Nyɛmusuŋ Atsɔa Nyɛ
“Nyɛwoa musuŋtsɔlɛ, mlihilɛ.”—KOLOSEBII 3:12.
1. Mɛni hewɔ musuŋtsɔlɛ he hiamɔ kpele yɔɔ ŋmɛnɛ lɛ?
BE KO bako yɛ yinɔsane mli ni yelikɛbuamɔ ni jɛ musuŋtsɔlɛ mli he ehia mɛi babaoo tamɔ nɛkɛ dã. Kɛ gbɔmɛi kɛ shihilɛi tamɔ hela, hɔmɔ, nitsumɔ ni anaaa, awuiyeli, tai, basabasa-feemɔ, kɛ adebɔɔ mli osharai kpe lɛ, yelikɛbuamɔ he hiaa mɛi akpekpei abɔ. Shi naagba ko yɛ ni yɔɔ hiɛdɔɔ waa fe enɛɛmɛi, ni no ji adesai amumɔŋ haomɔ shihilɛ lɛ. Satan, ni le akɛ be fioo kɛkɛ eyɔɔ lɛ, ‘miishishiu jeŋ muu lɛ fɛɛ.’ (Kpojiemɔ 12:9, 12) No hewɔ lɛ, mɛi ni yɔɔ anɔkwa Kristofoi asafo lɛ sɛɛ lɛ ji mɛi ni yɔɔ oshara mli titri, akɛ amɛwala baanyɛ aje amɛdɛŋ, ni Biblia lɛ wieɔ akɛ mɛi ni abaakpata amɛhiɛ yɛ Nyɔŋmɔ kojomɔ gbi ni baa lɛ nɔ lɛ bɛ gbohiiashitee he hiɛnɔkamɔ ko kwraa.—Mateo 25:31-33, 41, 46; 2 Tesalonikabii 1:6-9.
2. Mɛni hewɔ Yehowa kpatako efɔŋ feelɔi ahiɛ lolo lɛ?
2 Ni kɛlɛ, kɛbashi naagbee be kwraa nɛɛ mli po lɛ, Yehowa Nyɔŋmɔ miiya nɔ eejie tsuishitoo kɛ musuŋtsɔlɛ kpo lolo yɛ mɛi ni feɔ trumu kɛ mɛi fɔji lɛ ahe. (Mateo 5:45; Luka 6:35, 36) Efee enɛ yɛ yiŋtoo koome ni ha etsĩ Israel maŋ ni yeee anɔkwa lɛ toigbalamɔ naa lɛ nɔŋŋ hewɔ. “ ‘Gbii abɔ ni mihiɛ kã nɛɛ,’ Nuntsɔ Yehowa kɛɛ, ‘Minaaa efɔŋ feelɔ gbele he miishɛɛ, shi moŋ akɛ efɔŋ feelɔ akpale kɛjɛ egbɛ lɛ nɔ, ni eyi ana wala! Nyɛkpalea, nyɛkpalea kɛjɛa nyɛgbɛi fɔji lɛ anɔ! Shi mɛɛba ni nyɛaagbo, Israel we?’ ”—Ezekiel 33:11.
3. Mɛɛ nɔkwɛmɔ nɔ wɔyɔɔ ni tsɔɔ Yehowa musuŋtsɔlɛ kɛha mɛi ni jeee ewebii lɛ, ni mɛni wɔkaseɔ kɛjɛɔ enɛ mli?
3 Yehowa kpã emusuŋtsɔlɛ lɛ mli eha Ninivebii efɔŋ feelɔi lɛ hu. Yehowa tsu egbalɔ Yona akɛ eyabɔ amɛ kɔkɔ yɛ hiɛkpatamɔ ni baa lɛ he. Amɛtsu Yona shiɛmɔ lɛ he nii yɛ gbɛ kpakpa nɔ ni amɛtsake amɛtsui. Enɛ tsirɛ Yehowa, Nyɔŋmɔ musuŋtsɔlɔ lɛ, ni etsĩ hiɛkpatamɔ lɛ naa ni ekɛbaaa maŋtiase lɛ nɔ yɛ nakai beaŋ. (Yona 3:10; 4:11) Kɛ Nyɔŋmɔ nu he eha Ninivebii, ni kulɛ amɛbaanyɛ amɛna hegbɛ kɛha gbohiiashitee lɛ, no lɛ kwɛ bɔ ni eeená musuŋtsɔlɛ eha gbɔmɛi ni naanɔ hiɛkpatamɔ kã amɛhiɛ ŋmɛnɛ lɛ!—Luka 11:32.
