Obalaŋtai—Namɔ Tsɔɔmɔ Toi Nyɛboɔ?
“Mɛi komɛi aaakwa hemɔkɛyeli lɛ, ni amɛkɛ amɛhe aaayakpɛtɛ . . . daimonioi atsɔɔmɔi ahe.”—1 TIMOTEO 4:1.
1. (a) Mɛɛ nihalamɔ ka obalaŋtai ahiɛ? (b) Mɛɛ gbɛ nɔ Yehowa tsɔɔ etsɔɔ mɛi anii?
SANE ni abiɔ obalaŋtai yɛ biɛ ji akɛ, Namɔ tsɔɔmɔ toi nyɛboɔ? Enɛ tsɔɔ akɛ nyɛ obalaŋtai lɛ yɛ nɔ ni nyɛbaahala. Nihalamɔ lɛ ji ŋwɛi nitsɔɔmɔ toi ni ooobo jogbaŋŋ ni otsu he nii aloo daimonioi atsɔɔmɔi asɛɛ ni ooodi. Yehowa tsɔɔ E-Wiemɔ, ni ji Biblia lɛ, kɛ agbɛnɛ mɛi ni ekɛ amɛ tsuɔ nii akɛ enajiaŋdamɔlɔi yɛ shikpɔŋ nɔ lɛ asɔɔmɔ nɔ etsɔɔ nii. (Yesaia 54:13; Bɔfoi lɛ Asaji 8:26-39; Mateo 24:45-47) Shi ani efeɔ bo naakpɛɛ akɛ daimonioi lɛ hu tsɔɔ nii?
2. Mɛni hewɔ ehe hiaa akɛ wɔkwɛ wɔhe nɔ jogbaŋŋ yɛ daimonioi atsɔɔmɔi ahe, titri lɛ yɛ be nɛɛ mli lɛ?
2 Bɔfo Paulo ŋma akɛ: “Naagbee gbii lɛ anɔ lɛ, mɛi komɛi aaakwa hemɔkɛyeli lɛ, ni amɛkɛ amɛhe aaayakpɛtɛ lakamɔ mumɔi kɛ daimonioi atsɔɔmɔi ahe.” (1 Timoteo 4:1) Akɛni “naagbee gbii” lɛ amli wɔyɔɔ, ni Satan kɛ edaimonioi lɛ miitsu nii waa yɛ mli hewɔ lɛ, ani onuɔ nɔ hewɔ ni wɔbiɔ sane lɛ akɛ, Namɔ tsɔɔmɔ toi oboɔ, lɛ shishi? (2 Timoteo 3:1-5; Kpojiemɔ 12:7-12) Akɛni Satan kɛ edaimonioi lɛ tsuɔ nii yɛ gbɛ ni yɔɔ nigii nɔ, ni amɛlakaa mɔ waa yɛ amɛnifeemɔ gbɛi lɛ amli hewɔ lɛ, ehe miihia ni osusu sanebimɔ nɛɛ he waa.—2 Korintobii 11:14, 15.
Daimonioi lɛ kɛ Amɛtsɔɔmɔi Lɛ
3. Namɛi ji daimonioi lɛ, mɛni ji amɛyiŋtoo, ni mɛɛ gbɛ nɔ amɛtsɔɔ amɛtsuɔ enɛ he nii?
3 Be ko ni eho lɛ, daimonioi lɛ ji Yehowa ŋwɛibɔfoi, shi amɛtse atua amɛshi amɛ Bɔlɔ lɛ ni amɛbatsɔmɔ Satan sɛɛfilɔi. (Mateo 12:24) Amɛyiŋtoo ji ni amɛfite gbɔmɛi ni amɛgbala amɛ kɛjɛ Nyɔŋmɔ sɔɔmɔ he. Bɔni afee ni amɛnyɛ amɛfee enɛ lɛ, daimonioi lɛ kɛ adesai tsɔɔlɔi tsuɔ nii koni amɛkɛha pɛsɛmkunya, kɛ jeŋba shara shihilɛ ni Yehowa buɔ nomɛi fɔ lɛ ashwere. (Okɛto 2 Petro 2:1, 12-15 he.) Bɔ ni fee ni tsutsu ŋwɛibɔfoi anɔkwafoi batsɔmɔ daimonioi lɛ amlitii baaye abua bo koni oyoo amɛtsɔɔmɔi lɛ kɛ shihilɛ gbɛ ni nɛkɛ tsɔɔmɔi nɛɛ haa eshwereɔ lɛ.
4. (a) Mɛni hewɔ ŋwɛibɔfoi toigbolɔi ba shikpɔŋ nɔ yɛ Noa gbii lɛ amli lɛ? (b) Mɛni ba bɔfoi fɔji lɛ kɛ amɛshwiei lɛ anɔ yɛ Nu Afua lɛ mli?
