Kɛ Otsɔɔ Nii Lɛ, Shɛ Tsui Lɛ Mli
1, 2. (a) Mɛni ebiɔ dani atswa Yehowa kɛ etaomɔ nii ahe hiɛsɔɔ ni mli kwɔ awo mɛi krokomɛi amli? (b) Mɛni hewɔ babaoo he hiaa fe yitsoŋ nilee kɛkɛ lɛ?
1 YƐ BE MLI ni obaanyɛ okɛ oyaiyeli atswa asese ko oma shi lɛ, eka shi faŋŋ akɛ onyɛŋ okɛ jenamɔ ama maŋtsɛwe. Nakai nɔŋŋ eji anɔkwale yɛ kaselɔi afeemɔ mli. Akɛ aaatswa hiɛsɔɔ ni mli kwɔ kɛha Yehowa kɛ etaomɔ nii lɛ awo mɛi krokomɛi amli lɛ jeee sane bibioo. Ehoɔ be babaoo kɛ hesaa koni akɛma “maŋtsɛmɛiawei” ni tamɔ nɛkɛ.
2 Bɔni afee ni anyɛ afee enɛ lɛ, babaoo he miihia fe nilee kɛkɛ ni akɛaaha. Abɛi 3:1 kɛɔ akɛ: “Mibi, ohiɛ akakpa mimla lɛ nɔ, shi ha otsui ato mikitai lɛ.” Esa akɛ atsɔɔ mɛi ni wɔkɛ amɛ kaseɔ nii lɛ nɔ ni Biblia lɛ kɛɔ. Shi nɔ ni fe nakai lɛ, esa akɛ anyɛmɔ anɔkwale lɛ nɔ awo amɛtsuii amli. Hɛɛ, tsui lɛ mli esa akɛ wɔbote kɛji akɛ wɔɔnyɛ wɔtswa nibii ni la nyɛŋ ashã wɔwo mɛi ni wɔtsɔɔ amɛ nii lɛ amli, ni wɔye wɔbua amɛ ni amɛná amɛ kɛ Yehowa Nyɔŋmɔ teŋ wekukpaa ni mli wa.
3. (a) Mɛni hewɔ “nitsɔɔmɔ ŋaa” feɔ pii yɛ tsui ni wɔshɛɔ mli lɛ he lɛ? (b) Yɛ be mli ni wɔsusuɔ ŋaawooi komɛi ni abaanyɛ atsu he nii lɛ ahe lɛ, namɛi esa akɛ wɔha amɛhi wɔjwɛŋmɔ mli lɛ?
3 Eka shi faŋŋ akɛ enɛ feemɔ wa fe ekɛɛmɔ. Bɔni afee ni wɔshɛ tsui lɛ mli lɛ, jeee tsutswaa nibii ni hi loo eja pɛ esa akɛ wɔna. Esa akɛ wɔkɛ “nitsɔɔmɔ he ŋaa” hu atsu nii. (2 Timoteo 4:2, NW) Efaaa akɛ wɔɔkɛɛ mɛi ni wɔkɛ amɛ kaseɔ nii lɛ nɔ ni ji anɔkwale lɛ. Shi moŋ, “nitsɔɔmɔ he ŋaa” lɛ biɔ ni aye abua amɛ ni amɛjwɛŋ ni amɛsusu nɔ ni amɛkaseɔ lɛ he. Jeee akɛ wɔhe ni esa aloo gbɛ̀i ni wɔtsɔɔ nɔ lɛ kɛ mumɔŋ dalɛ baaba; Nyɔŋmɔ jɔɔmɔ ji nɔ ni he hiaa. (1 Korintobii 3:5, 6) Shi kɛlɛ, ŋaawoo fioo ko yɛ ni baanyɛ aye abua wɔ ni wɔshɛ mɛi krokomɛi atsui mli. Yɛ be mli ni wɔsusuɔ saji otii nɛɛ ahe lɛ, ha mɛi ni wɔtsɔɔ amɛ nii lɛ ahi ojwɛŋmɔ mli—mɛi ni okɛ amɛ kaseɔ Biblia lɛ kɛ obii.
Feemɔ Nɔkwɛmɔ Nɔ Kpakpa
4. (a) Mɛni ji nɔ kome ni ha Yesu bafee mɔ ni he esa yɛ mɛi atsui mli ni eshɛɔ lɛ hewɔ? (b) Mɛni hewɔ ehe hiaa akɛ aaato okadi kpakpa afɔ shi yɛ be mli ni atsɔɔ mɛi krokomɛi anii lɛ?
