Tsɛ kɛ Onukpa—Nitsumɔi Enyɔ lɛ Fɛɛ ni Aaatsu he Nii
“Shi kɛ mɔ ko leee lɛ diɛŋtsɛ ewe nɔ yeli lɛ, te eeefee tɛŋŋ ekwɛ Nyɔŋmɔ asafo lɛ huŋ?” —1 TIMOTEO 3:5.
1, 2. (a) Te fee tɛŋŋ ni nɔkwɛlɔi oshijafoi kɛ nɔkwɛlɔi ni ebote gbalashihilɛ mli ni bɛ bii lɛ nyɛ amɛsɔmɔ amɛ nyɛmimɛi lɛ yɛ klɛŋklɛŋ afii oha lɛ mli? (b) Akwila kɛ Priskila ji nɔkwɛmɔ nɔ kɛha hefatalɔi ni ebote gbalashihilɛ mli ŋmɛnɛ lɛ yɛ mɛɛ gbɛ nɔ?
NƆKWƐLƆI ni yɔɔ klɛŋklɛŋ Kristofoi asafo lɛ mli lɛ baanyɛ afee hii oshijafoi, loo hii ni ebote gbalashihilɛ mli ni bɛ bii, loo hii ni yɔɔ weku kɛ bii. Ŋwanejee ko bɛ he akɛ, nakai Kristofoi lɛ ateŋ mɛi komɛi nyɛ amɛnyiɛ bɔfo Paulo ŋaawoo ni ekɛha yɛ eklɛŋklɛŋ wolo ni eŋma eyaha Korintobii lɛ, yitso 7 lɛ sɛɛ, ni amɛhi shi akɛ oshijafoi. Yesu ekɛɛ akɛ: “Osaii lɛ ekrokomɛi hu yɛ ni ŋwɛi maŋtsɛyeli lɛ hewɔ amɛ diɛŋtsɛ amɛsa amɛhe.” (Mateo 19:12) Nɛkɛ oshijafoi nɛɛ, ni tamɔ Paulo kɛ ekolɛ enanemɛi ni ekɛ amɛ fãa gbɛ lɛ ateŋ mɛi komɛi yɛ heyeli ni amɛkɛaafã gbɛ amɛyaye amɛbua amɛ nyɛmimɛi lɛ.
2 Kɛ́ Barnaba, Marko, Sila, Luka, Timoteo, kɛ Tito ji oshijafoi lɛ, Biblia lɛ ewieee he. Kɛji akɛ ámɛbote gbalashihilɛ mli hu lɛ, belɛ eyɛ faŋŋ akɛ ámɛye amɛhe kɛjɛ weku mli gbɛnaa nii ahe bɔ ni amɛaanyɛ amɛfã gbɛ kɛya shɔŋŋ, kɛyatsu nitsumɔi sɔrɔtoi. (Bɔfoi lɛ Asaji 13:2; 15:39-41; 2 Korintobii 8:16, 17; 2 Timoteo 4:9-11; Tito 1:5) Kulɛ amɛ ŋamɛi baanyɛ afata amɛhe, tamɔ Petro kɛ “bɔfoi krokomɛi lɛ,” ni eyɛ faŋŋ akɛ, amɛŋɔ amɛ ŋamɛi amɛfata amɛhe beni amɛjɛɔ he kome kɛyaa he kroko lɛ. (1 Korintobii 9:5) Akwila kɛ Priskila ji gbalashihilɛ mli hefatalɔi ni miisumɔ ni amɛfã kɛyahi he kroko, amɛnyiɛ Paulo sɛɛ kɛjɛ Korinto kɛtee Efeso, kɛkɛ ni amɛfã kɛtee Roma, ni amɛku amɛsɛɛ amɛba Efeso ekoŋŋ. Biblia lɛ ewieee bii ni amɛyɔɔ loo amɛbɛ he. Amɛ hetuu-kɛhamɔ sɔɔmɔ lɛ ha nyɛmimɛi lɛ kɛ “jeŋmaji lɛ amli asafoi lɛ fɛɛ” hu da amɛ shi. (Romabii 16:3-5; Bɔfoi lɛ Asaji 18:2, 18; 2 Timoteo 4:19) Ŋwanejee ko bɛ he akɛ, gbalashihilɛ mli hefatalɔi pii ni tamɔ Akwila kɛ Priskila yɛ ŋmɛnɛ, ni amɛbaanyɛ amɛsɔmɔ asafoi krokomɛi, ekolɛ kɛtsɔ he ni hiamɔ lɛ da yɛ ni amɛaafã kɛya jɛmɛ lɛ nɔ.
