Mɛni He Hiaa Koni Eha Ona Miishɛɛ?

MAŊKWRALƆI ni maŋbii fɔɔ oshiki kɛhalaa amɛ lɛ kɛfeɔ oti ni ma amɛhiɛ akɛ amɛbaabɔ mɔdɛŋ ni amɛha gbɔmɛi nɛɛ ana miishɛɛ. Ejaakɛ yɛ gbɛ ko nɔ lɛ, amɛnitsumɔ lɛ damɔ no nɔ. Shi adafitswaa wolo tɛtrɛɛ ko wie “maŋbii ni nyɛɔ amɛfɔ̃ɔ oshiki lɛ ayiŋ ni efutu amɛ ni amɛtsi amɛhe hu” yɛ Poland lɛ ahe. Adafitswaa nitsulɔ ko tsɔɔ mli akɛ United States maŋ lɛ ji adesai akuu ko ni “eyi obɔ kɛ hekɛnɔfɔɔ ni abɛ kɛ maŋkwramɔŋ nifeemɔi foji kɛkɛ.” Niŋmalɔ kroko hu gbaa wɔ bɔ ni “maŋkwramɔŋ saji kɔɔɔ mɛi ahe nɔ ko yɛ France.” Nɛkɛ shikplikpii-feemɔ kɛ miishɛɛ ni abɛ​—ni jeee nɛkɛ maji etɛ nɛɛ amli pɛ eyɔɔ lɛ​—tsɔɔ akɛ maŋkwralɔi anine miinyɛ shi yɛ mɔdɛŋ ni amɛbɔɔ akɛ amɛaaha gbɔmɛi ana miishɛɛ lɛ mli.

Jamɔ mli hiɛnyiɛlɔi hu woɔ shi yɛ miishɛɛ he, kɛ jeee yɛ shihilɛ nɛɛ mli lɛ, no lɛ kɛ hoo lɛ, yɛ wɔsɛɛ be mli. Amɛkɛ enɛ damɔɔ jwɛŋmɔ ni amɛyɔɔ akɛ adesai yɛ susuma ni gbooo loo efaa eyahiɔ nɔ kroko mli, ni ji susumɔ ko ni mɛi pii kpooɔ, yɛ yiŋtoi babaoo ahewɔ, ni Biblia lɛ tsɔɔ faŋŋ akɛ eji amale lɛ nɔ. Sɔlemɔtsui ni kamɔ efoji kɛ sɔlemɔyalɔi ni amɛnɔ miigbɔ lɛ tsɔɔ akɛ gbɔmɛi akpekpei abɔ ebuuu jamɔ dɔŋŋ akɛ ehe miihia kɛha miishɛɛ namɔ.​—Okɛto 1 Mose 2:​7, 17; Ezekiel 18:​4, 20 he.

Jwiɛtɛi Suɔlɔi ni Mii Shɛɛɛ Amɛhe

Kɛ jeee maŋkwramɔ aloo jamɔ mli lɛ, belɛ nɛgbɛ abaanyɛ ana miishɛɛ yɛ mɔ? Ani ekolɛ abaana yɛ jarayeli mli‘? No hu kɛɔ akɛ enyɛɔ ekɛ miishɛɛ baa. Ewieɔ kɛfãa ehe kɛtsɔɔ jarayeli mli adafitswaa gbɛ nɔ, yɛ wiemɔ ni mli ka shi faŋŋ mli akɛ: Miishɛɛ jɛɔ heloonaa nibii ni shika nyɛɔ eheɔ kɛ sɔɔmɔ ni ehaa mɔ naa lɛ mli baa.

