“Nyɛfea Nibii Fɛɛ Kɛwoa Nyɔŋmɔ Hiɛ Nyam”

YEHOWA tsuji ji wɔ, ni wɔjɔɔ wɔhe nɔ wɔhã lɛ. No hewɔ lɛ, eji sɔ̃ ni kã wɔnɔ akɛ wɔkɛ wɔwiemɔi kɛ wɔnifeemɔi fɛɛ awo ehiɛ nyam. Bɔfo Paulo tsɔɔ shishitoo mla ni esa akɛ ekudɔ wɔ yɛ enɛ feemɔ mli. Eŋma akɛ: “Kɛ́ nii nyɛyeɔ jio, nii nyɛnuɔ jio, aloo nɔ kroko nyɛfeɔ jio, nyɛfea nibii fɛɛ kɛwoa Nyɔŋmɔ hiɛ nyam.” (1 Kor. 10:31) Enɛ baabi ni wɔhi shi yɛ Yehowa taomɔ nii ni ja lɛ anaa, ni etaomɔ nii lɛ hãa anaa esubaŋ ni hi kɛwula shi lɛ. (Kol. 3:10) Akɛni wɔji mɛi krɔŋkrɔŋi hewɔ lɛ, esa akɛ wɔfee wɔhe mɛi ni kaseɔ Nyɔŋmɔ.​—Efe. 5:1, 2.

² Bɔfo Petro wo Kristofoi ŋaa yɛ enɛ he akɛ: “Akɛ bii toibolɔi lɛ, nyɛkahãa nibii ni nyɛshweɔ tsutsu be ni nyɛleee nɔ ko lɛ yaa nɔ eshɔ̃a nyɛ dɔŋŋ, shi moŋ, tamɔ bɔ ni Mɔ Krɔŋkrɔŋ ni tsɛ nyɛ lɛ yɔɔ lɛ, nyɛ hu nyɛfea mɛi krɔŋkrɔŋi yɛ nyɛnifeemɔi fɛɛ amli, ejaakɛ aŋma akɛ: ‘Nyɛfea krɔŋkrɔŋ, ejaakɛ miyɛ krɔŋkrɔŋ.’” (1 Pet. 1:14-16) Bɔ ni abi ni blema Israelbii lɛ afee krɔŋkrɔŋ lɛ, nakai nɔŋŋ abiɔ ni Kristofoi asafo lɛ mli bii lɛ hu afee krɔŋkrɔŋ. Enɛ tsɔɔ akɛ esaaa akɛ amɛhãa nibii fɔji kɛ sui gbohii ni ajieɔ lɛ kpo yɛ je lɛ mli lɛ woɔ amɛhe muji. Ajie amɛ ato afã kɛhã sɔɔmɔ krɔŋŋ.​—2 Mo. 20:5.

³ Kɛ́ wɔtee nɔ wɔhi shi yɛ Yehowa mlai kɛ shishitoo mlai ni afee lɛ faŋŋ yɛ Ŋmalɛ Krɔŋkrɔŋ lɛ mli lɛ anaa lɛ, wɔbaaya nɔ wɔfee krɔŋkrɔŋ. (2 Tim. 3:16) Atsɔɔ wɔ Yehowa kɛ egbɛi lɛ ahe nii be ni akɛ wɔ kaseɔ Biblia lɛ, ni no hã wɔtsi wɔbɛŋkɛ lɛ. Nɔ ni akɛ wɔ kase lɛ hã wɔbana akɛ, esa akɛ wɔtao Nyɔŋmɔ Maŋtsɛyeli lɛ klɛŋklɛŋ, ni wɔhã Yehowa suɔmɔnaa nii ni wɔbaafee lɛ afee nɔ ni he hiaa wɔ fe nɔ fɛɛ nɔ. (Mat. 6:33; Rom. 12:2) Wɔbana akɛ, ja wɔwo subaŋ hee lɛ dani wɔbaanyɛ wɔfee nakai.​—Efe. 4:22-24.

⁴ Jeee be fɛɛ be eyɔɔ mlɛo akɛ wɔbaahi shi yɛ Yehowa taomɔ nii ni ja lɛ anaa. Satan Abonsam, ni ji wɔhenyɛlɔ lɛ, miitao ni egbala wɔ kɛje anɔkwale lɛ mli. Sui gbohii ni ajieɔ lɛ kpo yɛ je lɛ mli, kɛ agbɛnɛ hu, nibii gbohii ni wɔshweɔ akɛ wɔfee lɛ hãa bei komɛi lɛ ewaa kɛhãa wɔ akɛ wɔbaahi shi yɛ taomɔ nii nɛɛ anaa. Bɔ ni afee ni wɔhi shi akɛ mɛi ni ejɔɔ amɛhe nɔ amɛhã Yehowa lɛ, ebaabi ni wɔwu mumɔŋ ta ko. Ŋmalɛ lɛ kɛɔ wɔ akɛ, kɛ́ wɔkɛ shiteekɛwoo loo shihilɛi ni mli wawai kpe lɛ, esaaa akɛ efeɔ wɔ naakpɛɛ. Wɔbaana amanehulu yɛ jalɛ hewɔ. (2 Tim. 3:12) Kɛ́ wɔkɛ shihilɛi ni mli wawai miikpe lɛ wɔnáa miishɛɛ, ejaakɛ wɔle akɛ no tsɔɔ akɛ wɔmiifee Nyɔŋmɔ suɔmɔnaa nii.​—1 Pet. 3:14-16; 4:12, 14-16.

