Nii Ni Aaakase Kɛaajɛ Nyɔŋmɔ Jamɔ Hetuu-Kɛhamɔ Teemɔŋ Sane Krɔŋkrɔŋ Lɛ Mli
“Ejaakɛ Kristo hu na amanehulu eha nyɛ ni ekɛto okadi efɔ shi eha nyɛ, koni nyɛnyiɛ enanemaa hei lɛ asɛɛ.”—1 PETRO 2:21.
1. Mɛni fee Yehowa yiŋtoo yɛ ‘Nyɔŋmɔ jamɔ hetuu-kɛhamɔ mli teemɔŋ sane krɔŋkrɔŋ’ lɛ he?
“NYƆŊMƆ jamɔ hetuu-kɛhamɔ teemɔŋ sane krɔŋkrɔŋ” nɛɛ jeee teemɔŋ sane dɔŋŋ! (1 Timoteo 3:16, New World Translation) Kwɛ bɔ ni eyɔɔ sɔrɔto kwraa yɛ apasa jamɔŋ teemɔŋ saji tamɔ triniti teemɔŋ sane, ni ka he eji teemɔŋ sane lɛ he. Mɔ ko mɔ ko nyɛŋ anu shishi! Shi moŋ, Yehowa eto eyiŋ akɛ esa akɛ teemɔŋ sane krɔŋkrɔŋ ni ajie lɛ kpo yɛ Yesu Kristo he lɛ afee nɔ ni esa akɛ aha mɛi fɛɛ anu he. Yesu diɛŋtsɛ batsɔ Nyɔŋmɔ Maŋtsɛyeli lɛ he ekaa shiɛlɔ he nɔkwɛmɔ nɔ ni ekaaa. Wɔbaanyɛ wɔkase nii babaoo kɛjɛ esane lɛ mli kɛ agbɛnɛ gbɛ ni etsɔ nɔ eshiɛ lɛ mli taakɛ bɔ ni wɔbaana agbɛnɛ lɛ.
2. Mɛni hewɔ akɛ Yesu sɔɔmɔ nitsumɔ lɛ yeɔ kpɔmɔ nɔ lɛ hiɛ lɛ? (Mateo 20:28)
2 Nyɛhaa wɔsusua Yesu ni “jie ehe shi yɛ faŋŋ yɛ heloo mli” lɛ he ekoŋŋ. (1 Timoteo 3:16) Wɔkaneɔ yɛ Mateo 20:28 akɛ Yesu “baaa ni asɔmɔ lɛ, shi ebasɔmɔ moŋ, ni eŋɔ esusuma lɛ eha yɛ mɛi pii akpɔmɔ lɛ hewɔ.” Enɛ po kɛ esɔɔmɔ nitsumɔ lɛ yeɔ kpɔmɔ nɔ lɛ hiɛ. Mɛni hewɔ? Ojogbaŋŋ, yɛ Eden tɔɔ lɛ, Onufu ni le ŋaa lɛ eje jeŋ muu fɛɛ maŋtsɛ ni Yehowa ji yɛ adesai anɔ ni ja lɛ he ŋwane, ni eetsɔɔ akɛ tɔmɔ yɛ Nyɔŋmɔ nibɔɔ lɛ he ni akɛ kɛ gbɔmɔ baje kaa shishi lɛ enyɛŋ ehiɛ emuuyeli mli eha Ŋwɛi Flooflonyo lɛ. (Okɛto Hiob 1:6-12; 2:1-10 he.) Yesu sɔɔmɔ nitsumɔ ni tɔmɔ ko bɛ he akɛ gbɔmɔ ni yeɔ emuu lɛ, “naagbee Adam” lɛ tsɔɔ akɛ Satan mpoatswalɔ lɛ ji amalelɔ kɛ yiwalɔ. (1 Korintobii 15:45) Agbɛnɛ, Yesu jie ehe kpo akɛ eji mɔ ni sa kwraa akɛ esɔmɔɔ Nyɔŋmɔ akɛ ‘Najiaŋdamɔlɔ Nukpa kɛ Yiwalaherelɔ’ koni ‘ekojo jeŋ muu lɛ fɛɛ yɛ jalɛ naa,’ ni ekɛbu jeŋ muu fɛɛ maŋtsɛ ni Yehowa ji lɛ bem.—Bɔfoi lɛ Asaji 5:31; 17:31.
