Asafoŋ Sɔɔlɔi—Amɛji Jɔɔmɔ Kɛha Yehowa Webii
“Shi mɛnɛɛmɛi hu akaamɛ akwɛ fɛɛ dã; no sɛɛ lɛ, kɛ́ sane ko bɛ amɛhe Iɛ, amɛsɔmɔ.”—1 TIMOTEO 3:10.
1. Namɛi yeɔ buaa asafoŋ miishɛɛnamɔ kɛ ekomefeemɔ?
1 YEHOWA ji “miishɛɛ Nyɔŋmɔ” lɛ ni eesumɔ ni etsuji ana miishɛɛ. (1 Timoteo 1:11) Yɛ enɛ hewɔ lɛ, ekɛ onukpai kɛ asafoŋ sɔɔlɔi eha kɛha ewebii ajɔɔmɔ. Nɛkɛ hii ni hiɛ gbɛnaa nii nɛɛ tsuɔ yiŋtoi ni he yɔɔ sɛɛnamɔ ahe nii amɛkɛyeɔ amɛbuaa Kristofoi asafo lɛ miishɛɛnamɔ, ekomefeemɔ kɛ emli nitsumɔ fɛfɛo. Mɛɛ shidaa po Yehowa Odasefoi kɛhaa nɛkɛ yɛ suɔmɔ kɛ yelikɛbuamɔ ni nɛkɛ hii ni ehala amɛ yɛ Nyɔŋmɔ teokrase gbɛjianɔtoo lɛ mli lɛ kɛhaa amɛ lɛ hewɔ!
2. Mɛni esa akɛ efee onukpai kɛ asafoŋ sɔɔlɔi asu, shi mɛni esaaa akɛ amɛkuɔ amɛhiɛ amɛshwieɔ nɔ?
2 Yɛ yelikɛbuamɔ ni he hiaa ni onukpai kɛ asafoŋ sɔɔlɔi kɛhaa asafo lɛ fɛɛ sɛɛ lɛ, esaaa akɛ amɛwoɔ amɛhe nɔ. Esa ni amɛkai akɛ Yesu Kristo wo esɛɛnyiɛlɔi lɛ ŋaa akɛ amɛba amɛhe shi. Ekɛɛ amɛ be ko akɛ: “Mɔ fɛɛ mɔ ni baa ehe shi tamɔ gbekɛ nɛɛ lɛ, lɛ ji agbo yɛ ŋwɛi maŋtsɛyeli lɛ mli.” (Mateo 18:4) Asaŋ kaselɔ Yakobo ŋma akɛ: “Nyɛbaa nyɛhe shi yɛ Yehowa hiɛ, ni eeewo nyɛnɔ.” (Yakobo 4:10, NW; Romabii 12:3) Shi akɛ wɔɔba wɔhe shi Iɛ etsɔɔɔ akɛ hii nɛɛ baaba hiamɔ ni amɛnitsumɔ akɛ onukpai kɛ asafoŋ sɔɔlɔi lɛ he hiaa lɛ shi. Amɛbaanyɛ amɛba amɛhe shi ni yɛ nakai beaŋ nɔŋŋ lɛ, amɛnyiɛ sɔɔmɔ nitsumɔ lɛ hiɛ. Esaaa akɛ amɛhiɛ kpaa yiŋtoo ni he yɔɔ sɛɛnamɔ ni jɛɔ amɛnitsumɔ lɛ mli baa lɛ nɔ, shi esa akɛ amɛkai sɔ̃ ni ka amɛnɔ yɛ Yehowa kɛ amɛnanemɛi Kristofoi ahiɛ lɛ be fɛɛ be koni amɛfee bɔ ni amɛbaanyɛ yɛ amɛ gbɛnaa nii lɛ ahe nitsumɔ mli.
3. Abaanyɛ akɛ ekomefeemɔ ni Yehowa Odasefoi kɛtsuɔ nii lɛ ato mɛni he, ni mɛɛ gbɛ nɔ hii ni ejɔɔ amɛhe nɔ lɛ baatsɔ ni amɛha nakai ekomefeemɔ lɛ kɛ Maŋtsɛyeli lɛ he nibii aya hiɛ yɛ?
