Ekome ni Afee yɛ Suɔmɔ Kpaa ni Yeɔ Emuu Mli

“Nyɛfea ekome yɛ suɔmɔ mli.” — KOLOSEBII 2: 2, NW.

 1, 2. Mɛɛ hewalɛ ko ni gbalaa mɛi amli wɔnuɔ he, titri lɛ yɛ ŋmɛnɛ?

BO TOI! Gbee ko ni naa wa miijije yɛ ŋwɛi fɛɛ akɛ: “Kpoo ha mɛi ni yɔɔ shikpɔŋ lɛ nɔ kɛ ŋshɔ hiɛ lɛ! ejaakɛ Abonsam lɛ ekpeleke shi kɛba nyɛŋɔɔ, egri naakpa, ni ele akɛ be fioo kɛkɛ eyɔɔ.” (Kpojiemɔ 12:12) Nakai sane lɛ bafeɔ nɔ ni yɔɔ gbeyei waa kɛhaa shikpɔŋ lɛ nɔ bii lɛ beni afi fɛɛ afi hoɔ lɛ.

² Ajɛ jeeŋmɔ beebe ale Yehowa henyɛlɔ kpeteŋkpele lɛ akɛ shitee-kɛ-wolɔ (Satan) kɛ mɔ-heguɔgbelɔ (Abonsam). Shi nɛkɛ shishiulɔ nɛɛ ekɔ nitsumɔ kroko ni tsɔɔ efɔŋ efɔ ehe nɔ — ebatsɔ nyɔŋmɔ ni mli efu! Mɛni hewɔ? Ejaakɛ Mikael kɛ ebɔfoi lɛ shwie lɛ kɛjɛ ŋwɛi yɛ tawuu ni ba ŋwɛi lɛ mli, yɛ 1914. (Kpojiemɔ 12: 7-9) Abonsam le akɛ be fioo kɛkɛ eyɔɔ ni ekɛaabu enaataomɔ lɛ bem akɛ ebaanyɛ egbala gbɔmɛi fɛɛ kɛjɛ jamɔ ni amɛkɛaaha Nyɔŋmɔ lɛ he. (Hiob 1:11; 2: 4, 5) Akɛni ebɛ he ko ni eeetsɔ kɛjo foi hewɔ lɛ, lɛ kɛ edaimonioi lɛ tamɔ wobii ni mli efu ni fɛ̃ɔ amɛmlifu lɛ amɛshwieɔ adesai ni efee hamahama lɛ anɔ. — Yesaia 57: 20.

 3. Mɛni ejɛ Satan ni aba lɛ shi yɛ wɔbe nɛɛ mli lɛ mli eba?

³ Nibii ni ba, ni adesa hiŋmɛii enaaa nɛɛ, tsɔɔ nɔ hewɔ ni jeŋba shara egbɛ eshwa adesai ateŋ he fɛɛ he bianɛ lɛ. Etsɔɔ nɔ hewɔ ni gbɔmɛi amɔdɛŋbɔɔ kɛ hehiamɔ koni amɛkɛbua maji ni mli gbalaa amɛfeɔ kuikui lɛ anaa amɛtsara akɛni amɛnyɛɛɛ amɛhi shi yɛ ekomefeemɔ mli lɛ mli. Wekui kɛ wiemɔ kui kɛ yiwalɛ tutuaa amɛhe, ni nɔ ni jɛɔ mli baa ji gbɔmɛi akpekpei abɔ ni bɛ shia ni amɛyaje hei krokomɛi. Ebɛ naakpɛɛ akɛ mlakwamɔ miiya hiɛ yɛ gbɛ ni eko bako ni tamɔ nakai da lɛ nɔ! Taakɛ Yesu gba fɔ shi lɛ, ‘suɔmɔ ni adesai ateŋ mɛi ni fa lɛ yɔɔ lɛ he miijɔ.’ Gbeekpamɔ kɛ suɔmɔ ni bɛ ekadi adesai ni efee hamahama lɛ ŋmɛnɛ yɛ he fɛɛ he ni oookwɛ. — Mateo 24: 12.