3. Mɛɛ gbɛ nɔ Yesu ha Satan mpoatswaa lɛ fɛɛ hetoo yɛ?
3 Yesu ha Satan ahorabɔɔ ni ekɛtswaa mpoa lɛ fɛɛ hetoo akɛ ebɛ mli! Mɔ ko mɔ ko bɛ shikpɔŋ nɛɛ nɔ yɛ yinɔsane be fɛɛ mli ni sɔmɔ Nyɔŋmɔ yɛ hetuu-kɛhamɔ ni tamɔ nakai mli—yɛ hefɛoyelii, yii, gbɔmɔtsoŋ kɛ jwɛŋmɔŋ piŋmɔi lɛ fɛɛ sɛɛ. Ehe bahia ni Kristo aŋmɛ etsui shi yɛ ahorabɔɔ kɛ musubɔɔ fɛɛ mli akɛ Nyɔŋmɔ Bi. Etsɔ fɛɛ mli—kɛbote yiwalɛ kɛ hiɛgbele mli gbele mli—ni yɛ fɛɛ mli lɛ edamɔ shi shiŋŋ ni anyɛɛɛ agbala lɛ kɛjɛ anɔkwa ni eyeɔ e-Tsɛ lɛ he. Paulo ŋma yɛ Filipibii 2:8, 9 akɛ akɛni Yesu bo toi ‘kɛtee gbele mli, hɛɛ, kɛtee sɛŋmɔtso nɔ gbele mli hewɔ lɛ, Nyɔŋmɔ wo enɔ gojoo ni eha lɛ gbɛi ni fe gbɛi fɛɛ gbɛi.’ Yesu kpa Satan kɛ amalelɔ ni ehiii kwraa ni eji lɛ he mama!
4. Mɛni hewɔ Yesu baanyɛ akɛɛ Pilato akɛ eba je lɛ mli koni ebaye anɔkwale lɛ he odase lɛ?
4 No hewɔ lɛ, yɛ be mli ni afii fioo ni ekɛshiɛ dɛŋdɛŋ lɛ eba naagbee lɛ, Yesu baanyɛ ekɛ ekaa aye Pontio Pilato odase akɛ: “Okɛɛ; ejaakɛ maŋtsɛ ji mi. Belɛ, enɛ hewɔ afɔ mi ni enɛ hewɔ nɔŋŋ miba je lɛ mli, koni mibaye anɔkwale lɛ he odase. Mɔ fɛɛ mɔ ni jɛ anɔkwale lɛ mli lɛ nuɔ migbee.” (Yohane 18:37) Yesu ejie Nyɔŋmɔ jamɔ hetuu-kɛhamɔ ni fe fɛɛ yɛ Nyɔŋmɔ Maŋtsɛyeli anɔkwale lɛ jajemɔ kɛmiikpa Palestina fɛɛ lɛ kpo. Etsɔse ekaselɔi lɛ ni amɛ hu amɛfee shiɛlɔi ni yɔɔ ekaa. Kwɛ bɔ ni enɔkwɛmɔ nɔ lɛ woɔ wɔ hewalɛ koni wɔnyiɛ enanemaa hei lɛ asɛɛ ŋmɛnɛ!
Nii ni Wɔɔkase Kɛaajɛ Wɔ Nɔkwɛmɔ nɔ lɛ Ŋɔɔ
5. Mɛni wɔbaanyɛ wɔkase yɛ hetuu-kɛhamɔ ni Nyɔŋmɔ gbeyeishemɔ yɔɔ kɛtsɔ Yesu ni wɔɔkwɛ lɛ jogbaŋŋ lɛ nɔ lɛ he?
5 Wɔ hu wɔbaanyɛ wɔtsɔ wɔ-Nyɔŋmɔ jamɔ hetuu-kɛhamɔ yɛ Yehowa suɔmɔnaa nifeemɔ mli lɛ nɔ wɔha Abonsam atsɔ amalelɔ. Yɛ kaai fɛɛ ni wɔɔna mli amanehulu lɛ fɛɛ sɛɛ lɛ, eko kwraa bɛ ni kɛ piŋmɔ kɛ nisenianii ni Yesu kɛkpe lɛ baaye egbɔ. Belɛ nyɛhaa wɔkaseɔ nii kɛjɛa wɔ Nɔkwɛmɔ nɔ lɛ ŋɔɔ. Taakɛ Hebribii 12:1, 2 woɔ wɔ hewalɛ lɛ, eba akɛ wɔkɛ tsuishiŋmɛɛ aaada foi lɛ ni “wɔkwɛ hemɔkɛyeli shishijelɔ kɛ naagbelɔ ni ji Yesu lɛ.” Akɛ mɔ ni tamɔɔɔ Adam ni yeee omanye yɛ be mli ni aka lɛ yɛ Nyɔŋmɔ jamɔ hetuu-kɛhamɔ he lɛ, Yesu batsɔ gbɔmɔ kome pɛ ni yɔɔ shikpɔŋ nɔ ni ye kaai lɛ fɛɛ mli omanye yɛ emuuyeli mli. Efee nakai kɛtee gbele mli, akɛ “mɔ ni he tse, ni efɔŋ ko bɛ ehe, ni ehe bɛ kpa ko, ni etsi ehe kɛjɛ eshafeelɔi ahe.” (Hebribii 7:26) Ebaanyɛ ekɛɛ ehenyɛlɔi lɛ yɛ emuuyeli ni tɔmɔ ko kwraa bɛ mli lɛ mli akɛ: “Nyɛteŋ namɔ kaa mi yɛ esha ko hewɔ?” Yesu fɔ mpoa etswa Satan, ni ejaje akɛ: “Je lɛ nɔyelɔ lɛ . . . bɛ minɔ hewalɛ.” Ni yɛ be mli ni ekɛ enaagbee wiemɔ ni ekɛhaa ekaselɔi lɛ baa naagbee dani atsɔɔ esɛɛgbɛ ni amɔ lɛ lɛ, ekɛɛ amɛ akɛ: “Nyɛnaa ekaa! Miye je lɛ nɔ kunim.”—Yohane 8:46; 14:30; 16:33, New World Translation.