3 Abaanyɛ akɛ ekomefeemɔ ni Yehowa Odasefoi kɛtsuɔ nii ŋmɛnɛ lɛ ato ekomefeemɔ ni yɔɔ adesa gbɔmɔtso mli lɛ he. Yɛ anɔkwale mli lɛ, bɔfo Paulo kɛ Kristo mumɔŋ gbɔmɔtso lɛ to adesa gbɔmɔtso ni yɔɔ he nii babaoo lɛ he. Shi kɛha gbɔmɔtso muu lɛ fɛɛ sɛɛnamɔ lɛ, esa akɛ ehe nii lɛ fɛɛ atsu nii yɛ ekomefeemɔ mli. (1 Korintobii 12:12-31) Asaŋ, eji anɔkwale akɛ onukpai kɛ asafoŋ sɔɔlɔi ni ahala amɛ lɛ ji jɔɔmɔ kɛha Yehowa webii, ejaakɛ hii nɛɛ haa ekomefeemɔ ni akɛtsuɔ nii yɛ Kristofoi asafo lɛ mli ŋmɛnɛ lɛ yaa hiɛ. (Okɛto Kolosebii 2:18, 19 he.) Asafo lɛ mli hii ni amɛjɔɔ amɛhe nɔ ni bɔɔ mɔdɛŋ koni amɛfi Yehowa asafoŋ gbɛjianɔtoo nɛɛ sɛɛ kɛtsɔ ‘nɔkwɛmɔ nitsumɔ lɛ ni amɛtaoɔ’ nɔ lɛ miitsu nii kɛmiiye abua Kristofoia ekomefeemɔ kɛ Maŋtsɛyeli lɛ sɛɛnamɔi ahiɛyaa. (1 Timoteo 3:1) Shi klɛŋklɛŋ lɛ te nuu ni ji Kristofonyo lɛ feɔ tɛŋŋ ehe saa akɛ asafoŋ sɔɔlɔ lɛ?
“Aka Amɛ Akwɛ Fɛɛ Dã”
4. (a) Mɛni hewɔ esa akɛ ‘aka mɛi fɛɛ ni baatsɔmɔ asafo sɔɔlɔi akwɛ dã’ lɛ? (b) Esa akɛ hii nɛɛ asumɔ akɛ amɛaafee mɛni?
4 Bɔfo Paulo ekɛɛ ehefatalɔ nitsulɔ Timoteo nɔ ni ataoɔ dani abaanyɛ ehala hii akɛ asafoŋ sɔɔlɔi. Paulo ŋma kɛfata nibii krokomɛi ahe akɛ: “Shi mɛnɛɛmɛi hu aka amɛ akwɛ fɛɛ da; no sɛɛ lɛ, kɛ́ sane ko bɛ amɛhe lɛ, amɛsɔmɔ.” (1 Timoteo 3:10) Enɛ baatsi mɛi ni he esako, mɛi ni shɛko Ŋmalɛ mli taomɔnii kɛha enɛ lɛ he lɛ ni aaahala amɛ lɛ naa. Asaŋ, enɛ baaha ana be ni akɛsusu asafoŋ sɔɔlɔi ni abaahala amɛ lɛ asubaŋi ahe jogbaŋŋ. Yɛ anɔkwale mli lɛ, esaaa akɛ sɔɔmɔ kɛha gbɛihemɔ tsirɛɔ nɛkɛ hii nɛɛ ejaakɛ no baatsɔɔ akɛ amɛbɛ heshibaa. Shi moŋ, esa akɛ amɛyɔse anɔkwale ni eji akɛ Kristofonyo henɔjɔɔmɔ kɛmiiha Nyɔŋmɔ lɛ tsɔɔ akɛ aaasɔmɔ yɛ he fɛɛ he ni Yehowa diɛŋtsɛ naa akɛ ebaanyɛ ekɛ lɛ atsu nii yɛ, yɛ E-gbɛjianɔtoo lɛ mli. Hɛɛ, esa ni mɛi ni sumɔɔ ni amɛtsɔmɔ asafoŋ sɔɔlɔi lɛ ana he suɔmɔ akɛ amɛaasɔmɔ tamɔ anɔkwafo Yesaia, mɔ ni kɛɛ akɛ: “Naa mi, tsumi!” lɛ.—Yesaia 6:8.
5. (a) Mɛɛ taomɔ nii kɛha asafoŋ sɔɔlɔi akɛha yɛ 1 Timoteo 3:8? (b) Akɛ mɔ ko aaafee mɔ ni “hiɛ tsii” lɛ tsɔɔ mɛni? (d) Mɛni Paulo tsɔɔ beni ekɛɛ asafoŋ sɔɔlɔi akafee “lilɛi nta tsɛmɛi” lɛ?