Musuŋtsɔlɛ Nitsumɔ ko ni Ekaaa
4. Yehowa miijie musuŋtsɔlɛ kpo eetsɔɔ gbɔmɛi ŋmɛnɛ yɛ mɛɛ gbɛ nɔ?
4 Yɛ emusuŋtsɔlɛ su lɛ kɛ gbeekpamɔ naa lɛ, Yehowa kɛ nitsumɔ ewo e-Dasefoi lɛ adɛŋ akɛ amɛya nɔ amɛkɛ “maŋtsɛyeli lɛ he sanekpakpa” lɛ ayasara amɛkutsoŋbii lolo. (Mateo 24:14) Ni kɛ gbɔmɛi kɛ hiɛsɔɔ here nɛkɛ yiwalaheremɔ nitsumɔ nɛɛ nɔ lɛ, Yehowa gbeleɔ amɛtsuii anaa koni amɛnu Maŋtsɛyeli shɛɛ sane lɛ shishi. (Mateo 11:25; Bɔfoi lɛ Asaji 16:14) Yɛ amɛ-Nyɔŋmɔ lɛ kasemɔ mli lɛ, anɔkwa Kristofoi jieɔ musuŋtsɔlɛ kpo, ni amɛkuɔ sɛɛ amɛyaa mɛi ni yɔɔ wiemɔ lɛ he miishɛɛ lɛ aŋɔɔ ekoŋŋ, ni amɛyeɔ amɛbuaa amɛ, kɛji eeehi lɛ, kɛtsɔ Biblia mli nikasemɔ nɔ. Enɛ hewɔ lɛ, yɛ 1993 mli lɛ, Yehowa Odasefoi ni fa fe akpekpei ejwɛ kɛ fã, ni yɔɔ maji wuji 231 nɔ lɛ kɛ ŋmɛlɛtswai ni fa fe akpekpei akpe kome tsu nii yɛ shiɛmɔ mli yɛ shia kɛ shia, ni amɛkɛ amɛkutsoŋbii fee Biblia mli nikasemɔ. Nɛkɛ mɛi heei ni yɔɔ wiemɔ lɛ he miishɛɛ nɛɛ hu ena hegbɛ akɛ amɛaajɔɔ amɛwala nɔ amɛha Yehowa koni amɛfata mɛi ni ji e-Dasefoi ni abaptisi amɛ lɛ ahe. Kɛtsɔ enɛ nɔ lɛ, amɛ hu amɛkɛ amɛhe haa kɛha nɛkɛ musuŋtsɔlɛ nitsumɔ ni atsuko eko dã, ni yaa nɔ yɛ mɛi ni baanyɛ amɛbatsɔmɔ kaselɔi, ni Satan jeŋ ni gboɔ nɛɛ edu amɛ yɛ emli lolo lɛ agbɛfaŋ nɛɛ tsumɔ.—Mateo 28:19, 20; Yohane 14:12.
5. Kɛ Nyɔŋmɔ musuŋtsɔlɛ lɛ yashɛ enaagbee lɛ, mɛni baaba jamɔ ni gbeɔ Nyɔŋmɔ he guɔ lɛ nɔ?
5 Etsɛŋ ni Yehowa baafee enii akɛ “tawulɔ.” (2 Mose 15:3) Musuŋtsɔlɛ ni eyɔɔ kɛha egbɛi lɛ kɛ ewebii lɛ hewɔ lɛ, ebaajie efɔŋ feemɔ kɛya kwraa, ni ebaato jalɛ jeŋ hee ko ema shi. (2 Petro 3:13) Mɛi ni Nyɔŋmɔ mlifu gbi lɛ baaba amɛnɔ klɛŋklɛŋ kwraa ji Kristendom sɔlemɔi lɛ. Taakɛ bɔ ni Nyɔŋmɔ haaa lɛ diɛŋtsɛ esɔlemɔ we ni yɔɔ Yerusalem lɛ aye ehe kɛjɛ Babilon maŋtsɛ lɛ dɛŋ lɛ, nakai nɔŋŋ ehaŋ jamɔ gbɛjianɔtoi ni egbe ehe guɔ lɛ hu aye amɛye kɔkɔɔkɔ. Nyɔŋmɔ kɛbaawo Jeŋmaji Ekomefeemɔ kpee lɛ mli bii lɛ atsuii amli ni amɛfee Kristendom, kɛ apasa jamɔi krokomɛi fɛɛ ni eshwɛ lɛ amaŋfɔ. (Kpojiemɔ 17:16, 17) Yehowa jaje akɛ: “No hewɔ lɛ mi hu mihiŋmɛi enaŋ mɔbɔ, ni mibaaŋ yi, shi maha amɛgbɛ lɛ abua amɛyiteŋ!”—Ezekiel 9:5, 10.
6. Mɛɛ gbɛi anɔ akanyaa Yehowa Odasefoi ni amɛjie musuŋtsɔlɛ kpo yɛ?
6 Beni be yɔɔ lolo nɛɛ, Yehowa Odasefoi yaa nɔ amɛjieɔ musuŋtsɔlɛ kpo amɛtsɔɔ amɛkutsoŋbii kɛtsɔ ekaa ni amɛkɛshiɛɔ Nyɔŋmɔ shɛɛ sane lɛ amɛtsɔɔ lɛ nɔ. Ni yɛ adebɔɔ su naa lɛ, kɛji eeehi feemɔ lɛ, amɛyeɔ amɛbuaa gbɔmɛi ni yɔɔ heloonaa hiamɔ nii lɛ hu. Shi, yɛ enɛ gbɛfaŋ lɛ, amɛ klɛŋklɛŋ gbɛnaa nii ji ni amɛtsu amɛwekumɛi ni bɛŋkɛ amɛ kpaakpa, kɛ mɛi ni amɛkɛyɔɔ hemɔkɛyeli lɛ mli lɛ ahiamɔ nii ahe nii. (Galatabii 6:10; 1 Timoteo 5:4, 8) Yelikɛbuamɔ nibii ni Yehowa Odasefoi kɛtsu shii abɔ ni akɛyaha amɛnanemɛi héyelilɔi ni amanehului sɔrɔtoi eba amɛnɔ lɛ, feɔ musuŋtsɔlɛ he nɔkwɛmɔ nii ni sa kadimɔ waa. Shi kɛlɛ, esaaa akɛ Kristofoi mɛɔ ni amanehulu shihilɛ baa dani amɛjie musuŋtsɔlɛ kpo amɛtsɔɔ. Amɛjieɔ nɛkɛ su nɛɛ kpo oya yɛ daa gbi shihilɛ mli nibii kpakpai kɛ nibii fɔji fɛɛ ni akɛkpeɔ lɛ mli.
