Kɛ́ Nyɔŋmɔ Maŋtsɛyeli Lɛ Ba Lɛ, Mɛni Ebaajie Kɛya?

1, 2. (a) Mɛɛ gbɛ nɔ wɔbaanyɛ wɔkɛ nibii agbɛjianɔtoo nɛɛ ato awuiyelɔ ko ni abu lɛ gbele fɔ lɛ he? (Kwɛmɔ mfoniri ni yɔɔ nikasemɔ lɛ shishijee lɛ.) (b) Kɛ́ Nyɔŋmɔ kpãtã jeŋ fɔŋ nɛɛ hiɛ lɛ, te mɛi fɛɛ ni yɔɔ ŋwɛi kɛ shikpɔŋ lɛ nɔ lɛ baanu he ahã tɛŋŋ?

FEEMƆ shihilɛ ni nyiɛ sɛɛ nɛɛ he mfoniri okwɛ. Bulɔi kɛ awuiyelɔ kpanaku ko nyiɛ ablanaa ko nɔ yɛ tsuŋwoohe ko. Be ni amɛkɛ lɛ yaa lɛ, belɛ amɛmiibolɔ akɛ, “Dead man walking!” (Eshishi ji, “Gbɔmɔ nɛɛ, egbo ni enyiɛ lɛ!”) Ani ole nɔ hewɔ ni bulɔi lɛ boɔ nakai lɛ? Eyɛ mli akɛ mɔ ni amɛkɛnyiɛ lɛ yɛ gbɔmɔtsoŋ hewalɛ kpakpa moŋ, shi abu lɛ gbele fɔ ni ayaagbe lɛ. No hewɔ lɛ, ehiɛ kã moŋ nɛ, shi etamɔ gbonyo pɛpɛɛpɛ.a

² Jeŋ ni wɔyɔɔ mli ŋmɛnɛ lɛ tamɔ nakai awuiyelɔ lɛ ni ayaagbe lɛ lɛ. Nyɔŋmɔ ebu jeŋ fɔŋ nɛɛ fɔ jeeŋmɔ. Biblia lɛ kɛɔ akɛ: “Je lɛ . . . miiho kɛmiiya.” (1 Yoh. 2:17) Yehowa ewie akɛ ebaakpãtã je lɛ hiɛ, ni wɔle faŋŋ akɛ etsɛŋ ebaakpãtã hiɛ hu lɛɛlɛŋ. Kɛ̃lɛ, nɔ kome ni sa kadimɔ yɛ ni hãa esoroɔ jeŋ nɛɛ naagbee lɛ yɛ awuiyelɔ lɛ nɔ lɛ he. No ji akɛ, kɛ́ eshwɛ fioo ni abaagbe awuiyelɔ lɛ, mɛi komɛi baanyɛ awie akɛ ayeee esane lɛ jogbaŋŋ, ni no hewɔ lɛ, esaaa akɛ agbeɔ lɛ. Amɛbaanyɛ amɛfee aahu ni akagbe lɛ kwraa dɔŋŋ. Shi yɛ jeŋ fɔŋ nɛɛ gbɛfaŋ lɛ, mɔ ni kojo sane lɛ ji Jeŋ Muu Fɛɛ Nɔyelɔ lɛ, ni eyeɔ jalɛsane be fɛɛ be. (5 Mose 32:4) No hewɔ lɛ, mɔ ko mɔ ko nyɛŋ akɛɛ akɛ kulɛ esaaa akɛ ebuɔ je lɛ fɔ loo ekpɛɔ eyiŋ akɛ ebaakpãtã hiɛ. Kɛ́ Yehowa jie jeŋ fɔŋ nɛɛ kɛje jɛmɛ lɛ, mɛi fɛɛ ni yɔɔ ŋwɛi kɛ shikpɔŋ lɛ nɔ lɛ ahe baajɔ amɛ waa diɛŋtsɛ, ni amɛbaajɛ amɛtsuiŋ amɛwie akɛ, eja gbɛ akɛ Nyɔŋmɔ kpãtã je nɛɛ hiɛ.