5 Paulo tsɔɔ mli akɛ “Asafo mli sɔɔlɔi lɛ hu esa akɛ amɛfee gbɔmɛi ni hiɛ tsii, jeee lilɛi nta tsɛmɛi, jeee daatɔlɔi, jeee hiɛjoolɔi.” (1 Timoteo 3:8) Eyɛ mli akɛ asafoŋ sɔɔlɔi komɛi darako tsɔ moŋ, shi amɛjeee obalaŋtai ni esa ni amɛfee “gbɔmɛi ni hiɛ tsii.” Esa ni amɛfee mɛi ni amɛkase ni amɛle bɔ ni akɛ hiɛdɔɔ tsuɔ saji ni tsii lɛ ahe nii. (Okɛto Abɛi 22:15 he.) Esa akɛ amɛfee mɛi ni hiɛ ka shi ni anyɛɔ akɛ he fɔɔ amɛnɔ, jeee mɛi ni kɛ amɛgbɛnaa nii shwɛɔ. Ejaakɛ mɛni hiɛdɔɔ yɔɔ mli waa fe sɔɔmɔ krɔŋŋ ni akɛhaa Yehowa? Eji wala kɛ gbele sane—kɛha amɛ kɛ mɛi krokomɛi. (Okɛto 1 Timoteo 4:16 he.) Kɛfata he lɛ, beni Paulo kɛɛ esaaa akɛ asafoŋ sɔɔlɔi feɔ “lilɛi nta tsɛmɛi” lɛ, eetsɔɔ akɛ esa ni amɛfee mɛi ni tsakeee amɛwiemɔ kɛ anɔkwafoi, jeee oshekuyelɔi osatofoi aloo kutumpɔfoi.—Abɛi 3:32.
6. Esa akɛ asafoŋ sɔɔlɔi aŋmɛ pɛpɛɛpɛ yɛ mɛɛ gbɛi anɔ?
6 Esɔ akɛ hii ni he saa akɛ asafoŋ sɔɔlɔi lɛ aŋmɛ pɛpɛɛpɛ yɛ amɛ diɛŋtsɛ amɛwala shihilɛ mli. Beni Paulo kɛɛ amɛ “jeee daatɔlɔi, jeee hiɛjoolɔi” lɛ, belɛ, eetsɔɔ yɛ faŋŋ mli akɛ esa ni amɛkwa daanumɔ, hiɛjoomɔ kɛ amimyeli. Esa ni hii Kristofoi nɛɛ akwa nɔ ni amɛbaafee ni baaha mɛi krokomɛi ana amɛ akɛ amɛsumɔɔ hiɛtserɛjiemɔ aloo amɛdiɔ heloo gbɛfaŋ nibii asɛɛ babaoo lɛ. Esa akɛ amɛbɔ mɔdɛŋ yɛ be fɛɛ mli ni amɛkɛ mumɔŋ nibii aye klɛŋklɛŋ gbɛhe yɛ amɛshihilɛ mli. Enɛ baaye ebua amɛ koni amɛnyɛ amɛhiɛ “henilee kpakpa” mli yɛ amɛnanemɛi adesai ahiɛ, kɛ nɔ ni fe fɛɛ lɛ, yɛ Nyɔŋmɔ hiɛ.—1 Timoteo 3:8, 9.
7. (a) Mɛni hewɔ abaanyɛ akɛɛ akɛ asafoŋ sɔɔlɔi agbɛnaa nii lɛ jeee obalaŋtai anitsumɔ lɛ? (b) Anɔkwale ni eji akɛ asafoŋ sɔɔlɔ ko yeɔ oshija lɛ baanyɛ ajie mɛni kpo yɛ ehe?
7 Gbɛnaa nii ni tsii ni ka asafoŋ sɔɔlɔi anɔ lɛ jeee nɔ ni akɛtereɔ obalaŋtai. Awie hii nɛɛ ahe yɛ Ŋmalɛ mli akɛ amɛshɛ he ni amɛbaanyɛ amɛbote gbalashihilɛ mli ni amɛna weku. Yɛ nakai shishilɛi amli lɛ, amɛbaanyɛ amɛfee “mɛi ni yeɔ amɛbii kɛ amɛ diɛŋtsɛ amɛmɛi anɔ jogbaŋŋ.” (1 Timoteo 3:12) Ani enɛ tsɔɔ akɛ obalanyo nyɛŋ atsɔ asafoŋ sɔɔlɔ akɛ ja ebote gbalashihilɛ mli ni ena weku dã? Dabi, jeee nakai kwraa. Yɛ anɔkwale mli lɛ, shi ni eshashaoɔ yɛ oyaiyeli ni ekɛaabote gbalashihilɛ mli yɛ be mli ni esako ehe jogbaŋŋ aloo dani eeena hefatalɔ Kristofonyo ni sa ni abaptisi lɛ lɛ he lɛ baatsɔɔ akɛ dalɛ ko ni baaha enyɛ ekwɛ lɛ diɛŋtsɛ eshihilɛ mli nibii anɔ, kɛ nɔ ni fe fɛɛ lɛ, asafoŋ gbɛnaa nii anɔ he miihia lɛ.
