Yitso 13
Akɔntaa Ni Akɛ Tsuji Ni Yɔɔ Ŋmɛnɛ Lɛ Aaabu
1, 2. (a) Gbɛi krɔŋkrɔŋ lɛ ni baka amɛnɔ lɛ kɛ mɛni bafata he ha shwɛɛnii lɛ ni ji Kristo “tsuji” lɛ ni namɔ ji enɛ jɛɛhe? (b) Yɛ mɛɛ gbɛ nɔ awie nɛkɛ miishɛɛ loo nyamɔ nɛɛ he yɛ “talentai” lɛ ahe abɛbua lɛ mli?
1 GBƐI krɔŋkrɔŋ lɛ ni baka amɛnɔ kɛjɛ afi 1931 kɛyaa lɛ kɛ miishɛɛ loo nyamɔ hee baha Nuŋtsɔ Yesu Kristo “tsuji” ni ji shwɛɛnii lɛ ni yɔɔ shikpɔŋ nɔ lolo lɛ. Amɛnyamɔ loo miishɛɛ lɛ jɛ Jɛɛhe kometoo lɛ nɔŋŋ ni amɛ Nuŋtsɔ kɛ Nɔtsɛ lɛ na emiishɛɛ loo nyamɔ lɛ kɛjɛ lɛ, kɛjɛ Yehowa Nyɔŋmɔ ŋɔɔ. Nuŋtsɔ Yesu Kristo wie nɛkɛ emiishɛɛ loo enyamɔ nɛɛ he yɛ be mli ni ekɛ etsuji lɛ buɔ akɔntaa kɛhaa “talentai” lɛ he abɛbua lɛ miibaa lɛ. Wɔnaa enɛ yɛ Mateo 25:20-23, heni wɔkaneɔ yɛ akɛ:
2 “Ni mɔ ni na talentai enumɔ lɛ ba, ni ekɛ talɛntai enumɔ kroko hu babɔ he ekɛɛ: Nuŋtsɔ, oŋɔ talɛntai enumɔ oha mi, naa, mikɛna talentai enumɔ hu mifata he. Enuŋtsɔ lɛ kɛɛ lɛ akɛ: Ahekoo, tsulɔ kpakpa kɛ anɔkwafo, oye anɔkwa yɛ nii fioo he, maha oye nii pii atsɛ: Botemɔ onuŋtsɔ miishɛɛ lɛ mli. Shi mɔ ni na talɛntai enyɔ lɛ hu ba ni ebakɛɛ: Nuŋtsɔ, oŋɔ talentai enyɔ oha mi, naa, mikɛ talentai enyɔ hu miifata he. Enuŋtsɔ lɛ kɛɛ lɛ akɛ: Ahekoo, tsulɔ kpaakpa kɛ anɔkwafo, oye anɔkwa yɛ nii fioo he, maha oye nii pii atsɛ: Botemɔ onuŋtsɔ lɛ miishɛɛ lɛ mli.”
3, 4. (a) Ani “tsuji” etɛ lɛ feɔ gbɔmɛi aŋkroaŋkroi ahe mfoniri, aloo mɛni? (b) Yɛ mɛɛ gbɛ nɔ akɔntaa ni akɛ nɔ ni “tsuji” lɛ feɔ he mfoniri aaabu yɛ abɛbua lɛ mlibaa mli lɛ tsɔɔ akɛ parousia lɛ he shishinumɔ ni ja yɛ?
