Ani Ninámɔ Baanyɛ Aha Ona Miishɛɛ?
Maŋtsɛ Salomo le sɛɛnamɔ ni yɔɔ shika he. Eŋma akɛ: “Ŋmɔlɔ hewɔ aŋmɛɔ okpɔlɔ, ni wein haa hiɛkalɔi amii shɛɔ amɛhe, ni shika feɔ nɔ fɛɛ nɔ.” (Jajelɔ 10:19) Nanemɛi ni akɛ amɛ yeɔ nii lɛ baanyɛ afee nɔ ni yɔɔ miishɛɛ fe fɛɛ, shi kɛ́ oooná aboloo loo wein lɛ, shika he baahia bo. Akɛni shika ji nɔ ni atsɔɔ nɔ anáa heloonaa nibii hewɔ lɛ, no “feɔ nɔ fɛɛ nɔ.”
EYƐ mli akɛ Salomo yɛ nii babaoo diɛŋtsɛ moŋ, shi ele akɛ ninámɔ yɛ ehusui. Eyɔse akɛ heloonaa nibii asɛɛ ni adiɔ yɛ shihilɛ mli lɛ kɛ mɔ eyaaa miishɛɛnamɔ mli. Eŋma akɛ: “Mɔ ni sumɔɔ shika lɛ, shika etɔŋ lɛ, ni mɔ ni sumɔɔ nifálɛ lɛ, enaŋ sɛɛ ko.”—Jajelɔ 5:9.
Ŋɔɔ lɛ akɛ niiatsɛ ko ená nii babaoo diɛŋtsɛ. Salomo kɛɛ: “He ni nii fáa yɛ lɛ, yelɔi hu fáa yɛ jɛi.” (Jajelɔ 5:10) Yɛ be mli ni mɔ ko “nii,” loo nibii ni eyɔɔ lɛ fáa babaoo lɛ, ehe bahiaa ni aná gbɔmɛi pii ni baakwɛ nɔ. Esa akɛ awo nisaalɔi, nibii anɔkwɛlɔi, tsuji, niiahebulɔi, kɛ mɛi krokomɛi fɛɛ—anitsumɔi ahe nyɔmɔ. Yɛ no feemɔ mli lɛ, enɛ biɔ koni aná shika babaoo.
Shihilɛ ni tamɔ nɛkɛ lɛ saa mɔ lɛ miishɛɛnamɔ he. Hela yinɔsaneŋmalɔ Xenophon, ni hi shi yɛ afii ohai ejwɛ D.Ŋ.B. lɛ ŋma saji ni kɔɔ nuu ohiafo ko ni ebatsɔ̃ niiatsɛ lɛ he akɛ:
“Ei, ani osusuɔ lɛɛlɛŋ . . . akɛ yɛ be mli ni miiná nii babaoo lɛ, belɛ miiná miishɛɛ babaoo yɛ shihilɛ mli? Oleee,” etee nɔ ekɛɛ akɛ, “amrɔ nɛɛ ehaaa maná miishɛɛ fioo ko po ni mikɛaaye nii ni manu nii ni mawɔ fe beni miyeɔ ohia lɛ. Sɛɛnamɔ pɛ ni maná kɛjɛ nii babaoo ni miyɔɔ lɛ mli ji akɛ ebakãa minɔ akɛ matsu nibii babaoo ahe nii, ni maja nibii babaoo maha mɛi krokomɛi, ni mikɛ naagba akwɛ nibii babaoo nɔ fe bɔ ni mifeɔ tsutsu ko. Amrɔ nɛɛ, shia mli sɔɔlɔi babaoo kwɛɔ mi gbɛ kɛha niyenii, mɛi babaoo kwɛɔ mi gbɛ kɛha nii ni anuɔ, ni mɛi babaoo kɛha atadei, yɛ be mli ni datrɛfoi ahe hiaa mɛi komɛi; ni amɛteŋ mɔ ko babɔɔ mi toogwantɛŋ ni klaji etutua amɛ, loo tsinahii ni amɛjɛ nɔ ko nɔ amɛgbee shi amɛgboi he amaniɛ, loo ebakɛɔ akɛ hela ko miimɔmɔ tsinai lɛ fɛɛ. Ni yɛ no hewɔ lɛ efeɔ mi . . . tamɔ nɔ ni miyɛ naagba babaoo bianɛ yɛ nibii babaoo ni miyɔɔ lɛ hewɔ fe beni miyɔɔ nii fioo ko lɛ.”