8. Mɛɛ gbɛnaa nii ka asafoŋ sɔɔlɔi anɔ yɛ nɔ ni 1 Timoteo 3:13 kɛ Mateo 24:14 tsɔɔ hewɔ lɛ hewɔ?
8 Paulo kɛɛ “mɛi ni sɔmɔɔ jogbaŋŋ lɛ, amɛnaa sɛɛtso kpakpa amɛhaa amɛhe, kɛ ekaa babaoo yɛ hemɔkɛyeli ni yɔɔ Kristo Yesu mli lɛ.” (1 Timoteo 3:13) Gbɛ kome ni amɛtsɔɔ nɔ amɛjieɔ amɛhe kpo akɛ mɛi ni yɔɔ “ekãa babaoo” lɛ ji ekãa ni amɛkɛnaa gbɛfaŋnɔ yɛ “maŋtsɛyeli lɛ he sanekpakpa nɛɛ” lɛ shiɛmɔ mli. (Mateo 24:14) Esa ni amɛle akɛ eji amɛ kɛ onukpai lɛ fɛɛ agbɛnaa nii akɛ amɛnyiɛ shiɛmɔ yɛ shia kɛ shia kɛ sɔɔmɔ nitsumɔ lɛ fai krokomɛi fɛɛ hiɛ. (Bɔfoi 5:42; 20:20, 21) Yɛ be mli ni Satan yiwalɛ gbɛjianɔtoo nɛɛ kɛ oyaiyeli bɛŋkɛɔ enaagbee lɛ, shiɛmɔ nitsumɔ lɛ bafeɔ nɔ ko ni he hiaa waa diɛŋtsɛ. No hewɔ lɛ, esa akɛ asafoŋ sɔɔlɔi adu hiamɔ ni Maŋtsɛyeli shiɛmɔ nitsumɔ lɛ he hiaa lɛ amɛwo asafo lɛ mli kɛtsɔ nɔkwɛmɔ nɔ fɛfɛo ni amɛ diɛŋtsɛ amɛbaafee yɛ shiɛmɔ nitsumɔ lɛ mli lɛ nɔ.
Be Fɛɛ Sɔɔmɔ Lɛ Eye Ebua Amɛ
9. Yɛ bɔ ni wɔbe nɛɛ he hiaa hewɔ lɛ, mɛɛ sɔɔmɔ Kristofoi pii kɛ amɛhe ewo mli?
9 Yɛ bɔ ni wɔ jaramɔ be nɛɛ he hiaa ha hewɔ lɛ, Kristofoi hii kɛ yei pii ehala be fɛɛ sɔɔmɔ lɛ. Amɛteŋ mɛi pii ni ji gbɛgbalɔi kɛ ŋmɛlɛtswai enyɔ kɛyashi enumɔ tsuɔ nii yɛ shiɛmɔ mli daa gbi, ni amɛteŋ mɛi komɛi ji maŋsɛɛ sanekpakpashiɛlɔi yɛ mɛikpɔji ashikpɔji anɔ. Mɛi krokomɛi hu kɛ amɛbe fɛɛ sɔmɔɔ yɛ Buu Mɔɔ Asafo lɛ yitso lɛ aloo yɛ enitsumɔ he niji ni yɔɔ shikpɔŋ muu nɛɛ fɛɛ nɔ lɛ eko mli. Amɛsɔɔmɔ lɛ ji miishɛɛ kɛ nyamɔ jɛɛhe kɛha amɛ kɛ mɛi ni amɛsɔmɔɔ lɛ. Agbɛnɛ yɛ bei babaoo mli lɛ, niiashikpamɔ ni amɛnaa yɛ be fɛɛ sɔɔmɔ lɛ mli lɛ eye ebua hii komɛi ni ámɛna hesaai ni ataoɔ ni amɛshɛ he dani amɛsɔmɔ asafo lɛ yɛ gbɛ ni sɛɛnamɔ yɔɔ he akɛ asafoŋ sɔɔlɔi lɛ.