 4. Mɛni hewɔ oshara krɛdɛɛ ko yɔɔ Nyɔŋmɔ webii ahe lɛ?

⁴ Yɛ jeŋ shihilɛ lɛ hewɔ lɛ, Yesu sɔlemɔ kɛha esɛɛnyiɛlɔi lɛ tsɔɔ nɔ ko pɔtɛɛ ni mli kwɔ: “Mibiii akɛ ojie amɛ kɛjɛ je lɛ mli, shi moŋ akɛ obu amɛhe yɛ mɔ fɔŋ lɛ hewɔ. Amɛjeee je lɛ fa, taakɛ bɔ ni mi hu mijeee je lɛ fa lɛ.” (Yohane 17: 15, 16, NW) Ŋmɛnɛ, “mɔ fɔŋ” lɛ fɛ̃ɔ emlila lɛ eshwieɔ mɛi ni “yeɔ Nyɔŋmɔ kitai lɛ anɔ ni hiɛ Yesu Kristo odase lɛ” mli lɛ anɔ titri. (Kpojiemɔ 12:17) Eji jeee Yehowa kwɛmɔ kɛ esuɔmɔ yibaamɔ kulɛ, abaakpata e-Dasefoi anɔkwafoi lɛ ahiɛ. Wɔwala damɔ gbɛjianɔ fɛɛ ni Nyɔŋmɔ toɔ kɛhaa wɔmumɔŋ shweshweeshwe feemɔ kɛ wɔhilɛ-kɛhamɔ lɛ ni wɔkɛaatsu nii ni ehe aba sɛɛnamɔ aha wɔ lɛ nɔ. Enɛ biɔ wɔ hiɛmiamɔ yɛ E-hewalɛ ni tsuɔ nii kɛtsɔɔ Kristo nɔ lɛ kɛ gbeekpamɔ naa, taakɛ bɔfo lɛ wo hewalɛ yɛ Kolosebii 1:29 lɛ.

 5, 6. Te bɔfo Paulo nu he yɛ Kolose Kristofoi lɛ ahe eha tɛŋŋ, ni mɛni hewɔ ŋmalɛ saneyitso kɛha afi 1995 lɛ sa jogbaŋŋ lɛ?

⁵ Eyɛ mli akɛ ekolɛ Paulo enako amɛ hiɛ-kɛ-hiɛ moŋ, shi esumɔɔ enyɛmimɛi ni yɔɔ Kolose lɛ. Ekɛɛ amɛ akɛ: “Mina ni kulɛ nyɛnuɔ bɔ ni mifee yeyeeye yɛ nyɛhewɔ lɛ shishi.” (Kolosebii 2: 1, The New Testament in Modern English, ni J. B. Phillips ŋma) Akɛni Yesu sɛɛnyiɛlɔi lɛ jeee je lɛ fa hewɔ lɛ, “mɔ fɔŋ” lɛ baaya nɔ abɔ mɔdɛŋ ni efite ekome ni nyɛmimɛi lɛ efee lɛ kɛtsɔ je lɛ mumɔ lɛ ni eeetɛo yɛ amɛteŋ lɛ nɔ. Saji ni Epafra kɛjɛ Kolose kɛba lɛ tsɔɔ akɛ enɛ etee nɔ kɛyashi he ko.

⁶ Abaanyɛ amu nibii ni Paulo susuɔ he titri yɛ enyɛmimɛi Kristofoi lɛ ahe lɛ ateŋ ekome naa yɛ wiemɔ ni yɔɔ tɛɛ nɛɛ mli: “Nyɛfea ekome yɛ suɔmɔ mli.” Shishinumɔ krɛdɛɛ ko yɛ ewiemɔi lɛ amli ŋmɛnɛ, yɛ jeŋ ni ekomefeemɔ kɛ suɔmɔ ni bɛ eyi mli obɔ tɔ nɛɛ mli. Kɛ wɔnyiɛ Paulo ŋaawoo lɛ sɛɛ yɛ anɔkwayeli mli lɛ, wɔbaana Yehowa kwɛmɔ mli ŋɔɔmɔ. Wɔbaayoo emumɔ lɛ hewalɛ lɛ nitsumɔ yɛ wɔshihilɛ mli hu, ebaaye ebua wɔ koni wɔdamɔ je lɛ nɔnyɛɛi lɛ anaa. Kwɛ nilee ni yɔɔ ŋaawoo ni tamɔ nɛkɛ mli! No hewɔ lɛ, Kolosebii 2:2 baafee wɔ ŋmalɛ saneyitso kɛha 1995.