6. (a) Mɛni hewɔ Yesu le nɔ hejɔɔmɔ ni he hiaa adesai lɛ? (b) Yesu jie Nyɔŋmɔ jamɔ mli gbeyeishemɔ kpo kɛyashɛ nɛgbɛ?
6 Yesu kpa nɔ ni adesa ji lɛ shi yɛ heloo mli beni eyɔɔ shikpɔŋ nɛɛ nɔ lɛ, ni “aba lɛ shi fioo fe ŋwɛibɔfoi lɛ.” (Hebribii 2:7, New World Translation) Ebayoo adesa gbɔjɔmɔi no hewɔ lɛ asaa lɛ jogbaŋŋ akɛ mɔ ni baanyɛ asɔmɔ akɛ adesai a-Maŋtsɛ kɛ Kojolɔ kɛha afi akpe. Nɛkɛ Nyɔŋmɔ Bi nɛɛ ni kɛɛ akɛ “Nyɛbaa miŋɔɔ, nyɛ mɛi fɛɛ ni etɔ nyɛ ni nyɛjatsui fe nyɛ lɛ, ni maha nyɛ hejɔɔmɔ” lɛ le nɔ hejɔɔmɔ ni he hiaa adesai (Mateo 11:28) Hebribii 5:7-9 kɛɔ wɔ akɛ: “Eheloo gbii lɛ amli lɛ eŋɔ sɔlemɔi kɛ faikpamɔi ni bolɔmɔ ni naa wa kɛ yaafonui fata he esha afɔle eha mɔ ni yɔɔ hewalɛ ni ekɛaahere lɛ kɛaajɛ gbele mli lɛ, ni abo lɛ toi hu, ejaakɛ ebuɔ Nyɔŋmɔ; ni tsɛ Nyɔŋmɔ bi ji lɛ moŋ, shi ekase toiboo yɛ amanehului ni ena lɛ amli, ni akɛni ehi kɛwula shi [yɛ toiboo mli] hewɔ lɛ, etsɔ mɔ ni naanɔ yiwalaheremɔ jɛɔ ehaa mɛi fɛɛ ni boɔ lɛ toi lɛ.” Yesu Kristo he kpokpooo, eyɛ mli akɛ ehe bahia ni eŋmɛ etsui shi kɛyashi be mli ni akɛ adesa gbele aaatsurɔ lɛ yɛ ‘enanetsitsi pilamɔ’ ni jɛ Onufu hetsɛlɔ lɛ dɛŋ lɛ mli. (1 Mose 3:15) Eba akɛ taakɛ Yesu ji lɛ, wɔ hu wɔɔya nɔ wɔjie Nyɔŋmɔ jamɔ mli gbeyeishemɔ kpo yɛ bei fɛɛ mli kɛyashi gbele mli po kɛ ehe miihia, kɛ hekɛnɔfɔɔ akɛ Yehowa Nyɔŋmɔ baabo wɔsɔlemɔi atoi ni ehere wɔyiwala.
‘Wɔhiɛ ni Aaakamɔ Kɛha Jalɛ’
7. Taakɛ 1 Petro 2:21-24 tsɔɔ lɛ, mɛɛ nɔkwɛmɔ nɔ Kristo kɛfɔ shi eha wɔ, ni te esa akɛ eshihilɛ gbɛ lɛ asa wɔhe aha tɛŋŋ?
7 Beni eyɔɔ heloo mli lɛ, Yesu kɛ anɔkwayeli jie Nyɔŋmɔ jamɔ hetuu-kɛhamɔ teemɔŋ sane lɛ kpo. Wɔkaneɔ yɛ 1 Petro 2:21-24 akɛ: “Kristo hu na amanehulu eha nyɛ ni ekɛto okadi efɔ shi eha nyɛ, koni nyɛnyiɛ enanemaa hei lɛ asɛɛ, lɛ mɔ ni efeee esha, ni asaŋ anaaa apasa yɛ edaaŋ lɛ, mɔ ni, beni ajɛɔ lɛ lɛ, ejɛɛɛ mɔ ko etooo najiaŋ, beni enaa amanehulu lɛ, elomɔɔɔ mɔ ko, shi moŋ etu esane ewo mɔ ni kojoɔ yɛ jalɛ naa lɛ dɛŋ; mɔ ni lɛ diɛŋtsɛ etere wɔhe eshai lɛ yɛ egbɔmɔtso lɛ mli kɛtee sɛŋmɔtso lɛ nɔ, koni wɔgboi wɔha esha ni wɔhiɛ akamɔ aha jalɛ.” Yɛ be mli ni wɔsusuɔ Yesu shihilɛ gbɛ lɛ he lɛ, kwɛ bɔ ni ewoɔ wɔ hewalɛ koni wɔtiu Nyɔŋmɔ jamɔ hetuu-kɛhamɔ, ni wɔhiɛ wɔ emuuyeli mli, koni wɔhi shi wɔha jalɛ taakɛ efee lɛ.