Etamɔ nɔ ni gbɔmɛi abɔ ni tiuɔ miishɛɛ sɛɛ yɛ nɛkɛ gbɛ nɔ lɛ ayi miifa babaoo. Afii babaoo ni eho nɛ ni abɔ amaniɛ akɛ shiai enyɔ fɛɛ enyɔ ni yɔɔ Germany lɛ mli ekome hiɛ nyɔmɔ waa. No hewɔ lɛ, ebɛ naakpɛɛ akɛ German adafitswaa wolo Die Zeit ni ehe gbɛi waa lɛ gba efɔ shi akɛ “[mɛnɛɛmɛi] ateŋ mɛi babaoo bɛ hegbɛ bibioo po akɛ amɛkɛaaje nɛkɛ nyɔmɔ shihilɛ nɛɛ mli.” Etsɔɔ mli akɛ: “Ewaaa kwraa akɛ mɔ ko aaahe shika babaoo fe bɔ ni shikatoo he lɛ ŋmɛɔ gbɛ ni afa​—no hewɔ lɛ ewa waa akɛ ooojie ohe kɛjɛ nɛkɛ nyɔmɔ tsɔne ni dũɔ mɛi nɛɛ mli.”

Shihilɛ ni yɔɔ maji krokomɛi ni etee amɛhiɛ lɛ amli lɛ tamɔ nakai. Afii fioo ni eho nɛ lɛ, adesai ashihilɛ he nilelɔ, David Caplovitz, ni yɔɔ City University yɛ New York lɛ bu akɔntaa akɛ yɛ United States lɛ, wekui aaashɛ akpekpei 20 kɛmiimɔ akpekpei 25 hiɛ nyɔmɔ babaoo diɛŋtsɛ. Ekɛɛ “nyɔmɔ ni gbɔmɛi lɛ hiɛ lɛ eye amɛnɔ butuu, ni eefite amɛshihilɛ kwraa.”

Enɛ tamɔɔɔ miishɛɛ wiemɔ kwraa! Shi ani esa akɛ wɔkpa gbɛ akɛ jarayeli je lɛ baanyɛ atsu nɔ ni eka shi faŋŋ akɛ ekrokomɛi enyɔ (maŋkwramɔ kɛ jamɔ) nyɛɛɛ atsu nɛɛ? Maŋtsɛ Salomo ni yɔɔ nii waa lɛ ŋma be ko akɛ: “Mɔ ni sumɔɔ shika lɛ, shika etɔŋ lɛ, ni mɔ ni sumɔɔ nifalɛ lɛ, enaŋ sɛɛ ko. Enɛ hu yakayaka nɔ ko ni!”​—Jajelɔ 5:⁠9.

Miishɛɛnamɔ taomɔ yɛ heloonaa ninamɔ mli lɛ tamɔ nɔ ni oomamɔ mɔji yɛ kɔɔyɔɔŋ. Emaamɔ baafee miishɛɛ waa diɛŋtsɛ, shi kɛji oka akɛ oyaahi mli lɛ, obaana naagbai babaoo.

Nine Nyɛɔ Eshɛɔ Miishɛɛnamɔ nɔ, shi yɛ Mɛɛ Gbɛ Nɔ?

Bɔfo Paulo tsɛɔ Yehowa akɛ “miishɛɛ Nyɔŋmɔ.” (1 Timoteo 1:​11, New World Translation) Nyɔŋmɔ ni yɔɔ miishɛɛ nɛɛ tsɔ adesai ni ebɔ yɛ lɛ diɛŋtsɛ esubaŋ nɔ lɛ nɔ eha amɛ hu nyɛmɔ ni amɛkɛaana miishɛɛ. (1 Mose 1:26) Shi amɛmiishɛɛnamɔ lɛ damɔ sɔɔmɔ ni amɛaasɔmɔ Nyɔŋmɔ lɛ nɔ, taakɛ lalatsɛ lɛ tsɔɔ lɛ, akɛ: “Miishɛɛ ji maŋ ni Yehowa ji e-Nyɔŋmɔ lɛ!” (Lala 144:15b, NW) Kɛji wɔsusu hei 110 ni wiemɔ “miishɛɛ” kɛ “miishɛɛnamɔ” lɛ jeɔ kpo yɛ, yɛ New World Translation lɛ mli lɛ mli fioo komɛi ahe lɛ, ebaaha wɔnyɛ wɔnu nɔ ni fata sɔɔmɔ ni wɔkɛhaa Nyɔŋmɔ lɛ he lɛ shishi jogbaŋŋ, kɛ bɔ ni sɔɔmɔ ni wɔsɔmɔɔ lɛ lɛ kɛ anɔkwa miishɛɛ baa hu.

