Ani Ohe Esa Akɛ Ooosɔmɔ?
“Wɔsalɛ Iɛ Nyɔŋmɔ mli ejɛ.”—2 KORINTOBII 3:5.
1. Kristofoi asafo lɛ etooo gbɔmɛi ni hiɛ mɛɛ subaŋ lɛ yɛ mli?
NITSULƆI ji Yehowa Nyɔŋmɔ kɛ Yesu Kristo. Yesu kɛɛ: “Mi-Tsɛ miitsu nii kɛbashi be nɛ, no hewɔ ni mi hu mitsuɔ nii lɛ.” (Yohane 5:17) Nyɔŋmɔ ekpɛlɛɛɛ mɛi ni sumɔɔɔ nitsumɔ lɛ anɔ; ni nakai nɔŋŋ hu enɔkpɛlɛmɔ ehiii mɛi ni taoɔ hegbɛi bɔni afee ni amɛna hewalɛ yɛ mɛi krokomɛi anɔ lɛ hu anɔ. Kristofoi asafo lɛ etooo mɛi ni sumɔɔɔ nitsumɔ lɛ aloo mɛi ni kɛ hiɛjoomɔ taoɔ hiɛnyam lɛ hu.—Mateo 20:25-27; 2 Tesalonikabii 3:10.
2. Mɛni hewɔ hii ni baatsu gbɛnaa nii ahe nii yɛ Kristofoi asafo lɛ mli he hiaa waa lɛ?
2 Yehowa Odasefoi yɛ ‘babaoo ni amɛaatsu yɛ Nuŋtsɔ lɛ nitsumɔ lɛ mli,’ ni titri lɛ akɛni amrɔ nɛɛ mɛi pii miike yuu kɛmiiba anɔkwa jamɔ “gɔŋ” lɛ nɔ lɛ hewɔ. (1 Korintobii 15:58; Yesaia 2:2-4) Hii ni he esa yɛ mumɔŋ he miihia babaoo bɔni afee ni amɛtsu gbɛnaa nii ahe nii yɛ asafo lɛ mli. Akɛni jeee hiɛjoomɔ tsirɛɔ amɛ ni amɛtao hiɛnyam hewɔ lɛ, nɛkɛ hii nɛɛ jieɔ Yehowa yi, shi jeee amɛ diɛŋtsɛ. (Abɛi 8:13) Amɛle akɛ Nyɔŋmɔ yeɔ ebuaa amɛ bɔni afee ni amɛhe asa kɛha asafoŋ nitsumɔi, taakɛ bɔ ni ‘ehaa mɛi ahe saa akɛ amɛtsɔmɔ kpaŋmɔ hee lɛ he sɔɔlɔi lɛ.’—2 Korintobii 3:4-6.
3. Mɛni ji shishitoo nibii ni ataoɔ yɛ onukpai kɛ asafoŋ sɔɔlɔi ahe?
3 Ŋmɛnɛ, ahalaa hii kɛtsɔ mumɔ krɔŋkrɔŋ lɛ nɔ kɛ agbɛnɛ kɛtsɔ Yehowa gbɛjianɔtoo lɛ hu nɔ bɔni afee ni amɛsɔmɔ akɛ onukpai loo asafoŋ sɔɔlɔi, taakɛ eji yɛ mra be mli Kristofoi lɛ ateŋ lɛ. (Bɔfoi lɛ Asaji 20:28; Filipibii 1:1; Tito 1:5) Onukpai lɛ kwɛɔ Nyɔŋmɔ tooku lɛ nɔ yɛ mumɔŋ, ni amɛkɛ nɔkwɛmɔ ni hebuu yɔɔ mli haa. Asafoŋ sɔɔlɔi, ni mumɔŋ nɔkwɛmɔ yɛ gbɛi pɔtɛɛ anɔ fataaa amɛnitsumɔi lɛ ahe lɛ yeɔ buaa (1 Petro 5:2; okɛto Bɔfoi lɛ Asaji 6:1-6 he.) Nɛkɛ mɛi ni ahala amɛ nɛɛ sumɔɔ ni amɛsɔmɔ amɛnanemɛi heyelilɔi, tamɔ Nyɔŋmɔ Bi lɛ, ni ba koni ebasɔmɔ lɛ. (Marko 10:45) Kɛji Kristofonyo nuu ji bo lɛ, ani oyɛ nakai mumɔ lɛ eko?