4 Mɛɛ nɔkwɛmɔ nɔ kpakpa wɔyɔɔ yɛ gbɛ ni atsɔɔ nɔ ashɛɔ mɛi krokomɛi atsui mli fe Yesu Kristo diɛŋtsɛ? Mɛni hewɔ ehe esa yɛ mɛi ni enine shɛɔ amɛnɔ lɛ mli nakai lɛ? Nɔ kome ji akɛ, Yesu tsu nɔ ni eshiɛ lɛ he nii, ni ekɛ nɔkwɛmɔ nɔ ni nɔ bɛ fɔ shi ha esɛɛnyiɛlɔi lɛ ni amɛkase (Yohane 13:15; 1 Petro 2: 21) No hewɔ lɛ klɛŋklɛŋ ŋaawoo lɛ nɛ: feemɔ nɔkwɛmɔ nɔ kpakpa. Ani ejeee nɔ ni shishinumɔ yɔɔ mli akɛ wɔ diɛŋtsɛ lɛ wɔɔna Kristofoi asui ni tsɛɔ ni wɔsumɔɔ ni wɔtswa wɔwo mɛi krokomɛi amli lɛ nɔŋŋ eko? Taakɛ Yesu wie sane lɛ: “Nikaselɔ fɛɛ nikaselɔ ni atsɔse lɛ jogbaŋŋ lɛ baatamɔ etsɔɔlɔ lɛ.”—Luka 6: 40, The New Berkeley Version
5. Yɛ mɛɛ gbɛ nɔ Ŋmalɛ lɛ feɔ tsakpaa ni ka okadi kpakpa ni atoɔ kɛ mɛi krokomɛi atsui mli ni ashɛɔ lɛ he nɔkwɛmɔ nɔ?
5 Biblia lɛ tsɔɔ tsakpaa ni ka nɔkwɛmɔ nɔ kpakpa ni akɛaafɔ shi kɛ mɛi krokomɛi atsui mli ni aaashɛ lɛ teŋ lɛ shii abɔ. Ákɛ nɔkwɛmɔ nɔ lɛ, 5 Mose 6:4-6 tsɔɔ akɛ esa akɛ suɔmɔ kɛha Yehowa “akã [fɔlɔ lɛ] otsui nɔ” dani onyɛ okɛwo obii atsui mli. (Abɛi 20:7) Nɔ ni tamɔɔɔ enɛ lɛ, Yesu ka Farisifoi osatofoi ni hi shi yɛ egbii lɛ amli lɛ ahiɛ akɛ ‘amɛkɛɔ shi amɛfeee.’ Belɛ ani eyɛ naakpɛɛ mɔ akɛ gbɔmɛi lɛ atsui “ekpilim” lɛ?—Mateo 23:3; 13:13-15.
6. Mɛni hewɔ ehe hiaa akɛ ohi shi yɛ nɔ ni otsɔɔ lɛ naa lɛ? (Romabii 2:21-23)
6 No hewɔ lɛ esa akɛ gbeekpamɔ aba nɔ ni otsɔɔ lɛ kɛ nɔ ni ofeɔ lɛ teŋ. Akɛ nɔkwɛmɔ nɔ lɛ, kɛ oosumɔ ni otswa suɔmɔ kɛha Yehowa kɛ shwe ni ashweɔ akɛ aaasa ehiɛ lɛ owo onikaselɔi lɛ loo obii amli lɛ, belɛ ani esaaa akɛ amɛtsɔɔ osɔlemɔi, owiemɔi kɛ onifeemɔi anɔ amɛnaa suɔmɔ kɛ bɔ ni oshweɔ nii ni tamɔ nɛkɛ he odaseyeli? Kɛ oosumɔ ni otɛo he ni atuɔ ahaa Biblia shishitoo mlai yɛ gbɛ ni mli wa nɔ owo amɛmli lɛ, ani esaaa akɛ klɛŋklɛŋ lɛ amɛnaa bo, ákɛ ootsɔ owiemɔi kɛ onifeemɔi anɔ ootsɔɔ akɛ otsiii ohe kɛjɛɛɛ nakai shishitoo mlai lɛ ahe? Mɛi ni wɔtsɔɔ amɛ nii, titri lɛ, wɔbii kwɛɔ nɔ ni wɔfeɔ lɛ jogbaŋŋ fe nɔ ni wɔkɛɔ. Kɛ mɛi krokomɛi na akɛ wɔhiɔ shi yɛ nɔ ni wɔtsɔɔ lɛ naa lɛ, eeeha wɔshɛ amɛtsuii amli yɛ gbɛ ni waaa kwraa nɔ.
Bi Saji
7, 8. (a) Omanye ni wɔɔye babaoo yɛ mɛi krokomɛi ni wɔnine aaashɛ amɛnɔ lɛ mli lɛ damɔ mɛni nɔ? (b) Mɛni hewɔ sanebimɔi ahe hiaa yɛ tsui lɛ mli ni asha lɛ mli?
