Mɛni Ji Kristojamɔ Diɛŋtsɛ Naa Samfele?
ŊMƐNƐ, gbɔmɛi babaoo kɛɔ akɛ amɛyɛ Kristojamɔ mli fe jamɔ fɛɛ jamɔ ni yɔɔ je lɛ mli. Shi nɛkɛ mɛi ni tsɛɔ amɛ diɛŋtsɛ amɛhe Kristofoi nɛɛ ahemɔkɛyelii teɔ shi woɔ amɛhe, ekomefeemɔ bɛ amɛteŋ, ni bei komɛi po lɛ amɛgbeɔ amɛhe. Eyɛ faŋŋ akɛ, amɛteŋ mɛi pii jeee Kristofoi diɛŋtsɛ. Yesu kɛɛ akɛ, wɔgbii nɛɛ amli lɛ, mɛi pii baakɛɛ lɛ akɛ, “Nuŋtsɔ, Nuŋtsɔ,” aloo yɛ wiemɔ kroko mli lɛ, amɛbaakɛɛ Kristofoi ji amɛ, ni kɛlɛ ebaakɛɛ amɛ akɛ: “Mileee nyɛ kwraa, nyɛjea minɔ nyɛyaa, nyɛ mɛi ni nyɛtsuɔ nibii ni ejaaa gbɛ!” (Mateo 7:21, 23) Eka shi faŋŋ akɛ, wɔteŋ mɔ ko mɔ ko sumɔŋ ni efata mɛnɛɛmɛi ahe! No hewɔ lɛ te wɔɔfee tɛŋŋ wɔle kɛji Kristofoi diɛŋtsɛ ji wɔ lɛ?
Anɔkwale lɛ ji akɛ, nibii pii ahe miihia kɛha Kristofonyo diɛŋtsɛ ni mɔ ko aaafee. Esa akɛ Kristofonyo diɛŋtsɛ lɛ ana hemɔkɛyeli mi mli wa ejaakɛ “kɛ hemɔkɛyeli bɛ lɛ, anyɛŋ Nyɔŋmɔ hiɛ asa.” (Hebribii 11:6) Esa akɛ nitsumɔ ni ja afata nakai hemɔkɛyeli ni mli wa lɛ he. Kaselɔ Yakobo bɔ kɔkɔ akɛ “hemɔkɛyeli ni nitsumɔi bɛ he lɛ ji hemɔkɛyeli gbonyo.” (Yakobo 2:26) Kɛfata he lɛ, esa akɛ Kristofonyo lɛ akpɛlɛ hegbɛ ni “tsulɔ anɔkwafo kɛ nilelɔ” lɛ yɔɔ lɛ nɔ. (Mateo 24:45-47) Shi yɛ enɛɛmɛi fɛɛ sɛɛ lɛ, Kristojamɔ diɛŋtsɛ naa samfele lɛ kɔɔ nɔ kroko he.
Mɛni ji samfele lɛ? Bɔfo Paulo tsɔɔ mli yɛ eklɛŋklɛŋ wolo ni eŋma eyaha Korintobii lɛ mli akɛ: “Kɛji mikɛ gbɔmɛi kɛ ŋwɛibɔfoi alilɛii wieɔ, shi mibɛ suɔmɔ lɛ, kulɛ mitsɔ tamɔ ayawa ni jijeɔ loo ŋmɛlɛ ni gbɛɔ. Ni kɛji miyɛ gbalɛ, ni minaa teemɔŋ nii fɛɛ naa, ni mile nii fɛɛ, ni kɛji miyɛ hemɔkɛyeli fɛɛ hu, bɔ ni manyɛ gɔji matsirɛ, shi mibɛ suɔmɔ lɛ, jikulɛ mijeee nɔ ko. Ni kɛji miŋɔ minii fɛɛ mikuma mɛi, ni kɛji miŋɔ migbɔmɔtso miha ni ashã mi, shi mibɛ suɔmɔ lɛ, jikulɛ minaaa sɛɛ ko.”—1 Korintobii 13:1-3.
