‘Mlakwamɔ Gbɔmɔ lɛ’ Yɔsemɔ
“Aaajie mlakwalɔ lɛ kpo, mɔ ni Nuŋtsɔ Yesu kɛ edaaŋ mumɔ lɛ aaagbe.”—2 TESALONIKABII 2:8.
1, 2. Mɛni hewɔ ehe hiaa waa akɛ wɔyoo ‘esha loo mlakwamɔ gbɔmɔ’ lɛ?
MLAKWAMƆ be mli wɔyɔɔ nɛɛ. Eji nɔ ko ni anaa yɛ jeŋ fɛɛ. Asheɔ mlakwalɔi kɛ bɔ ni amɛwoɔ wɔgbɔmɔtsei kɛ nibii ni wɔyɔɔ lɛ he gbeyei lɛ gbeyei yɛ he fɛɛ he. Ni kɛlɛ, mlakwalɔ ko ni etsuɔ nii yɛ gbɛ nigii nɔ fe fɛɛ etee nɔ etsu nii afii ohai babaoo. Atsɛɔ lɛ yɛ Biblia lɛ mli akɛ ‘mlakwamɔ gbɔmɔ lɛ.’
2 Ehe miihia ni wɔyoo nɛkɛ mlakwamɔ gbɔmɔ nɛɛ. Mɛni hewɔ? Ejaakɛ etswa efai shi akɛ ebaafite shidaamɔ kpakpa ni wɔyɔɔ yɛ Nyɔŋmɔ hiɛ lɛ kɛ wɔhiɛnɔkamɔ kɛha naanɔ wala lɛ. Yɛ mɛɛ gbɛ nɔ? Kɛtsɔ ha ni eeeha wɔkpoo anɔkwale lɛ ni wɔhe amalei wɔye moŋ, koni etsɔ nɔ egbala wɔ kɛjɛ Nyɔŋmɔ ni wɔkɛ “mumɔ kɛ anɔkwale” aaasɔmɔ lɛ lɛ he lɛ nɔ. (Yohane 4:23) Anaa kɛjɛɔ enifeemɔi amli akɛ nɛkɛ mlakwamɔ nii nɛɛ teɔ shi ewoɔ Nyɔŋmɔ kɛ eyiŋtoi, kɛ agbɛnɛ ewebii ni ejɔɔ amɛhe nɔ amɛha lɛ lɛ.
3. Biblia lɛ gbalaa wɔjwɛŋmɔ kɛyaa mlakwalɔ lɛ nɔ yɛ mɛɛ gbɛ nɔ?
3 Biblia lɛ wieɔ nɛkɛ mlakwamɔ gbɔmɔ nɛɛ he yɛ 2 Tesalonikabii 2:3. Akɛni Nyɔŋmɔ mumɔ lɛ tsirɛɔ lɛ hewɔ lɛ, bɔfo Paulo ŋma akɛ: “Nyɛkahaa mɔ ko miishishiua nyɛ yɛ gbɛ ko gbɛ ko nɔ; ejaakɛ [Yehowa gbi ni ekɛbaakpata yiwalɛ nibii agbɛjianɔtoo nɛɛ hiɛ lɛ baŋ] ja Nyɔŋmɔ jamɔ kwamɔ lɛ eba fɛɛ da, ni ajie esha [mlakwamɔ] gbɔmɔ lɛ ni ji hiɛkpatamɔ bi lɛ kpo.” Paulo gba yɛ biɛ akɛ Nyɔŋmɔ jamɔ kwamɔ loo hemɔkɛyeli kwamɔ baaba kɛ mlakwamɔ gbɔmɔ lɛ dani gbɛjianɔtoo nɛɛ baaba enaagbee. Yɛ anɔkwale mli lɛ, Paulo tsɔɔ mli yɛ kuku 7 akɛ: “Ejaakɛ mlakwamɔ teemɔŋ sane lɛ miitsu nii momo.” No hewɔ lɛ nɛkɛ mlakwalɔ nɛɛ eje shishi eejie ehe kpo po yɛ klɛŋklɛŋ afi oha lɛ mli.
