ mli po lɛ, ebɛ mlɛo. Esa akɛ mɔ ko atsake eshihilɛ fɛɛ.”a

 7. Mɛni hewɔ esa akɛ Kristofonyo lɛ asusu nɔ ni baajɛ mligbalamɔ loo gbalamlitsemɔ mli aba lɛ he jogbaŋŋ lɛ?

⁷ No hewɔ lɛ kɛji akɛ Kristofonyo lɛ yɛ nɔ ni ebaahala po lɛ, esa akɛ esusu nɔ ni baajɛ mligbalamɔ loo gbalamlitsemɔ lɛ mli aba lɛ he jogbaŋŋ diɛŋtsɛ. Akɛ nɔkwɛmɔ nɔ lɛ, susumɔ henumɔŋ hiamɔ nii ahe, ekolɛ bɔ ni yoo lɛ baashwe akɛ ena nuu ko ni ji ehefatalɔ lɛ. (Okɛto 1 Mose 3:16 he.) Yoo ni etse gbala mli lɛ yɛ hiɛnɔkamɔ ni mli wa akɛ ebaaku sɛɛ ebote gbalashihilɛ mli ekoŋŋ. Mɛi komɛi shweɔ ni amɛje gbalashihilɛ ni kaa mɔ waa lɛ mli, shi ani amɛfee klalo akɛ amɛbaakpɛlɛ nɔ ni baanyɛ aba ni ji gbalashihilɛ mli botemɔ ekoŋŋ ni ekolɛ amɛnaŋ dɔŋŋ lɛ nɔ?

 8. (a) Yɛ sane ni yɔɔ 1 Korintobii 7:11 lɛ hewɔ lɛ, mɛni esa akɛ gbalashihilɛ mli hefatalɔi ni ji Kristofoi lɛ kɛ sɔlemɔ asusu he? (b) Mɛni nibii esaaa akɛ abaa amɛ shi beni asusuɔ mligbalamɔ loo gbalamlitsemɔ he lɛ?

⁸ Paulo ŋma akɛ: “Ni kɛji etse gbala lɛ tete lɛ, ehi shi nakai, ni ekagba, aloo ekɛ ewu lɛ ayakpata.” (1 Korintobii 7:11) Kɛ abɔ mɔdɛŋ lɛ, eeenyɛ eba akɛ yoo lɛ baanyɛ ni ekɛ ewu lɛ ‘akpata’ aloo ‘asaa amɛteŋ.’ Kɛji akɛ hefatalɔi ni ji Kristofoi egbala mli lɛ, belɛ esa akɛ amɛkɛ hiɛdɔɔ, kɛ sɔlemɔ asusu saamɔ he jogbaŋŋ. Agbɛnɛ hu, esaaa akɛ amɛkuɔ amɛhiɛ amɛshwieɔ anɔkwale ni eji akɛ bɔlɛnamɔ mli henumɔi baanyɛ atsɔ oshara aha amɛ lɛ nɔ. Te Nyɔŋmɔ baabu amɛ aha tɛŋŋ kɛji akɛ nyɛ ni amɛnyɛɛɛ amɛsaa amɛteŋ nɛɛ ha amɛyagbee jeŋba shara mli lɛ? Nɔ ni feɔ nɛkɛ oshara nɛɛ he nɔkwɛmɔ nɔ ji niiashikpamɔ ko ni yoo ko ni abaptisi lɛ lɛ na lɛ. Beni etse gbala mli lɛ sɛɛ lɛ, eje shishi akɛ ekɛ jeŋnyo ko aaanyiɛ, etsɛɛɛ ni eŋɔ hɔ, ni ashwie lɛ kɛjɛ asafo lɛ mli. Eyɛ mli akɛ aku sɛɛ ahe lɛ ekoŋŋ yɛ sɛɛ mli moŋ, shi eniiashikpamɔ lɛ maa bɔ ni ehe hiaa akɛ akwɛ jogbaŋŋ ni akɛ he afɔ Yehowa nɔ yɛ sɔlemɔ mli bɔni afee ni akwa ‘esha ni aaafee ashi Nyɔŋmɔ’ lɛ nɔ mi. (1 Mose 39:​7-12) Eka shi faŋŋ hu akɛ esaaa akɛ abaa henumɔŋ kɛ bɔlɛnamɔŋ hiamɔ nii ashi beni aje shishi aasusu mligbalamɔ loo gbalamlitsemɔ he lɛ.