Mumɔŋ Hiamɔ Nii Ayoomɔ

Yesu Kristo, Nyɔŋmɔ Bi lɛ, wie yɛ e-Gɔŋ nɔ Shiɛmɔ ni ehé gbɛi waa lɛ mli akɛ: “Miishɛɛ ji mɛi ni hiɛ yɔɔ amɛmumɔŋ hiamɔ nii anɔ lɛ.” (Mateo 5:​3, NW) Jarayeli je lɛ kaa akɛ eeelaka wɔ ni wɔsusu akɛ akɔnɔ nibii pii ahemɔ kɛkɛ fa kɛha miishɛɛnamɔ. Ekɛɔ wɔ akɛ miishɛɛnamɔ ji ni aaana kompiuta yɛ shia, kɛ video mfoniri-shamɔ tsɔne, tɛlifon, kar, kpɔiaŋgbɔlemɔ nii heei fe fɛɛ ni eba, aloo atadei ni akpɛ lɛ sɔrɔtoi. Nɔ ni ekɛɛɛ wɔ ji akɛ, gbɔmɛi akpei nyɔŋmai abɔ yɛ je lɛŋ ni amɛbɛ nɛkɛ nibii nɛɛ eko kwraa, ni kɛlɛ no etsɔɔɔ doo akɛ amɛbɛ miishɛɛ. Eyɛ mli akɛ enyɛɔ ehaa shihilɛ feɔ miishɛɛ ni eŋɔɔ moŋ, shi nɛkɛ nibii nɛɛ ahe ehiaaa kɛha miishɛnamɔ.

Taakɛ Paulo fee lɛ, mɛi ni hiɛ yɔɔ amɛmumɔŋ hiamɔ nii anɔ lɛ kɛɔ akɛ: “Kɛ wɔyɛ ŋmaa kɛ hehaanii kɛkɛ lɛ, esa akɛ wɔmii ashɛ he.” (1 Timoteo 6:⁠8) Mɛni hewɔ? Ejaakɛ mumɔŋ hiamɔ nii ni nine aaashɛ nɔ lɛ ji nɔ ni kɛ mɔ yaa naanɔ wala mli.​—Yohane 17:⁠3.

Ani tɔmɔ ko yɛ nibii kpakpai ni wɔɔna mli ŋɔɔmɔ lɛ he, kɛji wɔyɛ shika ni wɔkɛaahe? Ekolɛ dabi. Shi kɛlɛ, kɛji wɔkase bɔ ni wɔdiŋ akɔnɔ nibii fɛɛ asɛɛ, aloo wɔheŋ nɔ fɛɛ nɔ kɛkɛ akɛni wɔyɛ shika ni wɔkɛaahe hewɔ lɛ, ewoɔ wɔmumɔŋ shihilɛ lɛ mli hewalɛ. Ehaa wɔkaseɔ bɔ ni wɔmii shɛɔ nɔ ni wɔyɔɔ lɛ he, ni wɔhiɛɔ wɔmiishɛɛ lɛ mli, taakɛ Yesu fee lɛ, eyɛ mli akɛ eshika gbɛfaŋ shihilɛ lɛ jeee nɔ ni hi fe fɛɛ ni aaanyɛ aná yɛ jeŋ bii ashihilɛ naa. (Mateo 8:20) Ni Paulo etsɔɔɔ akɛ enaaa miishɛɛ beni eŋma nɛkɛ lɛ, akɛ: “Mi lɛ mikase akɛ shihilɛ fɛɛ shihilɛ ni miyɔɔ mli lɛ mimii ashɛ he. Mile ohia mli shihilɛ, ni mile nii amli shihilɛ hu; mihe ehomɔ yɛ nɔ fɛɛ nɔ kɛ nii fɛɛ mli: tɔɔ jio, hɔmɔ jio, ninamɔ jio, ohia jio.”​—Filipibii 4: 11, 12.