Mlakwamɔ Gbɔmɔ lɛ Shishijee
4. Namɔ je mlakwamɔ gbɔmɔ lɛ shishi ni efiɔ esɛɛ hu lɛ?
4 Namɔ je nɛkɛ mlakwamɔ gbɔmɔ nɛɛ shishi ni efiɔ esɛɛ hu lɛ? Paulo haa hetoo akɛ: “Mɔ hu ni ebaa lɛ mli lɛ eba kɛ Satan nitsumɔ ni mli wa yɛ amale hewalɛ kɛ okadii kɛ naakpɛɛ nii fɛɛ mli, kɛ nii ni ejaaa gbɛ fɛɛ ni akɛshishiuɔ mɛi ni laajeɔ lɛ, ejaakɛ amɛmɔɔɔ anɔkwale suɔmɔ lɛ mli ni akɛhere amɛyiwala.” (2 Tesalonikabii 2: 9, 10) No hewɔ lɛ Satan ji mlakwamɔ gbɔmɔ nɛɛ tsɛ kɛ mɔ ni lɛɔ lɛ. No hewɔ lɛ taakɛ bɔ ni Satan teɔ shi ewoɔ Yehowa, E-yiŋtoi, kɛ E-webii lɛ, nakai nɔŋŋ mlakwamɔ gbɔmɔ lɛ ji, kɛji akɛ ele looo eleee.
5. Mɛni mɛɔ mlakwalɔ lɛ kɛ mɛi ni nyiɛɔ esɛɛ lɛ?
5 Nɔ ni baa mlakwamɔ gbɔmɔ lɛ nɔ lɛ nɔŋŋ baaba mɛi ni nyiɛɔ esɛɛ lɛ hu anɔ—hiɛkpatamɔ: “Ni no dani aaajie mlakwalɔ lɛ kpo, mɔ ni Nuŋtsɔ Yesu kɛ edaaŋ mumɔ lɛ aaagbe, ni ekɛ ebaa lɛ puemɔ lɛ aaakpata ehiɛ.” (2 Tesalonikabii 2:8) Etsɛŋ kwraa ni nakai be ni akɛbaakpata mlakwamɔ gbɔmɔ lɛ kɛ esɛɛfilɔi (“mɛi ni laajeɔ”) lɛ ahiɛ lɛ baaba “beni aaajie Nuŋtsɔ Yesu kpo kɛaajɛ ŋwɛi kɛ ehewalɛ bɔfoi lɛ, mɔ ni kɛ lalilɛi aaatɔ owele yɛ mɛi ni leee Nyɔŋmɔ kɛ mɛi ni booo wɔ Nuŋtsɔ Yesu Kristo sanekpakpa lɛ toi lɛ anɔ lɛ, mɛi ni aaana nyɔmɔwoo ni ji naanɔ hiɛkpatamɔ.”—2 Tesalonikabii 1:6-9.
6. Mɛɛ saji krokomɛi Paulo haa wɔleɔ yɛ mlakwalɔ lɛ he?
6 Paulo tee nɔ etsɔɔ mɔ ni mlakwalɔ nɛɛ ji lɛ mli ekoŋŋ, akɛ: “Mɔ ni baate shi awo ehe nɔ ashi nɔ fɛɛ nɔ ni atsɛɔ nyɔŋmɔ loo nyɔŋmɔ jamɔ lɛ aahu ni lɛ diɛŋtsɛ eeeyata Nyɔŋmɔ we lɛ akɛ nyɔŋmɔ ko, ni eeetsɔ ehe akɛ lɛ ji Nyɔŋmɔ lɛ.” (2 Tesalonikabii 2:4) No hewɔ lɛ Paulo bɔ kɔkɔ akɛ Satan baatee mlakwalɔ ko shi, apasa nii ni ajaa lɛ tamɔ Nyɔŋmɔ, mɔ ni baawo ehe nɔ kɛteke Nyɔŋmɔ mla lɛ po.
Mlakwalɔ lɛ Yɔsemɔ
7. Mɛni haa wɔmuɔ sane naa akɛ jeee gbɔmɔ aŋkro ko he Paulo wieɔ lɛ, ni mlakwamɔ gbɔmɔ lɛ damɔ shi kɛha mɛni?
7 Ani Paulo miiwie gbɔmɔ aŋkro ko he? Dabi, ejaakɛ etsɔɔ mli akɛ nɛkɛ “gbɔmɔ” nɛɛ eje kpo yɛ Paulo gbii lɛ amli ni ebaaya nɔ ehi shi aahu kɛyashi Yehowa aaakpata ehiɛ yɛ gbɛjianɔtoo nɛɛ naagbee. No hewɔ lɛ, ehi shi afii ohai babaoo. Eka shi faŋŋ akɛ gbɔmɔ diɛŋtsɛ ko ehiko shi yɛ be kakadaŋŋ ni tamɔ nakai mli. No hewɔ lɛ wiemɔ “esha [mlakwamɔ] gbɔmɔ lɛ” baafee okadi nɔ ko, ni damɔ shi kɛha kuu ko loo gbɔmɛi akuu ko.
