‘Shi Misumɔɔɔ Yehowa!’
BOB ji gbekɛnuu fioo beni enyɛ batsɔ Yehowa Odasefoi lɛ ateŋ mɔ kome. Efata ehe kɛtee Maŋtsɛyeli Asa lɛ nɔ kɛ shiɛmɔ nitsumɔ lɛ nɔ, afii babaoo, eyɛ mli akɛ abaptisiko lɛ. Shi beni edaa kɛbɛŋkɛɔ afii nyɔŋmai enyɔ lɛ, ekpa Odasefoi lɛ kɛbɔɔ. Ejɛ shihilɛ gbonyo kome mli kɛyabote ekroko mli, ni efite eshihilɛ. Eyɛ mli akɛ ekɛɔ akɛ eheɔ nibii pii ni ekase kɛjɛ Biblia lɛ mli lɛ eyeɔ moŋ, shi enɛ faaa bɔ ni no baaha esumɔ akɛ eeeku esɛɛ eba Yehowa gbɛjianɔtoo lɛ mli. Mɛni hewɔ Bob nuɔ he nakai?
Susumɔ nɔkwɛmɔ nɔ kroko he. David efee be fɛɛ sɔɔlɔ afii babaoo. Yɛ be kɛ bei amli lɛ, sanebimɔi baa ejwɛŋmɔ mli ni kɔɔ Biblia mli tsɔɔmɔi komɛi ahe. Shi etsuɔ naagba lɛ he nii kɛtsɔɔ susumɔ akɛ esaaa akɛ gbɔmɔ nijiaŋ jeɔ wui akɛni nɔ kome loo nibii enyɔ ko tamɔ nɔ ni tsakpaa ko bɛ mli lɛ hewɔ. Etoɔ etsui shi emɛɔ Yehowa koni atsɔɔ nibii amli aha lɛ. Shi beni bei shwieɔ mli lɛ, David kɛɛ akɛ enyɛɛɛ eha etsui anyɔ emli yɛ nakai gbɛ nɔ dɔŋŋ. Eŋmɛɛ sɔɔmɔ hegbɛi lɛ ahe, ni etsɛɛɛ ni eshi anɔkwale lɛ. Mɛni ha tsakemɔ ba esusumɔ mli lɛ?
Yɛ anɔkwale mli lɛ, eji tsuiŋdɔlɛ akɛ wɔɔna mɛi ni wɔsumɔɔ lɛ akɛ amɛmiiŋmɛɛ wala foidamɔ lɛ he. Ŋwanejee ko bɛ he akɛ, wɔmiisumɔ ni wɔfee nɔ fɛɛ nɔ ni wɔɔnyɛ ni wɔkɛye wɔbua amɛ. (2 Korintobii 12:15; Galatabii 5:7) Shi mɛni haa mɔ ko shiɔ anɔkwale lɛ gbɛ lɛ? Mɛni abaanyɛ afee ni akɛye abua aŋkroaŋkroi ni tamɔ nɛkɛ ni amɛku amɛsɛɛ amɛba foidamɔ lɛ mli? Ni mɛni esa akɛ mɔ ko afee kɛ sui ni tamɔ nɛkɛ je shishi akɛ eeba emli?
Tsui, Henilee, Kɛ Hemɔkɛyeli
Nɔ kome ko yɛ ni sa kadimɔ jogbaŋŋ yɛ mɛi ni amɛŋmɛɛ anɔkwale lɛ he lɛ ahe. Amɛteŋ mɛi pii efeee nakai akɛni amɛheee amɛyeee akɛ eji anɔkwale lɛ dɔŋŋ hewɔ. Nɔ ni tamɔɔɔ nakai lɛ, amɛteŋ mɛi pii kɛɔ akɛ, “Mile akɛ enɛ ji anɔkwale lɛ, shi . . .” aloo, “Kɛ anɔkwale ko yɛ lɛ, mile akɛ no ji enɛ.” Amɛteŋ mɛi pii yɛ ni amɛheɔ amɛyeɔ kɛjɛɔ amɛtsuiŋ tɔɔ akɛ nɔ ni amɛkase kɛjɛ Biblia lɛ mli lɛ ji anɔkwale lɛ. Shi amɛha amɛnijiaŋ eje wui yɛ gbɛi komɛi anɔ ni amɛlaaje ekaa ni amɛyɔɔ lɛ. Yakobo kɛɛ: “Hemɔkɛyeli ni nitsumɔi bɛ he lɛ ji hemɔkɛyeli gbonyo.”—Yakobo 2:26.
