Yehowa Saa Gbɛ lɛ

“Aaashiɛ maŋtsɛyeli lɛ he sanekpakpa nɛɛ.”—MATEO 24:⁠14.

 1. Mɛni anyɛ atsu kɛtsɔ shiɛmɔ nitsumɔ lɛ ni tee nɔ yɛ klɛŋklɛŋ afii oha lɛ kɛ afii ohai 20 lɛ fɛɛ mli lɛ mli?

AKƐNI Yehowa ji Nyɔŋmɔ ni yɔɔ suɔmɔ hewɔ lɛ, esuɔmɔnaa nii ji ni “ehere gbɔmɛi [srɔtoi, NW] fɛɛ yiwala, koni amɛshɛ anɔkwale lɛ lee mli.” (1 Timoteo 2:⁠4) Enɛ ebi shiɛmɔ kɛ nitsɔɔmɔ he tafaa yɛ majimaji ateŋ. Yɛ klɛŋklɛŋ afii oha lɛ mli lɛ, nɛkɛ shiɛmɔ nɛɛ ha Kristofoi asafo lɛ bafee “anɔkwale lɛ akulashiŋ kɛ enɔdaamɔ nɔ̃.” (1 Timoteo 3:​15) No sɛɛ lɛ, hemɔkɛyeli kwamɔ be kakadaŋŋ ko te shi ni anɔkwale la lɛ bafee sulii. Yɛ nyɛsɛɛ bei nɛɛ amli, yɛ “naagbee be” nɛɛ mli lɛ, “anɔkwale nilee” (NW) efa babaoo ekoŋŋ, ni ekɛ naanɔ wala he hiɛnɔkamɔ ni damɔ Biblia nɔ ebaha gbɔmɛi akpekpei abɔ.​—⁠Daniel 12:⁠4.

 2. Yehowa etsu mɛni kɛtsɔ shiɛmɔ nitsumɔ lɛ nɔ?

² Yɛ mɔdɛŋ ni baaa shi ni Satan bɔɔ koni efite Nyɔŋmɔ yiŋtoo lɛ fɛɛ sɛɛ lɛ, shiɛmɔ nitsumɔ lɛ ni tee nɔ yɛ klɛŋklɛŋ afii oha lɛ kɛ afii ohai 20 lɛ mli lɛ fɛɛ eye omanye. Ehaa wɔkaiɔ Yesaia gbalɛ lɛ. Yesaia ŋma yɛ Yuda nomii ni kuɔ amɛsɛɛ kɛbaa Yuda yɛ afii ohai ekpaa D.Ŋ.B. lɛ mli lɛ he akɛ: “Awó jɔɔ fɛɛ jɔɔ nɔ, ni aha gɔji kɛ ŋmeŋmei fɛɛ aba shi, ni aha hei ni yɔɔ dokoidokoi lɛ afee trɛnɛɛ, ni hei ni yɔɔ gɔjigɔji lɛ afee kplanaa.” (Yesaia 40:⁠4) Yehowa hu esaa gbɛ kɛha shiɛmɔ he tafaa wuji lɛ yɛ klɛŋklɛŋ afii oha lɛ kɛ afii ohai 20 lɛ fɛɛ mli ni eha enɔ efee trotro.

 3. Mɛɛ gbɛ̀i anɔ Yehowa nyɛɔ etsɔɔ etsuɔ eyiŋtoi ahe nii yɛ?

³ Enɛ etsɔɔɔ akɛ Yehowa kɛ ehe wo nɔ fɛɛ nɔ ni tee nɔ yɛ shikpɔŋ nɔ lɛ mli koni eha sanekpakpa lɛ shiɛmɔ aya hiɛ; ni asaŋ etsɔɔɔ akɛ Yehowa kɛ nii ni etsɔɔ hiɛ eleɔ lɛ tsu nii koni ekɛle nɔ fɛɛ nɔ ni baaba lɛ mli fitsofitso. Wɔkpɛlɛɔ nɔ akɛ enyɛɔ enaa ni enyɛɔ ekudɔɔ wɔsɛɛ be mli saji ni baaba. (Yesaia 46:​9-11) Shi enyɛɔ etsuɔ saji ni baa lɛ ahe nii hu. Yehowa nyiɛɔ ewebii ahiɛ tamɔ tookwɛlɔ ni he esa ni le bɔ ni ebuɔ ni efãa etooku he lɛ feɔ lɛ. Enyiɛ amɛhiɛ kɛtee yiwalaheremɔ he, ebu amɛmumɔŋ shihilɛ lɛ he ni ekanya amɛ koni amɛkɛ shihilɛi kɛ saji ni baa ni haa sanekpakpa lɛ shiɛmɔ yɛ jeŋ fɛɛ lɛ yaa hiɛ lɛ atsu nii.​—Lala 23:​1-⁠4.

