Ani Oobɔ Mɔdɛŋ Ni Oshɛ He?

“Kɛji mɔ ko miibɔ mɔdɛŋ ni eshɛ nɔkwɛmɔ nitsumɔ he lɛ, eetao nitsumɔ kpakpa.”​—1 TIMOTEO 3:​1, New World Translation.

 1. Mɛɛ oti ko ni he hiaa fe fɛɛ Yehowa Odasefoi kɛmaa amɛhiɛ akɛ amɛaashɛ he?

YEHOWA ODASEFOI kɛ otii kpakpai ni akudɔɔ ni atsuɔ he nii yɛ Nyɔŋmɔ jamɔ gbɛ nɔ hu lɛ mamɔɔ amɛhiɛ. Akɛni amɛ-Nyɔŋmɔ lɛ yɔɔ otii ni nɔ kwɔlɔ ni etsuɔ eyiŋtoi ahe nii hu be fɛɛ be hewɔ lɛ, enɛ jeee naakpɛɛ nɔ ko. (Yesaia 55:​8-11) Esaaa ni Yehowa tsuji feɔ tamɔ nakai gbɔmɛi ni bɛ oti kpakpa ko ni ma amɛhiɛ ni amɛtsɔɔ shihilɛ mli kɛkɛ ni amɛfeɔ nɔ ko bibioo pɛ ni he baaa sɛɛnamɔ kɛhaaa mɔ ko mɔ ko akɛ ja amɛ pɛ lɛ. Nɔ ni he hiaa Nyɔŋmɔ Odasefoi fe fɛɛ ji oti ni nɔ kwɔ waa ni ji Maŋtsɛyeli shɛɛ sane lɛ ni amɛaajaje ni amɛkɛ mɛi krokomɛi aja Nyɔŋmɔ Wiemɔ lɛ mli nilee ni haa mɔ wala lɛ.​—Lala 119:105; Marko 13:​10; Yohane 17:⁠3.

 2. Mɛɛ oti ko ni sa akɛ Kristofoi bii kɛma amɛhiɛ Paulo tsi ta yɛ 1 Timoteo 3:⁠1?

² Otii krokomɛi hu ni nɔ kwɔlɔ yɛ Yehowa gbɛjianɔtoo lɛ mli. Bɔfo Paulo tsi amɛteŋ ekome ta yɛ be mli ni eŋma akɛ: “Anɔkwa wiemɔi nɛ: Kɛji mɔ ko miibɔ mɔdɛŋ ni eshɛ nɔkwɛmɔ nitsumɔ he lɛ, eetao nitsumɔ kpakpa.” Gbɔmɔ ni tamɔ nɛkɛ lɛ miitao atsu nɔ kpakpa ni baaha ahi aha mɛi krokomɛi. Eetao “nitsumɔ kpakpa,” jeee shihilɛ ni yɔɔ ogbɔjɔ kɛ anunyam. Shishitsɔɔmɔ kroko hu kɛɔ akɛ: “Eji anɔkwale akɛ aaakɛɛ akɛ gbɔmɔ ni kɛ etsui fɔɔ hiɛnyiɛmɔ nɔ lɛ lɛ kɛ oti ni sa yijiemɔ ema ehiɛ.”​—1 Timoteo 3:​1, Philips.

Osharai Kɛha Onukpai

 3, 4. Mɛni hewɔ ni esa akɛ gbɔmɔ ni bɔɔ mɔdɛŋ akɛ eeetsɔ nɔkwɛlɔ lɛ abu etsui he jogbaŋŋ lɛ?

³ Mɛɛ gbɛ nɔ gbɔmɔ ni kɛ etsui fɔɔ Kristofonyo onukpa ni eeetsɔ lɛ nɔ lɛ kɛ “oti ni sa yijiemɔ ema ehiɛ” yɛ? Ojogbaŋŋ, oti ni akɛma hiɛ akɛ abaashɛ he lɛ tsɔɔ shwee ni mli wa ni ayɔɔ akɛ abaashɛ yiŋkpɛɛ ko he. Eji anɔkwale akɛ ayɛ otii ni nɔ kwɔlɔ kɛ nɔ ni kwɔlɔɔɔ. Shi kɛ mɔ ko kɛ heshibaa bɔ mɔdɛŋ akɛ eeeshɛ nɔkwɛlɔ gbɛhe lɛ he akɛni eesumɔ ni esɔmɔ mɛi krokomɛi hewɔ lɛ, no lɛ etsuɔ esɔɔmɔ lɛ he nii kɛ jwɛŋmɔ kpakpa ni mumɔŋ jɔɔmɔi baanyɛ ajɛ mli aba. Shi ehe miihia ni ebu etsui he.​—Abɛi 4:⁠23.