⁵ Eyɛ mli akɛ Yesu eye emuu moŋ, shi ekase bɔ ni aboɔ Nyɔŋmɔ toi kɛjɛ amanehului ni ena lɛ amli. Eŋmɛɛɛ ehe ehãaa kai ni Satan kɛba enɔ lɛ ateŋ ekome folo po, ni etiuuu otii ni mɛi tiuɔ sɛɛ yɛ je lɛ mli lɛ eko kwraa sɛɛ. (Mat. 4:1-11; Yoh. 6:15) Ebaaa Yesu jwɛŋmɔ mli shi kome folo po akɛ ebaaŋmɛɛ nibii ahe kɛsaa. Eyɛ mli akɛ anɔkwa ni eye lɛ hã je lɛ nyɛ lɛ moŋ, shi etee nɔ ehi shi yɛ Yehowa taomɔ nii ni ja lɛ anaa. Be ni eshwɛ fioo ni Yesu baagbo lɛ, ebɔ ekaselɔi lɛ kɔkɔ akɛ amɛ hu je lɛ baanyɛ amɛ. Kɛjɛ nakai be lɛ kɛbaa nɛɛ, Yesu sɛɛnyiɛlɔi lɛ ena amanehului babaoo, shi le ni amɛle akɛ Nyɔŋmɔ Bi lɛ eye je lɛ nɔ kunim lɛ ehã amɛná ekãa.​—Yoh. 15:19; 16:33; 17:16.

⁶ Bɔ ni afee ni wɔya nɔ wɔfee mɛi ni fataaa je lɛ he lɛ, esa akɛ wɔya nɔ wɔhi shi yɛ Yehowa taomɔ nii ni ja lɛ anaa tamɔ bɔ ni wɔ-Nuŋtsɔ lɛ fee lɛ. Esaaa akɛ wɔkɛ wɔhe woɔ pɔlitis kɛ maŋ saji amli, ni esaaa akɛ wɔhãa jeŋbai gbohii ni yaa nɔ yɛ je lɛ mli lɛ hu náa wɔnɔ hewalɛ. Wɔkɛ ŋaawoo ni yɔɔ Yakobo 1:21 lɛ shwɛɛɛ kwraa. Jɛmɛ kɛɔ akɛ: “Nyɛjiea muji fɛɛ kɛ nii gbonyo fɛɛ nii gbonyo yɛ nyɛhe nyɛshɛrɛa nyɛshwiea, ni nyɛkɛ mlijɔlɛ amɔ wiemɔ lɛ ni baanyɛ ahere nyɛyiwala ni aduɔ yɛ nyɛmli lɛ mli.” Kɛ́ wɔkaseɔ nii ni wɔyaa kpeei srɔtoi lɛ, no baahã ‘adu’ anɔkwale “wiemɔ lɛ” yɛ wɔjwɛŋmɔŋ kɛ wɔtsuiiaŋ, ni wɔshweŋ je lɛŋ nibii lɛ po. Kaselɔ Yakobo ŋma akɛ: “Ani nyɛleee akɛ naanyo ni akɛ je lɛ bɔɔ lɛ ji nyɛɛ ni anyɛɔ Nyɔŋmɔ? No hewɔ lɛ, mɔ fɛɛ mɔ ni sumɔɔ akɛ etsɔ je lɛ naanyo lɛ, eetsɔ ehe Nyɔŋmɔ henyɛlɔ.” (Yak. 4:4) No hewɔ lɛ, abɔɔ wɔ kɔkɔ waa yɛ Biblia lɛ mli koni wɔya nɔ wɔhi shi yɛ Yehowa taomɔ nii ni ja lɛ anaa, ni wɔtse wɔhe kɛje je lɛ he.

⁷ Nyɔŋmɔ Wiemɔ lɛ bɔɔ wɔ kɔkɔ ni wɔkwɛ jogbaŋŋ koni wɔkɛ wɔhe akawo jeŋba sha kɛ hiɛgbejianifeemɔ ko kwraa mli. Ekɛɔ wɔ akɛ: “Ajwamaŋbɔɔ kɛ muji nii srɔtoi fɛɛ kɛ amimyeli lɛ, akatsĩ tã po yɛ nyɛteŋ, ejaakɛ enɛ esaaa mɛi krɔŋkrɔŋi.” (Efe. 5:3) No hewɔ lɛ, esaaa akɛ wɔkɛ wɔjwɛŋmɔ maa yakayaka nibii, hiɛgbejianii loo nibii gbohii anɔ, ni wɔŋmɛŋ gbɛ ni amɛje kpo yɛ wɔsanegbai hu amli. Nakai ni wɔfeɔ lɛ tsɔɔ akɛ, wɔmiisumɔ ni wɔhi shi yɛ jeŋba he taomɔ nii ni ja ni yɔɔ krɔŋŋ ni Yehowa eto shishi lɛ anaa.