Nitsumɔ ko ni Wa

4, 5. Mɛni hewɔ sanekpakpa lɛ shiɛmɔ efee nitsumɔ ni kaa mɔ waa nakai lɛ?

⁴ Taakɛ adeka lɛ kpɛɛ ji yɛ Noa gbii lɛ amli lɛ, Maŋtsɛyeli shiɛmɔ nitsumɔ lɛ efee nitsumɔ ko ni da naakpa​—yɛ klɛŋklɛŋ afii oha lɛ kɛ ŋmɛnɛŋmɛnɛ beaŋ fɛɛ. Shɛɛ sane fɛɛ shɛɛ sane ni akɛaaya gbɔmɛi srɔtoi fɛɛ aŋɔɔ lɛ wa waa, shi nitsumɔ nɛɛ efee nɔ ni kaa mɔ waa. Kɛ akɛaato he lɛ, kaselɔi lɛ ayi faaa yɛ klɛŋklɛŋ afii oha lɛ mli. Ágbe amɛ-Hiɛnyiɛlɔ Yesu akɛ maŋjwalɔ. Áto Yudafoi ajamɔ lɛ ama shi jogbaŋŋ. Sɔlemɔtsu fɛfɛo ko ma Yerusalem. Áto jamɔi ni jeee Yudafoi ajamɔ ni yɔɔ Mediteranea niiaŋ lɛ hu he gbɛjianɔ jogbaŋŋ, kɛ sɔlemɔtsui kɛ osɔfoyelii. Nakai nɔŋŋ hu beni “naagbee be” lɛ je shishi yɛ afi 1914 lɛ, no mli lɛ Kristofoi ni afɔ amɛ mu lɛ ayi faaa, ni mɛi ni kɛ amɛhe ekpɛtɛ jamɔi ni kɛɔ akɛ amɛsɔmɔɔ Nyɔŋmɔ lɛ ahe lɛ ayi fa.​—Daniel 12:⁠9.

⁵ Yesu ebɔ esɛɛnyiɛlɔi lɛ kɔkɔ akɛ abaawa amɛyi. Ekɛɛ: “Gbɔmɛi aaajie nyɛ amɛwo amanehulu mli ni amɛaagbe nyɛ, ni jeŋmaji fɛɛ aaanyɛ nyɛ yɛ migbɛi lɛ hewɔ.” (Mateo 24:⁠9, NW) Nɔ ni fata haomɔi nɛɛ ahe, titri lɛ yɛ “naagbee gbii lɛ” amli ji akɛ, Kristofoi baana amɛhe yɛ ‘jaramɔ bei ni mli wa’ mli. (2 Timoteo 3:⁠1) Bɔ ni nitsumɔ lɛ da ha, bɔ ni ekã shi faŋŋ akɛ yiwaa baaba, kɛ bɔ ni bei lɛ amli wa ha lɛ eha shiɛmɔ nitsumɔ lɛ efee nɔ ni kaa mɔ, ni wa. Efee nɔ ni hemɔkɛyeli babaoo he hiaa.

 6. Mɛɛ omanyeyeli he nɔmimaa Yehowa kɛha ewebii lɛ?

⁶ Yɛ be mli ni Yehowa le akɛ nibii amli baawa lɛ, ele hu akɛ nɔ ko nɔ ko bɛ ni baanyɛ atsĩ nitsumɔ lɛ naa. Agba omanye ni ebaaye lɛ yɛ gbalɛ ko ni ale jogbaŋŋ ni miiba mli yɛ naakpɛɛ gbɛ nɔ yɛ klɛŋklɛŋ afii oha lɛ kɛ afii ohai 20 lɛ mli fɛɛ lɛ mli, akɛ: “Ni aaashiɛ maŋtsɛyeli lɛ he sanekpakpa nɛɛ atsɔɔ je nɛŋ fɛɛ.”​—Mateo 24:​14, wɔma efã ko nɔ mi.