10, 11. Taakɛ mɛi komɛi awiemɔi ni atsɛ sɛɛ yɛ biɛ lɛ tsɔɔ lɛ, be fɛɛ sɔɔmɔ lɛ he baanyɛ aba sɛɛnamɔ aha hii ni sumɔɔ ni amɛtsɔmɔ asafoŋ sɔɔlɔi lɛ yɛ mɛɛ gbɛ nɔ?
10 Mɔ ko ni esɔmɔ akɛ asafoŋ sɔɔlɔ yɛ tsutsu, ni amrɔ nɛɛ eji onukpa yɛ Berlin, Germane asafo ko mli lɛ wie gbɛgbamɔ nitsumɔ ni ehala afii abɔ ko ni eho beni eji obalanyo lɛ he akɛ: “Manyɛ makɛɛ akɛ eji nifeemɔ ko ni mishwako mihe yɛ he kɔkɔɔkɔ. Yehowa ejɔɔmi. Mikɛ lɛ teŋ wekukpaa lɛ mli ewa babaoo diɛŋtsɛ.” Hɛɛ, nyɛminuu nɛɛ tamɔ akpei krokomɛi ni amɛna akɛ be fɛɛ sɔɔmɔ lɛ baanyɛ aha mɔ kɛ Yehowa teŋ wekukpaa lɛ mli awa kɛ nɔ ni haa mɔ yaa ehiɛ oyayaayai yɛ Kristofoi adalɛ mli.
11 Gbɛgbalɔ kroko ni etsɛ tsɔɔ bɔ ni be fɛɛ sɔɔmɔ lɛ ye ebua lɛ lɛ mli. Ekɛɛ, “miná hiɛshikamɔ ni mitsɔ mɔ ni ŋmɛɔ pɛpɛɛpɛ yɛ yiŋkpɛi ni akɛ oyaiyeli feɔ lɛ amli. Mina miishɛɛ babaoo yɛ bɔ ni akɛ gbɔmɛi sɔrɔtoi yeɔ haa lɛ mli.” Ani enɛɛmɛi fataaa sui ni ehe hiaa ni ebiɔ ni hii ni sumɔɔ akɛ amɛsɔmɔ akɛ asafoŋ sɔɔlɔi ana lɛ ahe?
12. (a) Mɛɛ hegbɛ yɔɔ kɛha be fɛɛ sɔɔmɔ lɛ ni wɔɔna mli gbɛfaŋnɔ? (b) Be fɛɛ sɔɔmɔ lɛ mli gbɛfaŋnɔ ni wɔɔna lɛ biɔ mɛɛ sui ni baaye abua asafoŋ sɔɔlɔ lɛ yɛ enitsumɔi amli?
12 Gbɛfaŋnɔ ni anaa yɛ be fɛɛ sɔɔmɔ lɛ mli beni Ŋmalɛ mli gbɛnaa nii ŋmɛɔ gbɛ lɛ, baanyɛ afee hegbɛ fɛfɛo aha Kristofoi hii koni ‘akɛka amɛ fɛɛ akwɛ da.’ Mɛi komɛi baanyɛ atsu sɔɔmɔ nɛɛ yɛ be fɛɛ mli; mɛi krokomɛi hu baanyɛ afee yɛ be kɛ bei amli. Obalaŋtai baanyɛ afee enɛ yɛ skul gbɛhamɔi amli kɛ onukpai hu beni amɛba hejɔɔmɔ aloo bei krokomɛi fɛɛ ni hi kɛha amɛ yɛ afi lɛ mli. Shi gbɛfaŋnɔ ni aaana yɛ be fɛɛ sɔɔmɔ lɛ mli lɛ biɔ gbɛjianɔtoo kpakpa kɛ ŋmɛ ni aaaŋmɛ pɛpɛɛpɛ. Sui nɛɛ ahe hiaa asafoŋ sɔɔlɔ lɛ ni ebaaye ebua lɛ koni etsu enitsumɔi egbe naa. Mɛɛ nitsumɔi?