 7. Mɛɛ ekomefeemɔ esa akɛ ana yɛ anɔkwa Kristofoi ateŋ?

⁷ Bɔfo lɛ kɛ adesa gbɔmɔtso lɛ tsu nii akɛ nɔkwɛmɔ nɔ, yɛ wolo ko ni etsɔ hiɛ eŋma eyaha Korintobii lɛ mli. Eŋma akɛ, “mligbalamɔ akaba” Kristofoi ni afɔ amɛ mu lɛ asafo lɛ mli, shi akɛ “henii lɛ abaabaa amɛhe yi pɛpɛɛpɛ.” (1 Korintobii 12: 12, 24, 25) Mɛɛ nɔkwɛmɔ nɔ ni yɔɔ naakpɛɛ nɛ! Wɔ henii lɛ tsaratsaraa amɛhe, eko fɛɛ eko tsa wɔgbɔmɔtso lɛ he. Nakai nɔŋŋ eji yɛ wɔ jeŋ muu fɛɛ nyɛmimɛi anaanyobɔɔ, ni feɔ mɛi ni afɔ amɛ mu lɛ kɛ akpekpei abɔ ni yɔɔ hiɛnɔkamɔ akɛ amɛbaahi shi yɛ shikpɔŋ nɔ paradeiso mli lɛ ahe. Esaaa akɛ wɔtseɔ wɔhe kɛjɛɔ nanemɛi Kristofoi agbɔmɔtso lɛ he kɔkɔɔkɔ ni wɔyahi shi akɛ aŋkroaŋkroi! Akɛni Nyɔŋmɔ mumɔ lɛ tsuɔ nii kɛtsɔɔ Kristo Yesu nɔ hewɔ lɛ, ehoɔ kɛtsɔɔ wɔnyɛmimɛi anaanyobɔɔ lɛ mli kɛbaa wɔnɔ babaoo.

Gbeekpamɔ kɛ Nilee yɛ Tsakpaa

 8, 9. (a) Mɛɛ shishitoo nii yeɔ ebuaa ekomefeemɔ ni wɔhaa ehiɔ asafo lɛ mli lɛ? (b) Ona Kristo he nilee yɛ mɛɛ gbɛ nɔ?

⁸ Otii titrii ni Paulo wie he lɛ ekome ji akɛ Kristofoi agbeekpamɔ kɛ nilee yɛ tsakpaa, titri lɛ nɔ ni kɔɔ Kristo he lɛ. Paulo ŋma akɛ esa akɛ Kristofoi “afee ekome yɛ suɔmɔ mli, kɛmɔ shishinamɔ ni ayɔɔ hewalɛ yɛ nɔ lɛ falɛ lɛ fɛɛ mli, ni amɛle Tsɛ Nyɔŋmɔ lɛ kɛ Kristo teemɔŋ sane lɛ.” (Kolosebii 2: 2) Wɔna nilee — anɔkwa saji — kɛjɛ be mli ni wɔje Nyɔŋmɔ Wiemɔ lɛ kasemɔ shishi lɛ. Akɛ bɔ ni anɔkwa saji nɛɛ pii baa Nyɔŋmɔ yiŋtoo mli lɛ he nilee ni wɔɔna lɛ fã ko lɛ, wɔnuɔ nitsumɔ titri ni Yesu tsuɔ lɛ shishi. “Mɔ mli ni aŋɔ ŋaa kɛ nilee jwetrii lɛ fɛɛ atee yɛ lɛ.” — Kolosebii 2: 3.

⁹ Ani nɛkɛ ji bɔ ni onuɔ he yɛ Yesu kɛ nɔ ni etsuɔ yɛ Nyɔŋmɔ yiŋtoo mli lɛ he? Mɛi ni yɔɔ Kristendom lɛ ateŋ mɛi pii kɛ oyaiyeli wieɔ Yesu he, amɛkɛɔ akɛ amɛhe lɛ amɛye ni ahere amɛyiwala. Shi ani amɛle lɛ lɛlɛŋ? Amɛleee lɛ, ejaakɛ amɛteŋ mɛi ni fa ji mɛi ni heɔ Triniti tsɔɔmɔ ni bɛ ŋmalɛ mli lɛ amɛyeɔ. Jeee akɛ ole anɔkwale ni kɔɔ enɛ he lɛ kɛkɛ, shi eeenyɛ eba akɛ oyɛ nɔ ni Yesu wie ni efee lɛ he nilee babaoo. Áye abua akpekpei abɔ yɛ enɛ gbɛfaŋ kɛtsɔ nikasemɔ ni haa mɔ leɔ nii ni atsɔ Gbɔmɔ ni Fe Mɔ Fɛɛ Mɔ ni Ehi Shi Pɛŋ wolo lɛ nɔ afee lɛ nɔ. Kɛlɛ, ehe miihia ni wɔha Yesu kɛ egbɛ̀i lɛ ahe nilee ni wɔyɔɔ lɛ mli akwɔ.

