Namɛi Diɛŋtsɛ Ji Nyɔŋmɔ Sɔɔlɔi
“YƐ NƐKƐ ŋmɛlɛtswaa ni akɛkpɛɔ yiŋ nɛɛ mli lɛ,wɔmiiwo wɔ Katolek asraafoi lɛ ŋaa ni amɛtsu amɛ nitsumɔ lɛ ni amɛkɛbo Hiɛnyiɛlɔ [Hitler] toi.”—Germany Katolek osɔfonukpai,taakɛ The New York Times, September 25, 1939 nɔ lɛ ŋma yɛ amɛhe lɛ.
“Ani ole sane ko, osɔfo, wɔ asraafoi ni yɔɔ wɔ tawuu kɔɔyɔɔŋ lɛlɛ nɛɛ mli lɛ ateŋ mɔ kome ji Katolek nyo, no hewɔ lɛ jɔɔmɔ lɛ dani wɔje okpɛlɛmii ni wɔyaa wɔyatswia wɔshwie Germany nɔ lɛ shishi. Agbɛnɛ, nakai Katolek jamɔ ni yɔɔ Germany lɛ nɔŋŋ miijɔɔ Katolek nyo ko ni ji German tawuu kɔɔyɔɔŋ lɛlɛ mli nyo ni kɛ kɔɔyɔɔŋ lɛlɛ baa ebakpata wɔ maŋtiasei lɛ ahiɛ lɛ. No hewɔ lɛ sane ni mibiɔ ji akɛ, ‘Namɔ gbɛfaŋ Nyɔŋmɔ yɔɔ?’” Nɛkɛ ji bɔ ni Ŋleshi kɔɔyɔɔŋ lɛlɛ mli nyo, David Walker kɛ Katolek osɔfo ko gba sane yɛ Jeŋ Ta II be lɛ mli.
Nɔ ni tamɔɔɔ enɛ lɛ, Yehowa Odasefoi akpei abɔ hi Nazi gbokɛlɛfoi aŋsrai ni mli yɔɔ gbeyei lɛ amli afii pii akɛni amɛkpoo akɛ amɛaajie Hitler yi aloo ni amɛaafata esraafoi lɛ ahe amɛwuu lɛ hewɔ. Yɛ maji krokomɛi ni kɛ Germany wuuɔ lɛ amli hu lɛ, awo Odasefoi babaoo tsuŋ akɛni amɛkpoo akɛ amɛkɛ amɛhe aaawo tawuu lɛ mli lɛ hewɔ.
Namɛi ji Nyɔŋmɔ anɔkwa sɔɔlɔi lɛ, ni mɛɛ taomɔ nii esa akɛ ana yɛ amɛhe.
Biblia Mli Hemɔkɛyeli
Esa akɛ Nyɔŋmɔ anɔkwa sɔɔlɔ lɛ ana hemɔkɛyeli ni ma shi shiŋŋ yɛ Biblia lɛ mli. Esa akɛ ele enɛ hu jogbaŋŋ bɔni afee ni enyɛ etsɔɔ mɛi krokomɛi Shi anaaa nɛkɛ shishijee taomɔ nii nɛɛ yɛ Kristendom osɔfoi lɛ pii ahe. Datrɛfonyo ko ni feɔ mɛi atsofa yɛ South Africa lɛ jaje akɛ Anglican Sɔlemɔ lɛ ni tsutsu ko lɛ efata amɛhe lɛ amli osɔfoi lɛ kɛ Biblia lɛ tsuɔ nii “yɛ gbɛ bibioo pɛ nɔ,” ni shiɛmɔ wiemɔi lɛ tamɔ shiɛlɔ lɛ diɛŋtsɛ yiŋsusumɔ. Agbɛnɛ ewie eshi osɔfoi tamɔ Osɔfonukpa Tutu ni jɛ Cape Town lɛ yɛ ehe ni ekɛwo maŋkwramɔŋ lɛ hewɔ.