Asafoŋ Sɔɔlɔi Anitsumɔi
13. Bɔfoi lɛ Asaji 6:1-6 woɔ ŋaa yɛ mɛɛ nitsumɔ ni atuɔ awoɔ asafoŋ sɔɔlɔi adɛŋ lɛ he?
13 Eyɛ mli akɛ Bɔfoi lɛ Asaji 6:1-6 kɔɔɔ asafoŋ sɔɔlɔi ahalamɔ he tɛɛ moŋ, shi nɔ ni áwie yɛ jɛmɛ lɛ tsɔɔ nɔ̃ nitsumɔ ni atuɔ awoɔ asafoŋ sɔɔlɔi adɛ̃. “Hii kpawo ni yɔɔ gbɛi kpakpa” ni ahala amɛ koni amɛja niyenii, shi jeee akɛ amɛtsɔɔ nanemɛi heyelilɔi anii lɛ ha bɔfoi lɛ na be amɛha ‘sɔlemɔ kɛ wiemɔ yɛ sɔɔmɔ lɛ mli.’ Yɛ nitsumɔi ni tamɔ enɛɛmɛi ni asafoŋ sɔɔlɔi tsuɔ ŋmɛnɛ hewɔ lɛ, amɛhaa onukpai lɛ naa be babaoo amɛhaa “Nyɔŋmɔ asafoku” lɛ nɔkwɛmɔ kɛ tsɔɔmɔ.—1 Petro 5:2, 3.
14. Mɛɛ nitsumɔi sɔrɔtoi nɛkɛ abaanyɛ atu awo asafoŋ sɔɔlɔi adɛ̃?
14 Organized to Accomplish Our Ministry wolo lɛ wieɔ asafoŋ sɔɔlɔi anitsumɔ lɛ he akɛ: ‘Abaanyɛ ahala asafoŋ sɔɔlɔ ko akɛ ekwɛ asafo lɛ woji anɔ, bɔni afee ni wɔ fɛɛ wɔnyɛ wɔhe woji ni he hiaa wɔ kɛ nɔ ni wɔkɛbaatsu nii yɛ shiɛmɔ nitsumɔ lɛ mli. Mɔ kroko hu baakwɛ woji tɛtrɛbii ni yɔɔ asafo lɛ mli lɛ anɔ. Atuɔ nitsumɔ awoɔ mɛi krokomɛi adɛ̃, tamɔ asafo shika nɔkwɛmɔ aloo shikpɔŋkuku nɔ kwɛmɔ aloo akɛ amɛ tsuɔ nii koni amɛkwɛ tsɔne ni awieɔ awoɔ mli lɛ nɔ, amɛkwɛ wiemɔ kpoku lɛ nɔ aloo ekolɛ amɛye amɛbua onukpai lɛ yɛ gbɛi krokomɛi anɔ. Nitsumɔi pii yɛ ni atsuɔ yɛ Maŋtsɛyeli Asa lɛ he bɔni afee ni aha emli atse, no hewɔ lɛ, afɔɔ asafoŋ sɔɔlɔi atsɛmɔ akɛ amɛye amɛbua yɛ nɛkɛ gbɛnaa nii anɔkwɛmɔ mli. Asaŋ, atoɔ mɛi ni baa kpeei anɔ kwɛmɔ kɛ mɛi heei lɛ ahe nyamɔ awoɔ asafoŋ sɔɔlɔi adɛ̃, ni amɛye amɛbua hu ni toiŋjɔlɛ ahi asafoŋ kpeei ashishi.’—Baafai 57-8.
15. (a) Mɛni he hiaa yɛ nyɛmɔ ni akɛtsuɔ nii lɛ sɛɛ bɔni afee ni asɔmɔ jogbaŋŋ akɛ asafoŋ sɔɔlɔ? (b) Eyɛ mli akɛ asafoŋ sɔɔlɔi kwɛɔ nibii sɔrɔtoi pii anɔ moŋ, shi mɛni esa akɛ amɛkɛfee oti ni amɛjwɛŋɔ he?
15 Ani nyɛminuu fɛɛ nyɛminuu ni yɔɔ nitsumɔ he nilee baanyɛ tsu enɛ? Dabida, ejaakɛ “hii ni yɔɔ gbɛi kpakpa” ni ahala amɛ yɛ klɛŋklɛŋ afii oha lɛ mli yɛ Yerusalem lɛ ji mɛi ni “mumɔ krɔŋkrɔŋ kɛ nilee eyi amɛ obɔ.” (Bɔfoi lɛ Asaji 6:3, Philips) Kɛ́ amɛji hii ni edara yɛ afii amli yɛ Yehowa webii ateŋ po lɛ, aha amɛ nitsumɔ ni tamɔ nɔ ni asafoŋ sɔɔlɔi tsuɔ bianɛ lɛ. No hewɔ lɛ, kɛ́ ŋmɛnɛŋmɛnɛ beaŋ asafoŋ sɔɔlɔi baatsu amɛnitsumɔi jogbaŋŋ lɛ, esa ni amɛfee hii ni “mumɔ krɔŋkrɔŋ kɛ nilee eyi amɛ obɔ.” Eyɛ mli kɛ asafo lɛ mli nitsumɔi sɔrɔtoi baahe amɛbe fɛɛ moŋ, shi nɔ ni esa akɛ amɛnya he babaoo ji gbɔmɛi asɔɔmɔ ni mumɔŋ sɛɛnamɔi ajɛ mli ba.
