Nyɛyaa Nɔ ni Nyɛkɛ Nyɔŋmɔ Anyiɛa
“Nyɛnyiɛa yɛ mumɔ naa, ni nyɛfeŋ heloo akɔnɔi lɛ anaa nii.”—GALATABII 5:16.
1. (a) Mɛɛ shihilɛi amli Henok kɛ Nyɔŋmɔ nyiɛ yɛ, ni kɛyashi mɛɛ be? (b) Be enyiɛ Noa kɛ Nyɔŋmɔ nyiɛ, ni mɛɛ gbɛnaa nii ni tsii jwere enɔ?
BIBLIA lɛ kɛɔ wɔ akɛ Henok “kɛ Nyɔŋmɔ nyiɛ.” Yɛ wiemɔi ni haa mɔ jijaa kɛ gbɔmɛi ni ebɔle ehe kɛkpe lɛ ajeŋba ni tsɔɔ Nyɔŋmɔ gbeyei ni amɛsheee lɛ fɛɛ sɛɛ lɛ, emia ehiɛ ni ekɛ Nyɔŋmɔ nyiɛ kɛyashi ewala ba naagbee beni eye afii 365. (1 Mose 5:23, 24; Yuda 14, 15) Noa hu “kɛ Nyɔŋmɔ nyiɛ.” Efee nakai beni ekwɛɔ eweku, yɛ be mli ni edamɔɔ jeŋ ni ŋwɛibɔfoi atuatselɔi kɛ amɛshwiei yiwalɔi lɛ ená gbɔmɛi anɔ hewalɛ yɛ mli lɛ naa, kɛ agbɛnɛ yɛ be mli ni etsuɔ nitsumɔi fɛɛ ni kɔɔ adeka agbo ko ni esa akɛ ekpɛ, ni da fe ŋshɔ hiɛ lɛlɛ fɛɛ lɛlɛ yɛ blema bei lɛ amli lɛ he nii lɛ. Etee nɔ ekɛ Nyɔŋmɔ nyiɛ yɛ Nu Afua lɛ sɛɛ, beni atua ni atseɔ ashiɔ Yehowa lɛ jie ehiɛ kpo ekoŋŋ po yɛ Babel lɛ. Yɛ anɔkwale mli lɛ, Noa tee nɔ ekɛ Nyɔŋmɔ nyiɛ aahu kɛyashi egbele mli beni eye afii 950.—1 Mose 6:9; 9:29.
2. Akɛ ‘akɛ Nyɔŋmɔ miinyiɛ’ lɛ shishi ji mɛni?
2 Beni Biblia lɛ kɛɔ akɛ gbɔmɛi ni yɔɔ hemɔkɛyeli lɛ kɛ Nyɔŋmɔ “nyiɛ” lɛ, belɛ ekɛ wiemɔ lɛ miitsu nii yɛ mfonirifeemɔ shishinumɔ naa. Etsɔɔ akɛ Henok kɛ Noa fee amɛnii yɛ gbɛ ni ye odase akɛ amɛyɛ Nyɔŋmɔ mli hemɔkɛyeli ni wa. Amɛfee nɔ ni Yehowa fã amɛ akɛ amɛfee, ni amɛto amɛshihilɛ he gbɛjianɔ yɛ nɔ ni amɛle yɛ ehe lɛ kɛ bɔ ni ekɛ adesai yeɔ haa lɛ kɛ gbeekpamɔ naa. (Okɛto 2 Kronika 7:17 he.) Jeee akɛ amɛkɛ amɛjwɛŋmɔ kpɛlɛ nɔ ni Nyɔŋmɔ kɛɛ kɛ nɔ ni efee lɛ nɔ kɛkɛ, shi amɛtsu nɔ fɛɛ nɔ ni etaoɔ lɛ he nii—jeee efã kɛkɛ, shi fɛɛ kɛyashɛ he ni amɛaanyɛ ákɛ adesai ni yeee emuu. No hewɔ lɛ, akɛ nɔkwɛmɔnɔ lɛ, Noa fee bɔ ni Nyɔŋmɔ fã lɛ akɛ efee lɛ pɛpɛɛpɛ. (1 Mose 6:22) Noa efeee nii kɛtekeee gbɛtsɔɔmɔ ni akɛha lɛ lɛ, ni ekuuu ehiɛ eshwieee saji anɔ kɛgbalaaa nibii asɛɛ. Akɛ mɔ ni kɛ Yehowa naa naanyobɔɔ ni mli wa mli ŋɔɔmɔ, ni esɔleɔ ehaa Nyɔŋmɔ yɛ heyeli mli, ni esumɔɔ ŋwɛi gbɛtsɔɔmɔ lɛ, belɛ ekɛ Nyɔŋmɔ miinyiɛ. Ani oofee nakai?