7 Ŋaawoo ni ji enyɔ, nɔ kroko ni ha Yesu fee tsɔɔlɔ kpakpa ji sanebimɔi ni ekɛtsu nii. Yesu ji mɔ ni he esa fe fɛɛ yɛ gbɔmɛi ni ahaa amɛsusuɔ ni amɛjwɛŋɔ saji ahe lɛ mli. (Mateo 17:24-27) Omanye babaoo ni oooye yɛ mɛi ni otsɔɔ amɛ nii lɛ atsui mli ni oooshɛ lɛ damɔ sanebimɔi ni okɛtsuɔ nii lɛ nɔ. Mɛni hewɔ?
8 Klɛŋklɛŋ lɛ, saji ni obiɔ lɛ baaha ole kɛji akɛ onikaselɔ lɛ miinu nɔ ni ekaseɔ lɛ shishi diɛŋtsɛ. Fɛɛ sɛɛ lɛ, kɛji akɛ enuuu shishi ni ekpɛlɛɛɛ saji lɛ anɔ lɛ, te aaafee tɛŋŋ ni saji lɛ aaahe shi yɛ etsui mli hu? (Luka 8:15) Nɔ ni ji enyɔ lɛ, dani oooshɛ tsui lɛ mli lɛ, ebaaye ebua akɛ ooole nɔ ni yɔɔ tsui lɛ mli. Jwɛŋmɔi komɛi ni atsɔ hiɛ ana kɛ apasa jamɔ mli tsɔɔmɔi baanyɛ afee nɔ ni ehe shi waa yɛ jɛmɛ. Akɛni wɔnyɛŋ wɔle nɔ ni yɔɔ tsui lɛ mli hewɔ lɛ, ehe miihia ni wɔbi saji ni baaha nikaselɔ lɛ diɛŋtsɛ atsɔɔ bɔ ni enuɔ saji ahe ehaa yɛ etsui mli lɛ yɛ lɛ diɛŋtsɛ ewiemɔi amli. Susumɔ nɔkwɛmɔ nii komɛi ahe.
9, 10. Feemɔ bɔ ni sɛɛnamɔ yɔɔ sane ni abiɔ koni mɛi atsɔɔ amɛjwɛŋmɔ yɛ he lɛ he nɔkwɛmɔ nɔ.
9 Nyɛhaa wɔsusua akɛ nyɛmiikase Obaanyɛ Ohi Shi Kɛya Naanɔ yɛ Paradeiso yɛ Shikpɔŋ Nɔ wolo lɛ yitso 10, ni ji “Mumɔi Fɔji yɛ Hewalɛ” lɛ, kɛkɛ ni nyɛbashɛ kuku 18, yɛ baafa 97, he ni jɛmɛ sanebimɔ lɛ kaneɔ akɛ, “Mɛɛ klɛŋklɛŋ Kristofoi ni yɔɔ Efeso lɛ anɔkwɛmɔ nɔ ji nɔ ni hi ni aaanyiɛ sɛɛ kɛ mɔ ko miisumɔ ni eye ehe kɛjɛ mumɔi atsɛmɔ he?” Onikaselɔ lɛ baanyɛ aha hetoo yɛ gbɛ ni ja nɔ kɛjɛ kuku lɛ mli, shi te lɛ diɛŋtsɛ lɛ onuɔ he ehaa tɛŋŋ? Ekolɛ ekɛ ehe ewo mumɔi atsɛmɔ mli afii pii ni eheɔ eyeɔ waa hu yɛ tsutsu. Kɛji nakai ni lɛ, ani ehe eye agbɛnɛ akɛ esa akɛ etsi ehe kɛjɛ he? Ehe baahia ni obi akɛ: ‘Te bo diɛŋtsɛ lɛ onuɔ enɛ he ohaa tɛŋŋ? Te ooofee tɛŋŋ ni okɛ sane nɛɛ atsu nii yɛ oshihilɛ mli hu?’ Gbɛ ni etsɔɔ nɔ ehaa hetoo agbɛnɛ lɛ baanyɛ ajie he ni sane ni nyɛkaseɔ lɛ ebote etsui mli kɛyashɛ lɛ kpo.