 7. Nɛgbɛ shiɛmɔ nitsumɔ lɛ mli lɛɛ kɛyashɛ yɛ klɛŋklɛŋ afii oha lɛ mli?

⁷ Akɛni hemɔkɛyeli kɛ mumɔ krɔŋkrɔŋ eyimɔ amɛ obɔbɔ hewɔ lɛ, Nyɔŋmɔ tsuji ni hi shi yɛ klɛŋklɛŋ afii oha lɛ mli lɛ tee nɔ amɛtsu nitsumɔ ni akɛwo amɛdɛŋ lɛ he nii. Akɛni Yehowa fee mɔ ni kɛ amɛ yɔɔ hewɔ lɛ, amɛye omanye fe bɔ ni amɛkpa gbɛ akɛ amɛaaye. Beni Paulo ŋmaa wolo eyaha Kolosebii lɛ, aaafee Yesu gbele lɛ sɛɛ afii 27 lɛ, enyɛ ewie sanekpakpa lɛ he akɛ “ashiɛɔ atsɔɔ bɔɔnii fɛɛ ni yɔɔ ŋwɛi shishi lɛ.” (Kolosebii 1:​23) Kɛ akɛaato he lɛ, beni afii ohai 20 lɛ baa naagbee lɛ, no mli lɛ aashiɛ yɛ shikpɔji 233 nɔ.

 8. Mɛɛ shihilɛi ashishi nɛkɛ mɛi pii kpɛlɛ sanekpakpa lɛ nɔ yɛ? Okɛ nɔkwɛmɔnii komɛi aha.

⁸ Gbɔmɛi akpekpei abɔ ekpɛlɛ sanekpakpa lɛ nɔ yɛ nyɛsɛɛ afii nyɔŋmai abɔ nɛɛ amli. Mɛi babaoo efee nakai yɛ shihilɛi ni ehiii kwraa po shishi​—yɛ tawuu, naatsii, kɛ yiwaa ni mli wa waa shishi. Ni eji anɔkwale hu yɛ klɛŋklɛŋ afii oha lɛ mli. Be ko lɛ akɛ kplebii yi Paulo kɛ Sila bɔ ni ehiii kwraa, ni ashɛrɛ amɛ awo gboklɛfoi atsũŋ. Mɛɛ shihilɛ ni nyɛŋ aba ákɛ amɛaafee kaselɔi yɛ mli nɛ! Kɛlɛ, Yehowa kɛ shihilɛ lɛ tsu nii ni ekɛfee nakai pɛpɛɛpɛ. Ajie Paulo kɛ Sila, ni gboklɛfoi akwɛlɔ lɛ kɛ eweku lɛ fɛɛ batsɔmɔ heyelilɔi. (Bɔfoi lɛ Asaji 16:​19-33) Niiashikpamɔi ni tamɔ nɛkɛ lɛ tsɔɔ akɛ mɛi ni teɔ shi woɔ sanekpakpa lɛ nyɛŋ atsĩ naa. (Yesaia 54:​17) Ni kɛlɛ, Kristojamɔ yinɔsane efeko haomɔ kɛ yiwaa ni baaa naagbee sɔŋŋ. Nyɛhaa wɔgbalaa wɔjwɛŋmɔ kɛyaa nibii kpakpai ni ba ni ye ebua ni saa gbɛ kɛha sanekpakpa lɛ shiɛmɔ yɛ omanyeyeli mli yɛ klɛŋklɛŋ afii oha lɛ mli kɛ afii ohai 20 lɛ mli lɛ anɔ.

Jamɔŋ Shihilɛ

9, 10. Mɛɛ gbɛ nɔ Yehowa tsɔ eto gbɛkpamɔ he gbɛjianɔ kɛha sanekpakpa lɛ shiɛmɔ yɛ klɛŋklɛŋ afii oha lɛ kɛ afii ohai 20 lɛ mli?

⁹ Susumɔ be ni ato aha jeŋ muu fɛɛ shiɛmɔ he tafaai lɛ ahe okwɛ. Yɛ jamɔŋ shihilɛ ni yɔɔ klɛŋklɛŋ afii oha lɛ mli lɛ he lɛ, gbalɛ ni kɔɔ otsii 70 ni ji afii, ni anaa yɛ Daniel 9:​24-27 lɛ tsɔɔ afi pɔtɛɛ ni Mesia lɛ baapue yɛ​—afi 29 Ŋ.B. Eyɛ mli akɛ klɛŋklɛŋ afii oha lɛ mli Yudafoi lɛ nuuu bɔ ni ato be pɔtɛɛ lɛ he saji aha lɛ shishi moŋ, shi no mli lɛ amɛmiikpa gbɛ, amɛmiimɛ Mesia lɛ. (Luka 3:​15) French wolo, Manuel Biblique lɛ kɛɛ akɛ: “Gbɔmɛi le akɛ otsii nyɔŋmai kpawo ni ji afii ni Daniel to lɛ miibɛŋkɛ enaagbee; efeee mɔ ko mɔ ko naakpɛɛ akɛ eeenu ni Yohane Baptisilɔ lɛ miitswa adafi akɛ Nyɔŋmɔ maŋtsɛyeli lɛ ebɛŋkɛ.”

