6. Mɛɛ saji krokomɛi Paulo haa wɔleɔ yɛ mlakwalɔ lɛ he?

⁶ Paulo tee nɔ etsɔɔ mɔ ni mlakwalɔ nɛɛ ji lɛ mli ekoŋŋ, akɛ: “Mɔ ni baate shi awo ehe nɔ ashi nɔ fɛɛ nɔ ni atsɛɔ nyɔŋmɔ loo nyɔŋmɔ jamɔ lɛ aahu ni lɛ diɛŋtsɛ eeeyata Nyɔŋmɔ we lɛ akɛ nyɔŋmɔ ko, ni eeetsɔ ehe akɛ lɛ ji Nyɔŋmɔ lɛ.” (2 Tesalonikabii 2:⁠4) No hewɔ lɛ Paulo bɔ kɔkɔ akɛ Satan baatee mlakwalɔ ko shi, apasa nii ni ajaa lɛ tamɔ Nyɔŋmɔ, mɔ ni baawo ehe nɔ kɛteke Nyɔŋmɔ mla lɛ po.

Amɛwoɔ Amɛhe Nɔ

10. Mɛɛ wekukpaa ebaka mlakwalɔ lɛ kɛ maŋkwramɔŋ nɔyelɔi ateŋ?

¹⁰ Yinɔsane tsɔɔ akɛ mɛi ni yɔɔ nɛkɛ mlakwamɔ gbɔmɔ kuu nɛɛ mli lɛ ejie hepupuumɔ kɛ henɔwomɔ kpo aahu akɛ yɛ anɔkwale mli lɛ amɛtsɔɔ nɔ ni esa akɛ je lɛŋ nɔyelɔi lɛ diɛŋtsɛ po afee. Akɛni amɛhɔlɔ tsɔɔmɔ ni ji ‘ŋwɛi hegbɛ ni maŋtsɛmɛi yɔɔ’ lɛ sɛɛ hewɔ lɛ, osɔfoi lɛ kɛɔ akɛ amɛji teŋdamɔlɔi ni he hiaa kɛha nɔyelɔi lɛ kɛ Nyɔŋmɔ. Amɛto maŋtsɛmɛi kɛ nɔyelɔi ni amɛkpa amɛ ni amɛnyɛɔ amɛtsɔɔ gbɔmɛi lɛ ayiŋ koni amɛfi nɔyelɔi lɛ asɛɛ loo amɛte shi amɛwo amɛ. Amɛkɛ enɛ feemɔ ekɛɛ, taakɛ bɔ ni Yudafoi osɔfonukpai ni kpoo Yesu lɛ kɛɛ lɛ: “Wɔbɛ maŋtsɛ ko akɛ ja Kaisare.” (Yohane 19:15) Ni kɛlɛ, Yesu tsɔɔ yɛ faŋŋ mli akɛ: “Mimaŋtsɛyeli lɛ jɛɛɛ je nɛŋ.”​—Yohane 18:⁠36.

11. Osɔfoi lɛ ewo amɛhe nɔ yɛ mɛɛ gbɛ nɔ?

¹¹ Bɔni afee ni amɛhole amɛhe nɔ kwraa kɛteke gbɔmɛi foji lɛ hewɔ lɛ, nɛkɛ mlakwamɔ kuu nɛɛ eŋɔ atade kroko amɛha amɛhe, titri lɛ nɔ ni ji ediŋ. Kɛfata he lɛ, amɛkɛ hewulamɔ nibii wujiwuji ewula amɛhe, kɛ emli akekerei, sɛŋmɔtsei, kɛ osɔfoi afaii. (Okɛto Mateo 23:​5, 6 he.) Shi Yesu kɛ esɛɛnyiɛlɔi lɛ bɛ atadei komɛi ni tamɔ nɛkɛ; amɛwoɔ atadei taakɛ bɔ ni gbɔmɛi foji lɛ nɔŋŋ woɔ lɛ. Agbɛnɛ osɔfoi lɛ hu eŋɔ sabalai tamɔ “Tsɛ,” “Tsɛ Krɔŋkrɔŋ,” “Mɔ ni Sa Woo,” “Mɔ ni Sa Woo fe Fɛɛ,” “Mɔ ni Sa Agbojee,” kɛ ekrokomɛi ni kɛ eko fataa ‘amɛhe nɔ ni amɛwoɔ kɛtekeɔ mɔ fɛɛ mɔ lɛ he.’ Ni kɛlɛ, nɔ ni Yesu tsɔɔ yɛ jamɔ mli sabalai ahe ji: “Nyɛkatsɛa mɔ ko nyɛtsɛ hu yɛ shikpɔŋ lɛ nɔ.” (Mateo 23:⁠9) Nakai nɔŋŋ yɛ be mli ni Elihu kãa Hiob osato miishɛjelɔi lɛ ahiɛ lɛ, ekɛɛ: “Mikwɛŋ mɔ ko mɔ ko hiɛ, ni asaŋ midɔkɔŋ minaa mihaŋ gbɔmɔ ko.”​—Hiob 32:⁠21.