10 Kɛ wɔɔŋɔ nɔkwɛmɔ nɔ kroko lɛ, ekolɛ okɛ obi lɛ miikase wolo lɛ nɔŋŋ yitso ni ji 26 lɛ, ni ji “Ta ni Awuɔ Koni Afee Nɔ Ni Ja.” Kuku 8 lɛ sanebimɔ “b” lɛ kaneɔ akɛ, “Mɛɛ jwɛŋmɔ ni obalanyo ko jie lɛ kpo eeefee nilee gbɛ akɛ wɔ hu wɔɔná?” Obi lɛ baanyɛ akane hetoo lɛ kɛjɛ kuku lɛ mli, ni no etsɔɔɔ bɔ ni lɛ diɛŋtsɛ lɛ enuɔ he ehaa. Ehe baahia ni okɛ tsuishitoo akoli nibii amli fioo: “Te bo diɛŋtsɛ lɛ onuɔ enɛ he ohaa tɛŋŋ? Ani jwɛŋmɔ yɛ shishinumɔ ni ehiɛ nɛɛ mli kɛha bo?’ Aloo ekolɛ okɛ shihilɛ ko baafɔ ehiɛ: ‘Ekolɛ obalaŋtai komɛi miishɛre zigaret ni amɛkɛ eko ha bo, te obaafee tɛŋŋ? Ni kɛji akɛ mɛi krokomɛi miikwɛ ni amɛje shishi akɛ amɛaaye ohe fɛo akɛni okpɛlɛɛɛ nɔ akɛ oooshɛrɛ lɛ hewɔ hu? Mɛni obaafee?’ Kɛ akɛ sanebimɔi nɛɛ tsu nii yɛ ŋaa mli lɛ, eeenyɛ eye ebua ni ole nɔ ni yɔɔ obi lɛ tsui mli.
11. (a) Mɛni hewɔ kɔkɔbɔɔ loo henɔkwɛmɔ jogbaŋŋ he hiaa kɛ akɛ sanebimɔi miitsu nii lɛ? (b) Mɛni hewɔ fɔlɔi titri ji mɛi ni esa amɛkwɛ amɛhe nɔ anɔ kɛ amɛbii lɛ hiɛ jwɛŋmɔ ko ni ejaa po lɛ?(kolosebii 3:21)
11 Shi kɔkɔbɔɔ loo henɔkwɛmɔ jogbaŋŋ ko nɛ: Eshɛɔ be ni sanebimɔi nɛɛ kɛ hetooi komɛi ni baaha onaa akpɛ ohe loo onijiaŋ aje wui baaba. Kɛkɛ lɛ mɛni? Kɛ eji sane ni henumɔ yɔɔ mli tsɔ lɛ, ehe ebahiaŋ ni otsa nɔ, shi moŋ obaanyɛ okɛɛ akɛ: ‘Ha wɔya nɔ. Wɔbaawie he yɛ be kroko mli.’ (Yohane 16:12) Kɔkɔbɔɔ loo henɔkwɛmɔ nɛɛ he miihia titri yɛ fɔlɔi agbɛfaŋ. Kɛ amɛtsɔɔ jwɛŋmɔ ko ni ejaaa lɛ, ye ohe nɔ. Osumɔɔɔ ni ofite sanegbaa gbɛ ni ete shi yɛ nyɛteŋ lɛ. Kɛji akɛ obi lɛ she gbeyei akɛ eeejie bɔ ni enuɔ saji ahe kpo lɛ, te ooofee tɛŋŋ ole nɔ ni yɔɔ etsui mli koni oye ebua lɛ hu?
Maa Nilee ni Yɔɔ Nyɔŋmɔ Mlai Atoiboo Mli lɛ Nɔ Mi
12, 13. (a) Mɛni hewɔ nilee ni yɔɔ Nyɔŋmɔ mlai atoiboo mli ni aaayɔse lɛ baanyɛ asa onikaselɔ lɛ tsui he lɛ? (b) Mɛni yɔɔ yelikɛbuamɔ ni akɛaaha nikaselɔ lɛ ni ena akɛ Yehowa toiboo ji nilee gbɛ lɛ mli?
12 Ŋaawoo ni ji etɛ ji ni oye ebua onikaselɔ lɛ koni ena nilee ni yɔɔ Nyɔŋmɔ mlai atoiboo mli lɛ. (5 Mose 4:5, 6; 10:12, 13) Enɛ baasa etsui he. Yɛ mɛɛ gbɛ nɔ? Kɛ ehe eye akɛ Yehowa mlai atoiboo hi ha lɛ diɛŋtsɛ lɛ, enɛ baatsirɛ lɛ ni esumɔ Nyɔŋmɔ ni etao akɛ eeesa ehiɛ.—Lala 112:1.
13 Te ooofee tɛŋŋ oye ebua mɛi ni otsɔɔ amɛ nii lɛ ni amɛna nilee ni yɔɔ Nyɔŋmɔ mlai atoiboo mli lɛ? Wɔbaanyɛ wɔfee enɛ he nɔkwɛmɔ nɔ kɛtsɔ Yehowa mlai ni wɔkɛaato tso ko ni ãka akpɛtɛ tso he akɛfee okadi ni aŋma yɛ nɔ akɛ “Akatsɔ Biɛ” lɛ he. Yɛ be mli ni okadi ni tamɔ nɛkɛ diɛŋtsɛ ji kɔkɔbɔɔ lɛ, ani okpɛlɛŋ nɔ akɛ kɛ atsɔɔ yiŋtoo hewɔ ni akɛ kɔkɔbɔɔ nɛɛ kpɛtɛ shi lɛ ehaa afeɔ toiboo amrɔ nɔŋŋ? Akɛ nɔkwɛmɔ lɛ, kɛji akɛ okadi lɛ kaneɔ akɛ “Akatsɔ Biɛ—Ilɛtrik Kpãa Kã Biɛ” lɛ, ebaaha mɔ ni baasumɔ ni kulɛ etsɔ jɛmɛ ni naa oshara ni baanyɛ aba enɔ lɛ abo kɔkɔbɔɔ lɛ toi.