Eji Gbɔmɔ Hee lɛ Fã
7. (a) Yɛ Kolosebii 3:8-13 lɛ, mɛɛ gbɛ nɔ akɛ musuŋtsɔlɛ tsaa gbɔmɔ hee lɛ woo yɛ? (b) Mɛni hedɔɔ ni suɔmɔ yɔɔ mli lɛ haa efeɔ mlɛo kɛhaa Kristofoi akɛ amɛaafee?
7 Eji anɔkwale akɛ esha ni yɔɔ wɔhe lɛ kɛ hewalɛ fɔŋ ni Satan je lɛ naa yɛ wɔnɔ lɛ ji gbɛtsii nii kɛha musuŋtsɔlɛ ni wɔɔjie lɛ kpo wɔtsɔɔ. No hewɔ ni Biblia lɛ woɔ wɔ hewalɛ ni wɔjie “mlifu, mlila, nishaianii, musubɔɔ wiemɔ, [kɛ] hiɛgbeji awiemɔ” wɔshwie lɛ. Yɛ nomɛi anajiaŋ lɛ, awoɔ wɔ ŋaa ni ‘wɔwo gbɔmɔ hee’—ni ji su ni kɛ Nyɔŋmɔ henɔ kpaa gbee. Klɛŋklɛŋ kwraa lɛ, akɛ famɔ haa wɔ akɛ wɔwo “musuŋtsɔlɛ, mlihilɛ, heshibaa jwɛŋmɔ, mlijɔlɛ, [kɛ] tsuishitoo.” No sɛɛ lɛ Biblia lɛ tsɔɔ wɔ gbɛ ni wɔɔtsɔ wɔjie nɛkɛ sui nɛɛ akpo diɛŋtsɛ. “Kɛji mɔ ko kɛ mɔ ko na sane ko lɛ, nyɛnanaa nyɛhaa nyɛhe ni nyɛkɛfafaa nyɛhe, taakɛ bɔ ni [Yehowa] hu ŋɔfa nyɛ lɛ, nakai nyɛ hu nyɛfea.” Efeɔ mlɛo kwraa akɛ wɔkɛ sane aaake kɛji wɔyɛ ‘musuŋtsɔlɛ’ su lɛ momo kɛha wɔ nyɛmimɛi.—Kolosebii 3:8-13.
8. Mɛni hewɔ ehe hiaa ni wɔna mumɔ ni haa wɔkɛ sane keɔ lɛ?
8 Nɔ ni tamɔɔɔ enɛ lɛ, musuŋtsɔlɛ kɛ eshaifaa ni wɔjieee lɛ kpo lɛ haa wɔkɛ Yehowa teŋ wekukpaa lɛ yajeɔ oshara mli. Yesu ha enɛ je kpo jogbaŋŋ yɛ abɛbua ko ni ekɛha ni tsɔɔ tsulɔ ko ni kɛ sane ekeee, ni enuntsɔ ha ayawo lɛ tsuŋ “kɛyashi beyinɔ ni eeebawo lɛ nyɔmɔ lɛ fɛɛ” lɛ mli. Tsulɔ lɛ sa bɔ ni akɛ lɛ ye aha nɛɛ, ejaakɛ ejieee musuŋtsɔlɛ ko kwraa kpo etsɔɔɔ enaanyo tsulɔ ko ni kpa fai ni ena lɛ mɔbɔ lɛ, ni efee mɛi naakpɛɛ. Yesu mu abɛbua lɛ naa ni ekɛɛ: “Nakai nɔŋŋ mi-Tsɛ ni yɔɔ ŋwɛi lɛ hu aaaŋɔfee nyɛ, kɛji nyɛteŋ mɔ fɛɛ mɔ eŋɔɔɔ enyɛmi nɔtɔmɔ ekeee lɛ kɛjɛɛɛ etsuiŋ lɛ.”—Mateo 18:34, 35.
9. Mɛɛ gbɛ nɔ musuŋtsɔlɛ kɛ gbɔmɔ hee lɛ fã ni he hiaa fe fɛɛ lɛ yɔɔ tsakpaa yɛ?
9 Musuŋtsɔlɛ ni wɔɔná lɛ ji suɔmɔ kpojiemɔ ko ni he hiaa. Ni suɔmɔ ji anɔkwale Kristojamɔ kadimɔ nii. (Yohane 13:35) No hewɔ lɛ, bɔ ni Biblia lɛ wieɔ gbɔmɔ hee lɛ he ehaa lɛ baa naagbee akɛ: “Enɛɛmɛi fɛɛ sɛɛ lɛ, nyɛwoa suɔmɔ ni ji emuuyeli kpaa lɛ.”—Kolosebii 3:14.
Hetsɛ—Eji Gbɛtsii Nii Kɛha Musuŋtsɔlɛ
10. (a) Mɛni baanyɛ aha awuŋayeli ahe shi yɛ wɔtsui mli? (b) Mɛɛ yibii fɔji baanyɛ ajɛ awuŋayeli mli aba?