¹⁰ Ni shihilɛ ni yɔɔ ŋmɛnɛŋmɛnɛ beaŋ lɛ hu? Ojogbaŋŋ, nɔ ko wulu ko ni ba ji Yesu ni akɛ lɛ ta maŋtsɛsɛi nɔ yɛ ŋwɛi, ni kadi ba ni eba yɛ Maŋtsɛyeli hewalɛ mli lɛ shishijee. Biblia gbalɛ tsɔɔ akɛ enɛ ba mli yɛ afi 1914. (Daniel 4:​13-17) Nɔ ni ba nɛɛ gbɛkpamɔ hu ha gbɛkpamɔ ni tamɔ nakai yi jamɔ gbɛjianɔtoi komɛi ni yɔɔ ŋmɛnɛŋmɛnɛ bei nɛɛ amli lɛ amli obɔ̃. Ana gbɛkpamɔ yɛ Biblia kaselɔi anɔkwafoi ni je wolo tɛtrɛɛ nɛɛ feemɔ shishi yɛ afi 1879 akɛ Zion’s Watch Tower and Herald of Christ’s Presence lɛ ahe. No hewɔ lɛ, jamɔ mli gbɛkpamɔi saa shihilɛ lɛ kɛha sanekpakpa lɛ shiɛmɔ yɛ klɛŋklɛŋ afii oha lɛ kɛ ŋmɛnɛŋmɛnɛ beaŋ fɛɛ lɛ nɔ̃.a

11. Mɛɛ jamɔ mli shishitoi akɛfɔ̃ shi koni eye ebua sanekpakpa lɛ shiɛmɔ?

¹¹ Nɔ kroko ni ye bua Kristofoi anitsumɔ lɛ yɛ bei enyɔ lɛ fɛɛ mli ji akɛ, mɛi pii le Ŋmalɛ Krɔŋkrɔŋ lɛ. Yudafoi akutsei egbɛ eshwã Jeŋmaji ni ebɔle amɛ lɛ amaji lɛ fɛɛ mli yɛ klɛŋklɛŋ afii oha lɛ mli. Nakai akutsei lɛ yɛ kpeehei ni gbɔmɛi kpeɔ daa yɛ jɛmɛ koni amɛbo Ŋmalɛi lɛ akanemɔ kɛ amɛ shishitsɔɔmɔ toi. No hewɔ lɛ klɛŋklɛŋ Kristofoi lɛ nyɛ amɛdamɔ jamɔ mli nilee ni gbɔmɛi lɛ yɔɔ momo lɛ nɔ amɛtsɔɔ amɛ nii. (Bɔfoi lɛ Asaji 8:​28-​36; 17:​1, 2) Yehowa webii kɛ shihilɛ ni tamɔ nɛkɛ tsu nii yɛ shikpɔji pii anɔ yɛ wɔbe nɛɛ shishijee mli. Abaanyɛ ana Biblia lɛ yɛ Kristendom nɔyelihei lɛ fɛɛ mli, titri lɛ yɛ Protestant shikpɔji anɔ. Akaneɔ yɛ sɔlemɔi pii amli; gbɔmɛi akpekpei abɔ yɛ eko. Biblia lɛ yɛ gbɔmɛi lɛ adɛŋ momo, shi yelikɛbuamɔ he miihia amɛ koni amɛnu nɔ ni amɛhiɛ lɛ shishi.

