Mɔ Anɔkwa Wala lɛ Mli Tamɔ Jwetri
ANI wala nɛɛ pɛ ji fɛɛ ni yɔɔ? Yɛ hewalɛ ni ewoɔ wɔ koni “[wɔ]mɔ anɔkwa wala lɛ mli [kpɛŋŋ]” hewɔ lɛ, Biblia lɛ tsɔɔ akɛ babaoo yɛ. (1 Timoteo 6:17-19) Kɛ wɔ ŋmɛnɛŋmɛnɛ wala nɛɛ jeee anɔkwa wala lɛ, belɛ mɛni ji no?
Ŋmalɛ ni atsi ta momo nɛɛ mli saji lɛ tsɔɔ akɛ “naanɔ wala” ji nɔ ni esa akɛ gbɔmɛi ni sheɔ Nyɔŋmɔ gbeyei lɛ amɔ mli kpɛŋŋ. (1 Timoteo 6:12) Kɛha mɛi ni fa babaoo lɛ, enɛ tsɔɔ naanɔ wala yɛ shikpɔŋ nɔ. Adam, klɛŋklɛŋ gbɔmɔ lɛ, yɛ hegbɛ ni ekɛaahi shi kɛya naanɔ yɛ paradeiso shikpɔŋ nɔ. (1 Mose 1:26, 27) Ja eye “ekpakpa kɛ efɔŋ lee tso lɛ” nɔ nii dani ebaagbo. (1 Mose 2:17) Shi, akɛni Adam kɛ eŋa Hawa kɛ toigbele ye nakai tso lɛ yibii hewɔ lɛ, Nyɔŋmɔ bu amɛ gbele fɔ. Amɛgboi yɛ Nyɔŋmɔ hiɛ, ‘yɛ gbi nɔ ni amɛye eko lɛ,’ ni amɛje shigbeemɔ ni kɛ amɛ boteɔ amɛ gbɔmɔtsoŋ gbele mli lɛ shishi. Amɛshihilɛ ebafeee nɔ ni hi tamɔ klɛŋklɛŋ nɔ̃ ni amɛna mli ŋɔɔmɔ lɛ dɔŋŋ.
Gbɛ ni Kɛ Mɔ Yaa “Anɔkwa Wala lɛ” Mli
Bɔni afee ni “anɔkwa wala lɛ” afee nɔ ni baanyɛ aba diɛŋtsɛ lɛ, Yehowa Nyɔŋmɔ to gbɛjianɔ koni ehere adesai ayiwala. Bɔni afee ni eye ebua wɔ ni wɔnu gbɛjianɔtoo nɛɛ shishi lɛ, nyɛhaa wɔsusua nitsumɔ hé bibioo ko he. Nitsumɔ tsɔnei ni yɔɔ jɛmɛ lɛ fɛɛ ehiii ni egbaa mɛi ni kɛtsuɔ nii lɛ anaa, ejaakɛ klɛŋklɛŋ nitsulɔ lɛ ku ehiɛ eshwie wolo ni tsɔɔ bɔ ni akɛtsu nii aha lɛ nɔ afii pii nɛ, ni efite tsɔnei lɛ fɛɛ. Ŋmɛnɛŋmɛnɛ beaŋ tsɔnei ahe nitsulɔi nɛɛ baanyɛ afee nɔ ni hi fe fɛɛ ni amɛaanyɛ yɛ tsɔnei nɛɛ kɛ nitsumɔ mli. Nitsumɔtsɛ lɛ miisumɔ ni esaa tsɔnei lɛ koni ekɛye ebua nitsulɔi lɛ, ni eebua shika ni he hiaa kɛha yiŋtoo ni tamɔ nɛkɛ lɛ naa.