8. Namɔ ji mlakwamɔ gbɔmɔ lɛ, ni mɛni ji nibii komɛi ni yɔɔ ehe ni haa ayɔseɔ lɛ?
8 Namɛi ni? Odaseyeli lɛ tsɔɔ akɛ amɛji Kristendom osɔfoi ni taoɔ hiɛnyam ni woɔ amɛhe nɔ lɛ akuu lɛ, ni yɛ afi ohai abɔ ni eho lɛ amli lɛ amɛ diɛŋtsɛ amɛtsɔmɔ mla amɛha amɛhe lɛ. Abaanyɛ ana enɛ yɛ anɔkwale ni eji akɛ jamɔi kɛ jamɔ kui sɔrɔtoi akpei abɔ yɔɔ Kristendom, ni eko fɛɛ eko yɛ esɔfo, ni kɛlɛ amɛteɔ shi amɛwoɔ amɛhe ni amɛkɛ amɛhe kpaaa yɛ tsɔɔmɔi loo jamɔ nifeemɔi komɛi amli lɛ mli. Nɛkɛ mligbalamɔ shihilɛ nɛɛ yeɔ he odase yɛ faŋŋ mli akɛ amɛnyiɛɛɛ Nyɔŋmɔ mla lɛ sɛɛ. Amɛnyɛŋ amɛfee mɛi ni jɛ Nyɔŋmɔ ŋɔɔ. (Okɛto Mika 2:12; Marko 3:24; Romabii 16:17; 1 Korintobii 1:10 he.) Ni nɔ kome ni jeɔ kpo yɛ nɛkɛ jamɔi nɛɛ fɛɛ he ji akɛ amɛhiɛɛɛ Biblia mli tsɔɔmɔi lɛ amli, ni amɛku mla ni ji: “Mɔ ko akajwɛŋ fe nɔ ni aŋma lɛ” mli.—1 Korintobii 4:6; kwɛmɔ Mateo 15:3, 9, 14 hu.
9. Mɛɛ tsɔɔmɔi kɛ hemɔkɛyelii ni damɔɔɔ ŋmalɛ nɔ mlakwalɔ lɛ kɛbaye Biblia mli anɔkwalei anajiaŋ?
9 No hewɔ lɛ, nɛkɛ mlakwalɔ nɛɛ feɔ gbɔmɛi akuu ko: Kristendom jamɔ mli osɔfoi lɛ. Amɛ fɛɛ, kɛji akɛ amɛji paapai, osɔfoi, blematsɛmɛi, loo Protestant shiɛlɔi lɛ, Kristendom jamɔ mli eshai lɛ ahe sɔ ka amɛnɔ. Amɛkɛ Nyɔŋmɔ anɔkwalei lɛ etsake wɔŋjalɔi amalei, amɛtsɔɔ tsɔɔmɔi ni bɛ ŋmalɛ mli tamɔ adesa susuma ni gbooo, hɛl la, hetsuumɔ he, kɛ Triniti. Amɛtamɔ jamɔ mli hiɛnyiɛlɔi lɛ ni Yesu kɛ amɛ wie nɛkɛ lɛ: “Nyɛtsɛ ni nyɛjɛ emli ji Abonsam, ni nyɛtsɛ lɛ tsinebaa nii nyɛsumɔɔ akɛ nyɛfee. . . . Amalelɔ kɛ malemɔtsɛ ji lɛ.” (Yohane 8:44) Amɛ nifeemɔi lɛ hu kpaa amɛhe mama akɛ mlakwalɔi, ejaakɛ amɛkɛ amɛhe woɔ nifeemɔi ni kuɔ Nyɔŋmɔ mlai amli lɛ mli. Mɛnɛɛmɛi ji mɛi ni Yesu kɛɛ: “Nyɛjea minɔ nyɛyaa, nyɛ mɛi ni nyɛtsuɔ nii ni ejaaa gbɛ lɛ.”—Mateo 7:21-23.
Amɛwoɔ Amɛhe Nɔ
10. Mɛɛ wekukpaa ebaka mlakwalɔ lɛ kɛ maŋkwramɔŋ nɔyelɔi ateŋ?
10 Yinɔsane tsɔɔ akɛ mɛi ni yɔɔ nɛkɛ mlakwamɔ gbɔmɔ kuu nɛɛ mli lɛ ejie hepupuumɔ kɛ henɔwomɔ kpo aahu akɛ yɛ anɔkwale mli lɛ amɛtsɔɔ nɔ ni esa akɛ je lɛŋ nɔyelɔi lɛ diɛŋtsɛ po afee. Akɛni amɛhɔlɔ tsɔɔmɔ ni ji ‘ŋwɛi hegbɛ ni maŋtsɛmɛi yɔɔ’ lɛ sɛɛ hewɔ lɛ, osɔfoi lɛ kɛɔ akɛ amɛji teŋdamɔlɔi ni he hiaa kɛha nɔyelɔi lɛ kɛ Nyɔŋmɔ. Amɛto maŋtsɛmɛi kɛ nɔyelɔi ni amɛkpa amɛ ni amɛnyɛɔ amɛtsɔɔ gbɔmɛi lɛ ayiŋ koni amɛfi nɔyelɔi lɛ asɛɛ loo amɛte shi amɛwo amɛ. Amɛkɛ enɛ feemɔ ekɛɛ, taakɛ bɔ ni Yudafoi osɔfonukpai ni kpoo Yesu lɛ kɛɛ lɛ: “Wɔbɛ maŋtsɛ ko akɛ ja Kaisare.” (Yohane 19:15) Ni kɛlɛ, Yesu tsɔɔ yɛ faŋŋ mli akɛ: “Mimaŋtsɛyeli lɛ jɛɛɛ je nɛŋ.”—Yohane 18:36.