10 Adesa su ni ji esha ni yɔɔ wɔhe lɛ hewɔ lɛ, hetsɛ henumɔ baanyɛ ahe shi yɛ wɔtsuii amli yɛ gbɛ ni yɔɔ mlɛo kwraa nɔ. Ekolɛ nyɛminuu loo nyɛmiyoo ko yɛ nyɛmɔi komɛi ni akɛfɔ lɛ, aloo ekolɛ eyɛ heloonaa hegbɛi komɛi ni wɔbɛ eko. Aloo ekolɛ mɔ ko ena mumɔŋ jɔɔmɔi kɛ hegbɛi krɛdɛɛi komɛi. Kɛji wɔna hetsɛ wɔha nɛkɛ gbɔmɛi nɛɛ, ani wɔbaanyɛ wɔkɛ amɛ aye yɛ musuŋtsɔlɛ mli? Ekolɛ wɔnyɛŋ nakai wɔfee. Shi moŋ, yɛ naagbee lɛ, ekolɛ awuŋayeli henumɔi baajie amɛhe kpo akɛ wiemɔi ni wɔɔwie wɔshi amɛ, loo wɔ nifeemɔ ni etsɔɔɔ mlihilɛ, ejaakɛ Yesu wie adesai ahe akɛ: “Nɔ ni eyi tsui eteke nɔ lɛ, no naabu wieɔ.” (Luka 6:45) Ekolɛ mɛi krokomɛi baafi wiemɔ ni wɔwieɔ wɔshiɔ amɛ nɛɛ sɛɛ. Kɛtsɔ enɛ nɔ lɛ, ebaanyɛ efite weku ko loo Nyɔŋmɔ webii asafo ko toiŋjɔlɛ namɔ kwraa.
11. Mɛɛ gbɛ nɔ Yosef nyɛmimɛi hii nyɔŋma lɛ jie musuŋtsɔlɛ kwraa kɛjɛ amɛtsuii amli, ni mɛni jɛ mli ba?
11 Susumɔ nɔ ni ba yɛ weku agbo ko mli lɛ he okwɛ. Yakob bihii onukpai nyɔŋma lɛ bɔi amɛnyɛminuu fioo Yosef he awuŋayeli ejaakɛ amɛtsɛ sumɔɔ esane waa fe amɛ fɛɛ. Nɔ ni enɛ kɛba ji akɛ, “amɛnyɛɛɛ amɛkɛ lɛ awie yɛ hejɔlɛ mli.” Yɛ sɛɛ mli lɛ, ajɔɔ Yosef kɛ ŋwɛi lamɔi komɛi ni aha ela, ni akɛma nɔ mi akɛ eyɛ Yehowa hiɛ duromɔ. Enɛ ha enyɛmimɛi lɛ “saa amɛnyɛ lɛ fe tsutsu lɛ.” Akɛni amɛjieee awuŋayeli lɛ kwraa kɛjɛɛɛ amɛtsuii amli hewɔ lɛ, ehaaa amɛna musuŋtsɔlɛ ko kwraa, ni enɛ ha amɛfee esha ni yɔɔ hiɛdɔɔ waa.—1 Mose 37:4, 5, 11.
12, 13. Kɛ awuŋayeli henumɔi bote wɔtsui mli lɛ, mɛni esa akɛ wɔfee?
12 Amɛkɛ yitsoŋwalɛ hɔ̃ɔ Yosef kɛtee nyɔŋyeli mli. Beni amɛbɔɔ mɔdɛŋ akɛ amɛaatsimɔ amɛ efɔŋ feemɔ nɛɛ nɔ lɛ, amɛlaka amɛtsɛ ni amɛha esusu akɛ kooloo awuiyelɔ ko egbe Yosef. Afii komɛi asɛɛ lɛ, esha ni amɛfee lɛ ba la hiɛ, beni hɔmɔ ko ni ba lɛ nyɛ amɛnɔ koni amɛfa gbɛ kɛya Mizraim ni amɛyahe niyenii lɛ. Niyenii nɔkwɛlɔ lɛ, ni amɛyooo lɛ akɛ Yosef ni lɛ, folɔ amɛnaa akɛ maŋ shikpalɔi ji amɛ, ni ekɛɛ amɛ akɛ amɛkabi lɛ yelikɛbuamɔ ko dɔŋŋ, ja amɛkɛ amɛnyɛminuu fioo, ni ji Benjamin eba dã. No mli lɛ, Benjamin ebatsɔ mɔ ni amɛtsɛ sumɔɔ fe fɛɛ, ni amɛle akɛ Yakob sumɔŋ akɛ eeeha eya.