Abaanyɛ Aba He Ni Feɔ Shoo Shi

 9. Te wɔɔfee tɛŋŋ wɔye wɔbua Kristofoi ni amɛgbala mli loo amɛtse gbala mli lɛ koni amɛnyɛ amɛdamɔ amɛhe ni feɔ shoo lɛ naa?

⁹ Kɛji akɛ anyɛŋ akwa loo atsi mligbalamɔ loo gbalamlitsemɔ naa lɛ, belɛ sa akɛ anyɛ adamɔ naagbai ni baajɛ mli aba lɛ naa. Akɛ nɔkwɛmɔ nɔ lɛ, shoofeemɔ ji naagba ni hiɛdɔɔ yɔɔ mli kɛha Kristofoi ni amɛgbala mli loo amɛtse gbãla mli. Mɛni ji nɔ ni mɛi krokomɛi baanyɛ afee yɛ enɛ he? Ojogbaŋŋ, asafoŋ onukpai kɛ mɛi krokomɛi baanyɛ ajie mumɔŋ miishɛɛ ni amɛyɔɔ yɛ nɛkɛ aŋkroaŋkroi nɛɛ ahe lɛ kpo, ni amɛtao amɛ ni amɛwo amɛ hewalɛ. (Okɛto 1 Tesalonikabii 5:14 he.) Kɛfata nibii krokomɛi ahe lɛ, wɔbaanyɛ wɔfɔ nine wɔtsɛ nɛkɛ gbɔmɛi nɛɛ kɛ amɛbii kɛba wɔshia ni amɛbaye nɔ ko fioo ni wɔweku lɛ kɛ amɛ agba saji ni tswaa mɔ emaa shi yɛ be kɛ bei amli. Ehe ehiaaa ni aŋmɛ okpɔlɔ wulu ko, ejaakɛ “shwie ni suɔmɔ yɔɔ he lɛ ehi fe tsina ni ewo fɔ ni nyɛɛ yɔɔ he.” (Abɛi 15:17) Yɛ gbɛkɛnaashi lɛ abaanyɛ agba niiashikpamɔi ni ŋɔɔ ni ana yɛ sɔɔmɔ nitsumɔ lɛ mli aloo abaanyɛ akase nii kutuu ni akɛsaa he aha Kristofoi akpeei.

10, 11. (a) Mɛɛ gbɛ kroko hu nɔ abaanyɛ atsɔ aye abua Kristofonyo ni egbala mli loo etse gbala mli yɛ? (b) Mɛɛ yiŋtoo hewɔ esa akɛ akwɛ he jogbaŋŋ lɛ?

¹⁰ Ni oooha fɔlɔ ni kɛ ehefatalɔ egbala mli loo amɛtse gbala mli lɛ kɛ ebii aaabafata nyɛweku lɛ he yɛ sɔɔmɔ nitsumɔ lɛ mli lɛ hu baanyɛ aye abua amɛ ni amɛdamɔ shoofeemɔ naa. Eji anɔkwale akɛ, mɛi krokomɛi nyɛŋ aye fɔlɔ ni bɛ lɛ najiaŋ, shi Kristofonyo yoo ko ni ekɛ ehefatalɔ etse gbala mli lɛ kɛɛ: “Tɔlɛ ni baa kɛjɛɔ mibii lɛ atsɔsemɔ ni nuu ko bɛ shia ni fata he lɛ mli lɛ naa eba shi saŋŋ yɛ yelikɛbuamɔ ni asafoŋ onukpai lɛ kɛ sɔɔlɔi lɛ ebɔ mɔdɛŋ amɛkɛha mi yɛ gbɛi sɔrɔtoi anɔ lɛ hewɔ.”

