Biblia Mli Wolo ni Ji 51—Kolosebii

Mɔ ni Ŋma: Paulo

Heni Aŋma Yɛ: Roma

Be ni Aŋma Agbe Naa: Aaafee afi 60–61 Ŋ.B.

HII enyɔ komɛi shi Efeso ni amɛnyiɛ amɛnane nɔ kɛfã gbɛ kɛtsɔ Asia Bibioo lɛ bokagbɛ yɛ Maeander (Menderes) Faa lɛ he. Beni amɛshɛ faa ni yɔɔ Frigia kpokpaa lɛ nɔ ni atsɛɔ lɛ Lycus ní hoɔ kɛboteɔ Maeander faa lɛ mli lɛ, amɛtsɔ wuoyi-boka gbɛ yɛ Lycus faa lɛ he kɛyatsɔ jɔɔ ko ni gɔji ebɔle lɛ mli. Amɛyaje shikpɔŋ fɛfɛo ko ni yɔɔ frɔfrɔ ni tooi akui babaoo yɔɔ nɔ lɛ nɔ. (Nitsumɔ titri ni atsuɔ yɛ kpokpaa nɛɛ nɔ ji toohetsɔi ni akɛfeɔ nibii.a) Amɛtsɔ amɛninejurɔ gbɛ kɛtsɔ Laodikea ni ji Roma nɔyeli lɛ maŋtiase kɛha nakai kpokpaa lɛ, ni emli bii lɛ yɛ nii waa lɛ mli. Hierapoli ni ehe gbɛi yɛ sɔlemɔtsui kɛ faa ni mli edɔ ni yɔɔ jɛmɛ lɛ hewɔ lɛ yɛ Lycus faa lɛ abɛkugbɛ. Kristofoi asafoi yɛ Laodikea kɛ Hierapoli kɛ maŋ bibioo ni ji Kolose ni yɔɔ kooyigbɛ ni kɛ amɛteŋ jɛkɛmɔ ji kilomitai 16 lɛ.

² Kolose ji heni gbɛfalɔi enyɔ lɛ yaa lɛ. Kristofoi ji amɛ. Mɔ kome le kpokpaa nɛɛ nɔ jogbaŋŋ ejaakɛ ejɛ Kolose. Egbɛi ji Onesimo, ni eji nyɔŋ ni miiku esɛɛ koni eyasɔmɔ enuŋtsɔ ni ji asafo ni yɔɔ kolose lɛ mli nyo lɛ ekoŋŋ. Atsɛɔ mɔ ni fata ehe lɛ akɛ Tihiko, ejeee nyɔŋ, bɔfo Paulo ji mɔ ni tsu amɛ koni amɛkɛ wolo ni eŋma kɛha “nyɛmimɛi heyelilɔi ni yɔɔ Kristo mli” ni yɔɔ Kolose lɛ, ayaha amɛ. Wɔbɛ odaseyeli ko ni tsɔɔ akɛ Paulo tee Kolose. Ekolɛ Epafra ni gbo Kolose asafo lɛ he deŋme ni no mli lɛ ekɛ Paulo yɛ Roma beni Paulo ŋmaa wolo nɛɛ ji mɔ ni to asafo ni yɔɔ Kolose ni jeŋmajiaŋbii titri yɔɔ mli lɛ.—Kol. 1:2, 7; 4:12.

³ Bɔfo Paulo ji mɔ ni ŋma wolo nɛɛ taakɛ etsi tã yɛ Kolosebii Awolo lɛ klɛŋklɛŋ kukuji enyɔ kɛ naagbee kuku lɛ mli lɛ. (1:1; 4:18) Wiemɔi ni ekɛmu wolo nɛɛ naa lɛ tsɔɔ akɛ beni eŋmaa wolo nɛɛ lɛ no mli lɛ awo lɛ tsuŋ. Eji be ni awo lɛ tsuŋ klɛŋklɛŋ yɛ Roma yɛ afi 59-61 Ŋ.B., be mli ni eŋmala woji koni ekɛwo asafoi lɛ ahewalɛ lɛ, ekɛ Kolosebii Awolo lɛ kɛ Filemon wolo lɛ maje yɛ be kome too lɛ nɔŋŋ mli. (Kol. 4:7-9; File. 10, 23) Etamɔ nɔ ni aŋma Kolosebii Awolo lɛ kɛ Efesobii Awolo lɛ yɛ be kome too lɛ nɔŋŋ mli ejaakɛ susumɔi ni yɔɔ mli lɛ kɛ bɔ ni aŋma amɛmli wiemɔi lɛ aha je amɛhe.