13 No hewɔ lɛ, beni amɛdamɔ Yosef hiɛ lɛ, amɛ henilee tsirɛ amɛ ni amɛkpɛlɛ nɔ akɛ: “Lɛlɛŋ, wɔye fɔ yɛ wɔnyɛmi [Yosef] hewɔ, akɛni wɔna haomɔ ni esusuma hao, ni ekpa wɔ fai aahu ni wɔbooo toi lɛ; no hewɔ ni nɛkɛ haomɔ nɛɛ eba wɔnɔ nɛɛ.” (1 Mose 42:21) Kɛtsɔ emusuŋtsɔlɛ gbɛ ni kɛlɛ eyɔɔ shiŋŋ lɛ nɔ lɛ, Yosef ye ebua enyɛmimɛi lɛ ni amɛma bɔ ni amɛ tsuitsakemɔ lɛ ji anɔkwale ha lɛ nɔ mi. Kɛkɛ ni ejie ehe kpo etsɔɔ amɛ ni ejɛ mlihilɛ mli ekɛ amɛhe ke amɛ. Aha weku ekomefeemɔ saa eba ekoŋŋ. (1 Mose 45:4-8) Akɛ Kristofoi lɛ, esa akɛ wɔkase nɔ ko kɛjɛ enɛ mli. Akɛni wɔle nibii fɔji ni jɛɔ awuŋayeli mli baa lɛ hewɔ lɛ, esa akɛ wɔsɔle wɔha Yehowa kɛha yelikɛbuamɔ, koni wɔkɛ ‘musuŋtsɔlɛ’ aye awuŋayeli henumɔi anajiaŋ.
Gbɛtsii Nii Krokomɛi Kɛha Musuŋtsɔlɛ
14. Mɛni hewɔ esaaa ni wɔhaa yiwalɛ nifeemɔi ni esaaa naa wɔ nɔ hewalɛ lɛ?
14 Gbɛtsii nii kroko ni haŋ wɔna musuŋtsɔlɛ lɛ baanyɛ ajɛ wɔhe ni wɔkɛaaha yiwalɛ nifeemɔ ni esaaa lɛ mli aba. Akaŋshii kɛ hiɛtserɛjiemɔ ni jieɔ yiwalɛ nifeemɔi etsɔɔ lɛ haa awuiyeli nifeemɔi ni anaa he miishɛɛ lɛ yaa hiɛ. Yɛ Biblia beaŋ lɛ, wɔŋjalɔi yakwɛɔ mɛi ni gbeɔ gbɔmɛi yɛ shwɛmɔi hei lɛ akaŋshii kɛ adesai ayi ni awaa yɛ gbɛi krokomɛi anɔ lɛ daa, yɛ Roma Maŋtsɛyeli lɛ mli shwɛmɔ hei lɛ. Taakɛ yinɔsane ŋmalɔ ko tsɔɔ mli lɛ, nɛkɛ hiɛtserɛjiemɔ nɛɛ “kpata mɔbɔnalɛ henumɔi ni aaana aha mɛi ni naa amanehulu, ni haa esoroɔ adesai yɛ kooloi ahe lɛ fɛɛ hiɛ kwraa.” Hiɛtserɛjiemɔ ni yɔɔ ŋmɛnɛŋmɛnɛ je nɛɛ mli lɛ babaoo naa mɛi anɔ hewalɛ ni tamɔ nakai nɔŋŋ. Ehe miihia ni Kristofoi, ni bɔɔ mɔdɛŋ akɛ amɛaana musuŋtsɔlɛ lɛ, ahala woji ni amɛkaneɔ, sinii ni amɛkwɛɔ, kɛ TV nɔ nibii ni ajieɔ atsɔɔ lɛ mli jogbaŋŋ. Amɛjɛɔ nilee mli amɛhaa Lala 11:5 mli wiemɔi lɛ hiɔ amɛjwɛŋmɔ mli, akɛ: “Mɔ ni sumɔɔ yiwalɛ lɛ, [Yehowa] susuma nyɛɔ [lɛ].”
15. (a) Mɛɛ gbɛ nɔ mɔ ko aaatsɔ ni eha ana faŋŋ akɛ ebɛ musuŋtsɔlɛ kwraa? (b) Te anɔkwa Kristofoi tsuɔ nanemɛi heyelilɔi kɛ amɛkutsoŋbii ahiamɔ nii ahe nii amɛhaa tɛŋŋ?
15 Mɔ ni susuɔ ekome pɛ ehe hu baanyɛ afee mɔ ni bɛ musuŋtsɔlɛ. Eji hiɛdɔɔ sane, taakɛ bɔfo Yohane tsɔɔ mli lɛ: “Mɔ ni yɔɔ je nɛŋ nii, ni enaa akɛ efi enyɛmi, ni emli joɔ yɛ enɔ lɛ, te aaafee tɛŋŋ ni Nyɔŋmɔ suɔmɔ lɛ aaahi emli hu?” (1 Yohane 3:17) Musuŋtsɔlɛ ni bɛ, ni tamɔ nɛkɛ je kpo yɛ osɔfo kɛ Levinyo ni buɔ amɛhe jalɔi, ni yɔɔ Yesu abɛbua ni kɔɔ Samarianyo kpakpa lɛ he lɛ mli lɛ. Beni amɛna amɛnyɛmi Yudanyo ni egbo fã-kɛ-fã lɛ amanehulu lɛ, nɛkɛ gbɔmɛi nɛɛ tsɔ gbɛ lɛ afa kroko, ni amɛtsa nɔ kɛtee he ni amɛyaa. (Luka 10:31, 32) Nɔ ni tamɔɔɔ enɛ lɛ, Kristofoi ni yɔɔ musuŋtsɔlɛ lɛ tsuɔ amɛnyɛmimɛi aheloonaa kɛ mumɔŋ hiamɔ nii fɛɛ ahe nii oya nɔŋŋ. Ni taakɛ Samarianyo ni yɔɔ Yesu abɛbua lɛ mli lɛ ji lɛ, amɛsusuɔ gbɔi hu ahiamɔ nii ahe. Enɛ hewɔ lɛ, amɛjɛɔ miishɛɛ mli amɛkɛ amɛbe, hewalɛ, kɛ heloonaa nii haa koni akɛha kaselɔ-feemɔ nitsumɔ lɛ ashwere kɛya hiɛ. Ni amɛtsɔɔ nɛkɛ gbɛ nɔ amɛyeɔ amɛbuaa kɛhaa mɛi akpekpei abɔ yiwalaheremɔ.—1 Timoteo 4:16.
