“Nyɛkahaa Ejurɔfeemɔ Miitɔa Nyɛ”
Tesalonikabii a-Wolo ni ji Enyɔ lɛ mli Saji Otii
BƆ NI bɔfo Paulo susuɔ Kristofoi ni yɔɔ Makedonia maŋtiase ni ji Tesalonika mli lɛ ahe ehaa lɛ tsirɛ lɛ ni eŋma wolo ni ji enyɔ eyaha amɛ, aaafee afi 51 Ŋ.B. lɛ mli. Mɛi komɛi yɛ asafo Iɛ mli ni amɛmiikɛɛ yɛ gbɛ ni ejaaa nɔ akɛ Kristo baa be lɛ ebɛŋkɛ. Ekolɛ amɛtsɔɔ wolo ko ni akɛɛ Paulo ji mɔ ni ŋma shi jeee nakai eji lɛ hu shishi akɛ eetsɔɔ akɛ “Nuŋtsɔ lɛ [Yehowa] gbi lɛ eshɛ eta.”—2 Tesalonikabii 2:1, 2.
No hewɔ Iɛ ebi ni ajaje Tesalonikabii lɛ ekomɛi asusumɔ. Paulo jie amɛ yi yɛ ewolo ni ji enyɔ lɛ mli, yɛ amɛhemɔkɛyeli ni daa, suɔmɔ ni faa, kɛ amɛtsuishiŋmɛɛ yɛ anɔkwayeli mli lɛ hewɔ. Shi etsɔɔ hu akɛ hemɔkɛyeli kwamɔ baaba dani Yesu baa lɛ baaba. No hewɔ lɛ bei ni mli wawai jwere amɛhiɛ, ni bɔfo lɛ wolo lɛ baaye abua ni amɛbo eŋaawoo nɛɛ toi: “Nyɛkahaa ejurɔfeemɔ miitɔa nyɛ.” (2 Tesalonikabii 3:13) Paulo wiemɔ lɛ baanyɛ aye abua wɔ yɛ nakai gbɛ nɔ nɔŋŋ.
Kristo Kpojiemɔ kɛ Beni Eba
Klɛŋklɛŋ lɛ Paulo wie heyeli kɛmiijɛ haomɔ mli lɛ he. (1:1-12) Enɛ baaba yɛ be mli ni “aaajie Nuŋtsɔ Yesu kpo kɛaajɛ ŋwɛi kɛ ehewalɛ bɔfoi lɛ.” Kɛkɛ lɛ akɛ naanɔ hiɛkpatamɔ baaba mɛi ni booo sanekpakpa lɛ toi lɛ anɔ. Eshɛjeɔ wɔmii kɛ wɔkai enɛ yɛ be mli ni wɔnaa amanehulu yɛ yiwalɔi adɛŋ lɛ.
Yɛ no sɛɛ lɛ, Paulo tsɔɔ akɛ abaajie “mlakwalɔ lɛ” kpo dani beni Kristo eba lɛ baashɛ. (2:1-17) Esaaa akɛ Tesalonikabii lɛ haoɔ yɛ sane ko ni tsɔɔ akɛ “Nuŋtsɔ lɛ [Yehowa] gbi lɛ eshɛ” amɛnɔ “eta” lɛ he. Klɛŋklɛŋ lɛ, Nyɔŋmɔjamɔ [hemɔkɛyeli] kwamɔ lɛ baaba, ni abaajie mlakwalɔ lɛ loo mlakwamɔ gbɔmɔ lɛ kpo. No sɛɛ lɛ Yesu baakpata ehiɛ yɛ be mli ni eeejie ehe kpo akɛ E-ba momo lɛ. Dani enɛ aaaba lɛ, Paulo sɔle koni Nyɔŋmɔ kɛ Kristo ashɛje Tesalonikabii lɛ amii ni eha ‘amɛfi shi shiŋŋ yɛ nitsumɔ kpakpa kɛ wiemɔ kpakpa fɛɛ mli.’