Hesaai ni Kɔɔ Kui Enyɔ lɛ Fɛɛ Ahe
4. Nɛgbɛ titri wɔnaa nibii ni ataoɔ yɛ mɛi ni atuɔ asafoŋ gbɛnaa nii ahe nitsumɔ awoɔ amɛdɛŋ lɛ ahe lɛ yɛ?
4 Bɔfo Paulo tsɔɔ nibii ni ataoɔ yɛ mɛi ni akɛ asafoŋ gbɛnaa nii ahe nitsumɔ ewo amɛdɛŋ lɛ ahe nitsumɔ ewo amɛdɛŋ lɛ ahe lɛ mli jogbaŋŋ yɛ 1 Timoteo 3:1-10, 12, 13 kɛ Tito 1:6-9. Yɛ be mli ni wɔsusuɔ nɛkɛ hesaai, ni ekomɛi kɔɔ onukpai kɛ asafoŋ sɔɔlɔi fɛɛ ahe lɛ ahe lɛ, esaaa akɛ wɔsusuɔ he yɛ bɔ ni je lɛ susuɔ nii ahe lɛ naa. Shi moŋ esa akɛ wɔsusu he taakɛ aŋma afɔ shi yɛ klɛŋklɛŋ afii oha lɛ mli ni akɛtsuɔ nii yɛ Yehowa webii ateŋ lɛ. Eji anɔkwale akɛ, nɛkɛ taomɔ nii nɛɛ ahe ni aaashɛ lɛ biii emuuyeli, ejaakɛ kɛ nakai lɛ, mɔ ko mɔ ko he esaŋ. (1 Yohane 1:8) Shi kɛji Kristofonyo nuu ji bo, ni oyɛ asafoŋ gbɛnaa nii ni ootsu he nii jio, obɛ eko jio lɛ, mɛni hewɔ okwɛɛɛ bo diɛŋtsɛ ohesaai lɛ ni ona bɔ ni amɛji?
5. Mɛni atsɔɔ kɛji akɛɛ anaaa mɔ ko he sane atã lɛ?
5 Mɔ ni anaŋ ehe sane ko atã; mɔ ni mɛi ni yɔɔ sɛɛ lɛ yeɔ ehe odase kpakpa; mɔ ni sane ko bɛ ehe. (1 Timoteo 3:2, 7, 8, 10; Tito 1:6, 7) Kɛji ahala lɛ kɛ agbɛnɛ be mli ni esɔmɔɔ hu lɛ, esa akɛ asafoŋ sɔɔlɔi kɛ onukpai lɛ afee mɛi ni anaŋ amɛhe sane ko atã, ni ji akɛ, shwamɔ ko loo hiamɔ ko akɛ aaakã amɛhiɛ yɛ jeŋba shara ko he loo tsɔɔmɔ he naafolɔmɔ ni ja ko hewɔ lɛ hu eko bɛ amɛhe. Naafolɔmɔi ni jeee anɔkwale ni “amale nyɛmimɛi” aloo mɛi krokomɛi kɛbaa lɛ haaa mɔ ko afee mɔ ni anaa ehe sane atãa. Kɛji aaabu mɔ ko akɛ mɔ ni esaaa ni esɔmɔɔ yɛ asafo lɛ mli lɛ, belɛ esaaa akɛ naafolɔmɔ lɛ feɔ fɛlɛfɛlɛ, ni esa akɛ ama nɔ mi yɛ tɛi ni Ŋmalɛi lɛ efolɔ eshwie shi lɛ kɛ gbeekpamɔ naa. (2 Korintobii 11:26; 1 Timoteo 5:19) Mɔ ni ahalaa lɛ yɛ asafo lɛ mli lɛ, “sa akɛ mɛi ni yɔɔ sɛɛ lɛ hu aye ehe odase kpakpa, koni ekagbee jɛmɔ kɛ Abonsam tsɔne mli.” Kɛji mɔ ko efee eshai komɛi ni hiɛdɔɔ yɔɔ he yɛ tsutsu ko lɛ, ja eshihilɛ tsɔɔ mɔ ko ni heguɔgbee ko bɛ ehe ni efee gbɛi kpakpa hu eha ehe dani abaanyɛ ahala lɛ.
6. Ni mɔ ko aaafee ŋa kome pɛ wu lɛ tsɔɔ mɛni?
6 Mɔ ni yɔɔ ŋa kome (1 Timoteo 3:2, 12; Tito 1:6) Enɛ etsɔɔɔ akɛ bii ni ebote gbalashihilɛ mli lɛ pɛ baanyɛ asɔmɔ akɛ asafoŋ sɔɔlɔi loo onukpai. Shi kɛlɛ, kɛji nuu ko ebote gbalashihilɛ mli lɛ, esa akɛ ehi ŋa kome pɛ ni eye lɛ anɔkwale hu. (Hebribii 13:4) Enyɛŋ ehi shi tamɔ klɛŋklɛŋ afii oha lɛ mli hii ni jeee Kristofoi lɛ, ni efee mɔ ni yɔɔ ŋamɛi babaoo.a
7. (a) Ani afii abɔ ni mɔ ko eye yɛ fɔmɔ mli lɛ haa mɔ ko he saa akɛ ahala lɛ akɛ onukpa? (b) Mɛni nibii abiɔ yɛ mɔ ko ni kwɛɔ eshia bii anɔ jogbaŋŋ lɛ he?