 3. Mɛɛ nibii fɔji ejwɛ ní baaya kɛji Nyɔŋmɔ Maŋtsɛyeli lɛ ba lɛ ahe wɔbaasusu yɛ nikasemɔ nɛɛ mli?

³ Shi kɛ́ “je lɛ” ho etee lɛ, mɛni kɛ mɛni baanyiɛ sɛɛ kɛya? Nibii ni baanyiɛ sɛɛ kɛya lɛ babaoo yɛ ni ŋmɛnɛ lɛ, ebatsɔ wɔshihilɛ lɛ fã. Shi ya ni amɛbaaya lɛ jeee dɔlɛ sane kɛhã wɔ. Moŋ lɛ, eji sane kpakpa. Yɛ anɔkwale mli lɛ, kɛ́ wɔtee wɔyaashiɛ “Maŋtsɛyeli lɛ he sane kpakpa lɛ” wɔhã mɛi lɛ, wɔkɛɔ amɛ akɛ abaajie nibii nɛɛ kɛya. (Mat. 24:14) Yɛ nikasemɔ nɛɛ mli lɛ, wɔbaasusu nibii gbohii ejwɛ komɛi ni baaya kɛji Nyɔŋmɔ Maŋtsɛyeli lɛ ba lɛ ahe. Nomɛi ji: mɛi fɔji, gbɛjianɔtoi gbohii, nifeemɔi fɔji, kɛ shihilɛi gbohii. Wɔbaakɔlɔ amɛ ekomekome, ni wɔkwɛ (1) bɔ ni amɛnáa wɔshihilɛ nɔ hewalɛ amrɔ nɛɛ, (2) nɔ ni Yehowa baafee yɛ amɛhe, kɛ (3) nɔ ni ekɛbaaye amɛnajiaŋ.

 4. Mɛɛ gbɛ nɔ gbɔmɛi fɔji náa wɔshihilɛ nɔ hewalɛ ŋmɛnɛ?

⁴ Mɛɛ gbɛ nɔ mɛi fɔji náa wɔshihilɛ nɔ hewalɛ ŋmɛnɛ? Yehowa kɛ emumɔ lɛ tsirɛ bɔfo Paulo ni eŋma akɛ, yɛ “naagbee gbii lɛ amli lɛ, bei krɛdɛɛ ní jaraa baaba,” kɛkɛ ni ekɛfata he akɛ: “Gbɔmɛi fɔji kɛ shishiulɔi baawo wu yɛ efɔŋ mli.” (2 Tim. 3:1-5, 13) Ani gbalɛ wiemɔi nɛɛ eba mli? Hɛɛ eba mli, ni wɔbaanyɛ wɔye enɛ he odase. Wɔteŋ mɛi pii egbee mɛi fɔji tamɔ mɛi ni feɔ mɛi niseniianii, mɛi ni buɔ amɛhe akɛ amɛhi fe mɛi ni hiɛ hewolonɔ su kroko, kɛ awuiyelɔi ni hiɛ yɔɔ laŋlaŋ adɛŋ pɛŋ. Mɛi komɛi kɛ nifɔjianii ni amɛfeɔ lɛ eteee, shi mɛi komɛi hu feɔ yɛ ŋaa mli. Kɛji akɛ wɔ diɛŋtsɛ wɔyagbeko mɛi fɔji adɛŋ po lɛ, nibii fɔji ni amɛfeɔ lɛ saa wɔhe yɛ gbɛ ko nɔ kɛ̃. Kɛ́ wɔnu loo wɔna yitsoŋwalɛ nibii ni amɛfeɔ lɛ, egbaa wɔnaa waa. Niseniianii ni amɛfeɔ gbekɛbii, mɛi ni egbɔlɔ, kɛ mɛi krokomɛi ni bɛ hewalɛ ni amɛkɛbaafã amɛhe lɛ, haoɔ wɔ naakpa. Gbɔmɛi fɔji feɔ amɛnii tamɔ kooloi awuiyelɔi, loo daimonioi po. (Yak. 3:15) Miishɛɛ sane ji akɛ, Yehowa Wiemɔ lɛ hãa wɔ hiɛnɔkamɔ.