14. (a) Mɛɛ gbɛ nɔ oootsɔ ni okɛ onikaselɔ lɛ asusu nii ahe ni oye ebua lɛ ni ena nɔ hewɔ ni gbɛ ko ji nilee gbɛ loo buulufeemɔ gbɛ lɛ? (b) Mɛɛ ŋmalɛi feɔ bɔ ni ehe hiaa akɛ aaatsɔɔ nɔ hewɔ ni gbɛ ko hi loo ehiii lɛ he nɔkwɛmɔ nɔ?
14 Nakai nɔŋŋ eji yɛ Nyɔŋmɔ mlai ahe. Kaa kɛɛ onikaselɔ lɛ nɔ ni Biblia lɛ kɛɔ akɛ eja kɛ nɔ ni ejaaa kɛkɛ; ye obua lɛ ni ena nɔ hewɔ ni gbɛ ko ji nilee gbɛ aloo buulufeemɔ gbɛ. Okɛ lɛ asusu nɔ hewɔ ni toiboo kɛha Nyɔŋmɔ mlai he baaba sɛɛnamɔ aha lɛ lɛ he. Ye obua lɛ ni ena nɔ ni baajɛ bu ni ebuŋ nakai taomɔ nii lɛ mli aba lɛ. Biblia lɛ diɛŋtsɛ feɔ enɛ shii abɔ. Ofainɛ, kanemɔ Abɛi 22:24, 25; 23:4, 5; 24:15, 16, 19, 20. Kadimɔ akɛ Biblia lɛ tsɔɔ yiŋtoo hewɔ ni gbɛ ko ja aloo ejaaa yɛ saji lɛ fɛɛ mli.
15. Okɛ sanebimɔi kɛ ŋmalɛi ni akɛha lɛ atsu nii ni okɛtsɔɔ nilee ni yɔɔ nɔ ni Nyɔŋmɔ kɛɔ yɛ anɔkwale ni ayeee kɛ ajwamaŋbɔɔ mi lɛ mli.
15 Akɛ nɔkwɛmɔ nɔ lɛ, susumɔ bɔ ni sanebimɔi kɛ ŋmalɛi ni nyiɛ sɛɛ nɛɛ maa nilee ni yɔɔ Nyɔŋmɔ mlai lɛ atoiboo mli lɛ nɔ mi ehaa lɛ he.
AmaIe, Juu: Mɛni hewɔ anɔkwale ni ayeee yeɔ awui lɛ? (Abɛi 15:27; 20:10; Kpojiemɔ 21: 8) Mɛni hewɔ sɛɛnamɔ yɔɔ anɔkwale ni oyeɔ mɛi krokomɛi lɛ mli lɛ? (Abɛi 3:3, 4; 12:19; Hebribii 13:18)
Ajwamaŋbɔɔ: Ahoshwibɔɔ baanyɛ aye wɔ awui yɛ mɛɛ gbɛ nɔ? (Abɛi 5:9; 7:21-23; 1 Korintobii 6:18) Mɛɛ gbɛ nɔ eeetsɔ eye mɛi krokomɛi awui yɛ? (1 Tesalonikabii 4:6; 1 Korintobii 5:6; Hebribii 12:15, 16) Biblia mli jeŋba mlai atoiboo he baa sɛɛnamɔ kɛhaa bo yɛ mɛɛ gbɛ nɔ? (Abɛi 5: 18, 19; Hebribii 13:4)
Yɛ be mli ni osusu Biblia mlai ahe yɛ nɛkɛ gbɛ nɔ lɛ, obaanyɛ obi akɛ: ‘Ani onuɔ he akɛ Yehowa miisumɔ ni ahi aha wɔ diɛŋtsɛ? Ani okpɛlɛɔ nɔ akɛ emlai lɛ haaa nɔ ko ni hi aŋmɛɛ wɔ?’