Tsɛ kɛ Onukpa
3. Mɛni tsɔɔ akɛ klɛŋklɛŋ afii oha lɛ mli onukpai lɛ ateŋ mɛi pii ji hii ni ebote gbalashihilɛ mli ni yɔɔ wekui?
3 Ekolɛ etamɔ nɔ ni Kristofoi onukpai ni yɔɔ Ŋ.B. klɛŋklɛŋ afii oha lɛ mli lɛ ateŋ mɛi ni fa ebote gbalashihilɛ mli, ni amɛyɛ bii. Beni Paulo kɛ hesaai ni ataoɔ kɛjɛɔ nuu ni “miitao nɔkwɛmɔ nitsumɔ” lɛ dɛŋ mamɔɔ shi lɛ, etsɔɔ akɛ, esa akɛ Kristofonyo ni tamɔ nɛkɛ afee “mɔ ni yeɔ lɛ diɛŋtsɛ ewe nɔ jogbaŋŋ, ni ebii boɔ lɛ toi kɛ woo fɛɛ.”—1 Timoteo 3:1, 4.
4. Mɛni ataoɔ yɛ onukpai ni ebote gbalashihilɛ mli ni yɔɔ bii lɛ adɛŋ?
4 Taakɛ wɔna lɛ, abiii ni nɔkwɛlɔ lɛ ana bii, loo efee mɔ ni ebote gbalashihilɛ mli po. Shi kɛ ebote gbalashihilɛ mli, ni ehe aaasa akɛ onukpa loo asafoŋ sɔɔlɔ lɛ, esa akɛ Kristofonyo lɛ kɛ yitsoyeli lɛ atsu nii yɛ gbɛ ni sa ni suɔmɔ yɔɔ mli nɔ yɛ eŋa nɔ, ni ejie ehe kpo akɛ mɔ ni nyɛɔ ehaa ebii baa amɛhe shi yɛ gbɛ ni sa nɔ. (1 Korintobii 11:3; 1 Timoteo 3:12, 13) Gbɔjɔmɔ ko ni yɔɔ hiɛdɔɔ ni aaana yɛ ewe nɔkwɛmɔ mli lɛ haŋ nyɛmi nuu lɛ he asa kɛha hegbɛi krɛdɛɛ yɛ asafo lɛ mli. Mɛni hewɔ? Paulo tsɔɔ mli akɛ: “Shi kɛ mɔ ko leee lɛ diɛŋtsɛ ewe nɔ yeli lɛ, te eeefee tɛŋŋ ekwɛ Nyɔŋmɔ asafo lɛ huŋ?” (1 Timoteo 3:5) Kɛ lɛ diɛŋtsɛ eheloo naa weku lɛ sumɔɔɔ ni amɛbaa amɛhe shi amɛhaa enɔkwɛmɔ lɛ, te mɛi krokomɛi aaafee amɛnii yɛ he amɛha tɛŋŋ?
“Ni Yɔɔ Bii ni Heɔ Yeɔ”
5, 6. (a) Mɛɛ taomɔ nii ni kɔɔ bii ahe Paulo tsĩ tã etsɔɔ Tito? (b) Mɛni akpaa gbɛ yɛ onukpai ni yɔɔ bii lɛ adɛŋ?
5 Beni efãa Tito ni ehala nɔkwɛlɔi yɛ Kreta asafoi lɛ amli lɛ, Paulo fã akɛ: “Kɛ mɔ ko yɛ ni kpa ko bɛ ehe, ni eji mɔ ni yɔɔ ŋa kome, ni yɔɔ bii ni heɔ yeɔ, ni awieee amɛhe akɛ nyenyeŋtswibɔlɔi loo toigbolɔi ji amɛ lɛ. Ejaakɛ esa akɛ nɔkwɛlɔ lɛ kpa ko akahi ehe, akɛni Nyɔŋmɔ we nɔ tsulɔnukpa ji lɛ hewɔ lɛ.” Mɛni kwraa ji nɔ ni akɛ taomɔ nii “ni yɔɔ bii ni heɔ yeɔ” lɛ tsɔɔ?—Tito 1:6, 7.