⁴ Gbɔmɛi ni kɛ otii mamɔɔ amɛhiɛ lɛ ekomɛi taoɔ hiɛnyam. Mɛi krokomɛi hu taoɔ ni amɛye amɛnanemɛi adesai anɔ. Gbɛi loo hewalɛnamɔ he hiɛjoomɔ lɛ tamɔ tso shishifa ni ekpɔtɔ ni baanyɛ aha tso ni ma shi fɛfɛo lɛ aku agbee shi. Kristofonyo lɛ hu baanyɛ aŋmɛɛ ehe eha nɛkɛ oti ni akɛmaa hiɛ he kanyamɔ ni ejaaa nɛɛ. (Abɛi 16:18) Bɔfo Yohane kɛɛ akɛ: “Miŋma wolo ko mimaje asafo lɛ, shi Diotrefe mɔ ni taoɔ amɛnɔ onukpa aye [“mɔ ni taoɔ afee nɔ fɛɛ nɔ yitso,” Phillips] lɛ haaa wɔ hiɛgbɛ. No hewɔ lɛ, kɛ mina miba jiŋŋ, makai enitsumɔi ni etsuɔ lɛ, bɔ ni ewieɔ wɔhe wiemɔi fɔji lɛ, ni enɛɛmɛi tete hu faaa haaa lɛ, shi moŋ lɛ diɛŋtsɛ ehereee nyɛmimɛi lɛ, ni asaŋ mɛi ni sumɔɔ akɛ amɛaafee nakai lɛ etsiɔ amɛ gbɛ, ni eshwieɔ amɛ kɛjɛɔ asafo lɛ mli.” (3 Yohane 9, 10) Oti ni Diotrefe kɛma ehiɛ lɛ jeee Kristofoi anɔ. Hewoo kɛ mɛi krokomɛi anɔ hewalɛnamɔ kɛ hiɛjoomɔ bɛ gbɛhe ko kwraa yɛ Yesu anɔkwa sɛɛnyiɛlɔi lɛ ateŋ.​—Abɛi 21:⁠4.

 5. Mɛɛ su esa akɛ onukpai kɛtsu gbɛnaa nii ni amɛtsuɔ he nii lɛ ahe nii?

⁵ Kristofonyo nɔkwɛlɔ ni tsuɔ egbɛnaa nii ahe nii kɛ jwɛŋmɔ ni ja lɛ tiuŋ hiɛjoomɔ mli otii asɛɛ. Ebaabu nɛkɛ nitsumɔ kpakpa ni ji Kristofoi anɔkwɛmɔ nitsumɔ nɛɛ akɛ hegbɛ ni Nyɔŋmɔ kɛba lɛ ni ebaakwɛ Nyɔŋmɔ tooi lɛ anɔ, “jeee nɔnyɛɛ naa, shi moŋ yɛ suɔmɔ naa; asaŋ jeee sɛɛnamɔ ni yɔɔ hiɛgbele hewɔ, shi moŋ tsuijurɔ naa; asaŋ jeee akɛ mɛi ni yeɔ asafoi lɛ anɔ nuŋtsɔmɛi asane, shi moŋ mɛi ni toɔ okadii amɛhaa asafoku lɛ.” (1 Petro 5:​2, 3) Hɛɛ, esa akɛ nɔkwɛlɔi lɛ abu amɛhe kɛjɛ henɔwomɔ mumɔ kɛ hewalɛ ni aaatao ni akɛye mɛi krokomɔi anɔ lɛ he.

 6. Mɛni hewɔ ni esaaa akɛ onukpa ko yeɔ Nyɔŋmɔ webii lɛ anɔ nuŋtsɔmɛi asane lɛ?

⁶ Esaaa akɛ onukpa lɛ yeɔ Kristofoi krokomɛi anɔ nuŋtsɔmɛi asane, ejaakɛ amɛnaanyo nitsulɔ ji lɛ ni ejeee ‘mɔ ni yeɔ amɛhemɔkɛyeli lɛ nyɔŋ.’ (2 Korintobii 1:24) Beni bɔfoi lɛ ekomɛi tao hiɛnyam lɛ, Yesu kɛɛ akɛ: “Nyɛle akɛ maji lɛ anɔ lumɛi lɛ yeɔ amɛnɔ, ni amɛteŋ gbɔmɛi agboi lɛ hu yɛ hewalɛ yɛ amɛnɔ. Ekafee nakai yɛ nyɛteŋ; shi mɔ fɛɛ mɔ ni sumɔɔ akɛ etsɔ agbo yɛ nyɛteŋ lɛ, lɛ moŋ etsɔ nyɛsɔɔlɔ. Ni mɔ fɛɛ mɔ ni sumɔɔ akɛ etsɔ onukpa yɛ nyɛteŋ lɛ, lɛ moŋ etsɔ nyɛtsulɔ. Tamɔ bɔ ni gbɔmɔ Bi lɛ baaa ni asɔmɔ lɛ; shi eba sɔɔmɔ moŋ, ni eŋɔ esusuma lɛ eha yɛ mɛi pii akpɔmɔ hewɔ lɛ.” (Mateo 20:​20-28) Onukpa lɛ jeee Tookwɛlɔ Nukpa lɛ, shi moŋ tookwɛlɔ bibioo kɛkɛ ji lɛ. Kɛji eyeɔ tooku lɛ nɔ nuŋtsɔmɛi asane lɛ, no lɛ eejie henɔwomɔ mumɔ kpo. Ni kɛji elaka mɛi krokomɛi hu bɔni afee ni amɛye amɛbua lɛ ni eya ehiɛ yɛ otii ni ekɛmamɔ ehiɛ yɛ henɔwomɔ mli lɛ mli lɛ, no baaye awui waa titri. Abɛbua ko kɛɔ akɛ: “Yehowa miihi mɔ fɛɛ mɔ ni woɔ ehe yɛ etsui mli; kɛ ata abasa yɛ enɔ po, eyeŋ ehe!”​—Abɛi 16:⁠5.