16. Nii ahe susumɔ yɛ nɛkɛ gbɛ nɔ lɛ baaná hewalɛ yɛ onikaselɔ lɛ nɔ yɛ mɛɛ gbɛ nɔ?
16 Yɛ be mli ni nyɛkaseɔ nii kɛyaa nɔ lɛ, okɛ lɛ asusu nibii ahe nakai nɔŋŋ yɛ Nyɔŋmɔ mlai ni kɔɔ daatɔɔ, tooyeli, zigaret shɛremɔ, lá he sane lɛ kɛ nibii krokomɛi ahe. Yɛ nɛkɛ gbɛ nɔ lɛ belɛ ooye oobua onikaselɔ lɛ loo obii lɛ ni amɛna akɛ Nyɔŋmɔ mlai lɛ fɛɛ yɛ kɛha wɔhilɛ. Enɛ etsɔɔɔ akɛ esa akɛ onikaselɔ lɛ ana nɔ ko nɔ adamɔ dani ebo Nyɔŋmɔ toi yɛ be fɛɛ mli. Shi nɔkwɛmɔ nii komɛi baaye ebua ni oshɛ etsui mli, ni otsirɛ lɛ ni efee mɔ ni baasumɔ akɛ esa Nyɔŋmɔ hiɛ. No hewɔ lɛ kɛ “la” lɛ loo kaa lɛ ba lɛ, ekɛ oyaiyeli baabo Nyɔŋmɔ wiemɔ lɛ toi—1 Korintobii 3:13.
Ye Obua Amɛ Ni Amɛle Nyɔŋmɔ
17. Mɛɛ ŋaawoo kroko baanyɛ aye ebua bo ni oshɛ onikaselɔ lɛ tsui mli?
17 Ŋaawoo ni ji ejwɛ lɛ ji enɛ: ye obua onikaselɔ lɛ ni ele Nyɔŋmɔ. (Yohane 17:3) Nɔ ni fe ni oooye obua lɛ ni ele akɛ Yehowa yɛ, ni ákɛ eyɛ gbɛi lɛ, ye obua onikaselɔ lɛ koni ele lɛ diɛŋtsɛ akɛ mɔ ni ekɛ lɛ bɔɔ naanyo. Enɛ baasa etsui he, ejaakɛ ni aaale Yehowa lɛ tsɔɔ akɛ aaasumɔ lɛ.
18. Mɛɛ gbɛ nɔ oootsɔ ogbala onikaselɔ lɛ jwɛŋmɔ kɛya,Yehowa sui anɔ yɛ mli ni nikasemɔ lɛ yaa nɔ lɛ?
18 Te ooofee tɛŋŋ oye obaa onikaselɔ lɛ ni ele Yehowa akɛ mɔ ni ekɛ lɛ bɔɔ naanyo loo ekɛ lɛ yeɔ yitsoŋsane? Nɔ kome ji akɛ onyɛŋ osumɔ mɔ ko ja ole mɔ lɛ sui, egbɛi. No hewɔ lɛ, ha ohiɛ ahi Yehowa sui ni eko kɛ lɛ yeee egbɔ lɛ ni ooogbala ejwɛŋmɔ kɛaaya nɔ yɛ nikasemɔ lɛ mli fɛɛ lɛ nɔ. Abaanyɛ afee enɛ shii abɔ ni sane ni akaseɔ lɛ kɔɔɔ he eko. Akɛ nɔkwɛmɔ nɔ lɛ, kɛ nyɛmiikase kpɔmɔ nɔ lɛ he nii lɛ, obaanyɛ omɛ yɛ sane titri ko he ni obi akɛ: ‘Ani kpɔmɔ nɔ gbɛjianɔtoo lɛ haa bɔ ni Yehowa sumɔɔ wɔ ehaa lɛ jeɔ kpo waa lo?’ Aloo kɛ nyɛmiikase nɔ hewɔ ni Nyɔŋmɔ eŋmɛ efɔŋfeemɔ gbɛ lɛ, obaanyɛ obi akɛ: ‘Yehowa ejie tsuishiŋmɛɛ babaoo kpo yɛ efɔŋ ni gbɔmɔ feɔ lɛ fɛɛ sɛɛ yɛ mɛɛ gbɛ nɔ?’ aloo, ‘Mɛɛ gbɛ nɔ Yehowa tsɔ ejie nilee ni nɔ bɛ kpo yɛ gbɛ ni etsɔ nɔ etsu atuatsemɔ ni ba yɛ Eden lɛ he nii lɛ hewɔ?’ Nibii ahe susumɔ yɛ nɛkɛ gbɛ nɔ lɛ baaye abua onikaselɔ lɛ ni etswa hetuu-kɛhamɔ henumɔ ni mli wa yɛ Yehowa mli ewo emli. Ebaasusu Yehowa he akɛ Mɔ diɛŋtsɛ ni esui saa ehiɛ ni egbalaa mɔ.
19, 20 (a) Mɛni hu he hiaa koni ale Yehowa jogbaŋŋ akɛ mɔ ni akɛ lɛ yeɔ yitsoŋsane? (b) Mɛɛ gbɛ nɔ niiashikpamɔ ni yɔɔ kuku lɛ mli lɛ feɔ bɔ ni ehe hiaa okɛ aaato okadi kpakpa afɔ shi kɛ eba sɔlemɔ mli lɛ he nɔkwɛmɔ nɔ?
