Yehowa Sumɔɔ Osusuma Muu Fɛɛ Sɔɔmɔ Lɛ
“Nɔ fɛɛ nɔ ni nyɛtsuɔ lɛ, nyɛjɛa nyɛsusuma muu fɛɛ mli nyɛtsua, taakɛ Yehowa nyɛtsuɔ nyɛhãa, shi jeee gbɔmɛi.”—KOLOSEBII 3:23, NW.
1, 2. (a) Mɛni ji hegbɛ ni fe fɛɛ ni wɔbaanyɛ wɔna? (b) Mɛni hewɔ yɛ bei komɛi amli lɛ wɔnyɛŋ wɔfee nɔ fɛɛ nɔ ni wɔsumɔɔ ni wɔfee yɛ Nyɔŋmɔ sɔɔmɔ mli lɛ?
YEHOWA sɔɔmɔ ji hegbɛ ni da fe fɛɛ ni wɔbaanyɛ wɔná. Ni yiŋtoo kpakpa hewɔ ni wolo nɛɛ ejɛ jeeŋmɔ ewo Kristofoi ahewalɛ koni amɛkɛ amɛhe awo sɔɔmɔ lɛ mli, ni amɛsɔmɔ ‘ni eteke nɔ fe tsutsu lɛ’ kɛ aaahi. (1 Tesalonikabii 4:1) Shi kɛlɛ, wɔnyɛɛɛ wɔtsu nibii fɛɛ ni wɔtsui shweɔ akɛ wɔtsu yɛ Nyɔŋmɔ sɔɔmɔ mli lɛ he nii. Nyɛmiyoo ko ni ji oshijafo ni abaptisi lɛ nɔ ni miihe ashɛ afii 40 ni eho nɛ lɛ tsɔɔ mli akɛ: “Shihilɛ mli ni miyɔɔ lɛ biɔ ni mikɛ be-fɛɛ atsu nii. Yiŋtoo hewɔ ni mitsuɔ nii lɛ jeee ni maná atadei ni jara wa babaoo, loo ni maná gbɛhamɔ ni baaha mikɛ ŋshɔ hiɛ lɛlɛ afã gbɛ, shi moŋ koni maná nibii ni he hiaa mi, ni tsofafeemɔ kɛ nyanyɔji ahe nyɔmɔbɔɔ fata he. Minuɔ he tamɔ nɔ ni mikɛ fioo ni shwɛɔ lɛ miiha Yehowa.”
2 Suɔmɔ kɛha Nyɔŋmɔ tsirɛɔ wɔ koni wɔsumɔ akɛ wɔɔfee babaoo ni wɔɔnyɛ yɛ shiɛmɔ nitsumɔ lɛ mli. Shi shihilɛ mli nibii tsĩɔ nɔ ni wɔbaanyɛ wɔfee lɛ naa yɛ bei pii amli. Ŋmalɛ naa gbɛnaa nii krokomɛi ahe nitsumɔ, ní weku mli gbɛnaa nii fata he baanyɛ ahe wɔbe kɛ hewalɛ babaoo. (1 Timoteo 5:4, 8) Shihilɛ miika mɔ waa yɛ “jaramɔ bei” nɛɛ amli. (2 Timoteo 3:1) Kɛ wɔnyɛɛɛ wɔfee nɔ fɛɛ nɔ ni wɔsumɔɔ ni wɔfee yɛ sɔɔmɔ lɛ mli lɛ, wɔtsui baanyɛ aye kɛyashɛ he ko. Ekolɛ wɔbaasusu akɛ ani wɔjamɔ lɛ saa Nyɔŋmɔ hiɛ po lo.
Fɛo ni Susuma Muu Fɛɛ Sɔɔmɔ lɛ Yɔɔ
3. Mɛni Yehowa kpaa gbɛ kɛjɛɔ wɔ fɛɛ wɔdɛŋ?
3 Biblia lɛ kɛ miishɛɛ hãa wɔ nɔmimaa yɛ Lala 103:14 akɛ, Yehowa “le wɔsu kɛ wɔbaŋ, ekaiɔ akɛ sũ kɛkɛ ji wɔ.” Enuɔ wɔ fãtɔɔi lɛ shishi babaoo fe mɔ fɛɛ mɔ. Ebiii babaoo fe bɔ ni wɔɔnyɛ wɔkɛha. Mɛni gbɛ ekpaa? Nɔ ko ni mɔ fɛɛ mɔ baanyɛ ekɛha, ni shihilɛ mli ni mɔ lɛ yɔɔ lɛ kɔɔɔ he eko: “Nɔ fɛɛ nɔ ni nyɛtsuɔ lɛ, nyɛjɛa nyɛsusuma muu fɛɛ mli nyɛtsua, taakɛ Yehowa nyɛtsuɔ nyɛhaa shi jeee gbɔmɛi.” (Kolosebii 3:23, NW) Hɛɛ, Yehowa miikpa wɔ gbɛ—wɔ fɛɛ—ni wɔjɛ susuma muu fɛɛ mli wɔsɔmɔ lɛ.