¹¹ Ni kɛlɛ, esa akɛ akwɛ he nɔ jogbaŋŋ yɛ enɛ mli. Nyɛmiyoo ko kpɛlɛ nɔ akɛ: “Akɛni mibinuu lɛ efee mɔ ni bɛ tsɛ hewɔ lɛ, nyɛminuu ko kɛ mlihilɛ na ehe miishɛɛ. . . . Mije shishi mina bɔ ni emli hi ha mibinuu lɛ yɛ bɔ ni ekeɔ lɛ nii lɛ hewɔ, kɛkɛ ni akɔnɔi ni ehiii je shishi amɛbɔi mimli baa. Etamɔ David ni miina akɔnɔ fɔŋ kɛmiiha nɔ ko ni jeee enɔ.” (2 Samuel 11:​1-4) Eyɛ mli akɛ bɔlɛnamɔ mli jeŋba shara ko baaa moŋ, shi yoo nɛɛ hiɛ gbo yɛ esusumɔi kɛ hedɔɔ loo yiŋflɛflɛ nifeemɔi nɛɛ ahewɔ, ni etao Yehowa dɛŋ eshaifaa, ni ekpa nakai nyɛminuu lɛ kɛbɔɔ. Kwɛ bɔ ni enɛ feɔ akɔnɔ fɔŋ ni aaakpoo kwraa lɛ he nɔkwɛmɔ nɔ jogbaŋŋ ehaa ni ‘wɔtsi wɔhe kɛjɛ nɔ fɛɛ nɔ ni hiɛ efɔŋ su lɛ he’! ​—1 Tesalonikabii 5:​22, The New American Bible; Galatabii 5:⁠24.

12. Mɔ ko baanyɛ aba shoo ni ehe feɔ lɛ shi kɛtsɔ mɛni ni hi ni ebaafee nɔ?

¹² Shoofeemɔ baanyɛ aba shi kɛtsɔ nii ni aaafee aha mɛi krokomɛi lɛ nɔ. Nyɛmiyoo ko ni egbala mli etse lɛ kɛɛ: “Kɛji akɛ obɛ deka yɛ mɛi krokomɛi ayelikɛbuamɔ mli lɛ, gbɛ ko baŋ ni aaaha ona ohe mɔbɔ loo onu he akɛ ohe efee shoo.” Nɔ ni baanyɛ afata ‘yelikɛbuamɔ’ ni mɛi ni amɛgbala mli loo amɛtse gbala mli lɛ kɛhaa lɛ he ji weku ko ni mɔ lɛ aaatsɛ amɛ kɛaaba eshia koni ekɛ amɛ ana mumɔŋ naanyobɔɔ ni tswaa mɔ emaa shi mli ŋɔɔmɔ yɛ gbɛkɛ ko. Kɛji akɛ enɛ nyɛŋ ahi yɛ shika mli naagbai loo nibii krokomɛi ahewɔ lɛ, obaanyɛ oya ni oyasara helatsɛmɛi loo mɛi krokomɛi ni owo amɛ hewalɛ. Obaanyɛ oye obua mɛi ni amɛdara yɛ afii amli hu lɛ ni ohe amɛ jara nɔ nibii oha amɛ loo otsu nitsumɔi krokomɛi oha amɛ. Okɛ ohe aha yɛ nɛkɛ gbɛi nɛɛ anɔ, ni obaana odaseyeli ni ka shi faŋŋ akɛ “nɔhamɔ mli yɛ jɔɔmɔ fe hemɔ” lɛ.​—Bɔfoi lɛ Asaji 20:⁠35.