Nɔ ni tamɔɔɔ enɛ lɛ, Yehowa tsuji anɔkwafoi lɛ heɔ Biblia lɛ amɛyeɔ diɛŋtsɛ ni amɛkɛ be babaoo kaseɔ enɛ ni amɛkɛtsɔɔ mli amɛhaa mɛi krokomɛi. Bɔ ni amɛ miishɛɛ kɛ suɔmɔ ni amɛyɔɔ amɛhaa Biblia lɛ mli kwɔ sɔŋŋ ha hewɔ lɛ amɛpɛi Biblia lɛ mli jogbaŋŋ ni amɛfee shishitsɔɔmɔ ko ni yaa trɔmɔɔ ni atsɛɔ lɛ New World Translation of the Holy Scriptures, ni damɔ shishijee Hebri, Aramaic kɛ Hela Biblia ni akɛ niji ŋmala lɛ anɔ. Nɛkɛ Biblia nɛɛ hiɛ afa gbɛ niŋmaai kɛ ŋmalɛi krokomɛi ni atsɛ yisɛɛ kɛtee nɔ yɛ efa ni ji Reference Edition lɛ mli koni eye ebua nikanelɔi lɛ ni amɛnu Biblia lɛ shishi jogbaŋŋ ni amɛnyɛ amɛtsɔɔ mli amɛha mɛi krokomɛi. Agbɛnɛ, atsɔɔ nɛkɛ Biblia ni ekaaa nɛɛ fɛɛ loo efai komɛi ashishi kɛtee wiemɔi krokomɛi 10 mli, ni aja enɛ akpekpei nyɔŋmai abɔ yɛ jeŋ fɛɛ.
Anɔkwa Sɔɔlɔi Kɛ Jeŋba Kpakpa
Biblia lɛ wieɔ shiɔ bɔlɛnamɔ mli eshafeemɔi sɔrɔtoi fɛɛ—ni gbalafitemɔ, ajwamaŋbɔɔ, hii kɛ hii ni kɛ amɛhe feɔ yakayaka nii kɛ kooloi ni akɛ amɛ feɔ yakayaka nii fata he. (3 Mose 20:10-13; Romabii 1:26, 27; Galatabii 5:19) Anɔkwa sɔɔlɔi ni ji Kristofoi jɛɔ amɛtsui muu fɛɛ mli amɛfiɔ Nyɔŋmɔ tɛi ni efolɔ eshwie shi yɛ jeŋba he lɛ sɛɛ. Hɛɛ, Yehowa Odasefoi ŋɔɔ Nyɔŋmɔ mla lɛ akɛ eji hiɛdɔɔ sane diɛŋtsɛ. Amɛshwieɔ mɛi ni feɔ esha ni tamɔ nɛkɛ ni amɛtsakeee amɛtsui lɛ kɛjɛɔ amɛ asafoi amli, ni amɛjieɔ mɔbɔnalɛ kpo amɛtsɔɔ mɛi ni tsakeɔ amɛtsui diɛŋtsɛ yɛ nɛkɛ jeŋbai gbohii nɛɛ ahe ni amɛjajeɔ amɛ shihilɛi lɛ.—1 Korintobii 5:11-13; 2 Korintobii 2:5-8.
Abɔɔ amaniɛ akɛ, yɛ South Africa lɛ, Anglican osɔfonukpa ko ni yɔɔ Cape Town lɛ kɛɛ: “Hii kɛ hii loo yei kɛ yei ni kɛ amɛhe naa bɔlɛ lɛ ekomɛi hi fe nuu kɛ yoo bɔlɛnamɔ ni ato ni afeɔ lɛ kɛ agbɛnɛ yɛ suɔmɔ ni yɔɔ mli lɛ hewɔ, ni miyɛ nɔmimaa akɛ amɛhaa Nyɔŋmɔ naa miishɛɛ.” Nɔ ni tamɔɔɔ nakai moŋ ji anɔkwale. Nyɔŋmɔ hiɔ bɔlɛnamɔ ni tamɔ nɛkɛ.—1 Korintobii 6:9, 10.