Klɛŋklɛŋ ‘tsɔne he nitsulɔ,’ Adam, ebuuu wala ni akɛha lɛ lɛ akɛ ejara wa. No hewɔ lɛ, ekɛ wala ni yeee emuu ha eshwiei, nɔ ko ni tamɔ tsɔne ni tsuuu nii jogbaŋŋ. (Romabii 5:12) Taakɛ sɛɛ mli tsɔnei ahe nitsulɔi, ni yɔɔ nitsumɔ he lɛ, ni nyɛɛɛ afee shihilɛ lɛ he nɔ ko lɛ ji lɛ, Adam shwiei anine nyɛɛɛ ashɛ anɔkwa wala lɛ nɔ amɛha amɛhe. (Lala 49:8) Bɔni afee ni esaa shihilɛ ni tamɔ nɔ ni hiɛnɔkamɔ bɛ mli nɛɛ, Yehowa tsu e-Bi koome lɛ kɛba shikpɔŋ nɔ koni ebahe naanɔ wala ekoŋŋ kɛha adesai. (Luka 1:35; 1 Petro 1:18, 19) Yɛ afɔleshaa gbele ni egbo yɛ adesai ahewɔ lɛ, Nyɔŋmɔ Bi koome, Yesu Kristo, kɛ shika lɛ ha—wala ni kɛ nɔ ni Adam laaje lɛ lɛ yeɔ egbɔ lɛ. (Mateo 20:28; 1 Petro 2:22) Yɛ afɔleshaa ni jara wa waa nɛɛ hewɔ lɛ, Yehowa ena nɔ ni ebaadamɔ nɔ ekɛ anɔkwa wala lɛ aha.
Kɛha adesai toibolɔi lɛ, Yesu kpɔmɔ afɔleshaa lɛ baafee naanɔ wala yɛ paradeiso shikpɔŋ nɔ aha amɛ. (Lala 37:29) Akɛ hiɛnɔkamɔ nɛɛ haa mɛi fɛɛ ni baaje “Nyɔŋmɔ Ofe lɛ gbi wulu lɛ nɔ ta lɛ,” ni atsɛɔ lɛ akɛ Harmagedon mli lɛ. (Kpojiemɔ 16:14-16) Ebaajie efɔŋ feemɔi fɛɛ kɛjɛ shikpɔŋ nɔ. (Lala 37:9-11) Abaatee mɛi ni yɔɔ Nyɔŋmɔ kaimɔ mli ni gboiɔ dani nakai be lɛ shɛɔ lɛ ashi kɛba Paradeiso ni asaa akɛba shikpɔŋ nɔ ekoŋŋ mli, ni amɛbaana hegbɛ ni amɛna anɔkwa wala diɛŋtsɛ ni yɔɔ kɛha mɛi fɛɛ ni boɔ Nyɔŋmɔ toi lɛ mli ŋɔɔmɔ.—Yohane 5:28, 29.
Ehe Miihia ni Wɔhiɛ Wɔ Ŋmɛnɛŋmɛnɛ Wala lɛ Dɔdɔɔdɔ
Enɛ etsɔɔɔ akɛ wɔbaanyɛ wɔfee mɛi ni ebuuu krɔŋkrɔŋ ni wɔ ŋmɛnɛŋmɛnɛ wala lɛ ji lɛ yɛ gbɛ ni ja nɔ. Ani nitsumɔ he nɔtsɛ lɛ baafite be kɛ shika ni ekɛsaa tsɔne eha nitsulɔ ni kwɛɛɛ nɔ jogbaŋŋ? Ani nitsumɔtsɛ lɛ kɛ tsɔne ni asaa lɛ ekoŋŋ lɛ woŋ mɔ ni bɔ mɔdɛŋ akɛ ekɛ emomo lɛ aaatsu nii jogbaŋŋ lɛ moŋ dɛŋ?
Wala ji nikeenii ni jara wa waa ni jɛ Yehowa ŋɔɔ. Ákɛ nakai nikeenii lɛ jɛɛhe ni mli hi lɛ, eesumɔ ni wɔhiɛ lɛ dɔdɔɔdɔ. (Lala 36:10; Yakobo 1:17) Beni ewieɔ bɔ ni Yehowa susuɔ gbɔmɛi ni yɔɔ shikpɔŋ nɔ lɛ ahe lɛ, Yesu kɛɛ: “Shi nyɛ yiteŋ tsɔi tete akane fɛɛ.” (Luka 12:7) Yehowa fa Israelbii lɛ akɛ amɛkagbe gbɔmɔ, ni nɔ ni fata he ji amɛhe ni esaaa akɛ amɛgbeɔ. (2 Mose 20:13) Enɛ yeɔ ebuaa wɔ koni wɔkwa hegbee akɛ nɔ ni abaahala.