Yehowa Mli Hekɛnɔfɔɔ

Mɔ hiɛ ni hiɔ ehe nɔ yɛ emumɔŋ hiamɔ nii ahe lɛ tsɔɔ esuɔmɔ mli ni ejɛɔ ekɛ ehe fɔɔ Nyɔŋmɔ nɔ. Enɛ kɛ miishɛɛ baa, taakɛ Maŋtsɛ Salomo tsɔɔ mli lɛ, akɛ: “Miishɛɛ ji mɔ ni kɛ ehiɛ fɔɔ Yehowa nɔ lɛ.”​—Abɛi 16:​20, NW.

Shi, ani ejeee anɔkwa sane, akɛ mɛi pii kɛ amɛhe fɔɔ amɛshika kɛ nibii ni amɛyɔɔ lɛ nɔ babaoo moŋ fe bɔ ni amɛkɛ amɛhe fɔɔ Nyɔŋmɔ nɔ? Kɛ wɔkwɛ yɛ nɛkɛ shishinumɔ naa lɛ, he kroko bɛ ni ehiii kwraa akɛ aaaŋmala nɛkɛ wiemɔ titri ni ji “‘Nyɔŋmɔ Nɔ Wɔhiɛ Ka” nɛɛ yɛ, tamɔ shika nɔ, eyɛ mli akɛ aŋma nakai wiemɔi lɛ yɛ U.S. shika lɛ nɔ.

Maŋtsɛ Salomo, mɔ ni nibii kpakpai ni shika baanyɛ ahe lɛ eko kwraa he ehiaaa lɛ lɛ yoo akɛ he ni akɛfɔɔ heloonaa nii ni ayɔɔ lɛ nɔ lɛ haaa mɔ ana miishɛɛ ní sɛɛ tsɛɔ. (Jajelɔ 5:​12-15) Shika ni akɛto shikatoo he baanyɛ alaaje kɛtsɔ shikatoo he lɛ shigbeemɔ loo nibii ajarawalɛ nɔ. Ahum ni naa wa baanyɛ akumɔ tsũi ni amamɔ. Ni eyɛ mli akɛ inshuɔrans baanyɛ ato heloonaa nibii ni laajeɔ lɛ ekomɛi anajiaŋ moŋ, shi enyɛŋ eto nibii ni laajeɔ yɛ henumɔ gbɛfaŋ lɛ anajiaŋ kɔkɔɔkɔ. Nitsumɔi amli gbɛfaŋnɔ ni ayɔɔ kɛ shika ni akɛfa baanyɛ afite nɔŋŋ jenamɔ yɛ nitsumɔ mli gbɛfaŋnɔ hɔɔmɔ hé shigbeemɔ hewɔ. Nitsumɔ ni awoɔ mɔ nyɔmɔ babaoo​—ni anyɛɔ anaa ŋmɛnɛ, kɛkɛ lɛ wɔ nɔŋŋ efite lɛ​—baanyɛ aje mɔ dɛŋ yɛ yiŋtoi sɔrɔtoi ahewɔ.

Yɛ yiŋtoi nɛɛ ahewɔ lɛ, mɔ ni kɛ ehiɛ fɔɔ Yehowa nɔ lɛ naa nilee ni yɔɔ Yesu kɔkɔbɔɔ wiemɔi nɛɛ atoiboo mli, akɛ: “Nyɛkabɔa jwetrii nyɛhaa nyɛhe yɛ shikpɔŋ lɛ nɔ, he ni omlɛgɛ kɛ ŋkanale fiteɔ nii ni julɔi gbaa amɛyajuɔ yɛ lɛ. Shi nyɛbɔa jwetrii nyɛhaa nyɛhe yɛ ŋwɛi, he ni omlɛgɛ kɛ ŋkanale fiteee nii ni julɔi gbaaa amɛyajuuu yɛ lɛ.”​—Mateo 6: 19, 20.