10. Nilee ni aŋɔtee lɛ yɛ kɛha wɔ yɛ mɛɛ gbɛ nɔ?

¹⁰ Wiemɔ akɛ “aŋɔ ŋaa kɛ nilee jwetrii lɛ fɛɛ atee” yɛ Yesu mli lɛ etsɔɔɔ akɛ wɔnyɛŋ wɔnu ŋaa kɛ nilee ni tamɔ nɛkɛ shishi. Shi moŋ, etamɔ bu ni naa kã ni atsaa sũ mli nii kɛjɛɔ mli. Ehe ehiaaa ni wɔkpa shi yɛ he ni da ni wɔtao ni wɔmiisusu he ni esa akɛ wɔje shitsaa shishi yɛ lɛ he. Wɔle momo — nilee diɛŋtsɛ jeɔ shishi kɛ nɔ ni Biblia lɛ jieɔ lɛ kpo yɛ Yesu Kristo he lɛ. Yɛ be mli ni wɔleɔ nɔ ni Yesu tsuɔ yɛ Yehowa yiŋtoo he nitsumɔ mli lɛ babaoo lɛ, wɔnine shɛɔ anɔkwa ŋaa kɛ anɔkwa nilee mli jwetrii lɛ anɔ. No hewɔ lɛ ehe miihia ni wɔya nɔ wɔtsa shi babaoo, ni wɔgbala ojarawa tɛi loo nibii ni jara wawai ni yɔɔ nɛkɛ jɛɛhei ni wɔtsa momo nɛɛ mli lɛ kɛba. — Abɛi 2: 1-5.

11. Te wɔɔfee tɛŋŋ wɔha wɔ nilee kɛ ŋaa aya hiɛ kɛtsɔ Yesu nɔjwɛŋmɔ nɔ? (Okɛ Yesu ni fɔ ekaselɔi lɛ anaji ahe lɛ afee nɔkwɛmɔ nɔ, aloo okɛ nɔkwɛmɔ nii krokomɛi atsu nii.)

¹¹ Akɛ nɔkwɛmɔ nɔ lɛ, ekolɛ wɔle akɛ Yesu fɔ ebɔfoi lɛ anaji ahe. (Yohane 13: 1-20) Shi, ani wɔjwɛŋ nii ni etaoɔ ni wɔkase kɛjɛ mli lɛ kɛ su ni ejie lɛ kpo lɛ he? Kɛ wɔfee nakai lɛ, wɔɔnyɛ wɔgbala ŋaa jwetri ni haa wɔnyɛɔ — hɛɛ, etsirɛɔ wɔ — ni wɔtsake bɔ ni wɔkɛ nyɛminuu loo nyɛmiyoo ni esu kɛ baŋ egba wɔnaa yɛ be kakadaŋŋ mli lɛ yeɔ haa lɛ mli. Aloo kɛ akɛ nitsumɔ ko ni jeee no wɔsumɔɔ tsɔ wo wɔdɛŋ lɛ, wɔbaanyɛ wɔtsu he nii yɛ gbɛ kroko nɔ kɛ wɔna wɔnu nɔ ni Yohane 13: 14, 15 lɛ tsɔɔ lɛ shishi jogbaŋŋ pɛ. Nakai ji bɔ ni nilee kɛ ŋaa naa wɔ nɔ hewalɛ ehaa. Te ebaasa mɛi krokomɛi ahe eha tɛŋŋ yɛ be mli ni wɔkaseɔ Kristo nɔkwɛmɔ nɔ lɛ babaoo yɛ nilee ni faa lɛ naa lɛ? Ekolɛ asafoku lɛ ‘baafee ekome yɛ suɔmɔ mli babaoo.’a

Nii ni Jieɔ JwɛŋmɔBaanyɛ Afite Ekomefeemɔ

12. Mɛɛ nilee ehe hiaa ni wɔkwɛ wɔhe nɔ jogbaŋŋ yɛ he lɛ?

¹² Kɛ anɔkwa nilee haa ‘ekome ni wɔɔfee yɛ suɔmɔ mli’ lɛ feɔ mlɛo lɛ, mɛni jɛɔ nii ni atsɛɔ lɛ “apasa nilee” lɛ mli baa? Nɔ ni tamɔɔɔ no — béi, mligbalamɔ, kɛ gbɛ ni adũɔ kɛjɛɔ hemɔkɛyeli lɛ he. No hewɔ lɛ esa akɛ wɔbu wɔhe kɛjɛ apasa nilee ni tamɔ nɛkɛ, ni Paulo bɔ Timoteo kɔkɔ yɛ he lɛ he. (1 Timoteo 6: 20, 21) Paulo ŋma hu akɛ: “Shi miikɛɛ enɛ, koni mɔ ko kɛ naadɔkɔmɔ wiemɔ ko akashishiu nyɛ. Nyɛkwɛa nyɛhe ni ahia, koni mɔ ko kɛ jeŋ nilee kɛ yaka shishiumɔ akaŋɔ-nyɛ nom, yɛ gbɔmɛi ablemasaji kɛ je nɛŋ shishijee nibii ni jeee Kristo lɛ anaa.” — Kolosebii 2: 4, 8.