16. Kɛ onukpai ni fa bɛ esafo ko mli lɛ, abaanyɛ atu mɛɛ nitsumɔi nɛkɛ awo asafoŋ sɔɔlɔi adɛ̃?
16 Akɛni esa akɛ asafoŋ sɔɔlɔi afee mumɔŋ gbɔmɛi hewɔ lɛ, abaanyɛ akɛ amɛ atsu nitsumɔi pii ni onukpai tsuɔ. (Organized to Accomplish Our Ministry (baafai 58-9) tsɔɔ mli akɛ: ‘Kɛ́ onukpai ni fa bɛ ni amɛbaakwɛ Asafo Woloŋ Nikasemɔ nɔ lɛ, akɛ asafoŋ sɔɔlɔi ni he esa jogbaŋŋ lɛ tsuɔ nii akɛ nikasemɔ nɔkwɛlɔi ni amɛkwɛɔ kui ni atuɔ awoɔ amɛdɛŋ lɛ anɔ. Abaanyɛ aha amɛ wiemɔ yɛ Sɔɔmɔ Kpee kɛ Teokrase Sɔɔmɔ Skul lɛ mli ni amɛbaanyɛ amɛha maŋshiɛmɔi yɛ amɛ asafo lɛ mli. Abaanyɛ akɛ hegbɛi krokomɛi aha asafoŋ sɔɔlɔi yɛ he ni hiamɔ ko ehia yɛ, kɛ́ amɛshɛɔ taomɔ nii kɛha nakai nitsumɔ lɛ he.—Okɛto 1 Petro 4:10 he.’
17. Mɛɛ nuu nɛkɛ ji Stefano, ni mɛɛ sanebimɔ enɛ teɔ Iɛ shi yɛ asafoŋ sɔɔlɔi ahe?
17 Nakai “hii kpawo ni yɔɔ gbɛi kpakpa” yɛ Biblia gbii amli lɛ ateŋ mɔ kome ji “Stefano, nuu ko ni hemɔkɛyeli kɛ mumɔ krɔŋkrɔŋ eyi lɛ obɔ” lɛ. (Bɔfoi lɛ Asaji 6:5) Dani ebaagbo akɛ lá odasefonyo anɔkwafo lɛ, Stefano ye odase ko ni tsirɛɔ mɔ etsɔɔ Yudafoi Agwabɔɔ lɛ. Kanemɔ nakai sane lɛ ni obaana akɛ eji mumɔŋ gbɔmɔ kɛ odasefonyo ko ni kpɛlɛɔ Nyɔŋmɔ mumɔ krɔŋkrɔŋ lɛ gbɛtsɔɔmɔ nɔ kɛ mɔ ni sumɔɔ ni ekɛ ewala aha yɛ Yehowa sɔɔmɔ mli. (Bɔfoi lɛ Asaji 6:8–7:60) Kɛ́ asafoŋ sɔɔlɔ ji bo lɛ, ani okɛ hiɛdɔɔ tsuɔ asafoŋ gbɛnaa nii kɛ shiɛmɔ nitsumɔ lɛ he nii taakɛ bɔ ni Stefano kɛ hiɛdɔɔ tsu egbɛnaa nii kɛ hegbɛ ni ekɛwie anɔkwale lɛ he nii lɛ?
Te Amɛyaa Nɔ Amɛhaa Tɛŋŋ?