3 Eka shi faŋŋ akɛ akɔntaa ni akɛ tsuji lɛ buɔ lɛ biɔ be kɛ nii ahe susumɔ. No hewɔ lɛ ebaafee ŋwɛi Nuŋtsɔ, Yesu Kristo ba ni eba loo parousia be lɛ ni haa abɛbua lɛ mli naagbee nibii ni eshwɛ lɛ baa mli lɛ he mfoniri. (Mat. 24:3) Nyɛkahaa wɔhiɛ kpaa nɔ akɛ tsuji etɛ ni yɔɔ abɛbua lɛ mli lɛ damɔ shi kɛha kui, ni ákɛ gbɔmɛi aŋkroaŋkroi yɔɔ kui nɛɛ amli. Eheɔ be babaoo kɛ nii ahe susumɔ ni akɛ kuu aye fe aŋkroaŋkroi. Yɛ kuu gbɛfaŋ nɛkɛ lɛ esa ákɛ akɛ kuu lɛ mlibii lɛ ateŋ mɔ fɛɛ mɔ aye. Bɔfo Paulo ŋma yɛ Romabii 14:9, 10 akɛ:
4 “Ejaakɛ enɛ hewɔ Kristo gbo ni ete shi ni ehiɛ ka, bɔni afee ni etsɔ gbohii kɛ hiɛkalɔi fɛɛ anuŋtsɔ. . . . Ejaakɛ wɔ fɛɛ wɔbaadamɔ Nyɔŋmɔ kojomɔsɛi lɛ hiɛ.”
5. (a) Yesu Kristo kojoɔ kɛhaa namɔ yɛ be mli ni ekojoɔ hiɛkalɔi kɛ gbohii lɛ? (b) Esa akɛ nakai kui ni “tsuji” ni gboi dani Kristo parousia lɛ ba lɛ feɔ amɛhe mfoniri lɛ afee mɛni yɛ amɛnyɔmɔwoo lɛ he?
5 Nuŋtsɔ Yesu Kristo kojoɔ kɛhaa Yehowa Nyɔŋmɔ yɛ “talentai” lɛ he abɛbua lɛ mlibaa mli. Jeee “etsuji” lɛ ni ekɛ “talentai” lɛ wo amɛdɛŋ lɛ fɛɛ anaa amɛ yɛ wala mli yɛ heloo mli yɛ shikpɔŋ nɔ yɛ afii ohai nyɔŋmai enyɔ nɛɛ mli. Akɛ nɔkwɛmɔ nɔ lɛ, mɛi ni hi shi yɛ klɛŋklɛŋ afii oha lɛ mli yɛ bɔfoi nyɔŋma kɛ enyɔ lɛ agbii lɛ amli aahu kɛbashi Yohane ni nine shɛ Kpojiemɔ lɛ nɔ lɛ egboi jeeŋmɔ, amɛwɔ yɛ gbele mli, ni amɛmiimɛ amɛ ŋwɛi Nuŋtsɔ kɛ Nɔtsɛ lɛ parousia lɛ, be mli ni amɛnine baashɛ nyɔmɔwoo nɔ kɛjɛ edɛŋ akɛ jalɛ Kojolɔ lɛ. Taakɛ bɔfo Paulo ŋma eyaha enaanyo maŋsɛɛ sanekpakpa shiɛlɔ Timoteo lɛ sɛɛ be fioo ko dani egbo akɛ lá odasefonyo lɛ: “Ta kpakpa lɛ, miwu; foidamɔ lɛ, mida migbe naa; hemɔkɛyeli lɛ, mihiɛ mli tswɛ; nɔ ni eshwɛ ni ka shi hami ji jalɛ akekre lɛ, ni Nuŋtsɔ ni ji jalɛ kojolɔ lɛ kɛbaaha mi yɛ nakai gbi lɛ nɔ lɛ, ni jeee mikome ebaaha, shi moŋ mɛi bluublu ni sumɔɔ epuemɔ lɛ hu.” (2 Tim. 4:7, 8) Hɛɛ, bɔfo Paulo miikpa “nakai gbi lɛ” gbɛ, Nuŋtsɔ lɛ parousia lɛ, kɛha shitee kɛmiijɛ gbohii ateŋ koni enine ashɛ ŋwɛi wala ni gbele bɛ mli lɛ nɔ akɛ nyɔmɔwoo. Esa akɛ mɛi fɛɛ ni gboiɔ dani e-parousia lɛ baa lɛ amɛ.