6 Wiemɔ, “bii ni heɔ yeɔ” lɛ kɔɔ gbekɛbii ni amɛjɔɔ amɛ wala nɔ amɛha Yehowa momo ni abaptisi amɛ lɛ ahe, aloo gbekɛbii ni miiya amɛhiɛ kɛmiishɛ henɔjɔɔmɔ kɛ baptisimɔ he. Asafo lɛ mli bii kpaa onukpai lɛ abii agbɛ ni amɛfee mɛi ni baa amɛjeŋ jogbaŋŋ, ni feɔ toiboo. Esa akɛ efee faŋŋ akɛ, onukpa lɛ miifee nɔ fɛɛ nɔ ni eeenyɛ koni ekɛtswa ebii ahemɔkɛyeli ema shi. Maŋtsɛ Salomo ŋma akɛ: “Tsɔɔmɔ gbekɛ gbɛ ni sa akɛ etsɔ nɔ, ni kɛ egbɔ hu lɛ ejeŋ nɔ.” (Abɛi 22:6) Shi kɛji akɛ gbekɛ ni nine eshɛ tsɔsemɔ ni tamɔ nɛkɛ nɔ lɛ kpoo akɛ eeesɔmɔ Yehowa aloo efee efɔŋ ni hiɛdɔɔ yɔɔ mli hu?
7. (a) Mɛni hewɔ eka shi faŋŋ akɛ jeee mla ko ni yɔɔ keketee Abɛi 22:6 tsɔɔ lɛ? (b) Kɛji akɛ onukpa ko bi sumɔɔɔ Yehowa sɔɔmɔ lɛ, mɛni hewɔ hegbɛi ni onukpa lɛ yɔɔ lɛ ejeŋ edɛŋ amrɔ nɔŋŋ lɛ?
7 Eka shi faŋŋ akɛ abɛi ni atsɛ sɛɛ yɛ yiteŋgbɛ nɛɛ kɛ mla ni yɔɔ keketee ko emaaa shi. Efiteee shishitoo mla ni kɔɔ heyeli mli ni ajɛɔ afeɔ nii lɛ. (5 Mose 30:15, 16, 19) Kɛ binuu loo biyoo ko shɛ he ni ebaatere lɛ diɛŋtsɛ egbɛnaa nii lɛ, esa akɛ ekpɛ lɛ diɛŋtsɛ eyiŋ eha ehe yɛ henɔjɔɔmɔ kɛ baptisimɔ he. Kɛji akɛ onukpa ko kɛ mumɔŋ yelikɛbuamɔ, gbɛtsɔɔmɔ, kɛ tsɔsemɔ ni he hiaa lɛ eha yɛ faŋŋ mli, ni kɛlɛ gbekɛ lɛ sumɔɔɔ ni ehalaa akɛ eeesɔmɔ Yehowa lɛ, tsɛ lɛ efeŋ mɔ ni esaaa amrɔ nɔŋŋ akɛ esɔmɔɔ akɛ nɔkwɛlɔ. Yɛ gbɛ kroko nɔ lɛ, kɛji akɛ onukpa ko yɛ gbekɛbii babaoo yɛ eshia, ni amɛtsaraa nɔ kɛfeɔ mɛi ni he yeɔ yɛ mumɔŋ ni amɛboteɔ haomɔ mli lɛ, ekolɛ anyɛŋ abu lɛ akɛ “mɔ ni yeɔ lɛ diɛŋtsɛ ewe nɔ jogbaŋŋ” dɔŋŋ. (1 Timoteo 3:4) Sane lɛ ji, esa akɛ ana faŋŋ akɛ nɔkwɛlɔ ko miifee nɔ ni hi fe fɛɛ ni eeenyɛ, koni ena ‘bii ni heɔ yeɔ ni awieee amɛhe akɛ nyenyeŋtswibɔlɔi loo basabasa feelɔi.’a
Mɔ ni Yɔɔ “Ŋa ko ni Heee Yeee”
