Yehowa Wiemɔ lɛ Hiɛ Kã
Tesalonikabii Awoji lɛ kɛ Timoteo Woji lɛ Amli Saji Otii
KƐJƐ beni bɔfo Paulo tee Tesalonika ni eyato asafo yɛ jɛmɛ lɛ, shiteekɛwoo sɔŋŋ asafo lɛ kɛkpe. No hewɔ lɛ, beni Timoteo ní no mli lɛ eye fe afii 20 lɛ ku esɛɛ kɛjɛ Tesalonika ní ebabɔ amɛhe amaniɛ kpakpa lɛ, enɛ tsirɛ Paulo ni eŋma wolo emaje Tesalonikabii lɛ koni ekɛjie amɛyi ní ekɛwo amɛ hewalɛ. Paulo ŋma wolo nɛɛ aaafee afi 50 Ŋ.B. naagbee gbɛ, ni no ji woji ni akɛ mumɔ tsirɛ lɛ kɛŋmala lɛ ateŋ klɛŋklɛŋ nɔ̃. No sɛɛ etsɛɛɛ lɛ, eŋma wolo ni ji enyɔ emaje Kristofoi ni yɔɔ Tesalonika lɛ. Etsɔ wolo nɛɛ nɔ ejaje susumɔ ni ejaaa ni mɛi komɛi hiɛ lɛ, ni ewo nyɛmimɛi lɛ hewalɛ koni amɛfi shi yɛ hemɔkɛyeli lɛ mli.
Aaafee afii nyɔŋma sɛɛ lɛ, no mli lɛ Paulo yɛ Makedonia ni Timoteo hu yɛ Efeso. Paulo ŋma wolo emaje Timoteo, ni ewo lɛ hewalɛ ni ehi Efeso koni eya nɔ eye ebua nyɛmimɛi lɛ ni amɛkɛ Yehowa teŋ wekukpãa lɛ mli awa koni apasa tsɔɔlɔi ni yɔɔ asafo lɛ mli lɛ akaha amɛdu gbɛ. Paulo ŋma wolo ni ji enyɔ emaje Timoteo beni abɔi Kristofoi lɛ ayiwaa yɛ la ko ni je ní kpata nibii ahiɛ yɛ Roma maŋ lɛ mli yɛ afi 64 Ŋ.B. lɛ sɛɛ lɛ. No ji woji ni akɛ mumɔ tsirɛ lɛ kɛŋmala lɛ ateŋ naagbee nɔ̃. Wɔbaanyɛ wɔná hewalɛwoo kɛ ŋaawoo ní yɔɔ Paulo woji ejwɛ nɛɛ amli lɛ ahe sɛɛ ŋmɛnɛ.—Heb. 4:12.
‘NYƐSHIA KPE’
Paulo jie Tesalonikabii lɛ ayi yɛ ‘amɛhemɔkɛyeli nitsumɔ lɛ, amɛsuɔmɔ mɔdɛŋbɔɔ lɛ, kɛ amɛtsuishitoo lɛ’ hewɔ. Ekɛɛ amɛ akɛ, amɛji ‘ehiɛnɔkamɔ kɛ emiishɛɛ kɛ eshwaa akekre.’—1 Tes. 1:3; 2:19.
Paulo kɛɛ Kristofoi ni yɔɔ Tesalonika lɛ koni amɛkɛ gbohiiashitee he hiɛnɔkamɔ lɛ ashɛjeshɛjee amɛmii, ni ekɛshi sɛɛ akɛ: ‘Yehowa gbi lɛ baaba tamɔ julɔ baa nyɔɔŋ lɛ.’ Ewo amɛ ŋaa ní ‘amɛshi kpe’ ní amɛhiɛ akã shi.—1 Tes. 4:16-18; 5:2, 6.