Anɔkwa Sɔɔlɔi Tsɔɔ Anɔkwa Tsɔɔmɔi
Anɔkwa sɔɔlɔi tsɔɔ tsɔɔmɔi ni damɔ Nyɔŋmɔ Wiemɔ lɛ nɔ shiŋŋ. Apasa sɔɔlɔi tsɔɔ tsɔɔmɔi ni bɛ sɛɛfimɔ loo shishitoo yɛ Biblia lɛ mli.Akɛ nɔkwɛmɔ nɔ lɛ, susumɔ Triniti tsɔɔmɔ lɛ he. Taakɛ The Encyclopædia Britannica (15th Edition) lɛ jaje lɛ: “Wiemɔ Trinity lɛ loo etsɔɔmɔ bɛ kpaŋmɔ hee lɛ mli, ni asaŋ Yesu kɛ esɛɛnyiɛlɔi lɛ etooo amɛyiŋ akɛ amɛaate shi amɛwo Shema ni yɔɔ Kpaŋmɔ Momo lɛ mli lɛ: ‘Bo toi O Israel: Nuŋtsɔ wɔ-Nyɔŋmɔ lɛ, Nuŋtsɔ kome ni’ (5 Mose 6:4) . “Triniti lɛ ebatsɔɔɔ sɔlemɔ lɛ tsɔɔmɔ titri aahu kɛbashi afii ohai ejwɛ Ŋ.B. lɛ mli yɛ Roma Maŋtsɛ Konstantino gbii lɛ amli. Yɛ anɔkwale mli lɛ, yɛ gbɛi ni ena lɛ kɛ hewalɛ ni enaa yɛ mɛi anɔ lɛ nɔ atsɔ ni Nikaea Gwabɔɔ ni kpe yɛ 325 Ŋ.B. lɛ kpɛlɛ nɛkɛ apasa tsɔɔmɔ nɛɛ nɔ.
Triniti tsɔɔmɔ lɛ eha sɔlemɔyalɔi pii, anɔkwafoi ni taoɔ anɔkwale lɛ ateŋ mɛi pii elaaje hekɛnɔfɔɔ ni amɛyɔɔ yɛ amɛ sɔɔlɔi lɛ amli. Enɛ ji anɔkwale yɛ obalayoo ko ni yɔɔ South Africa ni heee yeee akɛ ejamɔ lɛ, ni ji Dutch Reformed Church lɛ tsɔɔ tsɔɔmɔ ni mɔ yiŋ futuɔ lɛ tamɔ Triniti nɛɛ aahu kɛyashi be ni Yehowa Odasefoi kɛ odaseyelii ni je woji amli ha lɛ akɛ nakai pɛ sane lɛ ji! Mlalelɔ ni ekpa nitsumɔ yɛ dalɛ hewɔ ni lɛ hu ejɛ South Africa lɛ shi esɔlemɔ lɛ ejaakɛ “amɛtsɔɔmɔi babaoo ni akaa yiŋ atsɔɔ yɛ sɔlemɔ lɛ mli lɛ ejaaa ni amɛlakaa mɔ.”
Kristendom tsɔɔmɔ kroko ni ji apasa nɔ hu ji hɛl la lɛ. Eyɛ mli akɛ atsɔɔɔ enɛ pii loo aheee ayeee pii taakɛ tsutsu lɛ afeɔ lɛ moŋ,shi eji sɔlemɔi pii atsɔɔmɔ titri. Mɛnɛɛmɛi kɛɔ akɛ kɛ gbele ba lɛ, gbɔmɔtso lɛ gboɔ shi susuma lɛ, akɛni egbooo hewɔ lɛ, eyaa nɔ ehiɔ shi, ni apiŋɔ mɛi ni eba jeŋba gbonyo lɛ yɛ la ni tsoɔ mli kɛyaa naanɔi anaanɔ.Ani oheɔ enɛ oyeɔ? Nɔ ni he hiaa titri lɛ, ani eji anɔkwale. Belɛ jeee taakɛ Biblia lɛ tsɔɔ lɛ, ni kɛɔ akɛ: “Susuma ni feɔ esha lɛ—lɛ nɔŋŋ eeegbo.” (Ezekiel 18:4, 20) Agbɛnɛ, bɔfo Paulo ni mumɔ yɔɔ enɔ lɛ ŋma akɛ: “Esha dɛŋ nyɔmɔwoo lɛ gbele ni”—jeee hɛl la!—Romabii 6:23.