 5. (a) Mɛɛ hegbɛ Yehowa ehã mɛi fɔji? (b) Mɛni baaba mɛi fɔji ni tsakeee amɛtsui lɛ anɔ?

⁵ Mɛni Yehowa baafee yɛ he? Nyɔŋmɔ ebu je lɛ fɔ, shi ebuko gbɔmɛi fɔji ni yɔɔ mli lɛ fɔ. Ehã amɛ be koni amɛtsake amɛtsui. (Yes. 55:7) Shi kɛ́ kɛyashi amanehulu kpeteŋkpele lɛ baaje shishi lɛ amɛtsakeko amɛtsui ni amɛkã he amɛmiifi jeŋ fɔŋ nɛɛ sɛɛ lolo lɛ, mɛni ebaafee amɛ? Yehowa ewo shi akɛ ebaabule amɛ shishi kɛje shikpɔŋ lɛ nɔ. (Kanemɔ Lala 37:10.) Ekolɛ mɛi fɔji lɛ baasusu akɛ amɛbaaye amɛhe, ejaakɛ amɛteŋ mɛi pii nyɛɔ amɛfeɔ nibii fɔji kɛteɔ ni anaaa amɛ ni abaagbala amɛ toi. (Hiob 21:7, 9) Shi Biblia lɛ kɛɔ wɔ akɛ: “[Nyɔŋmɔ hiŋmɛii] jwere gbɔmɔ gbɛi anɔ, ni enaa enajifaamɔi fɛɛ. Duŋ bɛ, ni asaŋ gbele hɔɔŋ ko bɛ, he ni mɛi ni tsuɔ nishaianii lɛ aaatee amɛhe yɛ.” (Hiob 34:21, 22) Yehowa naa nɔ fɛɛ nɔ, ni mɔ ko mɔ ko nyɛɛɛ alu lɛ. No hewɔ lɛ, nɛgbɛ po amɛbaatee yɛ ni enaŋ amɛ? Yɛ Harmagedon ta lɛ sɛɛ lɛ, kɛ́ wɔkwɛ hei ni no mli lɛ mɛi fɔji lɛ yɔɔ lɛ, wɔnaŋ amɛ. Yehowa baajie amɛ kɛje shikpɔŋ lɛ nɔ kɛya naanɔ!​—Lala 37:12-15.

 6. Kɛ́ ajie mɛi fɔji lɛ, namɛi baashwɛ yɛ shikpɔŋ lɛ nɔ? Ni mɛni hewɔ enɛ ji sane kpakpa lɛ?

⁶ Kɛ́ ajie mɛi fɔji lɛ, namɛi baashwɛ yɛ shikpɔŋ lɛ nɔ? Yehowa ewo shi akɛ: “Mɛi ni he jɔ lɛ, shikpɔŋ lɛ aaatsɔ amɛnɔ, ni amɛmii aaashɛ amɛhe yɛ hejɔlɛ babaoo mli.” Sɛɛ mli lɛ, awie yɛ nakai lala lɛ nɔŋŋ mli akɛ: “Jalɔi lɛ, shikpɔŋ lɛ aaatsɔ amɛnɔ ni amɛaahi nɔ daa.” (Lala 37:11, 29) Namɛi ji “mɛi ni he jɔ lɛ,” ni namɛi ji “jalɔi lɛ”? Mɛi ni he jɔ lɛ ji mɛi ni baa amɛhe shi ni amɛkpɛlɛɔ koni Yehowa atsɔɔ amɛ nii ni etsɔɔ amɛ gbɛ. Ni jalɔi lɛ ji mɛi ni yɔɔ he miishɛɛ akɛ amɛbaafee nɔ ni ja yɛ Yehowa Nyɔŋmɔ hiɛ. Ŋmɛnɛ lɛ, jalɔi ahe esɛ̃ yɛ je lɛ mli. Shi yɛ jeŋ hee lɛ mli lɛ, mɛi ni he jɔ kɛ jalɔi pɛ baahi shikpɔŋ lɛ nɔ; mɔ fɔŋ kome nɛkɛ po futuŋ amɛ. Enɛ baahã shikpɔŋ lɛ nɔ shihilɛ aŋɔɔ diɛŋtsɛ!