Shihilɛ Gbɛ ni Damɔ Nɔ Kome Nɔ
3. Mɛni he hiaa waa kɛha mɛi fɛɛ ni ji Nyɔŋmɔ tsuji ni amɛjɔɔ amɛhe nɔ ni abaptisi amɛ lɛ?
3 Tsui nyãa, kɛ ana ni gbɔmɛi eje shishi amɛkɛ Nyɔŋmɔ miinyiɛ. Beni amɛtoɔ gbɛjianɔ kpakpa ni kɛ Yehowa suɔmɔnaa nii kpãa gbee lɛ, belɛ amɛmiijie amɛhemɔkɛyeli he odaseyeli, ni kɛ́ no bɛ mli lɛ mɔ ko nyɛŋ Nyɔŋmɔ hiɛ asa lɛ kpo. (Hebribii 11:6) Kwɛ bɔ ni wɔmli filiɔ wɔ, akɛ daa afi, kɛ aja mli aha afii enumɔ ni eho lɛ, gbɔmɛi fe 320,000 ejɔɔ amɛhe nɔ amɛha Yehowa, ni amɛkɛ amɛhe eha kɛha nu mli baptisimɔ! Shi ehe miihia kɛha amɛ hu, ni kɛha wɔ fɛɛ akɛ wɔɔya nɔ wɔkɛ Nyɔŋmɔ anyiɛ.—Mateo 24:13; Kpojiemɔ 2:10.
4. Eyɛ mli akɛ amɛjie hemɔkɛyeli ko kpo moŋ, shi mɛni hewɔ Israelbii ni shi Mizraim lɛ ateŋ mɛi pii boteee Shiwoo Shikpɔŋ lɛ nɔ lɛ?
4 Yɛ Mose gbii lɛ amli lɛ, ebi hemɔkɛyeli dani Israel weku ko aye Hehoo lɛ yɛ Mizraim, ni amɛkɛ lá adiki amɛshiai lɛ ashinaatsei kɛ amɛyiteŋnɔ̃ lɛ ahe. (2 Mose 12:1-28) Shi kɛlɛ, amɛteŋ mɛi pii ahemɔkɛyeli hoso beni amɛna ni Farao asraafoi lɛ ebɛŋkɛ amɛ yɛ Ŋshɔ Tsuru lɛ naa lɛ. (2 Mose 14:9-12) Lala 106:12 tsɔɔ akɛ beni amɛtsɔ̃ ŋshɔ ni eŋã lɛ shishi shweshweeshwe kɛfo mli lɛ, ni amɛna bɔ ni nui ni kũɔ amɛsɛɛ lɛ kpata Mizraim asraafoi lɛ ahiɛ lɛ, “kɛkɛ ni amɛhe [Yehowa] ewiemɔi lɛ amɛye” ekoŋŋ. Shi yɛ be fioo sɛɛ yɛ ŋa lɛ nɔ lɛ, Israelbii lɛ je shishi amɛwie huhuuhu yɛ nu ni amɛaanu, niyenii, kɛ amɛnɔkwɛmɔ he. Saralɔi 12 ni ku amɛsɛɛ kɛjɛ Shiwoo Shikpɔŋ lɛ saramɔ amɛba lɛ ateŋ mɛi 10 lɛ amaniɛbɔɔ ni bɛ mli lɛ ha amɛshe gbeyei. Yɛ shihilɛi ni tamɔ nɛkɛ mli lɛ, taakɛ Lala 106:24 kɛɔ lɛ, “amɛheee [Nyɔŋmɔ] ewiemɔ lɛ amɛyeee.” Amɛmiisumɔ ni amɛku amɛsɛɛ amɛya Mizraim. (4 Mose 14:1-4) Kɛji akɛ amɛyɛ hemɔkɛyeli ko lɛ, anaa enɛ yɛ be mli ni aajie ŋwɛi hewalɛi ni ekaa kpo. Amɛyaaa nɔ amɛkɛ Nyɔŋmɔ enyiɛɛɛ. Nɔ ni jɛ mli ba ji akɛ, nakai Israelbii lɛ boteee Shiwoo Shikpɔŋ lɛ nɔ.—Lala 95:10, 11.