 7, 8. (a) Mɛni hewɔ ni ehe hiaa ni Kristofoi onukpai lɛ aba amɛhe shi lɛ? (b) Okɛ onukpa ko ni baa ehe shi lɛ he nɔkwɛmɔ nɔ ko aha.

⁷ No hewɔ lɛ esa akɛ Kristofoi onukpai lɛ ‘aba amɛhe shi yɛ Nyɔŋmɔ nine ni wa lɛ shishi.’ Henɔwomɔ tsiɔ mumɔŋ hesɛɛnamɔ ni aaanyɛ aba yɛ mɔ ko naa ejaakɛ mɛi ni baa amɛhe shi lɛ lɛ pɛ amɛtsui kɛ amɛjwɛŋmɔi ja kɛha Nyɔŋmɔ suɔmɔnaa nifeemɔ. “Ejaakɛ Nyɔŋmɔ kuɔ hewolɔi anaa, shi heshibalɔi eduroɔ.” (1 Petro 5:​5, 6) Hɛɛ, Yehowa jɔɔ mɛi ni hiɛ heshibaa jwɛŋmɔ lɛ. Mɛnɛɛmɛi ateŋ ajɛɔ ni ahalaa hii ni he esa koni amɛsɔmɔ akɛ Kristofoi onukpai lɛ.

⁸ Ŋmɛnɛŋmɛnɛ beaŋ Yehowa Odasefoi lɛ ayinɔsane eyi obɔ kɛ amaniɛbɔi ni tsɔɔ heshibaa sɔɔmɔ ni mɛi ni yɔɔ Nyɔŋmɔ jamɔ su lɛ kɛhaa. Akɛ nɔkwɛmɔ nɔ lɛ, susumɔ W. J. Thorn ni he jɔ, ni be ko lɛ eji mɔ ni faa gbɛ eyashiɛɔ sanekpakpa, aloo nɔkwɛlɔ gbɛfalɔ, kɛ Betel nitsulɔ yɛ bei babaoo mli lɛ he okwɛ. Kristofonyo ko wie yɛ ehe akɛ: “Mihiɛ kpaŋ wiemɔ ko ni Nyɛminuu Thorn wie ni eye ebua mi kɛbashi ŋmɛnɛ gbi nɛɛ nɔ kɔkɔɔkɔ. Nɔ ni ekɛɛ lɛ nɛ, ‘Be fɛɛ be ni eeeba akɛ miisusu mi diɛŋtsɛ mihe waa lɛ, mikɛ mihe woɔ tsu lɛ koŋ, ni kɛ makɛɛ lɛ, mikɛɔ mihe akɛ: “Bo mulu kuli bibioo nɛɛ. Mɛni oyɔɔ ni okɛshwãa?” Mɛɛ su ni sa yijiemɔ kɛha onukpai kɛ mɛi krokomɛi fɛɛ ni amɛna enɛ ji nɛkɛ! Kaimɔ akɛ, “heshibaa kɛ Yehowa gbeyeishemɔ nyɔmɔwoo ji nii kɛ hiɛnyam kɛ wala.”​—Abɛi 22:⁠4.

Suɔmɔ Akɛ Aaasɔmɔ ni Nyɔŋmɔ Kɛha Lɛ

 9. Mɛni hewɔ ni abaanyɛ akɛɛ akɛ shwe ni ashweɔ akɛ aaasɔmɔ akɛ onukpa lɛ jɛɔ Nyɔŋmɔ ŋɔɔ kɛbaa lɛ?

⁹ Ani bɔ ni mɔ ko shweɔ akɛ eeesɔmɔ akɛ nɔkwɛlɔ lɛ jɛɔ Nyɔŋmɔ ŋɔɔ? Hɛɛ, ejaakɛ Yehowa mumɔ lɛ kɛ kanyamɔ, ekaawoo kɛ hewalɛwoo ni anaa akɛ akɛ sɔɔmɔ krɔŋŋ aaaha lɛ lɛ haa. Akɛ nɔkwɛmɔ nɔ lɛ, mɛni ji nɔ ni ba yɛ be mli ni Yesu sɛɛnyiɛlɔi ni awaa amɛ yi lɛ sɔle kɛha ekaawoo ni amɛkɛshiɛ lɛ? “He ni amɛnaa ekpe shi yɛ lɛ hoso, ni mumɔ krɔŋkrɔŋ yimɔ amɛ fɛɛ amɛmli obɔbɔ, ni amɛkɛ ekaa jaje Nyɔŋmɔ wiemɔ lɛ.” (Bɔfoi lɛ Asaji 4:​27-31) Akɛni mumɔ krɔŋkrɔŋ lɛ wo yibii ni tamɔ nɛkɛ hewɔ lɛ, ebaanyɛ etsirɛ mɔ koni ebɔ mɔdɛŋ ni eshɛ oti lɛ he.