 7. Mɛɛ gbɛ nɔ gbɛjianɔtoi fɔji náa wɔshihilɛ nɔ hewalɛ ŋmɛnɛ?

⁷ Mɛɛ gbɛ nɔ gbɛjianɔtoi fɔji náa wɔshihilɛ nɔ hewalɛ ŋmɛnɛ? Nibii gbohii ni yaa nɔ yɛ je lɛ mli ŋmɛnɛ lɛ babaoo yɛ ni jeee aŋkroaŋkroi ejɛ, shi moŋ ejɛ gbɛjianɔtoi gbohii srɔtoi. Akɛ nɔkwɛmɔnɔ lɛ, susumɔ nɔ ni jamɔŋ gbɛjianɔtoi srɔtoi lɛ feɔ lɛ he okwɛ. Amɛhãaa amɛmlibii akpekpei abɔ lɛ ale mɔ tuuntu ni Nyɔŋmɔ ji, ni nibii ni amɛtsɔɔ amɛ yɛ adesai kɛ shikpɔŋ lɛ he lɛ jeee anɔkwale. Amɛkɛɔ mɛi akɛ Biblia lɛ be eho, ni amɛtsɔɔ amale tsɔɔmɔi krokomɛi hu. Ni maŋ nɔyelii srɔtoi lɛ hu? Tai ni awuɔ yɛ je lɛ mli ŋmɛnɛ, majimaji ateŋ nɔ jio, wekui ateŋ nɔ jio lɛ, babaoo jɛ nɔyelii nɛɛ ekomɛi anifeemɔi. Kɛfata he lɛ, nɔyelii nɛɛ pii etsɔ juu kɛ fɔ̃ kɛ hiɛiaŋkwɛmɔ nɔ amɛná nii kpɔtɔɔ, ni amɛhãa ohiafoi kɛ mɛi ni bɛ bualɔ ko lɛ anii feɔ mɔbɔ. Nitsumɔhei babaoo hu yɛ ni amimyeli hewɔ lɛ, amɛwo maŋ lɛ mli fɛɛ muji, ni amɛkpãtã adebɔɔ nibii pii ahiɛ. Amɛshishiuɔ mɛi, ni amɛtsɔ enɛ nɔ amɛkpala ohiafoi akpekpei abɔ adɛŋ nɔ fɛɛ nɔ koni amɛkɛhã mɛi fioo komɛi atsɔmɔ niiatsɛmɛi. Eyɛ faŋŋ akɛ, gbɛjianɔtoi gbohii lɛ hu fata he ni mɛi naa nɔ yɛ je lɛ mli ŋmɛnɛ lɛ.