Mɛi ni Enyiɛɛɛ Gbɛjianɔ lɛ Ahe Nitsumɔ
Nɔ ni fata Paulo wiemɔi lɛ ahe ji famɔi ni tsɔɔ bɔ ni esa akɛ atsu mɛi ni enyiɛɛɛ gbɛjianɔ lɛ ahe nii aha. (3:1-18) Ejie hekɛnɔfɔɔ kpo akɛ Nuŋtsɔ lɛ baawaje Tesalonikabii lɛ ni ejie amɛ kɛjɛ mɔ fɔŋ, Satan Abonsam dɛŋ. Shi ehe miihia ni amɛto gbɛjianɔ kɛha amɛ diɛŋtsɛ amɛ mumɔŋ sɛɛnamɔ. Esa akɛ amɛtsi amɛhe kɛjɛ mɛi ni enyiɛɛɛ gbɛjianɔ lɛ ahe, mɛi ni kɛ amɛhe woɔ saji ni kɔɔɔ amɛhe lɛ amli ni amɛsumɔɔɔ akɛ amɛtsuɔ nii lɛ. Paulo kɛɛ: “Kɛ mɔ ko sumɔɔɔ akɛ etsuɔ nii lɛ, belɛ ekaye nii hu.” Esa akɛ akadi gbɔmɛi ni tamɔ nɛkɛ, ni akɛ amɛ akabɔ naanyo, shi esa akɛ awo amɛ ŋaa akɛ nyɛmimɛi. Tesalonika Kristofoi anɔkwafoi lɛ kpaŋ ejurɔfeemɔ loo nii ni ja lɛ feemɔ, ni Paulo miisumɔ ni Nuŋtsɔ Yesu Kristo duromɔ kɛ amɛ fɛɛ ahi shi.
Paulo wolo ni ji enyɔ ni eŋma eyaha Tesalonikabii lɛ maa nɔ mi kɛhaa Yehowa Odasefoi akɛ heyeli kɛmiijɛ amɛ amanehulu mli lɛ baaba, beni Kristo kɛ ebɔfoi lɛ kɛ oweletɔɔ baa mɛi ni booo sanekpakpa lɛ toi lɛ anɔ lɛ. Ewoɔ hemɔkɛyeli hewalɛ hu akɛ aaale akɛ etsɛŋ ni akɛ “mlakwalɔ lɛ,” [mlakwamɔ gbɔmɔ lɛ] (Kristendom osɔfoi akuu) lɛ kɛ apasa jamɔ fɛɛ baaba naagbee. Dani enɛ aaaba lɛ, nyɛhaa wɔboa Paulo ŋaawoo lɛ toi akɛ ejurɔfeemɔ akatɔ wɔ.
[Akrabatsa/Mfoniri ni yɔɔ baafa 23]
Yehowa Wiemɔ lɛ Miiya Hiɛ kɛ Foi: Paulo ŋma akɛ: “Nyɛsɔlea nyɛhaa wɔ koni Nuŋtsɔ lɛ [Yehowa] wiemɔ lɛ ahiɛ foi kɛya nɔ, ni awo ehiɛ nyam, taakɛ bɔ ni eyɔɔ yɛ nyɛŋɔɔ hu lɛ.” (2 Tesalonikabii 3:1) Woloŋlelɔi komɛi etsɔɔ akɛ bɔfo lɛ miiwie foidalɔi ni he yɔɔ oya yɛ foidamɔ mli lɛ ahe. Yɛ be mli ni anyɛŋ ama enɛ nɔ mi lɛ, Paulo bi Tesalonika Kristofoi lɛ asɔlemɔ koni lɛ kɛ enanemɛi nitsulɔi lɛ anyɛ ni amɛkɛ hehiamɔ ni naatsii bɛ mli agbɛ anɔkwale wiemɔ lɛ amɛshwa. Akɛni Nyɔŋmɔ haa sɔlemɔi ni tamɔ nɛkɛ hetoo hewɔ lɛ, ewiemɔ lɛ ‘hiɛ foi kɛmiiya,’ yɛ be mli ni akɛ hehiamɔ shiɛɔ sanekpakpa lɛ yɛ naagbee gbii nɛɛ amli lɛ. Aawo Yehowa wiemɔ lɛ ‘hiɛ nyam’ hu waa, mɛi ni heɔ yeɔ lɛ buɔ lɛ “Nyɔŋmɔ hewalɛ kɛha yiwalaheremɔ,” taakɛ eji yɛ Tesalonikabii ni mɔ mli lɛ ateŋ lɛ. (Romabii 1:16; 1 Tesalonikabii 2:13) Kwɛ miishɛɛ ni wɔna akɛ Nyɔŋmɔ miijɔɔ Maŋtsɛyeli jajelɔi lɛ ni eeha ejalɔi lɛ ayi hu miifa kɛ foi!—Yesaia 60:22.