6. Mɛɛ be mli atsĩɛ nakai “tsuji” ni wɔɔ yɛ gbele mli lɛ ahiɛ, ni mɛnɛɛmɛi tsɔɔ namɛi ahiɛ yɛ shitee lɛ mli?
6 Atsĩɛ nakai “tsuji” anɔkwafoi lɛ fɛɛ ni wɔɔ yɛ gbele mli lɛ ahiɛ yɛ e-parousia yɛ mumɔŋ ni anaaa lɛlɛ mli, beni be shɛ kɛha kojomɔ lɛ shishijee koni akɛ amɛ aya ŋwɛi wala mli yɛ mumɔŋ shihilɛ he lɛ. No hewɔ lɛ, “tsuji” ni yɔɔ wala mli lɛ anyɔmɔwoo lɛ tsɔɔɔ “tsuji” anɔkwafoi ni wɔɔ yɛ gbele mli lɛ anyɔmɔwoo lɛ hiɛ. Enɛ jeee nɔ ni wɔ diɛŋtsɛ wɔsusuɔ; ejaakɛ bɔfo Paulo ŋma eyaha Kristofoi asafo ni yɔɔ Tesalonika lɛ ni ekɛɛ akɛ: “Ejaakɛ kɛ wɔheɔ wɔyeɔ akɛ Yesu gbo ni ete shi lɛ, belɛ nakai nɔŋŋ Nyɔŋmɔ baatsɔ Yesu nɔ aŋɔ mɛi ni ewɔ [yɛ gbele mli] lɛ hu aafata ehe kɛba. Ejaakɛ wɔmiikɛɛ nyɛ enɛ yɛ Nuŋtsɔ lɛ wiemɔ ko naa, akɛ wɔ mɛi ni wɔhiɛ kamɔ ni baashwɛ yɛ Nuŋtsɔ lɛ baa be lɛ mli lɛ wɔtsɔŋ mɛi ni ewɔ [yɛ gbele mii] lɛ ahiɛ; ejaakɛ lɛ Nuŋtsɔ lɛ diɛŋtsɛ kɛ oshebɔɔ kɛ ŋwɛibɔfonukpa gbee kɛ Nyɔŋmɔ tɛtrɛmaŋtrɛ aaajɛ ŋwɛi akpeleke shi, ni gbohii ni yɔɔ Kristo mli lɛ tsutsu baate shi, no sɛɛ lɛ wɔ mɛi ni wɔhiɛ kamɔ ni eshwɛ lɛ, aaasha wɔ kɛ amɛ fɛɛ yɛ atatui amli kaatee Nuŋtsɔ lɛ kpeemɔ yɛ kɔɔyɔɔ mli, ni nakai wɔkɛ Nuŋtsɔ lɛ aaayahi shi daa.”—1 Tes. 4:14-17.
7. Mɛɛ gbohiiashitee nɛkɛ mɛi ni wɔɔ lɛ naa?
7 Enɛ tsɔɔ akɛ yɛ Nuŋtsɔ lɛ parousia lɛ be lɛ mli lɛ, yɛ be mli ni abaaje kojomɔ lɛ shishi lɛ, “tsuji” anɔkwafoi ni wɔɔ yɛ gbele mli lɛ eshitee ko ni anaaa ni kɛ amɛ yaa ŋwɛi wala mli yɛ mumɔŋ baa. “Tsuji” ni eshwɛ ni yɔɔ shikpɔŋ nɔ yɛ heloo mli lɛ ahiŋmɛi enaaa enɛ, taakɛ bɔ ni je lɛŋ bii ni amɛjeee Nuŋtsɔ Yesu ni eba ni anaaa lɛ lɛ “tsuji” lɛ hu enaaa enɛ lɛ.
8, 9. (a) Mɛni ji nɔ ni odaseyeli lɛ tsɔɔ kɛji akɛ kpe ni “tsuji” lɛ kɛ Nuŋtsɔ lɛ aakpe yɛ kɔɔyɔɔ mli lɛ tsɔɔ sha ni aaasha amɛ yɛ adesa gbɔmɔtsei amli kɛya atatui lɛ amli? (b) Mɛni ni atsɔɔ yɛ 1 Korintobii 15:50-55 kɔɔ nɛkɛ sane nɛɛ he?