13. Mɛni ji nɔ kroko ni yeɔ buaa he ni feɔ shoo nɔ kunim ni ayeɔ lɛ?

¹³ Yelikɛbuamɔ nɔ kroko ni haa ayeɔ he ni feɔ shoo nɔ kunim ji hegbɛ ni oooŋɔ daa ni ofata nanemɛi heyelilɔi ahe yɛ Maŋtsɛyeli shiɛmɔ nitsumɔ lɛ mli. Nyɛmiyoo ko kpɛlɛ nɔ akɛ: “Bei komɛi amli lɛ, minuɔ he akɛ mihe efee shoo ni miitao wu, shi yɛ be mli ni mihaa sɔɔmɔ nitsumɔ lɛ yaa hiɛ kɛ heyeli hee ni mina ni mikɛ minyɛmimɛi hii kɛ yei lɛ aaabɔle hewɔ lɛ, nɛkɛ bei nɛɛ feɔ nɔ ni efɔɔɔ kaa ni esɛɛ etsɛɛɛ dɔŋŋ.” Shia-kɛ-shia odaseyeli ni afeɔ daa baanyɛ ekɛ sɛɛsaramɔi kɛ shia Biblia mli nikasemɔi ni akɛ mɛi ni yɔɔ wiemɔ lɛ he miishɛɛ lɛ feɔ lɛ aba ni amɛteŋ mɛi komɛi baanyɛ atsɔmɔ Yehowa sɔɔlɔi ni amɛjɔɔ amɛhe nɔ. Shi, he ni feɔ shoo ni wɔɔye nɔ kunim lɛ jeee yiŋtoo hewɔ ni wɔkɛ wɔhe woɔ sɔɔmɔ nitsumɔ lɛ mli lɛ, shi ebaanyɛ efee nɔ ni baajɛ miishɛɛ kɛ nitsumɔ ni jɔɔmɔ yɔɔ mli nɛɛ fa nɛɛ mli aba.​—Abɛi 10:⁠22.

14. Mɛɛ nitsumɔi esa akɛ ena Kristofoi ni amɛgbala mli loo amɛtse gbala mli lɛ anɔ hewalɛ yɛ gbɛ kpakpa nɔ?

¹⁴ Yehowa webii fɛɛ baanyɛ ana mumɔŋ sɛɛnamɔi kɛjɛ sɔɔmɔ nitsumɔ lɛ mli ni amɛkɛ amɛhe woɔ, Kristofoi akpeei ni amɛyaa kɛ ‘Maŋtsɛyeli lɛ klɛŋklɛŋ ni amɛtaoɔ’ lɛ hewɔ. (Mateo 6:33) Akɛni nɛkɛ nitsumɔi kpakpai nɛɛ naa Yehowa tsuji fɛɛ anɔ hewalɛ kpakpa hewɔ lɛ, nɛkɛ nitsumɔi nɛɛ baanyɛ atswa Kristofoi ni amɛgbala mli loo amɛtse gbala mli lɛ hu ama shi. Dabi, nɛkɛ nitsumɔi nɛɛ kɛ tsabaa haŋ amɛnaagbai lɛ fɛɛ, shi ebaanyɛ eye ebua ni amɛshihilɛ ahi.

Sɔlemɔ Tsuɔ Titri

15. Mɛni sɔlemɔ baanyɛ atsu yɛ mɛi ni esa akɛ amɛhi shi akɛ oshijafoi ekoŋŋ lɛ ashihilɛ mli?

¹⁵ Aye abua Kristofonyo yoo ko ni ehe ebahia akɛ etsɔ oshijafonyo ekoŋŋ lɛ kɛtsɔ “ehe ni ekɛaawo sɔɔmɔ nitsumɔ lɛ mli kwraa . . . kɛ helatsɛmɛi, mɛi ni amɛdara yɛ afii amli kɛ mɛi ni amɛkpa shiɛmɔ nitsumɔ lɛ ni eeesara amɛ lɛ nɔ.” Shi nyɛmiyoo nɛɛ kɛfata he akɛ: “Be fɛɛ be ni manu he akɛ mihe efee shoo lɛ, miyasaraa mɛi ni misɔleɔ mibiɔ hewalɛ, akɛni mile akɛ Satan hiɛ edɔ waa lɛ hewɔ.” Hɛɛ, sɔlemɔ ni jɛ tsuiŋ tɔɔ lɛ he miihia kɛ aaanyɛ ahiɛ emuuyeli mli aha Nyɔŋmɔ. Nɔ ni baanyɛ afata Kristofoi ni amɛgbala mli loo amɛtse gbala mli lɛ asɔlemɔi ahe ji ni amɛbi Yehowa mumɔ lɛ kɛ eyibii ni ji henɔyeli bɔni afee amɛnyɛ amɛyɛ bɔlɛnamɔŋ henumɔi anɔ. (Luka 11:​13; Galatabii 5:22, 23; Kolosebii 3:​5, 6) Agbɛnɛ, akɛni kɛ wu ko kpɛ eyiŋ lɛ eeenyɛ ekɛ naagbai abaha yei komɛi ni amɛkɛ amɛhefatalɔi egbala mli loo amɛtse gbala mli lɛ hewɔ lɛ, ehe baahia ni amɛ hu amɛsɔle amɛbi Nyɔŋmɔ yelikɛbuamɔ koni amɛnyɛ amɛkpɛ amɛyiŋ yɛ saji ahe yɛ nilee mli ni amɛnyɛ amɛdamɔ kaai sɔrɔtoi anaa.​—Yakobo 1:​2-8.