Ŋmalɛ Naa Sanebimɔi ni Aha Hetoo:
4:15-17—Namɛi ‘asháa yɛ atatui amli kɛyaa Nuŋtsɔ lɛ kpeemɔ yɛ kɔɔyɔɔ mli’ lɛ, ni te enɛ baa lɛ ehaa tɛŋŋ? Amɛji Kristofoi ni afɔ amɛ mu ní yɔɔ wala mli beni awo Kristo maŋtsɛ lɛ. Amɛkɛ ‘Nuŋtsɔ Yesu kpeɔ’ yɛ ŋwɛi ní anyɛɛɛ akɛ hiŋmɛi ana jɛmɛ lɛ. Shi dani eeeba lɛ nakai lɛ ja amɛgboi ní atée amɛ shi ákɛ mumɔŋ bɔɔnii dã. (Rom. 6:3-5; 1 Kor. 15:35, 44) Akɛni Kristo eje enɔyeli lɛ shishi momo hewɔ lɛ, Kristofoi ni gboɔ ŋmɛnɛ lɛ eyaaa nɔ amɛhiii shi akɛ gbohii. ‘Ashaa amɛ’ loo ateɔ amɛshi amrɔ nɔŋŋ.—1 Kor. 15:51, 52.
5:23—Mɛni Paulo tsɔɔ beni esɔle akɛ ‘abaa nyɛmimɛi lɛ amumɔ kɛ amɛsusuma kɛ amɛgbɔmɔtso muu lɛ fɛɛ yi lɛ.’ Mumɔ, susuma kɛ gbɔmɔtso ní Paulo wieɔ he lɛ damɔ shi kɛha Kristofoi asafo kɛ emli bii babaoo lɛ, ní Kristofoi ni yɔɔ Tesalonika ni akɛ mumɔ efɔ amɛ mu lɛ hu fata he lɛ. Yɛ nɔ najiaŋ ní eeesɔle ni abaa asafo lɛ yi kɛkɛ lɛ, esɔle moŋ koni abaa asafo lɛ ‘mumɔ’ loo jwɛŋmɔ ní amɛhiɛ lɛ yi. Esɔle eha asafo lɛ susuma, ni damɔ shi kɛha shihilɛ mli ni asafo lɛ yɔɔ lɛ hu, kɛ ‘gbɔmɔtso’ lɛ ni ji Kristofoi ni afɔ amɛ mu lɛ. (1 Kor. 12:12, 13) Sɔlemɔ nɛɛ haa wɔnaa akɛ Paulo susuɔ asafo lɛ he diɛŋtsɛ.
Nibii ni Wɔkaseɔ Kɛjɛɔ Mli:
1:3, 7; 2:13; 4:1-12; 5:15. Kɛ́ ŋaawoo aaafee nɔ ni mɔɔ shi jogbaŋŋ lɛ, belɛ esa akɛ ajie mɔ ni awoɔ lɛ ŋaa lɛ yi ní awo lɛ hewalɛ ni eya hiɛ.
4:1, 9, 10. Esa akɛ Yehowa jálɔi aya nɔ amɛha amɛkɛ Yehowa teŋ wekukpãa lɛ mli awa.
5:1-3, 8, 20, 21. Beni Yehowa gbi lɛ bɛŋkɛɔ nɛɛ, esa akɛ ‘wɔhiɛ akã shi, ni wɔwo hemɔkɛyeli kɛ suɔmɔ dama lɛ, ni wɔbumɔ dadefai ni ji yiwalaheremɔ nɔhiɛkamɔ lɛ.’ Agbɛnɛ hu, esa akɛ wɔkɛ hiɛdɔɔ asusu Nyɔŋmɔ gbalɛ Wiemɔ ni ji Biblia lɛ he.
‘NYƐDAMƆA SHI SHIŊŊ’
Akɛni Tesalonika asafo lɛ mli bii lɛ ateŋ mɛi komɛi tsake nɔ ni Paulo wie yɛ eklɛŋklɛŋ wolo lɛ mli lɛ hiɛ hewɔ lɛ, eeenyɛ efee akɛ amɛkɛɛ akɛ ‘Nuŋtsɔ lɛ baa be lɛ’ eshɛ shi etã. Paulo tsɔɔ amɛ nɔ ni esa akɛ “eba fɛɛ dã,” ni ekɛjaje amɛjwɛŋmɔ.—2 Tes. 2:1-3.
Paulo wo amɛ hewalɛ akɛ: ‘Nyɛdamɔa shi shiŋŋ, ni nyɛhiɛa nii ni wɔtsɔɔ nyɛ lɛ amli.’ Ewo amɛ kitã akɛ ‘amɛkɛ nyɛmi fɛɛ nyɛmi ni enyiɛɛɛ gbɛjianɔ lɛ agbala mli.’—2 Tes. 2:15; 3:6.