Yiŋtoo kroko hu hewɔ ni gbɔmɛi tiuɔ nii babaoo sɛɛ fe tsutsu ko lɛ ji akɛ nɔ ni Yesu Kristo tsɛ lɛ akɛ “nii pii ahe lakamɔ lɛ” lakaa amɛ. (Mateo 13:22) Alakaa amɛ ejaakɛ yɛ ninámɔ ni amɛkɛ ekãa tiuɔ sɛɛ nɛkɛ nɛɛ mli lɛ, amɛnáaa tsui ni nyɔɔ mɔ mli loo miishɛɛ ni amɛkpaa gbɛ akɛ amɛaaná lɛ kɔkɔɔkɔ. Amɛsusuɔ sane he akɛ, nɔ ni shika fioo nyɛɛɛ afee lɛ, shika babaoo baafee. No hewɔ lɛ abɔɔ mɔdɛŋ koni aná babaoo be fɛɛ be.
Shikasuɔmɔ Haaa Aná Miishɛɛ
Ekolɛ niiatsɛ nibii ni esusuɔ he sɔŋŋ lɛ haŋ ená gbɛkɛ wɔ ni toiŋjɔlɛ yɔɔ mli lɛ mli ŋɔɔmɔ. Salomo ŋma akɛ: “Nitsulɔ lɛ, eye nii fioo jio, pii jio, ewɔ ŋɔɔ enaa; shi tɔ ni niiatsɛ tɔɔ lɛ haaa ewɔ.”—Jajelɔ 5:11.
Kɛ mɔ ko ye awerɛho babaoo tsɔ yɛ enii babaoo ni aaanyɛ aje edɛŋ lɛ hewɔ lɛ, nibii babaoo fata he fe wɔ ni enáaa ewɔ. Beni Salomo wieɔ kpɛkpɛɛfeelɔ he lɛ, eŋma akɛ: “Ewala gbii fɛɛ mli lɛ duŋ mli eyeɔ nii yɛ, emli woɔ la babaoo, ni hela kɛ mlifu kpaaa lɛ.” (Jajelɔ 5:16) Yɛ nɔ najiaŋ ni eeená enii babaoo lɛ mli miishɛɛ lɛ, ‘mlilawoo’ mli eyeɔ nii yɛ, tamɔ nɔ ni emli ewo la yɛ shika ni eyɔɔ ni ekɛbaahe nii eye po lɛ he. Jwɛŋmɔ ni tamɔ nɛkɛ ni esaaa lɛ baanyɛ ekɛ hela aba. Yɛ no feemɔ mli lɛ, hela haa kpɛkpɛɛfeelɔ lɛ yeyeeyefeemɔ lɛ fáa, akɛni ehaaa enyɛ ebua nii babaoo diɛŋtsɛ naa lɛ hewɔ.
Ekolɛ enɛ kaiɔ bo nɔ ni bɔfo Paulo ŋma akɛ: “Mɛi ni taoɔ nii pii aná lɛ gbeeɔ kaa kɛ tsɔne kɛ kwashiai akɔnɔi pii ni fiteɔ mɔ ni tsiɔ mɛi ewoɔ hiɛkpatamɔ kɛ laajemɔ mli lɛ amli. Ejaakɛ nibii fɔji fɛɛ ashishifã ji shikasuɔmɔ ni mɛi komɛi di sɛɛ . . . , ni amɛkɛ piŋmɔi babaoo egbulɔ amɛhe lɛ.” (1 Timoteo 6:9, 10) Yɛ shika sɛɛdii mli lɛ, gbɔmɛi shishiuɔ mɛi, amɛmaleɔ, amɛjuɔ, amɛkɛ mɛi náa bɔlɛ kɛheɔ shika, ni amɛgbeɔ mɛi po. Nɔ ni jɛɔ mli baa ji henumɔŋ, gbɔmɔtsoŋ, kɛ mumɔŋ piŋmɔi ni mɔ lɛ kɛgbulɔɔ ehe yɛ mɔdɛŋ ni ebɔɔ koni ená nii daa lɛ hewɔ. Ani enɛ feɔ tamɔ gbɛ ni kɛ mɔ yaa miishɛɛnamɔ mli? Dabi kwraa!
Wɔtsui ni Aaanyɔ Wɔmli yɛ Nɔ ni Wɔyɔɔ lɛ Hewɔ
Salomo yɛ saji babaoo ni ebaawie yɛ ninámɔ he jwɛŋmɔ ni ŋmɛɔ pɛpɛɛpɛ he. Eŋma akɛ: “Bɔ ni ejɛ enyɛ musuŋ eba kɛ ehe yayai lɛ, nakai nɔŋŋ eeeku esɛɛ kɛaatee, bɔ ni eba lɛ, ni ekɔŋ nɔ ko nɔ ko yɛ edeŋmegbomɔ lɛ mli, ni ekɛaahiɛ edɛ kɛaatee. Naa, nɔ ni mina nɛ: ehi ni eyɛ fɛo, akɛ gbɔmɔ aaaye ni enu ni eye nii kpakpai amli ŋɔɔmɔ yɛ edeŋme fɛɛ ni egboɔ yɛ hulu shishi nɛɛ lɛ mli, ewala gbii abɔ fɛɛ ni Nyɔŋmɔ eha lɛ lɛ; ejaakɛ no ji egbɛfaŋnɔ.”—Jajelɔ 5:14, 17.