10. (a) Mɛni ji yiŋtoo kome hewɔ ni ekolɛ Kristofonyo nuu ko ebɔŋ mɔdɛŋ akɛ eeeshɛ oti lɛ he lɛ? (b) Kɛ Nyɔŋmɔ kɛ sɔɔmɔ hegbɛ ko duro wɔ lɛ, mɛni he wɔbaanyɛ wɔna nɔmimaa waa yɛ?

¹⁰ Mɛni hewɔ ni ekolɛ Kristofonyo ni eda yɛ mumɔŋ lɛ ebɔɔɔ mɔdɛŋ ni eshɛ oti lɛ he lɛ? Ekolɛ eji mɔ ni eda yɛ mumɔŋ shi enuɔ he akɛ eshɛko. (1 Korintobii 2:​14, 15) Eji anɔkwale akɛ, esa akɛ wɔkɛ heshibaa asusu wɔhe, ni wɔhiɛ ahi wɔgbɔjɔmɔi lɛ anɔ. (Mika 6:⁠8) Yɛ najiaŋ ni wɔkɛ hewoo aaasusu wɔ diɛŋtsɛ wɔhe akɛ wɔhe esa kɛha gbɛnaa nii ko he nitsumɔ fe mɛi fɛɛ lɛ, ehi moŋ akɛ wɔɔkai akɛ “heshibalɔi moŋ yɔɔ nilee.” (Abɛi 11:⁠2) Shi esa akɛ wɔyoo hu akɛ kɛji Nyɔŋmɔ kɛ sɔɔmɔ hegbɛ ko duro wɔ lɛ, ebaaha wɔ hewalɛ ni hiaa wɔ bɔni afee ni wɔnyɛ wɔtsu he nii hu. Taakɛ Paulo kɛɛ lɛ: “Minyɛɔ nii fɛɛ mifeɔ yɛ mɔ ni wajeɔ mi ni ji Kristo lɛ mli.”​—Filipibii 4:⁠13.

11. Mɛni ji nɔ ni Kristofonyo nuu ni ebɔɔɔ mɔdɛŋ ni eeeshɛ oti lɛ he akɛni enuɔ he akɛ ehɛ nilee babaoo bɔ ni sa ni ekɛaawo ŋaa lɛ baanyɛ afee?

¹¹ Ekolɛ Kristofonyo ko ebɔŋ ehe mɔdɛŋ akɛ eeeshɛ oti lɛ he ejaakɛ esusuɔ akɛ ebɛ nilee ni fa bɔ ni sa ni eeenyɛ ekɛwo ŋaa. Ojogbaŋŋ, ekolɛ ebaanyɛ ena nilee kɛtsɔ Nyɔŋmɔ Wiemɔ lɛ ni ekɛ ekaa babaoo baakase lɛ nɔ, ni eka shi faŋŋ akɛ esa akɛ esɔle ni ebi nilee. Yakobo ŋma akɛ: “Shi kɛ nilee eshwɛ nyɛteŋ mɔ ko lɛ, ekpa Nyɔŋmɔ ni haa mɛi fɛɛ faa ni ewieee mɔ ko hiɛ lɛ fai, ni aaaŋɔha lɛ. Shi ha ni ekpa fai yɛ hemɔkɛyeli mli, ni ekaje nɔ ko nɔ ko he ŋwane; ejaakɛ ŋwanejelɔ lɛ tamɔ ŋshɔke ni kɔɔyɔɔ tswaa kɛyaa kɛbaa. Ejaakɛ nakai gbɔmɔ ko akasusu akɛ eeena nɔ ko yɛ Nuŋtsɔ lɛ [Yehowa] dɛŋ; jwɛŋmɔi enyɔnyɔtsɛ ko fiii shi yɛ egbɛi fɛɛ mli.” (Yakobo 1:​5-8) Yɛ be mli ni Nyɔŋmɔ haa Salomo sɔlemɔ ko hetoo lɛ, eha lɛ “tsui ni le nii ni yooɔ sane sɛɛ hu” ni enɛ ye ebua lɛ koni enyɛ ekpa ekpakpa kɛ efɔŋ mli yɛ be mli ni ekojoɔ lɛ. (1 Maŋtsɛmɛi 3:​9-14) Salomo sane lɛ yɛ sɔrɔto kwraa, shi kɛ wɔkɛ ekaa kase nii kɛ Nyɔŋmɔ yelikɛbuamɔ hu lɛ, hii ni atuu asafoŋ gbɛnaanii ahe nitsumɔ awo amɛdɛŋ lɛ baanyɛ amɛwo mɛi krokomɛi aŋaa yɛ jalɛ gbɛi anɔ. “Ejaakɛ Yehowa haa aleɔ nii, edaaŋ nilee kɛ sanesɛɛkɔmɔ jɛɔ.”​—Abɛi 2:⁠6.