4. Ákɛ ajɛ susuma muu fɛɛ mli asɔmɔ Yehowa lɛ tsɔɔ mɛni?
4 Ákɛ aaajɛ susuma muu fɛɛ mli asɔmɔ Yehowa lɛ tsɔɔ mɛni? Hela wiemɔ ni atsɔɔ shishi akɛ “susuma muu fɛɛ” lɛ shishi diɛŋtsɛ ji “kɛjɛ susuma lɛ mli.” “Susuma” lɛ tsɔɔ gbɔmɔ muu lɛ fɛɛ, kɛ egbɔmɔtsoŋ kɛ jwɛŋmɔŋ nyɛmɔi fɛɛ. No hewɔ lɛ susuma muu fɛɛ mli ni ajɛɔ asɔmɔɔ lɛ tsɔɔ wɔhe ni wɔkɛhaa, wɔjwɛŋmɔŋ nyɛmɔi fɛɛ ni wɔkɛtsuɔ nii, kɛ wɔ hewalɛi ni wɔkɛtsuɔ nii kɛyashɛɔ he ni wɔɔnyɛ yɛ Nyɔŋmɔ sɔɔmɔ mli. Kɛ wɔɔwie he kuku lɛ, etsɔɔ akɛ ni wɔɔtsu nɔ fɛɛ nɔ ni wɔsusuma baanyɛ atsu.—Marko 12:29, 30.
5. Yɛ mɛɛ gbɛ nɔ bɔfoi lɛ anɔkwɛmɔnɔ lɛ tsɔ̃ɔ yɛ akɛ jeee mɔ fɛɛ mɔ baafee nɔ fɛɛ nɔ pɛpɛɛpɛ yɛ sɔɔmɔ lɛ mli?
5 Ani susuma muu fɛɛ mli ni wɔjɛɔ wɔtsuɔ nii lɛ tsɔɔ akɛ esa akɛ wɔ fɛɛ wɔtsu nitsumɔ falɛ lɛ nɔŋŋ yɛ sɔɔmɔ lɛ mli? Ebaawa akɛ eeeba lɛ nakai, ejaakɛ shihilɛi kɛ nyɛmɔi yɛ sɔrɔto yɛ susuma kome kɛ susuma kroko nɔ he. Susumɔ Yesu bɔfoi anɔkwafoi lɛ ahe. Amɛ fɛɛ amɛnyɛɛɛ amɛtsu nitsumɔ kome too lɛ nɔŋŋ. Akɛ nɔkwɛmɔnɔ lɛ, bɔfoi lɛ ateŋ mɛi komɛi ahe saji fioo ko pɛ wɔle, tamɔ Simon, Kanaannyo lɛ kɛ Yakobo, Alfeo bi lɛ. Ekolɛ amɛ nitsumɔi akɛ bɔfoi lɛ faaa. (Mateo 10:2-4) Nɔ ni tamɔɔɔ nakai lɛ, Petro nyɛ ekpɛlɛ gbɛnaa nii pii ni tsiitsii lɛ anɔ—ejaakɛ Yesu kɛ “maŋtsɛyeli lɛ naa samfei” po ha lɛ! (Mateo 16:19) Ni kɛlɛ, awooo Petro nɔ kɛtekeee mɛi krokomɛi lɛ. Beni Yohane nine shɛ ninaa ni kɔɔ Yerusalem Hee lɛ he lɛ nɔ yɛ Kpojiemɔ (aaafee afi 96 Ŋ.B.) lɛ, ena shishitoo tɛi 12 ni aŋmala “bɔfoi nyɔŋma kɛ enyɔ lɛ agbɛii” yɛ nɔ.a (Kpojiemɔ 21:14) Yehowa buɔ bɔfoi lɛ fɛɛ asɔɔmɔ lɛ akɛ amɛjara wa, eyɛ mli akɛ ekã shi faŋŋ akɛ amɛteŋ mɛi komɛi nyɛ amɛfee babaoo fe mɛi krokomɛi.
6. Yɛ Yesu abɛbua ni kɔɔ nidulɔ lɛ he lɛ mli lɛ, mɛni ba dumɔwu ni yashwie “shikpɔŋ kpakpa” nɔ lɛ nɔ, ni mɛɛ sanebimɔi teɔ shi?