4 Yɛ Noa gbii lɛ amli lɛ, ŋwɛibɔfoi komɛi bana gbɔmɛi abiyei ni he yɔɔ fɛo lɛ ahe suɔmɔ aahu akɛ nɛkɛ ŋwɛi bɔɔ nii nɛɛ shi amɛ gbɛhei ni yɔɔ ŋwɛi lɛ ni amɛba shikpɔŋ lɛ nɔ. Nɔ ni jɛ bɔlɛnamɔ ni tee nɔ yɛ amɛkɛ yei ateŋ lɛ mli ba ji bii ni jeee adebɔɔ naa nɔ̃ ni atsɛɔ amɛ Nefilim loo obalaŋi agboi tamɔ asaabui. Akɛni ejeee adebɔɔ naa nii akɛ mumɔŋ bɔɔ nii kɛ gbɔmɛi ana bɔlɛ hewɔ lɛ, nɔ ni nakai bɔfoi toigbolɔi lɛ kɛ nakai yei lɛ fee lɛ ehiii tamɔ hii kɛ hii ayakayaka nifeemɔ ni tee nɔ yɛ sɛɛ mli yɛ Sodom hii kɛ gbekɛbii hii ateŋ lɛ pɛpɛɛpɛ. (1 Mose 6:1-4; 19:4-11; Yuda 6, 7) Eyɛ mli akɛ ŋwɛibɔfoi lɛ aŋamɛi lɛ gboi yɛ nu afua lɛ mli kɛ amɛbii asaabui lɛ moŋ, shi bɔfoi fɔji lɛ jie helooŋ gbɔmɔtsei ni amɛtsake amɛhe kɛbote mli lɛ yɛ amɛhe ni amɛku amɛsɛɛ kɛtee ŋwɛi ni amɛbatsɔmɔ Satan Abonsam hefatalɔi.—2 Petro 2:4.
5. Mɛɛ bɔɔ nii nɛkɛ daimonioi lɛ ji, ni amɛbɔɔ mɔdɛŋ koni amɛfite Nyɔŋmɔ mlai lɛ yɛ mɛɛ gbɛ nɔ?
5 Yɛ yinɔsane mli nii ni ba nɛɛ hewɔ lɛ, ani onuɔ nɔ̃ bɔɔ nii ni daimonioi lɛ ji diɛŋtsɛ lɛ shishi? Amɛji mɛi ni ekpɔtɔ yɛ nyenyeŋtswibɔɔ mli ni anaaa amɛ ni kudɔɔ jeŋ ni bɔlɛnamɔ eye lɛ sɛkɛ nɛɛ. Eyɛ mli akɛ atsi amɛ gbɛ koni amɛkatsɔmɔ amɛhe gbɔmɛi dɔŋŋ moŋ, shi amɛnaa miishɛɛ kɛjɛɔ mɛi ni amɛbaanyɛ amɛfite amɛ yɛ shikpɔŋ nɔ lɛ abɔlɛnamɔ mli nyenyeŋtswibɔɔ lɛ mli. (Efesobii 6:11, 12) Daimonioi lɛ bɔɔ mɔdɛŋ ni amɛfite Yehowa mlai ni kɔɔ hetsemɔ kɛ jeŋba kpakpa he lɛ kɛtsɔ ha ni amɛhaa efeɔ tamɔ eyɔɔ keketee tsɔ yɛ mɛi ahiɛ lɛ nɔ. Nɛkɛ ŋwɛibɔfoi yiwalɔi nɛɛ fiɔ bɔlɛnamɔ mli jeŋba shara sɛɛ akɛ nii ni tɔmɔ ko bɛ he, shihilɛ gbɛ ni ŋɔɔ.