5. Korintobii Awolo ni Ji Enyɔ 13:5 kɛ Abɛi 3:5, 6 kɔɔ Nyɔŋmɔ ni akɛ lɛ nyiɛɔ lɛ he yɛ mɛɛ gbɛ nɔ?
5 Biblia lɛ woɔ wɔ ŋaa akɛ: “Nyɛkaa nyɛ diɛŋtsɛ nyɛhe nyɛkwɛa akɛ nyɛyɛ hemɔkɛyeli [lɛ] mli lo; nyɛkwɛa nyɛ diɛŋtsɛ nyɛhe ni ahia.” (2 Korintobii 13:5) ‘Hemɔkɛyeli lɛ mli ni ayɔɔ’ lɛ tsɔɔ Kristofoi ahemɔkɛyelii lɛ ahe ni akɛ he kpɛtɛɔ. Enɛ he miihia kɛji akɛ wɔɔye omanye yɛ Nyɔŋmɔ ni wɔkɛ lɛ nyiɛɔ yɛ wɔshihilɛ gbii fɛɛ mli lɛ mli. Kɛji akɛ wɔkɛ Nyɔŋmɔ aaanyiɛ lɛ, belɛ esa akɛ wɔkɛ hemɔkɛyeli ni sa atsu nii, ni wɔkɛ wɔhiɛ afɔ̃ Yehowa nɔ kwraa. (Abɛi 3:5, 6) Tsɔnei kɛ akpái babaoo yɛ ni baanyɛ adũ mɛi ni efeee nakai lɛ. Mɛni ji enɛɛmɛi ateŋ ekomɛi?
Kwá Hé ni Aheɔ He Ayeɔ He Tsɔne Lɛ
6. Mɛni Kristofoi fɛɛ le yɛ ajwamaŋbɔɔ kɛ gbalafitemɔ he, ni te amɛnuɔ nɛkɛ eshai nɛɛ ahe amɛhaa tɛŋŋ?
6 Mɔ fɛɛ mɔ ni ekase Biblia lɛ, ni ejɔɔ ewala nɔ eha Yehowa, ni abaptisi lɛ lɛ le akɛ Nyɔŋmɔ Wiemɔ lɛ buɔ ajwamaŋbɔɔ kɛ gbalafitemɔ fɔ. (1 Tesalonikabii 4:1-3; Hebribii 13:4) Gbɔmɛi ni tamɔ nɛkɛ lɛ kpɛlɛɔ nɔ akɛ enɛ ja. Amɛto amɛyiŋ akɛ amɛbaahi shi yɛ enɛ kɛ gbeekpamɔ naa. Ni kɛlɛ, bɔlɛnamɔ jeŋba shara yaa nɔ efeɔ Satan tsɔnei ni ekɛdũɔ mɔ waa lɛ ateŋ ekome. Mɛni hewɔ?
7. Te fee tɛŋŋ ni Israel hii kɛ amɛhe yawo jeŋba ni amɛle akɛ ehiii mli yɛ Moab Ŋa lɛ nɔ?
7 Kɛjɛ shishijee lɛ, mɛi ni kɛ amɛhe woɔ jeŋba shara ni tamɔ nɛkɛ mli lɛ baanyɛ afee mɛi ni etooo nakai feemɔ he ŋaa. Ekolɛ enɛ ji anɔkwale hu yɛ Israelbii ni hi Moab Ŋa lɛ nɔ lɛ ahe. Kɛha Israelbii ni ŋa lɛ nɔ shihilɛ etɔ amɛ lɛ, Moab yei kɛ Midian yei ni laka amɛ lɛ baatamɔ nanemɛi kɛ gbɔfeelɔi yɛ amɛhiɛ. Shi mɛni ba beni Israelbii lɛ kpɛlɛ nine ni mɛi ni jaa Baal shi jeee Yehowa lɛ fɔ amɛ akɛ amɛkɛ amɛ ababɔ, gbɔmɛi ni ŋmɛ amɛ biyei (ni jɛ wekui kpakpai amli po) gbɛ koni amɛkɛ hii ni amɛkɛ amɛ boteko gbalashihilɛ mli lɛ aná bɔlɛ lɛ nɔ? Beni hii ni jɛ Israel nsaraŋ lɛ je shishi amɛsusu naanyobɔɔ ni tamɔ nɛkɛ he akɛ esa hiɛ lɛ, alaka amɛ koni amɛfee nibii ni amɛle akɛ ehiii, ni enɛ ha amɛlaaje amɛwala.—4 Mose 22:1; 25:1-15; 31:16; Kpojiemɔ 2:14.
8. Mɛni baanyɛ ni ekɛ Kristofonyo awo bɔlɛnamɔ jeŋba shara mli yɛ wɔgbii nɛɛ amli?
8 Mɛni baanyɛ aha mɔ ko agbee tsɔne ni tamɔ nɛkɛ mli yɛ wɔgbii nɛɛ amli? Eyɛ mli akɛ ekolɛ ele hiɛdɔɔ ni yɔɔ bɔlɛnamɔ jeŋba shara mli lɛ moŋ, shi kɛji akɛ eyooo oshara ni yɔɔ hé ni aheɔ he ayeɔ lɛ he lɛ, ekolɛ ebaaŋmɛɛ ehe eha shihilɛ ni tamɔ nɛkɛ mlibotemɔ, ni nɔ fɔŋ feemɔ he lakamɔ lɛ baahà esusumɔ nɔ kwraa.—Abɛi 7:6-9, 21, 22; 14:16.