Anɔkwale hemɔkɛyeli biɔ babaoo fe nilee kɛkɛ ni ayɔɔ aloo he ni aaahe aye akɛ nɔ ko yɛ ni ji anɔkwale. Ni eeefee nɔ ko ni yaa nɔ yɛ jwɛŋmɔŋ kɛkɛ lɛ, hemɔkɛyeli kɔɔ okadi tsui lɛ he, ejaakɛ Biblia lɛ kɛɔ wɔ akɛ: “Tsui akɛheɔ ayeɔ kɛshɛɔ jalɛ he.” (Romabii 10:10) No hewɔ lɛ shishinumɔ yɛ he akɛ Biblia lɛ gbalaa jwɛŋmɔ kɛyaa tsui lɛ nɔ akɛ naagba lɛ jɛɛhe yɛ be mli ni mɔ ko eje shishi eekpalaŋ kɛmiiya sɛɛ lɛ. Taakɛ Paulo bɔ kɔkɔ lɛ: “Nyɛkwɛa ni ahia, anyɛmimɛi, koni nyɛteŋ mɔ ko akahi tsui fɔŋ ni heee yeee ni ekpale kɛjɛ Nyɔŋmɔ, hiɛkalɔ lɛ he.”—Hebribii 3:12.
Kɛha odaseyeli ni tsɔɔ akɛ ekɔɔ tsui lɛ he diɛŋtsɛ lɛ, wɔbaanyɛ wɔbo Diane, mɔ ni kpalaŋ kɛtee lɛ toi. Beni enanemɛi Kristofoi bɔ mɔdɛŋ ni amɛye amɛbua lɛ lɛ, eha hetoo yɛ faŋŋ mli akɛ, “Minyɛŋ maku misɛɛ maba Yehowa ŋɔɔ. Misumɔɔɔ lɛ!” Ele akɛ nɔ kome pɛ ni baanyɛ aye abua lɛ ni ekpɛtɛ Yehowa Nyɔŋmɔ he ji suɔmɔ ni eeena eha lɛ akɛ Mɔ diɛŋtsɛ kɛ Mɔ ni sa ehetuu-kɛ-hamɔ. Yɛ anɔkwale mli lɛ, suɔmɔ ni tamɔ nɛkɛ ji nɔ ni tsirɛ lɛ ni ha ejɔɔ ewala nɔ eha Yehowa yɛ klɛŋklɛŋ be mli kwraa. Shi yɛ gbɛ ko nɔ lɛ enuuu suɔmɔ ko ni tamɔ nɛkɛ he dɔŋŋ. Kɛ enɛ bɛ lɛ, ele akɛ esa akɛ etsɔ henumɔi nɛɛ amli kɛji akɛ ebaanyɛ eku esɛɛ eba. Shi te ebaa lɛ tɛŋŋ ni mɔ ko laajeɔ suɔmɔ ni tsutsu lɛ enuɔ he waa nakai lɛ?
Paulo tsi “tsui fɔŋ ni heee yeee” ta. Yɛ shihilɛi lɛ ekomɛi amli lɛ, nɔ ni kɛ hemɔkɛyeli ni bɛ nɛɛ baa ji gbɛ ni aŋmɛɔ tsui lɛ koni nɔ ni Nyɔŋmɔ egu lɛ aba etsine aloo ni ete shi ewo nɔ ni efa lɛ. Tsui lɛ mli gbalaa ni eyeee emuu dɔŋŋ yɛ Yehowa hiɛ. Kɛ enu he akɛ enifeemɔ gbɛ lɛ jeee nɔ ni Nyɔŋmɔ kpɛlɛɔ nɔ dɔŋŋ lɛ, gbɛ ni yɔɔ mlɛo ni eeetsɔ nɔ ekpoo saji ni aaabibii lɛ ji ni ‘egbala ehe shi kɛjɛ Nyɔŋmɔ hiɛkalɔ lɛ he.’ (Okɛto 1 Mose 3:8-10 he.) Ni eeetsake etsui moŋ lɛ, “tsui fɔŋ” lɛ tsirɛɔ lɛ koni etsumɔ Yehowa kɛ eyiŋtoo kɛjɛ eshihilɛ mli. Gbɔmɔ ni bɛ hemɔkɛyeli lɛ ŋmɛɔ anɔkwale lɛ he nɛkɛ.