 8. Mɛni Biblia lɛ kɛɔ akɛ ebaaba gbɛjianɔtoi ni yɛ adesai ahiɛ lɛ, etamɔ nɔ ni amɛbaahi shi daa lɛ anɔ?

⁸ Mɛni Yehowa baafee yɛ he? Maŋkwramɔŋ gbɛjianɔtoi lɛ baatutua ashawo lɛ, ni ji Babilon Kpeteŋkpele lɛ, loo amale jamɔi fɛɛ ni yɔɔ je lɛ mli lɛ. Enɛ ji nɔ ni baatsɔɔ akɛ amanehulu kpeteŋkpele lɛ eje shishi. (Kpoj. 17:1, 2, 16; 18:1-4) Amɛbaakpãtã jamɔŋ gbɛjianɔtoi nɛɛ ahiɛ kwraa. Ni gbɛjianɔtoi gbohii krokomɛi lɛ hu? Biblia lɛ kɛ amɛ toɔ gɔji kɛ ŋshɔkpɔi ahe, ejaakɛ yɛ adesai ahiɛ lɛ, etamɔ nɔ ni amɛbaahi shi kɛya naanɔ. (Kanemɔ Kpojiemɔ 6:14.) Shi Nyɔŋmɔ Wiemɔ lɛ egba akɛ, Nyɔŋmɔ baakpãtã nɔyelii lɛ, gbɛjianɔtoi fɛɛ ni amɛkɛtsuɔ nii lɛ, kɛ mɛi fɛɛ ni fiɔ amɛsɛɛ lɛ ahiɛ. Enɛ ji nɔ ni kɛ amanehulu kpeteŋkpele lɛ baaba naagbee. (Yer. 25:31-33) No sɛɛ lɛ, gbɛjianɔtoo fɔŋ ko gbɛjianɔtoo fɔŋ ko ehiŋ shikpɔŋ lɛ nɔ dɔŋŋ!

 9. Mɛni hewɔ wɔyɔɔ nɔmimaa akɛ abaato shikpɔŋ hee lɛ he gbɛjianɔ jogbaŋŋ lɛ?

⁹ Mɛni Nyɔŋmɔ kɛbaaye gbɛjianɔtoi fɔji lɛ anajiaŋ? Yɛ Harmagedon ta lɛ sɛɛ lɛ, ani gbɛjianɔtoo ko baahi shikpɔŋ lɛ nɔ? Biblia lɛ hãa hetoo akɛ: “Yɛ eshiwoo lɛ naa lɛ, wɔmiimɛ ŋwɛi hee kɛ shikpɔŋ hee, ni nomɛi amli jalɛ baahi.” (2 Pet. 3:13) Ŋwɛi momo lɛ kɛ shikpɔŋ momo lɛ ji nɔyelii gbohii kɛ mɛi fɔji ni fiɔ amɛsɛɛ lɛ. Kɛ́ ajie amɛ kɛje jɛmɛ lɛ, mɛni akɛbaaye amɛnajiaŋ? Akɛ “ŋwɛi hee kɛ shikpɔŋ hee” baaye amɛnajiaŋ. Ni tsɔɔ akɛ, akɛ nɔyeli hee kɛ eshishi bii baaye amɛnajiaŋ. Nɔyeli hee nɛɛ ji Nyɔŋmɔ Maŋtsɛyeli lɛ, ni Yesu Kristo ji enɔ maŋtsɛ. Maŋtsɛyeli nɛɛ baajie Yehowa, ni ji Nyɔŋmɔ ni toɔ enɔ fɛɛ nɔ he gbɛjianɔ jogbaŋŋ lɛ, sui akpo kɛmɔ shi. (1 Kor. 14:33) No hewɔ lɛ, abaato “shikpɔŋ hee” lɛ, ni ji mɛi fɛɛ ni baahi Maŋtsɛyeli lɛ shishi lɛ, ahe gbɛjianɔ jogbaŋŋ. Abaaná gbɔmɛi kpakpai ni amɛkwɛ koni nibii aya nɔ jogbaŋŋ yɛ shikpɔŋ lɛ nɔ. (Lala 45:17) Kristo kɛ mɛi 144,000 ni baafata ehe kɛye nɔ lɛ baakudɔ hii nɛɛ. Kwɛ bɔ ni shihilɛ baafee yɛ nakai beiaŋ, be ni ajie gbɛjianɔtoi fɔji fɛɛ ni akɛ gbɛjianɔtoo kome ni emli bii efee ekome ni fiteŋ dɔŋŋ eye amɛnajiaŋ lɛ!