9. Mɛɛ Ŋmalɛ naa kɔkɔbɔi baanyɛ abu wɔhe kɛjɛ jeŋba shara he?
9 Nyɔŋmɔ Wiemɔ lɛ bɔɔ wɔ kɔkɔ yɛ faŋŋ mli akɛ wɔkaha alaka wɔ ni wɔsusu akɛ wɔhe wa aahu akɛ naanyobɔɔ fɔŋ nyɛŋ afite wɔ. Nɔ ni fata he ji tɛlivishiŋ nɔ nibii ni jieɔ gbɔmɛi ni kɛ amɛhe woɔ jeŋba shara mli lɛ ashihilɛ ni akwɛɔ kɛ woji tɛtrɛbii ni kanyaa jeŋba shara he akɔnɔi ni akwɛɔ. (1 Korintobii 10:11, 12; 15:33) Nanemɛi heyelilɔi ni akɛ amɛ bɔɔ yɛ shihilɛi ni ehiii mli lɛ baanyɛ ni ekɛ naagbai ni hiɛdɔɔ yɔɔ mli aba. Nɔ ni gbalaa hii kɛ yei kɛbɛŋkɛɔ amɛhe lɛ mli wa. Yɛ suɔmɔ mli ni ajɛɔ asusuɔ mɔ he lɛ hewɔ lɛ, Yehowa gbɛjianɔtoo lɛ ebɔ kɔkɔ eshi nuu kɛ yoo ni boteko gbalashihilɛ mli loo amɛjeee weku mli bii ni amɛ pɛ amɛaahi he ko banee ni gbɔmɛi enaaa amɛ. Bɔni afee ni wɔya nɔ wɔkɛ Nyɔŋmɔ anyiɛ lɛ, ehe miihia ni wɔtsi wɔhe kɛjɛ hé ni aheɔ he ayeɔ he tsɔne lɛ he, ni wɔbo ŋaawoo ni ji kɔkɔbɔɔ ni ekɛhaa wɔ lɛ toi.—Lala 85:9.
Kaaha Gbɔmɔ he Gbeyeishemɔ Miiye Onɔ
10. ‘Gbɔmɔ he gbeyeishemɔ’ tsɔɔ mɔ tsɔne yɛ mɛɛ gbɛ nɔ?
10 Atsɔɔ wɔ oshara kroko yɛ Abɛi 29:25, ni kɛɔ akɛ: “Gbɔmɔ shemɔ tsɔɔ tsɔne.” Nɔ ni fataa gbɔbilɔ tsɔne he yɛ bei pii amli ji kpãa ni afiɔ lɛ afãlã, ni kɛ eshá lɛ ebalaa kooloo lɛ kuɛ ni emiaa lɛ waa aloo elalaa enaji. (Hiob 18:8-11) Gbɔmɔ he gbeyeishemɔ baanyɛ atsĩ nyɛmɔ ni mɔ ko yɔɔ ni ekɛaawie yɛ heyeli mli ni eba ejeŋ yɛ gbɛ ni saa Nyɔŋmɔ hiɛ lɛ naa. Ákɛ asa mɛi krokomɛi ahiɛ lɛ ji adebɔɔ naa su, ni bɔ ni mɛi krokomɛi susuɔ nii ahe amɛhaa ni akuɔ hiɛ ashwieɔ nɔ kwraa lɛ jeee Kristofoi asubaŋ. Shi pɛpɛɛpɛ ni aaaŋmɛ he miihia. Kɛ́ bɔ ni gbɔmɛi krokomɛi aaafee amɛnii amɛha lɛ he susumɔ ha mɔ ko fee nɔ ni Nyɔŋmɔ egu, loo ekpá nɔ ni Nyɔŋmɔ Wiemɔ lɛ fãa akɛ afee lɛ feemɔ lɛ, belɛ ádũ nakai mɔ lɛ yɛ tsɔne mli.
11. (a) Mɛni buɔ mɔ he kɛjɛɔ gbɛ ni aaaŋmɛ ni gbɔmɔ he gbeyeishemɔ akudɔ mɔ lɛ he? (b) Yehowa eye ebua etsuji ni kɛ gbɔmɛi ahe gbeyeishemɔ peleɔ lɛ yɛ mɛɛ gbɛ nɔ?
