Biblia Mli Wolo ni Ji 53—2 Tesalonikabii
Mɔ ni Ŋma: Paulo
Heni Aŋma Yɛ: Korinto
Be ni Aŋma Agbe Naa: Aaafee afi 51 Ŋ.B.
WOLO ni ji enyɔ ni bɔfo Paulo ŋma kɛyaha Tesalonikabii lɛ tamɔ klɛŋklɛŋ nɔ̃ lɛ nɔŋŋ. Wɔle akɛ beni aŋma klɛŋklɛŋ nɔ̃ lɛ agbe naa nɔŋŋ ni aŋma nɔ ni ji enyɔ nɛɛ kɛjɛ Korinto maŋtiase lɛ nɔŋŋ mli, ejaakɛ nyɛmimɛi ni ji Silvano kɛ Timoteo lɛ nɔŋŋ aŋamɔi fata ŋamɔi ni Paulo kɛmaje asafo ni yɔɔ Tesalonika lɛ he. Sɔɔlɔi gbɛfalɔi ji amɛ fɛɛ yɛ mra be mli Kristofoi asafo lɛ mli, ni odaseyeli ko bɛ ni tsɔɔ akɛ yɛ sharamɔ ni amɛkɛ amɛhe shara yɛ Korinto nɛɛ sɛɛ lɛ, nɛkɛ mɛi etɛ nɛɛ kpe ekoŋŋ. (2 Tes. 1:1; Bɔf. 18:5, 18) Saneyitso ni awie he yɛ wolo lɛ mli lɛ kɛ bɔ ni sanegbaa lɛ tee nɔ lɛ tsɔɔ akɛ Paulo nu he akɛ ehe miihia ni ajaje naagba ko ni asafo lɛ eyaje mli lɛ amrɔ nɔŋŋ.
2 Aye bɔ ni wolo nɛɛ ja lɛ he odase tamɔ bɔ nɔŋŋ ni afee yɛ Tesalonikabii a-Klɛŋklɛŋ Wolo lɛ he lɛ nɔŋŋ. Irenaeus (afi 100 Ŋ.B. afii lɛ amli) kɛ mra be mli niŋmalɔi lɛ tsɛ wiemɔi ayisɛɛ kɛjɛ wolo nɛɛ mli, ni Justin Martyr (afi 100 Ŋ.B. afii lɛ amli) hu tsɛ wiemɔ ni ji “esha gbɔmɔ” lɛ yisɛɛ kɛjɛ 2 Tesalonikabii 2:3 lɛ mli. Anaa wolo nɛɛ yɛ woji ni ana Tesalonikabii a-Klɛŋklɛŋ Wolo lɛ yɛ mli lɛ nɔŋŋ mli. Eyɛ mli akɛ amrɔ nɛɛ anaaa yɛ Chester Beatty Papyrus No. 2 (P46) wolo lɛ mli moŋ, shi eeenyɛ efee akɛ no ji baafai kpawo ni nyiɛ Tesalonikabii a-Klɛŋklɛŋ Wolo lɛ sɛɛ ni laaje lɛ mli klɛŋklɛŋ baafai.
3 Mɛɛ yiŋtoo hewɔ ni aŋma wolo nɛɛ? Wɔnaa yɛ Paulo ŋaawoo ni ekɛha Tesalonikabii lɛ mli akɛ, mɛi komɛi miikɛɛ akɛ Nuŋtsɔ lɛ baa lɛ ebɛŋkɛ, ni etee nɔ etsɔɔ mli akɛ mɛi ni wieɔ enɛ lɛ miika amɛyiŋ amɛmiiwie nɔ ni amɛsumɔɔ, ni amɛhaaa miishɛɛ ahi asafo lɛ mli. Etamɔ nɔ ni mɛi komɛi kɛ enɛ jie amɛnaa ni amɛtsuuu nii ni amɛkɛkwɛ amɛ diɛŋtsɛ amɛ he po. (2 Tes. 3:11) Yɛ klɛŋklɛŋ wolo ni Paulo ŋma lɛ mli lɛ, ewie Nuŋtsɔ lɛ baa lɛ he, ni ŋwanejee ko bɛ he akɛ beni amɛnu wolo ni akane lɛ mli sane lɛ, amɛhe fee oya kɛ Paulo wiemɔi lɛ hiɛtsakemɔ ni amɛtsɔmɔ shishinumɔi ni yɔɔ mli lɛ hiɛ amɛbu shi. Eeenyɛ eba hu akɛ jeee Paulo ji mɔ ni ŋma wolo ni tsɔɔ akɛ ‘Yehowa gbi lɛ eshɛ shi eta’ lɛ.—2:1, 2.