Musuŋtsɔlɛ Kɛha Mɛi ni He Yeɔ
16. Mɛɛ husui komɛi ni wɔnyɛɛɛ wɔteke wɔkɛkpeɔ yɛ helai ahe nitsumɔ mli?
16 Hela ji adesai ni yeee emuu, ni gboiɔ lɛ ashihilɛ fã. Kristofoi hu yɛ mli, ni amɛteŋ mɛi babaoo jeee mɛi ni ekase tsofa-feemɔ he nii, ni nakai nɔŋŋ hu amɛnyɛɛɛ amɛfee naakpɛɛ nii taakɛ mra be mli Kristofoi ni nine shɛ nakai hewalɛi anɔ kɛjɛ Kristo kɛ ebɔfoi lɛ aŋɔɔ lɛ ateŋ mɛi komɛi fee lɛ. Yɛ Kristo bɔfoi lɛ kɛ amɛhefatalɔi ni bɛŋkɛ amɛ kpaakpa lɛ agbele sɛɛ lɛ, nɛkɛ naakpɛɛ hewalɛi nɛɛ sɛɛ fo. No hewɔ lɛ, nyɛmɔ ni wɔkɛaaye wɔbua mɛi ni gbɔmɔtsoŋ helai yeɔ amɛ, ní jwɛŋmɔŋ helai kɛ mɛi ni susuɔ akɛ amɛmiina ninaai lɛ fata he lɛ, yawaa he ko pɛ.—Bɔfoi lɛ Asaji 8:13, 18; 1 Korintobii 13:8.
17. Mɛni wɔkaseɔ kɛjɛɔ bɔ ni akɛ Hiob ni he yeɔ ni eyeɔ awerɛho hu lɛ ye ha lɛ mli?
17 Bei pii lɛ jwɛŋmɔŋ haomɔ fataa hela he kɛbaa. Akɛ nɔkwɛmɔ nɔ lɛ, Hiob ni sheɔ Nyɔŋmɔ gbeyei lɛ hao waa yɛ hela ni mli wa waa kɛ amanehului ni Satan kɛba enɔ lɛ hewɔ. (Hiob 1:18, 19; 2:7; 3:3, 11-13) Nanemɛi ni kɛ lɛ baaye kɛ musuŋtsɔlɛ, ni ‘baashɛje emii’ he miihia lɛ. (1 Tesalonikabii 5:14) Yɛ no najiaŋ lɛ, hii etɛ komɛi ni tsɛɔ amɛhe miishɛjelɔi basara lɛ ni amɛkɛ oyaiyeli mu saji anaa yɛ gbɛ ni ejaaa nɔ. Amɛwie akɛ Hiob amanehului lɛ jɛ tɔmɔ ko ni etɔ hewɔ, ni amɛkɛ enɛ feemɔ wo ehaomɔ lɛ mli wu. Akɛni Kristofoi jieɔ musuŋtsɔlɛ kpo hewɔ lɛ, esa akɛ amɛtsi amɛhe kɛjɛ nɛkɛ tsɔne nɛɛ mli botemɔ he, kɛji nanemɛi héyelilɔi ahe miiye aloo amɛbote jwɛŋmɔŋ haomɔ shihilɛ mli. Bei komɛi lɛ, nɔ titri ni he hiaa nɛkɛ gbɔmɛi nɛɛ ji mlihilɛ saramɔi fioo ni onukpai lɛ aloo Kristofoi krokomɛi ni edara yɛ mumɔŋ lɛ baasara amɛ, ni amɛkɛ musuŋtsɔlɛ abo amɛ toi, ni amɛjie shishinumɔ kpo yɛ amɛhe, ni amɛkɛ Ŋmalɛ mli ŋaawoo aha amɛ.—Romabii 12:15; Yakobo 1:19.
Musuŋtsɔlɛ Kɛha Mɛi ni Egbɔjɔ
18, 19. (a) Te esa akɛ onukpai lɛ kɛ mɛi ni egbɔjɔ loo mɛi etɔ̃ lɛ aye aha tɛŋŋ? (b) Kɛji ehe miihia ni ato saneyeli ajinafoi akuu po lɛ, mɛni hewɔ ehe hiaa ni onukpai lɛ kɛ efɔŋ feelɔi lɛ aye kɛ musuŋtsɔlɛ lɛ?
18 Esa akɛ onukpai lɛ titri ajie musuŋtsɔlɛ kpo. (Bɔfoi lɛ Asaji 20:29, 35) Biblia lɛ fãa wɔ akɛ: “Wɔ mɛi ni wɔyɔɔ hewalɛ lɛ, esa akɛ wɔkpeɔ mɛi ni bɛ hewalɛ lɛ kɛ amɛgbɔjɔmɔi lɛ.” (Romabii 15:1) Akɛni wɔyeee emuu hewɔ lɛ, wɔteŋ mɔ fɛɛ mɔ tɔ̃ɔ. (Yakobo 3:2) Suɔmɔ he miihia yɛ be mli ni akɛ mɔ ni “nɔtɔmɔ ko banina [lɛ] trukaa” lɛ yeɔ lɛ. (Galatabii 6:1) Onukpai lɛ sumɔŋ ni amɛfee tamɔ Farisifoi ni buɔ amɛhe jalɔi, ni amɛkɛ hiɛshikamɔ tsuuu nii yɛ Nyɔŋmɔ Mla lɛ kɛ nitsumɔ mli lɛ kɔkɔɔkɔ.