No hewɔ lɛ, suɔmɔ ji nɔ titri ni akɛyɔseɔ Kristojamɔ diɛŋtsɛ. Hemɔkɛyeli, nitsumɔi, kɛ naanyobɔɔ ni ja he miihia, anyɛŋ ashi nomɛi asɛɛ kɔkɔɔkɔ. Shi kɛ suɔmɔ bɛ lɛ, anyɛŋ ana sɛɛnamɔ ni yɔɔ amɛhe. Mɛni hewɔ?
Klɛŋklɛŋ kwraa lɛ, ejɛ Nyɔŋmɔ ni wɔjaa lɛ lɛ hewɔ. Bɔfo Yohane tsɔɔ bɔ ni Yehowa, anɔkwa Kristojamɔ Nyɔŋmɔ lɛ ji lɛ mli yɛ nɛkɛ wiemɔi nɛɛ amli akɛ: “Nyɔŋmɔ lɛ, suɔmɔ ji lɛ.” (1 Yohane 4:8) Yehowa Nyɔŋmɔ yɛ sui krokomɛi babaoo, tamɔ hewalɛ, jalɛsaneyeli, kɛ nilee, shi akɛni nɔ ni kadiɔ lɛ fe fɛɛ ji Nyɔŋmɔ ni yɔɔ suɔmɔ ni eji lɛ hewɔ lɛ, mɛɛ gbɔmɛi nɛkɛ ebaasumɔ ni mɛi ni jaa lɛ lɛ afee? Eka shi faŋŋ akɛ, aŋkroaŋkroi ni kaseɔ lɛ ni amɛjieɔ suɔmɔ kpo.—Mateo 5:44, 45; 22:37-39.
Henumɔ ko ni Ja
Hɛɛ, suɔmɔ haa Kristofoi feɔ amɛnii tamɔ Nyɔŋmɔ ni amɛjaa lɛ lɛ. Etsɔɔ akɛ henumɔi ni amɛyɔɔ lɛ tamɔ Nyɔŋmɔ henumɔi nɔŋŋ. Mɛɛ henumɔ ni fe fɛɛ tsirɛ Yehowa Nyɔŋmɔ ni etsu Yesu kɛba shikpɔŋ lɛ nɔ koni ekɛ hegbɛ abaha wɔ ni wɔna naanɔ wala lɛ? Suɔmɔ. “Ejaakɛ nɛkɛ Nyɔŋmɔ sumɔɔ je lɛ, akɛ eŋɔ e-Bi koome lɛ eha, koni mɔ fɛɛ mɔ ni heɔ enɔ yeɔ lɛ hiɛ akakpata, shi moŋ ena naanɔ wala.” (Yohane 3:16) No hewɔ lɛ, belɛ, mɛni esa akɛ efee wɔhenumɔ yɛ Nyɔŋmɔ suɔmɔnaa nifeemɔ mli? Shikome ekoŋŋ lɛ, suɔmɔ. “Ejaakɛ enɛ ji Nyɔŋmɔ suɔmɔ lɛ, akɛ wɔye ekitai lɛ anɔ.”—1 Yohane 5:3.
Ani eeenyɛ ebalɛ akɛ aaasɔmɔ Nyɔŋmɔ kɛ jwɛŋmɔ loo henumɔ ni ejaaa? Hɛɛ. Paulo tsi mɛi komɛi ni hi shi yɛ egbii amli ni amɛkɛ hetsɛ kɛ mpleshii sɔmɔɔ lɛ ata. (Filipibii 1:15-17) Enɛ baanyɛ aba wɔ hu wɔnɔ. Akaŋshii mumɔ yɛ je nɛɛ mli waa, ni nakai mumɔ lɛ baanyɛ asa wɔhe. Ekolɛ wɔkɛ henɔwomɔ baanyɛ asusu akɛ wɔji wielɔ ni he esa loo wɔnyɛɔ wɔkɛ woji babaoo haa fe mɛi krokomɛi. Ekolɛ wɔkɛ sɔɔmɔ hegbɛi ni wɔyɔɔ lɛ baato nɔ ni mɔ kroko ko naa mli ŋɔɔmɔ lɛ he ni eeeha wɔwo wɔhe nɔ—aloo wɔna hetsɛ po. Onukpa ko baanyɛ aye hegbɛ ni eyɔɔ lɛ he awuŋa, aahu po akɛ eeebɔ mɔdɛŋ ni etsi obalanyo ko ni yɔɔ nyɛmɔ lɛ naa bɔni afee ni ekaya ehiɛ. Suɔmɔ ni wɔɔna akɛ wɔna sɛɛ wɔha wɔ diɛŋtsɛ wɔhe lɛ baanyɛ atsirɛ wɔ ni wɔkɛ Kristofoi ni yɔɔ nii babaoo lɛ abɔ naanyo ni wɔshi mɛi ni ji ohiafoi lɛ.