Yɛ shihilɛ lɛ ekrokomɛi amli lɛ, ni eeena henilee mli piŋmɔi yɛ gbɛ ko ni ekɔ hewɔ lɛ, aŋkroaŋkro lɛ baanyɛ aŋmɛ gbɛ ni etsui lɛ atsɔ kutumpɔo nɔ etsirɛ lɛ koni etsɔ jeŋ nilee nɔ etao foijee kɛtsɔ yiŋkɔshikɔshifeemɔ, tɔmɔ taomɔ loo hemɔkɛyeli kwamɔ po nɔ. Kɛ ebaanyɛ etsɔ lɛ diɛŋtsɛ eyiŋ akɛ hemɔkɛyeli muu lɛ fɛɛ ejaaa lɛ, belɛ enuuu he dɔŋŋ akɛ gbɛnaa nii ka enɔ akɛ ehi shi yɛ naa. Aŋkroaŋkroi ni tamɔ nɛkɛ shɛɔ henilee kpakpa amɛfɔɔ ni ‘amɛhemɔkɛyeli lɛ yashaa shi.’—1 Timoteo 1:19.
Shi mɔ kroko hu baanyɛ aŋmɛɛ anɔkwale lɛ he yɛ yiŋtoo kroko hewɔ. Shi nɔ fɛɛ nɔ ni eji lɛ, ekɔɔ tsui lɛ he diɛŋtsɛ. Yɛ enɛ hewɔ lɛ, ŋaawoo nɛɛ ji nɔ ni akɛha yɛ ebe mli lɛlɛŋ: “Ohiɛ aka otsui he fe nii fɛɛ; ejaakɛ no mli wala jɛɔ.”—Abɛi 4:23.
Abaanyɛ Ahere Gbɔmɔ Lɛ Yiwala
Ni wɔɔkpɛlɛ nɔ akɛ wɔsusumɔi ni ejaaa lɛ ji nɔ ni ha wɔlaaje hemɔkɛyeli lɛ biɔ ekaa. Shi nakai feemɔ ji klɛŋklɛŋ nifeemɔ ni baaha wɔnyɛ wɔku sɛɛ wɔkɛ Yehowa abana wekukpaa ni ma shi shiŋŋ mli ŋɔɔmɔ ekoŋŋ. Steve, ni ji gbɛgbalɔ yɛ England lɛ niiashikpamɔ lɛ feɔ sane oti nɛɛ he nɔkwɛmɔ.
Eyɛ mli akɛ Steve shiii anɔkwale lɛ moŋ, shi be ko shɛ ni enu he akɛ nɔ ko nɔ ko bɛ mli ni nɔ ko hu tsirɛɛɛ lɛ. Kɛ eshiɛ etsɔɔ mɛi krokomɛi lɛ, ewiemɔi lɛ tamɔ nɔ ni nɔ ko bɛ mli yɛ lɛ diɛŋtsɛ etoiiaŋ. Kɛ Steve yɛ emumɔŋ nyɛmimɛi hii kɛ yei lɛ ateŋ lɛ, enuɔ he akɛ nɔ ko shɛɛɛ yɛ ehe, tamɔ nɔ ni ejeee amɛteŋ mɔ kome.