8. Te esa akɛ onukpa afee enii yɛ eŋa ni heee yeee lɛ he eha tɛŋŋ?
8 Paulo ŋma yɛ Kristofoi hii ni kɛ mɛi ni heee yeee ebote gbalashihilɛ mli lɛ ahe akɛ: “Kɛji nyɛmi ko yɛ ŋa ko ni heee yeee, ni kɛlɛ, ekpɛlɛ akɛ ekɛ lɛ aaahi shi lɛ, ekaŋmɛɛ ehe . . . Ejaakɛ atsuɔ yoo ni heee yeee lɛ he yɛ wu lɛ mli; ejaakɛ jeee nakai jikulɛ, nyɛbii lɛ hu he yɛ muji; shi agbɛnɛ lɛ amɛhe etse. . . . Aloo nuu, bo hu obaahere oŋa lɛ yiwala jiŋŋ, ole?” (1 Korintobii 7:12-14, 16) Wiemɔ, “heee yeee” ni yɔɔ biɛ lɛ kɔɔɔ ŋa ni bɛ jamɔ mli hemɔkɛyeli ko lɛ he, shi mɔ ni ejɔko ehe nɔ ehako Yehowa. Ebaanyɛ efee Yudanyo, loo mɔ ni heɔ wɔŋjalɔi anyɔŋmɔi eyeɔ. Ŋmɛnɛ, onukpa ko baanyɛ afee mɔ ni kɛ yoo ni diɔ jamɔ kroko sɛɛ, mɔ ni leee akɛ Nyɔŋmɔ yɛ loo ebɛ, loo mɔ ni heee yeee akɛ Nyɔŋmɔ yɛ po ebote gbalashihilɛ mli. Kɛ yoo lɛ miisumɔ ni ekɛ lɛ ahi shi lɛ, esaaa akɛ eshiɔ lɛ, yɛ amɛ hemɔkɛyelii ni yɔɔ sɔrɔto lɛ hewɔ. Esa akɛ eya nɔ ‘ekɛ lɛ ahi shi yɛ nilee naa, ni ekɛ woo awo lɛ akɛ mɔ ni he waaa tuutu ko,’ ekɛ lɛ miihi shi kɛ hiɛnɔkamɔ akɛ eeehere eyiwala.—1 Petro 3:7; Kolosebii 3:19.
9. Te esa akɛ onukpa afee enii yɛ shikpɔji ni mla kɛ hegbɛ haa wu kɛ ŋa fɛɛ akɛ amɛtsɔɔ amɛbii amɛ jamɔŋ hemɔkɛyelii lɛ he eha tɛŋŋ, ni enɛ baasa ehegbɛi ahe yɛ mɛɛ gbɛ nɔ?
9 Kɛ nɔkwɛlɔ ko yɛ bii lɛ, ekɛ wu kɛ tsɛ yitsoyeli ni sa baatsu nii ni ekɛtsɔse amɛ “yɛ Nuntsɔ [Yehowa, NW] tsɔsemɔ kɛ ŋaawoo lɛ mli.” (Efesobii 6:4) Maji pii yɛ ni mla lɛ kɛ hegbɛ haa gbalashihilɛ mli hefatalɔi enyɔ lɛ fɛɛ koni amɛkɛ jamɔ mli tsɔsemɔ aha amɛbii. Kɛ eba lɛ nɛkɛ lɛ, ŋa lɛ baabi ni ekɛ hegbɛ ni eyɔɔ lɛ atsu nii ni ekɛtsɔɔ ebii lɛ ejamɔ mli hemɔkɛyelii kɛ nifeemɔi, ni nɔ ni baanyɛ afata he ji esɔlemɔ ni ekɛ amɛ aaaya.b Shi, esa akɛ gbekɛbii lɛ adi amɛ diɛŋtsɛ amɛ henilee ni Biblia lɛ etsɔse lɛ lɛ sɛɛ, yɛ apasa jamɔ nifeemɔi ni amɛkɛ amɛhe woŋ mli lɛ mli. Akɛ weku yitso lɛ, tsɛ lɛ kɛ hegbɛ ni lɛ diɛŋtsɛ eyɔɔ lɛ baatsu nii ni ekɛ ebii lɛ akase nii, ni ekɛ amɛ aya kpeei yɛ Maŋtsɛyeli Asa lɛ nɔ kɛ hegbɛ lɛ ba. Kɛ amɛshɛ he ni amɛbaanyɛ amɛkpɛ amɛyiŋ lɛ, amɛ amɛbatsɔɔ gbɛ ni amɛbaatsɔ nɔ. (Yoshua 24:15) Kɛji akɛ enanemɛi onukpai lɛ kɛ asafo lɛ mli bii baanyɛ ana akɛ eefee nɔ fɛɛ nɔ ni mla lɛ ŋmɛɔ lɛ gbɛ ni efee yɛ ebii lɛ atsɔsemɔ yɛ anɔkwale lɛ mli yɛ gbɛ ni ja nɔ lɛ, aheŋ nɔkwɛlɔ ni eji lɛ kɛjɛŋ edɛŋ.