Akɛni mɛi ni sheɔ Nyɔŋmɔ gbeyei lɛ le bɔ ni Yehowa yɔɔ wɔ hilɛ-kɛhamɔ he miishɛɛ ha hewɔ lɛ, amɛkɛ Biblia mli shishitoo mlai tsuɔ ŋmɛnɛŋmɛnɛ gbii nɛɛ amli nifeemɔi ahe nii. Akɛ nɔkwɛmɔ nɔ lɛ, akɛni aatao ni anɔkwa Kristofoi ‘atsuu amɛhe kɛjɛ helooŋ kɛ mumɔŋ muji fɛɛ mli, ni amɛgbe hetsemɔ naa yɛ Nyɔŋmɔ gbeyeishemɔ mli’ hewɔ lɛ, amɛtsiɔ amɛhe kɛjɛɔ tawa kɛ tsofai ni naa mɔ jwɛŋmɔ nɔ hewalɛ lɛ ahe.—2 Korintobii 7:1.
Anaa bɔ ni Nyɔŋmɔ yɔɔ adesa wala he miishɛɛ lɛ lolo yɛ ŋaawoo ni ekɛha akɛ ahiɛ “tsui ni mli jɔ” mli, ni atsi he kɛjɛ jeŋba shara he lɛ mli. (Abɛi 14:30; Galatabii 5:19-21) Wɔhe ni wɔkɛkpɛtɛɔ mlai ni nɔ kwɔlɔ nɛɛ ahe lɛ buɔ wɔhe kɛjɛɔ nibii ni tamɔ mlifu ni yeɔ hewalɛnamɔ awui kɛ helai ni anaa kɛjɛɔ bɔlɛnamɔ mli lɛ ahe.
Bɔ ni Yehowa susuɔ ewebii ashihilɛ he lɛ hu jeɔ kpo yɛ kɔkɔ ni ebɔ akɛ akwa fufeemɔ kɛ daatɔɔ lɛ mli. (5 Mose 21:18-21; Abɛi 23:20, 21) Abɔɔ Kristofoi kɔkɔ akɛ hiɛjoolɔi kɛ daatɔlɔi anine shɛŋ Nyɔŋmɔ Maŋtsɛyeli lɛ nɔ, ni ji akɛ, amɛnaŋ anɔkwa wala lɛ mli ŋɔɔmɔ. (1 Korintobii 6:9, 10; 1 Petro 4:3) Akɛni Yehowa woɔ hiɛshikamɔ he hewalɛ hewɔ lɛ, etsɔɔ wɔ nii ni he baaba sɛɛnamɔ aha wɔ diɛŋtsɛ wɔhe.—Yesaia 48:17.
Kɛ wɔhi shi yɛ tɛi ni Nyɔŋmɔ efolɔ eshwie shi lɛ anaa lɛ, wɔtsɔɔ akɛ wɔbuɔ wɔ ŋmɛnɛŋmɛnɛ wala lɛ akɛ ejara wa. Shi, nɔ ni he hiaa fe fɛɛ ji anɔkwa wala lɛ. Akɛni ehiɔ shi kɛyaa naanɔ hewɔ lɛ, anɔkwa Kristofoi buɔ no akɛ ehe hiaa waa fe amɛ ŋmɛnɛŋmɛnɛ wala lɛ. Beni Yesu Kristo kɛ ewala sha afɔle lɛ, eba ehe shi eha Yehowa suɔmɔnaa nii. Toiboo ni eeefee eha e-Tsɛ lɛ tsɔɔ babaoo kɛhaa lɛ fe eshikpɔŋ nɛɛ nɔ wala lɛ. Nɔ ni jɛ gbɛ ni Yesu kɔ lɛ mli ba ji eshitee kɛ wala ni gbele bɛ mli yɛ ŋwɛi, ni enine shɛ nɔ. (Romabii 6:9) Egbele lɛ hu tsɔɔ naanɔ wala kɛhaa adesai toibolɔi ni tsɔɔ hemɔkɛyeli yɛ ekpɔmɔ afɔleshaa lɛ mli lɛ.—Hebribii 5:8, 9; 12:2.