Yɛ miishɛɛ mli lɛ, Steve yɔse akɛ naagba lɛ damɔ lɛ diɛŋtsɛ enɔ. Steve kɛɛ: “Mitseee mihe baneee akɛ tɔ ni mitɔ koni mikɛsusu nibii ahe, tamɔ nɔ ni hewalɛwoo ko yɛ heloo ni egbee shi lɛ mli ni baanyɛ aha mi saji ni ja.” (Okɛto Romabii 7:18 he.) Shi moŋ, eyoo akɛ esa akɛ etao lɛ diɛŋtsɛ etsui mli ni efamɔ shishiumɔ akɔnɔi ni gbalaa lɛ kɛjɛɔ anɔkwale lɛ he lɛ kɛjɛ jɛmɛ. No hewɔ lɛ eje shishi kɛjɛ eshishitoo lɛ nɔ tɔɔ, ni etsu nii koni ekɛma suɔmɔ ni eyɔɔ kɛha Nyɔŋmɔ kɛ hemɔkɛyeli yɛ e-Wiemɔ lɛ mli lɛ nɔ mi. Ŋmɛnɛ, Steve miisɔmɔ yɛ miishɛɛ mli akɛ maŋsɛɛ sanekpakpashiɛlɔ.
Bɔ Ni Mɛi Krokomɛi Baanyɛ Aye Abua
Jeee mɔ fɛɛ mɔ ni elaaje loo elaajeɔ anɔkwale lɛ mli ni ehiɛ kpɛŋŋ lɛ naa nibii amli faŋŋ taakɛ Steve na lɛ. Yɛ anɔkwale mli lɛ, yɛ be babaoo mli lɛ, mɔ lɛ mumɔŋ ninaa ni bɛ faŋŋ ni elaaje lɛ ji nɔ ni gbalaa lɛ kɛyaa naagbee shigbeemɔ mli. Biɛ ji he ni nanemɛi Kristofoi baanyɛ aye abua yɛ. (Romabii 15:1; Galatabii 6:1) Shi mɛɛ gbɛ nɔ aaatsɔ afee enɛ jogbaŋŋ yɛ?
Eka shi faŋŋ akɛ efaaa kɛkɛ akɛ aaafɔ nine atsɛ gbɔmɔ nɛɛ loo ni aaawo lɛ hewalɛ koni eku esɛɛ. Esa akɛ ayoo gbɛtsii nii lɛ ni ajie yɛ egbɛ nɔ. Esa akɛ abɔ mɔdɛŋ ni nine ashɛ mɔ ni egbɔjɔ lɛ loo eyaaa shiɛmɔ dɔŋŋ lɛ tsui nɔ. Sanegbaa ni jɛ tsui mli ni mlihilɛ yɔɔ mli shi emli ka shi faŋŋ baanyɛ aye abua gbɔmɔ lɛ. Ŋmalɛi tamɔ 1 Timoteo 1:19, Hebribii 3:12 kɛ Yeremia 17:9, 10 baanyɛ aye abua lɛ koni epɛi etsui mli tɔɔ koni ena nɔ ni ‘gbalaa lɛ kɛjɛɔ anɔkwa Nyɔŋmɔ lɛ he lɛ.’
Kɛ ayoo nɔ ni ji pɛ lɛ, esa akɛ abɔ mɔdɛŋ ni atsu he nii. Tsui diɛŋtsɛ ni he yeɔ lɛ biɔ kwɛmɔ kɛ ekolɛ opireshɛŋ ni waa mɔ he kɛ helatsɛ lɛ yi baana wala. Nakai nɔŋŋ eji yɛ okadi tsui ni he yeɔ lɛ he. Esa akɛ ajie akɔnɔ fɔŋ, sui ni haa ahiɔ shi akɛ mɔ ni etse ehe, aloo nibii krokomɛi ni miiha tsui lɛ miikpalaŋ lɛ kɛjɛ jɛmɛ kɛ eeenyɛ eba eŋɛlɛ nɔ ekoŋŋ lɛ. Kristofoi ni yɔɔ ekaa lɛ baanyɛ ni amɛkɛ mɔ ni ekpa shiɛmɔ lɛ asɔle, ni amɛkɛ lɛ akase Biblia lɛ po kɛji akɛ onukpai lɛ buɔ akɛ enɛ sa. Nɛkɛ gbɛ nɔ pɛ aaatsɔ awaje tsui lɛ ni mɔ lɛ abana suɔmɔ aha Yehowa ekoŋŋ.—Abɛi 2:1-5.