16. Yɛ mligbalamɔ loo gbalamlitsemɔ he lɛ, mɛni abaanyɛ akɛɛ yɛ fɔyeli he ni anuɔ lɛ he?

¹⁶ Henumɔi ni aaana akɛ aye fɔ lɛ baanyɛ ewa waa kɛha mɔ ko. Kristofonyo ko kpɛlɛ nɔ akɛ: “Fɔyeli ni onuɔ he beni otse gbala mli, yɛ be mli ni ojeee hefatalɔ ni yeɔ fɔ po lɛ baanyɛ ana onɔ hewalɛ.” Shi, anuɔ fɔyeli henumɔi ashishi kɛji akɛ mligbalamɔ loo gbalamlitsemɔ lɛ ba akɛni mɔ ko kpoo akɛ eeetsu gbalashihilɛ mli gbɛnaa nii lɛ ahe nii yɛ gbɛ ni ejaaa nɔ lɛ hewɔ. (1 Korintobii 7 :​3-5) Shi kɛji akɛ mligbalamɔ loo gbalamlitsemɔ lɛ ba yɛ Ŋmalɛ naa yiŋtoo ko hewɔ yɛ be mli ni atsɔ sɔlemɔ nɔ asusu sane lɛ he lɛ, ebaafee nɔ ni ja gbɛ akɛ aaasɔle aha Yehowa kɛha eyelikɛbuamɔ ni aye fɔyeli mli henumɔi ni esaaa lɛ anɔ kunim. Abaanyɛ akɛfata he akɛ asafoŋ onukpai lɛ akwɛ jogbaŋŋ ni amɛkɛ ŋaawoo ni damɔ Biblia lɛ nɔ aha shi jeee ŋaawoo ni tsii ni baaha Kristofonyo lɛ anu he akɛ eye fɔ yɛ gbɛ ni eŋmɛ loo akɛna mligbalamɔ loo gbalamlitsemɔ ni Biblia lɛ ŋmɛɔ gbɛ lɛ hewɔ.

‘Nyɔŋmɔ Toiŋjɔlɛ Lɛ’ Buɔ Wɔhe

17. Mɛni baanyɛ aye ebua Kristofoi fɛɛ ni amɛna miishɛɛ ni amɛdamɔ shi shiŋŋ yɛ jeŋ ni haomɔ yɔɔ mli nɛɛ mli?

¹⁷ Yɛ bei babaoo mli lɛ Kristofoi ni amɛgbala mli loo amɛtse gbala mli lɛ kɛ naagbai ni ekaaa kpeɔ. Kɛlɛ, “nakai amanehului lɛ nɔŋŋ [wɔ] nyɛmimɛi ni yɔɔ je lɛŋ lɛ hu naa.” (1 Petro 5:6-11) Akɛ nɔkwɛmɔ nɔ lɛ, yiwaa saa mɛi fɛɛ ni sɔmɔɔ Yehowa lɛ ahe, ni Kristofoi babaoo kɛ shika mli naagbai loo gbɔmɔtsoŋ hewalɛnamɔ mli naagbai, nijiaŋwujee, kaai kɛ nibii krokomɛi kpeɔ. No hewɔ lɛ, taakɛ Yehowa Odasefoi krokomɛi ji lɛ, ehe miihia ni Kristofoi ni amɛgbala mli loo amɛtse gbala mli lɛ atsu mumɔŋ hiamɔ nii ahe nii kɛtsɔ Biblia kasemɔ, daa kpeei ni aaaya, sɔɔmɔ nitsumɔ lɛ mli ni akɛ he aaawo, sɔɔmɔ krɔŋkrɔŋ ni akɛ he fɛɛ haa, kɛ daa sɔlemɔ nɔ, koni ahi shi akɛ mɛi ni bɛŋkɛ Yehowa he kpaakpa. (Mateo 5:⁠3) Kɛ wɔfeee nakai lɛ ekɛ Kristofonyo lɛ mumɔŋ shihilɛ aaawo oshara mli, yɛ be mli ni ‘Maŋtsɛyeli lɛ klɛŋklɛŋ ni aaatao’ lɛ kɛ miishɛɛ kɛ shiŋŋfeemɔ falɛ ko haa Yehowa Odasefonyo anɔkwafo lɛ yɛ jeŋ ni haomɔ yɔɔ mli nɛɛ mli.