La He Mla ni He Hiaa
Belɛ, anuɔ nɔ hewɔ ni Yesu sɛɛnyiɛlɔi lɛ jieɔ esusumɔ kpo lɛ shishi. Amɛsumɔɔ ni amɛsa Nyɔŋmɔ hiɛ yɛ nibii fɛɛ mli, taakɛ Kristo fee lɛ. Nɔ kome ji akɛ, enɛ tsɔɔ nɔ hewɔ ni amɛkpoɔ la ni agbalaa awoɔ mɔ mli, ni datrɛfoi komɛi tsɛɔ lɛ yiwalaheremɔ nii lɛ. Nyɛhaa wɔkwɛa bɔ ni mɔ ko tsɔɔ akɛ ebuɔ anɔkwa wala lɛ, kɛtsɔ la ni agbalaa awoɔ mɔ mli ni ekpoɔ lɛ nɔ.
Taakɛ Yesu Kristo ji lɛ, anɔkwa Kristofoi miisumɔ ni amɛhi wala mli yɛ Nyɔŋmɔ hiɛ, ni no biɔ toiboo kwraa ni aaafee aha Lɛ. Nyɔŋmɔ Wiemɔ lɛ woɔ Kristo sɛɛnyiɛlɔi lɛ kita akɛ: “Nyɛhi looi ni agbe aha wɔji kɛ la kɛ kooloi ni ashɔ̃tɔ̃ kɛ ajwamaŋbɔɔ.” (Bɔfoi lɛ Asaji 15:28, 29) Mɛni hewɔ akɛ mla ni kɔɔ la he nɛɛ fata kitai ni esa akɛ Kristofoi aye nɔ lɛ ahe lɛ?
Mla ni akɛha Israelbii lɛ biɔ ni amɛtsi amɛhe kɛjɛ la he. (3 Mose 17:13, 14) Kristofoi bɛ Mose Mla lɛ shishi. Shi amɛyɔseɔ akɛ kita ni akɛha akɛ akaye la lɛ yɛ dani Mla lɛ ba; no mli lɛ atsɔ hiɛ akɛha Noa yɛ Nu Afua lɛ sɛɛ. (1 Mose 9:3, 4; Kolosebii 2:13, 14) Nɛkɛ kita nɛɛ kɔɔ Noa seshibii fɛɛ, ni shikpɔŋ nɔ jeŋmaji fɛɛ jɛ amɛmli lɛ ahe. (1 Mose 10:32) Kɛfata he lɛ, Mose Mla lɛ yeɔ ebuaa wɔ ni wɔnaa nɔ hewɔ ni Nyɔŋmɔ maa krɔŋkrɔŋ ni la ji lɛ nɔ mi nakai lɛ. Beni egu Israelbii lɛ akɛ amɛkaye la fɛɛ la sɛɛ lɛ, Nyɔŋmɔ kɛɛ: “Ejaakɛ heloo lɛ wala yɛ ela lɛ mli, ni mi lɛ miŋɔha nyɛ yɛ afɔleshaa latɛ lɛ nɔ, koni aŋɔkpata aha nyɛ susumai lɛ; ejaakɛ la akɛkpataa ahaa susuma.” (3 Mose 17:11) Nyɔŋmɔ saa la lɛ eto koni akɛsha afɔle yɛ afɔleshaa latɛ lɛ nɔ. E-mla ni kɔɔ krɔŋkrɔŋ ni la ji he lɛ jieɔ hegbɛ ni eyɔɔ yɛ wala fɛɛ ni yɔɔ shikpɔŋ nɔ lɛ anɔ lɛ kpo. (Ezekiel 18:4; Kpojiemɔ 4:11) Akɛni wɔmiina wɔ wala yɛ bɔ ni Yehowa kwɛɔ nii ehaa lɛ naa hewɔ lɛ, wɔyɔseɔ akɛ jeee wɔnii ni, shi moŋ Nyɔŋmɔ kɛwo wɔdɛŋ kɛkɛ.