6 Nakai nɔŋŋ hu Yehowa biii shiɛmɔ falɛ lɛ nɔŋŋ kɛjɛɛɛ wɔ fɛɛ wɔdɛŋ. Yesu tsɔ̃ɔ enɛ yɛ nidulɔ lɛ abɛbua, ni kɛ shiɛmɔ nitsumɔ lɛ to wui ni aduɔ he lɛ mli. Dumɔwu lɛ yagbee sũi loo shikpɔji sɔrɔtoi amli, ni efee shihilɛ mli ni tsuii sɔrɔtoi yɔɔ, ni mɛi ni nuɔ sane lɛ jieɔ lɛ kpo lɛ he mfoniri. Yesu tsɔɔ mli akɛ: “Shi mɔ ni adu yɛ shikpɔŋ kpakpa nɔ lɛ, lɛ ji mɔ ni nuɔ wiemɔ lɛ ni eyooɔ sɛɛ, ni esaa ewoɔ yibii hu, ni ebaa, mɔ ko oha, mɔ ko hu nyɔŋmai ekpaa, kɛ mɔ ko hu nyɔŋmai etɛ.” (Mateo 13:3-8, 18-23) Mɛni ji nɛkɛ yibiiwoo nɛɛ, ni mɛni hewɔ efalɛ yɔɔ sɔrɔto lɛ?
7. Mɛni ji yibii ni dumɔwu lɛ wo lɛ, ni mɛni hewɔ eyibii lɛ falɛ yɔɔ sɔrɔto lɛ?
7 Akɛni dumɔwu ni aduɔ lɛ ji “maŋtsɛyeli lɛ he wiemɔ lɛ” hewɔ lɛ, yibii ni awoɔ lɛ ji wiemɔ lɛ gbɛɛ-kɛ-shwamɔ, ehe ni awieɔ atsɔɔ mɛi krokomɛi. (Mateo 13:19) Yibii ni awoɔ lɛ falɛ yɛ sɔrɔtoi—kɛjɛ toi nyɔŋmai etɛ kɛyashi oha—ejaakɛ nyɛmɔi kɛ wala shihilɛ yɛ sɔrɔto. Mɔ ni yɔɔ gbɔmɔtsoŋ hewalɛ kpakpa baanyɛ aye be babaoo yɛ shiɛmɔ mli fe mɔ ni ehewalɛ eba shi yɛ hela ko ni gbaa enaa be fɛɛ be lɛ hewɔ, loo mɔ ni afii ni eye lɛ etee hiɛ. Obalanyo loo obalayoo oshijafonyo ni bɛ weku mli gbɛnaa nii lɛ baanyɛ atsu babaoo fe mɔ ni esa akɛ ekɛ ebe-fɛɛ atsu nii ni ekɛkwɛ weku.—Okɛto Abɛi 20:29 he.
8. Te Yehowa buɔ mɛi ni kɛ nɔ ni hi fe fɛɛ ni amɛsusuma baanyɛ ekɛha lɛ hãa lɛ tɛŋŋ?
8 Yɛ Nyɔŋmɔ hiɛ lɛ, ani mɔ ni naa toi nyɔŋmai etɛ lɛ jeee mɔ ni etu ehe eha babaoo tamɔ mɔ ni naa toi oha lɛ? Etamɔɔɔ nakai kwraa! Yibiiwoo lɛ falɛ baafee sɔrɔto, shi Yehowa hiɛ sɔɔ, yɛ bei abɔ ni sɔɔmɔ ni akɛha lɛ ji nɔ ni hi fe fɛɛ ni wɔsusuma baanyɛ ekɛha. Kaimɔ akɛ, yibiiwoo lɛ falɛ ni yɔɔ sɔrɔto lɛ fɛɛ jɛ tsuii ni ji “shikpɔŋ kpakpa” mli. Hela wiemɔ (ka·losʹ) ni atsɔɔ shishi akɛ “kpakpa” lɛ tsɔɔ nɔ ko ni yɔɔ “fɛo” ni “ŋɔɔ tsui naa ni feɔ hiŋmɛi fɛo.” Kwɛ bɔ ni eshɛjeɔ wɔmii akɛ wɔɔle akɛ, kɛ wɔfee nɔ ni hi fe fɛɛ ni wɔɔnyɛ lɛ, wɔtsui feɔ fɛo yɛ Nyɔŋmɔ hiɛ!
Akɛtooo Mɔ Kroko Nɔ̃ He
9, 10. (a) Wɔtsui baanyɛ aha wɔsusu mɛɛ nibii ni ejaaa he? (b) Yɛ mɛɛ gbɛ nɔ nɔkwɛmɔnɔ ni yɔɔ 1 Korintobii 12:14-26 lɛ tsɔɔ akɛ Yehowa kɛ nɔ ni wɔfeɔ lɛ etooo mɛi krokomɛi anɔ̃ he?