7 Mɔ ni yeɔ lɛ diɛŋtsɛ ewe nɔ jogbaŋŋ, ni ebii boɔ lɛ toi kɛ woo fɛɛ.( 1 Timoteo 3:4, 5, 12; Tito 1:6) Ekolɛ mɛi komɛi nuɔ he akɛ esa akɛ kɛ hooo lɛ onukpai lɛ aye afii 30, shi Biblia lɛ kɛ afii abɔ ko emaaa shi akɛ esa akɛ aye nakai dã. Shi kɛlɔ, esa akɛ mɔ lɛ afee enii akɛ mɔ ko ni eda, yɛ mumɔŋ shishinumɔ naa. Esa akɛ asafoŋ sɔɔlɔi kɛ onukpai lɛ afee mɛi ni edara bɔ ni sa ni amɛbaanyɛ amɛfɔ bii. Kɛ mɔ lɛ ebote gbalashihilɛ mli, ni efeɔ enii yɛ Nyɔŋmɔ jamɔ gbɛ nɔ yɛ hei krokomɛi shi eyi wa yɛ shia lɛ, belɛ esaaa ni ahalaa lɛ. Esa akɛ efee mɔ ni yɔɔ bulɛ yɛ bɔ ni ekwɛɔ lɛ diɛŋtsɛ ewe nɔ jogbaŋŋ yɛ gbɛ ni kɛ Biblia shishitoo mlai kpaa gbee nɔ lɛ hewɔ, ni esa akɛ oti ni ma ehiɛ lɛ afee akɛ eefee enɛ bɔni afee ni eha eweku lɛ mlibii lɛ fɛɛ aye omanye yɛ mumɔŋ. Kɛ aaŋɔ lɛ tamɔ mla ko lɛ, esa akɛ onukpa ni ji tsɛ lɛ afee mɔ ni ebii bibii yɔɔ jeŋba kpakpa ni amɛji “mɛi ni heɔ yeɔ” hu. Esa akɛ amɛfee mɛi ni miiya amɛhiɛ kɛmiishɛ amɛhenɔjɔɔmɔ kɛ Nyɔŋmɔ hamɔ he, aloo mɛi ni abaptisi amɛ akɛ Yehowa Odasefoi momo po. Kɛ nuu ko yɛ ni enyɛɛɛ etswa ebii lɛ ahemɔkɛyeli ema shi lɛ, enyɛŋ aba akɛ eeenyɛ etswa mɛi krokomɛi ahemɔkɛyeli ema shi.
8. Dani nuu ni yɔɔ weku lɛ baatsɔ onukpa lɛ, mɛni esa akɛ ekase feemɔ?
8 Dani nuu ni yɔɔ weku lɛ aaanyɛ afee onukpa ni nyɛɔ ekwɛɔ asafo lɛ nɔ yɛ mumɔŋ yɛ gbɛ ni sa nɔ lɛ, esa akɛ etsɔ hiɛ ekase bɔ ni eefee enyiɛ lɛ diɛŋtsɛ eweku lɛ hiɛ tsutsu. “Shi kɛ mɔ ko leee bɔ ni eefee eye lɛ diɛŋtsɛ ewe nɔ lɛ, te abaafee tɛŋŋ ekwɛ Nyɔŋmɔ asafo lɛ nɔ hu?” (1 Timoteo 3-5) Eji anɔkwale, ŋa ni heee yeee lɛ baanyɛ ate shi awo nuu lɛ. (Mateo 10:36; Luka 12:52) Aloo ebii lɛ ateŋ mɔ kome baanyɛ aye esha ni hiɛdɔɔ yɔɔ mli lɛ he fɔ, eyɛ mli akɛ mɛi krokomɛi lɛ miiya amɛhiɛ yɛ mumɔŋ. Shi kɛlɛ, kɛji nuu lɛ efee nɔ fɛɛ nɔ ni akpaa gbɛ yɛ ehe, ni titri lɛ kɛji eye omanye yɛ mumɔŋ yɛ eshia mlibii krokomɛi lɛ agbɛfaŋ lɛ, no lɛ kpoomɔ ni eweku lɛ mlibii lɛ ateŋ mɔ kome aaakpoo egbɛtsɔɔmɔ kpakpa lɛ etsɔɔɔ akɛ eji mɔ ko ni esaaa akɛ esɔmɔɔ akɛ asafoŋ sɔɔlɔ aloo onukpa.
9. Te esa akɛ onukpa loo asafoŋ sɔɔlɔ lɛ akwɛ ehe nɔ eha tɛŋŋ yɛ dãa he?
9 Ejeee dãanulɔ aloo dãatɔlɔ. (1 Timoteo 3:3, 8; Tito 1:7) Esaaa ni asafoŋ sɔɔlɔ ko aloo onukpa ko feɔ mɔ ni sumɔɔ dãanumɔ babaoo. Kɛ etsɔ mɔ ni nuɔ dãa ni enyɛɛ ekpa lɛ ebaanyɛ eha etsɔ mɔ ko ni nyɛɛɛ aye ejwɛŋmɔi kɛ henumɔi anɔ, ni enɛ baaha ekɛ ehe awo dãatɔlɔi anɔmɔ mli. Esaaa ni efeɔ mɔ ni ‘sumɔɔ dãanumɔ babaoo’ aloo eji mɔ ko ni ale lɛ jogbaŋŋ akɛ mɔ ko ni nuɔ daa aloo dãatɔlɔ. (Abɛi 23:20, 21, 29-35) Kwɛ bɔ ni eeefee awerɛho sane waa akɛ ekɛ dãatɔɔ shɛii aaafite etookwɛmɔ saramɔ lɛ! Kɛ nyɛminuu ko baanu dãa kwraa po lɛ, esaaa ni efeɔ nakai yɛ be mli ni eeya kpeei, aloo ekɛ ehe ewo shiɛmɔ nitsumɔ lɛ loo sɔɔmɔ krɔŋŋ kroko ko mli.—3 Mose 10:8-11; Ezekiel 44:21.