⁸ Kristofoi kpɛlɛɔ nɔ akɛ esa akɛ amɛhe atse yɛ mumɔŋ kɛ jeŋba mli, ni amɛfee falefale hu. Nyɔŋmɔ yɛ krɔŋkrɔŋ. Enɛ hewɔ lɛ, efã Israelbii lɛ akɛ amɛhã nsara lɛ mli atse. Esa akɛ wɔ hu wɔhe atse koni Yehowa ‘akana hiɛgbejianii ko’ yɛ wɔteŋ.​—5 Mo. 23:14.

⁹ Biblia lɛ tsɔɔ akɛ kɛ́ mɔ ko yɛ krɔŋkrɔŋ lɛ, esa akɛ efee falefale hu. Akɛ nɔkwɛmɔnɔ lɛ, Paulo ŋma akɛ: “Nyɛ mɛi ni asumɔɔ, . . . nyɛhãa wɔjiea nɔ fɛɛ nɔ ni woɔ mɔ he muji yɛ heloŋ kɛ jwɛŋmɔ mli lɛ kɛjea wɔhe, ni wɔhã wɔkrɔŋkrɔŋfeemɔ lɛ aye emuu yɛ Nyɔŋmɔ gbeyeishemɔ mli.” (2 Kor. 7:1) No hewɔ lɛ, esa akɛ Kristofoi hii kɛ yei aju amɛhe daa ni amɛfɔ amɛtadei ahe koni amɛhe atse be fɛɛ be. Eyɛ mli akɛ esoro shihilɛi ni yɔɔ maŋ fɛɛ maŋ nɔ moŋ, shi bei pii lɛ, wɔbaanyɛ wɔná samala kɛ nu bɔ ni sa koni wɔhã wɔhe atse, ni wɔkwɛ ni wɔbii hu ahe atse.

¹⁰ Akɛni wɔkɛ wɔhe woɔ shiɛmɔ nitsumɔ lɛ mli hewɔ lɛ, ale wɔ waa yɛ wɔkutsei lɛ amli. Kɛ́ wɔto nibii ni yɔɔ wɔshĩai lɛ amli kɛ amɛhewɔ lɛ fɛɛ he gbɛjianɔ jogbaŋŋ ni wɔhã amɛhe tse ni amɛfee falefale lɛ, no po yeɔ akutsoŋbii lɛ odase. Weku lɛ mli bii lɛ fɛɛ baanyɛ aye abua ni afee enɛ. Esa akɛ nyɛmimɛi hii titri akwɛ ni amɛsaa shĩa lɛ kɛ ehewɔ fɛɛ falefale, ejaakɛ kɛ́ akura shĩa lɛ kɛ ehewɔ fɛɛ jogbaŋŋ lɛ, ehãa mɛi náa bulɛ amɛhãa shĩabii lɛ. Kɛ́ weku yitsei fee enɛ ni amɛnyiɛ weku lɛ hiɛ yɛ Nyɔŋmɔjamɔ saji amli hu lɛ, no tsɔɔ akɛ amɛmiikwɛ amɛ diɛŋtsɛ amɛshĩai anɔ jogbaŋŋ. (1 Tim. 3:4, 12) Eji nyɛmimɛi yei lɛ hu asɔ̃ akɛ amɛkwɛ nibii anɔ jogbaŋŋ, titri lɛ yɛ shĩa lɛ mli. (Tito 2:4, 5) Kɛ́ atsɔse gbekɛbii lɛ jogbaŋŋ lɛ, amɛbaahã amɛhe atse, ni amɛbaato nibii ni yɔɔ amɛtsũi lɛ amli lɛ jogbaŋŋ ni amɛbaafee jɛmɛ hu falefale. Kɛ́ weku lɛ mli bii lɛ ateŋ mɔ fɛɛ mɔ tsu egbɛfaŋnɔ lɛ, ehãa weku muu lɛ fɛɛ he tseɔ ni efeɔ falefale. Falefalefeemɔ he baahia waa yɛ jeŋ hee ni Nyɔŋmɔ Maŋtsɛyeli lɛ baaye nɔ lɛ mli.