13, 14. (a) Mɛni hewɔ oshara ba Kolose nyɛmimɛi lɛ ahe yɛ nilee hewɔ lɛ? (b) Mɛni hewɔ mɛi komɛi baanu he ŋmɛnɛ akɛ amɛbɛ oshara ni tamɔ nakai mli lɛ?

¹³ Nɔ ni ebɔle Kolose Kristofoi lɛ ahe kɛkpe ji hewalɛ fɔŋ diɛŋtsɛ ko ni tsuɔ nii nigii ni atsɛɔ lɛ apasa nilee lɛ. Mɛi pii ni yɔɔ Kolose kɛ he ni bɛŋkɛ jɛmɛ lɛ buɔ Hela jeŋ nilee waa. Yudafoi hu ni miisumɔ ni Kristofoi aye Mose Mla lɛ nɔ, tamɔ gbijurɔyelii kɛ taomɔ nii komɛi ni kɔɔ niyenii ahe lɛ hu yɛ jɛmɛ. (Kolosebi 2: 11, 16, 17) Paulo eteee shi ewooo anɔkwa nilee ni enyɛmimɛi lɛ aaana, shi ehe miihia ni amɛkwɛ jogbaŋŋ koni mɔ ko akadu amɛ kɛmiitsɔ ŋwanejeei ni akɛtsɔɔ mɛi ayiŋ lɛ nɔ, ni eeha amɛmiikwɛ shihilɛ kɛ nifeemɔi yɛ adesai asusumɔ naa kɛkɛ. Obaanyɛ onu shishi akɛ kɛ asafo lɛ mlibii lɛ ateŋ mɛi komɛi ha shihilɛ he subaŋi ni tamɔ nɛkɛ ni damɔɔɔ ŋmalɛ nɔ kudɔ amɛsusumɔ kɛ yiŋkpɛi lɛ, ebaafite ekomefeemɔ kɛ suɔmɔ ni yɔɔ asafo lɛ mlibii ateŋ lɛ.

¹⁴ Ekolɛ obaasusu akɛ, ‘Hɛɛ, miina oshara ni Kolosebii lɛ kɛkpe lɛ, shi oshara baŋ Hela susumɔi, tamɔ susuma ni gbooo kɛ triniti nyɔŋmɔ ko lɛ ni aaana minɔ hewalɛ lɛ he; ni asaŋ minaaa oshara ko ni yɔɔ apasa jamɔ ni mijo foi kɛjɛ mli lɛ awɔŋjamɔ mli gbijuji lɛ ni aaana minɔ hewalɛ lɛ hu mli.’ Ojogbaŋŋ. Ehi akɛ oookpɛ oyiŋ shiŋŋ yɛ bɔ ni anɔkwale ni mli ka shi faŋŋ ni ajie lɛ kpo kɛtsɔ Yesu nɔ ni yɔɔ Ŋmalɛi lɛ amli lɛ hi ni enɔ kwɔ kwraa lɛ he lɛ he. Shi, ani eeenyɛ eba akɛ oshara eba wɔhe yɛ jeŋ nileei loo adesa susumɔi komɛi ni egbɛ eshwa ŋmɛnɛ hewɔ lɛ he?

15, 16. Mɛɛ nikwɛmɔ yɛ shihilɛ he baanyɛ asa Kristofonyo lɛ susumɔ he?

¹⁵ Su nɛɛ ekome ehi shi yɛ be kakadaŋŋ mli: “Nɛgbɛ ebaa lɛ he shiwoo lɛ yɔɔ bianɛ? Wɔtsɛmɛi lɛ eyawɔwɔi, ni kɛlɛ nɔ fɛɛ nɔ miiya nɔ pɛpɛɛpɛ taakɛ eji be fɛɛ be lɛ.” (2 Petro 3: 4, The New English Bible) Ekolɛ abaajie nakai jwɛŋmɔ lɛ kpo yɛ wiemɔi krokomɛi amli, shi jwɛŋmɔ kome lɛ nɔŋŋ ni. Akɛ nɔkwɛmɔ nɔ lɛ, mɔ ko baasusu akɛ, ‘Beni mikase anɔkwale lɛ klɛŋklɛŋ afii nyɔŋmai abɔ ni eho nɛ lɛ, no mli lɛ naagbee lɛ “yɛ wɔsɛɛ be ni ka wɔhiɛ nɔŋŋ lɛ mli.” Shi ebako lolo, ni namɔ le beni ebaaba?’ Eji anɔkwale akɛ, mɔ ko mɔ ko leee be mli ni naagbee lɛ baaba. Shi kɛlɛ, kadimɔ jwɛŋmɔ ni Yesu wo wɔ hewalɛ ni wɔna: “Nyɛkwɛa jogbaŋŋ, nyɛshia kpe, . . . ejaakɛ nyɛleee beyinɔ ni be lɛ shɛɔ.” — Marko 13: 32, 33.