11. Osɔfoi lɛ ewo amɛhe nɔ yɛ mɛɛ gbɛ nɔ?
11 Bɔni afee ni amɛhole amɛhe nɔ kwraa kɛteke gbɔmɛi foji lɛ hewɔ lɛ, nɛkɛ mlakwamɔ kuu nɛɛ eŋɔ atade kroko amɛha amɛhe, titri lɛ nɔ ni ji ediŋ. Kɛfata he lɛ, amɛkɛ hewulamɔ nibii wujiwuji ewula amɛhe, kɛ emli akekerei, sɛŋmɔtsei, kɛ osɔfoi afaii. (Okɛto Mateo 23:5, 6 he.) Shi Yesu kɛ esɛɛnyiɛlɔi lɛ bɛ atadei komɛi ni tamɔ nɛkɛ; amɛwoɔ atadei taakɛ bɔ ni gbɔmɛi foji lɛ nɔŋŋ woɔ lɛ. Agbɛnɛ osɔfoi lɛ hu eŋɔ sabalai tamɔ “Tsɛ,” “Tsɛ Krɔŋkrɔŋ,” “Mɔ ni Sa Woo,” “Mɔ ni Sa Woo fe Fɛɛ,” “Mɔ ni Sa Agbojee,” kɛ ekrokomɛi ni kɛ eko fataa ‘amɛhe nɔ ni amɛwoɔ kɛtekeɔ mɔ fɛɛ mɔ lɛ he.’ Ni kɛlɛ, nɔ ni Yesu tsɔɔ yɛ jamɔ mli sabalai ahe ji: “Nyɛkatsɛa mɔ ko nyɛtsɛ hu yɛ shikpɔŋ lɛ nɔ.” (Mateo 23:9) Nakai nɔŋŋ yɛ be mli ni Elihu kãa Hiob osato miishɛjelɔi lɛ ahiɛ lɛ, ekɛɛ: “Mikwɛŋ mɔ ko mɔ ko hiɛ, ni asaŋ midɔkɔŋ minaa mihaŋ gbɔmɔ ko.”—Hiob 32:21.
12. Namɔ Paulo kɛɛ osɔfoi lɛ sɔmɔɔ lɛ lɛ?
12 Beni Paulo tsɔɔ yɛ egbii lɛ amli akɛ mlakwamɔ gbɔmɔ lɛ eje enitsumɔ lɛ shishi momo lɛ, ewie yɛ mɛi ni jieɔ nakai mlakwalɔ lɛ su kpo lɛ ahe akɛ: “Ejaakɛ nɛkɛ mɛi nɛɛ ji amale bɔfoi, nitsulɔi shishiulɔi ni tsakeɔ amɛhe feɔ Kristo bɔfoi. Ni enɛ bɛ naakpɛɛ tete; ejaakɛ Satan diɛŋtsɛ tsakeɔ ehe etsɔɔ la bɔfo; no hewɔ lɛ kɛ esɔɔlɔi lɛ hu tsakeɔ amɛhe amɛfeɔ tamɔ jalɛ sɔɔlɔi lɛ, ejeee nɔ ko wulu ko; amɛ lɛ amɛnaagbee baafee bɔ ni amɛnitsumɔi lɛ yɔɔ lɛ.”—2 Korintobii 11:13-15.