8. Te wɔɔfee tɛŋŋ wɔhi shi wɔha jalɛ taakɛ Yesu fee lɛ?
8 Yɛ anɔkwale mli lɛ Yesu hi shi eha jalɛ diɛŋtsɛ. Lala 45:8 gba yɛ ehe akɛ: “Osumɔɔ jalɛ ni onyɛɔ nifɔjianii.” Yɛ be mli ni ekɛ nakai wiemɔi lɛ toɔ Yesu he lɛ, bɔfo Paulo wie yɛ Hebribii 1:9 akɛ: “Osumɔɔ jalɛ ni onyɛɔ efɔŋfeemɔ.” Yɛ bɔ ni wɔnu Nyɔŋmɔ jamɔ hetuu-kɛhamɔ teemɔŋ sane nɛɛ shishi wɔha lɛ hewɔ lɛ, eba akɛ wɔ hu wɔɔsumɔ nɔ ni ja ni wɔnyɛ efɔŋ tamɔ Yesu yɛ bei fɛɛ mli. Yɛ Kristofoi ajeŋbai, ni ŋmɛnɛ Satan je lɛ tutuaa lɛ waa yɛ bei fɛɛ mli nɛɛ, kɛ agbɛnɛ yɛ wɔnifeemɔi kɛ mɛi ni yɔɔ Nyɔŋmɔ gbɛjianɔtoo lɛ mli kɛ esɛɛ fɛɛ lɛ agbɛfaŋ lɛ, nyɛhaa wɔtswaa wɔfai shi akɛ wɔbaahi shi wɔha jalɛ nifeemɔ, ni wɔmɔ Yehowa shishitoo mlai ni ja lɛ amli kpɛŋŋ. Ni nyɛhaa wɔyaa nɔ wɔkasea Nyɔŋmɔ Wiemɔ lɛ daa koni wɔna shishinamɔ ni Nyɔŋmɔ gbeyeishemɔ yɔɔ mli ni he hiaa koni wɔnyɛ wɔte shi wɔwo Satan kɛ eŋaatsɔɔi lɛ!
9. Mɛni hu fata ekaa ni Yesu jie lɛ kpo yɛ sɔɔmɔ nitsumɔ lɛ mli lɛ he, ni enɛ kɔɔ mɛni he yɛ apasa jamɔ mli tookwɛlɔi lɛ ahe?
9 Nɔ kroko ni fata he kanya Yesu koni efee ekaa yɛ esɔɔmɔ nitsumɔ lɛ mli. Mɛni ji no? Wɔkaneɔ yɛ Mateo 9:36 akɛ: “Shi beni ena mɛi babaoo lɛ, emusuŋ tsɔ lɛ yɛ amɛ hewɔ, akɛni etɔ amɛ ni amɛfee yuuyaa tamɔ tooi ni bɛ kwɛlɔ lɛ.” No hewɔ lɛ Yesu “bɔi amɛ nibii pii tsɔɔmɔ.” (Marko 6:34) Nɔ ni fata enɛ he ni he hiaa ji apasa jamɔ tookwɛlɔi lɛ anɔ fɔŋ feemɔ kɛ mlakwamɔ lɛ ni aaakpa he mama. Taakɛ Mateo 15:7-9 tsɔɔ lɛ. Yesu kɛɛ mɛnɛɛmɛi ateŋ mɛi komɛi akɛ: “Osatofoi! Gbɛnaa pɛ Yesaia gba yɛ nyɛhewɔ akɛ: ‘Maŋ nɛɛ kɛ amɛnaabu woɔ mi; shi amɛtsui etsi ehe kɛjɛ mihe kɛtee shɔŋŋ. Shi yakatswaa amɛjaa mi lɛ, ejaakɛ amɛtsɔɔ tsɔɔmɔi ni ji gbɔmɛi akitai.’”
Teemɔŋ Sane ni Yɔɔ Mɔbɔ ni Ahiɔ
10. Ŋmɛnɛ, “mlakwamɔ teemɔŋ sane” nɛɛ gbalaa jwɛŋmɔ kɛyaa namɛi anɔ, ni amɛye mɛni he fɔ?