⁴ Nɔ ko bɛ ni abaanyɛ adamɔ nɔ akɛɛ akɛ jeee Paulo ni ŋma Kolosebii Awolo lɛ. Akɛni efata woji ni Paulo ŋmala ni yɔɔ Chester Beatty Papyrus No. 2 (P⁴⁶) ni aheɔ ayeɔ akɛ akɛtsu nii yɛ afi 100 Ŋ.B. afii lɛ mli lɛ he hewɔ lɛ, no tsɔɔ akɛ blema Kristofoi lɛ kpɛlɛ nɔ akɛ efata woji ni Paulo ŋmala lɛ ahe. Blema Biblia he nilelɔi ni kpɛlɛ Paulo woji krokomɛi lɛ anɔ lɛ hu kpɛlɛɔ nɔ akɛ eji Paulo woji lɛ ateŋ ekome.

⁵ Mɛni hewɔ Paulo ŋma Kolose asafo lɛ wolo lɛ? Yiŋtoo kome ji akɛ Onesimo miiku esɛɛ eya Kolose ekoŋŋ. Epafra ejɛ Kolose eba ni ekã shi faŋŋ akɛ amaniɛ ni ebabɔ yɛ Kolose asafo lɛ he lɛ hu fata nɔ hewɔ ni Paulo ŋma Kolose asafo lɛ wolo lɛ he. (Kol. 1:7, 8; 4:12) Oshara ko miihe abanina Kristofoi asafo ni yɔɔ jɛmɛ lɛ. Mɛi miikpoo jamɔi ni yɔɔ lɛ ni amɛkɛ blema jamɔi lɛ mli kusumii komɛi miifutu kusumii heei koni amɛkɛto jamɔi heei ashishi. Ekolɛ wɔŋjamɔ nifeemɔi tamɔ heloo mli akɔnɔi ni atsiɔ he kɛjɛɔ he, mumɔi atsɛmɔ, wɔŋjamɔ mli hemɔkɛyeli gbohii kɛ Yudafoi ahemɔkɛyeli ni haa amɛkpoɔ niyenii komɛi kɛ gbii komɛi ahe gbijurɔ ni amɛyeɔ lɛ ená mɛi komɛi ni yɔɔ asafo lɛ mli lɛ anɔ hewalɛ. Bɔ fɛɛ bɔ ni naagba lɛ ji lɛ, etamɔ nɔ ni yiŋtoo kpakpa ko hewɔ ni Epafra fã gbɛ kakadaŋŋ kɛtee Roma koni eyana Paulo lɛ. Shi Epafra amaniɛ ni ebɔ Paulo akɛ asafoŋbii lɛ jieɔ suɔmɔ kpo ni amɛfiɔ shi yɛ hemɔkɛyeli lɛ mli ni woɔ mɔ hewalɛ lɛ tsɔɔ akɛ su fɔŋ ko heko shi yɛ asafo lɛ mli be mli ni ebɔɔ Paulo amaniɛ lɛ. Amaniɛbɔɔ nɛɛ ha Paulo ŋma Kolose asafo lɛ ni ekɛ ekãa fã anɔkwa nilee kɛ jamɔ ni yɔɔ krɔŋŋ he. Ema nɔ mi akɛ Kristo ní Nyɔŋmɔ kpɛlɛɔ enɔ lɛ nɔ kwɔ fe wɔŋjalɔi anilee, jamɔ ni akɛhaa ŋwɛibɔfoi kɛ Yudafoi akusumii ni ebɔle amɛhe lɛ fɛɛ.

NƆ HEWƆ NI EHE YƆƆ SƐƐNAMƆ

¹² Ewaŋ kɛhaŋ wɔ akɛ wɔɔna akɛ be ni nyɛmimɛi hii enyɔ ni fã gbɛ kɛjɛ Roma lɛ shɛ shi nɔŋŋ lɛ etsɛɛɛ ni Kolose asafo lɛ mlibii lɛ nu he akɛ amɛba. Amɛkɛ miishɛɛ yabua amɛhe naa ekolɛ yɛ Filemon we lɛ koni amɛbo wolo ni Paulo ŋma amɛ lɛ mli kanemɔ lɛ toi. (File. 2) Anɔkwa saji ni kɔɔ gbɛnaa tuuŋtu ni Kristo yɔɔ kɛ bɔ ni ehe hiaa ni wɔná anɔkwa nilee lɛ ni yɔɔ wolo nɛɛ mli lɛ haa mɔ tsui nyɔɔ emli waa! Paulo ha efee faŋŋ yɛ wolo lɛ mli akɛ Kristo toiŋjɔlɛ lɛ kɛ ewiemɔ lɛ nɔ kwɔ fe adesai anilee kɛ Yudafoi akusumii lɛ kwraa! Saji ni baawaje mɛi fɛɛ ni yɔɔ asafo lɛ mli ni ji nɔkwɛlɔi, wumɛi, ŋamɛi, tsɛmɛi, bii, nuŋtsɔmɛi kɛ nyɔji ajwɛŋmɔ kɛ amɛtsuii yɛ wolo nɛɛ mli. Ekã shi faŋŋ akɛ ŋaawoo kpakpa yɛ mli kɛha Filemon kɛ Onesimo be mli ni amɛboteɔ nuŋtsɔ kɛ nyɔŋ wekukpãa mli ekoŋŋ lɛ. Ekɛ gbɛtsɔɔmɔ kpakpa ha nɔkwɛlɔi lɛ yɛ bɔ ni ajajeɔ asafoŋbii lɛ koni amɛhiɛ tsɔɔmɔ kpakpa mli! Paulo wiemɔi lɛ ha Kolose asafo lɛ mlibii lɛ ná miishɛɛ waa fe tsutsu lɛ akɛ amɛkɛ amɛtsui muu fɛɛ baasɔmɔ Yehowa! Ŋaawoo ni tswaa mɔ emaa shi ni akɛha Kolose asafo lɛ mlibii lɛ koni amɛtsi amɛhe kɛjɛ je lɛ susumɔi kɛ nifeemɔi ni haa amɛfeɔ nyɔji lɛ he lɛ he yɛ sɛɛnamɔ lolo kɛha Kristofoi asafo ni yɔɔ ŋmɛnɛ lɛ hu.—Kol. 1:9-11, 17, 18; 2:8; 3:15, 16, 18-25; 4:1.