19 Kɛfata he lɛ, onyɛŋ ole mɔ ko jogbaŋŋ kɛ okɛ mɔ lɛ egbaaa sane. Nakai nɔŋŋ hu onikaselɔ lɛ nyɛŋ ana ekɛ Yehowa teŋ wekukpaa ni bɛŋkɛ kpaakpa mli ŋɔɔmɔ kɛ ekɛ Yehowa egbaaa sane. Akɛni ole enɛ hewɔ lɛ, tsɔɔmɔ onikaselɔ lɛ gbɛ ni atsɔɔ nɔ asɔleɔ. Ye obua lɛ ni ena saji sɔrɔtoi ni sa akɛ asɔleɔ yɛ he. (1 Yohane 5:14) Tswaa hiɛsɔɔ kɛha Yehowa akɛ Mɔ ni boɔ sɔlemɔi atoi ni ehaa hetoo hu owo emli. (Lala 65:3) Wolɛ hewalɛ ni ejie ehenumɔi ni hɔ shishi tɔŋŋ lɛ kpo, ‘efɔse etsui mli saji eshwie’ Yehowa hiɛ.—Lala 62:9.
20 Bo diɛŋtsɛ onɔkwɛmɔ nɔ he miihia yɛ biɛ hu. Ani osɔlemɔi jieɔ bɔ ni otu ohe oha Yehowa lɛ kpo? Enɛ baanyɛ ana hewalɛ kpakpa yɛ mɛi ni otsɔɔ amɛ nii lɛ anɔ, kɛ obii lɛ hu. Susumɔ niiashikpamɔ nɛɛ he.
Afii komɛi nɛ ni Kristofonyo nuu kɛ yoo ko miitsɔɔ amɛ binuu ni eye afii etɛ lɛ gbɛ ni atsɔɔ nɔ asɔleɔ. Gbɛkɛ ko, yɛ be mli ni esɔle eha Yehowa koni ejɔɔ Dada kɛ Mama lɛ, gbɛkɛ lɛ bi ni Yehowa ajɔɔ “Wally.” Namɔ ji “Wally” nɛɛ? Efɔlɔi lɛ leee, ni gbekɛ lɛ je shishi esɔle eha “Wally” shii abɔ! Yɛ naagbee lɛ, yɛ be mli ni sane lɛ eha amɛnaa ekpɛ amɛhe aahu lɛ, amɛyoo nɔ ni eba lɛ. Gbekɛ lɛ miisɔle aha nyɛmimɛi ni yɔɔ Malawi (ni yɛ nakai be lɛ mli lɛ aawa amɛyi lɛ) shi etsɛɛɛ gbɛi lɛ jogbaŋŋ ni no he egbɛɛ “Wally” lɛ. Oti lɛ ji akɛ, gbekɛ nuu lɛ enu ni efɔlɔi miisɔle yɛ nɛkɛ gbɛ nɔ, ni ekase amɛ nɔkwɛmɔ nɔ kpakpa lɛ. Bo lɛ susumɔ bɔ ni fɔlɔi nɛɛ aaanu he aha lɛ he!
Ani enɛ efeee bɔ ni ehe hiaa akɛ aaato okadi kpakpa afɔ shi kɛ eba mɛi krokomɛi anitsɔɔmɔ yɛ gbɛ ni atsɔɔ nɔ asɔleɔ lɛ he nɔkwɛmɔ nɔ?
Nyɔmɔwoo Lɛ
21. (a) Taakɛ 1 Korintobii 3:14, 15 tsɔɔ lɛ, mɛni baanyɛ afee ohiɛnɔkamɔ akɛ Kristofonyo tsutswalɔi? (b) Ani “nyɔmɔwoo” lɛ ji naanɔ wala yɛ Nyɔŋmɔ Gbɛjianɔtoo Hee lɛ mli? Tsɔɔmɔ mli.