10 Taakɛ bɔ ni Yesu wie eshi apasa jamɔ mli hiɛnyiɛlɔi lɛ, nakai nɔŋŋ ŋmɛnɛ wɔ hu wɔhiɔ teemɔŋ sane ni yɔɔ sɔrɔto kwraa yɛ Nyɔŋmɔ jamɔ mli hetuu-kɛhamɔ teemɔŋ sane krɔŋkrɔŋ lɛ he lɛ. Paulo tsɛ enɛ yɛ 2 Tesalonikabii 2:7 akɛ “mlakwamɔ teemɔŋ sane lɛ.” Eji teemɔŋ sane yɛ Ŋ.B. klɛŋklɛŋ afii oha lɛ mli, ejaakɛ ajieŋ lɛ kpo aahu kɛyashi bɔfoi lɛ agbele sɛɛ be kakadaŋŋ. Ŋmɛnɛ, egbalaa jwɛŋmɔ kɛyaa Kristendom osɔfoi, ni nyaa maŋkwramɔ he babaoo fe ni amɛaajaje Nyɔŋmɔ jalɛ Maŋtsɛyeli lɛ he sanekpakpa lɛ nɔ. Osatofeemɔ egbɛ eshwa babaoo yɛ amɛteŋ. Televishin nɔ sanekpakpashiɛlɔi ni jɛ Kristendom Protestant jamɔi sɔrɔtoi lɛ amli lɛ ji enɛɛmɛi ahe nɔkwɛmɔ nii ni jeɔ kpo faŋŋ: mɛi ni kwaa amɛfeɔ amɛhe helatsalɔi ni yeɔ amɛtooi lɛ ahe nii, ni buaa ninamɔ ni shɛɔ dɔlai akpekpei toi abɔ naa kɛbɔleɔ amɛhe, ni kɛ ajwamaŋi bɔɔ, ni kwaa amɛfɔɔ loo amɛwoɔ yara yɛ be mli ni akpaa amɛhe mama, ni yaa nɔ amɛbaa shika, shika yɛ bei fɛɛ mli. Roman Katolek Vatican lɛ hu shihilɛ bɛ fɛo nakai nɔŋŋ ejaakɛ ekɛ ehe woɔ maŋkwramɔ mli vii, kɛ kponɔ gbɛ agbojee kɛ woo ni ajieɔ lɛ kpo atsɔɔ, kɛ shikatoo hei amli nifeemɔi ni ekpɔtɔ.
11. Mɛni baaba Kristendom osɔfoi lɛ kɛ mɛi krokomɛi fɛɛ ni yɔɔ Babilon Kpeteŋkpele lɛ mli lɛ anɔ?
11 Ŋwanejee ko bɛ he akɛ no hewɔ ni ayoo Kristendom osɔfoi akuu lɛ akɛ “mlakwamɔ gbɔmɔ” loo esha gbɔmɔ lɛ. (2 Tesalonikabii 2:3) Abaakpa nɛkɛ Babilon Kpeteŋkpele lɛ fa ni tamɔ ajwamaŋ ni ehe gbɛi nɛɛ he mama kɛmɔ shi ni akpata ehiɛ kwraa kɛ apasa jamɔi krokomɛi ni eshwɛ lɛ fɛɛ. Ye be mli ni wɔkaneɔ yɛ Kpojiemɔ 18:9-17 lɛ, maŋkwralɔi kɛ jarayelɔi (kɛ amɛ shikatolɔi) baawo yara yɛ amɛ hewɔ akɛ: “Kpoo, kpoo, maŋ kpeteŋkpele lɛ!” Abaajie Babilon Kpeteŋkpele lɛ kɛ eteemɔŋ saji lɛ akpo yɛ faŋŋ mli, ni ana akɛ esoro enɛ kwraa yɛ nibii fɛɛ ni haa Nyɔŋmɔ jamɔ hetuu-kɛhamɔ teemɔŋ sane krɔŋkrɔŋ lɛ kpɛɔ kaŋkaŋ lɛ he.
12. Suɔmɔ ni Yesu yɔɔ kɛha jalɛ lɛ nyiɛ ehiɛ koni efee mɛni?
12 Bɔ ni Yesu sumɔɔ jalɛ ni enyɛɔ nɔ fɔŋ feemɔ loo mlakwamɔ lɛ tsirɛ lɛ ni emia ehiɛ ni enaaa ehe mɔbɔ yɛ anɔkwa jamɔ he. Yɛ be mli ni etee eyasara Yerusalem klɛŋklɛŋ akɛ Nyɔŋmɔ Bi ni afɔ lɛ mu lɛ, eshwie jarayelɔi lɛ kɛ shikatsakelɔi lɛ kɛje sɔlemɔ we lɛ, ni ejaje akɛ: “Nyɛjiea nii nɛɛ kɛjea biɛ, nyɛkaŋɔa mitsɛ we lɛ nyɛfea jara nɔ.” (Yohane 2:13-17) Yɛ sɛɛ mli be kroko ni eyasara sɔlemɔ we lɛ, Yesu kɛɛ Yudafoi ni teɔ shi woɔ lɛ lɛ akɛ: “Nyɛ lɛ nyɛtsɛ ni nyɛjɛ emli ji Abonsam, ni nyɛtsɛ lɛ tsinebaa nii nyɛsumɔɔ akɛ nyɛfee. Lɛ lɛ gbɔmɔgbelɔ ji lɛ kɛjɛ teteete, ni edamɔɔɔ anɔkwale lɛ mli, ejaakɛ anɔkwale bɛ emli. Kɛ eemale lɛ, lɛ diɛŋtsɛ enii ahe ewieɔ, ejaakɛ amalelɔ kɛ malemɔtsɛ ji lɛ.” (Yohane 8:44) Kwɛ ekaa ni Yesu jie lɛ kpo akɛ ekɛɛ nɛkɛ Nyɔŋmɔ jalɔi nɛɛ yɛ amɛhiɛ akɛ amɛji amalelɔi kɛ Abonsam bii!