Agbɛnɛ nyɛhaa wɔsusua tɛi ni esa akɛ Kristofoi anɔkwale sɔɔlɔi ashɛ he lɛ ahe.
Anɔkwa Sɔɔlɔi Aŋmalɛ Naa Taomɔ Nii
Ŋleshi wiemɔ “minister” lɛ ji shishitsɔɔmɔ ko ni ana kɛjɛ Hela wiemɔ “di·aʹko·nos,” ni eshishijee bɛ faŋŋ lɛ mli. Ekɔɔ mɔ ni tsuɔ mɔ kroko famɔi ahe nii lɛ he, titri lɛ mɔ ni ji nuŋtsɔ lɛ famɔi ahe nii. No hewɔ lɛ, Biblia mli wiemɔ lɛ wieɔ tsulɔ he pɔtɛɛ. Bɔ ni akɛtsuɔ nii yɛ Biblia lɛ mli lɛ tsɔɔ mɔ ni eŋmɛɛɛ heshibaa mli ni ejɛɔ esɔmɔɔ mɛi krokomɛi lɛ he. Yesu ma nɛkɛ heshibaa sɔɔmɔ nɛɛ nɔ mi, taakɛ nɔkwɛmɔ nɔ ni nyiɛ sɛɛ nɛɛ tsɔɔ lɛ.
Gbi ko, beni eshwɛ fioo ni Yesu baagbo yɛ sɛŋmɔtso nɔ lɛ, Yakobo kɛ Yohane nyɛ ba eŋɔɔ ni ebakɛɛ: “Kɛɛmɔ ni mibii enyɔ nɛɛ ateŋ mɔ kome ata oninejurɔ nɔ, ni mɔ kome hu ata obɛku nɔ yɛ omaŋtsɛyeli lɛ mli.” Kaselɔi krokomɛi lɛ amli fu yɛ nɛkɛ sane nɛɛ he. Kɛkɛ ni Yesu kɛ mlihilɛ tsɔɔ amɛ nikasemɔ ko ni he hiaa. Ebua amɛ naa yɛ he kome ni ekɛɛ: “Mɔ fɛɛ mɔ ni sumɔɔ akɛ etsɔ agbo yɛ nyɛteŋ lɛ, lɛ moŋ etsɔ nyɛ sɔɔlɔ. Ni mɔ fɛɛ mɔ ni sumɔɔ akɛ etsɔ onukpa yɛ nyɛteŋ lɛ, lɛ moŋ etsɔ nyɛ tsulɔ.”—Mateo 20:20, 21, 24-27.
Yesu bɔ etoibolɔi lɛ kɔkɔ yɛ woloŋmalɔi lɛ kɛ Farisifoi lɛ ahe yɛ emaŋshiɛmɔi ni aŋmala ni tswaa mɔ emaa shi lɛ ekome mli. Agbɛnɛ hu etsɔɔ nɛkɛ apasa, osato sɔɔlɔi nɛɛ atɔmɔi lɛ ekomɛi yɛ faŋŋ mli. Etsɔɔ akɛ amɛwoɔ amɛhe nɔ waa ni amɛbiɔ ni afee nii aha amɛ, ni amɛsumɔɔ gbɛhei ni nɔ kwɔlɔ.—Mateo 23:1-7.