12. Kɛji nuu ko ebɔɔɔ mɔdɛŋ ni eeeshɛ oti lɛ he yɛ yeyeeyefeemɔ hewɔ lɛ, mɛni baanyɛ aye abua lɛ?

¹² Yeyeeyefeemɔ hu baanyɛ atsi mɔ ko naa koni ekabɔ ehe mɔdɛŋ ni eshɛ oti lɛ he. Ekolɛ ebaasusu akɛ enyɛŋ etere gbɛnaa nii ni tsii ni ji onukpa ni eji lɛ. Paulo tete po kpɛlɛ nɔ akɛ: “Soro nibii ni yɔɔ sɛɛ; ni asaŋ mihaomɔ ni minaa daa kɛ asafoi lɛ fɛɛ ahe susumɔ.” (2 Korintobii 11:28) Shi bɔfo lɛ le nɔ ni sa akɛ efee yɛ be mli ni efee yeyeeye lɛ, ejaakɛ eŋma akɛ: “Nyɛkahaoa yɛ nɔ ko nɔ ko he, shi moŋ nɔ fɛɛ nɔ mli lɛ nyɛkɛ sɔlemɔ kɛ faikpamɔ kɛ shidaa atsĩa nyɛtutɔmɔi lɛ ata yɛ Nyɔŋmɔ hiɛ; ni Nyɔŋmɔ hejɔlɛ ni fe jwɛŋmɔi fɛɛ lɛ aaato nyɛtsuii kɛ nyɛjwɛŋmɔi lɛ yɛ Kristo Yesu mli!” (Filipibii 4:​6, 7) Hɛɛ, sɔlemɔ kɛ Nyɔŋmɔ mli hekɛnɔfɔɔ baanyɛ aye abua ni ejie yeyeeyefeemɔ lɛ kɛya.

13. Mɛni he mɔ ko ni he ejɔɔɔ lɛ yɛ mɔdɛŋ ni ebɔɔ koni eshɛ oti lɛ he lɛ baanyɛ asɔle yɛ?

¹³ Kɛji yeyeeyefeemɔ lɛ miiya nɔ lolo lɛ, gbɔmɔ ni he ejɔɔɔ lɛ yɛ mɔdɛŋ ni ebɔɔ koni eshɛ oti lɛ he lɛ baanyɛ asɔle tamɔ David fee lɛ: “Mawu, taomɔ mimli, ni ole mitsuiŋ; kaa mi okwɛ, ni oyoo mijwɛŋmɔi! Ni okwɛ akɛ minyiɛ gbɛ fɔŋ ko nɔ lo, ni okpala mi kɛya naanɔ gbɛ lɛ nɔ!” (Lala 139:​23-24) Bɔ fɛɛ bɔ ni wɔjwɛŋmɔŋ ‘ŋkɔmɔyeli’ kɛ ‘yeyeeyefeemɔi’ lɛ ji lɛ, Nyɔŋmɔ baanyɛ aye ebua wɔ ni wɔnyɛ naa wɔdamɔ koni wɔnyɛ wɔya wɔhiɛ yɛ mumɔŋ. (Kwɛmɔ The New International Version lɛ.) Taakɛ bɔ ni awie lɛ jogbaŋŋ yɛ lala kroko mli lɛ: “Kɛ mikɛɛ: ‘Minane miishane!’ lɛ, Yehowa, omɔbɔnalɛ lɛ hiɛ mimli. Kɛ ŋkɔmɔyeli fa babaoo yɛ mimli lɛ, omiishɛjemɔi lɛ haa misusuma mii shɛɔ ehe.”​—Lala 94:​18, 19.

Okɛ Miishɛɛ Asɔmɔ yɛ Yehowa Suɔmɔ Naa

14. Mɛni hewɔ ni esa akɛ mɔ ko ni ebɔɔɔ mɔdɛŋ ni eshɛ oti lɛ he lɛ asɔle ni ebi Nyɔŋmɔ mumɔ krɔŋkrɔŋ lɛ?

¹⁴ Kɛji Kristofonyo nuu lɛ nyɛɛɛ ashɛ oti lɛ he yɛ yeyeeyefeemɔ hewɔ, aloo enuɔ he akɛ eshɛɛɛ, aloo kanyamɔ ni enaaa hewɔ lɛ, eka shi faŋŋ akɛ eja gbɛ jogbaŋŋ akɛ eeesɔle ebi Nyɔŋmɔ mumɔ lɛ. Yesu kɛɛ akɛ: “Belɛ kɛji nyɛ ni nyɛji mɛi fɔji lɛ nyɛle bɔ ni nyɛfeɔ ni nyɛkɛ nikeenii kpakpai keɔ nyɛbii lɛ, enyiɛ nɔŋŋ nyɛ-Tsɛ ni yɔɔ ŋwɛi lɛ eŋɔŋ mumɔ krɔŋkrɔŋ ehaŋ mɛi ni biɔ lɛ lɛ?” (Luka 11:13) Akɛni toiŋjɔlɛ kɛ henɔyeli fata mumɔ lɛ yibii lɛ ahe hewɔ lɛ, mumɔ nɛɛ baanyɛ aye abua wɔ ni wɔnyɛ wɔkpee yeyeeyefeemɔ aloo henumɔi ni wɔnaa akɛ wɔshɛɛɛ lɛ anaa.​—Galatabii 5:​22, 23.