‘Mɔ ni Yeɔ Lɛ Diɛŋtsɛ Ewe Nɔ Jogbaŋŋ’
10. Kɛ nuu ni yɔɔ weku lɛ ji onukpa lɛ, mɛni baafee enitsumɔ titri?
10 Shi ejeee nitsumɔ ni yɔɔ mlɛo kɛha onukpa ni ji tsɛ, ni eŋa ji naanyo Kristofonyo lɛ, akɛ eeeja ebe kɛ ehiɛ ni hiɔ nɔ̃ nɔ lɛ mli jogbaŋŋ eha eŋa, ebii, kɛ asafoŋ gbɛnaa nii. Ŋmalɛi lɛ feɔ lɛ faŋŋ akɛ, tsɛ ni ji Kristofonyo lɛ yɛ gbɛnaa nii akɛ ekwɛ eŋa kɛ ebii anɔ. Paulo ŋma akɛ: “Shi kɛ mɔ ko kwɛɛɛ lɛ diɛŋtsɛ emɛi, titri lɛ, lɛ diɛŋtsɛ eshiabii lɛ, ekpa yɛ hemɔkɛyeli lɛ sɛɛ, ni efaŋ mɔ ni heee yeee fe lɛ.” (1 Timoteo 5:8) Paulo jaje yɛ nakai wolo lɛ nɔŋŋ mli akɛ, hii ni amɛbote gbalashihilɛ mli, ni amɛjie amɛhe kpo momo akɛ wumɛi kɛ tsɛmɛi kpakpai pɛ esa akɛ ajie amɛyi ni amɛsɔmɔ akɛ nɔkwɛlɔi.—1 Timoteo 3:1-5.
11. (a) Mɛɛ gbɛi anɔ esa akɛ onukpa lɛ ‘akwɛ lɛ diɛŋtsɛ emɛi’ lɛ yɛ? (b) Yɛ mɛɛ gbɛ nɔ enɛ baanyɛ aye abua onukpa lɛ ni etsu esafoŋ gbɛnaa nii ahe nii?
11 Esa akɛ onukpa lɛ ‘akwɛ’ lɛ diɛŋtsɛ enii anɔ, ni jeee yɛ heloonaa nibii amli pɛ, shi yɛ mumɔŋ kɛ henumɔŋ hu. Maŋtsɛ Salomo nilelɔ lɛ ŋma akɛ: “Saamɔ onitsumɔ yɛ agbó naa, ni ofee lɛ klalo oha ohe yɛ ŋmɔshi; no sɛɛ dani oma otsũ.” (Abɛi 24:27) No hewɔ lɛ, yɛ be mli ni ekɛ heloonaa, henumɔŋ, kɛ hiɛtserɛjiemɔ mli hiamɔ nii haa eŋa kɛ ebii lɛ, esa akɛ nɔkwɛlɔ lɛ hu atswa amɛ ema shi yɛ mumɔŋ. Enɛ heɔ be—be ni enyɛŋ etu eha asafoŋ saji. Shi be ji nɔ ni kɛ sɛɛnamɔ babaoo baaba yɛ weku miishɛɛnamɔ kɛ mumɔŋ nɔyaa gbɛfaŋ. Yɛ naagbee lɛ, kɛ eweku lɛ he wa yɛ mumɔŋ lɛ, ekolɛ ehe ebahiaŋ ni onukpa lɛ kɛ bei pii atsu weku mli naagbai ahe nii. Enɛ baaha ejwɛŋmɔŋ akã lɛ shi babaoo koni ekɛtsu asafoŋ saji ahe nii. Enɔkwɛmɔ nɔ akɛ wu kpakpa kɛ tsɛ kpakpa lɛ he baaba sɛɛnamɔ yɛ mumɔŋ aha asafo lɛ.—1 Petro 5:1-3.