10. Mɛɛ nifeemɔi gbohii ehe shi yɛ okutso lɛ mli? Ni te nifeemɔi nɛɛ esa okɛ oweku lɛ he ehã tɛŋŋ?

¹⁰ Mɛɛ gbɛ nɔ nifeemɔi gbohii náa wɔshihilɛ nɔ hewalɛ ŋmɛnɛ? Jeŋ ni wɔyɔɔ mli ŋmɛnɛ lɛ mli eyi obɔ kɛ nifeemɔi gbohii. Jeŋba sha, anɔkwa ni ayeee, kɛ awuiyeli ehe shi yɛ he fɛɛ he. Nibii ni mɛi kɛjieɔ amɛhiɛtserɛ ŋmɛnɛ lɛ hãa efeɔ tamɔ nɔ ni tɔmɔ ko kwraa bɛ nifeemɔi gbohii nɛɛ ahe, ni ehãa mɛi nuɔ he akɛ Yehowa mlai kɛ eshishitoo mlai lɛ yɛ kpɛŋŋ tsɔ. (Yes. 5:20) Fɔlɔi náaa lɛ mlɛo kwraa akɛ amɛbaabu amɛbii ahe kɛjɛ sui gbohii nɛɛ ahe, ni yɛ anɔkwale mli lɛ, jeee amɛ pɛ amɛwuɔ ta nɛɛ. Anɔkwa Kristofoi fɛɛ miifee nɔ fɛɛ nɔ ni amɛbaanyɛ koni nifeemɔi gbohii ni ehe shi yɛ je lɛ mli lɛ akahã amɛku amɛhiɛ amɛshwie Yehowa gbɛtsɔɔmɔi anɔ ni no fite wekukpaa ni yɔɔ amɛ kɛ lɛ teŋ lɛ.

11. Mɛni wɔkaseɔ yɛ Sodom kɛ Gomora hiɛ ni Yehowa kpãtã lɛ mli?

¹¹ Mɛni Yehowa baafee yɛ nifeemɔi gbohii ahe? Susumɔ nɔ ni Yehowa fee be ni efɔŋfeemɔ he shi yɛ Sodom kɛ Gomora lɛ he okwɛ. (Kanemɔ 2 Petro 2:6-8.) Lot fee nɔ ni ja, ni kɛ̃lɛ, lɛ kɛ eweku lɛ hao babaoo yɛ nibii fɔji fɛɛ ni mɛi ni ebɔle amɛ lɛ feɔ lɛ ahewɔ. Yehowa kpãtã mɛi ni yɔɔ nakai kpokpaa lɛ nɔ lɛ ahiɛ yɛ amɛnifeemɔi gbohii lɛ ahewɔ, “ni ekɛfee nibii ni baaba lɛ ahe nɔkwɛmɔnɔ ehã mɛi ni ebuuu Nyɔŋmɔ lɛ.” Bɔ ni Yehowa kpãtã nakai maji lɛ ahiɛ, ni ehã nibii gbohii fɛɛ ni amɛfeɔ lɛ asɛɛ fo lɛ, nakai nɔŋŋ ebaakpãtã shihilɛ gbɛjianɔtoo ni yɔɔ amrɔ nɛɛ hu hiɛ, ni ehã nifeemɔi gbohii ni yaa nɔ ŋmɛnɛ lɛ fɛɛ asɛɛ afo.

