• Halamɔ Onanemɛi Yɛ Hiɛshikamɔ Mli
    Oyi Aná Wala Kɛya Naanɔ!—Biblia Kasemɔ Ni Baafee Sanegbaa

    • 1. Mɛɛ gbɛ nɔ mɛi ni ohalaa akɛ onanemɛi lɛ baanyɛ atsake bo?

      Kɛ́ okɛ mɔ ko bɔ aahu lɛ, ofeɔ onii tamɔ lɛ. Ni enɛ baanyɛ afee sane kpakpa loo sane fɔŋ​—kɛji wɔkɛ mɔ lɛ bɔɔ hiɛ kɛ hiɛ jio, wɔkɛ lɛ bɔɔ yɛ Intanɛt lɛ nɔ jio. Biblia lɛ kɛɔ akɛ: “Mɔ ni kɛ hiɛshikalɔi nyiɛɔ lɛ, ebaatsɔ hiɛshikalɔ, shi mɔ ni kɛ kwashiai [loo mɛi ni sumɔɔɔ Yehowa] bɔɔ lɛ, egbeŋ naa ekpakpa.” (Abɛi 13:​20) Kɛ́ onanemɛi lɛ sumɔɔ Yehowa ni amɛjáa lɛ lɛ, amɛbaanyɛ amɛwa bo ni ohi emasɛi ni okpɛ yiŋ kpakpai hu. Shi kɛ́ wɔkɛ mɛi ni sumɔɔɔ Yehowa bɔɔ naanyo lɛ, amɛbaanyɛ amɛhã wɔshi lɛ. Enɛ hewɔ Biblia lɛ woɔ wɔ hewalɛ ni wɔhala wɔnanemɛi yɛ hiɛshikamɔ mli lɛ! Kɛ́ wɔkɛ mɛi ni sumɔɔ Nyɔŋmɔ bɔ naanyo lɛ amɛbaaná wɔnɔ hewalɛ kpakpa, ni wɔ hu wɔbaaná amɛnɔ hewalɛ kpakpa. No baahã wɔnyɛ ‘wɔwowoo wɔhe hewalɛ, ni wɔtswatswaa wɔhe wɔma shi.’​—1 Tesalonikabii 5:11.

  • Te Ooofee Tɛŋŋ Okɛ Mɛi Awie Bɔ Ni Yehowa Baaná He Miishɛɛ?
    Oyi Aná Wala Kɛya Naanɔ!—Biblia Kasemɔ Ni Baafee Sanegbaa

    • Be ni Yehowa bɔ wɔ lɛ, edro wɔ nikeenii ko ni nɔ bɛ, no ji wiemɔ. Ani egbaa ehe naa yɛ bɔ ni wɔkɛ nikeenii nɛɛ tsuɔ nii wɔhãa lɛ he? Hɛɛ! (Kanemɔ Yakobo 1:​26.) Hewɔ lɛ, te wɔɔfee tɛŋŋ wɔkɛ mɛi awie bɔ ni Yehowa baaná he miishɛɛ?

      1. Te esa akɛ wɔwie wɔhã tɛŋŋ?

      Biblia lɛ kɛɔ wɔ akɛ: “Nyɛyaa nɔ nyɛwowoa nyɛhe hewalɛ, ni nyɛtswaa nyɛhe nyɛmaa shi.” (1 Tesalonikabii 5:​11) Ani ole mɛi komɛi ni ehe miihia ni awo amɛ hewalɛ? Mɛni obaanyɛ ofee kɛwaje amɛ? Hã amɛle akɛ amɛsane kã otsui nɔ. Obaanyɛ okɛɛ amɛ nibii ni osumɔɔ yɛ amɛhe. Ani ole ŋmalɛ ko ni baanyɛ awo mɔ ko hewalɛ? Ŋmalɛi babaoo yɛ ni obaanyɛ okɛwo mɛi hewalɛ. Kaimɔ akɛ, bɔ ni obaawie nɔ ko ohã lɛ hu baanyɛ awo mɛi hewalɛ waa. Hewɔ lɛ, bɔɔ mɔdɛŋ ni be fɛɛ be lɛ okɛ mɛi awie yɛ naajɔlɛ mli.​—Abɛi 15:1.

      2. Mɛɛ wiemɔ esaaa akɛ wɔwieɔ?

      Biblia lɛ kɛɔ akɛ: “Wiemɔ ni ehiii ko akaje nyɛnaa.” (Kanemɔ Efesobii 4:​29.) Enɛ tsɔɔ akɛ, esaaa akɛ wɔwieɔ wiemɔ sha, yakayaka wiemɔ, loo wiemɔ ni kɛ́ mɔ ni ekɔɔ ehe lɛ nu lɛ, ebaadɔ lɛ. Agbɛnɛ hu, esaaa akɛ wɔyeɔ mɛi ahe osheku, ni esaaa akɛ wɔfiteɔ mɛi wɔhãa mɛi.​—Kanemɔ Abɛi 16:28.