Daimonioi Atsɔɔmɔi ni Ahaa Eshwereɔ
6. Mɛni hewɔ esaaa akɛ efeɔ wɔ naakpɛɛ akɛ daimonioi lɛ haa amɛtsɔɔmɔi gbɛɔ shwãa yɛ gbɛ ni yɔɔ nigii nɔ lɛ?
6 Esaaa akɛ efeɔ wɔ naakpɛɛ akɛ daimonioi lɛ aaaha amɛtsɔɔmɔi lɛ ashwere yɛ gbɛ ni yɔɔ nigii nɔ, ejaakɛ enɛ ji gbɛ ni amɛhiɛnyiɛlɔ, Satan Abonsam, kɛtsu nii ni ekɛlaka Hawa lɛ. Kaimɔ akɛ ewie etsɔɔ lɛ tamɔ mɔ ko ni miisumɔ ni eye ebua lɛ. Satan bi akɛ: “Lɛlɛŋ Nyɔŋmɔ kɛɛ akɛ nyɛkaye trom lɛ mli tsei ayibii lɛ fɛɛ eko lɛ?” Kɛkɛ ni ekɛ ŋaatsɔɔ bɔ mɔdɛŋ ni egbɔjɔ Nyɔŋmɔ tsɔɔmɔ lɛ kɛtsɔ kɛɛmɔ ni ekɛɛ Hawa akɛ tso ni agu eyeli lɛ yeli moŋ he baaba sɛɛnamɔ aha lɛ lɛ nɔ. Abonsam wo lɛ shi akɛ: “Gbi nɔ ni nyɛaaye eko lɛ, nyɛhiŋmɛii aaagbele, ni nyɛaatsɔmɔ tamɔ Nyɔŋmɔ, ni nyɛaale ekpakpa kɛ efɔŋ.” (1 Mose 3:1-5) No hewɔ lɛ alaka Hawa, hɛɛ, ashishiu lɛ kɛtee Nyɔŋmɔ nɔ toigbele mli.—2 Korintobii 11:3; 1 Timoteo 2:13, 14.
7. Mɛni ejɛ daimonioi atsɔɔmɔi nigii lɛ mli eba, ni mɛɛ kɔkɔbɔɔ enɛ kɛhaa?
7 Alaka mɛi pii yɛ ŋmɛnɛŋmɛnɛ beaŋ hu. Daimonioi lɛ kɛ ŋaa fɔŋ eha bɔlɛnamɔ mli jeŋba shara eshwere aahu akɛ ebafee nii ni mɛi ni wieɔ shiɔ enɛ yɛ tsutsu lɛ miikpɛlɛ nɔ agbɛnɛ. Akɛ nɔkwɛmɔ nɔ lɛ, beni mɔ ko ni ale lɛ jogbaŋŋ ni kɛ ŋaawoo haa yɛ adafitswaa woji amli yɛ U.S. Amerika lɛ ha wolo ko ni kɔɔ mɛi ni boteko gbalashihilɛ mli ni kɛ amɛhe woɔ bɔlɛnamɔ mli lɛ ahe hetoo lɛ, yoo nɛɛ ŋma akɛ: “Misusuuu akɛ matsake mijwɛŋmɔ yɛ sane nɛɛ he, shi agbɛnɛ misusuɔ akɛ mɛi enyɔ ni hiɛ edɔ yɛ gbalashihilɛ mlibotemɔ he lɛ baanyɛ afa gbɛ yɛ otsii lɛ anaagbee shii abɔ ko koni amɛyaka bɔ ni amɛaatamɔ amɛhe lɛ amɛkwɛ.” Kɛkɛ ni ekɛfata he akɛ: “Minyɛɛɛ mahe maye akɛ miŋma enɛ!” Enyɛɛɛ ehe eye akɛ ejie ajwamaŋbɔɔ yi etsɔɔ, shi nakai nɔŋŋ efee lɛ! Eyɛ faŋŋ akɛ, esa akɛ wɔkwɛ jogbaŋŋ koni daimonioi atsɔɔmɔi akana hewalɛ yɛ bɔ ni wɔsusuɔ nifeemɔi ni Nyɔŋmɔ buɔ amɛ fɔ lɛ he wɔhaa lɛ nɔ.—Romabii 1:26, 27; Efesobii 5:5, 10-12.
8. (a) Akɛ wiemɔ “je” lɛ tsuɔ nii yɛ Biblia lɛ mli yɛ mɛɛ gbɛ nɔ? (b) Namɔ yeɔ je lɛ nɔ lɛ, ni te esa akɛ Yesu sɛɛnyiɛlɔi lɛ abu loo asusu je lɛ he aha tɛŋŋ?
8 Esaaa akɛ wɔhiɛ kpaa nɔ akɛ Satan ji “je nɛŋ lumɔ lɛ.” Yɛ anɔkwale mli lɛ, bɔfo Yohane kɛɛ akɛ “jeŋ muu lɛ fɛɛ ka mɔ fɔŋ lɛ [hewalɛ] mli.” (Yohane 12:31; 1 Yohane 5:19) Eji anɔkwale akɛ, yɛ bei komɛi amli lɛ, Yesu kɛ wiemɔ “jeŋ” loo “je” tsuɔ nii ekɛdamɔɔ shi ehaa adesai fɛɛ. (Mateo 26:13; Yohane 3:16; 12:46) Shi efɔɔ wiemɔ “je lɛ” kɛ nitsumɔ ni ekɛtoɔ adesai fɛɛ ni ato amɛ gbɛjianɔ ni yɔɔ anɔkwa Kristofoi asafo lɛ sɛɛ lɛ ahe shii abɔ. Akɛ nɔkwɛmɔ nɔ lɛ, Yesu kɛɛ esa akɛ esɛɛnyiɛlɔi lɛ afee mɛi ni “jɛɛɛ je lɛŋ” (adesai asafoi ni ejaaa lɛ), ni akɛ, akɛni amɛjɛɛɛ je lɛ mli hewɔ lɛ, je lɛ baanyɛ amɛ. (Yohane 15:19; 17:14-16) Biblia lɛ kɛ kɔkɔbɔɔ kroko haa akɛ wɔkatsɔmɔ mɛi ni dɔɔ jeŋ ni Satan yeɔ nɔ nɛɛ he.—Yakobo 4:4.
