‘Nyɛkayea Awerɛho Tamɔ Bɔ ni Mɛi ni Eshwɛ lɛ Feɔ Lɛ’
ANI okadi bɔ ni efeɔ tamɔ nɔ ni fɔfɔi ema eyitso shi beni ahum ko ni naa wa etswa sɛɛ lɛ pɛŋ? Esaa henumɔ he yɛ gbɛ ko nɔ. Ejaakɛ eka shi faŋŋ akɛ, ahum ni tswa lɛ ha kooloi kɛ gbɔmɛi babaoo ni anyɛŋ akane amɛ—ni ji bɔɔ nii ni he wa fe fɔfɔi fɛɛ fɔfɔi—gba shi kɛha abobaa he taomɔ. Ni kɛlɛ, fɔfɔi lɛ damɔ shi, yɛ eshishifai anaa, ni ekɛ kɔɔyɔŋ tsakemɔ ni naa wa lɛ miikpe. Agbɛnɛ, naa lɛ, edamɔ shi nakai nɔŋŋ, ema eyitso shi loo edɔ emli, shi ekuko, eejie hewalɛ ko ni kɛ bɔ ni eyɔɔ wudɔɔ ha lɛ kpaaa gbee kpo. Onaa baakpɛ ohe, yɛ be mli ni ojieɔ eyi lɛ, akɛ ani eeena hewalɛ ekoŋŋ ni ewo eyitso fɛfɛo lɛ nɔ ekwɛ ŋwɛigbɛ ekoŋŋ lo.
Nakai pɛpɛɛpɛ gbɔmɔ yɔɔ ha. Wɔkɛ ahum loo kɔɔyɔɔ sɔrɔtoi ni tswaa waa kpeɔ yɛ nɛkɛ haomɔ bei nɛɛ amli. Ohia, nɔnyɛɛ, gbɔmɔtsoŋ hewalɛ ni baa shi, suɔlɔ ko gbele—ahum ni naa wa ni tamɔ nɛkɛ baa wɔ fɛɛ nɔ yɛ be kome loo be kroko mli, ni yɛ bei komɛi amli lɛ wɔnyɛɛɛ wɔjo nibii nɛɛ anaa foi tamɔ bɔ ni fɔfɔi nyɛɛɛ afã ehe kɛjɛ shikpɔŋ ni ejo foi eyatao abobaa he lɛ. Bɔ ni aŋkroaŋkroi ni tamɔ mɛi ni yɔɔ wudɔɔ lɛ jieɔ hewalɛ ni yɔɔ naakpɛɛ kpo ni amɛnyɛɔ amɛdamɔɔ naagbai nɛɛ anaa lɛ saa mɔ he waa. Mɛɛ gbɛ nɔ amɛtsɔɔ amɛfeɔ nakai? Yɛ bei pii amli lɛ, nɔ titri lɛ ji hemɔkɛyeli. Yesu Kristo nyɛ bi Yakobo ŋma akɛ: “Nyɛle akɛ kɛ nyɛ hemɔkɛyeli nyɛ edamɔ kaai nɛɛ anaa yɛ omanyeyeli mli lɛ, nɔ ni jɛɔ mli baa ji nyɛmɔ ni nyɛnaa kɛhaa tsuishiŋmɛɛ.”—Yakobo 1:3, Today’s English Version.
Nɔ kroko ni he hiaa waa ji hiɛnɔkamɔ. Akɛ nɔkwɛmɔ nɔ lɛ, kɛ gbele ba suɔlɔ ko nɔ lɛ, hiɛnɔkamɔ baanyɛ afee babaoo aha mɛi ni ashi amɛ lɛ. Bɔfo Paulo ŋma wolo eyaha Kristofoi ni yɔɔ Tesalonika lɛ akɛ: “Wɔsumɔɔɔ ni nyɛfeɔ mɛi ni leee mɛi ni wɔɔ yɛ gbele mli lɛ ahe nɔ ko; koni nyɛkaye awerɛho tamɔ mɛi ni eshwɛ ni bɛ hiɛnɔkamɔ lɛ feɔ lɛ.” (1 Tesalonikabii 4:13) Yɛ be mli ni eka shi faŋŋ akɛ Kristofoi yeɔ awerɛho yɛ gbele hewɔ lɛ, kɛlɛ sɔrɔto-feemɔ yɛ mli. Amɛyɛ shihilɛ mli ni gbohii lɛ yɔɔ lɛ kɛ gbohiiashitee he hiɛnɔkamɔ lɛ ahe anɔkwa nilee.—Yohane 5:28, 29; Bɔfoi lɛ Asaji 24:15.
Nilee nɛɛ haa amɛ hiɛnɔkamɔ. Ni nakai hiɛnɔkamɔ lɛ hu baa awerɛho ni amɛyeɔ lɛ shi fiofio. Eyeɔ ebuaa amɛ ni amɛŋmɛɔ amɛtsui shi, kɛ babaoo. Yɛ be ni sa mli lɛ, taakɛ fɔfɔi lɛ ji yɛ ahum lɛ sɛɛ lɛ, ekolɛ amɛbaahole amɛyitsei anɔ kɛjɛ awerɛho lɛ mli ni amɛna miishɛɛ kɛ shihilɛ kpakpa mli ŋɔɔmɔ ekoŋŋ.