Taakɛ tsɔne he nitsulɔ ni yɔɔ wɔ nɔkwɛmɔ nɔ lɛ mli lɛ ji mɔ ni akɛ tsɔne lɛ ewo edɛŋ lɛ, akɛ wɔ ŋmɛnɛŋmɛnɛ wala lɛ ewo wɔdɛŋ. Mɛni obaafee kɛ eebi ni asaa otsɔne lɛ, ni tsɔne saalɔ ko wo ŋaa akɛ okɛ tsɔnei ahe nibii komɛi ni mɛi ni fee tsɔne lɛ eje gbɛ egu yɛ ehe wolo lɛ mli akɛ akɛkatsu nii afee? Ani obiŋ tsɔnei ahe nitsulɔi krokomɛi ajwɛŋmɔ koni ona kɛ abaanyɛ asaa tsɔne lɛ yɛ bɔ ni ehe wolo lɛ etsɔɔ lɛ naa lo? Adesa wala he hiaa waa ni eyɛ hwanyaŋŋ kwraa fe tsɔne. Wɔ Feelɔ lɛ guɔ la ni akɛaatsu nii ni akɛbaa wala yi, yɛ e-Wiemɔ ni jɛ mumɔŋ, ni ji wolo ni baaha adesai ahi wala mli lɛ mli. (5 Mose 32:46, 47; Filipibii 2:16) Ani shishinumɔ bɛ mli ákɛ, akɛ he aaakpɛtɛ nakai wolo lɛ mli taomɔ nii ahe?
Yɛ anɔkwale mli lɛ, jeee akɛ helatsɛmɛi Kristofoi, ni biɔ ni akɛ tsofa ni la bɛ mli atsu amɛhe nii lɛ miikpoo tsofai fɛɛ ni akɛaaha amɛ. Nɔ ni amɛbiɔ kɛkɛ ji tsofafeemɔ ni kɛ bulɛ baaha amɛ wala—ŋmɛnɛŋmɛnɛ kɛ wɔsɛɛ be mli nɔ̃ fɛɛ. Datrɛfoi ni kɛ bulɛ haa shidaamɔ ni Kristofoi lɛ ekɔ, yɛ ekãa naa lɛ, yeɔ sɛɛnamɔi ni jɛɔ amɛ tsofafeemɔ ni kɛ amɛ nibimɔ lɛ kpaa gbee lɛ mli baa lɛ he odase. Datrɛfonyo ko ni feɔ opireshɛn ni tsutsu lɛ ekɛ la haa mɛi waa lɛ kɛɛ: “Yehowa Odasefoi ni mikɛ amɛ kpe lɛ ha miyana nibii heei ni sɛɛnamɔ yɔɔ he waa.” Amrɔ nɛɛ ebɔɔ mɔdɛŋ etsaa mɛi ni jeee Odasefoi lɛ po helai ni ekɛ la tsuuu nii.
Anɔkwa Wala lɛ ni Wɔɔmɔ Mli Tamɔ Jwetri
Mɛni ji nibii heei ni sɛɛnamɔ yɔɔ he waa ni datrɛfonyo ni feɔ opireshɛn nɛɛ na kɛtsɔ tsofa ni efee Yehowa Odasefoi lɛ nɔ lɛ? Eyɔseɔ bianɛ akɛ tsofa ni eeefee helatsɛ ko lɛ kɔɔɔ gbɔmɔtso lɛ fa ni hela yɔɔ jɛmɛ lɛ pɛ he, shi moŋ ekɔɔ gbɔmɔ muu lɛ fɛɛ he. Ani esaaa akɛ aŋmɛɔ helatsɛ lɛ gbɛ koni ebi ni akɛ kwɛmɔ ni hi fe fɛɛ aha egbɔmɔtso, mumɔŋ kɛ henumɔŋ hilɛ-kɛhamɔ?