9 Shi, wɔtsui ni yeee emuu lɛ baanyɛ akojo sane yɛ gbɛ kroko nɔ. Ekolɛ ekɛ wɔsɔɔmɔ lɛ baato mɛi krokomɛi anɔ̃ he. Ekolɛ ebaasusu akɛ, ‘Mɛi krokomɛi miifee babaoo yɛ sɔɔmɔ nitsumɔ lɛ mli fe mi. Te aaafee tɛŋŋ ni Yehowa hiɛ aaasɔ misɔɔmɔ lɛ?’—Okɛto 1 Yohane 3:19, 20 he.
10 Yehowa susumɔi kɛ egbɛi anɔ kwɔlɔ fe wɔ diɛŋtsɛ wɔ nɔ̃. (Yesaia 55:9) Wɔnuɔ bɔ ni Yehowa susuɔ wɔ aŋkroaŋkro mɔdɛŋbɔi ahe lɛ shishi kɛjɛɔ 1 Korintobii 12:14-26, he ni akɛ asafo lɛ to gbɔmɔtso ni hiɛ henii pii—hiŋmɛii, niji, naji, toii, kɛ ekrokomɛi ahe yɛ lɛ. Okɛ be fioo ko asusu gbɔmɔtso lɛ diɛŋtsɛ he okwɛ. Kwɛ ŋmɔlɔ ni eeefee akɛ okɛ ohiŋmɛii aaato oniji ahe loo okɛ onaji aaato otoii ahe! Henɔ̃ fɛɛ henɔ̃ tsuɔ nɔ ko ni yɔɔ sɔrɔto he nii, ni kɛlɛ henii lɛ fɛɛ he yɛ sɛɛnamɔ ni abuɔ amɛ. Nakai nɔŋŋ hu Yehowa sumɔɔ osusuma muu fɛɛ sɔɔmɔ lɛ kɛ́ mɛi krokomɛi miifee babaoo loo amɛmiifee fioo.—Galatabii 6:4.
11, 12. (a) Mɛni hewɔ ekolɛ mɛi komɛi baanu he akɛ “amɛhe waaa” loo ‘amɛhiɛ bɛ nyam’ lɛ? (b) Te Yehowa buɔ sɔɔmɔ ni wɔkɛhãa lɛ lɛ ehãa tɛŋŋ?
11 Yɛ naatsii ni hela, gbɔlɛ, loo shihilɛi krokomɛi kɛbaa hewɔ lɛ, ekolɛ wɔteŋ mɛi komɛi baanyɛ anu he yɛ bei komɛi amli akɛ “amɛhe waaa” loo ‘amɛhiɛ bɛ nyam.’ Shi jeee nakai Yehowa naa saji ehaa. Biblia lɛ kɛɔ wɔ akɛ: “Gbɔmɔtso lɛ henii ni efeɔ wɔ akɛ amɛhe waaa kwraa lɛ, amɛ moŋ amɛhe hiaa wɔ titri; ni nii ni efeɔ wɔ akɛ amɛji gbɔmɔtso henii ni hiɛ bɛ nyam kwraa lɛ, nomɛi titri ahiɛ nyam wɔwoɔ, . . . Shi Nyɔŋmɔ to gbɔmɔtso lɛ gbɛjianɔ etsara, ni nɔ ni shwɛɔ lɛ nɔ ko lɛ, no titri ekɛ woo haa.” (1 Korintobii 12:22-24) No hewɔ lɛ, aŋkroaŋkro fɛɛ baanyɛ afee mɔ ni jara wa kɛha Yehowa. Ebuɔ wɔ sɔɔmɔ ni wɔkɛhaa yɛ he ni wɔnyɛɔ wɔfeɔ nii kɛyashɛɔ lɛ waa. Ani otsui tsirɛɛɛ bo koni osumɔ akɛ ooofee nɔ fɛɛ nɔ ni ooonyɛ ni okɛsɔmɔ Nyɔŋmɔ ni tamɔ nɛkɛ ni yɔɔ shishinumɔ kɛ suɔmɔ lɛ?
12 Belɛ nɔ ni he hiaa Yehowa lɛ jeee ni ofee babaoo tamɔ bɔ ni mɔ ko feɔ, shi moŋ akɛ ofee nɔ ni bo—osusuma—diɛŋtsɛ baanyɛ afee. Ákɛ Yehowa buɔ wɔ aŋkroaŋkro mɔdɛŋbɔi lɛ, afee enɛ he nɔkwɛmɔnɔ yɛ gbɛ ni saa mɔ tsui he waa nɔ, yɛ gbɛ ni Yesu tsɔ nɔ ekɛ yei sɔrɔtoi enyɔ ko ye ha lɛ mli, yɛ eshikpɔŋ nɔ shihilɛ lɛ naagbee gbii lɛ amli.