10. Mɛni hewɔ esaaa ni ahalaa mɛi ni sumɔɔ shika kɛ mɛi ni hiɛ joɔ yɛ ninamɔ he lɛ akɛ onukpai loo asafoŋ sɔɔlɔi lɛ?
10 Jeee mɔ ni hiɛ kɔ̃ɔ shika nɔ aloo hiɛjoolɔ. (1 Timoteo 3:3, 8; Tito 1:7) Mɛi ni sumɔɔ shika lɛ yɛ mumɔŋ oshara ni mli wa waa mli, ni “hiɛjoolɔi” hu anine shɛŋ Nyɔŋmɔ Maŋtsɛyeli lɛ nɔ. No hewɔ lɛ hii ni tamɔ nɛkɛ lɛ he esaaa akɛ onukpai loo asafoŋ sɔɔlɔi. (1 Korintobii 6:9, 10; 1 Timoteo 6:9, 10) Hela wiemɔ ni atsɔɔ shishi akɛ “hiɛjoomɔ” lɛ shishitsɔɔmɔ kroko hu ji “hiɛgbejianii,” ni wiemɔ ni atsɔɔ shishi akɛ ‘ana sɛɛ’ lɛ kɔɔ sɛɛnamɔi sɔrɔtoi fɛɛ loo nɔ fɛɛ nɔ ni haa ehiɔ haa bo fe mɛi krokomɛi lɛ he. (Filipibii 1:21; 3:4-8) Yɛ anɔkwale mli lɛ, kɛji nuu ko nifeemɔ tsɔɔ akɛ ekɛ Nyɔŋmɔ “tooi” lɛ baaye kɛ hiɛjoomɔ lɛ, no lɛ esaaa mɔ ni ahalaa lɛ kɛhaa asafoŋ gbɛnaa nii. (Ezekiel 34:7-10; Bɔfoi lɛ Asaji 20:33-35; Yuda 16) Bɔ ni amaa bɔ ni ehe hiaa ni akwɛ jogbaŋŋ dani ajie mɛi ayi lɛ nɔ mi lɛ jeɔ kpo waa kɛji wɔyoo akɛ abaanyɛ akɛ shika nɔkwɛmɔ awo asafo sɔɔlɔ dɛŋ ni eeenyɛ ebalɛ akɛ eeju shika lɛ eko lɛ.—Yohane 12:4-6.
11. Mɛni hewɔ ni esaaa akɛ ajieɔ “mɔ ni bote Nyɔŋmɔ jamɔ mli etsɛko” lɛ yi kɛha asafoŋ gbɛnaa nii ahe nitsumɔ lɛ?
11 Ejeee mɔ ni bote Nyɔŋmɔ jamɔ mli etsɛko; aka amɛ akwɛ akɛ amɛsa. (1 Timoteo 3:6, 10) Mɔ ko ni abaptisi lɛ ehee lɛ nako be ni ekɛaatsɔɔ akɛ ekɛ anɔkwayeli baatsu nitsumɔi ni akɛaawo edɛŋ lɛ ahe nii. Ekolɛ enaŋ mɔbɔnalɛ eha mɛi ni piŋɔ lɛ aloo ebɛ nilee ni he hiaa ni akɛaaye abua enanemɛi jalɔi lɛ ni ekolɛ eeenyɛ ebu mɛi krokomɛi akɛ amɛbaa shi po fe lɛ. No hewɔ lɛ, dani aaajie mɔ ko yi akɛ asafoŋ sɔɔlɔ lɛ titri lɛ akɛ onukpa lɛ, esa akɛ nuu ni tamɔ nɛkɛ lɛ, ‘aka lɛ akwɛ fɛ̃ɛ da’ ni esa akɛ ana odaseyeli ni tsɔɔ akɛ eji mɔ ni baanyɛ akojo saji yɛ gbɛ kpakpa nɔ ni abaanyɛ akɛ he afɔ enɔ hu. Atsɔko be pɔtɛɛ ko ni esa akɛ akɛka lɛ akwɛ, ni esoro bɔ ni mɛi aŋkroaŋkroi yaa amɛhiɛ amɛhaa yɛ mumɔŋ dalɛ mli. Shi esaaa ni onukpai lɛ jieɔ nuu ni ji mɔ hee lɛ yi oya nɔŋŋ “koni ekawo ehe nɔ ni egbee Abonsam kojomɔ mli.” Esa akɛ aha nuu lɛ ajie heshibaa su ni tamɔ Kristo nɔ lɛ eko kpo da.—Filipibii 2:5-8.
Aagbala Jwɛŋmɔ Kɛmiiba Asafoŋ Sɔɔlɔi lɛ Anɔ
12. Ani taomɔ nii ni abiɔ yɛ asafoŋ sɔɔlɔi ahe lɛ yɛ kɛha amɛ pɛ ni amɛshɛ he?
12 Atsi nibii ni ataoɔ yɛ asafoŋ sɔɔlɔi ahe lɛ ekomɛi ata. Shi kɛlɛ, kɛji onukpai lɛ hu shɛɛɛ nɛkɛ taomɔ nii nɛɛ ahe lɛ, no lɛ amɛfeŋ mɛi ni he esa akɛ amɛsɔmɔ. Akɛ Kristofonyo nuu lɛ, ani oshɛɔ taomɔ nii nɛɛ ahe?