18. Mɛɛ sanebimɔi kɛ nifeemɔ gbɛi esa akɛ Kristofoi ni ji gbalashihilɛ mli hefatalɔi ni amɛgbala mli lɛ kɛ hiɛdɔɔ asusu he?

¹⁸ Wɔmumɔŋ shihilɛ ni baadamɔ shi shiŋŋ lɛ damɔ Nyɔŋmɔ Wiemɔ lɛ ni wɔ diɛŋtsɛ lɛ wɔkɛaatsu nii yɛ wɔshihilɛ mli lɛ nɔ. No hewɔ lɛ, kɛ oji Kristofonyo ni okɛ ogbalashihilɛ mli hefatalɔ ni lɛ hu eji mɔ ni ejɔɔ ehe nɔ eha Nyɔŋmɔ egbala mli lɛ, ani okɛ Paulo ŋaawoo ni yɔɔ 1 Korintobii 7:​10-16 lɛ eto otsui mli? Titri lɛ kɛji akɛ mligbalamɔ lɛ etee nɔ be saŋŋ lɛ, ebaahi jogbaŋŋ aha nyɛ akɛ nyɛkɛ kpatamɔ loo saamɔ aaafee nyɛsɔlemɔ ni hiɛdɔɔ yɔɔ mli. Obaanyɛ obi ohe hu akɛ: Mɛni Yehowa taoɔ yɛ midɛŋ akɛ mɔ ni ebote gbalashihilɛ mli? Ani esaaa akɛ hefatalɔi Kristofoi haa amɛshihilɛ kɛ ŋwɛi taomɔ nii kɛha mɛi ni amɛbote gbalashihilɛ mli lɛ kpaa gbee? Ani eeenyɛ eba akɛ wɔnine shɛɛɛ Yehowa jɔɔmɔ nɔ ejaakɛ wɔkɛ woo haaa wɔgbalashihilɛ mli kitakamɔi loo shiwoi lɛ? Belɛ susumɔ nɔ kpakpa ni baanyɛ aba kɛji akɛ nyɛsusu sane lɛ he yɛ heshibaa mli, okɛ hiɛdɔɔ sɔle yɛ he, ni okɛ hiɛmiamɔ bɔ mɔdɛŋ koni okɛ Nyɔŋmɔ Wiemɔ lɛ atsu nii yɛ oshihilɛ mli lɛ he. Kwɛ bɔ ni ebaafee nɔ ni hi jogbaŋŋ akɛ nyɛyi enyɔ lɛ nyɛaasaa nyɛgbalashihilɛ mli naagbai lɛ ni nyɛna shihilɛ mli ŋɔɔmɔ ekoŋŋ yɛ shia ni hejɔɔmɔ kɛ toiŋjɔlɛ yɔɔ mli lɛ mli!