Atua ni Atseɔ Ashiɔ Anɔkwa Jamɔ
13. Mɛni ji Nyɔŋmɔ jamɔ kwamɔ loo hemɔkɛyeli kwamɔ ni Paulo tsi ta lɛ?
13 Paulo kɛɛ akɛ nɛkɛ mlakwamɔ gbɔmɔ nɛɛ baapue kɛ Nyɔŋmɔ jamɔ kwamɔ loo hemɔkɛyeli kwamɔ. Yɛ anɔkwale mli lɛ, nɔ ni Paulo ha ale klɛŋklɛŋ ni akɛbaayoo nɛkɛ mlakwamɔ kuu nɛɛ ji akɛ “Nuŋtsɔ [Yehowa] lɛ gbi lɛ [be ni Yehowa kɛbaakpata yiwalɛ nibii agbɛjianɔtoo nɛɛ hiɛ lɛ baŋ] . . . ja Nyɔŋmɔ jamɔ kwamɔ [hemɔkɛyeli kwamɔ] lɛ eba fɛɛ da.” (2 Tesalonikabii 2:2, 3) Shi mɛni ji “Nyɔŋmɔ jamɔ kwamɔ loo hemɔkɛyeli kwamɔ” lɛ shishi? Yɛ ŋmalɛ nɛɛ mli lɛ, etsɔɔɔ mumɔŋ gbɔjɔmɔ ni haa agbaa afa. Hela wiemɔ ni akɛtsu nii yɛ biɛ aha “Nyɔŋmɔ jamɔ kwamɔ” loo hemɔkɛyeli kwamɔ lɛ tsɔɔ kɛfata nibii krokomɛi ahe lɛ, “kpa ni akpaa mɔ ko sɛɛ nyiɛmɔ” aloo “bei kɛ maŋsɔ.” Shishitsɔɔmɔi pii kɛ wiemɔ “atuatsemɔ” tsuɔ nii. William Barclay shishitsɔɔmɔ lɛ jaje akɛ: “Nakai gbi lɛ nyɛŋ aba kɛyashi be mli ni Atuatsemɔ Kpeteŋkpele lɛ eba da.” The Jerusalem Bible lɛ tsɛɔ lɛ “Maŋsɔ kɛ Bei Kpeteŋkpele lɛ.” No hewɔ lɛ, yɛ nɔ ni Paulo wieɔ he nɛɛ hewɔ lɛ, “Nyɔŋmɔ jamɔ kwamɔ” loo hemɔkɛyeli kwamɔ lɛ tsɔɔ maŋsɔ kɛ bei loo atua ni atseɔ ashiɔ anɔkwa jamɔ.
14. Mɛɛ be mli Nyɔŋmɔ jamɔ kwamɔ loo hemɔkɛyeli kwamɔ lɛ je shishi diɛŋtsɛ?
14 Te fee tɛŋŋ ni nɛkɛ Nyɔŋmɔ jamɔ kwamɔ loo hemɔkɛyeli kwamɔ, nɛkɛ atuatsemɔ nɛɛ je shishi hu? Paulo ŋma yɛ “nɔ ni tsiɔ” mlakwalɔ lɛ “ekpojiemɔ lɛ gbɛ” lɛ he yɛ egbii lɛ amli yɛ 2 Tesalonikabii 2:6. Mɛni ji enɛ? No ji bɔfoi lɛ anaatsii hewalɛ lɛ. Shihilɛ mli ni amɛyɔɔ yɛ no beaŋ, kɛ hewalɛ nikeenii ni amɛyɔɔ ni mumɔ krɔŋkrɔŋ lɛ kɛha amɛ lɛ tsi Nyɔŋmɔ jamɔ kwamɔ loo hemɔkɛyeli kwamɔ naa koni ekatsɔ tsɛŋemɔ hela ko ni egbɛ eshwa. (Bɔfoi lɛ Asaji 2:1-4; 1 Korintobii 12:28) Shi beni bɔfoi lɛ gboi pɛ, aaafee klɛŋklɛŋ afii oha lɛ naagbee lɛ, kɛkɛ ni ajie nibii ni tsiɔ gbɛ lɛ.
Osɔfoi Akuu ni Damɔɔɔ Ŋmalɛ nɔ je Shishi
15. Mɛɛ gbɛjianɔ Yesu to kɛha Kristofoi asafo lɛ?
15 Asafo ni Yesu to lɛ tee ehiɛ yɛ klɛŋklɛŋ afi oha lɛ mli yɛ onukpai (nɔkwɛlɔi) kɛ asafoŋ sɔɔlɔi lɛ agbɛtsɔɔmɔ shishi. (Mateo 20:25-27; 1 Timoteo 3:1-13; Tito 1:5-9) Ahala mɛnɛɛmɛi kɛjɛ asafo lɛ mli. Amɛji mumɔŋ gbɔmɛi ni ji hii ni yɔɔ nyɛmɔ ni bɛ Nyɔŋmɔ jamɔ he nikasemɔ skul tsɔsemɔ krɛdɛɛ ko, taakɛ bɔ ni Yesu hu bɛ tsɔsemɔ ko ni tamɔ nakai lɛ. Yɛ anɔkwale mli lɛ, mɛi ni teɔ shi woɔ lɛ lɛ anaa kpɛ amɛhe ni amɛkɛɛ: “Te mɔ nɛ ni ekaseko nii lɛ fee tɛŋŋ ni ele woji amli nii nɛɛ?” (Yohane 7:15) Agbɛnɛ jamɔ mli nɔyelɔi lɛ wie nakai nɔŋŋ yɛ bɔfoi lɛ ahe akɛ: “Agbɛnɛ beni amɛna Petro kɛ Yohane ekaa lɛ ni amɛyoo akɛ jeee woloŋlelɔi kɛ nilelɔi komɛi ji amɛ lɛ, efee amɛhiɛ yaa, ni amɛkɔ sɛɛ akɛ amɛkɛ Yesu hi shi.”—Bɔfoi lɛ Asaji 4:13.