9, 10. (a) Mɛɛ je lɛŋ nibii kanyaa bɔlɛnamɔ mli akɔnɔi ni esaaa? (b) Mɛɛ gbɛ nɔ abaanyɛ ayoo mɔ ni hɔ nii ni je lɛŋ hiɛtserɛjiemɔ tsɔɔ lɛ sɛɛ?
9 Bɔfo Yohane wo hewalɛ akɛ: “Nyɛkasumɔa je lɛ, aloo nibii hu ni yɔɔ je lɛŋ.” Ekɛɛ hu akɛ: “Nɔ fɛɛ nɔ ni yɔɔ je lɛŋ lɛ, heloo lɛ sɛɛdii nii lɛ kɛ hiŋmɛii lɛ asɛɛdii nii lɛ kɛ shihilɛ lɛ mli hewoo lɛ, ejɛɛɛ Tsɛ lɛ mli.” (1 Yohane 2:15, 16) Susumɔ enɛ he okwɛ. Mɛni yɔɔ je lɛ mli ŋmɛnɛ ni kanyaa akɔnɔ fɔŋ, akɛ nɔkwɛmɔ nɔ lɛ, bɔlɛnamɔ mli jeŋba shara nɛkɛ? (1 Tesalonikabii 4:3-5) Ni je lɛŋ lalai lɛ amli babaoo hu? California polisi onukpa ko ni kwɛɔ gbokɛlɛfoi ni aŋmɛɛ amɛhe fioo lɛ anɔ lɛ kɛɛ: “Nɔ ni lalai lɛ tsɔɔ titri ji akɛ esaaa akɛ oboɔ ofɔlɔi atoi, ni ákɛ esa akɛ ohi shi bɔ ni osumɔɔ.” Ani oyɔseɔ tsɔɔmɔ ni lala ni tamɔ nɛkɛ kɛhaa lɛ jɛɛhe lɛ?
10 Kaimɔ akɛ nɔ ni Satan taoɔ akɛɛ Hawa ji akɛ: ‘Oolaaje nɔ ko ni ŋɔɔ waa. Hii shi bɔ ni osumɔɔ. Kpɛɛ bo diɛŋtsɛ oyiŋ yɛ nɔ ni hi kɛ nɔ ni ehiii he. Ehe ehiaaa ni obo Nyɔŋmɔ toi.’ (1 Mose 3:1-5) Ani jeee shɛɛ sane ni tamɔ nɛkɛ nɔŋŋ anaa yɛ je lɛŋ lalai babaoo mli wiemɔi amli? Shi jeee lalai anɔ pɛ daimonioi lɛ tsɔɔ amɛtsɔɔ nii. Amɛkɛ televishin nɔ nibii ni kɔɔ jarayeli, sinii, kɛ video nɔ nibii hu tsɔɔ nii. Yɛ mɛɛ gbɛ nɔ? Ojogbaŋŋ, hiɛtserɛjiemɔi ni jɛɔ je lɛŋ redio, televishin kɛ video nɔ baa lɛ haa Nyɔŋmɔ jeŋba kpakpa he tsɔɔmɔi lɛ feɔ tamɔ nɔ ni amɛyɛ keketee ni akɛwaa mɔ yi. Amɛwoɔ ajwamaŋbɔɔ he hewalɛ kɛtsɔɔ enɔ mi ni amɛmaa kɛ bɔ ni akɛtsɔɔ akɛ akɔnɔ nii lɛ nɔ.
