Kwɛmɔ Jogbaŋŋ yɛ Mlihilɛ ni Egba Afa He
1 Ale Yehowa webii waa yɛ mlihilɛ kɛ nihamɔ mumɔ ni amɛjieɔ lɛ kpo lɛ he. Bei pii lɛ, enɛ jeɔ kpo yɛ gbɛ pɔtɛɛ nɔ yɛ be mli ni wɔkaseɔ Samarianyo kpakpa ni Yesu wie ehe yɛ ebɛbua ni saa mɔ henumɔi ahe lɛ mli lɛ. (Luka 10:29-37) Shi kɛlɛ, mɛi komɛi ni esaaa akɛ ayeɔ abuaa amɛ yɛ heloo gbɛfaŋ lɛ baabɔ mɔdɛŋ ni amɛna wɔ mlihilɛ nɛɛ he sɛɛ. Enɛ hewɔ lɛ, esa akɛ suɔmɔ ni wɔyɔɔ kɛha mɛi krokomɛi lɛ kɛ “nilee kɛ sɛɛyoomɔ fɛɛ” aŋmɛ pɛpɛɛpɛ.—Filip. 1:9.
2 Yɛ Asafo lɛ Mli: Akɛ nɔkwɛmɔ nɔ lɛ, ekolɛ mɔ ko baakɛɛ akɛ enitsumɔ efite aloo ebaatsɔɔ yiŋtoi krokomɛi ahewɔ ni ebiɔ yelikɛbuamɔ lɛ. Bei komɛi lɛ, nɛkɛ gbɔmɛi nɛɛ ebɔɔɔ mɔdɛŋ akɛ amɛaatao nitsumɔ, shi moŋ, ní mɛi krokomɛi aha amɛ amɛshihilɛ mli hiamɔ nii. Bɔfo Paulo fã yɛ gbɔmɛi ni tamɔ nɛkɛ he akɛ: “Kɛ mɔ ko sumɔɔɔ akɛ etsuɔ nii lɛ, belɛ ekaye nii hu.”—2 Tes. 3:10.
3 “Be kɛ shihilɛ mli nibii ni baa trukaa” ninaa wɔ fɛɛ, no hewɔ lɛ, kɛ heloonaa nii ahe miihia wɔ, ni wɔnaaa “wɔ daa ŋmaa” lɛ, esaaa ni wɔhaoɔ wɔhe yɛ he fe nine, ejaakɛ Yehowa haa mɛi ni sumɔɔ lɛ ni amɛfeɔ esuɔmɔnaa nii lɛ amɛhiamɔ nii. (Jaj. 9:11, NW; Matt. 6:11, 31, 32) Ekolɛ mɔ ko ni efi lɛ lɛ baana akɛ ehe miihia ni ekɛ onukpai lɛ ateŋ mɔ ko awie he. Ni lɛ hu, ebaakɛɛ onukpai akuu lɛ ákɛ teemɔŋ sane. Onukpai lɛ baanyɛ asusu mɛi fɛɛ ni biɔ ni aye abua amɛ lɛ ateŋ mɔ fɛɛ mɔ shihilɛ he koni amɛkɛna nɔ ni abaanyɛ afee.—Okɛto 1 Timoteo 5:3-16 he.
4 Gbɛfalɔi Shishiulɔi: Asafo lɛ yaa nɔ enine shɛɔ amaniɛbɔi anɔ akɛ gbɛfalɔi shishiulɔi komɛi eju asafo lɛ mli bii lɛ ekomɛi ashika kɛ heloonaa nibii krokomɛi. Esaaa akɛ enɛ feɔ wɔ naakpɛɛ, ejaakɛ Ŋmalɛi lɛ bɔɔ kɔkɔ akɛ “gbɔmɛi fɔji kɛ shishiulɔi aaawo wu yɛ efɔŋ mli; amɛlakaa mɛi ni amɛ hu alakaa amɛ.” (2 Tim. 3:13) Bei pii lɛ, nɛkɛ shishiulɔi nɛɛ kɛɔ akɛ amɛka gbɛ teŋ, ni amɛmiitao shika ni amɛkɛ eko ata tsɔne mli kɛku amɛsɛɛ kɛya shia ni amɛkɛ eko hu aye nii yɛ gbɛ lɛ nɔ. Mɛi krokomɛi hu kɛ nitsumɔ he susumɔi ni lakaa mɔ baa. Eyɛ mli akɛ ekolɛ amɛwiemɔi lɛ baafee anɔkwale moŋ, shi bei pii lɛ, jeee Yehowa Odasefoi kwraa ji amɛ, shi kwa amɛkwaa amɛfeɔ amɛhe nakai kɛkɛ.
5 Kɛ gbɔ ko babi yelikɛbuamɔ lɛ, nilee yɛ mli akɛ okɛ lɛ agba teokrase saji ahe sane koni okɛna akɛ ani mɔ lɛ, nyɛmi diɛŋtsɛ ni lo. Okɛ asafo lɛ mli onukpai lɛ asusu he, ní kɛ ebaahi lɛ, atswa tɛlifon ni akɛbi mɔ lɛ he saji koni anyɛ ana nɔmimaa yɛ eshidaamɔ he. Nyɛmimɛi hii kɛ yei diɛŋtsɛ ni yajeɔ hiamɔ shihilɛ ko mli trukaa lɛ baanu shishi akɛ aabibii saji ni abiɔ lɛ lɛ bɔni afee ni akɛbu mɛi fɛɛ ni ekɔɔ amɛhe lɛ ahe. Shi yɛ gbɛ kroko nɔ lɛ, saji ni abaabi nɛɛ baakpa shishiulɔi ahe mama. Ehe ehiaaa ni wɔjwɛŋmɔ feɔ wɔ enyɔnyɔ yakatswaa yɛ mɛi fɛɛ ni ekolɛ wɔleee amɛ lɛ ahe, shi kɛlɛ, esa akɛ wɔkwɛ jogbaŋŋ yɛ shishiulɔi ahe.
6 Nilelɔ Maŋtsɛ Salomo wo ŋaa akɛ: “Mɛi ni sa ejurɔfeemɔ lɛ, kaakãmã amɛ, kɛji efeemɔ yɛ odɛŋ hewalɛ mli lɛ.” (Abɛi 3:27) Kɛ wɔkɛ nilee kɛ sɛɛyoomɔ tsu nii lɛ, no lɛ wɔbaanyɛ wɔya nɔ wɔjie mlihilɛ kpo beni wɔkwɛɔ jogbaŋŋ hu yɛ mlihilɛ ni egba afa he lɛ.