12. Mɛɛ nitsumɔi obaasumɔ ni otsu kɛ́ ajie shihilɛ gbɛjianɔtoo ni yɔɔ amrɔ nɛɛ kɛje jɛmɛ lɛ?

¹² Mɛni baaye nifeemɔi fɔji anajiaŋ? Yɛ Paradeiso lɛ mli lɛ, wɔbaaná nitsumɔi babaoo ni yɔɔ miishɛɛ wɔtsu. Kwɛ miishɛɛ ni wɔbaaná be ni wɔsaa shikpɔŋ lɛ nɔ fɛfɛo ni wɔmamɔɔ tsũi wɔhãa wɔsuɔlɔi kɛ wɔ diɛŋtsɛ wɔhe lɛ! Aloo susumɔ miishɛɛ ni wɔbaaná be ni wɔhereɔ mɛi akpekpei abɔ ni abaatee amɛ shi lɛ atuu ni wɔtsɔɔ amɛ Yehowa kɛ nibii fɛɛ ni efee ehã adesai lɛ ahe nii lɛ he okwɛ! (Yes. 65:21, 22; Bɔf. 24:15) Wɔbaaná nibii pii ni yɔɔ miishɛɛ wɔtsu nakai beiaŋ, ni nɔ fɛɛ nɔ ni wɔbaatsu lɛ kɛ yijiemɔ baahã Yehowa!

13. Mɛni ejɛ atua ni Satan, Adam, kɛ Hawa tse lɛ mli kɛba?

¹³ Mɛɛ gbɛ nɔ shihilɛi fɔji náa wɔshihilɛ nɔ hewalɛ ŋmɛnɛ? Gbɔmɛi fɔji, gbɛjianɔtoi gbohii, kɛ nifeemɔi gbohii ehã jeŋ nɛɛ shihilɛ efite kwraa. Wɔteŋ namɔ baanyɛ akɛɛ akɛ tawuu, ohia, kɛ hiɛiaŋkwɛmɔ esako ehe yɛ gbɛ ko kwraa nɔ? Ni hela kɛ gbele hu? Nibii nɛɛ saa wɔ fɛɛ wɔhe. Nɔ ni eyatsɛ enɛɛmɛi fɛɛ kɛba ji atua ni mɛi fɔji etɛ komɛi tse lɛ. Amɛji Satan, Adam, kɛ Hawa. Atua ni amɛtse lɛ kɛ nibii gbohii ni ejɛ mli kɛba lɛ esa adesai fɛɛ ahe.

14. Mɛni Yehowa baafee yɛ shihilɛi gbohii ahe? Okɛ enɛ he nɔkwɛmɔnɔ ahã.

¹⁴ Mɛni Yehowa baafee yɛ shihilɛi gbohii ahe? Hã wɔsusu enyɔoo ko he wɔkwɛa. Tawuu. Yehowa ewo shi akɛ ebaahã tai fɛɛ asɛɛ afo kɛya naanɔ. (Kanemɔ Lala 46:9, 10.) Hela. Ebaahã helai fɛɛ alaaje yɛ je lɛ mli. (Yes. 33:24) Gbele. Yehowa baami gbele kɛya naanɔ! (Yes. 25:8) Ohia. Ebaahã ohia sɛɛ afo. (Lala 72:12-16) Hɛɛ, Yehowa baajie shihilɛi gbohii fɛɛ ni hãaa wɔhe ajɔ wɔ kwraa yɛ je lɛ mli ŋmɛnɛ lɛ kɛya. Ehãŋ Satan kɛ edaimonioi lɛ po aná wɔnɔ hewalɛ dɔŋŋ.​—Efe. 2:2.