Sɛɛnamɔi ni Yɔɔ Mla He

12. Yɛ mɛɛ gbɛ nɔ Roma mla bafee hebuunɔ yɛ bei pii amli yɛ klɛŋklɛŋ afii oha lɛ mli?

¹² Nɔyeli lɛ mla he eba sɛɛnamɔ kɛha Kristofoi ashiɛmɔ yɛ bei pii amli. Roma Maŋtsɛyeli lɛ ye klɛŋklɛŋ afii oha lɛ mli je lɛ nɔ, ni emlai ni áŋma lɛ ná daa gbi shihilɛ nɔ hewalɛ waa. Nɛkɛ mlai nɛɛ kɛ hebuu ha, ni amɛhe ba sɛɛnamɔ kɛha klɛŋklɛŋ Kristofoi lɛ. Ákɛ nɔkwɛmɔnɔ lɛ, Roma mla ni Paulo tsɛ́ sɛɛ yɛ esane lɛ mli lɛ ha aŋmɛɛ ehe kɛjɛ gboklɛfoi atsũŋ ni ebaa eyi kɛjɛ kplebii ni akɛaayi lɛ lɛ mli. (Bɔfoi lɛ Asaji 16:​37-​39; 22:​25, 29) Roma mla gbɛjianɔtoo lɛ mli sane ni egbala jwɛŋmɔ kɛtee nɔ lɛ ye ebua ni eha asafo babaoo ko ni mli efu yɛ Efeso lɛ ahe jɔ. (Bɔfoi lɛ Asaji 19:​35-​41) Be ko lɛ ahere Paulo yiwala kɛjɛ gbele mli yɛ Yerusalem akɛni eji Romanyo lɛ hewɔ. (Bɔfoi lɛ Asaji 23:​27) Yɛ sɛɛ mli lɛ, Roma mla ŋmɛ lɛ gbɛ koni eyafã ehemɔkɛyeli lɛ he yɛ mla naa yɛ Kaisare hiɛ. (Bɔfoi lɛ Asaji 25:​11) Eyɛ mli akɛ Kaisaremɛi lɛ ateŋ mɛi pii ye nɔ akɛ yiwalɔi moŋ, shi mlai ni yɔɔ klɛŋklɛŋ afii oha lɛ mli lɛ ŋmɛ “sanekpakpa lɛ he famɔ kɛ enɔmimaa” gbɛ.​—Filipibii 1:⁠7.

13. Mla lɛ he eba sɛɛnamɔ kɛha wɔbei nɛɛ amli shiɛmɔ nitsumɔ lɛ yɛ bei pii amli yɛ mɛɛ gbɛ nɔ?

¹³ Nakai nɔŋŋ eji anɔkwale yɛ shikpɔji pii anɔ ŋmɛnɛ. Eyɛ mli akɛ mɛi ni ‘baatsɔ mla nɔ amɛye sane fɔŋ’ ehi shi moŋ, shi kɛlɛ, mlai ni áŋmala ashwie shi yɛ maji pii anɔ lɛ buɔ jamɔ mli heyeli akɛ shishijee hegbɛ ni mɔ ko yɔɔ. (Lala 94:​20) Akɛni nɔyelii babaoo eyoo akɛ Yehowa Odasefoi wooo amɛ kwasafoŋ shihilɛ he gbeyei hewɔ lɛ, amɛ́ḱpɛlɛ wɔ nitsumɔ lɛ nɔ yɛ mla naa. Yɛ United States, he ni Odasefoi lɛ ekala amɛ woji babaoo yɛ lɛ, mlai ni yɔɔ lɛ eha amɛ́nyɛ amɛ́tee nɔ amɛ́fee Buu-Mɔɔ wolo tɛtrɛɛ lɛ kɛtsara nɔ aahu afii 120 sɔŋŋ koni akane yɛ jeŋ muu fɛɛ.

Toiŋjɔlɛ kɛ Tsuishiŋmɛɛ Bei

14, 15. Yɛ mɛɛ gbɛ nɔ kwasafo shihilɛ mli toiŋjɔlɛ fioo ni yɔɔ lɛ he ba sɛɛnamɔ kɛha shiɛmɔ nitsumɔ lɛ yɛ klɛŋklɛŋ afii oha lɛ mli?

¹⁴ Kɛ akɛaato he lɛ, toiŋjɔlɛ bei lɛ ahe eba sɛɛnamɔ kɛha shiɛmɔ nitsumɔ lɛ. Eyɛ mli akɛ Yesu gba efɔ̃ shi pɛpɛɛpɛ akɛ ‘maŋ baate shi awo maŋ’ yɛ nɛkɛ bei nɛɛ amli moŋ, shi bei folɔɔ mli ni basabasafeemɔ ko eyaaa nɔ ni enɛ haa anyɛɔ atsuɔ Maŋtsɛyeli shiɛmɔ lɛ he nii waa. (Mateo 24:⁠7) Klɛŋklɛŋ afii oha lɛ mli Kristofoi lɛ hi shi yɛ Pax Romana, loo Roma Toiŋjɔlɛ shishi. Yinɔsaneŋmalɔ ko ŋma akɛ: “Roma eba gbɔmɛi ni yɔɔ Mediteranea je lɛ mli lɛ ashi kwraa akɛ, eha afii abɔ ni akɛwuu ta be fɛɛ be lɛ ba naagbee kɛha amɛ.” Nɛkɛ toiŋjɔlɛ be nɛɛ gbele gbɛ kɛha klɛŋklɛŋ Kristofoi lɛ koni amɛfã gbɛ yɛ toiŋjɔlɛ mli fioo yɛ Roma je lɛ fɛɛ mli.