19 Nɔ ni tamɔɔɔ enɛ lɛ, onukpai lɛ nyiɛɔ Yehowa Nyɔŋmɔ kɛ Yesu Kristo musuŋtsɔlɛ he nɔkwɛmɔ nii lɛ asɛɛ. Amɛ nitsumɔ titri ji amɛwo Nyɔŋmɔ tooi lɛ hewalɛ, kɛ ekaa, ni amɛha amɛna hejɔɔmɔ. (Yesaia 32:1, 2) Ní amɛaabɔ mɔdɛŋ akɛ amɛaakudɔ nibii kɛtsɔ mlai babaoo nɔ moŋ lɛ, amɛkwɛɔ shishitoo mlai kpakpai ni yɔɔ Nyɔŋmɔ Wiemɔ lɛ mli lɛ kɛhaa sɛɛfimɔ. No hewɔ lɛ, esa akɛ onukpai lɛ anitsumɔ afee mɛi atswaa-kɛ-shimaa, koni amɛha amɛnyɛmimɛi lɛ atsuii ana miishɛɛ kɛ hiɛsɔɔ amɛha Yehowa ejurɔfeemɔ lɛ. Kɛ naanyo héyelilɔ ko tɔ̃ tɔmɔ bibioo ko lɛ, bei pii lɛ, onukpa lɛ sumɔŋ ni ejaje lɛ yɛ mɛi ahiɛ ni amɛnu nɔ ni ekɛɔ lɛ. Kɛ ehe miihia ni ekɛ lɛ awie po lɛ, suɔmɔ henumɔi ni ji musuŋtsɔlɛ baatsirɛ onukpa lɛ ni etsɛ mɔ lɛ kɛya sɛɛ, ni ekɛ lɛ asusu naagba lɛ he, yɛ he ni mɛi krokomɛi nuŋ nɔ ni ekɛɔ lɛ lɛ. (Okɛto Mateo 18:15 he.) Bɔ fɛɛ bɔ ni mɔ ko kɛ wiemɔ wa waa ha po lɛ, esa akɛ gbɛ ni onukpa lɛ baatsɔ nɔ ekɛ lɛ awie lɛ afee nɔ ni tsuishitoo kɛ yelikɛbuamɔ yɔɔ mli. Esaaa akɛ etaoɔ naajiemɔi ni eeedamɔ nɔ eshwie mɔ ni tamɔ nɛkɛ kɛjɛ asafo lɛ mli. Kɛ ehe miihia ni ato saneyeli ajinafoi akuu po lɛ, onukpai lɛ baajie musuŋtsɔlɛ kpo yɛ bɔ ni amɛkɛ mɔ ni kɛ ehe eyawo efɔŋ feemɔ ni yɔɔ hiɛdɔɔ mli lɛ yeɔ haa lɛ mli. Ekolɛ amɛ tsuishitoo lɛ baaye abua ni akɛ nakai mɔ lɛ aba tsuitsakemɔ mli.—2 Timoteo 2:24-26.
20. Mɛɛ be mli musuŋtsɔlɛ ni jɛɔ henumɔi komɛi amli lɛ esaaa, ni mɛni hewɔ?
20 Shi, eshɛɔ bei komɛi ni Yehowa tsulɔ nyɛŋ ajie musuŋtsɔlɛ kpo. (Okɛto 5 Mose 13:6-9 he.) Yɛ Kristofonyo gbɛfaŋ lɛ, enaanyo loo ewekunyo ni bɛŋkɛ lɛ kpaakpa ni ashwie lɛ, ni ‘ekɛ lɛ ebɔŋ dɔŋŋ’ lɛ baanyɛ afee kaa diɛŋtsɛ kɛha lɛ. Yɛ shihilɛ ni tamɔ nakai mli lɛ, ehe miihia ni mɔ lɛ akaŋmɛɛ ehe eha mɔbɔnalɛ henumɔi. (1 Korintobii 5:11-13) Ekolɛ nɛkɛ shiŋŋfeemɔ nɛɛ po baaye abua mɔ ni etɔ̃ lɛ ni etsake etsui. Kɛfata he lɛ, yɛ be mli ni ekolɛ hii kɛ yei yeɔ lɛ, esa akɛ Kristofoi atsi amɛhe kɛjɛ musuŋtsɔlɛ henumɔi ni esaaa ni baanyɛ ekɛ mɔ aya bɔlɛnamɔ mli jeŋba shara mli lɛ ahe.