16. Hemɔkɛyeli kwamɔ loo Nyɔŋmɔ jamɔ kwamɔ lɛ gba afa kɛjɛ klɛŋklɛŋ afi oha lɛ mli Kristofoi anɔkwɛmɔ nɔ kɛha asafoŋ gbɛjianɔtoo lɛ he yɛ mɛɛ gbɛ nɔ?
16 Shi kɛlɛ, hemɔkɛyeli kwamɔ loo Nyɔŋmɔ jamɔ kwamɔ lɛ kɛ susumɔi ni ana kɛjɛ Yudafoi osɔfoi lɛ kɛ agbɛnɛ yɛ naagbee lɛ kɛjɛ Roma wɔŋjamɔ gbɛjianɔtoo lɛ mli lɛ ba. Beni be shwieɔ mli ni atsiɔ he kɛjɛɔ anɔkwa hemɔkɛyeli lɛ he lɛ, osɔfoi akuu ko ni damɔɔɔ ŋmalɛ nɔ je kpo. Paapa ni awo lɛ maŋtsɛ loo akɛ akekere ebu lɛ je shishi akɛ eeeye osɔfonukpai akuu ko, ni amɛ hu ahala amɛ kɛjɛ bishop kɛ archbishop ni ji osɔfonukpai ohai abɔ lɛ ateŋ ni amɛ hu ana amɛ kɛjɛ osɔfoi askul tsɔsemɔ mli lɛ anɔ. No hewɔ lɛ, klɛŋklɛŋ afii oha lɛ sɛɛ etsɛɛɛ kwraa ni osɔfoi akuu ko ni tamɔ teemɔŋ sane baye nɔ yɛ Kristendom. Nɛkɛ kuu nɛɛ efeee enii tamɔ klɛŋklɛŋ afii oha lɛ mli Kristofoi onukpai kɛ asafoŋ sɔɔlɔi lɛ, shi moŋ amɛ nifeemɔ tamɔ wɔŋjalɔi agbɛjianɔtoi lɛ.
17. Mɛɛ be mli titri mlakwalɔ lɛ hewalɛ lɛ mli bawa fe fɛɛ ni efee shiŋŋ hu?
17 Mra mli yɛ Ŋ.B. afii ohai etɛ lɛ mli ni aba heyelilɔi ashi afee amɛ kuu ni ji enyɔ ni ji toibolɔi. Kɛkɛ ni mlakwamɔ gbɔmɔ ni ekwa hemɔkɛyeli loo Nyɔŋmɔ jamɔ lɛ ŋɔ hewalɛ fiofio yɛ nɛkɛ gbɛ nɔ. Nɛkɛ hewalɛ nɛɛ mli bawa waa loo ebafee kpɛŋŋ yɛ Roma maŋtsɛ Konstantino nɔyeli beaŋ, titri lɛ yɛ Nikea Gwabɔɔ ni afee yɛ 325 Ŋ.B. lɛ sɛɛ. Kɛkɛ ni Sɔlemɔ lɛ kɛ Maŋ lɛ bafee ekome. Kɛkɛ ni mlakwamɔ gbɔmɔ lɛ—Kristendom osɔfoi lɛ—batsɔmɔ Nyɔŋmɔ jamɔ kwalɔi loo hemɔkɛyeli kwalɔi akuu kakadaŋŋ ni amɛhi shi yɛ afii ohai abɔ lɛ amli ni amɛtse atua amɛshi anɔkwa Nyɔŋmɔ ni ji Yehowa lɛ. Mlai kɛ gbɛjianɔtoi ni amɛnyiɛ sɛɛ lɛ ji amɛ diɛŋtsɛ amɛnɔ shi jeee Nyɔŋmɔ nɔ.