¹¹ Ŋmɛnɛ lɛ, Yehowa webii lɛ ateŋ mɛi babaoo taa tsɔji amli kɛyaa kpeei. Yɛ hei komɛi lɛ, shihilɛi ni yɔɔ jɛmɛ lɛ biɔ ni ata tsɔne mli kɛya shiɛmɔ. Esa akɛ ahã tsɔne lɛ he kɛ emli fɛɛ atse ni akwɛ akɛ ehe nɔ fɛɛ nɔ miitsu nii jogbaŋŋ lo. Esa akɛ wɔshĩai kɛ wɔtsɔji ahã ana akɛ wɔfata Yehowa webii ni yɔɔ krɔŋkrɔŋ ni he tse lɛ ahe. Ni nakai nɔŋŋ esa akɛ wɔhã wɔshiɛmɔyaa baagi kɛ Biblia lɛ he atse.

¹² Esa akɛ wɔtadewoo kɛ wɔhesaamɔ kɛ Nyɔŋmɔ shishitoo mlai lɛ akpã gbee. Kɛ́ wɔmiiya hiɛnaanɔ gbɔmɔ ko hiɛ lɛ, ani wɔbaasaa wɔhe basabasa loo wɔbaawo atadei komɛi kɛkɛ kɛya? Dabi kwraa! Enyiɛ nɔŋŋ ni esaaa akɛ wɔsaa wɔhe jogbaŋŋ kɛ́ wɔyaadamɔ Yehowa najiaŋ yɛ shiɛmɔ nitsumɔ lɛ mli loo yɛ wiemɔ kpoku lɛ nɔ! Bɔ ni wɔsaa wɔhe wɔhãa kɛ atade henɔi ni wɔwoɔ lɛ baanyɛ aná bɔ ni mɛi naa Yehowa jamɔ amɛhãa lɛ nɔ hewalɛ. Esa akɛ wɔkɛ hiɛ ni gboɔ nɔ awula wɔhe, ni esaaa akɛ wɔkɛ wɔhesaamɔ tɔ̃tɔɔ mɛi anane. (Mika 6:8; 1 Kor. 10:31-33; 1 Tim. 2:9, 10) No hewɔ lɛ, kɛ́ wɔmiisaa wɔhe koni wɔya shiɛmɔ loo asafoŋ kpee, kpokpaa nɔ kpee, loo kpee wulu ko lɛ, esa akɛ wɔhã nɔ ni Ŋmalɛ lɛ kɛɔ yɛ falefalefeemɔ kɛ bɔ ni esa akɛ wɔkɛ hiɛ ni gboɔ nɔ awula wɔhe lɛ he lɛ ahi wɔjwɛŋmɔŋ. Wɔmiisumɔ ni be fɛɛ be lɛ, wɔkɛ woo ahã Yehowa ni wɔwo ehiɛ nyam.

¹³ Kɛ́ wɔyaasara Yehowa Odasefoi anitsumɔhe yitso lɛ loo nitsumɔhe niji lɛ eko lɛ, esa akɛ wɔkɛ shishitoo mlai nɛɛ nɔŋŋ atsu nii. Kaimɔ akɛ, gbɛ́i Betel lɛ shishi ji “Nyɔŋmɔ Shĩa.” No hewɔ lɛ, kɛ́ wɔmiiya jɛmɛ lɛ, esa akɛ wɔsaa wɔhe ni wɔba wɔjeŋ tamɔ bɔ ni wɔfeɔ kɛ́ wɔtee kpeei yɛ Maŋtsɛyeli Asa lɛ nɔ lɛ.

¹⁴ Kɛ́ wɔmiijie wɔhiɛtserɛ loo wɔmiiwo wɔtsui fioo po lɛ, esa akɛ wɔhã wɔhiɛ ahi wɔtadewoo kɛ wɔhesaamɔ nɔ. Wɔbaanyɛ wɔbi wɔhe akɛ, ‘Ani mihesaamɔ lɛ baahã efee mi hiɛgbele akɛ maye mɛi odase?’

¹⁵ Ehe miihia ni wɔjɔɔ wɔhe ni wɔjie wɔhiɛtserɛ yɛ be kɛ beiaŋ bɔ ni afee ni wɔná gbɔmɔtsoŋ hewalɛ kpakpa ni wɔnyɛ wɔjwɛŋ nibii anɔ jogbaŋŋ. Be ko lɛ Yesu fɔ̃ ekaselɔi lɛ nine koni amɛfata ehe kɛya he ko banee ‘ni amɛyajɔɔ amɛhe fioo.’ (Mar. 6:31) Kɛ́ wɔjɔɔ wɔhe ni wɔshwɛ loo wɔjie wɔhiɛtserɛ lɛ, ehãa wɔtsakeɔ wɔshihilɛ lɛ mli fioo ni wɔtsui nyɔɔ wɔmli. Ebaanyɛ ehã wɔná hewalɛ hee koni wɔnyɛ wɔyatsa nitsumɔ ni wɔtsuɔ lɛ nɔ.