21. Mɛɛ hei krokomɛi hu ehe hiaa ni wɔjie musuŋtsɔlɛ kpo yɛ, ni mɛɛ sɛɛnamɔi jɛɔ mli baa?
21 Wɔnaŋ gbɛ ni da ni baaha wɔnyɛ wɔsusu hei sɔrɔtoi babaoo ni suɔmɔ kɛ musuŋtsɔlɛ he hiaa yɛ—yɛ bɔ ni akɛ mɛi ni edara yɛ afii amli, kɛ mɛi ni nɔ enyɔ amɛhiŋmɛiiŋ, kɛ mɛi ni kɛ yiwaa miikpe kɛmiijɛ amɛhefatalɔi ni heee yeee adɛŋ lɛ yeɔ ahaa lɛ fɛɛ he. Esa akɛ akɛ onukpai ni tsuɔ nii waa lɛ hu aye yɛ musuŋtsɔlɛ mli nakai nɔŋŋ. (1 Timoteo 5:17) Na bulɛ oha amɛ ni ofi amɛsɛɛ. (Hebribii 13:7, 17) Bɔfo Petro ŋma akɛ: “Nyɛ fɛɛ . . . nyɛmli ajɔa ahaa nyɛhe.” (1 Petro 3:8) Kɛ wɔfee wɔnii yɛ nɛkɛ gbɛ nɔ, yɛ shihilɛi fɛɛ ni ehe hiaa yɛ mli lɛ amli lɛ, wɔhaa ekomefeemɔ kɛ miishɛɛ yaa hiɛ yɛ asafo lɛ mli ni wɔgbalaa mɛi ni yɔɔ sɛɛ lɛ kɛbaa anɔkwale lɛ he. Nɔ ni fe fɛɛ lɛ, wɔkɛ nakai feemɔ woɔ wɔ-Tsɛ, Yehowa ni yɔɔ suɔmɔ kɛ musuŋtsɔlɛ lɛ hiɛ nyam.
Sanebimɔi ni Akɛtiɔ Mli
◻ Mɛɛ gbɛ nɔ Yehowa jieɔ musuŋtsɔlɛ kpo etsɔɔ adesai eshafeelɔi yɛ?
◻ Mɛni hewɔ ehe hiaa ni wɔna suɔmɔ kɛ musuŋtsɔlɛ lɛ?
◻ Mɛni ji gbɛtsii nii komɛi ni haaa anyɛ ajie musuŋtsɔlɛ kpo?
◻ Te esa akɛ wɔkɛ mɛi ni he yeɔ kɛ mɛi ni ehao yɛ jwɛŋmɔŋ lɛ aye aha tɛŋŋ?
◻ Namɛi titri ehe hiaa ni amɛna musuŋtsɔlɛ, ni mɛni hewɔ?
[Akrabatsa ni yɔɔ baafa 19]
FARISIFOI NI BƐ MUSUŊTSƆLƐ LƐ
ATO Hejɔɔmɔ gbi lɛ akɛ efee mumɔŋ kɛ heloonaa jɔɔmɔ kɛha Nyɔŋmɔ webii. Shi, Yudafoi ajamɔ mli hiɛnyiɛlɔi lɛ fee mlai babaoo kɛgbe Nyɔŋmɔ Hejɔɔmɔ Gbi mla lɛ he guɔ ni amɛha etsɔ jatsu ni kã gbɔmɛi lɛ anɔ. Akɛ nɔkwɛmɔ nɔ lɛ, kɛji mɔ ko yabote oshara mli loo hela ko miipiŋ lɛ waa lɛ, enyɛɛɛ ena yelikɛbuamɔ ko yɛ Hejɔɔmɔ Gbi lɛ nɔ, ja ewala eyaje oshara mli.
Farisifoi akui lɛ ekome yɛ shɛii waa yɛ bɔ ni etsɔɔ Hejɔɔmɔ Gbi lɛ he mla lɛ shishi ehaa lɛ mli, aahu akɛ amɛkɛɔ akɛ: “Ashɛjeee ŋkɔmɔyelɔi amii, ni asaraaa helatsɛmɛi hu yɛ Hejɔɔmɔ Gbi lɛ nɔ.” Jamɔ mli hiɛnyiɛlɔi krokomɛi ŋmɛ nɛkɛ saramɔi nɛɛ agbɛ yɛ Hejɔɔmɔ Gbi lɛ nɔ, shi amɛwo mla akɛ: “Aahi yaafo nui.”
Enɛ hewɔ lɛ, eja gbɛ jogbaŋŋ akɛ Yesu bu Yudafoi ajamɔ mli hiɛnyiɛlɔi lɛ fɔ, yɛ amɛhiɛ ni amɛku amɛshwie Mla lɛ mli taomɔ nii ni he hiaa, tamɔ jalɛ saneyeli, suɔmɔ, kɛ mɔbɔnalɛ nɔ lɛ he. Ebɛ naakpɛɛ akɛ ekɛɛ Farisifoi lɛ akɛ: “Nyɛgu Nyɔŋmɔ wiemɔ lɛ yɛ nyɛ blema saji ni nyɛkɛba jeŋ lɛ hewɔ”!—Marko 7:8, 13; Mateo 23:23; Luka 11:42.
[Mfoniri ni yɔɔ baafa 16]
Yehowa Odasefoi miitsu musuŋtsɔlɛ nitsumɔ ko ni atsuko eko nakai dã, yɛ shikpɔji 231 anɔ, yɛ gbɔmɛi ashiai amli, yɛ gbɛjegbɛi anɔ, kɛ tsuŋwoo hei amli po
[Mfoniri ni yɔɔ baafa 18]
Awuiyeli nibii ni wɔɔkwɛ, tamɔ nɔ ni ajieɔ yɛ TV nɔ lɛ, fiteɔ suɔmɔ kɛ musuŋtsɔlɛ ni wɔɔna