13. (a) Nɛgbɛ titri ajie bɔ ni Yesu nyɛɔ mlakwamɔ lɛ kpo atsɔɔ yɛ? (b) Mɛni hewɔ osɔfoi ni ekwa mla lɛ sa kojomɔ ni tamɔ nɔ ni Yesu jaje eshwie woloŋmalɔi lɛ kɛ Farisifoi lɛ anɔ lɛ?
13 He ko bɛ ni atsɔɔ bɔ ni Yesu nyɛɔ nɔ fɔŋ feemɔ lɛ mli aha jogbaŋŋ fe ewiemɔi ni ekɛshi woloŋmalɔi lɛ kɛ Farisifoi lɛ ni tamɔ onufui lɛ taakɛ aŋma afɔ shi yɛ Mateo yitso 23 lɛ. Jɛmɛ ji he ni etsi “kpoo” sɔrɔtoi kpawo ta etsɔɔ amɛ ni ekɛ amɛ to ‘gbohii abui ni asha he eyɛŋ—ni nihii nii sɔrɔtoi fɛɛ, osatofeemɔ, kɛ mlakwamɔ eyi mli obɔ’ lɛ he. Kwɛ bɔ ni Yesu shweɔ akɛ eeejie gbɔmɛi ni awaa amɛ yi lɛ kɛje nakai mlakwamɔ loo nɔ fɔŋ feemɔ lɛ mli! Ebolɔ akɛ, “Yerusalem, Yerusalem, . . . shii enyiɛ mitao akɛ kulɛ mibuaa obii anaa tamɔ bɔ ni wuɔ buaa ebii anaa ewoɔ efiji ashishi lɛ, shi nyɛkpɛlɛɛɛ! Naa, aaashi nyɛwe lɛ amaŋfɔ aha nyɛ!” (Kukuji 37, 38) Kojomɔ ni tamɔ nakai sa osɔfoi mlakwalɔi kɛ nɔ fɔŋ feelɔi ni yɔɔ wɔgbii nɛɛ amli lɛ, ejaakɛ taakɛ 2 Tesalonikabii 2:12 tsɔɔ lɛ, ‘amɛheee anɔkwale lɛ amɛyeee, shi moŋ amɛnyaa nibii ni ejaaa gbɛ lɛ moŋ he.’ Amɛ mlakwamɔ kɛ nɔ fɔŋ feemɔ lɛ teɔ shi ewoɔ Nyɔŋmɔ jamɔ hetuu-kɛhamɔ ni Yesu kɛ anɔkwayeli jie lɛ kpo babaoo yɛ be mli ni eyɔɔ shikpɔŋ nɛɛ nɔ lɛ.
Nyɔŋmɔ Kojomɔi lɛ ni Ajajeɔ Atsɔɔ
14. Esa akɛ hiɛsɔɔ kɛha Nyɔŋmɔ jamɔ hetuu-kɛhamɔ teemɔŋ sane krɔŋkrɔŋ lɛ atsirɛ wɔ ni wɔfee mɛni?
14 Esa akɛ hiɛsɔɔ ni wɔyɔɔ wɔhaa Nyɔŋmɔ jamɔ hetuu-kɛhamɔ teemɔŋ sane krɔŋkrɔŋ lɛ anyiɛ wɔhiɛ yɛ bei fɛɛ mli koni wɔnyiɛ Yesu nanemaa hei lɛ asɛɛ kpaakpa. Esa akɛ wɔfee ekaa tamɔ lɛ, yɛ nɔ ni Yesaia 61:2 tsɔɔ mli lɛ jajemɔ mli akɛ: “Yehowa duromɔ afi kɛ wɔ-Nyɔŋmɔ lɛ oweletɔɔ gbi” lɛ. Ni eba akɛ wɔkɛ ekaa aaafee wɔ gbɛfaŋnɔ ni “wɔshɛje ŋkɔmɔyelɔi fɛɛ mii.” Taakɛ eji yɛ be mli ni Yesu yɔɔ shikpɔŋ nɛɛ nɔ lɛ, nakai nɔŋŋ ebiɔ ekaafeemɔ ŋmɛnɛ koni wɔjaje Yehowa kojomɔi lɛ, ni shɛɛ sane ni mli wawai ni Buu-Mɔɔ mli saji lɛ kɛ wolo ni ji Revelation—Its Grand Climax At Hand! lɛ jieɔ lɛ kpo lɛ fata he lɛ. Esa akɛ wɔshiɛ kɛ ekaa kɛ ŋaa, koni wɔwiemɔi lɛ afee nɔ ni “ŋoo yɔɔ mli” bɔni afee ni eŋɔɔ mɛi ni sumɔɔ jalɛ nifeemɔ lɛ naa. (Kolosebii 4:6) Akɛni wɔkase nii kɛjɛ Yesu nɔkwɛmɔ nɔ ni kɔɔ Nyɔŋmɔ jamɔ hetuu-kɛhamɔ he lɛ mli hewɔ lɛ, eba akɛ wɔɔnyɛ wɔbɔ amaniɛ yɛ be ni sa mli akɛ wɔgbe nitsumɔ ni Yehowa kɛha wɔ lɛ naa.—Mateo 24:14; Yohane 17:4.