¹⁶ Ŋmɛnɛ lɛ, akɛni nibii babaoo yɛ ni wɔbaanyɛ wɔfee kɛjie wɔhiɛtserɛ hewɔ lɛ, esa akɛ wɔhala nibii nɛɛ amli ni wɔkɛ hiɛshikamɔ ni jɛ Nyɔŋmɔ ŋɔɔ lɛ atsu nibii ni wɔfeɔ lɛ ahe nii. Hiɛtserɛjiemɔ he miihia, shi jeee no ji nɔ ni esa akɛ wɔkɛ wɔjwɛŋmɔ aya nɔ titri yɛ wɔshihilɛ mli. Abɔ wɔ kɔkɔ akɛ, yɛ “naagbee gbii lɛ” amli lɛ, gbɔmɛi baatsɔmɔ “mɛi ni sumɔɔ shwɛmɔ-kɛ-ŋɔɔmɔ moŋ fe Nyɔŋmɔ.” (2 Tim. 3:1, 4) Nibii ni mɛi kɛjieɔ amɛhiɛtserɛ lɛ ateŋ babaoo ji nibii ni esaaa kɛhã mɛi ni miisumɔ ni amɛhi shi yɛ Yehowa taomɔ nii ni ja lɛ anaa.

¹⁷ Ehe bahia ni blema Kristofoi lɛ akwɛ jogbaŋŋ koni mɛi ni ebɔle amɛ ni sumɔɔ shwɛmɔ-kɛ-ŋɔɔmɔ lɛ asui gbohii lɛ akaná amɛnɔ hewalɛ. Yɛ Romabii lɛ ashwɛmɔhei lɛ, awaa mɛi ayi kɛjieɔ mɛi ni eba nikwɛmɔ lɛ ahiɛtserɛ. Ayeɔ mɛi awui, ashwieɔ mɛi alá shi, ni mɛi kɛ amɛhe woɔ bɔlɛnamɔ jeŋba sha mli kɛjieɔ maŋbii lɛ ahiɛtserɛ, shi blema Kristofoi lɛ tsi amɛhe kwraa kɛje nibii nɛɛ ahe. Ŋmɛnɛ lɛ, nibii ni mɛi kɛjieɔ amɛhiɛtserɛ lɛ ateŋ babaoo eyi kɛ nibii ni tamɔ nɛkɛ, ni mɛi nyaa he waa. Esa akɛ ‘wɔhiɛ ahi wɔhe nɔ jogbaŋŋ’ yɛ wɔnifeemɔi fɛɛ amli, ni wɔtsi wɔhe kɛje hiɛtserɛjiemɔi ni baanyɛ ahã wɔkase jeŋbai gbohii lɛ ahe. (Efe. 5:15, 16; Lala 11:5) Kɛ́ hiɛtserɛjiemɔ lɛ hi po lɛ, ekolɛ shihilɛ mli ni afeɔ yɛ lɛ baanyɛ afee nɔ ni esaaa.​—1 Pet. 4:1-4.

¹⁸ Hiɛtserɛjiemɔi srɔtoi ni sa yɛ ni Kristofoi baanyɛ amɛkɛ amɛhe awo mli. Mɛi babaoo ená Ŋmalɛ mli shishitoo mlai kɛ ŋaawoi ni sa ni yɔɔ wɔwoji lɛ amli ni amɛkɛtsu nii lɛ ahe sɛɛ.

¹⁹ Bei komɛi lɛ, afɔ̃ɔ wekui fioo komɛi nine kɛyaa shĩa ko kɛhã Kristofoi ahenaabuamɔ. Aloo abaanyɛ afɔ̃ nyɛmimɛi hii kɛ yei nine kɛhã yookpeemɔ okpɔlɔŋmɛɛ ko loo henaabuamɔ ko ni tamɔ nakai. (Yoh. 2:2) Nibii ni baaya nɔ yɛ okpɔlɔŋmɛɛ lɛ shishi lɛ he sɔ̃ kã mɔ ni ŋmɛ okpɔlɔ lɛ nɔ. Ŋwanejee ko bɛ he akɛ, kɛ́ mɛi babaoo bua amɛhe naa kɛhã hiɛtserɛjiemɔ lɛ, esa akɛ akwɛ jogbaŋŋ yɛ nɔ ni baaya nɔ yɛ nifeemɔ lɛ shishi lɛ he. Akɛni yɛ henaabuamɔi ni tamɔ nɛkɛ ashishi lɛ, mɔ fɛɛ mɔ he jɔɔ lɛ ni enáa ehewɔ miishɛɛ hewɔ lɛ, mɛi komɛi ŋɔɔ hegbɛ lɛ kɛfeɔ fu, amɛnuɔ dãa fe nine, ni amɛfeɔ nibii krokomɛi ni esaaa Kristofoi. Amɛteŋ mɛi komɛi po kɛ amɛhe woɔ efɔŋfeemɔi krokomɛi ni yɔɔ hiɛdɔɔ amli. Enɛ hewɔ lɛ, Kristofoi ni hiɛ kã shi lɛ ena akɛ, ebaafee nɔ ni sa jogbaŋŋ akɛ amɛbaafɔ̃ mɛi fioo ko nine kɛhã hiɛtserɛjiemɔi ni amɛkaye bei pii hu yɛ henaabuamɔi nɛɛ ashishi. Kɛ́ abaanu dãa ni wa yɛ henaabuamɔ lɛ shishi lɛ, esaaa akɛ anuɔ lɛ pii. (Fip. 4:5) Kɛ́ afee bɔ fɛɛ bɔ ni abaanyɛ koni henaabuamɔi kɛhã hiɛtserɛjiemɔ afee nɔ ni sa ni tswaa mɔ emaa shi yɛ mumɔŋ lɛ, niyenii kɛ dãa efeŋ nɔ ni he hiaa titri.