11 Nɔ ni buɔ mɔ he kɛjɛɔ tsɔne ni tamɔ nɛkɛ he lɛ bɛ su ni akɛfɔ́ gbɔmɔ lɛ mli, shi moŋ eyɛ ‘Yehowa ni akɛ hiɛ fɔ̃ɔ enɔ’ lɛ mli. (Abɛi 29:25b) Kɛ́ akɛ hiɛ fɔ̃ɔ Nyɔŋmɔ nɔ lɛ, mɔ ni ehiɛ gboɔ yɛ fɔmɔsu naa lɛ po baanyɛ ana ekãa ni edamɔ shi shiŋŋ. Bei abɔ ni Satan nibii agbɛjianɔtoo nɛɛ mli nɔnyɛɛi ebɔle wɔhe kɛkpe nɛɛ, ehe baahia ni wɔhiɛ ahi wɔhe nɔ yɛ gbɔmɔ he gbeyeishemɔ ni tsɔɔ mɔ tsɔne lɛ he. Eyɛ mli akɛ gbalɔ Elia efee gbɛi kpakpa yɛ ekãa sɔɔmɔ mli moŋ, shi beni Izebel wo ehe gbeyei akɛ ebaaha agbe lɛ lɛ, ekɛ gbeyeishemɔ jo foi. (1 Maŋtsɛmɛi 19:2-18) Beni bɔfo Petro baje nɔnyɛɛ shishi lɛ, ekɛ gbeyeishemɔ kɛɛ akɛ eleee Yesu Kristo, ni afii komɛi asɛɛ lɛ, eŋmɛ gbɛ ni gbeyeishemɔ ha eba ejeŋ yɛ gbɛ ni kɛ hemɔkɛyeli lɛ kpãaa gbee nɔ. (Marko 14:66-71; Galatabii 2:11, 12) Shi kɛlɛ, Elia kɛ Petro fɛɛ kpɛlɛ mumɔŋ yelikɛbuamɔ nɔ, ni yɛ hekɛnɔfɔɔ ni amɛyɔɔ yɛ Yehowa mli hewɔ lɛ, amɛtee nɔ amɛsɔmɔ Nyɔŋmɔ yɛ nɔkpɛlɛmɔ mli.
12. Mɛɛ ŋmɛnɛŋmɛnɛ beaŋ nɔkwɛmɔnii tsɔɔ bɔ ni áye abua aŋkroaŋkroi koni amɛkwa gbeyei ni amɛaaha etsi amɛ gbɛ koni amɛkasa Nyɔŋmɔ hiɛ lɛ?
12 Yehowa tsuji ni yɔɔ wɔgbii nɛɛ amli lɛ ateŋ mɛi pii hu ekase bɔ ni ayeɔ gbeyeishemɔ ni tsɔɔ mɔ tsɔne lɛ nɔ kunim. Odasefonyo gbekɛ ko ni yeko afii nyɔŋmai enyɔ ni yɔɔ Guyana lɛ kpɛlɛ nɔ akɛ: “Ta ni awuɔ koni adamɔ tipɛŋfoi anɔnyɛɛ naa yɛ skul lɛ naa wa.” Shi ekɛfata he akɛ: “Ni nakai ji mihemɔkɛyeli yɛ Yehowa mli.” Beni etsɔɔlɔ lɛ ye ehe fɛo yɛ klas muu lɛ fɛɛ hiɛ yɛ ehemɔkɛyeli hewɔ lɛ, esɔle eha Yehowa dioo. Yɛ sɛɛ mli lɛ, ekɛ ŋaa ye etsɔɔlɔ lɛ odase yɛ teemɔŋ. Beni obalanyo ko ni miikase Yehowa taomɔ nii yasara emaŋ yɛ Benin lɛ, etswa efai shi akɛ ebaashɛ́ amaga ko ni etsɛ egbɔ kɛha lɛ lɛ efɔ̃. Obalanyo lɛ le akɛ wala ko bɛ amaga lɛ mli, ni esheee enɛ gbeyei, shi ele hu akɛ akrowa lɛŋ bii ni amɛmli ewo la lɛ baatao lɛ ni amɛgbe lɛ. Esɔle eha Yehowa, kɛkɛ ni eŋɔ amaga lɛ kɛtee koo mli gbɛkɛ ni eyashɛ efɔ̃. (Okɛto Kojolɔi 6:27-31 he.) Beni yoo ko ni yɔɔ Dominican Republic lɛ je Yehowa sɔɔmɔ shishi lɛ, ewu kɛɛ lɛ akɛ ehala lɛ loo Yehowa. Nuu lɛ kɛ gbalamlitsemɔ wo ehe gbeyei. Ani gbeyeishemɔ baaha eŋmɛɛ ehemɔkɛyeli lɛ he? Eha hetoo akɛ: “Eji ekɔɔ anɔkwa ni miyeee yɛ gbalashihilɛ mli lɛ he kulɛ, mihiɛ baagbo, shi mihiɛ gbooo akɛ miisɔsɔmɔ Yehowa Nyɔŋmɔ!” Etee nɔ ekɛ Nyɔŋmɔ nyiɛ, ni yɛ be ni sa mli lɛ, ewu lɛ bafata ehe yɛ Yehowa suɔmɔnaa nifeemɔ mli. Kɛji akɛ wɔyɛ wɔŋwɛi Tsɛ lɛ mli hekɛnɔfɔɔ kwraa lɛ, wɔ hu wɔbaanyɛ wɔkwa gbɔmɔ he gbeyeishemɔ ni wɔɔŋmɛ gbɛ ni ehã wɔkpa nɔ ni wɔle akɛ esaa Yehowa hiɛ lɛ feemɔ lɛ.