21 No hewɔ lɛ kɛ wɔɔnyɛ wɔtswa sui ni la nyɛŋ ashã wɔwo mɛi amli, ni wɔye wɔbua amɛ ni amɛná amɛ kɛ Yehowa teŋ wekukpaa kpakpa lɛ, belɛ esa akɛ wɔshɛ amɛtsui mli. Efeŋ nɔ ni waaa moŋ, shi nyɔmɔwoo yɛ mli. Paulo tsɔɔ enɛ beni ekɛɛ akɛ: “Kɛ mɔ ko nitsumɔ ni etswa ema nɔ lɛ aaadamɔ shi lɛ, eeena nyɔmɔwoo; shi kɛ mɔ ko nitsumɔ aaashã [ejaakɛ emaaa lɛ jogbaŋŋ, ekɛ nibii ni la nyɛŋ ashã emaaa] lɛ, enine baanyɛ shi [ni ji akɛ, “la” lɛ baashã nɔ ni etswa ema shi lɛ;] shi lɛ diɛŋtsɛ lɛ aaahere eyiwala, shi kɛlɛ tamɔ mɔ ko ni tsɔ la mli.” Mɛni ji “nyɔmɔwoo” lɛ? Eka shi faŋŋ akɛ Paulo yɛ nɔ ko ni fe naanɔ wala yɛ Nyɔŋmɔ Gbɛjianɔtoo Hee lɛ mli yɛ ejwɛŋmɔ mli, ejaakɛ aŋma akɛ mɔ ni etswaaa tsu lɛ jogbaŋŋ lɛ nine shɛɛɛ “nyɔmɔwoo” lɛ nɔ, eyɛ mli akɛ lɛ diɛŋtsɛ lɛ abaanyɛ ahere eyiwala tamɔ nɔ ni afee nakai kɛtsɔ “la” mli.—1 Korintobii 3:14, 15.
22, 23. (a) Mɛɛ nyɔmɔwoo bɔfo Paulo nine shɛ nɔ yɛ enyɛmimɛi Kristofoi ni yɔɔ Tesalonika lɛ hewɔ? (b) Mɛni ji “nyɔmɔwoo” ni otsui shweɔ lɛ, ni te ooofee tɛŋŋ ni onine ashɛ enɛ nɔ?
22 Belɛ mɛni ji nɛkɛ “nyɔmɔwoo” nɛɛ? Sane ko ni Paulo kɛɛ Tesalonikabii lɛ haa wɔleɔ enɛ mli. Paulo ŋma eyaha Kristofoi ni awaa amɛyi yɛ jɛmɛ lɛ akɛ: “Namɔ ji wɔhiɛnɔkamɔ loo wɔmiishɛɛ loo wɔshwãa akekre lɛ yɛ wɔ-Nuŋtsɔ Yesu Kristo hiɛ, yɛ ebaa be lɛ mli lɛ? Ahi jeee nyɛ nɔŋŋ ni? Ejaakɛ nyɛ nyɛji wɔnunyam kɛ wɔmiishɛɛ.” (1 Tesalonikabii 2:19, 20) Paulo eye ebua nakai Tesalonikabii lɛ kɛbote anɔkwale lɛ mli. Ni eyɛ mli akɛ awa amɛyi kɛjɛ shishijee moŋ, shi amɛmiidamɔ shi shiŋŋ. Paulo nyɔmɔwoo ji miishɛɛ ni ena akɛ eeena amɛ akɛ amɛŋmɛ amɛtsui shi yɛ shitee-kɛ-woo mli lɛ. Enɛ ye odase akɛ Paulo etswa tsu lɛ jogbaŋŋ.
23 Nakai eji yɛ wɔgbɛfaŋ. Ani ejeee nɔ ni oshweɔ yɛ otsui mli akɛ oooye obua mɛi ni otsɔɔ amɛ nii lɛ, ni amɛná Kristofoi asubaŋi kpakpai ni hiɔ shi kɛyaa naanɔ ni baanyɛ adamɔ shi shiŋŋ yɛ kaai kɛ nɔnyɛɛi ni baaba amɛnɔ lɛ anaa? Hɛɛ, kwɛ miishɛɛ ni ooona ni tamɔ nyɔmɔwoo ko akɛ o-Biblia mli nikaselɔi lɛ kɛ obii lɛ enyɛ edamɔ kaai ni tamɔ “la” lɛ anaa! Enɛ yeɔ odase akɛ otswa otsu lɛ jogbaŋŋ. Eba akɛ enɛ aaafee onyɔmɔwoo yɛ be mli ni oyaa nɔ okɛ nibii ni la nyɛŋ asha tswaa maa shishitoo ni ja lɛ nɔ, yɛ be mli ni okwɛɔ Yehowa gbɛ koni ejɔɔ omɔdɛŋbɔɔi anɔ lɛ.
Ani obaanyɛ okai?
◻ Dani oooshɛ tsui lɛ mli lɛ—
◻ Mɛni hewɔ ehe hiaa akɛ ofee nɔkwɛmɔ nɔ kpakpa?
◻ Mɛɛ sanebimɔi nɛkɛ yeɔ buaa, ni mɛni hewɔ?
◻ Mɛni hewɔ ehe hiaa akɛ onikaselɔ lɛ ana nilee ni yɔɔ Nyɔŋmɔ mlai atoiboo mli lɛ?
◻ Mɛni hewɔ esa akɛ onikaselɔ lɛ akase gbɛ ni atsɔɔ nɔ asɔleɔ lɛ?
[Mfoniri ni yɔɔ baafa 16]
Ani osɔlemɔi jieɔ bɔ ni otu ohe oha Nyɔŋmɔ lɛ kpo? Enɛ baanyɛ asa obii atsui he