²⁰ Ehi jogbaŋŋ akɛ wɔbaafee mɛi gbɔ. (1 Pet. 4:9) Kɛ́ wɔmiifɔ̃ Kristofoi krokomɛi nine kɛba wɔshĩa kɛhã niyeli, hiɛtserɛjiemɔ, naanyobɔɔ loo koni amɛbawo amɛtsui fioo lɛ, esa akɛ wɔhã mɛi ni ehia amɛ lɛ ahi wɔjwɛŋmɔŋ. (Luka 14:12-14) Kɛ́ afɔ̃ wɔ nine kɛtee henaabuamɔi ni tamɔ nɛkɛ lɛ ashishi lɛ, esa akɛ wɔnifeemɔ kɛ shishitoo mla ni yɔɔ Marko 12:31 lɛ akpã gbee. Ehi jogbaŋŋ akɛ wɔbaada mɛi ashi yɛ mlihilɛ ni amɛjieɔ lɛ kpo amɛtsɔɔ wɔ lɛ hewɔ.

²¹ Kristofoi amii shɛɔ amɛhe yɛ nibii babaoo ni Nyɔŋmɔ kɛdroɔ amɛ, kɛ le ni amɛle akɛ amɛbaanyɛ ‘amɛye ni amɛnu ni amɛná nii ni amɛtsuɔ waa lɛ fɛɛ mli ŋɔɔmɔ’ lɛ hewɔ. (Jaj. 3:12, 13) Kɛ́ mɛi ni ŋmɛɔ okpɔlɔ lɛ kɛ mɛi ni afɔ̃ amɛ nine kɛba okpɔlɔŋmɛɛ lɛ shishi lɛ fɛɛ ‘fee nibii fɛɛ kɛwo Nyɔŋmɔ hiɛ nyam’ lɛ, sɛɛ mli kɛ́ amɛkai nibii ni tee nɔ lɛ, amɛtsui baanyɔ amɛmli akɛ henaabuamɔ lɛ etswa amɛ ema shi yɛ mumɔŋ.

²² Yehowa Odasefoi abii náa wolokasemɔ ni mla biɔ ni mɔ fɛɛ mɔ nine ashɛ nɔ lɛ he sɛɛ. Kɛ́ amɛmiiya skul lɛ, amɛbɔɔ mɔdɛŋ koni amɛkase nikanemɔ kɛ niŋmaa jogbaŋŋ. Nibii krokomɛi ni akaseɔ yɛ skul lɛ he baanyɛ aba sɛɛnamɔ kɛhã amɛ be ni amɛtiuɔ mumɔŋ otii asɛɛ lɛ. Akɛ oblahii kɛ oblayei ni miiya skul lɛ, amɛbɔɔ mɔdɛŋ jogbaŋŋ ‘kɛkaiɔ amɛ-Bɔlɔ Kpele lɛ’ kɛtsɔ mumɔŋ nibii ni amɛkɛyeɔ klɛŋklɛŋ gbɛhe lɛ nɔ.​—Jaj. 12:1.

²³ Kɛ́ oji oblanyo loo oblayoo ni miiya skul lɛ, kwɛmɔ ohe nɔ jogbaŋŋ koni okɛ je lɛŋ oblahii kɛ oblayei lɛ akabɔ yɛ shihilɛi ni ehe ehiaaa ni okɛ amɛ abɔ lɛ amli. (2 Tim. 3:1, 2) Akɛni Yehowa miifee nɔ fɛɛ nɔ ni ehe miihia ni efee koni ekɛbu wɔhe hewɔ lɛ, esa akɛ ofee bɔ fɛɛ bɔ ni obaanyɛ koni je lɛŋ sui gbohii lɛ akaná onɔ hewalɛ. (Lala 23:4; 91:1, 2) No hewɔ lɛ, okɛ nibii ni Yehowa kɛdro bo lɛ atsu nii kɛbu ohe.​—Lala 23:5.