¹⁵ Roma Maŋtsɛyeli lɛ bɔ mɔdɛŋ koni efee gbɔmɛi lɛ ekome yɛ enineshiwalɛ shishi. Jeee akɛ mla nifeemɔ nɛɛ ha gbɛfaa, tsuishitoo, kɛ saji ahe ni asusuɔ tee hiɛ kɛkɛ, shi majimaji ateŋ nyɛmifeemɔ he jwɛŋmɔ hu tee hiɛ. Wolo ni atsɛɔ lɛ On the Road to Civilization lɛ jaje akɛ: “Ekomefeemɔ ni yɔɔ [Roma] Maŋtsɛyeli lɛ mli lɛ hã [Kristofoi ashiɛmɔ] ŋmɔ̃ lɛ fee nɔ ni hi. Ajie maji ahusui. Romanyo ji je lɛ maŋnyo. . . . Agbɛnɛ hu, abaanyɛ anu jamɔ ni tsɔɔ akɛ gbɔmɔ nyɛmi ji gbɔmɔ lɛ shishi yɛ maŋ ni ená jeŋ muu fɛɛ maŋnyo tsɔmɔ he jwɛŋmɔ lɛ mli.”​—Okɛto Bɔfoi lɛ Asaji 10:​34, 35; 1 Petro 2:​17 he.

16, 17. Mɛni ekanya mɔdɛŋ ni abɔɔ koni aha toiŋjɔlɛ ashwere yɛ wɔ ŋmɛnɛŋmɛnɛ bei nɛɛ amli lɛ, ni gbɔmɛi pii emu sane naa yɛ mɛɛ gbɛ nɔ?

¹⁶ Ni wɔbe nɛɛ hu? Afii ohai 20 lɛ ena tai ni fiteɔ nii fe fɛɛ yɛ yinɔsane mli lɛ ekomɛi, ni maji anɔ tai miiya nɔ lolo yɛ shikpɔji komɛi anɔ. (Kpojiemɔ 6:⁠4) Kɛlɛ, toiŋjɔlɛ bei bibii hu ehi shi. Jeŋ hewalɛi titrii lɛ kɛ amɛhe woko ta ni awuɔ diɛŋtsɛ lɛ mli fe afii 50 nɛ. Ni shihilɛ nɛɛ eye ebua babaoo yɛ sanekpakpa lɛ shiɛmɔ mli yɛ nakai maji lɛ anɔ.

¹⁷ Afii ohai 20 nɛɛ mli tawuu ni yɔɔ gbeyei lɛ eha mɛi pii eyɔse bɔ ni ehe hiaa ni aná jeŋ nɔyeli. Tawuu he gbeyeishemɔ ji nɔ ni ha ato Jeŋmaji Akpaŋmɔ lɛ kɛ Jeŋmaji Ekomefeemɔ lɛ ama shi. (Kpojiemɔ 13:​14) Gbɛjianɔtoi enyɔ lɛ ayiŋtoo titri ni amɛjaje ji ni amɛha majimaji ateŋ ekomefeemɔ kɛ toiŋjɔlɛ ashwere. Bei pii lɛ, gbɔmɛi ni nuɔ hiamɔ ni tamɔ nɛkɛ he lɛ kpɛlɛɔ sanekpakpa ni kɔɔ jeŋ nɔyeli ni kɛ anɔkwa toiŋjɔlɛ ni hiɔ shi daa baaba​—ni ji Nyɔŋmɔ Maŋtsɛyeli lɛ he lɛ nɔ.