13. Kɛ akɛɛ mɔ ko hiɛ dɔɔ yɛ enitsumɔ he lɛ tsɔɔ mɛni?
13 Mɔ ni hiɛ dɔɔ yɛ nitsumɔ he. (1 Timoteo 3:8) Esaaa akɛ nuu ni he saa akɛ esɔmɔ akɛ asafoŋ sɔɔlɔ lɛ feɔ mɔ ni buɔ egbɛnaa nii ahe nitsumɔ akɛ nɔ ko fɛlɛfɛlɛ. Esa akɛ ehiɛ ehe akɛ mɔ ko ni hiɛ yɔɔ nyam bɔni afee ni ena bulɛ. Eyɛ mli akɛ kɛ eyɛ mli aahu lɛ, ebaanyɛ ewo naaŋmɔlɔ shikome moŋ, shi kɛji efeɔ enii be fɛɛ be kɛ yiŋ fɛlɛfɛlɛ lɛ, ejeee mɔ ni he esa akɛ ahalaa lɛ.
14. (a) Ni mɔ ko efeŋ lilɛi ŋta tsɛ lɛ tsɔɔ mɛni? (b) Ni mɔ ko aaana henilee kpakpa lɛ biɔ ni efee mɛni?
14 Ejeee lilɛi ŋta tsɛ; eji mɔ ni yɔɔ henilee ni mli tse. (1 Timoteo 3:8, 9) Esa akɛ asafoŋ sɔɔlɔi (kɛ onukpai) lɛ afee mɛi ni wieɔ anɔkwale, jeee mɛi he wielɔi aloo mɛi ni kɛ wiemɔ lɔgɔɔ shi. Akɛni esaaa ni amɛfeɔ lilɛi ŋta tsɛmɛi hewɔ lɛ, esaaa ni amɛkɛ osatofeemɔ kɛɔ mɔ ko nɔ kome ni amɛyakɛɔ mɔ kroko nɔ kroko kwraa. (Abɛi 3:32; Yakobo 3:17) Esa akɛ hii ni tamɔ nɛkɛ lɛ hu afee mɛi ni fiɔ anɔkwalei ni ajie amɛ kpo lɛ asɛɛ waa, “mɛi ni hiɛɔ hemɔkɛyeli lɛ teemɔŋ sane lɛ yɛ henileeni mli tse mli.” Esa akɛ nuu ni tamɔ nɛkɛ lɛ henilee aye odase yɛ Nyɔŋmɔ hiɛ akɛ eji mɔ ko ni ja efeee efɔŋ ko loo nɔ ko ni he tseee. (Romabii 9:1, 2; 2 Korintobii 1:12; 4:2; 7:1) Esaaa ni ahalaa gbɔmɔ ni tamɔ nakai ni esɔmɔ Nyɔŋmɔ tooku lɛ ja mɔ ni kɛ ahe kpɛtɛ anɔkwale lɛ kɛ Nyɔŋmɔ jamɔ mli shishitoo tɛi ahe lɛ pɛ.
Aagbala Jwɛŋmɔ Kɛmiiba Onukpai lɛ Ataomɔ Nii Anɔ
15. Mɛɛ taomɔ nii agbalaa jwɛŋmɔ kɛbaa nɔ agbɛnɛ, ni mɛni titri he enɛ kɔɔ?
15 Taomɔ nii komɛi yɛ ni kɔɔ onukpai lɛ ahe titri ni ekɔɔ amɛnitsumɔ akɛ tookwɛlɔi kɛ tsɔɔlɔi lɛ ahe hu titri. Akɛ Kristofonyo nuu lɛ, ani oshɛɔ nɛkɛ taomɔ nii nɛɛ ahe?
16. (a) Ni mɔ ko kɛ hiɛshikamɔ aaatsu nii lɛ tsɔɔ mɛni? (b) Te onukpa ko aaafee tɛŋŋ ni eye ehe nɔ hu?
16 Esa akɛ efee hiɛshikalɔ; mɔ ni yeɔ ehe nɔ. (1 Timoteo 3:2; Tito 1:8) Esa akɛ onukpa lɛ afee mɔ ni yeɔ ehe nɔ, jeee mɔ ni sui gbohii ena enɔ hewalɛ. Kɛ ekɛ shihilɛi ni kaa mɔ kpe lɛ, no lɛ Nyɔŋmɔ baaye ebua lɛ ni eŋmɛ pɛpɛɛpɛ kɛji esɔle taakɛ lalatsɛ lɛ fee lɛ: “Mitsui mli haomɔi lɛ fa; jiemɔ mi kɛjɛ mifimɔi lɛ amli!” (Lala 25:17) Esa akɛ nɔkwɛlɔ lɛ hu asɔle ni ebi Nyɔŋmɔ mumɔ lɛ ni ejie eyibii lɛ, ni henɔyeli fata he lɛ kpo. (Luka 11:13; Galatabii 5:22, 23) Kɛji onukpa lɛ yeɔ ejwɛŋmɔi, ewiemɔ, kɛ enifeemɔi anɔ lɛ, no baaye ebua lɛ ni etsi ehe kɛjɛ nii ni eeefee fe nine lɛ he yɛ be mli ni ekɛ mumɔŋ gbɛtsɔɔmɔi haa asafo lɛ.