11. Kɛ aawie yɛ jeŋba gbɛfaŋ lɛ, mɛni televishin fɔɔ tsɔɔmɔ?
11 Wolo tɛtrɛɛ, U.S.News & World Report lɛ jaje akɛ: “Yɛ afi 1991 mli lɛ, U.S.Amerika redio kɛ televishin nitsumɔ hei etɛ lɛ jie bɔlɛnamɔ he nibii fe 10,000 kɛjɛ gbɛkɛ ŋmɛji 7 kɛyashi 11; yɛ mfonirii lɛ fɛɛ eko ni tsɔɔ bɔ ni bɔlɛnamɔ yaa nɔ yɛ gbalashihilɛ mli hefatalɔi ateŋ lɛ sɛɛ lɛ, amɛjie bɔlɛnamɔ ni yaa nɔ yɛ gbalashihilɛ sɛɛ lɛ 14 sɔŋŋ amɛtsɔɔ.” Yɛ bɔlɛnamɔ mli jeŋba shara fe 9,000 ni ajie atsɔɔ daa gbɛkɛnaashi yɛ afi muu fɛɛ mli lɛ hewɔ lɛ, mɛni ji nɔ ni obaakɛɛ akɛ televishin tsɔɔ mɛi lɛ? Barry S. Sapolsky, ni kɛ mɔ ko ŋma amaniɛbɔɔ, “Sex in Primetime Television: 1979 Versus 1989,” lɛ wie akɛ: “Kɛ obalaŋta ko ni miida kɛ afii pii kwɛ TV nɔ nibii ni tsɔɔ bɔ ni mɛi kɛ amɛhe woɔ bɔlɛnamɔ nifeemɔi amli lɛ, nɛkɛ mfonirii akpei abɔ ni enaa loo amɛhoɔ yɛ ehiɛ afii pii lɛ baatsɔɔ lɛ akɛ bɔlɛnamɔ ŋɔɔ—ni nɔ ko kwraa jɛɛɛ mli baaa.” Ŋwanejee ko kwraa bɛ enɛ he: Je lɛŋ hiɛtserɛjiemɔi tsɔɔ obalaŋtai lɛ akɛ mlai bɛ, ákɛ akpɛlɛɔ ajwamaŋbɔɔ nɔ, ni ákɛ nɔ fɔŋ ko bɛ ni baajɛ bɔ ni ohiɔ shi ohaa ni Nyɔŋmɔ buɔ no fɔ lɛ mli aba.—1 Korintobii 6:18; Efesobii 5:3-5.
12. Mɛni hewɔ je lɛŋ hiɛtserɛjiemɔ ji oshara kɛha obalaŋtai Kristofoi titri lɛ?
12 Ato je lɛŋ lalai, sinii, video, kɛ televishin nɔ nibii lɛ ahe gbɛjianɔ koni eŋɔɔ obalaŋtai anaa. Amɛhaa daimonioi atsɔɔmɔi ni ekpɔtɔ lɛ shwereɔ! Shi ani esa akɛ enɛ afee wɔ naakpɛɛ? Susumɔ he okwɛ. Kɛji akɛ apasa jamɔ kɛ maŋkwramɔ ji Satan je lɛ fa—ni nakai amɛji yɛ faŋŋ mli lɛ—ani jwɛŋmɔ yɛ mli akɛ aaahe aye akɛ daimonioi ahewalɛ ko bɛ hiɛtserɛjiemɔ ni je lɛ haa eshwereɔ lɛ mli? Obalaŋtai titri ji mɛi ni esa akɛ amɛha amɛhiɛ ahi amɛhe nɔ jogbaŋŋ koni “nyɛkaha jeŋ ni ebɔle nyɛhe kɛkpe lɛ miimia nyɛ kɛmiiwo lɛ diɛŋtsɛ enɔ̃ mli.”—Romabii 12:2, The New Testament in Modern English, ni J. B. Phillips fee.
Taomɔ Bo Diɛŋtsɛ Omli Okwɛ
13. Mɛɛ hekaa-kɛ-kwɛmɔ loo mlipɛimɔ esa akɛ afee?
13 Sane ni kɔɔ mɔ ni oboɔ etsɔɔmɔi atoi nɛɛ he lɛ kɔɔɔ owiemɔi pɛ he shi ekɔɔ onifeemɔi hu he. (Romabii 6:16) No hewɔ lɛ bi ohe akɛ, ‘Ani nɔ ni mikaseɔ kɛjɛɔ je lɛŋ lakamɔ gbɛi nɛɛ anɔ lɛ miisa misubaŋ kɛ mishihilɛ gbɛ lɛ he yɛ gbɛ ni ejaaa nɔ? Ani eeenyɛ eba akɛ daimonioi atsɔɔmɔi miigbu shi kɛmiibote mishihilɛ mli?’ Bɔni afee ni aye abuao ni onyɛ oha sanebimɔi nɛɛ ahetoo lɛ, mɛni hewɔ okɛ be kɛ mɔdɛŋbɔɔ ni okɛkaseɔ Biblia lɛ, Kristofoi akpeei ashishi ni oyaa, kɛ mɛi krokomɛi ni owieɔ Nyɔŋmɔ Maŋtsɛyeli lɛ he sane lɛ otsɔɔ amɛ lɛ etooo nɔ ni ofiteɔ okɛkwɛɔ TV, okɛboɔ lalai atoi, kpɔiaŋgbɔlemɔ he akaŋshii mli ni okɛ ohe woɔ, loo nibii krokomɛi ni okɛ ohe woɔ mli lɛ he okwɛɛɛ? Akɛni oshara babaoo—yɛ anɔkwale mli lɛ, owala diɛŋtsɛ—ka oshara mli hewɔ lɛ, okɛ anɔkwayeli apɛi loo otao omli okwɛ.—2 Korintobii 13:5.