Yoo ni Hiɛ Sɔɔ Nii lɛ Nikeenii “Ni Jara Wa Naakpa” Lɛ
13. (a) Mɛɛ shihilɛi amli mũ ni jeɔ ŋma ni Maria fɔse eshwie Yesu yiteŋ kɛ enaji ahe lɛ ba yɛ? (b) Mɛni ji Maria mũ lɛ jara?
13 Yɛ Sohaa gbɛkɛ, Nisan 8 lɛ, Yesu bashɛ Betania, akrowa fioo ko ni yɔɔ Mu Gɔŋ lɛ bokagbɛ he ni ema enaa shi yɛ lɛ mli, aaafee kilomitai etɛ̃ kɛjɛ Yerusalem. Yesu yɛ nanemɛi ni esumɔɔ amɛ yɛ maŋ nɛɛ mli—Maria, Marta, kɛ amɛnyɛmi nuu, Lazaro. Yesu batoɔ amɛ gbɔ yɛ amɛshia lɛ, ekolɛ shii abɔ. Shi Hɔɔ gbɛkɛ lɛ, Yesu kɛ enanemɛi lɛ ye nii yɛ Simon, tsutsu kpitiyelɔ ko ni eeenyɛ efee akɛ Yesu tsa lɛ lɛ shia. Beni Yesu ta okpɔlɔ lɛ he lɛ, Maria kɛ heshibaa fee nɔ ko ni tsɔɔ suɔmɔ kpele ni eyɔɔ kɛha nuu ni tee enyɛmi nuu lɛ shi lɛ. Ejwa tɔ ni mu “ni jara wa naakpa” yɔɔ mli. Ejara wa diɛŋtsɛ! Ejara ji denarioi 300, ni eshɛɔ afi nyɔmɔwoo. Efɔse mu ni jeɔ ŋma nɛɛ eshwie Yesu yiteŋ kɛ enaji ahe. Ni ekɛ eyitsɔi tsumɔ enaji ahe po.—Marko 14:3; Luka 10:38-42; Yohane 11:38-44; 12:1-3.
14. (a) Te kaselɔi lɛ fee amɛnii yɛ Maria nifeemɔ lɛ he amɛha tɛŋŋ? (b) Yesu fã Maria he yɛ mɛɛ gbɛ nɔ?
14 Kaselɔi lɛ amli wo la! Amɛbi akɛ: ‘Mɛɛ nifitemɔ nɛ?’ Yuda, ni kɛ bɔ ni esumɔɔ ni eju nii lɛ teeɔ ŋaawoo ni tsɔɔ nii ni kulɛ esa akɛ akɛke ohiafoi lɛ sɛɛ lɛ, kɛɛ akɛ: “Mɛni hewɔ ahɔɔɔ mu nɛɛ aheee denarioi ohai etɛ, ni aŋɔ-ha ohiafoi?” Maria fee dioo. Shi Yesu kɛɛ kaselɔi lɛ akɛ: “Nyɛfɔa lɛ hiɛmɔ; mɛni hewɔ nyɛhaoɔ lɛ? Etsu nitsumɔ fɛfɛo [nɔ ni tamɔ ka·losʹ] eha mi. . . . Mɔ nɛɛ lɛ, nɔ ni enyɛ efee nɛ; etsɔ hiɛ ebafɔ migbɔmɔtso lɛ mũ eto mifũu. Lɛɛlɛŋ, miikɛɛ nyɛ akɛ: He fɛɛ he ni aaashiɛ sanekpakpa nɛɛ yɛ, yɛ je nɛŋ fɛɛ lɛ, aaatsĩ nɔ ni efee nɛɛ hu tã aŋɔkai lɛ.” Kwɛ bɔ ni miishɛɛ ni yɔɔ Yesu wiemɔi lɛ amli lɛ aaaha Maria tsui anyɔ emli aha!—Marko 14:4-9; Yohane 12:4-8.
15. Mɛni hewɔ nɔ ni Maria fee lɛ sa Yesu tsui he waa nakai lɛ, ni mɛni wɔkaseɔ yɛ susuma muu fɛɛ sɔɔmɔ he?
15 Nɔ ni Maria fee lɛ kanya Yesu waa. Yɛ esusumɔ naa lɛ, éfee nii ni sa yijiemɔ. Jeee nikeenii lɛ jara ji nɔ ni he hiaa Yesu, shi yɛ anɔkwale ni eji akɛ ‘efee nɔ ni ebaanyɛ.’ Ekɛ hegbɛ lɛ tsu nii, ni ekɛ nɔ ni ebaanyɛ ekɛha lɛ hã. Shishitsɔɔmɔi krokomɛi etsɔɔ nɛkɛ wiemɔi nɛɛ ashishi akɛ, “Efee nɔ fɛɛ nɔ ni eeenyɛ,” aloo, “Éfee nɔ ni yɔɔ ehewalɛ mli ni eeenyɛ efee.” (An American Translation; The Jerusalem Bible) Maria nihamɔ lɛ jɛ susuma muu fɛɛ mli, ejaakɛ ekɛ nɔ ni eyɔɔ ni fe fɛɛ lɛ ha. No ji nɔ ni susuma muu fɛɛ sɔɔmɔ lɛ tsɔɔ.