15. Mɛni eba kɛjɛ 1914 yɛ Nyɔŋmɔ jamɔ teemɔŋ sane krɔŋkrɔŋ lɛ he?
15 Mɛɛ Nɔkwɛlɔ kpakpa ni ekaaa Yesu ji yɛ be mli ni ejie ehe kpo yɛ heloo mli lɛ nɛkɛ! Kwɛ bɔ ni Nyɔŋmɔ jamɔ hetuu-kɛhamɔ mli teemɔŋ sane krɔŋkrɔŋ lɛ ba mli faŋŋ yɛ emli! Kwɛ bɔ ni ekɛ ekaa wo Yehowa gbɛi lɛ nɔ gojoo eha! Ni kwɛ bɔ ni Yesu Tsɛ lɛ hu wo lɛ nyɔmɔ yɛ emuuyeli mli hiɛmɔ gbɛ ni etsɔ nɔ yɛ naakpɛɛ gbɛ nɔ lɛ hewɔ! Shi babaoo fata Nyɔŋmɔ teemɔŋ sane krɔŋkrɔŋ lɛ he. Kɛjɛ 1914 kɛbaa nɛɛ “Nuŋtsɔ lɛ gbi” lɛ mli wɔyɔɔ nɛɛ. (Kpojiemɔ 1:10) Taakɛ Kpojiemɔ 10:7 jaje lɛ, be eshɛ ni esa akɛ ‘agbe Nyɔŋmɔ teemɔŋ sane krɔŋkrɔŋ lɛ naa.’ Ŋwɛi gbee ejaje agbɛnɛ akɛ: “Je nɛŋ maŋtsɛyeli lɛ etsɔ wɔ-Nuŋtsɔ [Yehowa] lɛ kɛ e-Kristo (mɔ ni efɔ lɛ mu lɛ) nɔ, ni eeeye maŋtsɛ kɛaatee naanɔi anaanɔ.” (Kpojiemɔ 11:15) Yehowa ewo Mesia Maŋtsɛ, Yesu Kristo maŋtsɛ, yɛ enunyam maŋtsɛsɛi lɛ nɔ koni ebafata E-he akɛ nɔyelɔ hefatalɔ!
16. Yɛ mɛɛ gbɛ nɔ Maŋtsɛ ni awo lɛ ehee, Yesu Kristo, kɛ oyaiyeli tsɔɔ bɔ ni esumɔɔ ni Nyɔŋmɔ gbeyeishemɔ ahi ŋwɛi lɛ yɛ enɛ gbɛfaŋ?
16 Akɛ Nyɔŋmɔ hefatalɔ nɔyelɔ yɛ Maŋtsɛyeli ni ato lɛ ehee lɛ mli lɛ, atsɛɔ Yesu hu akɛ Mikael (eshishi ji “Namɔ Tamɔ Nyɔŋmɔ?”). Atuatselɔ ko bɛ ni baanyɛ atamɔ Nyɔŋmɔ, ni Maŋtsɛ ni awo lɛ ehee lɛ kɛ oyaiyeli fee enɛ he nɔkwɛmɔ kɛtsɔ shwiemɔ ni eshwie shishijee Onufu, Satan, kɛ ebɔfoi lɛ kɛjɛ ŋwɛi eshwie shikpɔŋ nɔ lɛ nɔ. (Kpojiemɔ 12:7-9) Hɛɛ, Yesu buɔ gbeyeishemɔ ni aaana aha Nyɔŋmɔ yɛ ŋwɛi, taakɛ ejie hetuu-kɛhamɔ ni Nyɔŋmɔ gbeyeishemɔ yɔɔ mli lɛ kpo yɛ be mli ni eyɔɔ shikpɔŋ lɛ nɔ lɛ. Yesu Kristo ni awo ehiɛ nyam lɛ ejɔŋ ehe kɛyashi be mli ni eeekpata apasa jamɔ fɛɛ hiɛ kwraa ni etsumɔ Satan gbɛjianɔtoo lɛ, nɔ ni anaa kɛ nɔ ni anaaa lɛ fɛɛ kɛjɛ shihilɛ mli.