17. Mɛni ji nibii komɛi ni ataoɔ yɛ mɔ ko ni jwɛŋmɔ mli ka shi lɛ he?
17 Mɔ ni jwɛŋmɔ mli tse. (1 Timoteo 3:2) Esa akɛ onukpa lɛ afee mɔ ni yɔɔ jwɛŋmɔ, mɔ ni le nii, mɔ ni hiɛ ka shi. Esa akɛ efee mɔ ni yiŋtoo kɛ shishinumɔ yɔɔ ewiemɔ kɛ enifeemɔi amli. Eheshibaa jwɛŋmɔ ni ŋmɛɔ pɛpɛɛpɛ lɛ nilee damɔ ni jɛɔ Nyɔŋmɔ ŋɔɔ lɛ kɛ Yehowa Wiemɔ lɛ mli tsamɔ tsɔɔmɔ, ni esa akɛ efee mɔ ni kɛ ekaa kaseɔ lɛ nɔ.—Romabii 12:3; Tito 2:1.
18. Ni onukpa ko aaaba ejeŋ jogbaŋŋ lɛ biɔ mɛni yɛ ehe?
18 Mɔ ni baa ejeŋ jogbaŋŋ. (1 Timoteo 3:2) Atsɔɔ Hela wiemɔ ni akɛtsu nii yɛ biɛ lɛ shishi akɛ “[nɔ] ni sa” yɛ 1 Timoteo 2:9. No hewɔ lɛ esa akɛ onukpa lɛ ahi shihilɛ ni he tse, ni sa jogbaŋŋ mli. Akɛ nɔkwɛmɔ nɔ lɛ, esa akɛ efee mɔ ni yeɔ ebe nɔ. Ekolɛ etamɔ nɔ ni klɛŋklɛŋ afii oha lɛ mli Kristofoi lɛ emaaa woloŋmaa-kɛ-shishwiemɔ nɔ mi titri, ni ehe ehiaaa ni nɔkwɛlɔ ni sɔmɔɔ ŋmɛnɛ lɛ afee akɔntaabulɔ loo klakefonyo kpanaa ko. Asafoŋ sɔɔlɔi baanyɛ atsu gbɛnaa nii nɛɛ ahe nii yɛ nɛkɛ gbɛ nɔ. Shi Hela wiemɔ ni akɛtsu nii akɛ “mɔ ni baa ejeŋ jogbaŋŋ” lɛ baanyɛ akɔ jeŋba kpakpa he, ni eka shi faŋŋ akɛ nuu ko nyɛŋ ni ehe asa ni ahala lɛ akɛ onukpa kɛ eji mɔ ko ni bɛ tsɔsemɔ ni ebaaa ejeŋ jogbaŋŋ loo ebɛ gbɛjianɔ lɛ.—1 Tesalonikabii 5:14; 2 Tesalonikabii 3:6-12; Tito 1:10.
19. Akɛni onukpa lɛ feɔ gbɔ hewɔ lɛ, mɛni ji nibii ni efeɔ?
19 Eji gbɔfeelɔ. (1 Timoteo 3:2; Tito 1:8) Onukpa lɛ ‘bɔɔ gbɔfeemɔ he mɔdɛŋ.’ (Romabii 13:12; Hebribii 13:2) Hela wiemɔ ni akɛtsu nii akɛ “gbɔfeelɔ” lɛ shishitsɔɔmɔ diɛŋtsɛ ji “mɔ ni naa gbɔi ahe miishɛɛ.” No hewɔ lɛ, onukpa ni feɔ mɔ gbɔ lɛ kpeeɔ mɛi heei lɛ kɛbaa Kristofoi akpeei ashishi; ni ejieɔ emiishɛɛnamɔ kometoo lɛ nɔŋŋ kpo yɛ ohiafoi ahe taakɛ efeɔ yɛ mɛi ni yɔɔ heloonaa nii babaoo lɛ ahe lɛ. Efeɔ mɛi ni faa gbɛ yɛ Kristojamɔ hewɔ lɛ gbɔi, ni ewoɔ amɛ gbɛ “bɔ ni sa yɛ Nyɔŋmɔ hiɛ.” (3 Yohane 5-8) Lɛlɛŋ, onukpa lɛ jieɔ gbɔfeemɔ kpo, titri lɛ yɛ nanemɛi heyelilɔi agbɛfaŋ yɛ bɔ ni amɛhiamɔ nii ji lɛ kɛ bɔ ni eshihilɛ aaaŋmɛ lɛ gbɛ lɛ naa.—Yakobo 2:14-17.
20. Mɛɛ gbɛi anɔ esa akɛ onukpa lɛ he asa akɛ nitsɔɔlɔ yɛ?
20 Mɔ ni le nitsɔɔmɔ. (1 Timoteo 3:2) Onukpa lɛ nyɛmɔ ni eyɔɔ akɛ mumɔŋ nitsɔɔlɔ lɛ jɛɛɛ ejwɛŋmɔŋ nyɛmɔ loo je lɛŋ nilee mli. (1 Korintobii 2:1-5, 13) Enaa nɛkɛ nyɛmɔ nɛɛ ejaakɛ “[e]hiɛɔ tsɔɔmɔ lɛ naa [loo, ehe] anɔkwa wiemɔ mli, koni enyɛ ewie etsɔɔ mɛi yɛ nitsɔɔmɔ ni tsaa mɔ lɛ mli, ni mɛi ni kuɔ wiemɔ lɛ mli naa lɛ hu, eka amɛhiɛ.” (Tito 1:9; okɛto Bɔfoi lɛ Asaji 20:18-21, 26, 27) Esa akɛ enyɛ ‘ekɛ mlijɔlɛ awie atsɔɔ mɛi ni mɛi ni kuɔ enaa lɛ.’ (2 Timoteo 2:23-26) Kɛji akɛ onukpa ko jeee mɔ ni he esa fe fɛɛ yɛ asafoŋ maŋshiɛmɔ hamɔ mli po lɛ, esa akɛ efee Nyɔŋmɔ Wiemɔ lɛ kaselɔ kpakpa bɔni afee ni enyɛ ekɛ hesaa atsɔɔ heyelilɔi ni amɛ hu amɛkaseɔ Biblia lɛ anii ni ewo amɛ ŋaa hu. (2 Timoteo 11:6) Esa akɛ efee mɔ ni he esa ni kɛ “tsamɔ tsɔɔmɔ” ni yeɔ ebuaa weku kɛ aŋkroaŋkroi fɛɛ lɛ haa amɛ bɔni afee ni amɛtiu Nyɔŋmɔ jamɔ shihilɛ sɛɛ.—Tito 2:1-10.