¹⁶ Kwɛ oshara ni eeeji, akɛ wɔɔna jwɛŋmɔ ni tamɔ nɛkɛ, akɛ, akɛni wɔleee be mli ni naagbee lɛ baa hewɔ lɛ, esa akɛ wɔhi shi jogbaŋŋ taakɛ “afeɔ daa” lɛ! Nakai su lɛ baanyɛ aje kpo yɛ susumɔ nɛɛ mli, ‘Ebaahi kɛha mi akɛ mato gbɛjianɔ ni baaŋmɛ mi (loo mibii lɛ) agbɛ ni wɔna nitsumɔ ni bulɛ yɔɔ mli ni nyɔmɔwoo kpakpa fata he ni baaha mana shihilɛ mli ŋɔɔmɔ. Shi, maya Kristofoi akpeei ni mikɛ mihe awo shiɛmɔ nitsumɔ lɛ mli, shi yiŋtoo ko bɛ ni madamɔ nɔ mamia mihiɛ loo ni mikɛ mihe asha afɔlei wuji.’ — Mateo 24: 38-42.

17, 18. Mɛɛ jwɛŋmɔ Yesu kɛ bɔfoi lɛ wo wɔ hewalɛ ni wɔna?

¹⁷ Shi anyɛŋ aje he ŋwane akɛ, Yesu kɛ ebɔfoi lɛ jie shihilɛ ni wɔɔhi kɛ hehiamɔ yɛ sanekpakpa lɛ shiɛmɔ mli lɛ yi, ni wɔwaje wɔhe ni wɔsumɔ akɛ wɔkɛ nibii aaashashaa afɔlei. Paulo ŋma akɛ: “Shi anyɛmimɛi, nɔ ni mikɛɔ ji akɛ, be lɛ faaa dɔŋŋ; nɔ ni eshwɛ ji akɛ, mɛi ni yɔɔ ŋamɛi tete afee tamɔ mɛi ni bɛ eko; . . . ni mɛi ni heɔ lɛ atamɔ mɛi ni jeee nɔtsɛmɛi; ni mɛi ni tsuɔ je nɛɛ he nii lɛ afee tamɔ mɛi ni tsuuu he nii; ejaakɛ je nɛŋ subaŋ lɛ hoɔ eyaa.” — 1 Korintobii 7: 29-31; Luka 13: 23, 24; Filipibii 3: 13-15; Kolosebii 1:29; 1 Timoteo 4:10; 2 Timoteo 2:4; Kpojiemɔ 22: 20.

¹⁸ Bɔni afee ni enɛ akafee akɛ wɔmiitsɔɔ akɛ wɔkɛ ogbɔjɔ shihilɛ afee oti ni ma wɔhiɛ lɛ, Paulo ŋma yɛ mumɔ lɛ tsirɛmɔ naa akɛ: “Wɔkɛ nɔ ko baaa je nɛŋ, no hewɔ lɛ, eyɛ faŋŋ akɛ, wɔnyɛŋ wɔkɛ nɔ ko aya hu. Shi kɛ wɔyɛ ŋmaa kɛ hehaa nii kɛkɛ lɛ, esa akɛ wɔmii ashɛ he. . . . Wuu hemɔkɛyeli he ta kpakpa lɛ, mɔ naanɔ wala lɛ mli, nɔ he hu ni atsɛo kɛba ni ojaje jajemɔ fɛfɛo yɛ odasefoi pii ahiɛ lɛ.” — 1 Timoteo 6: 7-12.

19. Kɛ asafo ko kpɛlɛ shihilɛ he jwɛŋmɔ ni Yesu wo hewalɛ yɛ he lɛ nɔ lɛ, te esaa mɛi ni yɔɔ mli lɛ ahe ehaa tɛŋŋ?

¹⁹ Kɛ Kristofoi ni yɔɔ ekãa ni bɔɔ mɔdɛŋ waa ni ‘amɛjaje jajemɔ fɛfɛo yɛ mɛi pii ahiɛ’ yɔɔ asafo ko mli lɛ, nɔ ni jɛɔ mli baa ji ekomefeemɔ. Amɛkɛ amɛhe haaa subaŋ ni ji, ‘Obua nibii kpakpai pii anaa oto kɛha afii pii; gbɔjɔmɔ ohe, ye nii, nuu nii, ni oha omii ashɛ ohe.’ (Luka 12:19) Shi moŋ, amɛfee ekome yɛ mɔdɛŋbɔɔ kome too lɛ nɔŋŋ mli, amɛmiisumɔ ni amɛkɛ nibii asha afɔle koni amɛna nitsumɔ ni atsuŋ eko dɔŋŋ nɛɛ mli gbɛfaŋnɔ babaoo bɔ ni amɛaanyɛ. — Okɛto Filipibii 1: 27, 28 he.