17. Kɛjɛ 1914 kɛbaa nɛɛ, mɛni baa ni haa Mateo 25:31-33 baa mli?
17 Kɛjɛ 1914 kɛbaa nɛɛ, Yesu diɛŋtsɛ gbalɛ ni yɔɔ Mateo 25:31-33 lɛ mlibaa eha Nyɔŋmɔ teemɔŋ sane krɔŋkrɔŋ nɛɛ ekpɛ kaŋkaŋ. Jɛmɛ ji he ni Yesu jaje akɛ: “Shi beni gbɔmɔ bi lɛ aaaba yɛ enunyam lɛ mli, ni bɔfoi krɔŋkrɔŋi lɛ fɛɛ aaafata ehe lɛ, no mli eeeta enunyam sɛi lɛ nɔ; ni aaabua jeŋmaji lɛ fɛɛ naa yɛ ehiɛ, ni eeegbala amɛmli, taakɛ bɔ ni tookwɛlɔ gbalaa gwantɛŋi kɛ abotiai amli lɛ. Ni eeeŋɔ gwantɛŋi lɛ edamɔ eninejurɔ nɔ, shi abotiai lɛ, eeeŋɔ amɛ edamɔ ebɛku nɔ.” Nɛkɛ anunyam Maŋtsɛ, Kojolɔ, kɛ Hefalɔ ni diɔ Nyɔŋmɔ jamɔ hetuu-kɛhamɔ sɛɛ nɛɛ baajɛ he ni eyɔɔ ni kwɔ grɔŋŋ yɛ ŋwɛi lɛ ni ekɛ oweletɔɔ baaba, klɛŋklɛŋ lɛ yɛ mlakwamɔ gbɔmɔ lɛ kɛ Babilon Kpeteŋkpele lɛ mli fai krokomɛi lɛ anɔ, kɛ agbɛnɛ mɛi ni eshwɛ lɛ fɛɛ ni tamɔ abotiai ni fiɔ Satan yiwalɛ shikpɔŋ nɔ gbɛjianɔtoo lɛ sɛɛ lɛ anɔ. Kɛkɛ lɛ akɛ Satan baawo bu kwɔŋkwɔŋ lɛ mli. (Kpojiemɔ 20:1-3) Shi mɛi ni tamɔ gwantɛŋi ni ji “jalɔi” lɛ baaya naanɔ wala mli. (Mateo 25:46) Eba akɛ Nyɔŋmɔ jamɔ hetuu-kɛhamɔ sɛɛ ni odiɔ lɛ baaha obaje nakai kuu ni ja lɛ mli!
18. Mɛɛ hegbɛ ni miishɛɛ yɔɔ mli wɔyɔɔ ni kɔɔ Nyɔŋmɔ jamɔ hetuu-kɛhamɔ teemɔŋ sane krɔŋkrɔŋ lɛ he?
18 Kpojiemɔ 19:10 (New World Translation) woɔ wɔ hewalɛ koni “wɔja Nyɔŋmɔ.” Yɛ mɛni hewɔ? Ŋmalɛi lɛ yaa nɔ akɛ: “Ejaakɛ Yesu he odase ni ayeɔ lɛ ji nɔ ni kanyaa gbalɛ.” No hewɔ lɛ, blema bei amli gbalɛi pii ni jɛ mumɔŋ lɛ yeɔ Yesu he odase! Ni nɛkɛ gbalɛi nɛɛ eba mli, ni Nyɔŋmɔ teemɔŋ sane krɔŋkrɔŋ lɛ mli efee faŋŋ ni emli etse keŋkeŋ. No hewɔ lɛ wɔmli filiɔ wɔ, akɛ wɔɔle akɛ nɛkɛ Nyɔŋmɔ jamɔ hetuu-kɛhamɔ mli teemɔŋ sane krɔŋkrɔŋ nɛɛ baje kpo diɛŋtsɛ yɛ Yesu mli. Belɛ wɔna hegbɛ ni yɔɔ naakpɛɛ akɛ wɔɔnyiɛ enanemaa hei asɛɛ akɛ Nyɔŋmɔ Maŋtsɛyeli lɛ he sɔɔlɔi ni baa amɛhe shi. Hɛɛ, awo wɔhiɛ nyam akɛ wɔna enɛ he shishinumɔ lɛ mli gbɛfaŋnɔ ni wɔjaje Nyɔŋmɔ teemɔŋ sane krɔŋkrɔŋ lɛ fɛɛ ni kɔɔ sanekpakpa lɛ he lɛ wɔtsɔɔ!
Te Obaaha Hetoo Oha Tɛŋŋ?
◻ Mɛni wɔbaanyɛ wɔkase kɛjɛ Yesu Nyɔŋmɔ jamɔ hetuu-kɛhamɔ he nɔkwɛmɔ nɔ lɛ mli?
◻ Te wɔɔfee tɛŋŋ wɔhi shi wɔha jalɛ taakɛ Kristo fee lɛ?
◻ Mɛɛ teemɔŋ sane ni ahiɔ yɔɔ sɔrɔto kwraa yɛ Nyɔŋmɔ jamɔ hetuu-kɛhamɔ mli teemɔŋ sane krɔŋkrɔŋ lɛ he?
◻ Esa akɛ hiɛsɔɔ ni wɔyɔɔ kɛha Nyɔŋmɔ jamɔ hetuu-kɛhamɔ teemɔŋ sane krɔŋkrɔŋ lɛ atsirɛ wɔ ni wɔfee mɛni?
[Mfoniri ni yɔɔ baafa 9]
Akɛ Nyɔŋmɔ Jamɔ hetuu-kɛhamɔ hefalɔ kɛ Maŋtsɛyeli lɛ jajelɔ ekaalɔ lɛ, Yesu baanyɛ akɛɛ Pilato akɛ: “Enɛ hewɔ nɔŋŋ miba je lɛ mli, koni mibaye anɔkwale Iɛ he odase”
[Mfoniri ni yɔɔ baafa 11]
Yesu jie e-Nyɔŋmɔ jamɔ hetuu-kɛhamɔ lɛ kpo yɛ be mli ni ejaje fɔbuu wiemɔi eshi woloŋmalɔi lɛ kɛ Farisifoi Iɛ
[Baafa 14]January Daa Gbi Ŋmalɛ
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)