18. Mɛɛ su ni ajie lɛ kpo yɛ jamɔ he eye ebua shiɛmɔ nitsumɔ lɛ?

¹⁸ Eyɛ mli akɛ áwa Kristofoi ayi waa yɛ bei komɛi amli moŋ, shi klɛŋklɛŋ afii oha lɛ kɛ afii ohai 20 lɛ ji bei ni ato tsui shi aha jamɔ. (Yohane 15:​20; Bɔfoi lɛ Asaji 9:​31) Romabii lɛ kpɛlɛ gbɔmɛi ni amɛye amɛnɔ kunim lɛ anyɔŋmɔi kɛ nyɔŋmɔyei lɛ anɔ ni amɛkɛtsu nii. Nilelɔ Rodney Stark ŋma akɛ: “Roma kɛ jamɔ mli heyeli babaoo ha yɛ gbɛ̀i pii anɔ fe bɔ ni ana pɛŋ kɛyashi Amerika Maŋ Hiɛ Tsakemɔ lɛ sɛɛ.” Yɛ ŋmɛnɛŋmɛnɛ beaŋ lɛ, gbɔmɛi ni yɔɔ maji pii anɔ lɛ ajwɛŋmɔ mli egbele kɛtee susumɔi krokomɛi anɔ, ni nɔ ni ejɛ mli kɛba ji akɛ, amɛmiisumɔ ni amɛbo Biblia mli shɛɛ sane ni Yehowa Odasefoi shiɛɔ lɛ toi.

Nɔ ni Tsɔnei Ahe Nilee Etsu

19. Te fee tɛŋŋ ni klɛŋklɛŋ Kristofoi lɛ kɛ codex lɛ batsu nii?

¹⁹ Yɛ naagbee lɛ, susumɔ bɔ ni Yehowa eha ewebii ená tsɔnei ahe nilee ni yaa hiɛ lɛ he sɛɛ lɛ he okwɛ. Eyɛ mli akɛ klɛŋklɛŋ be mli Kristofoi lɛ ehiii shi yɛ be ni tsɔnei ahe nilee yaa hiɛ oyayaayai yɛ mli lɛ mli moŋ, shi nɔ ko ni afee ni amɛkɛtsu nii ji codex, loo wolo ni yɔɔ baafai lɛ. Akɛ codex lɛ to wolokpo ni akotaa ni tsii waa lɛ najiaŋ. The Birth of the Codex wolo lɛ kɛɔ akɛ: “Nɔ ni tamɔɔɔ nifeemɔ ni yɔɔ blɛoo kɛ fiofio ni codex lɛ tsɔ nɔ ekɛbaye wolokpo lɛ najiaŋ yɛ je lɛŋ woji afeemɔ mli lɛ, etamɔ nɔ ni bɔ ni Kristofoi lɛ kpɛlɛ codex lɛ nɔ lɛ ba amrɔ nɔŋŋ yɛ jeŋ muu fɛɛ.” Nɛkɛ wolo nɛɛ kɛɔ hu akɛ: “Bɔ ni Kristofoi lɛ kɛ codex lɛ tsu nii ha yɛ jeŋ muu fɛɛ yɛ afii ohai enyɔ lɛ mli lɛ ha eba lɛ akɛ ekɛ nitsumɔ kɛjɛ shishijee baanyɛ afee nɔ ni ba dani A.D. 100 shɛ.” Codex lɛ kɛ nitsumɔ yɛ mlɛo fe wolokpo lɛ. Anyɛɔ anaa ŋmalɛi lɛ oya. Yɛ anɔkwale mli lɛ enɛ ye ebua klɛŋklɛŋ Kristofoi lɛ, ni taakɛ Paulo ji lɛ, jeee akɛ amɛtsɔɔ Ŋmalɛi lɛ amli kɛkɛ shi ‘amɛtsɛɔ’ nibii ni amɛtsɔɔ lɛ ‘asɛɛ kɛjɛɔ mli kɛyeɔ he odase.’​—Bɔfoi lɛ Asaji 17:⁠2, 3.

20. Nyɔŋmɔ webii kɛ ŋmɛnɛŋmɛnɛ beaŋ tsɔnei ahe nilee etsu nii yɛ jeŋ muu fɛɛ shiɛmɔ nitsumɔ lɛ mli yɛ mɛɛ gbɛ nɔ, ni mɛni hewɔ?