Mɛɛ shweshweeshwe shihilɛ kɛ miishɛɛnamɔ henumɔ mɔ ko aaanyɛ ana fe ni mɔ lɛ aaale akɛ ekɛ ehiɛ efɔ Nyɔŋmɔ Ofe lɛ, mɔ ni haa wɔ nɔ fɛɛ nɔ lɛ nɔ?​—Lala 94:​14; Hebribii 13: 5, 6.

Nyɔŋmɔ Kamɔ Nɔkpɛlɛmɔ

Kɛ anɔkwa naanyo kɛ ŋaawoo, loo kamɔ po ha yɛ mumɔ ni tsɔɔ suɔmɔ mli lɛ, akpɛlɛɔ nɔ. Mɔ ko ni tsɛɔ ehe Nyɔŋmɔ tsulɔ Hiob naanyo ko lɛ kɛ bɔ ni ebuɔ ehe jalɔ ehaa lɛ kɛɛ lɛ akɛ: “Miishɛɛ ji adesa ni Nyɔŋmɔ kãa lɛ lɛ.” Eyɛ mli akɛ eji anɔkwale moŋ, shi nɔ ni Elifaz kɛ nɛkɛ wiemɔi nɛɛ tsɔɔ​—akɛ Hiob yeɔ efɔŋfeemɔ ko ni hiɛdɔɔ yɔɔ mli he fɔ lɛ​—jeee anɔkwale. Mɛɛ ‘miishɛjelɔ mɔnaagbalɔ’ nɛ! Shi kɛlɛ, beni Yehowa kã Hiob yɛ sɛɛ mli yɛ suɔmɔ mli lɛ, Hiob kɛ heshibaa kpɛlɛ kamɔ lɛ nɔ ni no ha ebote shihilɛ ni miishɛɛ babaoo yɔɔ mli lɛ mli.​—Hiob 5:​17; 16:2; 42:​6, 10-17 NW.

Ŋmɛnɛ, Nyɔŋmɔ kɛ etsuji ewieee tɛɛ tamɔ bɔ ni ekɛ Hiob wie lɛ. Shi moŋ, ekãa amɛ kɛtsɔɔ e-Wiemɔ lɛ kɛ egbɛjianɔtoo ni mumɔ kudɔɔ lɛ lɛ nɔ. Shi, bei pii lɛ, Kristofoi ni diɔ heloonaa nibii asɛɛ lɛ naaa be, kɛ hewalɛ, aloo henumɔ ko po akɛ amɛkase Biblia lɛ daa ni amɛya kpeei ni Yehowa gbɛjianɔtoo lɛ eto he gbɛjianɔ lɛ eko fɛɛ eko.

Yɛ Abɛi 3:​11-18 (NW) kɛ gbeekpamɔ naa lɛ, gbɔmɔ ni Nyɔŋmɔ kpɛlɛɔ enɔ lɛ yooɔ nilee ni yɔɔ nɛkɛ kamɔ wiemɔi nɛɛ anɔkpɛlɛmɔ mli, akɛ: “Miishɛɛ ji gbɔmɔ ni naa nilee kɛ gbɔmɔ ni naa jwɛŋmɔ lɛ, ejaakɛ no namɔ hi fe jwiɛtɛi namɔ, ni emli sɛɛnamɔ lɛ fe shika krɔŋŋ. Ejara hu wa fe tɛŋɛlɛo, ni onii ni jara wa fɛɛ onyɛŋ okɛto he. Gbii asɛɛjɛkɛmɔ yɛ eninejurɔ, ni nii kɛ anunyam yɛ ebɛku. Egbɛi lɛ gbɛ́i fɛfɛji ni, ni etempɔŋi lɛ fɛɛ lɛ hejɔlɛ ni. Wala tso ji lɛ ha mɛi ni mɔɔ emli lɛ, ni mɔ ni hiɛɔ emli lɛ, aaatsɛ lɛ mɔ ni yɔɔ miishɛɛ.”