12. Mɛɛ weku saji esa akɛ tsɛmɛi ni ji onukpai lɛ ato okadi kpakpa yɛ mli?
12 Be he gbɛjianɔ ni etoɔ koni ekwɛ weku nikasemɔ nɔ lɛ fata we nɔ ni ayeɔ jogbaŋŋ lɛ he. Ehe miihia titri ni onukpai ato okadi kpakpa yɛ enɛ feemɔ mli, ejaakɛ wekui ni he wa feɔ asafoi ni he wa. Esaaa akɛ sɔɔmɔ hegbɛi krokomɛi heɔ nɔkwɛlɔ lɛ be, be fɛɛ be, akɛ enaaa be ni ekɛ eŋa kɛ ebii akase nii. Kɛji akɛ nɛkɛ ji sane lɛ, no lɛ esa akɛ eku sɛɛ ekwɛ ebe he gbɛjianɔtoo lɛ mli ekoŋŋ. Ebaabi ni ekolɛ etsake ebe ni etuɔ ehaa saji krokomɛi lɛ mli, loo etse nɔ, ni ekakpɛ̃lɛ hegbɛi komɛi po nɔ yɛ bei komɛi amli.
Nɔkwɛmɔ ni Ŋmɛɔ Pɛpɛɛpɛ
13, 14. Mɛɛ ŋaawoo “tsulɔ anɔkwafo kɛ nilelɔ lɛ” kɛha onukpai ni yɔɔ wekui?
13 Ŋaawoo akɛ aha weku kɛ asafoŋ gbɛnaa nii aŋmɛ pɛpɛɛpɛ lɛ jeee nɔ̃ ko hee. “Tsulɔ anɔkwafo kɛ nilelɔ lɛ” kɛ ŋaawoo ni kɔɔ saji nɛɛ ahe eha onukpai afii pii. (Mateo 24:45) Nɔ ni fe afii 37 ni eho nɛ, ni September 15, 1959, Blɔfo Buu-Mɔɔ lɛ wo ŋaa yɛ baafai 553 kɛ 554 akɛ: “Yɛ anɔkwale mli lɛ, ani jeee fɛɛ ji, ni wɔha nɔ ni ebiɔ ni wɔkɛ wɔbe afee lɛ fɛɛ aŋmɛ pɛpɛɛpɛ? Ha ama nibii ni he hiaa bo diɛŋtsɛ oweku lɛ anɔ mi, yɛ nɛkɛ pɛpɛɛpɛ ni aŋmɛɔ nɛɛ mli. Eji anɔkwale akɛ, Yehowa Nyɔŋmɔ kpáŋ gbɛ ni mɔ ko kɛ ebe fɛɛ atsu asafoŋ nitsumɔ, ni ekɛye ebua enyɛmimɛi kɛ akutseiaŋbii ni ahere amɛyiwala, ni kɛlɛ ekwɛɛɛ lɛ diɛŋtsɛ eshiabii ayiwalaheremɔ nɔ. Nuu ŋa kɛ ebii ji egbɛnaa nii titri.”
14 April 1, 1987 Buu-Mɔɔ lɛ woɔ ŋaa yɛ ebaafa 22 akɛ: “Sɔɔmɔ nitsumɔ lɛ mli ni nyɛkɛ nyɛhe aaawo akɛ weku lɛ baagbala nyɛ ni nyɛfee ekome, ni kɛ̃lɛ, nibii ni yɔɔ sɔrɔto ni he hiaa gbekɛbii lɛ biɔ oteemɔŋ be kɛ henumɔŋ nyɛmɔi ni okɛaaha amɛ. No hewɔ lɛ, pɛpɛɛpɛ ni aŋmɛɔ he miihia, koni okɛle bei abɔ ni okɛbaatsu . . . asafoŋ nitsumɔi ahe nii, yɛ be mli ni okwɛɔ ‘mɛi ni ji bo diɛŋtsɛ oshiabii’ lɛ amumɔŋ, henumɔŋ, kɛ heloo gbɛfaŋ hiamɔ nii anɔ lɛ. Esa akɛ Kristofonyo ‘akase Nyɔŋmɔ gbeyeishemɔ yɛ lɛ diɛŋtsɛ ewe tsutsu.’ (1 Timoteo 5:4, 8)”