Ŋmɛnɛ, titri lɛ Katolek Sɔlemɔ lɛ mli osɔfoi, kɛ agbɛnɛ hei komɛi lɛ, Anglican osɔfoi lɛ babaoo biɔ akɛ atsɛ amɛ akɛ “Father.” Akɛ nɔkwɛmɔ nɔ lɛ, Church of England osɔfo ko ni yɔɔ Mozambique lɛ ha sanebimɔ ko hetoo afii babaoo ni eho nɛ yɛ be mli ni Yehowa Odasefoi lɛ ateŋ mɔ ko bi lɛ nɔ hewɔ ni ekɛ sabla “Father” lɛ tsuɔ nii lɛ. Eha hetoo akɛ: “Mipupuɔ mihe yɛ he!” Ni eka shi faŋŋ hu akɛ Roma paapa lɛ nyaa bɔ ni atsɛɔ lɛ akɛ “Holy Father” (Tsɛ Krɔŋkrɔŋ) lɛ he—yɛ Yesu famɔ ni ekɛha ekaselɔi lɛ akɛ “ni nyɛkatsea mɔ ko nyɛtsɛ hu yɛ shikpɔŋ lɛ nɔ; ejaakɛ mɔ kome ji nyɛ-Tsɛ, mɔ ni yɔɔ ŋwɛi lɛ” fɛɛ sɛɛ. Yesu kɛ nɛkɛ shishitoo mla nɛɛ fata he: “Ni mɔ fɛɛ mɔ ni aaawo ehe nɔ lɛ, aaaba lɛ shi.”—Mateo 23:9-12.
Ani Esa Akɛ Ahala Yei Akɛ Osɔfoi?
Yei ni ahalaa amɛ akɛ osɔfoi yɛ nyɛsɛɛ bei nɛɛ amli lɛ ayi efa. Shi Paulo fa Timoteo akɛ: “Shi mihaaa yoo hegbɛ akɛ etsɔɔ nii aloo eye nuu nɔ.” (1 Timoteo 2:12) Shi, enɛ etsɔɔɔ akɛ Kristofonyo yoo nyɛŋ atsɔɔ ebii anii aloo ni eeetsɔɔ gbɔmɛi krokomɛi anii, shi moŋ ekatsɔɔ nii yɛ asafo lɛ mli.
Ani no tsɔɔ akɛ esaaa akɛ yei wieɔ yɛ Kristofoi akpeei ashishi? Yehowa Odasefoi kaseɔ wolo tɛtrɛɛ nɛɛ, Buu-Mɔɔ lɛ, yɛ amɛ daa otsi kpeei lɛ ekome shishi, ni akɛ saji ni akɛ sanebimɔi ehɔlɔ kuku fɛɛ kuku shishi feɔ. Sɔɔlɔ lɛ ni kwɛɔ nikasemɔ nɛɛ nɔ ni be fɛɛ be lɛ eji nyɛminuu lɛ, tsɛɔ asafo lɛ mli bii lɛ, ni nyɛmimɛi yei fata he, ni amɛha sanebimɔi nɛɛ ahetoo. Shi yei nɛɛ etsɔɔɔ nii. Amɛmiitsɔɔ susumɔi ni yɔɔ sane lɛ mli lɛ yɛ amɛ diɛŋtsɛ amɛ wiemɔi amli. Awoɔ gbekɛbii ahewalɛ po ni amɛha hetoo, ni yɛ bei babaoo mli lɛ, amɛ hetoo, ni yɔɔ kuku ni mli ka shi lɛ, feɔ anɔkwale aloo eŋɔɔ toi naa—kɛ wɔɔwie lɛ yɛ nakai gbɛ nɔ lɛ.
Paulo hu wie nɛkɛ yɛ yei ahe: “Shi kɛ amɛmiisumɔ ni amɛkase nɔ ko lɛ, amɛbi amɛ diɛŋtsɛ amɛwumɛi yɛ shia. Ejaakɛ eyɛ hiɛgbele ha yei akɛ amɛaawie yɛ asafo mli.” (1 Korintobii 14:35) Enɛ tsɔɔ akɛ kɛji akɛ nyɛmimɛi yei lɛ nuuu nɔ ko shishi aloo amɛkane sane ko loo awie nɔ ko yɛ kpeei ashishi ni amɛnuuu shishi lɛ, esaaa akɛ amɛteɔ bei ashi yɛ asafo lɛ mli. Shi moŋ, amɛbi amɛwumɛi ni amɛtsɔɔ saji lɛ amli faŋŋ amɛha amɛ yɛ shia.