18. Mɛni abaanyɛ awie yɛ asafoŋ sɔɔlɔi pii anitsumɔ he, ni mɛni nɔ mi abaanyɛ ama aha amɛ?
18 Asafoŋ sɔɔlɔi pii feɔ nɔkwɛmɔ nɔ kpakpa yɛ Kristofoi ashihilɛ mli, ni amɛkwɛɔ amɛ asafoŋ nitsumɔi anɔ jogbaŋŋ, ni amɛnyiɛɔ shiɛmɔ nitsumɔ lɛ hiɛ fɛfɛo. Amɛnanemɛi Kristofoi ahiɛ sɔɔ amɛnitsumɔ nɛɛ babaoo ni Yehowa shiŋ amɛ ni ejwereee amɛ, ejaakɛ awo Hebri Kristofoi lɛ ashi akɛ: “Ejaakɛ Nyɔŋmɔ jeee mɔ ni yeɔ sane ni ejaaa ni ehiɛ aaakpa nyɛnitsumɔ lɛ nɔ kɛ suɔmɔ deŋme ni nyɛgbo yɛ egbɛi lɛ ahe, ni nyɛkɛsɔmɔ mɛi krɔŋkrɔŋi lɛ, ni nyɛsaa nyɛsɔmɔɔ amɛ lolo lɛ nɔ.”—Hebribii 6:10.
19. (a) Mɛɛ sanebimɔi asafoŋ sɔɔlɔ fɛɛ asafoŋ sɔɔlɔ baanyɛ ebi ehe? (b) Mɛni hewɔ ehe baaba sɛɛnamɔ akɛ aasusu naagbai ni asafoŋ sɔɔlɔi kɛkpeɔ lɛ ekomɛi ahe lɛ?
19 Shi, ekolɛ asafoŋ sɔɔlɔ fɛɛ asafoŋ sɔɔlɔ aaabi ehe ekɛ: “Te mishɛɔ Ŋmalɛ mli taomɔ nii ehe mihaa tɛŋŋ? Ani miyeɔ mibuaa asafo lɛ ekomefeemɔ diɛŋtsɛ? Ani mikwɛɔ nitsumɔ ni átu awo midɛŋ lɛ nɔ jogbaŋŋ kɛ hiɛdɔɔ? Ani mifeɔ nɔkwɛmɔ nɔ kpakpa yɛ shiɛmɔ nitsumɔ mli? Asafoŋ sɔɔlɔi komɛi yɛ naagba yɛ taomɔ nii ni amɛaashɛ he lɛ mli. No hewɔ lɛ, nyɛhaa wɔgbaa nɛkɛ naagbai nɛɛ ekomɛi ahe sane wɔkwɛa. Enɛ feemɔ baaye abua asafo lɛŋ asafoŋ sɔɔlɔ fɛɛ asafoŋ sɔɔlɔ ni ‘eka lɛ diɛŋtsɛ enitsumɔ ekwɛ.’ (Gal. 6:4) Esa akɛ enɛ aha hiɛsɔɔ ni mɛi krokomɛi yɔɔ kɛha suɔmɔ deŋme ni nɛkɛ hii ni sɔmɔɔ yɛ yiŋtoo krɛdɛɛ ko hewɔ lɛ gboɔ yɛ Yehowa Odasefoi ateŋ ni amɛji jɔɔmɔ diɛŋtsɛ kɛha Nyɔŋmɔ webii lɛ aya hiɛ.a
[Shishigbɛ niŋmaa]
a Ajie kɛjɛ September 15, 1985 Watchtower Iɛ mli.
Ani Obaanyɛ Otsɔɔ Mli?
◻ Asafoŋ sɔɔlɔi ji jɔɔmɔ kɛha Yehowa webii yɛ mɛɛ gbɛ nɔ?
◻ Yɛ mɛɛ gbɛ nɔ be-fɛɛ sɔɔmɔ lɛ baanyɛ aye abua nyɛmimɛi ni taoɔ ni amɛtsɔmɔ asafoŋ sɔɔlɔi Iɛ?
◻ Mɛni hewɔ esa akɛ asafoŋ sɔɔlɔi afee mɛi ni “mumɔ krɔŋkrɔŋ kɛ nilee eyi emɛ obɔ” lɛ?
◻ Yɛ mɛɛ gbɛ nɔ anɔkwafo Stefano lɛ ji nɔkwɛmɔ nɔ fɛfɛo kɛha asafoŋ sɔɔlɔi ŋmɛnɛ?
[Mfoniri ni yɔɔ baafa 11]
Onukpai kɛ osafoŋ sɔɔlɔi ji jɔɔmɔ kɛha asafo Iɛ
[Mfoniri ni yɔɔ baafa 13]
Gbɛgbamɔ sɔɔmɔ Iɛ ji tsɔsemɔ ni sa jogbaŋŋ kɛha mɛi ni sumɔɔ ni amɛtsɔmɔ asafoŋ sɔɔlɔi aloo onukpai