Nɛkɛ nibii nɛɛ baanyɛ aba ejaakɛ wɔyeee emuu. Shi kɛlɛ, kɛji—wɔha suɔmɔ fee nɔ ni kanyaa wɔ—tamɔ Yehowa lɛ, no lɛ wɔɔwuu wɔshi nɛkɛ henumɔi nɛɛ. Hiɛjoomɔ, suɔmɔ ni wɔɔna akɛ wɔɔwo wɔ diɛŋtsɛ wɔhiɛ nyam, aloo henɔwomɔ baanyɛ agbe nakai suɔmɔ lɛ kwraa, ni no lɛ ‘wɔnaaa sɛɛ ko kwraa,’—Abɛi 11:2; 1 Korintobii 13:3.
Suɔmɔ yɛ Pɛsɛmkunya Jeŋ ko Mli
Yesu kɛɛ akɛ esɛɛnyiɛlɔi lɛ baafee mɛi ni “jɛɛɛ je lɛ mli.” (Yohane 17:14) Te wɔɔfee tɛŋŋ wɔtsi wɔhe kɛjɛ hewalɛ ni jeŋ ni ebɔle wɔhe lɛ aaanyɛ ana yɛ wɔnɔ lɛ he hu? Suɔmɔ baaye abua wɔ. Akɛ nɔkwɛmɔ nɔ lɛ, ŋmɛnɛ, gbɔmɛi etsɔmɔ “mɛi ni sumɔɔ shwɛmɔ-kɛ-ŋɔɔmɔ fe Nyɔŋmɔ.” (2 Timoteo 3:4) Yohane bɔ wɔ kɔkɔ ni wɔkafee tamɔ amɛ. Ekɛɛ: “Nyɛkasumɔa je lɛ aloo nibii hu ni yɔɔ je lɛŋ. Kɛji mɔ ko miisumɔ je lɛ, belɛ Tsɛ lɛ suɔmɔ lɛ bɛ emli; ejaakɛ nɔ fɛɛ nɔ ni yɔɔ je lɛŋ lɛ, heloo lɛ sɛɛdii nii lɛ kɛ hiŋmɛii lɛ asɛɛdii nii lɛ kɛ shihilɛ lɛ mli hewoo lɛ, ejɛɛɛ Tsɛ lɛ mli, shi moŋ je lɛ mli ejɛ.”—1 Yohane 2:15, 16.
Ni kɛlɛ, ebɛ mlɛo kwraa akɛ wɔɔkpoo “heloo lɛ sɛɛdii nii lɛ” kɛ “hiŋmɛii lɛ asɛɛdii nii lɛ.” Wɔsumɔɔ nɛkɛ nibii nɛɛ, ni nɔ hewɔ pɔtɛɛ ji, ejaakɛ amɛfeɔ wɔheloo lɛ akɔnɔ. Nɔ ni fe fɛɛ lɛ, miishɛjemɔ nibii pii kɛ sɔrɔtoi babaoo hu yɛ ŋmɛnɛ fe bɔ ni yɔɔ yɛ Yohane gbii lɛ amli lɛ, ni no hewɔ lɛ kɛji hiŋmɛii lɛ asɛɛdii nii lɛ ji naagba yɛ nakai beaŋ lɛ, no lɛ eji naagba titri waa ŋmɛnɛ.