19. Taakɛ Filipibii 4:​6, 7 tsɔɔ lɛ, mɛni ji nɔ ko ni jara wa waa ni Nyɔŋmɔ tsuji fɛɛ baanyɛ ana mli ŋɔɔmɔ?

¹⁹ Nɔ ko he miihia Nyɔŋmɔ tsuji anɔkwafoi fɛɛ ni amɛbaanyɛ amɛna nii ni jara wa nɛɛ mli ŋɔɔmɔ​—“Nyɔŋmɔ toiŋjɔlɛ ni fe jwɛŋmɔi fɛɛ lɛ.” Akɛ Kristofoi lɛ, wɔbaanyɛ wɔna nɛkɛ toiŋjɔlɛ ni tamɔ jwetri nɛɛ kɛji akɛ wɔbo Paulo wiemɔi nɛɛ atoi: “Nyɛkahaoa yɛ nɔ ko nɔ ko he, shi moŋ nɔ fɛɛ nɔ mli lɛ nyɛkɛ sɔlemɔ kɛ faikpamɔ kɛ shidaa atsia nyɛtutɔmɔi lɛ ata yɛ Nyɔŋmɔ hiɛ; ni Nyɔŋmɔ toiŋjɔlɛ ni fe jwɛŋmɔi fɛɛ lɛ aaato nyɛtsuii kɛ nyɛjwɛŋmɔi lɛ yɛ Kristo Yesu mli.”​—Filipibii 4:​6, 7, New World Translation.

20. (a) Mɛni ji “Nyɔŋmɔ toiŋjɔlɛ” lɛ? (b) Bɔ fɛɛ bɔ ni wɔgbalashihilɛ shidaamɔ ji ha lɛ, mɛni esa akɛ wɔfee?

²⁰ Nakai toiŋjɔlɛ lɛ ji kpoo kɛ dioofeemɔ loo hejɔlɛ ni Nyɔŋmɔ kɛhaa, yɛ shihilɛi ni mli wawai ashishi po. Ebaa kɛjɛɔ wekukpaa ni bɛŋkɛ kpaakpa ni akɛ Yehowa naa kɛ nilee akɛ wɔmiifee nɔ ni sa ehiɛ lɛ mli. Mɛi ni yɔɔ “Nyɔŋmɔ toiŋjɔlɛ” lɛ ŋmɛɔ emumɔ lɛ gbɛ koni ekanya amɛ, ni yeyeeyefeemɔ gbaaa amɛnaa. Mɛni hewɔ? Ejaakɛ aŋmɛɛɛ gbɛ ni nɔ ko nɔ ko aba amɛnɔ ja nɔ ni ji ŋwɛi gbɛŋmɛɛ nɔ. (Efesobii 4:​30; okɛto Bɔfoi lɛ Asaji 11:26 he.) No hewɔ lɛ kɛji akɛ wɔji oshijafoi loo wɔbote gbalashihilɛ mli, wɔgbala mli loo wɔtsɛ gbala mli hu lɛ, nyɛhaa wɔsumɔa “Nyɔŋmɔ toiŋjɔlɛ” lɛ. Ni eba akɛ wɔɔna hekɛnɔfɔɔ ni David na lɛ nɔŋŋ eko, mɔ ni jaje akɛ: “Toiŋjɔlɛ mli kwraa po ni maka shi mawɔ yɛ; ejaakɛ bo, Yehowa, okome ohaa mihiɔ shi shweshweeshwe.”​—Lala 4:​8, New World Translation.

[Shishigbɛ niŋmai]

Te Obaaha Hetoo Oha Tɛŋŋ?

◻ Mɛɛ shihilɛi ashishi aaanyɛ akɛɛ akɛ: “Nyɔŋmɔ etsɛ nyɛ kɛha toiŋjɔlɛ”?

◻ Mɛɛ gbɛ nɔ aaatsɔ aba he ni feɔ shoo shi?

◻ Mɛni esa akɛ esɔlemɔ atsu yɛ Kristofonyo ni egbala mli loo etse gbala mli Iɛ shihilɛ mli?

◻ Mɛɛ gbɛ nɔ obaatsɔ otao “Nyɔŋmɔ toiŋjɔlɛ” ni buɔ Yehowa tsuji ni ji oshijafoi, mɛi ni ebote gbalashihlɛ mli, amɛgbala mli, aloo amɛtse gbala mli Iɛ atsuii ahe Iɛ mli yɛ?

[Mfoniri ni yɔɔ baafa 29]

Sɔlemɔ baanyɛ ni ekɛ “Nyɔŋmɔ toiŋjɔlɛ” ni baabu amɛtsuii kɛ jwɛŋmɔŋ nyɛmɔi ahe abaha anɔkwa Kristofoi fɛɛ