Wɔkwɛ Jogbaŋŋ yɛNaataomɔi ni Kɔneɔ Yiŋ lɛ Ahe

20. Mɛni ji he kroko hu ni abaanyɛ alaka Kristofoi yɛ?

²⁰ Shi, gbɛi krokomɛi hu yɛ ni abaanyɛ atsɔ nɔ ni ‘akɛ naataomɔi ni kɔneɔ mɔ yiŋ’ alaka Kristofoi ajwɛŋmɔ, aloo yaka shishinumɔi ni fiteɔ ‘ekome ni aaafee yɛ suɔmɔ mli’ lɛ. Buu Mɔɔ Asafo lɛ nitsumɔ he nine ni yɔɔ Germany lɛ ŋma afi nɛɛ akɛ: “Sane kome ko kɛ naataomɔi babaoo ba asafoi pii amli, ni shiɛlɔi kɛ onukpai po yafi afa kome sɛɛ kɛshi afa kroko ni ŋwanejee eba amɛteŋ lɛ, yɛ helatsamɔ gbɛ ko ni nyɛminuu ko kɛtsuɔ nii lɛ hewɔ.” Amɛkɛfata he akɛ: “Yɛ gbɛi sɔrɔtoi pii ni atsɔɔ nɔ afeɔ enɛ kɛ helatsɛmɛi lɛ ayifalɛ hewɔ lɛ, enɛ ebatsɔ nɔ ni ajeɔ he ŋwane, ni kɛji akɛ mumɔi anifeemɔi komɛi yɛ helatsamɔ gbɛ̀i nɛɛ asɛɛ lɛ, ebaanyɛ ekɛ oshara aba hu.” — Efesobii 6: 12.

21. Bɔ ni Kristofonyo kwɛɔ nii yɛ gbɛ ni ja nɔ ŋmɛnɛ lɛ baanyɛ aje edɛŋ yɛ mɛɛ gbɛ nɔ?

²¹ Kristofoi miisumɔ ni amɛhi wala mli ni amɛna gbɔmɔtsoŋ hewalɛ kpakpa koni amɛnyɛ amɛja Nyɔŋmɔ. Shi kɛlɛ, wɔyɛ gbɔlɛ kɛ hela ni jɛ emuu ni ayeee shishi yɛ gbɛjianɔtoo nɛɛ mli. Ni wɔɔma hewalɛnamɔ he saji anɔ mi moŋ lɛ, esa akɛ wɔjwɛŋ tsabaa diɛŋtsɛ kɛha wɔ kɛ mɛi krokomɛi lɛ anɔ. (1 Timoteo 4:16) Kristo ji mɔ ni agbalaa jwɛŋmɔ kɛyaa enɔ yɛ nakai tsabaa lɛ he, taakɛ eji mɔ titri yɛ Paulo ŋaawoo ni ekɛha Kolosebii lɛ mli lɛ. Shi kaimɔ akɛ, Paulo tsɔɔ akɛ, mɛi komɛi kɛ “naadɔkɔmɔ wiemɔi” baaba ni amɛbaagbala wɔjwɛŋmɔ kɛjɛ Kristo nɔ, ekolɛ kɛya gbɛ ni atsɔɔ nɔ anaa helai komɛi kɛ amɛhe tsabaai, loo niyenii sɔrɔtoi komɛi anɔ. — Kolosebii 2: 2-4.