      3. Mɛni baawa wɔ ni wɔwie wiemɔi ni woɔ mɔ hewalɛ?

      Bei pii lɛ, nibii ni wɔwieɔ he lɛ hãa anaa bɔ ni wɔnuɔ he wɔhãa, loo nɔ ni wɔsusuɔ he. (Luka 6:​45) Enɛ hewɔ lɛ, esa akɛ wɔtsɔse wɔhe koni wɔsusu nibii kpakpai ahe​—nibii ni ja, nibii ni he tse, nibii ni hãa ajieɔ suɔmɔ kpo, kɛ nibii ni sa yijiemɔ. (Filipibii 4:8) Kɛ́ wɔkwɛ jogbaŋŋ yɛ nibii ni wɔkɛjieɔ wɔhiɛtserɛ, kɛ mɛi ni wɔkɛbɔɔ naanyo lɛ he lɛ, no baawa wɔ ni wɔsusu nibii kpakpai ahe. (Abɛi 13:​20) Agbɛnɛ hu, ebaahi waa akɛ wɔbaajwɛŋ dani wɔwie. Bi ohe akɛ, ‘Kɛ́ mɛi nu miwiemɔi lɛ, te amɛbaanu he amɛhã tɛŋŋ?’ Biblia lɛ kɛɔ akɛ: “Wiemɔ ni awieɔ ni asusuuu he lɛ, etamɔ nɔ ni aabamɔ klante, shi hiɛshikalɔi alilɛi tsaa mɔ.”​—​Abɛi 12:​18.

      KASEMƆ PII OFATA HE

      Obaana bɔ ni ooofee okɛ mɛi awie bɔ ni Yehowa baaná he miishɛɛ, ni agbɛnɛ hu, ewo mɛi hewalɛ.

      4. Kudɔmɔ owiemɔ

      Wɔ fɛɛ lɛ, bei komɛi lɛ wɔwieɔ nibii komɛi, kɛkɛ lɛ sɛɛ mli lɛ wɔshwa wɔhe. (Yakobo 3:2) Nyɛkanea Galatiabii 5:​22, 23 lɛ, ni nyɛsusua sanebimɔi nɛɛ ahe:

      • Te sui nɛɛ ateŋ nɔ ni obaasumɔ ni osɔle obi Yehowa ni ehã oná, koni onyɛ okudɔ owiemɔ? Mɛɛ gbɛ nɔ sui nɛɛ baanyɛ awa bo?

      Nyɛkanea 1 Korintobii 15:​33 lɛ, ni nyɛsusua sanebimɔ nɛɛ he:

      • Mɛɛ gbɛ nɔ mɛi ni okɛbɔɔ kɛ nibii ni okɛjieɔ ohiɛtserɛ lɛ baanyɛ aná bɔ ni owieɔ ohãa lɛ nɔ hewalɛ?

      Mfonirii ni ato naa: Nibii komɛi ni eha nuu ko kɛ eŋa miiwie bɔ ni esaaa. 1. Eebo lalai ni woɔ mɛi hewalɛ ni amɛfee yiwalɛ nii toi. 2. Aanɔ atswɛrɛ yɛ TV nɔ, ni ekɛ enaanyo ko miikwɛ kɛ miishɛɛ. Mfonirii ni ato naa: Nibii komɛi ni eha nakai nuu lɛ nɔŋŋ kɛ eŋa miiwie yɛ naajɔlɛ mli. 1. Eekane Biblia lɛ. 2. Ekɛ eŋa kɛ amɛnaanyo ko miigba sane yɛ Maŋtsɛyeli Asa lɛ nɔ.

      Mɛni baanyɛ aná bɔ ni wɔwieɔ wɔhãa lɛ nɔ hewalɛ?

      Nyɛkanea Jajelɔ 3:​1, 7 lɛ, ni nyɛsusua sanebimɔ nɛɛ he:

      • Mɛɛ be ebaahi jogbaŋŋ akɛ wɔbaafee diŋŋ loo wɔbaamɛ kɛyashi be ni sa dani wɔwie nɔ ko?

      5. Wiemɔ mɛi ahe ekpakpa

      Mɛni baawa wɔ ni wɔkajɛ mɛi loo wɔkawie wiemɔi ni esaaa yɛ mɛi ahe? Jiemɔ VIDIO lɛ, ni nyɛsusua sanebimɔi ni nyiɛ sɛɛ nɛɛ ahe.

      VIDIO: Wiemɔ ‘Nibii Ni Hi Ni Tswaa Mɔ Emaa Shi’ (4:07)

      • Mɛni hewɔ nyɛmi nuu lɛ bɔ mɔdɛŋ akɛ ebaatsake nibii ni ewieɔ yɛ mɛi ahe lɛ?