Ŋmalɛ Naa Sanebimɔi ni Aha Hetoo:
2:3, 8—Namɔ ji “esha gbɔmɔ lɛ,” ni mɛɛ gbɛ nɔ abaatsɔ akpata ehiɛ? “Esha gbɔmɔ” nɛɛ damɔ shi kɛha Kristendom osɔfoi lɛ. “Wiemɔ lɛ,” ni ji Yesu Kristo, Nyɔŋmɔ Naawielɔ Nukpa lɛ—ji mɔ ni aha lɛ hegbɛ ní ekɛ Nyɔŋmɔ kojomɔ lɛ aba mɛi fɔji anɔ, ni lɛ ebaafã koni akpata amɛhiɛ. (Yoh. 1:1) No hewɔ lɛ, abaanyɛ akɛɛ akɛ Yesu “kɛ edaaŋ-mumɔ lɛ” baakpata esha gbɔmɔ lɛ hiɛ.
2:13, 14—Mɛɛ gbɛ nɔ ‘ahala’ Kristofoi ni afɔ amɛ mu lɛ ‘kɛjɛ shishijee aha walaheremɔ’? Ajie Kristofoi ni afɔ amɛ mu lɛ ato akɛ kuu beni Yehowa to eyiŋ akɛ yoo lɛ seshi lɛ atswa Satan yitso nɔ̃ lɛ. (1 Mose 3:15) Yehowa tsɔɔ taomɔ nii ni esa akɛ amɛshɛ he, nitsumɔ ni amɛbaatsu, kɛ kaa ni amɛkɛbaakpe. Enɛ hewɔ ‘etsɛ amɛ.’
Nibii ni Wɔkaseɔ Kɛjɛɔ Mli:
1:6-9. Yehowa kpataaa jalɔi ahiɛ eshiii efɔŋfeelɔi anɔ.
3:8-12. Esaaa akɛ wɔkɛ bɛŋkɛmɔ ni Yehowa gbi lɛ ebɛŋkɛ lɛ jieɔ wɔnaa akɛ no hewɔ ni wɔtsuuu nii ni wɔná wɔhiamɔ nii kɛ nibii ni wɔkɛbaakwɛ wɔhe yɛ sɔɔmɔ nitsumɔ lɛ mli lɛ. Kɛ́ wɔtsuuu nii lɛ ebaaha wɔfee hejɔ̃ ni wɔbaatsɔmɔ mɛi ni kɛ ‘amɛhe woɔ mɛi krokomɛi asaji amli.’—1 Pet. 4:15.
“NII NI ATUU AWO ODƐŊ LƐ BAAMƆ YI”
Paulo kɛɛ Timoteo koni ‘ewu ta kpakpa lɛ, ni ehiɛ hemɔkɛyeli kɛ henilee kpakpa.’ Paulo tsɔɔ taomɔ nii ni adamɔɔ nɔ akɛholeɔ asafoŋ onukpai kɛ sɔɔlɔi. Paulo kɛɛ Timoteo hu koni ‘egu yakayaka adesãi.’—1 Tim. 1:18, 19; 3:1-10, 12, 13; 4:7.
Paulo ŋma akɛ: “Kaafámɔ onukpa ko.” Ewo Timoteo hewalɛ akɛ: “Nii ni atuu awo odɛŋ lɛ baamɔ yi, ni okwa yakayaka sanegbaa ni buleɔ mɔ kɛ ŋwanejee wiemɔ ni jɛ apasa nilee mli lɛ.”—1 Tim. 5:1; 6:20.
Ŋmalɛ Naa Sanebimɔi ni Aha Hetoo:
1:18; 4:14—Mɛɛ ‘gbalɛi agba’ yɛ Timoteo he? Ebaanyɛ efee gbalɛi komɛi ni ajɛ mumɔŋ agba yɛ nibii ni Timoteo baatsu yɛ Kristofoi asafo lɛ mli lɛ he, beni Paulo nyiɛ emaŋsɛɛ sanekpakpa shiɛmɔ nitsumɔ lɛ he gbɛfaa ni ji enyɔ lɛ nɔ ní eyasara Listra lɛ. (Bɔf. 16:1, 2) Asafo lɛ mli onukpai lɛ damɔ “gbalɛi” nɛɛ anɔ ni amɛkɛ ‘amɛniji shwie’ oblanyo Timoteo nɔ, ni tsɔɔ akɛ ahala lɛ kɛha nitsumɔ pɔtɛɛ ko.