Miishɛɛ sane ji akɛ, ŋmɛnɛŋmɛnɛ beaŋ miishɛjemɔ nibii ni je lɛ kɛhaa lɛ jeee nɔ ni tɔmɔ ko yɔɔ he. Tɔmɔ ko kwraa bɛ shia agbo ni mɔ ko yɔɔ, aloo kar fɛfɛo, televishin, aloo redio ni gbɛɔ waa ni eyɔɔ lɛ he. Ni nakai nɔŋŋ hu, ni aaafa gbɛ kɛya maŋsɛɛ shɔŋŋ kɛha miishɛɛnamɔ kɛ hejɔɔmɔ lɛ ekuuu Biblia mli mla ko kwraa mli. Belɛ mɛni ji oti ni yɔɔ Yohane kɔkɔbɔɔ lɛ mli mɔ? Nɔ kome ji akɛ, kɛji nɛkɛ nibii nɛɛ bafee nibii ni he hiaa wɔ fe nine lɛ, no lɛ amɛhaa hiɛjoomɔ, heloonaa ninamɔ, kɛ henɔwomɔ mumɔ naa shishifa yɛ wɔmli. Ni mɔdɛŋ ni wɔɔbɔ ni wɔna shika koni wɔnine kɛshɛ nibii nɛɛ anɔ lɛ baanyɛ atsi sɔɔmɔ ni wɔkɛhaa Yehowa lɛ naa. Ni nakai nibii lɛ amli miishɛɛnamɔ po heɔ be, ni eyɛ mli akɛ hejɔɔmɔ ni fa bɔ ni sa lɛ haa mɔ he jɔɔ lɛ moŋ, shi Kristofonyo lɛ be faaa kwraa, yɛ gbɛnaa nii ni ka enɔ akɛ ekase Biblia lɛ, ekɛ nanemɛi Kristofoi krokomɛi akpe kɛha jamɔ, ni eshiɛ Maŋtsɛyeli lɛ he sanekpakpa lɛ hewɔ.—Lala 1:1-3; Mateo 24:14; 28:19, 20; Hebribii 10:24, 25.
Ebiɔ faishitswaa diɛŋtsɛ yɛ nɛkɛ yinɔ ni sumɔɔ heloo naa ninamɔ nɛɛ mli dani ‘akɛ Nyɔŋmɔ Maŋtsɛyeli lɛ aye klɛŋklɛŋ gbɛhe’ ni ate shi ashi ‘nii ni akɛ je lɛ aaatsu kɛmɔ shi.’ (Mateo 6:33; 1 Korintobii 7:31) Hemɔkɛyeli ni mli wa baanyɛ aye abua. Shi titri lɛ, anɔkwa suɔmɔ ni wɔɔna wɔha Yehowa kɛ wɔnanemɛi lɛ baawaje wɔ ni wɔnyɛ wɔte shi wɔwo nibii ni lakaa wɔ, yɛ be mli ni amɛjeee nibii ni tɔmɔ yɔɔ he, shi amɛtsiɔ wɔ gbɛ koni wɔkanyɛ ‘wɔgbe wɔsɔɔmɔ nitsumɔ lɛ naa kwraa’ lɛ. (2 Timoteo 4:5) Kɛji wɔbɛ suɔmɔ ni tamɔ nɛkɛ lɛ, no lɛ wɔsɔɔmɔ nitsumɔ lɛ baaba shi kwraa kɛyashɛ mɔdɛŋbɔɔ bibioo ko kɛkɛ ni wɔkɛaawo mli lɛ mli.
Suɔmɔ yɛ Asafo lɛ Mli
Yesu ma bɔ ni suɔmɔ he hiaa ha lɛ nɔ mi beni ekɛɛ nɛkɛ lɛ: “Kɛji nyɛsumɔɔ nyɛhe lɛ, no mɛi fɛɛ kɛaale akɛ mikaselɔi ji nyɛ.” (Yohane 13:35) Mɛni hewɔ ni kulɛ onukpai baahe be babaoo ni amɛkwɛ amɛnanemɛi Kristofoi lɛ anɔ ni amɛkɛye amɛbua amɛ hu kɛji amɛbɛ suɔmɔ kɛha amɛ? Mɛni hewɔ ni asafo lɛ mlibii lɛ baana mli amɛha amɛnanemɛi yɛ amɛgbɔjɔmɔi ahewɔ—kɛ onukpai lɛ tete po—kɛ jeee suɔmɔ ni amɛyɔɔ lɛ hewɔ? Suɔmɔ tsirɛɔ Kristofoi ni amɛyeɔ amɛbuaa amɛhe yɛ heloo gbɛfaŋ kɛji amɛna amɛle akɛ efi mɛi krokomɛi lɛ. (Bɔfoi lɛ Asaji 2:44, 45) Yɛ yiwaa bei amli lɛ, Kristofoi buɔ amɛnanemɛi krokomɛi ahe ni amɛgboiɔ amɛhaa amɛhe po. Mɛni hewɔ? Yɛ suɔmɔ hewɔ.—Yohane 15:13.