Kwá Bɔ ni Abaa Ŋaawoo ni He Hiaa Shi Lɛ
13. Mɛɛ tsɔne abɔɔ wɔ kɔkɔ yɛ he yɛ 1 Timoteo 6:9 lɛ?
13 Eyɛ mli akɛ akɛ tsɔnei komɛi ni gbɔbilɔi kɛtsuɔ nii lɛ duɔ kooloo fɛɛ kooloo ni leee ehe be ni eeebatsɔ he ko pɔtɛɛ lɛ moŋ, shi tsɔnei krokomɛi lakaa kooloi komɛi kɛtsɔɔ nɔ ko ni shishiuɔ mɔ tamɔ kpoŋ naa loo nɔ. Ninámɔ tamɔ nakai kɛha gbɔmɛi pii. (Mateo 13:22) Biblia lɛ woɔ wɔ hewalɛ yɛ 1 Timoteo 6:8, 9 akɛ wɔmii ashɛ ŋmãa kɛ hehaa nii ahe. Kɛkɛ ni ebɔ kɔkɔ akɛ: “Mɛi ni taoɔ nii pii ana lɛ gbeeɔ kaa kɛ tsɔne kɛ kwashiai akɔnɔi pii ni fiteɔ mɔ ni tsiɔ mɛi ewoɔ hiɛkpatamɔ kɛ laajemɔ mli lɛ mli.”
14. (a) Mɛni baatsi mɔ ko naa koni ekakpɛlɛ ŋaawoo akɛ mɔ aha etsui anyɔ emli yɛ ŋmãa kɛ hehaa nii ahe lɛ nɔ? (b) Yɛ mɛɛ gbɛ nɔ ninámɔ shishitsɔɔmɔ yɛ gbɛ ni ejaaa nɔ baanyɛ aha mɔ aba kɔkɔbɔɔ ni akɛha yɛ 1 Timoteo 6:9 lɛ shi? (d) Yɛ mɛɛ gbɛ nɔ “hiŋmɛii lɛ asɛɛdii nii” baanyɛ ashwila mɛi komɛi yɛ tsɔne ni mɛɔ amɛ koni edũ amɛ lɛ he?
14 Yɛ kɔkɔbɔɔ nɛɛ fɛɛ sɛɛ lɛ, adũɔ mɛi pii yɛ tsɔne mli ejaakɛ amɛkɛ ŋaawoo lɛ tsuuu nii yɛ amɛ diɛŋtsɛ amɛshihilɛ mli. Mɛni hewɔ? Ani eeenyɛ eba akɛ henɔwomɔ tsirɛɔ amɛ koni amɛma nɔ mi doo akɛ amɛkɛ amɛhe baakpɛtɛ shihilɛ gbɛ ni biɔ nɔ ni fe “ŋmãa kɛ hehaa nii” ni Biblia lɛ woɔ wɔ hewalɛ ni wɔmii ashɛ he lɛ he? Ani ekolɛ amɛbaa Biblia lɛ kɔkɔbɔɔ lɛ shi ejaakɛ amɛtsɔɔ bɔ ni ninámɔ ji lɛ mli ni amɛkɛtoɔ nibii babaoo ni mɛi ni yɔɔ nii lɛ yɔɔ lɛ ahe? Biblia lɛ tsɔ̃ɔ fai shi ni atswaa akɛ aaaná nii lɛ mli akɛ esoro no yɛ tsui ni nyɔɔ mɔ mli yɛ ŋmãa kɛ hehaa nii ni ayɔɔ lɛ he lɛ he. (Okɛto Hebribii 13:5 he.) Ani “hiŋmɛii lɛ asɛɛdii nii”—bɔ ni amɛshweɔ ni amɛná nibii ni amɛkɛ amɛhiŋmɛi naa, ni amɛkɛ mumɔŋ nibii asɛɛdii po shãa afɔle lɛ—haa amɛtsiɔ anɔkwa jamɔ he nibii amɛwoɔ gbɛhe ni ji enyɔ? (1 Yohane 2:15-17; Hagai 1:2-8) Kwɛ miishɛɛ babaoo ni mɛi ni boɔ Biblia mli ŋaawoo lɛ toi ni amɛkɛ Nyɔŋmɔ nyiɛɔ lɛɛlɛŋ kɛtsɔɔ Yehowa sɔɔmɔ ni amɛkɛfeɔ amɛshihilɛ mli hiamɔ nii titri lɛ yɔɔ!