15. Mɛni hewɔ nilee kɛ sanesɛɛkɔmɔ he hiaa onukpa ni yɔɔ ŋa kɛ bii lɛ?
15 Ŋmalɛ mli abɛbua ko kɛɔ akɛ: “Nilee akɛmaa tsũ, ni sanesɛɛkɔmɔ akɛhaa edamɔɔ shi.” (Abɛi 24:3) Hɛɛ, kɛ nɔkwɛlɔ aaatsu eteokrase nitsumɔi ahe nii, ni yɛ nakai beaŋ nɔŋŋ lɛ etswa eshia ema shi lɛ, nilee kɛ sanesɛɛkɔmɔ he baahia lɛ diɛŋtsɛ. Yɛ Ŋmalɛ naa lɛ, eyɛ fe he kome ni ebaakwɛ nɔ—ekɔɔ eweku kɛ esafoŋ gbɛnaa nii hu he. Sanesɛɛkɔmɔ he miihia lɛ koni eŋmɛ pɛpɛɛpɛ yɛ enɛɛmɛi ahe. (Filipibii 1:9, 10) Nilee he miihia lɛ koni ekɛ nibii ni he hiaa lɛ aye klɛŋklɛŋ gbɛhe. (Abɛi 2:10, 11) Shi, bɔ fɛɛ bɔ ni enuɔ he akɛ eeetsu esafoŋ hegbɛi ahe nii lɛ fɛɛ sɛɛ lɛ, esa akɛ eyoo akɛ, ákɛ wu kɛ tsɛ lɛ, egbɛnaa nii ni baa klɛŋklɛŋ ni Nyɔŋmɔ kɛha lɛ ji, eweku lɛ kwɛmɔ kɛ amɛ yiwalaheremɔ.
Tsɛmɛi Kpakpai kɛ Agbɛnɛ hu Onukpai Kpakpai
16. Mɛɛ sɛɛnamɔ baa kɛhaa onukpa kɛ eji tsɛ hu?
16 Onukpa ni yɔɔ bii ni baa amɛjeŋ jogbaŋŋ lɛ feɔ sɛɛnamɔ diɛŋtsɛ. Kɛ ekase eweku lɛ kwɛmɔ jogbaŋŋ lɛ, enyɛɔ eyeɔ ebuaa wekui krokomɛi ni yɔɔ asafo lɛ mli lɛ. Enuɔ amɛ naagbai lɛ ashishi jogbaŋŋ, ni ebaanyɛ ekɛ ŋaawoo ni tamɔ nɔ ni lɛ diɛŋtsɛ etsɔ mli lɛ aha. Nɔ ni yɔɔ miishɛɛ ji akɛ, onukpai akpei abɔ ni yɔɔ jeŋ fɛɛ lɛ miitsu nitsumɔ kpakpa akɛ wumɛi, tsɛmɛi, kɛ nɔkwɛlɔi.
17. (a) Mɛni esaaa akɛ nuu ni ji tsɛ kɛ onukpa fɛɛ lɛ hiɛ kpaa nɔ kɔkɔɔkɔ? (b) Te esa akɛ mɛi krokomɛi ni yɔɔ asafo lɛ mli lɛ anu he aha tɛŋŋ?
17 Kɛ nuu ni yɔɔ weku aaafee onukpa lɛ, belɛ esa akɛ efee Kristofonyo ni eda yɛ mumɔŋ, mɔ ni yɛ be mli ni ekwɛɔ eŋa kɛ ebii lɛ, eeenyɛ eto esaji ahe gbɛjianɔ koni enyɛ etu be kɛ jwɛŋmɔ eha mɛi krokomɛi ni yɔɔ asafo lɛ mli lɛ. Esaaa akɛ ehiɛ kpaa nɔ kɔkɔɔkɔ akɛ esaramɔ kɛ kwɛmɔ nitsumɔ lɛ jeɔ shishi kɛjɛɔ shia. Akɛni asafo lɛ mli bii le akɛ, onukpai ni yɔɔ ŋamɛi kɛ bii lɛ yɛ gbɛnaa nii ni kɔɔ amɛ weku kɛ amɛ asafoŋ nitsumɔi ahe hewɔ lɛ, asafo lɛ mli bii ebɔŋ mɔdɛŋ ni amɛbi amɛbe tsɔ̃ bɔ ni esaaa. Akɛ nɔkwɛmɔ nɔ lɛ, ekolɛ onukpa ni yɔɔ bii ni esa akɛ amɛya skul enɔ jetsɛremɔ leebi lɛ nyɛŋ ahi shi yɛ be ko mli beni akpa kpee gbɛkɛ. Esa akɛ asafo lɛ mli bii krokomɛi anu enɛ shishi, ni amɛnu he amɛha lɛ.—Filipibii 4:5.