Ni Wɔɔfee Mɛi ni Yɔɔ Krɔŋŋ kɛ Mɛi ni Sumɔɔ Toiŋjɔlɛ

Yesu wie mɛi ni yɔɔ miishɛɛ lɛ ahe akɛ “mɛi ni tsuii amli tse” kɛ “mɛi ni he jɔ.” (Mateo 5: 8, 9, NW) Shi kwɛ bɔ ni eyɔɔ mlɛo akɛ hiɛjoomɔ, kɛ ekolɛ akɔnɔi ni he tseee po aaaná shishifa yɛ wɔtsuii amli, yɛ jeŋ ni woɔ heloonaa ninamɔ shihilɛ he hewalɛ nɛɛ mli! Kɛji ŋwɛi nilee kudɔɔɔ wɔ lɛ, kwɛ bɔ ni eeefee mlɛo kwraa eha akɛ aaalaka wɔ ni wɔtao shika gbɛfaŋ hejɔlɛ shihilɛ kɛtsɔ gbɛ́i gbohii ni aaanyɛ afite toiŋjɔlɛ wekukpaa ni ka wɔkɛ mɛi krokomɛi ateŋ lɛ kwraa lɛ anɔ! Yiŋtoo kpakpa hewɔ ni Biblia lɛ bɔɔ kɔkɔ akɛ: “Nibii fɔji fɛɛ ashishifa ji shika suɔmɔ ni mɛi komɛi di sɛɛ ni amɛdu gbɛ kɛjɛ hemɔkɛyeli lɛ mli, ni amɛkɛ piŋmɔi babaoo egbulɔ amɛhe lɛ.”​—1 Timoteo 6:​10.

Shika suɔmɔ haa mɔ diɛŋtsɛ he ni esusuɔ kɛtekeɔ nɔ lɛ yaa hiɛ, ni ewoɔ nii ahe miishɛɛ ni anaaa, hiɛ ni esɔɔɔ nii, kɛ hiɛjoomɔ he hewalɛ. Bɔni afee ni amɛkɛtsĩ nɛkɛ su ni ejaaa nɛɛ naa ni ekada lɛ, dani Kristofoi komɛi aaakpɛ amɛyiŋ yɛ shika gbɛfaŋ saji wuji ahe lɛ, amɛbiɔ amɛhe saji tamɔ: Ani ehe miihia mi lɛlɛŋ? Ani nɛkɛ nii ni jara wa ni mahe aloo nɛkɛ nitsumɔ ni awoɔ mɔ nyɔmɔ pii, shi eheɔ mɔ be babaoo ni matsu nɛɛ he miihia mi fe gbɔmɛi akpekpei abɔ krokomɛi ni bɛ eko lɛ? Ani ekolɛ manyɛ mikɛ mishika loo mibe atsu nii jogbaŋŋ ni mikɛlɛɛ gbɛfaŋnɔ ni minaa yɛ anɔkwa jamɔ mli lɛ mli, kɛtsɔ jeŋ muu fɛɛ shiɛmɔ nitsumɔ lɛ sɛɛfimɔ nɔ, aloo ni mikɛye mibua mɛi ni efi amɛ fe mi lɛ?

Tsuishiŋmɛɛ Kpojiemɔ

Kaai ni ehe bahia ni Hiob aŋmɛ etsui shi yɛ mli lɛ ekome ji shika gbɛfaŋ fimɔ. (Hiob 1:1417) Taakɛ enɔkwɛmɔ nɔ lɛ tsɔɔ lɛ, tsuishiŋmɛɛ he miihia yɛ shihilɛ mli nibii fɛɛ gbɛfaŋ. Esa akɛ Kristofoi komɛi aŋmɛ amɛtsui shi yɛ yiwaa shishi; mɛi krokomɛi hu, kaa; kɛ mɛi krokomɛi hu, shika gbɛfaŋ shihilɛi ni ehiii kwraa. Shi Yehowa baawo tsuishiŋmɛɛ sɔrɔtoi fɛɛ he nyɔmɔ, taakɛ Kristofonyo kaselɔ Yakobo ŋma beni ewieɔ Hiob he lɛ, akɛ: “Miishɛɛ ji mɛi ni ŋmɛɔ amɛtsui shi lɛ.”​—Yakobo 5:​11, NW.