Tsɔɔmɔi ni jɛ Wɔŋjamɔ Mli
18. Mɛɛ wɔŋjalɔi amusubɔɔ tsɔɔmɔi mlakwalɔ lɛ kpɛlɛ nɔ?
18 Bɔ ni mlakwamɔ gbɔmɔ lɛ tee nɔ eda lɛ hu ha eyaba wɔŋjalɔi atsɔɔmɔi. Akɛ nɔkwɛmɔ nɔ lɛ, akɛ Triniti nyɔŋmɔ ko ni he yɔɔ naakpɛɛ ni anuuu shishi bato Mɔ kome pɛ ni kɛɔ akɛ: “Miji Yehowa, migbɛi ji no, ni mikɛ minunyam lɛ haŋ mɔ kroko, ni mikɛ miyijiemɔ lɛ hu haŋ amagai,” kɛ “Miji Yehowa, ni mɔ ko bɛ dɔŋŋ, misɛɛ lɛ Nyɔŋmɔ ko Nyɔŋmɔ ko bɛ” lɛ najiaŋ. (Yesaia 42:8; 45:5) Nɛkɛ adesa loo wɔŋjalɔi ajwɛŋmɔi ni akɛto Nyɔŋmɔ anɔkwalei lɛ anajiaŋ lɛ mli lɛɛ aahu kɛyashi akɛ musubɔɔ kroko bafata he: jamɔ ni akɛhaa Biblia mli Maria ni baa ehe shi lɛ akɛ Kristendom “Nyɔŋmɔ Nyɛ.” No hewɔ lɛ, mɛi ni kɛ nɛkɛ apasa tsɔɔmɔi nɛɛ baa lɛ, osɔfoi akuu lɛ, batsɔmɔ “jwɛi” ni Satan du koni ekɛbɔ mɔdɛŋ ni ekɛha dumɔ wui kpakpai ni Kristo du lɛ anɔ lɛ ateŋ oti.—Mateo 13:36-39.
19. Kristendom mli egbala kɛtsɔ afii ohai abɔ lɛ amli yɛ mɛɛ gbɛ nɔ, shi mɛni amɛtee nɔ amɛmɔ mli nakai nɔŋŋ?
19 Yɛ be mli ni mligbalamɔi kɛ kui bibii afeemɔ yaa nɔ lɛ, Kristendom kumɔ ni emli gbala efee jamɔ kui sɔrɔtoi ohai abɔ. Shi jamɔ kuu hee fɛɛ jamɔ kuu hee hiɛ emligbalamɔ ni ji osɔfoi akuu kɛ toibolɔi akuu lɛ mli, ja fioo ko pɛ. No hewɔ lɛ abaa mlakwamɔ gbɔmɔ kuu lɛ yi koni ekalaaje aahu kɛbashi ŋmɛnɛ gbi nɛɛ. Ni eka he ewoɔ ehe nɔ kɛtekeɔ gbɔmɛi foji lɛ yɛ atadei ni haa esoroɔ lɛ kɛ esabalai wujiwuji ni eŋɔhã ehe lɛ hewɔ. Anaa yɛ faŋŋ mli akɛ, jeee sane he Paulo woɔ yɛ be mli ni ekɛɛ akɛ mlakwamɔ gbɔmɔ kuu lɛ baawo lɛ diɛŋtsɛ ehiɛ nyam ni ewo ehe nɔ kɛyashɛ gbɛhe ko ni tamɔ nyɔŋmɔ nɔ lɛ.
Paapa Gbɛhe Lɛ
20. Te Katolek woji kɛ amɛŋmalalɔi tsɔɔ bɔ ni paapa lɛ ji lɛ mli amɛha tɛŋŋ?
20 Nɛkɛ hiɛnyamwoo nɛɛ he nɔkwɛmɔ nɔ ji Roma paapa lɛ gbɛhe lɛ. Osɔfoi awiemɔi komekomei ashishitsɔɔmɔ wolo ni Lucio Ferraris ŋma yɛ Italia lɛ tsɔɔ bɔ ni paapa lɛ ji lɛ mli akɛ “bɔ ni eji mɔ ni sa woo kɛ agbojee ha sɔŋŋ hewɔ lɛ jeee gbɔmɔ ko kɛkɛ eji, shi moŋ taakɛ eji lɛ Nyɔŋmɔ hu, kɛ Nyɔŋmɔ Najiaŋdamɔlɔ.” Ekekere lɛ ji akekere ŋtai etɛ, “akɛ ŋwɛi, kɛ shikpɔŋ kɛ hɛl nɔ maŋtsɛ.” Nakai wiemɔi komekomei ashishitsɔɔmɔ wolo lɛ nɔŋŋ tee nɔ akɛ: “Taakɛ eji lɛ, paapa lɛ ji Nyɔŋmɔ yɛ shikpɔŋ nɔ, Kristo anɔkwafoi lɛ ateŋ lumɔ kome pɛ, maŋtsɛmɛi amaŋtsɛ ni da fe fɛɛ.” Ekɛfata he akɛ: “Yɛ bei komɛi amli lɛ paapa lɛ baanyɛ ate shi awo ŋwɛi mla.” Agbɛnɛ, The New Catholic Dictionary lɛ wie yɛ paapa lɛ he akɛ: “Ni ebɔfoi loo enajiaŋdamɔlɔi lɛ baa klɛŋklɛŋ loo amɛnɔ kwɔlɔ fe maji krokomɛi anɔ bɔfoi akuu lɛ mli bii.”