Shihilɛ Mli Yeyeeyefeemɔ Naa ni Adamɔɔ yɛ Omanyeyeli Mli
15. Mɛɛ shihilɛi ni anuɔ shishi baanyɛ aha Yehowa webii lɛ ateŋ mɛi pii afee yeyeeye, ni mɛɛ tsɔne esa akɛ wɔha wɔhiɛ ahi nɔ kɛ wɔyɛ nɔnyɛɛ ni tamɔ nɛkɛ shishi?
15 Nɔ ni fa babaoo fe fai shi ni atswaa akɛ aaaná nii ji yeyeeye ni afeɔ yɛ shihilɛ mli hiamɔ nii ahe lɛ. Heloo gbɛfaŋ nibii fioo ko pɛ Yehowa tsuji lɛ ateŋ mɛi pii kɛhiɔ shi. Amɛkɛ ŋmɛlɛtswai babaoo tsuɔ nii waa koni amɛna hiamɔ nii tamɔ hehaa nii, he ko ni amɛweku lɛ baawɔ gbɛkɛ, ni kɛ hoo lɛ niyenii ko kɛha gbi lɛ. Mɛi krokomɛi kɛ naagbai kpeɔ yɛ hela loo gbɔ ni amɛ diɛŋtsɛ loo amɛweku lɛ mli bii gbɔɔ lɛ hewɔ. Kwɛ bɔ ni ewaaa akɛ amɛaaha shihilɛi ni tamɔ nɛkɛ agbe mumɔŋ nibii ahe miishɛɛ kɛjɛ amɛshihilɛ mli!—Mateo 13:22.
16. Mɛɛ gbɛ Yehowa tsɔɔ nɔ eyeɔ ebuaa wɔ koni wɔdamɔ shihilɛ mli nɔnyɛɛi anaa?
16 Yehowa jɛɔ suɔmɔ mli egbaa wɔ hejɔlɛ ni wɔbaaná yɛ Mesia Maŋtsɛyeli lɛ shishi lɛ he sane. (Lala 72:1-4, 16; Yesaia 25:7, 8) Eyeɔ ebuaa wɔ hu koni wɔdamɔ shihilɛ mli nɔnyɛɛi anaa bianɛ, kɛtsɔ ŋaa ni ewoɔ wɔ yɛ bɔ ni wɔɔto nibii ni he hiaa wɔ titri lɛ ahe gbɛjianɔ jogbaŋŋ wɔha lɛ nɔ. (Mateo 4:4; 6:25-34) Yehowa maa enɛ nɔ mi kɛhaa wɔ kɛtsɔɔ nɔ ni áŋma afɔ shi yɛ bɔ ni eye ebua etsuji yɛ bei ni eho lɛ amli lɛ nɔ. (Yeremia 37:21; Yakobo 5:11) Etsɔɔ nilee nɔ ewajeɔ wɔ akɛ, yɛ haomɔ fɛɛ haomɔ ni aaaba wɔnɔ lɛ fɛɛ sɛɛ lɛ, esuɔmɔ kɛha etsuji anɔkwafoi lɛ ma shi nakai nɔŋŋ. (Romabii 8:35-39) Kɛha mɛi ni kɛ amɛhiɛ fɔɔ Yehowa nɔ lɛ, ejajeɔ akɛ: “Mishiŋo ni misaa mikwaŋo gbi ko gbi ko.”—Hebribii 13:5.