      • Mɛɛ tsakemɔi efee?

      Nyɛkanea Jajelɔ 7:​16 lɛ, ni nyɛsusua sanebimɔ nɛɛ he:

      • Kɛ́ wɔyaawie nɔ ko gbonyo yɛ mɔ ko he lɛ, mɛni esa akɛ wɔkai?

      Nyɛkanea Jajelɔ 7:​21, 22 lɛ, ni nyɛsusua sanebimɔ nɛɛ he:

      • Kɛ́ mɔ ko wie nɔ ko ni ehiii yɛ ohe lɛ, mɛɛ gbɛ nɔ ŋmalɛi nɛɛ baanyɛ awa bo ni omli akafu?

      6. Okɛ oweku lɛ mli bii lɛ awie yɛ naajɔlɛ mli

      Yehowa miisumɔ ni wɔkɛ wɔweku lɛ mli bii lɛ awie yɛ naajɔlɛ kɛ suɔmɔ mli. Jiemɔ VIDIO lɛ, ni nyɛsusua sanebimɔ ni nyiɛ sɛɛ nɛɛ he.

      VIDIO: Kɛ́ Ajie Suɔmɔ Kɛ Bulɛ Kpo Yɛ Weku Lɛ Mli Lɛ, Efeɔ Weku Lɛ Ekome (3:08)

      • Mɛni baawa bo ni okɛ oweku lɛ mli bii lɛ awie yɛ naajɔlɛ mli?

      Nyɛkanea Efesobii 4:​31, 32 lɛ, ni nyɛsusua sanebimɔ nɛɛ he:

      • Mɛɛ wiemɔi nɛkɛ kɛ́ wɔkɛ wɔweku lɛ mli bii lɛ wie lɛ ebaawo amɛ hewalɛ?

      Yehowa hã ana akɛ esumɔɔ e-Bi Yesu, ni eyɛ ehe miishɛɛ. Nyɛkanea Mateo 17:5 lɛ, ni nyɛsusua sanebimɔ nɛɛ he:

      • Mɛɛ gbɛ nɔ obaanyɛ okase Yehowa yɛ nibii nɛɛ amli: gbɛ ni otsɔɔ nɔ okɛ oweku lɛ mli bii lɛ wieɔ, kɛ nibii ni okɛ amɛ wieɔ lɛ?

      Yoo ko biyoo fioo etɛŋ nii, ni eejie eyi.

      Taomɔ hegbɛi ni baahã ojie mɛi ayi

      MƐI KOMƐI KƐƆ AKƐ: “Mi lɛ, mikɛɔ mɛi mijwɛŋmɔ. Mɛi lɛ sumɔɔ jio, amɛsumɔɔɔ jio, jeee mihe sane.”

      • Kɛ́ mɔ ko kɛɛ nakai lɛ, ani esane ja? Kɛ́ okɛɛ ‘Hɛɛ’ lɛ, mɛni hewɔ, ni kɛ́ okɛɛ ‘Dabi’ hu lɛ, mɛni hewɔ?

      EMLI OTI

      Wiemɔ yɔɔ nɛɛ, ebaanyɛ ewo mɔ hewalɛ loo eye mɔ awui. Esa akɛ wɔsusu nɔ ni wɔwieɔ, be ni wɔwieɔ, kɛ bɔ ni wɔwieɔ lɛ wɔhãa lɛ he jogbaŋŋ.

      Mɛni Okase?

      • Mɛɛ gbɛi komɛi anɔ obaanyɛ otsɔ owiemɔ nɔ oye obua mɛi?

      • Mɛɛ wiemɔ esaaa akɛ owieɔ?

      • Mɛni baawa wɔ ni wɔwie yɛ naajɔlɛ mli, ni wɔwiemɔ awo mɔ hewalɛ hu be fɛɛ be?

      Nɔ Ni Obaanyɛ Ofee

      EHE SAJI KROKOMƐI

      Mɛni baawa wɔ ni wɔwie wiemɔi ni woɔ mɔ hewalɛ?

      Ná Nilelɔi Alilɛi (8:04)

      Obaana nɔ ni baawa bo ni okawie wiemɔ sha.

      “Ani Mɔjɛmɔ Ehiii Kwraa?” (jw.org lɛ nɔ sane)

      Obaana nɔ ni baawa bo ni okaye mɛi ahe osheku.

      Te Mafee Tɛŋŋ Makpa Mɛi Ahe Wiemɔ? (2:36)

      Obaana bɔ ni Yehowa ye ebua nuu ko ni ekpa mɔjɛmɔ.

      “Mibabɔi Bɔ ni Mishihilɛ Naa Baayakpa Aha lɛ he Susumɔ Waa” (Buu-Mɔɔ, August 1, 2013)