15. Mɛɛ sɔlemɔi baanyɛ aye ebua mɛi ni nɔ ko kanyaaa amɛ lɛ bɔni afee ni amɛkɛ amɛhe aha kɛha sɔɔmɔ hegbɛi?

¹⁵ Ni kanyamɔ ni wɔnaaa lɛ hu? Akɛ Kristofoi ni abaptisi amɛ lɛ, ehe miihia ni wɔsɔle wɔbi ni Nyɔŋmɔ aha wɔfee nɔ ni saa ehiɛ. David kpa fai akɛ: “Yehowa, tsɔɔmɔ mi ogbɛi lɛ, . . . Ha manyiɛ onɔkwale lɛ mli, ni otsɔɔ mi nii.” (Lala 25:​4, 5) Sɔlemɔi ni tamɔ nɛkɛ lɛ baaye abua wɔ ni wɔtsi wɔhe kɛjɛ gbɛi fɔji ahe, ni kɛji wɔbɛ kanyamɔ ni wɔkɛaabɔ mɔdɛŋ kɛshɛ oti lɛ he lɛ, no lɛ wɔbaanyɛ wɔsɔle nakai nɔŋŋ. Wɔbaanyɛ wɔsɔle wɔbi Yehowa koni eha wɔsumɔ akɛ wɔɔkpɛlɛ sɔɔmɔ hegbɛi anɔ. Yɛ anɔkwale mli lɛ, kɛji wɔsɔle wɔbi Nyɔŋmɔ mumɔ lɛ ni wɔŋmɛɛ wɔhe wɔha ekudɔmɔ lɛ, ŋwanejee ko bɛ he akɛ kɛji akɛ sɔɔmɔ hegbɛi komɛi miiha wɔ lɛ, wɔkɛ wɔhe baaha ni wɔkpɛlɛ nɔ. Ejaakɛ yɛ fɛɛ sɛɛ lɛ, gbɛ ko bɛ ni Nyɔŋmɔ tsuji aaatsɔ nɔ amɛkpoo emumɔ lɛ.​—Efesobii 4:⁠30.

16. Mɛɛ su ko kanyaa mɔ waa bɔni afee ni mɔ ko abɔ mɔdɛŋ kɛshɛ asafoŋ gbɛnaa nii ahe?

¹⁶ Akɛni wɔyɛ “Kristo jwɛŋmɔ” lɛ hewɔ lɛ, wɔnaa Nyɔŋmɔ suɔmɔnaa nifeemɔ he miishɛɛ. (1 Korintobii 2:16) Yesu na nakai su lɛ nɔŋŋ eko taakɛ lalatsɛ lɛ ni kɛɛ nɛkɛ lɛ: “Mi-Nyɔŋmɔ, eŋɔɔ minaa akɛ mafee osuɔmɔnaa nii ni omla lɛ yɛ mitsui mli.” (Lala 40:⁠9) Kristo kɛɛ: “Naa, miba ni mibafee bo, Nyɔŋmɔ, osuɔmɔnaa nii lɛ,” ni etsa nɔ kɛyashɛ sɛŋmɔtso nɔ gbele mli tɔɔ. (Hebribii 10: 9, 10) Shwe ni ashweɔ akɛ aaafee nɔ fɛɛ nɔ ni aaanyɛ yɛ Yehowa sɔɔmɔ mli lɛ kɛ kanyamɔ ni mli wa haa koni abɔ mɔdɛŋ ni ashɛ asafoŋ gbɛnaa nii ahe.

Kwɛmɔ Wɔsɛɛ Be Gbɛ

17. (a) Mɛni hewɔ ni ehe ehiaaa ni hii ni sɔmɔɔɔ amrɔ nɛɛ taakɛ amɛsɔmɔɔ tsutsu ko lɛ anijiaŋ aje wui lɛ? (b) Te nɔ ni ji hegbɛ ni nɔ kwɔ fe fɛɛ lɛ?