²⁰ Tsɔnei ahe nilee ni etee hiɛ yɛ wɔ afii oha nɛɛ mli lɛ yɛ naakpɛɛ. Woji akalamɔ tsɔnei ní tsuɔ nii kɛ foi eye ebua ni eha anyɛ afee Biblia kasemɔ he woji yɛ be kome mli yɛ wiemɔi srɔtoi amli. Ŋmɛnɛŋmɛnɛ beaŋ tsɔnei ahe nilee eha Biblia shishitsɔɔmɔ nitsumɔ lɛ etee nɔ oyayaayai. Lɔlei wuji, oketekei, ŋshɔ hiɛ lɛji, kɛ kɔɔyɔŋ lɛji haa anyɛɔ akɛ Biblia kasemɔ he woji yaa shikpɔŋ lɛ nɔ he fɛɛ he yɛ oyaiyeli mli. Tɛlifoŋ kɛ faks tsɔnei srɔtoi abɔ eha sharamɔ ni ayeɔ kɛtsɔɔ kpãa nɔ amrɔ nɔŋŋ efee nɔ ni yaa nɔ diɛŋtsɛ. Yehowa etsɔ emumɔ lɛ nɔ etsirɛ ewebii lɛ koni amɛkɛ tsɔnei ahe nilee ni tamɔ nɛkɛ atsu nii ni sɛɛnamɔ aba he koni sanekpakpa lɛ agbɛ ashwã jeŋ fɛɛ. Amɛkɛ nɛkɛ nibii heei nɛɛ tsuuu nii akɛni amɛmiisumɔ ni amɛkɛ nɔ̃ hee fɛɛ nɔ̃ hee ni eba je lɛ mli lɛ atsu nii hewɔ. Yɛ no najiaŋ lɛ, klɛŋklɛŋ nii ni amɛnyaa he fe fɛɛ ji nɔ ni baaye abua amɛ ni amɛtsu amɛshiɛmɔ nitsumɔ lɛ he nii yɛ gbɛ ni mɔɔ shi jogbaŋŋ nɔ.

21. Wɔbaanyɛ wɔná hekɛnɔfɔɔ yɛ mɛni he?

²¹ Yesu gba fɔ̃ shi akɛ: “Ni aaashiɛ maŋtsɛyeli lɛ he sanekpakpa nɛɛ atsɔɔ je nɛŋ fɛɛ.” (Mateo 24:​14) Bɔ ni klɛŋklɛŋ Kristofoi lɛ na nakai gbalɛ lɛ mlibaa lɛ, nakai wɔ hu ŋmɛnɛ wɔnaa enɛ yɛ gbɛ ni da waa nɔ. Yɛ bɔ ni nitsumɔ lɛ da ni ewa ha, yɛ bei ni hi kɛ bei ni ehiii fɛɛ mli, yɛ mlai kɛ subaŋi ni tsakeɔ mli, yɛ tawuu kɛ toiŋjɔlɛ mli, yɛ tsɔnei ahe nilee mli hiɛyaa srɔtoi fɛɛ mli lɛ fɛɛ sɛɛ lɛ, átee nɔ áshiɛ sanekpakpa lɛ ni aaya nɔ aashiɛ. Ani enɛ haaa onaa akpɛ ohe yɛ Yehowa nilee kɛ eshɔŋŋ ninamɔ ni haa mɔ naa kpɛɔ ehe lɛ he? Wɔbaanyɛ wɔná nɔmimaa kwraa akɛ abaagbe shiɛmɔ nitsumɔ lɛ naa yɛ be ni Yehowa eto lɛ mli, ni ákɛ abaatsu eyiŋtoo ni suɔmɔ yɔɔ mli lɛ he nii agbe naa kɛha jalɔi lɛ ajɔɔmɔ. Shikpɔŋ lɛ aaatsɔ amɛnɔ̃ ni amɛaahi nɔ daa. (Lala 37:​29; Habakuk 2:⁠3) Kɛji akɛ wɔha wɔshihilɛ kɛ Yehowa yiŋtoo kpã gbee lɛ, wɔbaafata amɛhe.​—1 Timoteo 4:⁠16.

[Shishigbɛ niŋmaa]

Saji Otii ni Abaati Mli

◻ Mɛni hewɔ sanekpakpa lɛ shiɛmɔ efee nitsumɔ ni kaa mɔ waa lɛ?

◻ Yɛ mɛɛ gbɛ̀i anɔ nɔyeli gbɛjianɔtoi kɛ kwasafo shihilɛ mli toiŋjɔlɛ fioo ni yɔɔ lɛ he eba sɛɛnamɔ kɛha Kristofoi anitsumɔ lɛ?

◻ Yehowa jɔɔmɔ ni yɔɔ shiɛmɔ nitsumɔ lɛ nɔ lɛ maa mɛni ni baaba yɛ wɔsɛɛ be mli lɛ nɔ mi kɛhaa wɔ?