21. (a) Mɛni hewɔ ni abaanyɛ akɛɛ akɛ onukpa lɛ jeee nine kpokpookpo tsɛ lɛ? (b) Ni mɔ ko aaafee mɔ ni he jɔ lɛ tsɔɔ mɛni? (d) Ni mɔ ko jeee mɔ ni beɔ lɛ tsɔɔ mɛni?
21 Ejeee nine kpokpookpo tsɛ, shi moŋ mɔ ni he jɔ, mɔ ni beee. (1 Timoteo 3:3; Tito 1:7) Akɛni onukpa lɛ he jɔ hewɔ lɛ, egbalaaa mɛi ama aloo ni eeewo amɛhe gbeyei kɛtsɔ jɛmɔ wiemɔi loo wiemɔi waawaa anɔ. (Okɛto 2 Korintobii 11:20 he.) (Wiemɔ ni tsɔ hiɛ akɛ “ejeee dãanulɔ” lɛ tsɔɔ akɛ etsiɔ ehe kɛjɛɔ dãatɔɔ ni bei babaoo lɛ ekɛ bei kɛ nɔmɔi baa lɛ he.) Akɛni eji “mɔ ni he jɔ,” (aloo, “eŋmɛɛɔ sane he”), ni ejeee mɔ ni kɛ ekɛɛ lɛ akɛɛɛ eko dɔŋŋ kɛ mɔ ni anyɛɛɛ ehiɛ asa hewɔ lɛ, efeee shɛii yɛ saji bibii ahe. (1 Korintobii 9:12; Filipibii 4:5; 1 Petro 2:18) Akɛni onukpa lɛ jeee beitsɛ, aloo mlilatsɛ hewɔ lɛ, etsiɔ ehe kɛjɛɔ bei he ni “ejeee mlifutsɛ.”—Tito 3:2; Yakobo 1:19, 20.
22. Anɔkwale ni eji akɛ esaaa ni onukpa lɛ feɔ etsuinaa nii lɛ tsɔɔ mɛni?
22 Ejeee mɔ ni feɔ lɛ diɛŋtsɛ etsui naa nii. (Tito 1:7) Yɛ wiemɔ fa mli lɛ, enɛ tsɔɔ akɛ “ejeee mɔ ni saa lɛ diɛŋtsɛ ehiɛ.” (Okɛto 2 Petro 2:10 he.) Esaaa akɛ onukpa lɛ heɔ ehe eyeɔ fe nine, shi moŋ esa akɛ ekɛ heshibaa jwɛŋmɔ asusu nyɛmɔi ni yɔɔ lɛ ahe. Akɛni esusuuu akɛ enyɛɔ etsuɔ nibii ahe nii jogbaŋŋ fe mɔ fɛɛ mɔ hewɔ lɛ, ekɛ mɛi krokomɛi tsuɔ gbɛnaanii ahe nii yɛ heshibaa mli ni ebuɔ ŋaawolɔi ni yi fa pii lɛ akɛ nɔ ko ni jara wa waa.—4 Mose 11:26-29; Abɛi 11:14; Romabii 12:3, 16.
23. (a) Te obaatsɔɔ “mɔ ni sumɔɔ ekpakpafeemɔ” shishi oha tɛŋŋ? (b) Ni mɔ ko aaafee jalɔ lɛ tsɔɔ mɛni?
23 Mɔ ni sumɔɔ ekpakpafeemɔ; jalɔ. (Tito 1:8) Dani mɔ ko he aaasa akɛ onukpa lɛ, esa akɛ mɔ lɛ asumɔ ekpakpafeemɔ ni efee jalɛ hii. Mɔ ni sumɔɔ ekpakpafeemɔ lɛ sumɔɔ nɔ ni ji ekpakpa yɛ Yehowa hiɛ, ni ekɛ mlihilɛ feɔ nibii ni ekɛyeɔ ebuaa, ni ejieɔ hiɛsɔɔ kpo yɛ nibii kpakpai ni mɛi krokomɛi feɔ lɛ ahe. (Luka 6:35; ekɛto Bɔfoi lɛ Asaji 9:36, 39; 1 Timoteo 5:9, 10 he.) Ni mɔ ko aaafee jalɔ lɛ tsɔɔ akɛ enifeemɔ kɛ Nyɔŋmɔ mlai kɛ eshishitoo tɛi lɛ kpaa gbee. Kɛfata he lɛ, gbɔmɔ ni tamɔ nɛkɛ kwɛɛɛ mɛi ahiɛaŋ ni ehaa nii ni ja gbɛ, nii ni he tse, kɛ nii ni yɔɔ gbɛi kpakpa hiɔ ejwɛŋmɔ mli. (Luka 1:6; Filipibii 4:8, 9; Yakobo 2:1-9) Akɛni esoro ekpakpafeemɔ yɛ jalɛ he ejaakɛ eyaa shɔŋŋ kɛtekeɔ nɔ ni jalɛsaneyeli biɔ lɛ hewɔ lɛ, mɔ ni sumɔɔ ekpakpafeemɔ lɛ feɔ nibii babaoo ehaa mɛi krokomɛi fe bɔ ni akpaa gbɛ kɛjɛɔ edɛŋ.—Mateo 20:4, 13-15; Romabii 5:7.