Nɛkɛ wiemɔi nɛɛ tsɔɔ akɛ miishɛɛ damɔɔɔ mɔdɛŋ ni abɔɔ waa akɛ aaabua nii babaoo diɛŋtsɛ naa yɛ be ko mli ni ekolɛ wɔhiŋ shi ni wɔnine aaashɛ nɔ wɔsɛɛ ko lɛ nɔ. Ehi kwraa akɛ wɔtsui aaanyɔ wɔmli ni wɔmli afili wɔ yɛ nibii ni jɛɔ wɔnitsumɔ ni wa lɛ mli kɛbaa lɛ he. Bɔfo Paulo wie nɔ ko ni tamɔ nakai yɛ ewolo ni jɛ mumɔŋ ni eŋma eyaha Timoteo lɛ mli akɛ: “Wɔkɛ nɔ ko nɔ ko baaa je nɛŋ, no hewɔ lɛ eyɛ faŋŋ akɛ wɔnyɛŋ wɔkɛ nɔ ko aya hu. Shi kɛ wɔyɛ ŋmãa kɛ hehaanii kɛkɛ lɛ, esa akɛ wɔmii ashɛ he.”—1 Timoteo 6:7, 8; okɛto Luka 12:16-21 he.
Nɔ ni Haa Anáa Miishɛɛ
Salomo yɛ nii babaoo kɛ Nyɔŋmɔjamɔ he nilee hu babaoo. Shi ewie miishɛɛnamɔ he kɛkɔ nilee he, shi jeee shika. Ekɛɛ: “Gbɔmɔ ni náa nilee kɛ gbɔmɔ ni náa jwɛŋmɔ lɛ [yɛ miishɛɛ, NW]! Ejaakɛ no namɔ hi fe jwiɛtɛi namɔ, ni emli sɛɛnamɔ lɛ fe shika krɔŋŋ. Ejara hu wa fe tɛŋɛlɛo, ni onii ni jara wa fɛɛ onyɛŋ okɛto he. Gbii asɛɛjɛkɛmɔ yɛ eninejurɔ, ni nii kɛ anunyam yɛ ebɛku. Egbɛ̀i lɛ gbɛ̀i fɛfɛji ni, ni etempɔŋi lɛ fɛɛ lɛ hejɔlɛ ni. Walatso ji lɛ ha mɛi ni mɔɔ emli lɛ, ni mɔ ni hiɛɔ emli lɛ, ajɔɔ lɛ.”—Abɛi 3:13-18.
Mɛni hewɔ nilee nɔ kwɔ fe heloonaa nibii lɛ? Salomo ŋma akɛ: “Nilee tamɔ hɔɔŋ, tamɔ bɔ ni shika hu tamɔ hɔɔŋ lɛ; shi nɔ ni nilee kɛfe ji akɛ nilee hereɔ etsɛ yiwala.” (Jajelɔ 7:12) Yɛ be mli ni shika kɛ hebuu ko haa, ni ehaa etsɛ heɔ nɔ ni he hiaa lɛ, nilee baanyɛ abu mɔ he kɛjɛ ehe ni ekɛaawo osharai ni baaha ewala ayaje oshara mli lɛ mli. Jeee akɛ anɔkwa nilee baanyɛ ahere mɔ yiwala kɛjɛ kpatu gbele mli kɛkɛ, shi akɛni edamɔ Nyɔŋmɔ gbeyeishemɔ kpakpa nɔ hewɔ lɛ, ebaaha mɔ lɛ aná naanɔ wala.
Mɛni hewɔ Nyɔŋmɔjamɔ he nilee haa mɔ náa miishɛɛ lɛ? Ejaakɛ anɔkwa miishɛɛ baanyɛ ajɛ Yehowa Nyɔŋmɔ pɛ ŋɔɔ kɛba. Niiashikpamɔ tsɔɔ akɛ abaanyɛ aná anɔkwa miishɛɛ kɛtsɔ Ŋwɛi Flooflonyo lɛ toiboo pɛ nɔ. Miishɛɛ ni wɔɔná daa lɛ damɔ shidaamɔ kpakpa ni aaakã wɔkɛ Nyɔŋmɔ teŋ lɛ nɔ. (Mateo 5:3-10) Kɛ wɔkɛ nɔ ni wɔkaseɔ kɛjɛɔ Biblia lɛ mli lɛ tsu nii lɛ, wɔbaaná “nilee ni jɛ ŋwɛi.” (Yakobo 3:17) Ebaaha wɔná miishɛɛ ni ninámɔ nyɛŋ ekɛha kɔkɔɔkɔ.
[Mfoniri ni yɔɔ baafa 4-5]
Maŋtsɛ Salomo le nɔ ni haa mɔ náa miishɛɛ. Ani ole?