17. Okɛ bɔ ni aŋkroaŋkroi ni naa nɔ yɛ haomɔ ni naa wa mli lɛ enyɛ amɛtee nɔ amɛkɛ Nyɔŋmɔ enyiɛ lɛ ahe nɔkwɛmɔnii aha.
17 Akɛni nilee nɛɛ ewo amɛ hewalɛ hewɔ lɛ, anɔkwa Kristofoi yaa nɔ amɛkɛ Nyɔŋmɔ nyiɛɔ fe ni amɛaagba afã kɛya je lɛ gbɛ̀i anɔ. Jwɛŋmɔ ko ni ehe shi yɛ ohiafoi ni yɔɔ maji pii anɔ lɛ ji akɛ, ní oookɔ nɔ ko kɛjɛ mɔ ni yɔɔ nii babaoo lɛ ŋɔɔ koni okɛlɛ oweku lɛ jeee juu. Shi mɛi ni nyiɛɔ yɛ hemɔkɛyeli naa lɛ kpooɔ nakai jwɛŋmɔ lɛ. Amɛbuɔ Nyɔŋmɔ nɔkpɛlɛmɔ akɛ ejara wa fe nɔ fɛɛ nɔ, ni amɛkwɛɔ lɛ gbɛ koni ewo amɛ anɔkwayeli jeŋba lɛ he nyɔmɔ. (Abɛi 30:8, 9; 1 Korintobii 10:13; Hebribii 13:18) Yoo okulafo ko ni yɔɔ India na akɛ, suɔmɔ ni eyɔɔ akɛ eeetsu nii kɛ ŋaa gbɛi ni etsɔ nɔ eto enibii ahe gbɛjianɔ lɛ ye ebua lɛ ni enyɛ edamɔ naa. Yɛ nɔ najiaŋ ni eeeha shihilɛ mli ni eyɔɔ lɛ adɔ lɛ lɛ, ele akɛ, kɛji akɛ ekɛ Nyɔŋmɔ Maŋtsɛyeli lɛ kɛ ejalɛ lɛ ye klɛŋklɛŋ gbɛhe yɛ eshihilɛ mli lɛ, Yehowa baajɔɔ mɔdɛŋ ni ebɔɔ koni enine ashɛ shihilɛ mli hiamɔ nii anɔ kɛha ehe kɛ ebinuu lɛ nɔ. (Mateo 6:33, 34) Gbɔmɛi akpei abɔ ni yɔɔ shikpɔŋ nɔ hei sɔrɔtoi fɛɛ lɛ feɔ nakai, ni bɔ fɛɛ bɔ ni haomɔi ni amɛkɛaakpe lɛ ji lɛ, Yehowa ji amɛ abobaahe kɛ mɔ̃ɔ ni wa. (Lala 91:2) Ani enɛ ji anɔkwale yɛ ogbɛfaŋ?
18. Mɛni ji Satan je lɛ mli tsɔnei ni aaakwa lɛ anaa tsabaa?
18 Bei abɔ ni wɔyɔɔ nibii agbɛjianɔtoo nɛɛ mli lɛ, tsɔnei ni dũɔ mɔ ni esa akɛ wɔkwa baahi shi. (1 Yohane 5:19) Biblia lɛ haa wɔleɔ enɛɛmɛi ni etsɔɔ wɔ bɔ ni wɔɔfee wɔkwa enɛɛmɛi. Mɛi ni sumɔɔ Yehowa lɛɛlɛŋ ni amɛsheɔ ehiɛ ni amɛsaŋ lɛ gbeyei lɛ baanyɛ atsu tsɔnei nɛɛ ahe nii yɛ omanyeyeli mli. Kɛji akɛ ‘amɛtee nɔ amɛnyiɛ yɛ mumɔ naa’ lɛ, amɛŋmɛŋ amɛhe amɛhaŋ je lɛ gbɛ̀i lɛ. (Galatabii 5:16-25) Kɛha mɛi fɛɛ ni tswaa amɛshihilɛ kɛbɔleɔ wekukpaa ni kã amɛkɛ Yehowa teŋ lɛ he lɛ, gbɛkpamɔ kpeteŋkpele ni ji amɛkɛ Nyɔŋmɔ nyiɛmɔ, ni amɛkɛ lɛ aná yitsoŋsaneyeli mli ŋɔɔmɔ kɛya naanɔ lɛ yɛ.—Lala 25:14.
Mɛni Obaakɛɛ?
◻ Hé ni aheɔ he ayeɔ lɛ baanyɛ atsɔ mɔ tsɔne yɛ mɛɛ gbɛ nɔ?
◻ Mɛni baanyɛ abu wɔhe kɛjɛ gbɔmɔ he gbeyeishemɔ ni aaaye wɔnɔ lɛ he?
◻ Mɛni baanyɛ aha wɔkpa ŋaawoo ni kɔɔ oshara ni yɔɔ ninámɔ sɛɛdii he lɛ kɛ nitsumɔ?
◻ Mɛni baanyɛ aye abua wɔ koni wɔkwa shihilɛ mli yeyeeyefeemɔ ni aaatsɔ wɔ tsɔne lɛ?
[Mfoniri ni yɔɔ baafa 16-17]
Mɛi pii yaa nɔ amɛkɛ Nyɔŋmɔ nyiɛɔ yɛ amɛ wala shihilɛ be fɛɛ mli