¹⁷ Gbɔmɔtsoŋ hewalɛnamɔ mli naagbai aloo naagbai krokomɛi ahewɔ lɛ, mɛi komɛi ni tsutsu ko lɛ amɛtsuɔ asafoŋ gbɛnaa nii ni he hiaa waa ahe nii lɛ bɛ nakai hegbɛi lɛ dɔŋŋ amrɔ nɛɛ. Esaaa akɛ mɛnɛɛmɛi anijiaŋ jeɔ wui. Wɔle akɛ hii anɔkwafoi babaoo ni amrɔ nɛɛ amɛnyɛɛɛ amɛsɔmɔ kwraa kɛmɔ shi tamɔ amɛfeɔ yɛ tsutsu ko lɛ damɔ shi shiŋŋ lolo akɛ emuuyeli mli hiɛlɔi. (Lala 25:21) Lɛlɛŋ, onukpai ni kɛ heshibaa esɔmɔ bei babaoo lɛ baanyɛ amɛya nɔ ni amɛha amɛ niiashikpamɔ lɛ he aba sɛɛnamɔ kɛtsɔ onukpai akuu lɛ ni amɛaafata he lɛ nɔ. Eyɛ mli akɛ ekolɛ gbɔlɛ loo gbɔmɔtsoŋ gbɔjɔmɔi krokomɛi baanyɛ atsi amɛnaa moŋ, shi ehe ehiaaa ni amɛŋmɛɛ gbɛhei lɛ ahe. Yɛ nakai beaŋ nɔŋŋ hu lɛ, nyɛhaa Yehowa Odasefoi lɛ ateŋ mɔ fɛɛ mɔ abua hegbɛ ni nɔ kwɔ fe fɛɛ, ni ji ‘Nyɔŋmɔ maŋtsɛyeli lɛ anunyam lɛ he ni wɔɔwie’ akɛ mɛi ni woɔ egbɛi krɔŋkrɔŋ lɛ agbojee lɛ nɔ lɛ.​—Lala 145:​10-13.

18. Kɛji ajie onukpa ko loo asafoŋ sɔɔlɔ ko kɛjɛ esɔɔmɔ gbɛhe lɛ mli lɛ, mɛni ekolɛ ehe baahia lɛ? (b) Mɛɛ su fɛfɛo ko onukpa ko ni ejie lɛ kɛjɛ onukpai egbɛhe lɛ mli lɛ jie lɛ kpo?

¹⁸ Kɛji be ko lɛ oji onukpa aloo asafoŋ sɔɔlɔ shi osɔmɔɔɔ akɛ nakai dɔŋŋ amrɔ nɛɛ lɛ, na nɔmimaa akɛ Nyɔŋmɔ jwɛŋɔ ohe lolo, ni ekolɛ eeeha bo sɔɔmɔ hegbɛi komɛi ni okpaaa gbɛ yɛ wɔsɛɛ be ko mli. (1 Petro 5:​6, 7) Kɛji ehe miihia ni ofee tsakemɔi komɛi lɛ, okɛ miishɛɛ akpɛlɛ otɔmɔi anɔ ni okɛ Nyɔŋmɔ yelikɛbuamɔ atsu amɛhe nii. Mɛi komɛi ni ajie amɛ kɛjɛ amɛ onukpai agbɛhei lɛ ebɔi sui komɛi ni jeee Kristofoi asui namɔ, ni amɛteŋ mɛi fioo ko ekpa shiɛmɔyaa aloo amɛshi anɔkwale lɛ kwraa po. Shi kwɛ bɔ ni nilee yɔɔ mli akɛ wɔɔtamɔ mɛi ni ejie mumɔ kpakpa kpo lɛ! Akɛ nɔkwɛmɔ nɔ lɛ, beni ajie onukpa ko ni kɛ afii babaoo esɔmɔ yɛ Central America lɛ kɛjɛ enukpa gbɛhe lɛ, ekɛɛ: “Edɔɔ mi waa akɛ gbɛhe ni mikɛ bei babaoo ebu lɛ akɛ nɔ ko ni jara wa waa kɛha mi lɛ eje midɛŋ. Shi mibatsu nii waa yɛ gbɛ fɛɛ gbɛ nɔ ni nyɛmimɛi lɛ baasumɔ ni amɛkɛ mi atsu nii, koni matsu nii ni minine ashɛ sɔɔmɔ hegbɛi lɛ anɔ ekoŋŋ.” Yɛ be ni sa mli lɛ, nyɛminuu nɛɛ na hegbɛ akɛ eeesɔmɔ akɛ onukpa ekoŋŋ.

19. Mɛɛ ŋaawoo ni sa akɛhaa nyɛminuu ni ekolɛ ajie lɛ kɛjɛ onukpa loo asafoŋ sɔɔlɔ gbɛhe lɛ mli lɛ?

¹⁹ Kɛji oji onukpa loo asafoŋ sɔɔlɔ ni ajie bo kɛjɛ nakai gbɛhe lɛ mli lɛ, no lɛ, ka he ojie heshibaa mumɔ kpo. Tsi ohe kɛjɛ mlifu ni okɛaawo omli ni haŋ ohe asa kɛha sɔɔmɔ hegbɛi yɛ wɔsɛɛ lɛ he. Nyɔŋmɔ mumɔ ni ooojie kpo lɛ baaha ona bulɛ. Yɛ najiaŋ ni onijiaŋ aaaje wui lɛ, susumɔ bɔ ni Yehowa jɔɔ osɔɔmɔ nitsumɔ lɛ loo oweku lɛ ehaa lɛ he. Tswaa eweku lɛ oma shi yɛ mumɔŋ, saramɔ mɛi ni he yeɔ lɛ, koni owo mɛi ni egbɔjɔ lɛ hewalɛ. Ni nɔ ni fe fɛɛ lɛ, buu osɔɔmɔ hegbɛi ni okɛjieɔ Nyɔŋmɔ yi lɛ kɛ sanekpakpa lɛ jajemɔ akɛ Yehowa Odasefoi lɛ ateŋ mɔ kome lɛ akɛ nɔ ni jara wa waa.​—Lala 145:​1, 2; Yesaia 43:​10-12.