Bei krokomɛi lɛ, suɔmɔ he odaseyelii kpelei lɛ jeɔ kpo yɛ nibii bibii amli. Ekolɛ, naanyo Kristofonyo ko kɛ sane ko ni he ehiaaa onukpa ko lɛ baaku sɛɛ aba onukpa nɛɛ ni ekolɛ eyɛ enitsumɔ nɔnyɛɛ shishi momo lɛ ŋɔɔ ekoŋŋ. Ani esa akɛ onukpa lɛ mli afu? Yɛ nɔ najiaŋ ni eeeŋmɛ enɛ gbɛ ni etsɔ nɔ ni baagbala amɛteŋ lɛ, ekɛ enyɛmi lɛ baaye yɛ tsuishitoo kɛ mlihilɛ mli moŋ. Amɛbaasusu sane lɛ he kutuu shikome ekoŋŋ, ni eeeha amɛtsɔmɔ nanemɛi ni bɛŋkɛ amɛhe kpaakpa fe tsutsu lɛ po. (Mateo 5:23, 24; 18:15-17) Yɛ nɔ najiaŋ ni amɛteŋ mɔ fɛɛ mɔ aaakɛɛ lɛ esane ja moŋ lɛ, esa akɛ amɛteŋ mɔ fɛɛ mɔ abɔ mɔdɛŋ ni ena tsuishitoo ni Yesu jie yi lɛ eko, ni efee klalo akɛ ekɛ sane aaake enyɛmimɛi “shii kpawo toi nyɔŋmai kpawo.” (Mateo 18:21, 22) No hewɔ lɛ, Kristofoi bɔɔ mɔdɛŋ waa ni amɛwo suɔmɔ tamɔ awoɔ atade lɛ, “suɔmɔ ni ji emuuyeli kpaa lɛ.”—Kolosebii 3:14.
Ni Wɔɔha Suɔmɔ ni Wɔyɔɔ Wɔha Wɔhe lɛ Mli Awa
Hɛɛ, suɔmɔ ji henumɔ kpakpa ni akɛsɔmɔɔ Yehowa. Suɔmɔ baawaje wɔ ni wɔya nɔ wɔtsi wɔhe kɛjɛ je lɛ he, ni suɔmɔ baakwɛ koni asafo lɛ aya nɔ ahi shi akɛ Kristofoi asafo lɛlɛŋ. Eyɛ mli akɛ etsɔɔɔ akɛ akatsu nii jogbaŋŋ moŋ, shi ebaaye ebua mɛi ni yɔɔ gbɛhei amli lɛ ni amɛjwɛŋmɔ akahi nii ni amɛaatsu jogbaŋŋ ni emɔ shi lɛ pɛ nɔ ni amɛhiɛ miikpa mlihilɛ kɛ mlijɔlɛ gbɛ ni amɛaatsɔ nɔ amɛkɛ mɛi krokomɛi aye lɛ nɔ. Suɔmɔ yeɔ ebuaa wɔ fɛɛ koni ‘wɔbo wɔtsɔɔlɔi lɛ atoi ni wɔba wɔhe shi wɔha amɛ.’—Hebribii 13:17.