15. Yɛ Harmagedon ta lɛ sɛɛ lɛ, mɛɛ nibii ehiŋ shi dɔŋŋ?

¹⁵ Feemɔ bɔ ni jeŋ shihilɛ baaŋɔɔ ahã be ni tawuu, hela, kɛ gbele bɛ dɔŋŋ lɛ he mfoniri okwɛ. Bo lɛ susumɔ he okwɛ: Anáŋ asraafoi akui, tawuu nibii, loo hei ni akɛkaiɔ mɛi ni egboi yɛ ta mli. Datrɛfoi, nɛɛsifoi, kɛ mɛi ni kpɛɔ gbonyo adekai náŋ nɔ ko amɛtsu dɔŋŋ, ni akɛ health insurance hu tsuŋ nii dɔŋŋ. Helatsamɔhei, mɔtsirii, hei ni asaa gbohii yɛ, kɛ gɔɔ hu ehiŋ jɛmɛ! Ni akɛni awuiyeli bɛ dɔŋŋ hewɔ lɛ, polisifoi, kɛ alaam srɔtoi fɛɛ ahe ebahiaŋ wɔ dɔŋŋ. Ekolɛ wɔkɛ kladowai kɛ samfei po tsuŋ nii dɔŋŋ! Nibii gbohii fɛɛ ni hãa wɔtsui yeɔ ni wɔhaoɔ lɛ fɛɛ kwa sɛɛ baafo.

16, 17. (a) Te mɛi ni baafo Harmagedon lɛ baanu he amɛhã tɛŋŋ? Okɛ enɛ he nɔkwɛmɔnɔ ahã. (b) Mɛni kɛ́ ofee lɛ obaanyɛ oná nɔmimaa akɛ obaahi shi be ni jeŋ fɔŋ nɛɛ hoɔ kɛyaa lɛ?

¹⁶ Te je lɛŋ baafee tɛŋŋ be ni shihilɛi gbohii ni yɔɔ amrɔ nɛɛ bɛ dɔŋŋ? Wɔjwɛŋmɔ nyɛŋ akpele bɔ ni ebaaji ehã lɛ he. Wɔhi jeŋ fɔŋ nɛɛ mli afii babaoo, no hewɔ lɛ, etamɔ nɔ ni wɔjwɛŋmɔ eyaaa shihilɛi gbohii ni yɔɔ mli lɛ anɔ dɔŋŋ. Wɔtamɔ mɛi ni shĩa yɔɔ oketekei adaamɔhe ko loo bɔɔla ko he. Eshɛɔ he ko ni oketekei lɛ agbɛɛmɔ lɛ loo bɔɔla lɛ fũ lɛ jeee amɛhe sane ko dɔŋŋ, ejaakɛ amɛle. Kɛ̃lɛ, wɔle akɛ kɛ́ Yehowa jie shihilɛi gbohii ni yɔɔ amrɔ nɛɛ kɛtee lɛ, wɔhe baajɔ wɔ waa diɛŋtsɛ!

¹⁷ Kɛ́ shihilɛi gbohii ni hãa wɔhaoɔ lɛ fɛɛ tee lɛ, te wɔbaanu he wɔhã tɛŋŋ? Lala 37:11 lɛ kɛɔ akɛ: “Amɛmii aaashɛ amɛhe yɛ hejɔlɛ babaoo mli.” Wiemɔi nɛɛ taa wɔtsuiŋ waa, aloo jeee nakai? Yehowa miisumɔ ni wɔná hejɔlɛ babaoo. No hewɔ lɛ, feemɔ bɔ fɛɛ bɔ ni obaanyɛ ni oya nɔ okpɛtɛ Yehowa Nyɔŋmɔ kɛ egbɛjianɔtoo lɛ he yɛ naagbee gbii ni jaraa nɛɛ amli! Jwɛŋmɔ ohiɛnɔkamɔ lɛ he ni ohã otsui ahi he. Buu lɛ akɛ nɔ ko ni jara wa waa. Feemɔ nibii kpakpai ni Yehowa kɛbaaba lɛ ahe mfoniri yɛ ojwɛŋmɔ mli, ni okɛ mɛi krokomɛi agba he sane. (1 Tim. 4:15, 16; 1 Pet. 3:15) Kɛ́ ofee nakai lɛ, obaanyɛ oná nɔmimaa akɛ, kɛ́ jeŋ fɔŋ nɛɛ ho etee lɛ, obaahi shi kɛya naanɔ yɛ miishɛɛ babaoo mli!