21. Okɛ paapa lɛ nifeemɔi ni esoro no yɛ Petro kɛ ŋwɛibɔfo ko nifeemɔi ahe lɛ ato he ni akwɛ
21 Yɛ bei babaoo mli lɛ paapa lɛ woɔ atadei wuyawuyaai ni esumɔɔ adesai ayijiemɔi, shi enɛ tamɔɔɔ Yesu kaselɔi lɛ. Paapa lɛ ŋmɛɔ gbɛ koni gbɔmɛi akula shi yɛ ehiɛ, amɛshɔ ewao ga, ni amɛtere lɛ yɛ amɛ kɔɔji anɔ yɛ sɛi krɛdɛɛ ko mli. Mɛɛ yaka anunyam taomɔ paapai lɛ ejie lɛ kpo yɛ afii ohai abɔ lɛ amli nɛkɛ! Esoro enɛ kwraa yɛ Petro heshibalɔ lɛ ni kɛɛ Kornelio, Roma asraafoi ohaiatsɛ ni kula shi yɛ Petro najianaa koni eja lɛ lɛ he: “Tee shi odamɔ shi, . . . gbɔmɔ folo kɛkɛ ji mi”! (Bɔfoi lɛ Asaji 10:25, 26, Katolekbii a-Jerusalem Bible lɛ.) Ni kwɛ bɔ ni esoro paapa lɛ yɛ bɔfo lɛ ni kɛ Kpojiemɔ ha bɔfo Yohane lɛ he! Yohane bɔ mɔdɛŋ koni ekulashi ni eja nakai bɔfo lɛ, shi bɔfo lɛ jaje akɛ: “Kaakwɛ ni ofee! Ejaakɛ onaanyo tsulɔ kɛ onyɛmimɛi kɛ gbalɔi kɛ mɛi ni toɔ nɛkɛ wolo nɛɛ mli wiemɔi lɛ ateŋ mɔ ko ji mi. Nyɔŋmɔ moŋ oja.”—Kpojiemɔ 22:8, 9.
22. Mɛɛ Ŋmalɛ naa mla abaanyɛ adamɔ nɔ ni akɛyoo mlakwalɔ lɛ?
22 Ani bɔ ni awieɔ osɔfoi akuu lɛ he ahaa nɛɛ mli wa tsɔ? Wɔbaanyɛ wɔna enɛ kɛtsɔ mla ni Yesu kɛha ni no nɔ aaatsɔ ayoo apasa gbalɔi lɛ kɛ nitsumɔ nɔ: “Amɛ yibii lɛ nyɛkɛaale amɛ.” (Mateo 7:15, 16) Belɛ mɛni ji yibii ni osɔfoi lɛ ewo yɛ afii ohai abɔ lɛ amli kɛ agbɛnɛ wɔ diɛŋtsɛ hu wɔ afii ohai 20 nɛɛ mli? Mɛni baaba nɛkɛ mlakwamɔ gbɔmɔ nɛɛ nɔ, ni namɛi baana nɔ ni baaba enɔ nɛɛ eko? Mɛɛ gbɛnaa nii ka mɛi ni sheɔ Nyɔŋmɔ gbeyei diɛŋtsɛ lɛ anɔ yɛ nɛkɛ mlakwalɔ nɛɛ he? Nikasemɔ ni nyiɛ sɛɛ lɛ baasusu nɛkɛ saji otii nɛɛ ahe.
Sanebimɔi Ni Akɛtiɔ Mli
◻ Mɛni ji mlakwamɔ gbɔmɔ lɛ, ni mɛɛ be mli ayoo Iɛ?
◻ Biblia lɛ haa ayɔseɔ mlakwamɔ kuu nɛɛ shishitolɔ lɛ yɛ mɛɛ gbɛ nɔ?
◻ Osɔfoi lɛ ehole amɛhe nɔ kɛteke gbɔmɛi Iɛ yɛ mɛɛ gbɛ nɔ?
◻ Mɛɛ hemɔkɛyeli kwamɔ tsɔɔmɔi kɛ nifeemɔi osɔfoi akuu Iɛ kɛba?
◻ Paapai Iɛ asubaŋ yɛ sɔrɔto yɛ Petro kɛ ŋwɛi bɔfo ko nɔ he yɛ mɛɛ gbɛ nɔ?
[Mfoniri ni yɔɔ baafa 6]
Bɔfo Petro, ni tamɔɔɔ paapai Iɛ eŋmɛɛɛ gbɛ koni adesa ko aja lɛ