²⁴ Odasefoi oblahii kɛ oblayei ni yaa skul lɛ ateŋ mɛi babaoo ekpɛ mli akɛ amɛkɛ amɛhe woŋ nifeemɔi krokomɛi ni afeɔ yɛ skul ni fataaa skul nikasemɔ lɛ he lɛ amli, bɔ ni afee ni amɛtse amɛhe kɛje je lɛ he. Ekolɛ amɛklasbii lɛ kɛ amɛtsɔɔlɔi lɛ nuŋ amɛyiŋkpɛɛ nɛɛ shishi. Shi Nyɔŋmɔ hiɛ ni wɔbaasa lɛ ji nɔ ni he hiaa. Enɛ tsɔɔ akɛ obaajɛ ohenilee ni okɛ Biblia lɛ etsɔse lɛ lɛ mli okpɛ mli akɛ okɛ ohe woŋ akaŋ ni ashĩɔ yɛ je lɛŋ lɛ kɛ maŋhedɔɔ nifeemɔi ni yaa nɔ yɛ mli lɛ amli. (Gal. 5:19, 26) Oblahii kɛ oblayei, kɛ́ nyɛkɛ Ŋmalɛ mli gbɛtsɔɔmɔi ni nyɛfɔlɔi ni ji Kristofoi lɛ kɛhãa nyɛ lɛ tsu nii, ni nyɛkɛ mɛi ni yɔɔ asafo lɛ mli ni feɔ nɔkwɛmɔnɔ kpakpa lɛ bɔ lɛ, nyɛbaanyɛ nyɛhi shi yɛ Yehowa taomɔ nii ni ja lɛ anaa.

²⁵ Ŋmalɛ lɛ kɛ sɔ̃ etere weku yitsei akɛ amɛkwɛ amɛ diɛŋtsɛ amɛshĩabii. (1 Tim. 5:8) Fɛɛ sɛɛ lɛ, akɛ Nyɔŋmɔ sɔɔlɔi lɛ, amɛle akɛ esaaa akɛ amɛkɛ amɛheloonaa nitsumɔ yeɔ Maŋtsɛyeli lɛ he nibii lɛ ni amɛbaatiu sɛɛ lɛ hiɛ. (Mat. 6:33; Rom. 11:13) Akɛni amɛjieɔ Nyɔŋmɔjamɔ su kpo ni amɛmii shɛɔ niyenii kɛ atadei ni amɛyɔɔ lɛ ahe hewɔ lɛ, amɛyeee amɛtsui tuutu yɛ heloonaa nibii ahe, ni no hewɔ lɛ, amɛgbeee tsɔne ni mɛi ni tiuɔ heloonaa nibii asɛɛ lɛ gbeɔ mli lɛ eko mli.​—1 Tim. 6:6-10.

²⁶ Esa akɛ Kristofoi fɛɛ ni ejɔɔ amɛhe nɔ ni tsuɔ heloonaa nitsumɔ lɛ ale Ŋmalɛ mli shishitoo mlai jogbaŋŋ. Bɔ ni afee ni wɔjɛ anɔkwayeli mli wɔná wɔdaaŋ ŋmaa lɛ, esaaa akɛ wɔkɛ wɔhe woɔ nifeemɔi ni kuɔ Nyɔŋmɔ mla lɛ loo maŋ ni wɔyɔɔ nɔ lɛ mla lɛ mli. (Rom. 13:1, 2; 1 Kor. 6:9, 10) Wɔle oshãrai ni yɔɔ naanyobɔɔ fɔŋ he. Akɛni wɔji Kristo asraafoi hewɔ lɛ, wɔkɛ wɔhe wooo jarayeli nifeemɔi ni kɛ Nyɔŋmɔ taomɔ nii kpãaa gbee, loo ebaanyɛ ehã wɔkɛ wɔhe awo pɔlitis kɛ maŋ saji amli, loo ebaanyɛ efite wekukpãa ni yɔɔ wɔ kɛ Yehowa teŋ lɛ amli. (Yes. 2:4; 2 Tim. 2:4) Ni wɔkɛ “Babilon Kpeteŋkpele lɛ,” ni ji jamɔi fɛɛ ni Nyɔŋmɔ nyɛɔ lɛ, bɛ nɔ ko feemɔ kwraa.​—Kpo. 18:2, 4; 2 Kor. 6:14-17.

²⁷ Kɛ́ wɔhi shi yɛ Nyɔŋmɔ taomɔ nii ni ja lɛ anaa lɛ, wɔyeŋ jara yɛ teokrase henaabuamɔi ashishi, ni wɔyeŋ wɔnyɛmimɛi lɛ ahe nii. Yiŋtoo pɛ hewɔ ni wɔkɛ wɔnyɛmimɛi Kristofoi lɛ bɔɔ yɛ asafoŋ kpeei, kpokpaa nɔ kpeei, kɛ kpeei wuji ashishi ji, ni wɔjá Yehowa. Kpeei nɛɛ hãa wɔyeɔ nii yɛ okpɔlɔ ni Yehowa eŋmɛ lɛ shishi, ni ‘wɔwowoɔ wɔhe hewalɛ.’ (Rom. 1:11, 12; Heb. 10:24, 25) Esa akɛ nibii ni wɔbaafee yɛ mumɔŋ okpɔlɔŋmɛi nɛɛ ashishi lɛ afee nibii ni baahã wekukpaa ni yɔɔ wɔ kɛ Yehowa teŋ lɛ mli awa.