Bɔfo Petro wo wɔ hewalɛ ni wɔna “suɔmɔ ni . . . mli wa” wɔha wɔhe ejaakɛ “suɔmɔ haa eshai babaoo nɔ.” (1 Petro 4:8) Mɛɛ gbɛ nɔ wɔɔtsɔ wɔfee enɛ? Abɔ gbɔmɔ yɛ Nyɔŋmɔ subaŋ nɔ, ni no hewɔ lɛ eyɛ adebɔɔ mli nyɛmɔ ko ni haa enaa suɔmɔ. Shi nɔ kroko hu he miihia yɛ suɔmɔ ni wɔwieɔ he yɛ biɛnɛɛ lɛ mli. Yɛ anɔkwale mli lɛ, no ji Nyɔŋmɔ mumɔ lɛ yibii lɛ mli oti fe fɛɛ. (Galatabii 5:22) No hewɔ lɛ, kɛji wɔɔna suɔmɔ lɛ, no lɛ esa akɛ wɔha Nyɔŋmɔ mumɔ lɛ ana wɔnɔ hewalɛ. Yɛ mɛɛ gbɛ nɔ? Kɛtsɔ Biblia lɛ, ni ajɛ Yehowa mumɔ mli aŋma lɛ kasemɔ nɔ. (2 Timoteo 3:16) Kɛtsɔ sɔlemɔ ni wɔɔsɔle wɔbi Yehowa mumɔ lɛ ni eha suɔmɔ ni wɔyɔɔ kɛha Yehowa kɛ wɔnyɛmimɛi lɛ aya hiɛ lɛ nɔ. Kɛ agbɛnɛ kɛtsɔ Kristofoi asafo lɛ, he ni mumɔ lɛ hoɔ yɛ ni nɔ ko etsiii enaa lɛ ni wɔkɛaabɔ lɛ hu nɔ.
Ehe miihia hu ni wɔkwɛ wɔmli jogbaŋŋ koni wɔna wɔnifeemɔ kɛ susumɔi ni etsɔɔɔ suɔmɔ lɛ fɛɛ. Kaimɔ akɛ, suɔmɔ ji tsui lɛ mli nifeemɔ ko, ni “tsui yɔɔ nɛɛ, eyi tɔ kɛ kutumpɔo fe nii fɛɛ, ni esane ehiii kwraa.” (Yeremia 17:9) Yɛ yelikɛbuamɔ ni Yehowa kɛhaa wɔ lɛ fɛɛ sɛɛ lɛ, bei komɛi lɛ wɔfeɔ wɔnii yɛ gbɛ ni suɔmɔ bɛ mli nɔ. Ekolɛ wɔkɛ wɔnaanyo Kristofonyo ko aaawie wiemɔi ni wa ni he ehiaaa, aloo wɔmli aaanyɛ afu yɛ nɔ ko ni mɔ ko aaakɛɛ lɛ hewɔ. No hewɔ lɛ, wɔɔfee jogbaŋŋ akɛ wɔɔti David sɔlemɔ nɛɛ mli: “Mawu, taomɔ mimli, ni ole mitsuiŋ; kaa mi okwɛ, ni oyoo mijwɛŋmɔi! Ni okwɛ akɛ minyiɛ gbɛ fɔŋ ko nɔ lo, ni okpala mi kɛya naanɔ gbɛ lɛ nɔ.”—Lala 139:23, 24.
Taakɛ Biblia lɛ kɛɔ lɛ, “suɔmɔ sɛɛ efooo gbi ko gbi ko.” (1 Korintobii 13:8) Kɛji wɔkaseɔ bɔ ni wɔɔfee wɔna suɔmɔ wɔha wɔhe lɛ, no lɛ wɔfeŋ mɛi ni etɔ fa yɛ kaa be mli kɔkɔɔkɔ. Suɔmɔ ni yɔɔ Nyɔŋmɔ webii ateŋ lɛ yeɔ ebuaa babaoo yɛ mumɔŋ paradeiso shihilɛ ni yɔɔ ŋmɛnɛ lɛ gbɛfaŋ. Mɛi ni yɔɔ suɔmɔ ni mli wa waa kɛha amɛhe kɛjɛ amɛtsuiiaŋ tɔɔ lɛ pɛ baana jeŋ hee lɛ mli hilɛ he miishɛɛ. No hewɔ lɛ, kasemɔ Yehowa yɛ suɔmɔ ni tamɔ nakai lɛ kpojiemɔ mli koni otsɔ nakai feemɔ nɔ oha ekomefeemɔ kpaa lɛ mli awa. Jiemɔ suɔmɔ kpo, koni ona Kristojamɔ diɛŋtsɛ naa samfele lɛ.