14. Mɛni baasa wɔmumɔŋ hewalɛnamɔ he, ni mɛɛ susumɔ ni hiɛdɔɔ yɔɔ mli esa akɛ wɔha ahi wɔjwɛŋmɔ mli?
14 Ole jogbaŋŋ akɛ heloo naa niyenii ni oyeɔ lɛ baasa ogbɔmɔtsoŋ hewalɛnamɔ he. Nakai nɔŋŋ hu, nɔ ni okɛwoɔ ojwɛŋmɔ kɛ otsui mli lɛ saa omumɔŋ hewalɛnamɔ he. (1 Petro 2:1, 2) Yɛ be mli ni obaanyɛ olaka bo diɛŋtsɛ ohe yɛ nɔ ni onaa he miishɛɛ diɛŋtsɛ lɛ ahe lɛ, onyɛŋ olaka wɔ-Kojolɔ, Yesu Kristo. (Yohane 5:30) No hewɔ lɛ, bi ohe akɛ, ‘Eji Yesu yɛ shikpɔŋ nɔ kulɛ, ani eeefee mi hiɛgbele akɛ maha eba mitsũ mli ni ebabo milalai atoi loo ena nɔ ni mikwɛɔ yɛ TV nɔ lɛ?’ Anɔkwasane ni hiɛdɔɔ yɔɔ mli ji akɛ, Yesu miikwɛ ni ele wɔ nitsumɔi lɛ.—Kpojiemɔ 3:15.
Wuu Oshi Daimonioi Atsɔɔmɔi
15. Mɛni hewɔ esa akɛ Kristofoi awuu waa ni amɛkɛte shi amɛshi daimonioi atsɔɔmɔi lɛ?
15 Nɔnyɛɛ ni daimonioi lɛ kɛbaa obalaŋtai anɔ koni amɛbo amɛtsɔɔmɔi atoi lɛ da naakpa. Etamɔ nɔ ni nɛkɛ mumɔi fɔji nɛɛ kɛ shihilɛ ni ji amrɔ miishɛɛnamɔ haa—ashwɛ ni aŋmɔ. Bɔni afee ni Mose ni hi shi yɛ blema lɛ asa Nyɔŋmɔ hiɛ lɛ, ekpoo “esha mli ŋɔɔmɔ be fioo ko” ni eeena akɛ Farao weku lɛ mlinyo ko ni he hiaa waa lɛ. ((Hebribii 11:24-27) Nɔ ni daimonioi lɛ kɛhaa lɛ kpoomɔ bɛ mlɛo, no hewɔ lɛ esa akɛ owuu ta waa koni onyɛ ofee nɔ ni ja. Sane nɛɛ ji anɔkwale diɛŋtsɛ, ejaakɛ wɔna esha akɛ gboshinii ni wɔtsuii shweɔ efɔŋ feemɔ yɛ bei pii amli. (1 Mose 8:21; Romabii 5:12) Yɛ esha ni wɔshweɔ hewɔ lɛ, ehe bahia ni bɔfo Paulo po kɛ ehe aye dɛŋdɛŋ koni ekaŋmɛ ehelooŋ akɔnɔi lɛ agbɛ ní amɛye enɔ.—1 Korintobii 9:27; Romabii 7:21-23.
16. Te obalaŋtai aaafee tɛŋŋ ate shi ashi nɔnyɛɛ koni akɛ he awo jeŋba shara mli lɛ?
16 Eyɛ mli akɛ ekolɛ aaakao ni “[o]nyiɛ mɛi pii asɛɛ kɛyafee efɔŋ” moŋ, shi Nyɔŋmɔ baanyɛ aye abuao ni owuu oshi nɔnyɛɛ ni jɛɔ otipɛŋfoi aŋɔɔ baa koni odi amɛgbɛ fɔŋ lɛ sɛɛ lɛ. (2 Mose 23:2; 1 Korintobii 10:13) Shi esa akɛ obo Nyɔŋmɔ gbɛtsɔɔmɔi atoi, ni okɛ wiemɔi lɛ ato otsui mli tamɔ jwetri ko. (Lala 119:9, 11) Ehe miihia ni oyoo akɛ, kɛ obalaŋtai tse amɛhe banee lɛ, bɔlɛnamɔ mli akɔnɔi baanyɛ ate shi ni ekɛ Nyɔŋmɔ mla mlikuu baaba. Obalayoo fioo ko kpɛlɛ nɔ akɛ, “Kɛ mikɛ minaanyo gbekɛ nuu lɛ pɛ yɛ he kome lɛ, migbɔmɔtso lɛ sumɔɔ ni efee nɔ kome ni mijwɛŋmɔ hu kɛɔ mi akɛ mifee nɔ kroko moŋ.” No hewɔ lɛ yɔsemɔ he ni obaanyɛ ofee nii kɛyashɛ, ni oyoo akɛ otsui lɛ, kutumpɔfo ni. (Yeremia 17:9) Kaatse ohe banee. (Abɛi 18:1) Foo husu owo ohedɔɔ loo suɔmɔ wiemɔi lɛ ahe. Ni nɔ ni he hiaa titri lɛ, okɛ mɛi ni yɔɔ suɔmɔ kɛha Yehowa ni amɛyɔɔ bulɛ ni mli kwɔ kɛha emlai lɛ pɛ abɔ gbagbalii.—Lala 119:63; Abɛi 13:20; 1 Korintobii 15:33.