2:15—Mɛɛ gbɛ nɔ ‘ahereɔ’ yoo ‘yiwala kɛtsɔ biiafɔmɔ nɔ’? Bifɔmɔ, gbekɛbii akwɛmɔ, kɛ shĩa kulamɔ baanyɛ ‘ahere’ loo ebu yoofɔyoo he koni ekafee hejɔ̃ ni ebatsɔ ‘mɔ ni wiewieɔ mɛi ahe ni ekɛ ehe woɔ mɛi asaji amli.’—1 Tim. 5:11-15, Ga Biblia hee lɛ.
3:16—Mɛni ji Nyɔŋmɔ jamɔ teemɔŋ sane lɛ? Ákɛ adesai baanyɛ amɛbo Yehowa toi kɛwula shi loo amɛnyɛŋ amɛfee nakai lɛ bafee teemɔŋ sane afii babaoo. Yesu ha ana sane lɛ naa kɛtsɔ anɔkwa ni eye Nyɔŋmɔ kɛtee gbele mli lɛ nɔ.
6:15, 16—Namɔ he wiemɔi nɛɛ kɔɔ, Yehowa Nyɔŋmɔ aloo Yesu Kristo? Wiemɔi nɛɛ kɔɔ Yesu Kristo he ejaakɛ lɛ epuemɔ he awie yɛ biɛ lɛ. (1 Tim. 6:14) Kɛ́ akɛ Yesu to adesai maŋtsɛmɛi kɛ nuŋtsɔmɛi ahe lɛ, lɛ pɛ ji “hewalɛ nɔyelɔ kome” ni lɛ pɛ eyɔɔ naanɔ shihilɛ ni gbele bɛ mli. (Dan. 7:14; Rom. 6:9) Kɛjɛ beni ekwɔ kɛtee ŋwɛi nɛɛ, adesa ko ‘nyɛŋ lɛ ana’ kɛ ehiŋmɛi.
Nibii ni Wɔkaseɔ Kɛjɛɔ Mli:
4:15. Kɛ́ wɔbatsɔmɔ Kristofoi etsɛ jio, nyɛsɛɛ nɛɛ nɔŋŋ wɔbatsɔmɔ jio lɛ, esa akɛ wɔmia wɔhiɛ ni wɔya hiɛ, ni wɔwaje wɔkɛ Yehowa teŋ wekukpãa lɛ daa.
6:2. Kɛ́ wɔnyɛmi héyelilɔ ji wɔnitsumɔtsɛ lɛ, yɛ nɔ najiaŋ ni wɔɔye lɛ sɛɛ lɛ, esa jogbaŋŋ moŋ akɛ wɔjɛ wɔtsuiŋ wɔsɔmɔ lɛ fe bɔ ni wɔbaasɔmɔ mɔ ko ni bɛ asafo lɛ mli.
“SHIƐMƆ WIEMƆ LƐ, KÃ HE”
Akɛni Paulo miitao ni ewaje Timoteo eto naagbai ni jwere ehiɛ lɛ hewɔ lɛ, ekɛɛ lɛ akɛ: “Nyɔŋmɔ haaa wɔ gbeyeishemɔ mumɔ, shi moŋ hewalɛ kɛ suɔmɔ kɛ jwɛŋmɔ ni sa mumɔ eŋɔha wɔ.” Ewo Timoteo ŋaa akɛ: “Nuŋtsɔ lɛ tsulɔ lɛ, esaaa akɛ ebéɔ, shi moŋ emli ajɔ aha mɛi fɛɛ, mɔ ni le nitsɔɔmɔ.”—2 Tim. 1:7; 2:24.