Yoo Okulafo ko “Shika Bibii Enyɔ” Lɛ
16. (a) Te fee tɛŋŋ ni Yesu bana yoo okulafo ohiafo ko oniatsumɔ lɛ? (b) Mɛni ji okulafo lɛ shika lɛ jara?
16 Yɛ gbii enyɔ asɛɛ, yɛ Nisan 11 lɛ, Yesu ye gbi muu yɛ sɔlemɔwe lɛ, yɛ he ni abi lɛ hegbɛ ni eyɔɔ ni ekɛfeɔ nɔ ni efeɔ lɛ he sane yɛ, ni eha sanebimɔi ni wa ni kɔɔ toohemɔi, gbohiiashitee, kɛ saji krokomɛi ahetoo trukaa yɛ lɛ. Ebu woloŋmalɔi kɛ Farisifoi lɛ fɔ, ejaakɛ kɛfata nibii krokomɛi ahe lɛ, amɛji mɛi ni “miɔ yei okulafoi ashiai.” (Marko 12:40) Kɛkɛ ni Yesu yata shi, eka shi faŋŋ akɛ yɛ Yei Akpo lɛ nɔ, he ni taakɛ Yudafoi ablemasaji tsɔɔ lɛ, shika adekai 13 mamɔ shi yɛ lɛ. Eta shi yɛ be saŋŋ mli, ni eekwɛ mɛi ni kɛ amɛ oniatsumɔ shika lɛ woɔ mli lɛ jogbaŋŋ. Niiatsɛmɛi pii ba, ekolɛ amɛteŋ mɛi komɛi ba akɛ mɛi ni buɔ amɛhe jalɔi, kɛ hoofeemɔ babaoo po. (Okɛto Mateo 6:2 he.) Yesu kwɛ yoo pɔtɛɛ ko gãa. Ekolɛ hiŋmɛi folo nyɛŋ ayoo nɔ ko ni sa kadimɔ yɛ ehe loo enikeenii lɛ he. Shi Yesu, ni baanyɛ ale mɛi krokomɛi atsuiaŋ lɛ le akɛ eji “yoo okulafo ohiafo.” Ni ele shika ni ekɛbawo mli lɛ naa pɛpɛɛpɛ hu—“leptoi enyɔ ni naa shiɔ tsaakpoo.”b—Marko 12:41, 42.
17. Mɛɛ bulɛ Yesu kɛha okulafo lɛ oniatsumɔ lɛ, no hewɔ lɛ, mɛni wɔkaseɔ yɛ nii ni wɔkɛhãa Nyɔŋmɔ lɛ he?
17 Yesu tsɛ ekaselɔi lɛ kɛba emasɛi, ejaakɛ eetao ni amɛkɛ amɛhiŋmɛi ana nii ni ebaatsɔɔ amɛ lɛ. Yesu kɛɛ yoo lɛ “kɛ pii ewo mli fe mɛi fɛɛ ni kɛ eko ebawo shikatoohe lɛ mli lɛ.” Yɛ esusumɔ naa lɛ, yoo lɛ kɛ babaoo wo mli fe mɛi krokomɛi lɛ fɛɛ anɔ̃ ni abua naa. Ekɛ shika “ni ekɛlɛɔ ehe lɛ fɛɛ”—shika fioo ni eyɔɔ lɛ fɛɛ bawo mli. Ekɛ ehe wo Yehowa dɛŋ kɛha kwɛmɔ yɛ nakai feemɔ mli. Gbɔmɔ ni akɛ lɛ fee nɔkwɛmɔnɔ yɛ nii ni akɛhaa Nyɔŋmɔ lɛ mli lɛ ji mɔ ni enikeenii lɛ ji nɔ ni sɛɛnamɔ ko kwraa bɛ he yɛ ejara gbɛfaŋ. Shi yɛ Nyɔŋmɔ hiɛ lɛ, nɔ ko bɛ ni abaanyɛ akɛto he!—Marko 12:43, 44; Yakobo 1:27.