24. Ni mɔ ko aaaye enɔkwa lɛ biɔ mɛni?
24 Mɔ ni yeɔ anɔkwa. (Tito 1:8, NW) Nuu ni he esa akɛ ahalaa lɛ akɛ onukpa lɛ hiɛɔ hetuu-kɛhamɔ ni anyɛɛɛ aku mli lɛ mli ehaa Nyɔŋmɔ ni eyeɔ Nyɔŋmɔ mla nɔ, ni bɔ ni aaaka emuuyeli mli ni ehiɛ lɛ aha lɛ kɔɔɔ he eko. Efeɔ nɔ ni Yehowa kpaa gbɛ kɛjɛɔ edɛŋ, ni nɔ ni fata enɛ he ji sɔɔmɔ ni eeesɔmɔ akɛ Maŋtsɛyeli jajelɔ anɔkwafo.—Mateo 24:14; Luka 1:74, 76; Bɔfoi lɛ Asaji 5:29; 1 Tesalonikabii 2:10.
Taomɔ Nii lɛ Ahe ni Aaashɛ
25. Namɛi ataoɔ hesaai ni wɔsusuɔ he bianɛ lɛ yɛ amɛhe, ni te amɛaafee tɛŋŋ ni amɛshɛ he hu?
25 Taomɔ nii ni wɔwie he kɛtsɔ hiɛ lɛ ateŋ ekomɛi ji nibii ni ataoɔ yɛ Yehowa Odasefoi fɛɛ adɛŋ ni anyɛɔ eshɛɔ he kɛtsɔɔ Nyɔŋmɔ jɔɔmɔ ni hiɔ aŋkroaŋkroi fɛɛ anikasemɔ, mɔdɛŋbɔɔ, naanyobɔɔ kpakpa, kɛ sɔlemɔ nɔ lɛ nɔ. Mɛi aŋkroaŋkroi komɛi ahe baanyɛ asa yɛ taomɔ nii komɛi amli fe mɛi krokomɛi. Shi esa akɛ asafoŋ sɔɔlɔi kɛ onukpai lɛ ashɛ hesaai ni ataoɔ yɛ amɛhe yɛ sɔɔmɔ hegbɛi pɔtɛɛ komɛi ahewɔ lɛ ahe yɛ shishinumɔ ko naa.
26. Mɛni hewɔ Kristofoi hii kɛ amɛhe haa kɛhaa asafoŋ gbɛnaa nii ahe nitsumɔ lɛ?
26 Esa akɛ Yehowa Odasefoi fɛɛ asumɔ akɛ amɛaafee nɔ fɛɛ nɔ ni amɛaanyɛ yɛ Nyɔŋmɔ sɔɔmɔ mli. Nɛkɛ mumɔ nɛɛ tsirɛɔ Kristofoi hii lɛ bɔni afee ni amɛkɛ amɛhe aha kɛha asafoŋ gbɛnaa nii ahe nitsumɔ. Ani oji nuu ni ojɔɔ ohe nɔ ni abaptisi bo? Kɛji nakai lɛ, bɔɔ mɔdɛŋ ni oya ohiɛ akɛ ohe aaasa koni ahala bo ni osɔmɔ!
[Shishigbɛ niŋmai]
a Kwɛmɔ March 15, 1983 The Watchtower lɛ baafa 29, yɛ yitso bibioo ni ji “Scriptural Divorce,” ‘Ŋmalɛ Naa Gbalamlitsemɔ’ shishi.
Te Obaaha Hetoo Oha Tɛŋŋ?
◻ Mɛni hewɔ ni ehe hiaa waa akɛ hii ni abaptisi amɛ Iɛ aaakpɛlɛ asafoŋ gbɛnaa nii anɔ Iɛ?
◻ Mɛni ji hesaai komɛi ni ataoɔ yɛ asafoŋ sɔɔlɔi ahe?
◻ Mɛni ji taomɔ nii komɛi ni esa akɛ onukpai ashɛ he?
◻ Mɛni hewɔ ni esa akɛ onukpa Iɛ ale bɔ ni eeefee ekwɛ ewe nɔ jogbaŋŋ Iɛ?
◻ Mɛni tsirɛɔ Kristofoi hii bɔni afee ni amɛkɛ amɛhe aha kɛha asafoŋ gbɛnaa nii ahe nitsumɔ?
[Mfoniri ni yɔɔ baafa 24, 25]
Esa akɛ onukpai kɛ asafoŋ sɔɔlɔi akwɛ amɛ diɛŋtsɛ amɛwei anɔ yɛ gbɛ ni kɛ Biblia shishitoo mlai kpaa gbee nɔ