Wɔhiɛ ni wɔɔku wɔshwie mumɔŋ nibii anɔ bɔni afee ni wɔha wɔ shika gbɛfaŋ shihilɛ ahi fioo eha wɔ lɛ baanyɛ eha wɔ be kukuoo heyeli moŋ, shi ani ebaaye ebua ni shika gbɛfaŋ heyeli ni baahi shi daa yɛ Nyɔŋmɔ Maŋtsɛyeli lɛ shishi lɛ he ninaa ni wɔyɔɔ lɛ mli akpɛ? Ani esa akɛ wɔkɛ wɔhe awo oshara ni tamɔ nakai mli?​—2 Korintobii 4:⁠18.

Bɔ ni Wɔɔfee Wɔna Miishɛɛ Bianɛ kɛ Agbɛnɛ Kɛya Naanɔ

Eka shi faŋŋ akɛ mɛi komɛi jeɔ bɔ ni Yehowa susuɔ nɔ ni baaha adesai ana miishɛɛ he ehaa lɛ he ŋwane. Akɛni amɛkuɔ amɛhiɛ amɛshwieɔ wɔsɛɛ be sɛɛnamɔi ni he hiaa lɛ anɔ hewɔ lɛ, amɛnaaa sɛɛnamɔ ko ni baajɛ nɔ ni Nyɔŋmɔ woɔ wɔ ŋaa akɛ wɔfee lɛ mli aba amrɔ nɔŋŋ. Amɛyooo akɛ amɛhiɛ ni amɛkɛfɔɔ heloonaa nibii anɔ lɛ ji yakayaka nii, ni ekɛ nijiaŋwujee baa. Biblia ŋmalɔ lɛ bi yɛ gbɛ ni ja nɔ akɛ: “He ni nii faa yɛ lɛ, yelɔi hu faa yɛ jɛi, ni mɛɛ sɛɛnamɔ yɔɔ mli ha nɔtsɛmɛi lɛ, akɛ ja kwɛ ni amɛaakwɛ kɛ amɛhiŋmɛi lɛ kɛkɛ?” (Jajelɔ 5:​10; kwɛmɔ Jajelɔ 2:​4-11; 7:12 hu.) Kwɛ bɔ ni nibii ahe miishɛɛ ni wɔnaa lɛ tãa oya nɔŋŋ ni nibii ni wɔsusu akɛ esa akɛ wɔna doo lɛ yagbeɔ naa yɛ adekai amli, ni etsuuu nɔ ko kwraa fe gbɛ ni eheɔ yɛ nibii atoohe, ni eloo mulu pɛ kɛkɛ!

Anɔkwa Kristofonyo lɛ eŋmɛŋ gbɛ ni anyɛ enɔ ni ‘etamɔ mɛi krokomɛi’ yɛ ninamɔ gbɛfaŋ. Ele akɛ anaa anɔkwa bulɛ ahaa mɔ, jeee yɛ enii ni eyɔɔ hewɔ, shi moŋ yɛ bɔ ni eji lɛ hewɔ. Yiŋkɔshikɔshi-feemɔ ko bɛ eyiŋ yɛ nɔ ni he hiaa koni eha mɔ ana miishɛɛ​—miishɛɛ diɛŋtsɛ lɛ he: mɔ lɛ kɛ Yehowa teŋ wekukpaa kpakpa mli ŋɔɔmɔ ni eeena kɛ edeka fɛɛ ni ekaatsu nii yɛ E-sɔɔmɔ mli.

[Mfoniri ni yɔɔ baafa 20]

Heloonaa nibii pɛ kɛkɛ nyɛŋ ekɛ miishɛɛ ni sɛɛ tsɛɔ aba

[Mfoniri ni yɔɔ baafa 22]

Biblia lɛ kɛɔ akɛ: “Miishɛɛ ji mɛi ni hiɛ yɔɔ amɛmumɔŋ hiamɔ nii anɔ Iɛ”