17. Mɛni baanyɛ aye abua obalaŋtai Kristofoi koni amɛna hewalɛ ni baaha amɛte shi amɛwo daimonioi atsɔɔmɔi?
17 Kristofoi awoji ni ato he gbɛjianɔ kɛha omumɔŋ hewalɛwoo lɛ kasemɔ jogbaŋŋ baaye abua bo. Akɛ nɔkwɛmɔ nɔ lɛ, susumɔ Questions Young People Ask—Answers That Work kɛ agbɛnɛ yitso ni kɔɔ “Ta ni Awuɔ Koni Afee Nɔ ni Ja” ni yɔɔ Obaanyɛ Ohi Shi Kɛya Naanɔ yɛ Paradeiso yɛ Shikpɔŋ Nɔ wolo lɛ mli lɛ he okwɛ. Ha Ŋmalɛ mli nitsɔɔmɔ ni akɛha lɛ abote ojwɛŋmɔ kɛ otsui mli tɔ̃ɔ, ni eeewaje bo. Anɔkwa sane ko ni esaaa akɛ ohiɛ kpaa nɔ kɔkɔɔkɔ ji akɛ, nii ni ja feemɔ bɛ mlɛo, yɛ jeŋ ni daimonioi yeɔ nɔ nɛɛ mli. No hewɔ lɛ esa akɛ owuu ta lɛ waa. (Luka 13:24) Tswaa omumɔŋ hewalɛ lɛ oma shi. Kaakase mɛi ni he waaa, ni kɛ gbeyeishemɔ nyiɛɔ gbɔmɛi asɛɛ kɛkɛ lɛ.
Na Ŋwɛi Nitsɔɔmɔ He Sɛɛ
18. Mɛni ji sɛɛnamɔi ni jɛɔ toiboo ni afeɔ ahaa ŋwɛi nitsɔɔmɔ mli baa lɛ ekomɛi?
18 Kaimɔ hu akɛ, nɔ ko ni sɛɛnamɔ yɔɔ he ejeŋ odɛŋ kɔkɔɔkɔ yɛ Yehowa tsɔɔmɔi atoi ni oboɔ lɛ hewɔ. Yɛ anɔkwale mli lɛ, esumɔɔ bo, ni no hewɔ ni “etsɔɔo nii ni hi hao” lɛ. (Yesaia 48:17) No hewɔ lɛ bo Yehowa tsɔɔmɔ toi koni oye ohe kɛjɛ tsuiŋdɔlɛ ni henilee ni afite lɛ, bulɛ ni ayɔɔ kɛha he ni laajeɔ, hɔŋɔɔ ni asumɔɔɔ, bɔlɛnamɔ mli tsɛŋemɔ helai, loo osharai krokomɛi ni ekɛbaa lɛ amli. Yehowa mli filiɔ lɛ kɛ́ etsuji kɛ hetoo ni ekɛaaha Satan mpoatswaa akɛ adesai yeŋ Nyɔŋmɔ anɔkwa yɛ kaa shishi lɛ ha lɛ lɛ. (Hiob 1:6-12) Kɛ oha Yehowa tsui nya kɛtsɔ anɔkwa ni oooye lɛ lɛ nɔ lɛ, oyi baana wala yɛ be mli ni ekɛ fɔbuu kojomɔ baa je nɛɛ nɔ lɛ, shi mɛi fɛɛ ni kuɔ emlai amli lɛ ahiɛ baakpata.—Abɛi 27:11; 1 Korintobii 6:9, 10; 1 Yohane 2:17.