Shi, bei komɛi yɛ ni Kristofoi yei baanyɛ ashiɛ aha hii. Yehowa Odasefoi kɛ bei babaoo shiɛɔ Maŋtsɛyeli lɛ he sanekpakpa lɛ yɛ shia-kɛ-shia. Kɛ yoo shiɛlɔ ko kɛ nuu kpe lɛ, ani esa akɛ ejie enaa ni eho ehe eya? Dabida. Yɛ enɛ mli lɛ, eshiɛɛɛ ehaaa asafo shi moŋ gbɔmɔ kome ni ekolɛ eheee eyeee.Nakai nɔŋŋ hu sɔɔlɔ ko ni ji yoo baanyɛ ekɛ weku ko ni jeee Kristofoi akase Biblia lɛ yɛ be mli ni tsɛ lɛ po yɔɔ jɛmɛ.
Yesu Kristo—Nɔkwɛmɔ Nɔ Fɛfɛo
Yesu ji nɔkwɛmɔ nɔ fɛfɛo ni wɔ fɛɛ wɔɔfee jogbaŋŋ akɛ wɔɔbɔ mɔdɛŋ wɔkase lɛ! Lɛ ji tsɔɔlɔ ni hi fe fɛɛ, tsɔɔlɔ kpakpa, nitsulɔ ni yɔɔ ekaa fe fɛɛ, kɛ ŋaawolɔ ni yɔɔ suɔmɔ fe fɛɛ ni ehi shikpɔŋ nɛɛ nɔ. Ni mɔ ko aaanyiɛ enanemaahei lɛ asɛɛ lɛ ji hegbɛ kpele diɛŋtsɛ. Ani oobɔ mɔdɛŋ ni ofee nakai?
Yehowa Odasefoi akpekpei abɔ miibɔ mɔdɛŋ ni amɛfee nɔ fɛɛ nɔ ni amɛaanyɛ ni amɛkase lɛ, tsɛbelɛ amɛyeee emuu. Egbɛi lɛ yɛ sɔrɔto kwraa yɛ osɔfoi ni yɔɔ shihilɛ mli ŋmɛnɛ lɛ babaoo nɔ he. Etswaaa sɔlemɔ ŋmɛlɛ ni emɛ koni gbɔmɛi aba eŋɔɔ, eyɛ mli akɛ mɛi pii jɛ amɛsuɔmɔ mli amɛba eŋɔɔ. Shi moŋ, etee gbɔmɛi lɛ aŋɔɔ ni etsɔɔ amɛ nii yɛ amɛshiai amli, yɛ jarawoo hei, yɛ gɔji anɔ, ni yɛ Galilea Ŋshɔ lɛ naa. Yɛ bei komɛi amli lɛ ewieɔ etsɔɔ kui ni shɛɔ akpei abɔ, taakɛ nɔkwɛmɔ nɔ ni yɔɔ shishigbɛ nɛɛ tsɔɔ lɛ.—Mateo 9:35; 13:36; Luka 8:1.