Paulo wo Timoteo hewalɛ akɛ: “Hii shi yɛ nii ni okase ni oyɔɔ hewalɛ yɛ nɔ lɛ amli.” Akɛni hemɔkɛyeli kwalɔi atsɔɔmɔi miigbɛ eeshwã hewɔ lɛ, Paulo wo oblanyo nɔkwɛlɔ nɛɛ ŋaa akɛ: “Shiɛmɔ wiemɔ lɛ, kã he . . . kã hiɛ, wo ŋaa, bɔɔ kɔkɔ.”—2 Tim. 3:14; 4:2.
Ŋmalɛ Naa Sanebimɔi ni Aha Hetoo:
1:13—Mɛni ji ‘tsámɔ wiemɔi lɛ akadi lɛ’? ‘Tsámɔ wiemɔi lɛ’ ji “wɔ-Nuŋtsɔ Yesu Kristo wiemɔi” lɛ ni ji anɔkwa Kristofoi atsɔɔmɔ lɛ. (1 Tim. 6:3) Yesu nitsɔɔmɔi kɛ enifeemɔi lɛ kɛ Nyɔŋmɔ Wiemɔ lɛ kpã gbee, no hewɔ lɛ wiemɔ ni ji “tsamɔ wiemɔi” lɛ hu baanyɛ akɔ Biblia mli tsɔɔmɔi lɛ fɛɛ ahe. Tsɔɔmɔi nɛɛ baanyɛ aye abua wɔ koni wɔna nɔ ni Yehowa taoɔ yɛ wɔdɛŋ lɛ. Wɔhiɛɔ tsamɔ wiemɔi lɛ akadi lɛ mli kɛtsɔ shi ní wɔhiɔ yɛ nibii ni wɔkase kɛjɛ Biblia lɛ mli lɛ anaa lɛ nɔ.
4:13—Mɛni ji ‘kooloi ahe woji lɛ’? Wiemɔ ni ji ‘kooloi ahe woji’ lɛ tsɔɔ kooloo he wolo ní aŋmaa nii yɛ nɔ. Eeenyɛ efee akɛ Paulo miibi koni abaha lɛ Hebri Ŋmalɛi lɛ ekomɛi bɔni afee ni ekase beni awo lɛ tsuŋ yɛ Roma lɛ. Ekolɛ aŋmala ŋmalɛi nɛɛ ekomɛi ashwie adaa nɔ, ni aŋmala ekrokomɛi hu ashwie kooloi ahe woji anɔ.
Nibii ni Wɔkaseɔ Kɛjɛɔ Mli:
1:5; 3:15. Ŋmalɛ lɛ ni akɛtsɔse Timoteo yɛ shĩa kɛjɛ egbekɛbiiashi lɛ ji nɔ ni ha ená Kristo Yesu mli hemɔkɛyeli, ni nakai hemɔkɛyeli lɛ ná enɔ hewalɛ yɛ eshihilɛ mli fɛɛ. Kwɛ bɔ ni ehe hiaa waa ni fɔlɔi kɛ hiɛdɔɔ diɛŋtsɛ asusu bɔ ni amɛtsuɔ amɛbii lɛ atsɔsemɔ ni Nyɔŋmɔ kɛwo amɛdɛŋ nɛɛ he nii amɛhaa lɛ he!
1:16-18. Nyɛhaa wɔsɔlea wɔhaa wɔnyɛmimɛi héyelilɔi lɛ kɛ́ amɛkɛ kaai kpe, aawa amɛ yi, loo awo amɛ tsuŋ lɛ, ni wɔfee nɔ fɛɛ nɔ ni wɔɔnyɛ kɛye wɔbua amɛ.—Abɛi 3:27; 1 Tes. 5:25.
2:22. Esaaa akɛ Kristofoi, titri lɛ, oblahii kɛ oblayei, haa kpɔiaŋgbɔlemɔ, lala, hiɛtserɛjiemɔ, nibii ni amɛnyaa amɛfeemɔ he, gbɛfãa, yakayaka wiemɔ, kɛ nibii ni tamɔ enɛɛmɛi lɛ heɔ amɛbe fɛɛ ní no hewɔ lɛ amɛnáaa be tsɔ amɛkɛ amɛhe awo Kristofoi anitsumɔi amli.
[Mfoniri ni yɔɔ baafa 31]
Te woji ni ajɛ mumɔŋ aŋmala lɛ ateŋ nɔ ni bɔfo Paulo ŋma naagbee kwraa lɛ?