20. Mɛɛ gbɛ nɔ onukpai akuu lɛ baanyɛ amɛye amɛbua mɔ ko ni tsutsu ko lɛ eji nɔkwɛlɔ aloo asafoŋ sɔɔlɔ lɛ yɛ?

²⁰ Esa akɛ onukpai akuu lɛ ayoo akɛ jiemɔ ni aaajie mɔ ko kɛjɛ egbɛhe lɛ mli lɛ baanyɛ ekɛ nɔnyɛɛ aba tsutsu be ko mli onukpa loo asafoŋ sɔɔlɔ lɛ nɔ, kɛji akɛ ebalɛ akɛ lɛ diɛŋtsɛ eŋmɛɛ sɔɔmɔ hegbɛ lɛ he po lɛ. Kɛji ashwieee lɛ kɛjɛɛɛ asafo lɛ mli, shi onukpai lɛ na akɛ nyɛminuu lɛ ehao yɛ jwɛŋmɔŋ lɛ, no lɛ esa akɛ amɛjɛ suɔmɔ mli amɛkɛ mumɔŋ yelikɛbuamɔ aha lɛ. (1 Tesalonikabii 5:14) Esa akɛ amɛye amɛbua lɛ ni eyoo akɛ ehe hiaa yɛ asafo lɛ mli. Ni kɛ ŋaawoo ji nɔ ni he bahia tete po lɛ, etsɛŋ tsɔ ni gbɔmɔ ni baa ehe shi ni yɔɔ hiɛsɔɔ hu lɛ kuɔ sɛɛ enaa sɔɔmɔ hegbɛi krokomɛi ekoŋŋ yɛ asafo lɛ mli.

21. Namɛi mɛ kɛha sɔɔmɔ hegbɛi, ni mɛɛ ŋaa awoɔ mɛi ni mɛɔ hegbɛi nɛɛ ŋmɛnɛ lɛ?

²¹ Kɛji oobɔ mɔdɛŋ ni oshɛ oti lɛ he lɛ, ekolɛ ebaabi ni omɛ be fioo ko kɛyashi be mli ni ooona sɔɔmɔ hegbɛi krokomɛi. Ŋmɛɛ otsui shi. Mose mɛ aahu afii 40 dani Nyɔŋmɔ kɛ lɛ tsu nii yɛ be mli ni ejieɔ Israelbii lɛ kɛjɛɔ Mizraimbii anyɔŋyeli lɛ shishi lɛ. (Bɔfoi lɛ Asaji 7:​23-36) Ni dani aaahala Yoshua akɛ Mose sɛɛyelɔ lɛ, ekɛ be babaoo sɔmɔ lɛ akɛ etsulɔ. (2 Mose 33:​11; 4 Mose 27:​15-23) David mɛ be kplaŋŋ ko dani akɛ lɛ ta Israel maŋtsɛsɛi lɛ nɔ. (2 Samuel 2:7; 5:⁠3) Ni etamɔ nɔ ni Petro kɛ Yohane Marko hu tsɔ hetsuumɔ be kplaŋŋ ko mli. (Mateo 26:​69-75; Yohane 21:​15-19; Bɔfoi lɛ Asaji 13:​13; 15:​36-41; Kolosebii 4:10) No hewɔ lɛ kɛji obɛ asafoŋ gbɛnaa nii ni ootsu he nii lɛ, ekolɛ Yehowa miiŋmɛ bo gbɛ koni asaa bo jogbaŋŋ kɛtsɔ niiashikpamɔi babaoo ni ooona lɛ nɔ. Gbɛ fɛɛ gbɛ nɔ lɛ, taomɔ Nyɔŋmɔ yelikɛbuamɔ yɛ be mli ni obɔɔ mɔdɛŋ ni oshɛ oti lɛ he lɛ, ni ekɛ sɔɔmɔ hegbɛi krokomɛi babaoo baajɔɔ bo. Yɛ nakai beaŋ nɔŋŋ lɛ, tsu nii waa kɛ ekaa bɔni afee ni ohe asa kɛha asafoŋ gbɛnaa nii koni ojie su ni David na lɛ hu eko kpo, mɔ ni kɛɛ nɛkɛ lɛ: “Minaabu aaagba Yehowa yijiemɔ, ni heloo fɛɛ aaajie egbɛi krɔŋkrɔŋ lɛ yi daa kɛaatee naanɔ!”​—Lala 145:⁠21.

[Mfoniri ni yɔɔ baafa 19]

W. J. Thorn fee nɔkwɛmɔ nɔ kpakpa akɛ onukpa ni baa ehe shi