8 Kpe ni “tsuji” ni átee amɛ shi lɛ kɛ Nuŋtsɔ lɛ aaakpe yɛ kɔɔyɔɔ mli lɛ hu ji nɔ ko ni heloo mli hiŋmɛii fɛɛ ni yɔɔ shikpɔŋ nɔ enaa, no hewɔ lɛ adesai ni yɔɔ shikpɔŋ nɔ lɛ leee nɔ ni yaa nɔ ja hemɔkɛyeli kɛtsɔ Nyɔŋmɔ Wiemɔ lɛ nɔ kɛ agbɛnɛ nibii ni bei lɛ tsɔɔ. Atee nakai “tsuji” lɛ ni wɔɔ yɛ gbele mli lɛ fɛɛ shi shikome yɛ he kometoo lɛ nɔŋŋ mli koni amɛkɛ ‘Nuŋtsɔ lɛ ayakpe yɛ kɔɔyɔɔ mli.’ Shi kɛlɛ, nakai “tsuji” lɛ ni shwɛɔ yɛ shikpɔŋ nɔ kɛyashiɔ kojomɔ be lɛ aloo be ni akɛbuɔ akɔntaa lɛ jeɔ shishi lɛ, ashaaa amɛ diɛŋtsɛ yɛ amɛheloo gbɔmɔtsei ni anaa lɛ amli kɛyaa atatui ni ebɔle shikpɔŋ lɛ he kɛkpe lɛ amli koni amɛkɛ Nuŋtsɔ ko ni anaa lɛ ayakpe yɛ kɔɔyɔɔ mli. Ejaakɛ ŋmɛnɛŋmɛnɛ yinɔsane eŋmaaa nɔ ko ni tamɔ enɛ ni miiba mli lɛ efɔɔɔ shi. “Tsuji” akuu nɛɛ mlibii ni shwɛɔ lɛ gboɔ yɛ be kɛ bei amli yɛ nɔ ni fe afii nyɔŋmai enumɔ ni eho nɛɛ mli, shi, taakɛ Biblia shiwoo lɛ tsɔɔ lɛ, amɛnaa amrɔ shitee kɛyaa wala mli yɛ mumɔŋ yɛ ŋwɛi ni anaaa jɛmɛ lɛ amrɔ nɔŋŋ. Akɛni Nuŋtsɔ lɛ parousia lɛ eje shishi momo hewɔ lɛ, ehe ehiaaa ni amɛwɔ yɛ gbele mli ni amɛmiimɛ ebaa lɛ. Nɔ ni Paulo wie lɛ kɔɔ amɛhe:
9 “Heloo kɛ la nine shɛŋ Nyɔŋmɔ maŋtsɛyeli lɛ nɔ, ni asaŋ fitemɔ hu nine shɛŋ nɔ ni fiteee lɛ nɔ. Naa, teemɔŋ sane miŋɔkɛɔ nyɛ nɛɛ: Jeee wɔfɛɛ wɔbaawɔ [yɛ gbele mli] lɛ, shi abatsake wɔ fɛɛ, trukaa hiŋmɛitswaa mli, heni aaakpa naagbee tɛtrɛmaŋtrɛ lɛ; ejaakɛ abaakpa tɛtrɛmantrɛ, ni aaatee gbohii ashi ni amɛ fiteŋ dɔŋŋ, ni wɔ lɛ abaatsake wɔ. Ejaakɛ ja nɛkɛ fitemɔ nɔ̃ nɛɛ wo no ni fiteee lɛ, ni nɛkɛ gbele nɔ̃ nɛɛ wo nɔ ni gbooo lɛ. Shi beni nɛkɛ fitemɔ nɔ̃ nɛɛ ewo nɔ ni fiteee lɛ, ni nɛkɛ gbele nɔ̃ nɛɛ ewo wɔ ni gbooo lɛ, no lɛ wiemɔ ni aŋma Iɛ aaaba mli akɛ: ‘Ami gbele yɛ kunim mli.’”—1 Kor. 15:50-55; Yes. 25:8.