Nii ni Wɔkaseɔ Kɛjɛɔ Bɔ ni Yehowa Buɔ Susuma Muu Fɛɛ Sɔɔmɔ Ehaa lɛ Mli
18. Mɛni wɔkaseɔ kɛjɛɔ bɔ ni Yesu kɛ yei enyɔ lɛ ye ha lɛ mli?
18 Yɛ bɔ ni Yesu kɛ yei enyɔ nɛɛ ye ha hewɔ lɛ, wɔkaseɔ nibii komɛi ni haa mɔ tsui nyaa yɛ bɔ ni Yehowa buɔ susuma muu fɛɛ sɔɔmɔ ehaa lɛ mli. (Yohane 5:19) Yesu kɛ okulafo lɛ etooo Maria he. Ebuuu okulafo lɛ shika bibii enyɔ lɛ akɛ amɛjara waaa tamɔ Maria mũ ni “jara wa naakpa” lɛ. Akɛni yei lɛ ateŋ mɔ fɛɛ mɔ kɛ nɔ ni hi fe fɛɛ ni eyɔɔ ha hewɔ lɛ, amɛ nikeenii lɛ jara yeɔ egbɔ yɛ Nyɔŋmɔ hiɛ. No hewɔ lɛ, kɛji akɛ henumɔ ko te shi yɛ omli akɛ sɛɛnamɔ ko bɛ ohe, akɛni onyɛɛɛ ofee nɔ fɛɛ nɔ ni osumɔɔ ni ofee yɛ Nyɔŋmɔ sɔɔmɔ mli hewɔ lɛ, kaaha onijiaŋ miije wui. Eŋɔɔ Yehowa naa akɛ eeekpɛlɛ nɔ ni hi fe fɛɛ ni okɛaaha lɛ nɔ. Kaimɔ akɛ, Yehowa lɛ “tsui ekwɛɔ,” no hewɔ lɛ, ele nii ni otsui shweɔ lɛ.—1 Samuel 16:7.
19. Mɛni hewɔ esaaa akɛ wɔkojoɔ yɛ nɔ ni mɛi krokomɛi feɔ yɛ Nyɔŋmɔ sɔɔmɔ mli lɛ he?
19 Esa akɛ bɔ ni Yehowa buɔ susuma muu fɛɛ sɔɔmɔ ehaa lɛ ana bɔ ni wɔbuɔ ni wɔfeɔ wɔhe lɛ nɔ hewalɛ. Kwɛ bɔ ni suɔmɔ bɛ mli kwraa ha akɛ wɔɔwie wɔshi mɛi krokomɛi amɔdɛŋbɔɔ aloo ni wɔkɛ mɔ ko sɔɔmɔ aaato mɔ kroko nɔ̃ he! Eyɛ mɔbɔ akɛ Kristofonyo ko aaaŋma akɛ: “Yɛ bei komɛi amli lɛ, mɛi komɛi anifeemɔ tsɔɔ akɛ, kɛ ojeee gbɛgbalɔ lɛ, belɛ sɛɛnamɔ ko kwraa bɛ ohe. Esa akɛ hiɛ asɔ wɔ mɛi ni wɔtswiaa shi kɛyaa nɔ akɛ daa Maŋtsɛyeli shiɛlɔi ‘kɛkɛ’ lɛ hu.” Nyɛhaa wɔkaia akɛ, akɛ hegbɛ ko hako wɔ ni wɔkojo yɛ nɔ ni ji susuma muu fɛɛ sɔɔmɔ kɛha naanyo Kristofonyo lɛ mli. (Romabii 14:10-12) Yehowa sumɔɔ Maŋtsɛyeli shiɛlɔi anɔkwafoi akpekpei abɔ lɛ ateŋ mɔ fɛɛ mɔ susuma muu fɛɛ sɔɔmɔ lɛ, ni esa akɛ wɔ hu wɔfee nakai.
20. Ehi jogbaŋŋ akɛ wɔɔsusu mɛni he yɛ wɔnanemɛi jálɔi lɛ ahe?
20 Shi, kɛji akɛ etamɔ nɔ ni mɛi komɛi miifee nɔ ni shɛɛɛ bɔ ni amɛbaanyɛ amɛfee lɛ he yɛ sɔɔmɔ lɛ mli hu? Naanyo heyelilɔ ko nitsumɔ ni baa shi lɛ baanyɛ aha onukpai ni susuɔ sane he lɛ anu he akɛ yelikɛbuamɔ loo hewalɛwoo he miihia. Yɛ nakai beaŋ nɔŋŋ lɛ, esaaa akɛ wɔhiɛ kpaa nɔ akɛ, kɛha mɛi komɛi lɛ, susuma muu fɛɛ sɔɔmɔ lɛ baanyɛ atamɔ okulafo lɛ shika bibii lɛ pɛpɛɛpɛ fe Maria mũ ni jara wa lɛ. Ehi jogbaŋŋ akɛ wɔɔsusu akɛ wɔnyɛmimɛi hii kɛ yei lɛ sumɔɔ Yehowa, ni akɛ nɛkɛ suɔmɔ nɛɛ baatsirɛ amɛ ni amɛfee babaoo ni amɛaanyɛ—jeee bibioo—ni amɛaanyɛ. Yɛ anɔkwale mli lɛ, Yehowa tsulɔ ko bɛ ni yɔɔ henilee kpakpa ni baahala akɛ ebaafee nɔ ko fioo ko pɛ yɛ Nyɔŋmɔ sɔɔmɔ mli fe bɔ ni eeenyɛ efee!—1 Korintobii 13:4, 7.