Yelikɛbuamɔ Ni Akɛaaha Ohiafoi, Helatsɛmɛi, Kɛ Mɛi Ni Amɛdara Yɛ Afii Amli
Mɛnɛɛmɛi ateŋ mɛi enyiɛ yɔɔ ŋmɛnɛ? Akpekpei ohai abɔ. Ni yibɔ lɛ miiya hiɛ kɛ foi yɛ be mli ni jeŋ shihilɛ yaa nɔ efiteɔ ni ŋmɛnɛŋmɛnɛ nibii agbɛjianɔtoo nɛɛ bɛŋkɛɔ enaagbee kwraa yɛ Harmagedon ta lɛ he lɛ. (Kpojiemɔ 16:16) Adebɔɔ mli osharai, hɔmɔ, kɛ tsɛŋemɔ helai kɛ eko fataa nifitemɔ kɛ piŋmɔ lɛ he. Mra be mli Kristofoi lɛ hu kɛ naagba nɛɛ kpe. Aaafee afi 46 Ŋ.B. lɛ, beni Klaudio ji Roma maŋtsɛ lɛ, hɔmɔ kpeteŋkpele ko ba he fɛɛ he. No hewɔ lɛ mɛni ji nɔ ni kaselɔi lɛ fee? “Kaselɔi lɛ kpɛ mli akɛ amɛaatsu nɔ ko amɛmaje nyɛmimɛi ni yɔɔ Yudea lɛ ni amɛkɛyafɛne amɛ, mɔ fɛɛ mɔ bɔ ni ooonyɛ.”—Bɔfoi lɛ Asaji 11:27-30.
Yɛ ŋmɛnɛŋmɛnɛ beaŋ lɛ, Yehowa Odasefoi kɛ nibii majeɔ mɛi ni naa amanehulu loo ehia amɛ lɛ. Nyɛsɛɛ nɛɛ, beni maŋ ta fɛ yɛ Mozambique—ni nɔ ni jɛ mli ba ji hɔmɔ ni naa wa, kɛ hehaa nɔ ni anaaa, tsofai ni anaaa kɛ hiamɔ nibii krokomɛi lɛ—Yehowa Odasefoi ni yɔɔ South Africa ni bɛŋkɛ amɛ lɛ baye bua amɛnyɛmimɛi ni efi amɛ nɛɛ. Amɛkɛ niyenii, atadei, kɛ nibii krokomɛi babaoo ni amɛbua naa maje kɛtee Maputo, maŋ lɛ maŋtiase lɛ mli, kɛ lɔlei wuji.
Biblia Gbalɛ Ni Ahaa Ebaa Mli
Hɛɛ, Nyɔŋmɔ anɔkwa sɔɔlɔi ni yɔɔ ŋmɛnɛ lɛ yɛ hegbɛ ko ni yɔɔ naakpɛɛ yɛ Biblia gbalɛi amlibaa ni amɛnaa mli gbɛfaŋnɔ lɛ hewɔ. Yɛ mɛɛ gbɛ nɔ? Yɛ be ni fee yinɔsane yɛ be mli ni kaselɔi lɛ bi Yesu sane ni tamɔ nɛkɛ lɛ: ”Tsɔɔmɔ wɔ beyinɔ ni aaafee nii nɛɛ, ni mɛni ji obaa lɛ kɛ je nɛŋ naagbee lɛ he okadi?” lɛ, eha hetoo akɛ yɛ jeŋ tai, hɔmɔ, shikpɔŋhosomɔ kɛ mlakwamɔ gbii lɛ amli lɛ, “aaashiɛ maŋtsɛyeli lɛ he sanekpakpa nɛɛ atsɔɔ je nɛŋ fɛɛ.” (Mateo 24:3, 14) Paulo to okadi eha anɔkwa sɔɔlɔi fɛɛ kɛtsɔ ‘shia-kɛ-shia’ shiɛmɔ nɔ.—Bɔfoi lɛ Asaji 20:20.
Ale Yehowa Odasefoi yɛ jeŋ fɛɛ yɛ ekaa ni amɛkɛshiɛɔ lɛ hewɔ. Ekolɛ amɛba oshia yɛ bei komɛi amli. Ani oboɔ amɛ toi jogbaŋŋ? Kɛ jeee nakai lɛ, mɛni hewɔ ofeee nakai kɛ amɛba jɛmɛ be kroko? Onaa baakpɛ ohe diɛŋtsɛ!
[He ni Mfoniri ni yɔɔ baafa 4 lɛ Jɛ]
Based on U.S. Army photo