Feemɔ Nɔkwɛmɔ Nɔ Kpakpa yɛ Wiemɔ kɛ Jeŋba Mli
1 Bɔfo Paulo wo Timoteo ŋaa akɛ efee nɔkwɛmɔ nɔ kpakpa yɛ wiemɔ kɛ jeŋba mli. (1 Tim. 4:12) Esa akɛ wɔ hu wɔfee nɔkwɛmɔ nɔ kpakpa yɛ wiemɔ kɛ jeŋba mli, titri lɛ, yɛ be mli ni wɔkɛ wɔhe woɔ shiɛmɔ nitsumɔ lɛ mli lɛ, ejaakɛ no feemɔ baanyɛ atsɔɔ kɛji wɔshɛɔ mɛi ni wɔkɛ amɛ kpeɔ lɛ atsui he loo wɔshɛɛɛ he.
2 Ehe miihia ni wɔjie jeŋba kpakpai sɔrɔtoi fɛɛ kpo wɔtsɔɔ, ní woo, mɔ hesusumɔ, mlihilɛ, bulɛ kɛ ŋaa fata he. Kɛ wɔjie sui kpakpai nɛɛ akpo lɛ, no lɛ wɔtsɔɔ akɛ wɔle bɔ ni wɔnifeemɔi saa mɛi krokomɛi ahenumɔi ahe ehaa. Abaanyɛ akɛ jeŋba kpakpai ni ajieɔ lɛ kpo yɛ shiɛmɔ nitsumɔ mli lɛ ato nibii ni akɛwoɔ niyenii amli koni eŋɔɔ ni eje ŋma lɛ ahe. Kɛ nomɛi bɛ lɛ, niyenii kpakpa baanyɛ afee nɔ ni eŋɔɔɔ, ni baaa mɔ tsine. Nakai nɔŋŋ ji bɔ ni ebaaba lɛ kɛ wɔkɛ jeŋba kpakpai tsuuu nii yɛ bɔ ni wɔkɛ mɛi krokomɛi yeɔ haa lɛ mli.—Kol. 4:6.
3 Feemɔ Nɔkwɛmɔ Nɔ Kpakpa yɛ Wiemɔ Mli: Hiɛŋmɔlɔŋmɔlɔ kɛ ŋamɔ ni yɔɔ miishɛɛ lɛ ji sanekpakpa ni wɔkɛhaa lɛ mli sui komɛi ni he hiaa. Kɛ wɔkɛ miishɛɛ kɛ anɔkwayeli tsu nii yɛ wɔhiɛkpamɔ wiemɔ mli lɛ, wɔhaa shiatsɛ lɛ leɔ akɛ wɔyɛ ehe miishɛɛ lɛlɛŋ. Kɛ ewie lɛ, bo toi jogbaŋŋ, ni ojie bulɛ ni sa kpo otsɔɔ yɛ nɔ ni eyɔɔ kɛɛmɔ lɛ he. Kɛ oowie lɛ, okɛ ŋaa kɛ mlihilɛ atsu nii.—Okɛto Bɔfoi lɛ Asaji 6:8 he.
4 Bei komɛi lɛ, wɔkɛ mɔ ko ni ekolɛ ejieŋ miishɛɛ kpo, ni kɛ wɔ baabe po kpeɔ. Mɛni esa akɛ wɔfee? Petro wo wɔ hewalɛ ni wɔkɛ mɛi awie yɛ “mlijɔlɛ mli kɛ bulɛ ni mli kwɔ” naa. (1 Pet. 3:15, NW; Rom. 12:17, 18) Yesu wie akɛ, kɛ shiatsɛ ko kɛ mlifu kpoo Maŋtsɛyeli he shɛɛ sane lɛ, nɔ ni esa akɛ wɔfee kɛkɛ ji ni ‘wɔkpokpo wɔnajiashi mlu lɛ.’ (Mat. 10:14) Ekolɛ jeŋba kpakpai ni wɔɔjie lɛ kpo yɛ shihilɛi ni tamɔ nɛkɛ mli lɛ, baajɔɔ shitee-kɛ-wolɔ lɛ tsui he yɛ sɛɛ mli.
5 Feemɔ Nɔkwɛmɔ Nɔ Kpakpa yɛ Jeŋba Mli: Sanekpakpa lɛ shiɛmɔ yɛ gbɛjegbɛi ni mɛi pii hoɔ yɛ nɔ kɛ hei ni mɛi babaoo yɔɔ lɛ biɔ ni wɔsusu mɛi ahe, wɔkabolɔ loo wɔkafee veveeve, ni wɔkagbá mɛi ni hoɔ lɛ anyiɛmɔ naa. Kɛ wɔyɛ mɛi ni yɔɔ wiemɔ lɛ he miishɛɛ lɛ ashiai amli lɛ, esa akɛ wɔhesaamɔ he atse ni wɔba wɔjeŋ akɛ gbɔi ni yɔɔ mlihilɛ, ni wɔhiɛ asɔ amɛgbɔfeemɔ lɛ. Esa akɛ gbekɛbii fɛɛ ni kɛ wɔ yaa lɛ ajie bulɛ kpo atsɔɔ shiatsɛ lɛ kɛ enibii, ni esa akɛ amɛba amɛjeŋ jogbaŋŋ ni amɛbo sane toi jogbaŋŋ beni wɔgbaa sane lɛ. Kɛ gbekɛbii lɛ atoi egbo lɛ, enɛ baaha mɛi lɛ ana jwɛŋmɔ ni ejaaa beni wɔshi amɛŋɔɔ wɔ́tee lɛ.—Abɛi 29:15.
6 Esa akɛ wɔhesaamɔ aha mɛi krokomɛi ana faŋŋ akɛ, Nyɔŋmɔ Wiemɔ lɛ he sɔɔlɔi ji wɔ. Esaaa akɛ wɔ atadewoo kɛ hesaamɔ feɔ nɔ ni atoko he gbɛjianɔ jogbaŋŋ ni yɔɔ basabasa, loo nɔ ni yɔɔ haŋtsii ni bɛ hiŋmɛi nɔ. Esa akɛ wɔhesaamɔ afee nɔ ni sa sanekpakpa lɛ daa. (Okɛto Filipibii 1:27 he.) Kɛ wɔsusu wɔhesaamɔ kɛ wɔ nibii ahe jogbaŋŋ lɛ, wɔfeŋ nɔ ko ni baaha mɛi krokomɛi anane atɔ̃tɔ̃ loo ni amɛna nɔ fɔŋ ko amɛwie yɛ wɔsɔɔmɔ nitsumɔ lɛ he. (2 Kor. 6:3, 4) Nɔkwɛmɔ nɔ kpakpa ni wɔɔfee yɛ wiemɔ kɛ jeŋba mli lɛ haa Maŋtsɛyeli he shɛɛ sane lɛ feɔ nɔ ni ŋɔɔ, ni ewoɔ Yehowa hiɛ nyam.—1 Pet. 2:12.