¹³ Akɛ ŋaawoo kpakpa ha shiɛlɔi ni ji Kristofoi lɛ yɛ Kolosebii 4:6 lɛ akɛ: “Nyɛhaa nyɛwiemɔ he abaa nyam daa, ni ŋoo ahi mli, ni nyɛle bɔ ni sa akɛ nyɛhaa mɔ fɛɛ mɔ hetoo.” Mɛi ni yɔɔ tsui kpakpa lɛ nyaa anɔkwa wiemɔi ni yɔɔ nyam lɛ he ni ehe baa sɛɛnamɔ kɛhaa amɛ kɛyaa naanɔ. Agbɛnɛ hu kɛ́ Kristofoi ni shiɔ kpe lɛ jɛ amɛtsui kɛ hiɛsɔɔ mli amɛsɔle amɛha Yehowa lɛ, Yehowa nɛɔ jɔɔmɔi babaoo eshwieɔ amɛnɔ: “Nyɛkãa sɔlemɔ he, ni nyɛshia kpe yɛ mli kɛ shidaa.” Kristofoi ahenaabuamɔ haa mɔ naa miishɛɛ ni etswaa mɔ emaa shi waa diɛŋtsɛ! Paulo kɛɛ akɛ: ‘Nyɛtsɔɔa nyɛhe nii ni nyɛwiea nyɛtsɔɔa nyɛhe ni nyɛlaa yɛ nyɛtsuii amli nyɛhaa Yehowa Nyɔŋmɔ.’ (4:2; 3:16) Obaana gbɛtsɔɔmɔi kpakpai babaoo krokomɛi be mli ni opɛiɔ Kolosebii Awolo lɛ mli lɛ.

¹⁴ Aŋma yɛ wolo lɛ mli fã ni kɔɔ Mose Mla lɛ nɔyeli he lɛ akɛ: “Nii ni baaba lɛ ahe susuma kɛkɛ ni, shi gbɔmɔtso lɛ ji Kristo nɔ lɛ.” (2:17) Awie Kristo he anɔkwa sane nɛɛ he shii abɔ yɛ Kolosebii Awolo lɛ mli. Atsĩ hiɛnɔkamɔ ni yɔɔ nyam ni asaa ato yɛ ŋwɛi kɛha Kristo nanemɛi niyelɔi lɛ atã shii abɔ yɛ Kolosebii Awolo lɛ mli. (1:5, 27; 3:4) Esa akɛ mɛi nɛɛ ada Tsɛ lɛ shi waa akɛ ejie amɛ momo kɛjɛ duŋ hewalɛ lɛ mli, ni ekɛ amɛ eto “esuɔmɔ bi lɛ maŋtsɛyeli lɛ mli.” No hewɔ lɛ mɔ ni yeɔ amɛnɔ ji Mɔ ni ji ‘Nyɔŋmɔ ni anaaa lɛ subaŋ, bɔɔ nii fɛɛ ateŋ kromɔbi lɛ; ejaakɛ emli abɔ nii fiaa yɛ, nii ni yɔɔ ŋwɛi kɛ nii ni yɔɔ shikpɔŋ lɛ nɔ, nii ni anaa kɛ nii ni anaaa, maŋtsɛsɛii jio, nɔyelii jio, onukpayelii jio, hegbɛi jio.’ Lɛ ji mɔ ni sa fe fɛɛ akɛ eyeɔ nɔ yɛ jalɛ mli yɛ Nyɔŋmɔ Maŋtsɛyeli lɛ mli. No hewɔ ni Paulo kɛ gbɛtsɔɔmɔ nɛɛ ha Kristofoi ni afɔ amɛ mu lɛ akɛ: “No hewɔ lɛ, kɛ́ atee nyɛ kɛ Kristo fɛɛ shi lɛ, nyɛtaoa nii ni yɔɔ ŋwɛi, he ni Kristo yɔɔ ni eta Nyɔŋmɔ ninejurɔ nɔ yɛ lɛ.”—1:12-16; 3:1.

[Shishigbɛ niŋmaa]