19. Te naanyo ni akɛ mɛi ni hiɛ sɔɔ Yehowa tsɔɔmɔ mli sɛɛnamɔi lɛ bɔɔ lɛ jara wa ha tɛŋŋ?
19 Kɛ okɛ gbɔmɛi ni hiɛ sɔɔ nɔ ni Yehowa efee kɛha amɛ lɛ bɔɔ gbagbalii lɛ, obaanyɛ okase nii kɛjɛ amɛ niiashikpamɔ mli. Yoo ko ni tsutsu lɛ ekɛ tsofai fɔji tsuɔ nii ni ekɛ ehe woɔ jeŋba shara mli lɛ tsɔɔ mli akɛ: “Eji mibooo Yehowa toi kulɛ, benɛ migbo momo. AIDS gbe nuu ni kulɛ mikɛ lɛ baabote gbalashihilɛ mli lɛ. Mi tsutsu nanemɛi fɛɛ ni mikɛ amɛ bɔɔ gbagbalii lɛ fɛɛ egboi kɛ AIDS loo amɛjwere gbele saa nɔ. Mifɔɔ amɛ namɔ yɛ gbɛjegbɛi anɔ, ni midaa Yehowa shi daa gbi yɛ emlai ni kudɔɔ ewebii lɛ hewɔ, ni ebaaha wɔfee mɛi krɔŋkrɔŋi kɛ wɔkɛtsu nii. Minako miishɛɛ, tsui ni nyɔɔ mɔ mli, kɛ shweshweeshwe shihilɛ tamɔ bɔ ni mina bianɛ nɛɛ pɛŋ.” Lɛlɛŋ, toiboo ni afeɔ ahaa Yehowa tsɔɔmɔ lɛ he baa sɛɛnamɔ kɛhaa wɔ yɛ be fɛɛ mli!
Halamɔ nɔ ni Ja Lɛ
20, 21. (a) Mɛɛ nihalamɔi enyɔ obalaŋtai yɔɔ? (b) Mɛɛ sɛɛnamɔ ni sɛɛ tsɛɔ baajɛ ŋwɛi tsɔɔmɔ toiboo mli aba?
20 Wɔmiiwo nyɛ obalaŋtai lɛ ahewalɛ akɛ: Nyɛhalaa nɔ ni ja lɛ kɛtsɔ Yehowa ni nyɛaasɔmɔ lɛ lɛ nɔ. Agbɛnɛ nyɛtswaa nyɛfai shi akɛ nyɛkɛ nyɛhe baakpɛtɛ nakai yiŋkpɛɛ lɛ he. (Yoshua 24:15) Yɛ anɔkwale mli lɛ, nibii enyɔ ateŋ ekome pɛ obaanyɛ okɔ. Yesu kɛɛ akɛ agbo ni lɛɛ kɛ gbɛ tɛtrɛɛ lɛ yɛ—nɔ ni enɔ nyiɛmɔ waaa ni mɔ fɛɛ mɔ feɔ nɔ ni esumɔɔ yɛ nɔ lɛ. Nakai gbɛ lɛ baa naagbee yɛ hiɛkpatamɔ mli. Gbɛ kroko lɛ nɔ etsa. Enɔ nyiɛmɔ wa yɛ jeŋba shara jeŋ ni daimonioi yeɔ nɔ nɛɛ mli. Shi yɛ naagbee lɛ nakai gbɛ lɛ kɛ mɛi ni nyiɛ nɔ lɛ baaya Nyɔŋmɔ naakpɛɛ jeŋ hee lɛ mli. (Mateo 7:13, 14) Mɛɛ gbɛ obaakɔ? Namɔ tsɔɔmɔ toi obaabo?
21 Yehowa eshi nihalamɔ lɛ eha bo. Ebɔɔɔ mɔdɛŋ akɛ eeenyɛ onɔ ni osɔmɔ lɛ. Nyɔŋmɔ gbalɔ Mose kɛɛ: “Mikɛ wala kɛ gbele eshwie nyɛhiɛ,” ni ewo amɛ hewalɛ akɛ: “Kɔ wala.” Ni ahalaa enɛ kɛtsɔɔ suɔmɔ ni “ooosumɔ Yehowa o-Nyɔŋmɔ lɛ, ni obo egbee toi, ni okɛ ohe akpɛtɛ ehe” lɛ nɔ. (5 Mose 29:2; 30:19, 20) Eba akɛ okɛ nilee aaahala akɛ ooobo ŋwɛi nitsɔɔmɔ toi koni ona wala ni bɛ naagbee lɛ mli ŋɔɔmɔ yɛ Nyɔŋmɔ anunyam jeŋ hee lɛ mli.
Te Obaaha Hetoo Tɛŋŋ?
◻ Namɛi ji daimonioi lɛ, ni mɛni amɛtsɔɔ?
◻ Mɛɛ gbɛ nɔ daimonioi lɛ tsɔɔ amɛhaa amɛtsɔɔmɔi gbɛɔ shwaa ŋmɛnɛ?
◻ Abaanyɛ awuu ashi daimonioi lɛ atsɔɔmɔi lɛ yɛ mɛɛ gbɛ nɔ?
◻ Mɛni ji sɛɛnamɔi ni jɛɔ Yehowa tsɔɔmɔi ni aboɔ toi lɛ mli baa?
[Mfoniri ni yɔɔ baafa 16]
Ŋwɛibɔfoi toigbolɔi lɛ kɛ amɛbii lɛ ha awuiyeli kɛ nyenyeŋtswibɔɔ shwere dani Nu Afua lɛ ba
[Mfoniri ni yɔɔ baafa 18]
Ani ohiɛ baagbo kɛ Yesu nu lala ni osumɔɔ lɛ?