4 Etamɔ nɔ ni Paulo nine shɛ amaniɛbɔɔ ni kɔɔ nɛkɛ shihilɛ nɛɛ he lɛ nɔ kɛjɛ mɔ ni kɛ eklɛŋklɛŋ wolo ni eŋma lɛ yaha asafo lɛ dɛŋ, ni Paulo yɛ he miishɛɛ waa akɛ eeejaje enyɛmimɛi ni esumɔɔ amɛ jogbaŋŋ nɛɛ ajwɛŋmɔ. No hewɔ lɛ, yɛ afi 51 Ŋ.B. lɛ, Paulo kɛ ehefatalɔi enyɔ lɛ, kɛ wolo maje kɛjɛ Korinto ní akɛyaha asafo ni yɔɔ Tesalonika lɛ. Kɛfata amɛsusumɔi ni ejaaa ni kɔɔ Kristo baa lɛ he ni ejaje lɛ he lɛ, Paulo kɛ hewalɛwoo ni kanyaa mɔ ha amɛ koni amɛnyɛ amɛfĩ shi shiŋŋ yɛ anɔkwale lɛ mli.
NƆ HEWƆ NI EHE YƆƆ SƐƐNAMƆ
10 Nɛkɛ wolo ni sɛɛ kɛɛɛ ni aŋma ayaha Tesalonikabii nɛɛ wieɔ saji srɔtoi ni kɔɔ Kristofoi anɔkwale lɛ he, ni sɛɛnamɔ yɛ he akɛ aaajwɛŋ eko fɛɛ eko nɔ. Susumɔ shishijee tsɔɔmɔi kɛ shishitoi mlai ni nyiɛ sɛɛ nɛɛ ahe okwɛ: Yehowa ji yiwalaheremɔ Nyɔŋmɔ, ni ekɛ emumɔ lɛ haa mɛi ahe tseɔ yɛ hemɔkɛyeli kɛ anɔkwale lɛ mli (2:13); esa akɛ Kristofonyo adamɔ yiwaai anaa koni anyɛ abu lɛ afata mɛi ni sa Nyɔŋmɔ Maŋtsɛyeli lɛ ahe (1:4, 5); abaabua Kristofoi anaa yɛ Nuŋtsɔ Yesu Kristo baa lɛ mli (2:1); Yehowa kɛ kojomɔ ni ja baaba mɛi ni booo sanekpakpa lɛ toi lɛ anɔ (1:5-8); abaawo mɛi ni atsɛ lɛ hiɛ nyam yɛ Kristo Yesu mli, yɛ Nyɔŋmɔ duromɔ ni esaaa amɛ lɛ naa (1:12); atsɔɔ sanekpakpa lɛ nɔ atsɛɔ amɛ kɛbaa (2:14); hemɔkɛyeli ji taomɔ nii ko ní he hiaa waa diɛŋtsɛ (1:3, 4, 10, 11; 2:13; 3:2); ehi akɛ mɛi aaatsu nii ni amɛkɛkwɛ amɛhe yɛ sɔɔmɔ nitsumɔ lɛ mli; kɛ mɔ ko tsuuu nii lɛ, ebaatsɔ anihaolɔ ni ekɛ ehe baawo mɛi asaji ni kɔɔɔ ehe lɛ amli (3:8-12); Nyɔŋmɔ suɔmɔ lɛ haa anáa tsuishiŋmɛɛ (3:5). Mɛɛ saji ni he yɔɔ sɛɛnamɔ waa ni tswaa mɔ emaa shi po wɔnaa yɛ wolo kuku kome mli nɛkɛ!
11 Paulo tsɔɔ bɔ ni esusuɔ enyɛmimɛi ni yɔɔ Tesalonika lɛ amumɔŋ hilɛ-kɛhamɔ, amɛ ekomefeemɔ kɛ asafo lɛ shweremɔ lɛ he jogbaŋŋ yɛ ewolo nɛɛ mli. Etsɔɔ amɛ Yehowa gbi lɛ mli jogbaŋŋ, ni eha amɛle akɛ esa akɛ “esha gbɔmɔ” lɛ aba ni ebata ‘Nyɔŋmɔ we lɛ, ni etsɔɔ ehe akɛ nyɔŋmɔ.’ Shi mɛi ni ‘ahala akɛ amɛsa kɛha Nyɔŋmɔ maŋtsɛyeli lɛ’ yɛ hiɛnɔkamɔ ni ma shi shiŋŋ akɛ abaana Nuŋtsɔ Yesu kɛmiijɛ ŋwɛi, ni ekɛ lalilɛi aaatɔ owele “beni eeeba ni aaawo ehiɛ nyam yɛ emɛi krɔŋkrɔŋi lɛ amli, ni aaana enaakpɛɛ nii yɛ eheyelilɔi lɛ fɛɛ mli yɛ nakai gbi lɛ nɔ lɛ.”—2:3, 4; 1:5, 10.