Enɛ bafee anɔkwale yɛ Diane sane lɛ he. Sanegbaa ni tee nɔ yɛ ekɛ Kristofoi ni amɛdara lɛ ateŋ lɛ ye bua lɛ ni eyoo nɔ ni he hiaa lɛ ni efee koni etee suɔmɔ ni eyɔɔ kɛha Yehowa lɛ shi ekoŋŋ. Beni Diane yoo akɛ esa akɛ ebale Yehowa jogbaŋŋ ekoŋŋ lɛ, ekpɛlɛ yelikɛbuamɔ ni akɛha lɛ lɛ nɔ. Beni akɛ lɛ ekase Biblia lɛ afi lɛ, ekɛ ewu fɛɛ batsɔmɔ Yehowa yijielɔi ni yɔɔ ekaa ekoŋŋ.
Akɛni suɔmɔ biɔ nifeemɔ hewɔ lɛ, yɛ bei babaoo mli lɛ nɔ ni Yehowa kɛɔ lɛ feemɔ kɛ eyelikɛbuamɔ ni suɔmɔ yɔɔ mli ni wɔnine shɛɔ nɔ lɛ ji nɔ ni yeɔ buaa jogbaŋŋ fe fɛɛ. Hɛɛ, nitsumɔ yeɔ buaa mɔ koni enine ashɛ tsutsu suɔmɔ ni kanya etsui be ko lɛ nɔ. (Lala 34:9) Nɔ ni baaje enɛ shishi ji gbɛjianɔ ni aaato koni awuu ashi akɔnɔ fɔŋ loo ajaje tsui lɛ sui ni ejaaa lɛ. Kunim fɛɛ kunim ni aaaye yɛ nɛkɛ tawuu nɛɛ mli lɛ ji nanefaa kome ni kɛ tsui lɛ bɛŋkɛɔ Yehowa he ekoŋŋ. (Abɛi 23:26; 1 Petro 2:1-3) Beni ayeɔ tsui lɛ nɔ kunim lɛ, suɔmɔ akɛ akɛ mɛi krokomɛi aaaja nɔ ni yɔɔ mli lɛ daa. No hewɔ lɛ, kɛ tsutsu Maŋtsɛyeli shiɛlɔi ni ekpa shiɛmɔ lɛ bafee mɛi ni sa ekoŋŋ lɛ, esa akɛ aye abua amɛ ni amɛna shiɛmɔ nitsumɔ lɛ mli gbɛfaŋnɔ, ejaakɛ “tsui akɛheɔ ayeɔ kɛshɛɔ jalɛ he, ni naabu akɛjajeɔ kɛshɛɔ yiwalaheremɔ he.”—Romabii 10:10.
Kɛha mɔ fɛɛ mɔ ni nuɔ he akɛ esumɔɔɔ Yehowa dɔŋŋ lɛ, gbɛ ni kɛ mɔ kuɔ sɛɛ kɛyaa shihilɛ ni Nyɔŋmɔ gbeyeishemɔ yɔɔ mli lɛ baanyɛ afee nɔ ni kɛ ni enɔ nyiɛmɔ wa hu. Ni kɛlɛ, Steve kɛ Diane ni saa na amɛmumɔŋ hewalɛ ekoŋŋ lɛ ji odaseyeli ni tsɔɔ akɛ tsuitsakemɔ baanyɛ aba. Hɛɛ, saamɔ baanyɛ aba kɛtsɔ Yehowa mumɔ lɛ nitsumɔ, e-Wiemɔ lɛ kɛ nitsumɔ, kɛ egbɛjianɔtoo loo esafo lɛ ni akɛ lɛ aaafee ekome lɛ nɔ. Eji nɔ ni wɔhiɛ ka nɔ diɛŋtsɛ kɛ wɔsɔlemɔ akɛ abaanyɛ aye abua gbɔmɛi ni tamɔ nɛkɛ ni amɛmli afili amɛ shikome ekoŋŋ yɛ Yehowa jamɔ kɛ sɔɔmɔ krɔŋkrɔŋ mli akɛ mɛi ni kɛ amɛtsui muu fɛɛ sumɔɔ Yehowa.—Marko 12:30; 1 Korintobii 13:8; 3 Yohane 1-4.