Kɛha Kumiko ni eye afii 15 lɛ, la ni akɛaaha lɛ ni akɛtsa ela mli hela ko ni gbeɔ mɔ lɛ ji nihalamɔ ko ni ehiii fe fɛɛ ni eeehala. Ni eeebɔ mɔdɛŋ akɛ eeeha ewala sɛɛ akɛ kɛtsɔ nɛkɛ gbɛ nɔ otsii, nyɔji, loo afii fioo lɛ esaaa nɔ ni eeelaaje yɛ naagbee lɛ kwraa. Akɛni ejɔɔ eŋmɛnɛŋmɛnɛ wala lɛ nɔ eha Yehowa Nyɔŋmɔ, akɛ e-Dasefoi lɛ ateŋ mɔ kome hewɔ lɛ, ekɛ bulɛ ha krɔŋkrɔŋ ni wala kɛ la ji lɛ. Eyɛ mli akɛ etsɛ kɛ wekumɛi krokomɛi te shi wo lɛ waa yɛ eshidaamɔ lɛ hewɔ moŋ, shi Kumiko damɔ shi shiŋŋ. Datrɛfonyo ni kwɛɔ lɛ lɛ bi lɛ be ko akɛ: “Kɛji akɛ o-Nyɔŋmɔ lɛ kɛfaa mɛi ni tɔ̃ɔ lɛ, ani ekɛfaŋ bo kɛ oha akɛ la po ha bo?” Kumiko kpoo saji ahe ni eeeŋmɛɛ koni ekɛkwa ehemɔkɛyeli ni damɔ Biblia nɔ lɛ. Akɛni ‘emɔ wala wiemɔ lɛ mli kpɛŋŋ’ hewɔ lɛ, edamɔ eshidaamɔ he lɛ. (Filipibii 2:16) Taakɛ enaa ni heee yeee lɛ kɛɛ lɛ, “Kumiko eŋmɛŋ ehemɔkɛyeli lɛ he.” Etsɛɛɛ ni su ni etsɛ kɛ enaa kɛ agbɛnɛ datrɛfoi ni kwɛɔ lɛ lɛ hiɛ lɛ tsake.
Hemɔkɛyeli ni mli wa ni Kumiko yɔɔ yɛ Yehowa Nyɔŋmɔ, ni baanyɛ atee lɛ shi kɛjɛ gbohii ateŋ lɛ mli lɛ, sa mɛi pii atsui he. Beni eyɔɔ wala mli lolo lɛ, ekpa etsɛ fai kɛ yiŋtsɔmɔ akɛ: “Kɛji akɛ migbo po lɛ, abaatee mi shi yɛ Paradeiso. Shi kɛ akpata ohiɛ yɛ Harmagedon lɛ, minaŋ bo. No hewɔ lɛ, ofainɛ, kasemɔ Biblia lɛ.” Nɔ ni etsɛ lɛ tee nɔ ewie ji akɛ: “Kɛ ohe wa bo lɛ, mafee nakai.” Shi beni Kumiko hela ni eŋmɛɛɛ ehe lɛ gbe lɛ lɛ, etsɛ kɛ wolo ko ni eŋma, wo egbonyo adeka lɛ mli, ni ekaneɔ akɛ: “Kumiko, mana bo yɛ Paradeiso.” Yɛ yarafeemɔ lɛ sɛɛ lɛ, ekɛ mɛi ni ba yarafeemɔ lɛ shishi lɛ wie, ni ekɛɛ: “Miwo Kumiko shi akɛ, mana lɛ yɛ Paradeiso. Eyɛ mli akɛ minyɛɛɛ mahe maye lolo ejaakɛ mikaseko nii babaoo moŋ, shi, mitswa mifai shi akɛ makwɛ mli jogbaŋŋ. Nyɛfainɛ nyɛyea nyɛbuaa mi.” Eweku lɛ mlibii krokomɛi hu je Biblia lɛ kasemɔ shishi.
Kumiko yɛ bulɛ diɛŋtsɛ kɛha wala, ni eesumɔ ni ehi wala mli. Ehiɛ sɔ nibii fɛɛ ni edatrɛfoi lɛ fee koni amɛkɛhere eŋmɛnɛŋmɛnɛ be nɛɛ mli wala lɛ. Shi, akɛni ekɛ famɔi ni yɔɔ Bɔlɔ lɛ wolo lɛ mli lɛ tsu nii hewɔ lɛ, eye odase ekɛtsɔɔ akɛ ebuɔ anɔkwa wala diɛŋtsɛ lɛ. Kɛha akpekpei abɔ lɛ, enɛ baafee naanɔ wala yɛ paradeiso shikpɔŋ nɔ. Ani obaafee mɔ ni fata amɛhe?