22. Mɛɛ su ni ŋmɛɔ pɛpɛɛpɛ esa akɛ wɔna yɛ gbɛi babaoo ni akɛɛ atsɔɔ nɔ anaà helai kɛ amɛtsamɔ lɛ ahe?

²² Aaloo adafitswai kɛ odaseyelii babaoo ni kɔɔ hela-tsamɔi kɛ gbɛ ni atsɔɔ nɔ anaà helai lɛ ahe aashwie gbɔmɛi ni yɔɔ je lɛŋ fɛɛ lɛ anɔ. Ekomɛi yɛ ni akɛmiitsu nii babaoo momo ni ale nomɛi; ekrokomɛi yɛ ni awieɔ ashiɔ babaoo loo yiŋ etɛɛɛ mɔ yɛ he.b Nɔ ni mɔ ko aaafee yɛ ehewalɛnamɔ he lɛ he gbɛnaa nii ka mɔ aŋkro lɛ diɛŋtsɛ nɔ. Shi abaabu mɛi ni kpɛlɛɔ Paulo ŋaawoo ni anaa yɛ Kolosebii 2: 4, 8 lɛ nɔ lɛ ahe kɛjɛ “naadɔkɔmɔ wiemɔi” loo “yaka shishiumɔ” ni lakaa mɛi pii ni akɛni amɛbɛ Maŋtsɛyeli hiɛnɔkamɔ lɛ hewɔ lɛ, amɛfee yeyeeye kɛmiitao tsabaa lɛ ahe. Kɛji akɛ Kristofonyo ko heɔ yeɔ po akɛ etamɔ nɔ ni tsofa ni afeɔ lɛ lɛ hi kɛha lɛ lɛ, esaaa akɛ egbɛɔ enɛ eshwãa Kristofoi anyɛmifeemɔ lɛ teŋ, ejaakɛ ebaatsɔ nɔ ni awieɔ he ni ajeɔ he ŋwane babaoo. Enɛ baaha ejie lɛ kpo akɛ ebuɔ bɔ ni ekomefeemɔ ni aaahi asafo lɛ mli lɛ he hiaa ha lɛ waa.

23. Mɛni hewɔ wɔyɔɔ nɔ krɛdɛɛ ni wɔɔdamɔ wɔna miishɛɛ lɛ?

²³ Bɔfo Paulo ma nɔ mi akɛ ekomefeemɔ ni esa akɛ ehi Kristofoi ateŋ lɛ ji miishɛɛ diɛŋtsɛ nɔdaamɔ nɔ. Eka shi faŋŋ akɛ asafoi ni yɔɔ egbii lɛ amli lɛ faaa tamɔ bɔ ni eji ŋmɛnɛ lɛ. Ni kɛlɛ enyɛ eŋma Kolosebii lɛ akɛ: “Ejaakɛ kɛ mikɛ nyɛ bɛ yɛ heloo gbɛfaŋ jiŋŋ, mumɔ gbɛfaŋ lɛ, mikɛ nyɛ yɛ, ni mimii shɛɔ, ni minaa nyɛ gbɛjianɔtoo lɛ kɛ nyɛhé ni nyɛheɔ Kristo nɔ nyɛyeɔ lɛ shifimɔ lɛ.” (Kolosebii 2: 5) Kwɛ bɔ ni nɔ ni wɔdamɔɔ nɔ wɔnaa miishɛɛ lɛ da ha! Wɔnyɛɔ wɔnaa ekomefeemɔ, gbɛjianɔtoo kpakpa, kɛ shiŋŋfeemɔ yɛ hemɔkɛyeli mli lɛ he odaseyeli diɛŋtsɛ yɛ wɔ asafo lɛ mli, ni enɛ jieɔ bɔ ni Nyɔŋmɔ webii ashihilɛ ji yɛ shikpɔŋ lɛ nɔ he fɛɛ he lɛ kpo. No hewɔ lɛ, nyɛhaa wɔteŋ mɔ fɛɛ mɔ atswaa efai shi akɛ “[wɔɔfee] ekome yɛ suɔmɔ mli” yɛ be kuku ni eshwɛ kɛha ŋmɛnɛŋmɛnɛ gbɛjianɔtoo nɛɛ lɛ mli.

[Shishigbɛ niŋmai]

Ani Okadi?

◻ Mɛni ji 1995 afi ŋmalɛ kɛha Yehowa Odasefoi?

◻ Mɛni hewɔ ehe hiaa ni Kolose Kristofoi lɛ afee ekome yɛ suɔmɔ mli lɛ, ni mɛni hewɔ esa akɛ wɔfee nakai ŋmɛnɛ?

◻ Mɛɛ nikwɛmɔ yɛ shihilɛ he ni baa nigii esa akɛ Kristofoi titri akwɛ amɛhe nɔ jogbaŋŋ yɛ he ŋmɛnɛ?

◻ Mɛni hewɔ esa akɛ Kristofoi ahiɛ ahi amɛhe nɔ koni akɛ naadɔkɔmɔ wiemɔi ni kɔɔ hewalɛnamɔ he kɛtsɔ hela taomɔ nɔ lɛ akashishiu amɛ lɛ?

[Mfoniri ni yɔɔ baafa 17]

Ani ogbɛjianɔtoo kɛha wɔsɛɛ be damɔ ba ni Kristo eba lɛ nɔ?