21. Mɛɛ nitsumɔ ni nyɔmɔwoo yɔɔ mli mɛi pii diɔ sɛɛ, ni mɛɛ sanebimɔi teɔ shi?
21 Shi, kɛha Nyɔŋmɔ webii lɛ ateŋ mɛi pii lɛ, susuma muu fɛɛ sɔɔmɔ efee nitsumɔ ni nyɔmɔwoo babaoo yɔɔ mli—gbɛgbamɔ sɔɔmɔ lɛ sɛɛdii. Mɛɛ jɔɔmɔi amɛnine shɛɔ nɔ? Ni wɔ mɛi ni wɔnyɛko wɔkɛ wɔhe awo gbɛgbamɔ mli lɛ hu—te wɔɔfee tɛŋŋ wɔjie gbɛgbamɔ mumɔ lɛ kpo? Abaasusu nɛkɛ sanebimɔi nɛɛ ahe yɛ nikasemɔ ni nyiɛ sɛɛ lɛ mli.
[Shishigbɛ niŋmai]
a Akɛni Matia baye Yuda najiaŋ akɛ bɔfo hewɔ lɛ, egbɛi—shi jeee Paulo gbɛi—baafata nɔ ni yɔɔ shishitoo tɛi 12 lɛ anɔ̃ lɛ he. Eyɛ mli akɛ Paulo ji bɔfo moŋ, shi ejeee 12 lɛ ateŋ mɔ kome.
b Shikai nɛɛ eko fɛɛ eko ji lepto, Yudafoi ashika ni ayeɔ yɛ nakai be lɛ mli lɛ ateŋ nɔ ni ji bibioo kwraa. Leptoi enyɔ feɔ gbi kome nitsumɔ nyɔmɔwoo lɛ mlijaa 1/64. Taakɛ Mateo 10:29 tsɔɔ lɛ, mɔ ko kɛ asario shika (ni feɔ leptoi kpaanyɔ) baanyɛ ahe afilimatai, ni fata loofɔji ni jara waaa kwraa ni ohiafoi kɛfeɔ niyenii lɛ ahe lɛ enyɔ. No hewɔ lɛ okulafo nɛɛ ji ohiafo diɛŋtsɛ, ejaakɛ shika ni ekɛaahe afilimata kome lɛ fã pɛ ehiɛ, eshɛɛɛ shikome niyeli po.
Te Obaaha Hetoo Oha Tɛŋŋ?
◻ Ákɛ ajɛ susuma muu fɛɛ mli asɔmɔ Yehowa lɛ tsɔ̃ɔ mɛni?
◻ Mɛɛ gbɛ nɔ nɔkwɛmɔnɔ ni yɔɔ 1 Korintobii 12:14-26 lɛ tsɔɔ yɛ akɛ, Yehowa kɛ wɔ etooo mɛi krokomɛi ahe?
◻ Mɛni wɔkaseɔ yɛ nihamɔ ni jɛ susuma muu fɛɛ mli lɛ he, yɛ nɔ ni Yesu wie yɛ Maria mũ ni jara wa naakpa lɛ kɛ okulafo lɛ shika bibii enyɔ lɛ he lɛ hewɔ?
◻ Mɛɛ gbɛ nɔ esa akɛ wɔhã bɔ ni Yehowa buɔ susuma muu fɛɛ sɔɔmɔ ehãa lɛ aná bɔ ni wɔsusuɔ mɛi ahe wɔhãa lɛ nɔ hewalɛ yɛ?
[Mfoniri ni yɔɔ baafa 15]
Maria kɛ nɔ ni eyɔɔ ni hi fe fɛɛ ha, ekɛ mũ ni “jara wa naakpa” kpa Yesu gbɔmɔtso lɛ he
[Mfoniri ni yɔɔ baafa 16]
Okulafo lɛ shikai lɛ—sɛɛnamɔ ko bɛ he yɛ ejarawalɛ gbɛfaŋ, shi nɔ ko bɛ ni ejara tamɔ no yɛ Yehowa hiɛ