²⁸ Yehowa taomɔ nii ni ja lɛ hu biɔ ni ewebii lɛ ‘ahiɛ ekomefeemɔ ni amɛtsɔ mumɔ lɛ nɔ amɛná lɛ mli, yɛ toiŋjɔlɛ ni tamɔ kpãa ni fĩɔ amɛ efeɔ amɛ ekome lɛ mli.’ (Efe. 4:1-3) Esa akɛ wɔteŋ mɔ fɛɛ mɔ abɔ mɔdɛŋ atao nibii ni baahi kɛhã mɛi krokomɛi moŋ fe ni ebaatao nɔ ni baasa lɛ pɛ ehiɛ. (1 Tes. 5:15) Ekã shi faŋŋ akɛ, osafoŋbii lɛ jieɔ su ni tamɔ nɛkɛ kpo. Ekɔɔɔ he eko weku loo maŋ nɔ ni wɔjɛ, shihilɛ mli ni atsɔse wɔ yɛ, shika abɔ ni wɔyɔɔ, loo he ni wɔtee skul kɛyashɛ lɛ, esa akɛ wɔ fɛɛ wɔhi shi yɛ jalɛ taomɔ nii kome too lɛ nɔŋŋ naa. Mɛi ni jeee Odasefoi po eyɔse su ni nɔ bɛ ni Yehowa webii jieɔ lɛ kpo nɛɛ.​—1 Pet. 2:12.

²⁹ Bɔfo Paulo hu ma nɔ hewɔ ni esa akɛ wɔfee ekome lɛ nɔ mi. Eŋma akɛ: “Gbɔmɔtso kome yɔɔ, kɛ mumɔ kome, tamɔ bɔ nɔŋŋ ni hiɛnɔkamɔ kome ji nɔ ni yɔɔ tsɛmɔ ni akɛtsɛ nyɛ lɛ mli lɛ; Nuŋtsɔ kome, hemɔkɛyeli kome, baptisimɔ kome; Nyɔŋmɔ kome kɛ mɛi fɛɛ a-Tsɛ kome, mɔ ni ta nii fɛɛ nɔ, ni etsɔɔ mɛi fɛɛ anɔ etsuɔ nii, ni etsuɔ nii yɛ mɛi fɛɛ amli lɛ.” (Efe. 4:4-6) Enɛ baabi ni wɔ fɛɛ wɔnu Biblia mli tsɔɔmɔi ni esa akɛ ale klɛŋklɛŋ lɛ kɛ Biblia mli tsɔɔmɔi ni mli kwɔlɔ lɛ ashishi yɛ gbɛ kome nɔ, koni no atsɔɔ akɛ wɔkpɛlɛɔ Yehowa nɔ akɛ wɔ-Nɔyelɔ. Anɔkwa, Yehowa etsɔɔ ewebii lɛ anɔkwale lɛ he wiemɔ krɔŋŋ lɛ koni amɛfee ekome kɛsɔmɔ lɛ.​—Zef. 3:9.

³⁰ Ekomefeemɔ kɛ toiŋjɔlɛ ni yɔɔ Kristofoi asafo lɛ mli lɛ hãa mɛi fɛɛ ni jáa Yehowa lɛ ahe jɔɔ amɛ. Yehowa shiwoo ni nyiɛ sɛɛ nɛɛ eba mli yɛ wɔgbɛfaŋ, akɛ: “Mafee amɛ ekome, tamɔ gwantɛŋi yɛ toi atsũ mli.” (Mika 2:12) Esa akɛ wɔhi shi yɛ Yehowa taomɔ nii ni ja lɛ anaa koni ekomefeemɔ kɛ toiŋjɔlɛ nɛɛ aya nɔ ahi wɔteŋ.

³¹ Mɛi ni akpɛlɛ amɛnɔ kɛba Yehowa asafo ni he tse lɛ mli lɛ yɛ miishɛɛ! Sɛɛnamɔ yɛ he akɛ wɔbaafee nɔ fɛɛ nɔ ni wɔbaanyɛ koni Yehowa gbɛ́i lɛ aya nɔ akã wɔnɔ. Wɔbaabɔ mɔdɛŋ fɛɛ ni wɔbaanyɛ koni wɔya nɔ wɔhi shi yɛ Yehowa taomɔ nii ni ja lɛ anaa ni wɔjie yi hu wɔhã mɛi krokomɛi koni wekukpaa kpakpa aya nɔ ahi wɔ kɛ Yehowa teŋ.​—2 Kor. 3:18.