Esa Akɛ Wɔ Onukpai lɛ Afee Mɛi ni Jara Wa Kɛha Wɔ
18, 19. (a) Mɛni 1 Korintobii yitso 7, ni wɔpɛi mli lɛ enyɛ eha wɔyɔse? (b) Te esa akɛ wɔsusu Kristofoi hii nɛɛ ahe wɔha tɛŋŋ?
18 Paulo klɛŋklɛŋ wolo ni eŋma eyaha Korintobii lɛ yitso 7 ni wɔpɛi mli lɛ eha wɔnyɛ wɔna akɛ, yɛ Paulo ŋaawoo lɛ sɛɛdii hewɔ lɛ, hii oshijafoi babaoo yɛ ni kɛ amɛheyeli lɛ miitsu nii kɛmiisɔmɔ Maŋtsɛyeli lɛ he nibii. Nyɛmimɛi hii akpei abɔ hu yɛ ni amɛbote gbalashihilɛ mli ni bɛ bii, ni yɛ be mli ni amɛkɛ kwɛmɔ ni sa haa amɛŋamɛi lɛ, amɛsɔmɔɔ akɛ nɔkwɛlɔi kpakpai yɛ kpokpai wuji, kpokpai bibii, asafoi, kɛ Buu Mɔɔ nitsumɔ he niji amli, kɛ ekomefeemɔ ni sa yijiemɔ ni jɛ amɛŋamɛi aŋɔɔ. Yɛ naagbee lɛ, tsɛmɛi babaoo yɛ Yehowa webii asafoi ni miihe ashɛ 80,000 lɛ amli, ni jeee akɛ amɛkɛ suɔmɔ kwɛɔ amɛŋamɛi kɛ amɛbii anɔ kɛkɛ, shi amɛheɔ be hu amɛkɛsɔmɔɔ amɛ nyɛmimɛi akɛ nɔkwɛlɔi tookwɛlɔi.—Bɔfoi lɛ Asaji 20:28.
19 Bɔfo Paulo ŋma akɛ: “Onukpai ni yeɔ nɔ jogbaŋŋ lɛ, esa akɛ aŋɔ woo toi enyɔ awo amɛ, titri lɛ mɛi ni bɔɔ wiemɔ kɛ tsɔɔmɔ he mɔdɛŋ lɛ.” (1 Timoteo 5:17) Hɛɛ, onukpai ni yeɔ nɔ jogbaŋŋ yɛ amɛshiai kɛ asafoi lɛ amli lɛ sa wɔ suɔmɔ kɛ bulɛ. Lɛlɛŋ, esa akɛ wɔya nɔ “[wɔbu] nɛkɛ gbɔmɛi nɛɛ akɛ mɛi ni sa woo.”—Filipibii 2:29.
[Shishigbɛ niŋmai]
a Kwɛmɔ Blɔfo Buu-Mɔɔ, February 1, 1978, baafai 31-2.
b Kwɛmɔ Blɔfo Buu-Mɔɔ, December 1, 1960, baafai 735-6.
Kɛ Aaati Mli Lɛ
◻ Te wɔfeɔ tɛŋŋ wɔleɔ akɛ Ŋ.B. klɛŋklɛŋ afii oha lɛ mli onukpai pii ji hii ni yɔɔ weku?
◻ Mɛni ataoɔ yɛ onukpai ni ebote gbalashihilɛ mli ni yɔɔ bii lɛ adɛŋ, ni mɛni hewɔ?
◻ Mɛni ji wiemɔ, “bii ni heɔ yeɔ” lɛ shishi, shi kɛ onukpa lɛ bi sumɔɔɔ akɛ esɔmɔɔ Yehowa hu?
◻ Mɛɛ gbɛi anɔ esa akɛ onukpa lɛ ‘akwɛ lɛ diɛŋtsɛ emɛi’ yɛ?
[Mfoniri ni yɔɔ baafa 23]
Wekui ni he wa feɔ asafoi ni he wa